Batumelebi

“გარკვეული საკითხები უკეთესად დაზუსტდა… დღეს მოქმედი კანონი მკაფიოდ არეგულირებს ინსპექტორის რეაგირების მანდატს,” – უთხრა მოსამართლეებს თამარ ქალდანმა, პერსონალურ მონაცემთა დაცვის ინსპექტორმა. საკონსტიტუციო სასამართლო განაგრძობს ფარულ მოსმენებზე პოზიციების მოსმენას.

პერსონალურ მონაცემთა დაცვის ინსპექტორმა თავის გამოსვლაში ყურადღება გაამახვილა იმაზე, რომ ინსპექტორის აპარატი საზედამხედველო ორგანოა. ამ არგუმენტით თამარ ქალდანი ამართლებს პარლამენტის გადაწყვეტილებას, რომლის მიხედვითაც ინსპექტორს ე.წ. გასაღები აღარ აქვს, ანუ მისი თანხმობა აღარ სჭირდება სუს-ს ფარული მოსმენის დასაწყებად.

“შესაძლებელია, თანხმობის გაცემა ვინმეს აღექვა ისე, რომ ჩვენც გამოძიების ჩამტარებლები ვართ და არა მაკონტროლებლები. თუ ფარულ საგამოძიებო მოქმედებას ასრულებს საგამოძიებო ორგანო, მან უნდა აიღოს სრულად პასუხისმგებლობა, ხოლო ინსპექტორი თუკი პრობლემას დაინახავს, შეუძლია მოითხოვოს ამ პროცესის შეჩერება,” – აღნიშნა თამარ ქალდანმა.

ნათქვამის საილუსტრაციოდ ინსპექტორმა ციფრებიც დაასახელა: გასულ წელს, ანუ “გასაღების” ჩამორთმევამდე, ინსპექტორს 47 შემთხვევაში არ გაუცია მოსმენაზე თანხმობა, მიმდინარე წელს კი, მხოლოდ 8-ჯერ მოუთხოვია ინსპექტორს უკანონოდ მიჩნეული მოსმენის შეჩერება.

თამარ ქალდანმა კონკრეტული დარღვევის აღმოჩენის მაგალითიც მოიყვანა, სადაც ინსპექტორმა დაადგინა, რომ პროკურატურის განჩინების მხარისთვის წარდგენის გარეშე შესრულდა ფარული საგამოძიებო მოქმედება, ასევე დაირღვა განჩინებაში მითითებული ვადები.

“ეს ხომ არ ადასტურებს იმას, რომ როცა თქვენ ინსპექტირების ფარგლებში, პოსტფაქტუმ ამოწმებთ კონკრეტულ შემთხვევებს, ეს არაა საკმარისი? შეიძლება თქვენ ნახეთ ეს დარღვევა ერთ საქმეში, მაგრამ არ იცით, რა ხდება დანარჩენ ასობით საქმეში. თქვენ კი ამბობთ, რომ ყველაფერი იდეალურადაა…” – აქ მოსამართლე მაია კოპალეიშვილს თამარ ქალდანმა გააწყვეტინა:

“მე არ მითქვამს, რომ იდეალურადაა საქმე…”

“ციფრები, რაც დაასახელეთ, ეს ჩანს… მეც მინდა უკეთესობა. იქნებ მეც დამარწმუნოთ, რომ იდეალურადაა საქმე, სხვა მოსამართლეებიც, დარბაზიც,” – დაამატა მაია კოპალეიშვილმა.

“ასპროცენტიანი დაცვის მექანიზმი არ არსებობს. ჩვენც გვინდა, რაღაც დაიხვეწოს. ვერც ერთი საზედამხედველო ორგანო ვერ უზრუნველყოფს ყველა საგამოძიებო მოქმედების კონტროლს. მაშინ გამოვა, რომ მეორე სასამართლო ვართ”, – დასძინა თამარ ქალდანმა.

კითხვები დაისვა საერთო სასამართლოს გადაწყვეტილებაზეც, როცა მოსამართლე მოსმენაზე ნებართვას გასცემს და ამის შემდეგ უგზავნიან ინსპექტორს გადაწყვეტილების მხოლოდ სარეზოლუციო ნაწილს.

“სასამართლოს აქტის გამოცემამდე თქვენ პროცესზე არ მიგიწვდებათ ხელი… დღეს წარმოგვიდგინა ერთ-ერთმა მოსარჩელემ სისხლის სამართლის საქმე, სადაც აღმოჩნდა, რომ გამომძიებელს ფარულად ჩაწერილ მასალებში რაღაც შეუცვლია…” – მიმართა ინსპექტორს მოსამართლე მაია კოპალეიშვილმა.

“ინსპექტორი არ არის სასამართლო… იყო ასეთი შემთხვევა, როცა სასამართლოს გადაწყვეტილებაში არ იყო მკაფიოდ მითითებული, ორი პირიდან ვისი მოსმენა დაუშვა სასამართლომ. ამ შემთხვევაში ჩვენ სასამართლოს დავუბრუნეთ აქტი დასაზუსტებლად,” – აღნიშნა თამარ ქალდანმა.

საკონსტიტუციო სასამართლოს პლენუმი მხარეების მოსმენას ხვალ, 8 ივლისს დაასრულებს. სასამართლომ უნდა გადაწყვიტოს, სარჩელზე არსებით განხილვას დაიწყებს, თუ ამის გარეშე დააკმაყოფილებს მოსარჩელეების მოთხოვნას და ფარული მიყურადების არსებულ მოდელს გააუქმებს.

დღეს, 7 ივლისს, აჭარის მთავრობის თავმჯდომარე ზურაბ პატარაძე აჭარის ფინანსთა და ეკონომიკის მინისტრთან რამაზ ბოლქვაძესთან ერთად  ახალი სასტუმრო კომპლექსის – „თვინ თაუერსის“ მშენებლობის გახსნას დაესწრო. მშენებლობას არაბეთის გაერთიანებულ საემიროებში მოღვაწე კომპანია “გრინ ვალეი დეველოპმენტი” ახორციელებს.

ბათუმში განსახორციელებელი პროექტი მოიცავს სასტუმრო კომპლექსს, რომლის საერთო მოცულობა 74000 მ.კვ. შეადგენს და ორ ოცდარვა და ერთ ოცსართულიან ნაგებობას ითვალისწინებს. კომპლექსში განთავსდება ერთ-ერთი ყველაზე დიდი სავაჭრო ცენტრი რეგიონში, სპორტულ გამაჯანსაღებელი და სარეკრეაციო ზონა, ზღვისპირა რესტორნები და კაფე-ბარები, შიდა და გარეავტოსადგომი.

პროექტის საერთო ინვესტიცია 30 მილიონ აშშ დოლარს შეადგენს და მშენებლობა 2021 წლის ზაფხულში დასრულდება.

„ამერიკის შეერთებულ შტატებშიც ცალ-ცალკე არსებობდა ორგანო, რომელიც ფარულ მოსმენებს ახორციელებდა და დაწესებულება, რომელიც ქვეყნის უსაფრთხოებაზეა პასუხისმგებელი. ეს ორი უწყება გაერთიანდა და ამის მიზეზი იყო ტერორიზმის წინააღმდეგ ბრძოლა,“ – ასე უპასუხა სუს-ის წარმომადგენელმა, ბექა ზეგარდელმა მოსამართლე მანანა კობახიძის შეკითხვას საერთაშორისო პრაქტიკის შესახებ. საკონსტიტუციო სასამართლოს პლენუმი განაგრძობს 326 მოსარჩელის სარჩელის განხილვაზე განმწესრიგებელ სხდომას. მოსარჩელეები მიიჩნევენ, რომ პარლამენტის მიერ ჩამოყალიბებული ახალი უწყება – ოპერატიულ-ტექნიკური სააგენტო ისევ სუს-ს ექვემდებარება და უკანონო მოსმენები გრძელდება.

„ერთია ტერორიზმი და მეორე – ადამიანის უფლებები. იქნებ ის გვითხრათ, რატომ არის აუცილებელი ეს უწყება საქართველოში სუს-ს ექვემდებარებოდეს,“ – მიმართა სუს-ის წარმომადგენელს ზაზა თავაძემ, საკონსტიტუციო სასამართლოს თავმჯდომარემ.

ბექა ზეგარდელმა ისევ საერთაშორისო პრაქტიკაზე გაამახვილა ყურადღება და თქვა, რომ უწყება, რომელიც უსაფრთხოებას იცავს, „ქვეყნის ხერხემალია“.

„იქნებ შეეშვათ ამ საერთაშორისო პრაქტიკას, – უთხრა სუს-ის წარმომადგენელს მოსამართლე გიორგი კვერენჩხილაძემ, –  ჩვენ გვაქვს საკონსტიტუციო სასამართლოს გადაწყვეტილება [იგულისხმება საკონსტიტუციო სასამართლოს 2016 წლის 14 აპრილს მიღებული გადაწყვეტილება], სადაც წერია, რომ უწყება, რომელიც ფარულ მოსმენებს ახორციელებს, არ უნდა იყოს სუს-ის დაქვემდებარებაში. პარლამენტს უნდა შეესრულებია ეს გადაწყვეტილება. გასაგებია, რომ თქვენ წარმოადგენთ სუს-ის პოზიციას, მაგრამ ჩვენ გვაინტერესებს, შინაარსობრივად ხომ არ მივიღეთ იგივე უწყება, რაც მანამდე დეპარტამენტის სახით გვქონდა?“

მოსამართლეს სუს-ის წარმომადგენელმა კითხვა დაუბრუნა: „ვთქვათ, სუს-ის დაქვემდებარებიდან ეს უწყებს შინაგან საქმეთა სამინისტროში გადასულიყო, ასე შესრულდებოდა სასამართლოს გადაწყვეტილება?… მთავარი არის არა ის, თუ ვის დაქვემდებარებაშია სააგენტო, არამედ ის, რომ რეალურად მას დამოუკიდებლად მუშაობის საკანონმდებლო გარანტიები აქვს“, – აღნიშნა ბექა ზეგარდელმა.

მოსამართლეებმა სუს-ის წარმომადგენლეს ასევე hკითხეს სუს-ის გენერალური ინსპექციის შესახებ, რომელსაც ოპერატიულ-ტექნიკური სააგენტოს ცალკეულ თანამშრომლებზე დასკვნის დადება შეუძლია. ბექა ზეგარდელის განმარტებით, მართალია, გენერალური ინსპექცია სუს-ის სტრუქტურაა, მაგრამ მის მიერ მომზადებულ დასკვნაზე საბოლოო გადაწყვეტილება ოპერატიულ-ტექნიკური სააგენტოს ხელმძღვანელმა უნდა მიიღოს.

„თუ სააგენტოს უფროსს მოკვლევის ხარისხი არ აკმაყოფილებს, შეუძლია თვითონ გამოიკვლიოს?“- იკითხა მოსამართლე მერაბ ტურავამ.

„პრაქტიკულადაც ასე ხდება. ყოფილა შემთხვევა, როცა გენერალური ინსპექციის დასკვნის შემდეგ, დეპარტამენტის უფროსს ინფორმაცია მოუკვლევია და განსხვავებული შედეგი დადებულა. გენინსპექციის დასკვნას მხოლოდ სარეკომენდაციო ხასიათი აქვს,“ – უპასუხა მოსამართლეს ბექა ზეგარდელმა.

დისკუსიაში მოსამართლე ირინე იმერლიშვილი ჩაერთო: „ოპერატიულ-ტექნიკური სააგენტოს ხელმძღვანელს აქვს რაიმე მექანიზმი, გადაამოწმოს გენერალური ინსპექციის მიერ დარღვევების დაფიქსირება რამდენად სამართლიანად მოხდა?“ კითხვას სუს-ის წარმომადგენლემა მოკლედ უპასუხა: „ორი გენერალური ინსპექცია ერთ სამსახურს ვერ ეყოლება“.

მოსამართლე მაია კოპალეიშვილმა სუს-ის წარმომადგენელს შეახსენა, რომ გენერალური ინსპექციის ხელმძღვანელის უფროსი სუს-ის უფროსია და ამ რგოლის მეშვეობით შესაძლოა სუს-მა სააგენტოზე ზეგავლენა მოახდინოს.

„მთავარია, ვინ მიიღებს გადაწყვეტილებას. გენერალურმა ინსპექციამ შესაძლოა დადოს დასკვნა, მაგრამ გადაწყვეტილება ვინმეს გათავისუფლებაზე სააგენტოს უფროსმა უნდა მიიღოს“, – აღნიშნა სუს-ის წარმომადგენელმა, ბექა ზეგარდელმა.

„ვინ და რატომ გადაწყვიტა ასეთი არქიტექტურით ყოფილიყო ეს ახალი სააგენტო წარმოდგენილი?“ – ეს შეკითხვა მოსამართლე მანანა კობახიძემ დასვა. მოსამართლეს და ყოფილ პარლამენტარს სუს-ს წარმომადგენელმა უპასუხა: „ჩვენც, რა თქმა უნდა, ჩართულები ვიყავით, მაგრამ პარლამენტს აქვს ყველაზე დიდი წილი ამ კანონპროექტის შემუშავებაში…“

საკონსტიტუციო სასამართლოს პლენუმი ამჯერად პერსონალურ მონაცემთა დაცვის ისნპექტორის პოზიციას მოისმენს.

7 ივლისიდან საქართველოს ეროვნული ბანკი ქართული ვაზის თემაზე შექმნილი საკოლექციო დანიშნულების 5 ლარის ნომინალის ვერცხლის მონეტის რეალიზაციას იწყებს.

ეროვნული ბანკის ინფორმაციით, მონეტა, რომლის გამოშვების რაოდენობა 1500 ცალია, იაპონიის ზარაფხანაში (Japan Mint) მოიჭრა. მონეტის სარეალიზაციო ფასი 60 ლარია და მისი შეძენა შესაძლებელია დღეიდან, როგორც ეროვნული ბანკის საკასო ცენტრში [მის: თბილისი, კახეთის გზატკეცილი N72], ისე ეროვნული ბანკის ვებგვერდზე განთავსებული ონლაინ მაღაზიის მეშვეობით.

„აღნიშნული მონეტის გამოშვებით, საქართველოს ეროვნული ბანკი ეხმაურება 2017 წელს საფრანგეთის ქალაქ ბორდოში დაგეგმილ ღვინის საერთაშორისო გამოფენას, სადაც საქართველო პირველი საპატიო სტუმარი და მევენახეობა – მეღვინეობისადმი მიძღვნილი ღონისძიების მთავარი მასპინძელია,“ – აცხადებს ეროვნული ბანკი.

სახელმწიფო უსაფრთხოების სამსახურის წარმომადგენელი, ბექა ზეგარდელი, საკონსტიტუციო სასამართლოს პლენუმის კითხვებს პასუხობს. სასამართლო 326 მოქალაქის სარჩელს განიხილავს, რომლებიც მიიჩნევენ, რომ სუს-ს ისევ აქვს თითოეული ჩვენგანის უკანონოდ მოსმენის უფლება და შესაძლებლობა ნებისმიერ დროს.

ბექა ზეგარდელს მაშინვე შეაწყვეტინა სიტყვა მოსამართლე მაია კოპალეიშვილმა, როცა მან ტექნიკურ-ოპერატიული სააგენტოს უფროსის დანიშვნის ახალი წესის დემოკრატიულობაზე დაიწყო ლაპარაკი. ეს სააგენტო პარლამენტის გადაწყვეტილებით 30 მარტიდან გვისმენს. ახალი უწყება ანგარიშვალდებულია სუს-ის უფროსთან, თუმცა სუს-ის წარმომადგენელი ირწმუნება, რომ ამ უწყების ხელმძღვანელს სპეციალური კომისია შეარჩევს სუს-ის უფროსის წარდგენით. კომისია შერჩეულ კანდიდატს პრემიერ-მინისტრს წარუდგენს დასანიშნად. პროცესი შეიძლება განუსაზღვრელად გაგრძელდეს, თუკი კომისია სუს-ის მიერ წარდგენილი სამი კანდიდატიდან სასურველს ვერ შეარჩევს.

“იქნებ იმაზეც გაამახვილოთ ყურადღება, ვინ შეარჩევს პარლამენტის წარმომადგენელს, ვინც ამ კომისიაში იქნება”, – მიმართა სუს-ის წარმომადგენელს მოსამართლე მაია კოპალეიშვილმა.

“მოგეხსენებათ, უმრავლესობით ხდება გადაწყვეტილების მიღება,”- თქვა ბექა ზეგარდელმა.

მოსამართლე ირინე იმერლიშვილმა იკითხა: “არის კი ეს ის ორგანო, რომელიც ამდენად უნდა იყოს დამოკიდებული პოლიტიკურ პროცესებზე?”.

სუს-ის წარმომადგენელმა კითხვაზე პასუხად თქვა, რომ ოპერატიულ-ტექნიკური სააგენტო თავისი არსით აღმასრულებელი ორგანოა. “მე ყურადღებას გავამახვილებ იმაზე, რა იყო და რა არის ახლა. კანონმდებლობის შეცვლის შემდეგ, კომისია არჩევს ამ ორგანოს უფროსს და არა სუს-ის უფროსი, როგორც აქამდე ხდებოდა. სიტუაცია არის რადიკალურად შეცვლილი,” – დასძინა ბექა ზეგარდელმა.

სუს-ის წარმომადგენელმა თავის გამოსვლაში აქცენტი გააკეთა სააგენტოს უფროსის გათავისუფლების შესაძლებლობაზე არაჯეროვანი მუშაობის დროს. იურისტის თქმით, აქაც საბოლოო გადაწყვეტილების მიღება პრემიერ-მინისტრს შეუძლია.

მოსამართლეებს კითხვები ამ ნაწილშიც გაუჩნდათ.

გიორგი კვერენჩხილაძე: “პრემიერს აქვს უფლება სუს-ის გარეშე გაათავისუფლოს, ან როცა სუს-ი მას კანდიდატს წარუდგენს, არ დანიშნოს?”

ირინე იმერლიშვილი: “სად შეიძლება პრემიერმა გადაამოწმოს, ასრულებს თუ არა სააგენტოს უფროსი უფლებამოსილებას არაჯეროვნად, თუ არა სუს-ის უფროსთან?”

“პრემიერს შეუძლია უშუალოდ დაიბაროს სააგენტოს უფროსი და გაესაუბროს,” – უპასუხა მოსამართლეს სუს-ის წარმომადგენელმა.

წინა სასამართლო პროცესზე მოსამართლე მანანა კობახიძე დაინტერესდა, როგორ დაადგენდა სუს-ის უფროსი, ასრულებდა თუ არა თავის საქმეს ჯეროვნად სააგენტოს უფროსი.

“მოუსმენს, მანანა, მოუსმენს”, – იხუმრა მოსამართლე ირინე იმერლიშვილმა.

„ომეგა ჯგუფის“ დამფუძნებელმა და ამჟამად აჭარის უმაღლესი საბჭოს დეპუტატმა „საქართველოს პატრიოტთა ალიანსიდან“, ზაზა ოქუაშვილმა, BMW X1-ის მარკის ავტომობილი აჭარის უმაღლეს საკანონმდებლო ორგანოს მიმდინარე წლის 7 ივნისს გადასცა. როგორც მაშინ ოქუაშვილმა განმარტა, ავტომობილი კონკრეტულად დეპუტატ ცოტნე ანანიძის საჩუქარი იყო.

უმაღლესი საბჭოს იმ ავტომანქანების ჩამონათვალში, რომლებზეც მიმდინარე წლის ივნისის თვეში საწვავი გაიცა, ნაჩუქარი ავტომობილი არ ფიგურირებს. სატრანსპორტო საშუალებათა მართვისა და ექსპლუატაციის განყოფილების უფროსის, პლატონ მანჯგალაძის ინფორმაციით, აღნიშნული ავტომანქანა უმაღლეს საბჭოსთვის ოფიციალურად გადაცემული არ არის: „ეს მანქანა პრაქტიკულად არ გვყავს. შესაბამისად, როცა მოხდება გადმოცემა, შემდეგ ავიყვანთ ბალანსზეც და აისახება საწვავის ხარჯშიც, ალბათ მომავალ თვეში“.

უმაღლესი საბჭოს მონაცემებით, ივნისის თვეში საწვავი არც ცოტნე ანანიძის სახელზე გაცემულა. ავტომანქანების ნუსხაში კი არც ის ავტომანქანაა [MAL 977], რომელიც ცოტნე ანანიძეს მაისის თვეში ემსახურებოდა. პლატონ მანჯგალაძის თქმით, ეს მანქანა ქირავნობით იყო აყვანილი დროებით, 20-25 დღე, ივნისის თვეში კი, ცოტნე ანანიძეს ავტომანქანა არ ემსახურებოდა.

უმაღლესი საბჭოს ავტოპარკში ახალი ავტომობილი გამოჩნდა – სახელმწიფო ნომრით: SP819CO, რომელიც ივნისში უმაღლესი საბჭოს წევრს, ვლადიმერ მგალობლიშვილს ემსახურებოდა. საბჭოს ინფორმაციით, მოხდა ავტომანქანების შეცვლა. მანქანა – სახ.ნომრით SCA 505, რომელიც ვლადიმელ მგალობლიშვილს ემსახურებოდა, გადაეცა აჭარის განათლების, კულტურისა და სპორტის სამინისტროს, რომელმაც საბჭოს გადმოსცა სხვა მანქანა – სახ.ნომრით: SP819CO. ვლადიმერ მგალობლიშვილი უმაღლესი საბჭოს წევრობამდე ამ სამინისტროში მინისტრის მოადგილე იყო.

უმაღლეს საბჭოში საგრძნობლადაა შემცირებული საწვავის ხარჯი ივნისის თვეში იმ ორ ავტომანქანაზე, რომლებიც საბჭოს თავმჯდომარეს, დავით გაბაიძეს ემსახურება [ივნისის თვეში ამ ავტომანქანებზე გახარჯულია 510,95 ლიტრი საწვავი, რაც 289 ლიტრით ნაკლებია მაისში გახარჯულ საწვავთან შედარებით]. თუმცა, საბჭოს წევრებს შორის, ვის სახელზეც საწვავი გაიცა ივნისში, თავმჯდომარე კვლავ ლიდერობს.

თავმჯდომარის შემდეგ ყველაზე მეტი საწვავი ივნისის თვეში კვლავ გახარჯული აქვთ  ვლადიმერ მგალობლიშვილს, ირაკლი ჭეიშვილს და მერაბ კარანაძეს – 400-400 ლიტრი თითოეულს. თითქმის ამდენივე საწვავი აქვთ გახარჯული: დავით ბაციკაძეს – 399,98 ლიტრი; ელგუჯა ბაგრატიონს – 399,01 ლიტრი [უმაღლეს საბჭოში საწვავის ლიმიტი თვეში 400 ლიტრია].

მიმდინარე წლის პირველ კვარტალში ყველაზე მეტი საწვავი უმაღლესი საბჭოს თავმჯდომარის შემდეგ, დეპუტატებს შორის გახარჯული ჰქონდა დავით ბაციკაძეს. „გასდიოდა მანქანას, ამიტომ გამოვიდა ამდენი,“ – უთხრა მაშინ „ბათუმელებს“ დავით ბაციკაძემ.  თუმცა, იმავე ავტომანქანამ, რომელიც დავით ბაციკაძეს ემსახურება, 399.93 ლიტრი აპრილის თვეში, 399,98 ლიტრი მაისის თვეში გახარჯა. ბაციკაძემ განაცხადა, რომ ავტომანქანა, რომელიც მას ემსახურება შეკეთდა, მაისში საწვავის ხარჯის ოდენობა კი იმით ახსნა, რომ იმყოფებოდა საქართველოს პარლამენტში:  „მიმდინარე თვის ბოლოს მოიკითხეთ და ნახეთ რამდენი იქნება ხარჯი“. „მიმდინარე თვის“, ანუ ივნისის ბოლოს კი დავით ბაციკაძის სახელზე უმაღლეს საბჭოში ზუსტად იმდენივე საწვავია გაცემული, რამდენიც მაისის თვეში [399,98 ლიტრი].

ივნისის თვეში საბჭოს წევრებს შორის ყველაზე ნაკლები საწვავი ნინო ჩხეტიას სახელზეა გამოწერილი – 205,47 ლიტრი.

გარდა იმ ავტომანქანებისა, რომლებიც დეპუტატებს პერსონალურად ემსახურება, უმაღლეს საბჭოში არის 4 მორიგე ავტომანქანა, რომლებზეც ივნისის თვეში გაცემულია 1390,11 ლიტრი საწვავი, რაც 34 ლიტრით მეტია მაისის თვესთან შედარებით.

მიმდინარე წელს ყველაზე მეტი საწვავი – 6013,48 ლიტრი – უმაღლესმა საბჭომ მაისის თვეში გახარჯა.

დღეს და ხვალ აჭარაში უმეტესად წვიმიანი ამინდი იქნება – ამბობენ გარემოს ეროვნული სააგენტოს აჭარის რეგიონული ჰიდრომეტეოროლოგიურ ობსერვატორიაში. სინოპტიკოსების ცნობით, გამოდარებას ბათუმში 9 ივლისიდან უნდა ველოდოთ.

„დღეს შენარჩუნდება ცვალებადი მოღრუბლულობა, დროგამოშვებით წვიმა, ელვა და ჭექა, იქროლებს ცვალებადი მიმართულების ქარი 10-15 მეტრი წამში. ტემპერატურა სანაპირო რაიონებში იქნება დღისით 22-27 გრადუსი, ღამით – 16-21 გრადუსი.  მთაში: ღამით 10-15 გრადუსი, დღისით – 15-20 გრადუსი. ზღვის წყლის ტემპერატურა 26 გრადუსი იქნება. ზღვაზე იქნება ღელვა სამიო-ოთხი ბალი“ – გვითხრეს ჰიდრომეტეოროლოგიურ ობსერვატორიაში.

გარემოს ეროვნული სააგენტოს გრძელვადიანი ამინდის პროგნოზის თანახმად, ორშაბათიდან, 10 ივლისიდან 13 ივლისის ჩათვლით, ბათუმში ღრუბლიანი, უმეტესად უნალექო ამინდი შენარჩუნდება, ჰაერის ტემპერატურა კი 28-31 გრადუსი იქნება.

„მთავარი პრობლემა, რაზეც პატიმრები საუბრობენ, არის ჯანმრთელობის დაცვის მომსახურება,“ – უთხრა ბათუმის ციხიდან გამოსულმა ცოტნე ანანიძემ „ბათუმელებს“. აჭარის უმაღლესი საბჭოს ადამიანის უფლებების დაცვის კომისიის თავმჯდომარის შეხვედრა პატიმრებთან რამდენიმე საათს გაგრძელდა. ცოტნე ანანიძე დაწესებულებაში სასჯელაღსრულების სამინისტროს ნებართვის საფუძველზე შევიდა.

ცოტნე ანანიძის თქმით, იგი ბათუმის ციხის მთავარ ექიმსაც შეხვდა: „მითხრა, რომ ადეკვატურ სამედიცინო მომსახურებას უწევენ პატიმრებს. ჩემი რეკომენდაცია იყო, რომ მაქსიმალურად სრულფასოვანი, დროული და ეფექტური რეაგირება მოახდინონ პატიმრების ჩივილებზე,“ – ამბობს ცოტნე ანანიძე.

ადამიანის უფლებათა დაცვის კომისიის თავმჯდომარეს კითხვები აქვს სასჯელაღსრულების სამინისტროსთან. პატიმრებმა მას უთხრეს, რომ სადამსჯელო ღონისძიების გამოყენება ხშირად უსამართლოდ ხდება, მაგალითად, ტელეფონზე საუბრის შეზღუდვა. ცოტნე ანანიძე მიიჩნევს, რომ ნებისმიერი ღონისძიება, რაც პატიმარს კონკრეტულ უფლებას უზღუდავს, უნდა იყოს სამართლიანი და ამ თემაზე ის შეხვედრას სასჯელაღსრულების სამინისტროს წარმომადგენლებთან აპირებს.

ცოტნე ანანიძე საუბრობს დადებით ტენდენციებზეც: „როცა პატიმარი ვიყავი, საკნები ძალიან გადატვირთული იყო პატიმრებით. ახლა როცა შევედი ციხეში, პირველად ამან მიიქცია ჩემი ყურადღება, საერთოდ გადატვირთულობაზე საუბარი ზედმეტია. მთლიანად დავათვალიერე ციხის ინფრასტრუქტურა. უკვე მოეწყო პირადი პაემნების ოთახი. პატიმრებს შეუძლიათ დროის გარკვეულ მონაკვეთში შეხვდნენ საკუთარი ოჯახის წევრებს და მათთან განმარტოებით ერთი დღე-ღამე გაატარონ. რაც მთავარია, არც ერთი პატიმარი აღარ საუბრობს ცემასა და არაჰუმანურ დამოკიდებულებაზე“.

ადამიანის უფლებათა დაცვის კომისიის თავმჯდომარე შეხვდა იმ პატიმრებსაც, ვინც ციხიდან წერილი გამოაგზავნეს და აღნიშნეს, რომ ცოტნე ანანიძე მათი პრობლემებით არ ინტერესდება. დეპუტატის თქმით, ზოგიერთი პატიმარი სამედიცინო დაწესებულებაში იყო გადაყვანილი, რამდენიმე მათგანის შესახებ კი, სასჯელაღსრულების სამინისტროსთან ისაუბრებს.

ცოტნე ანანიძე ბათუმის სასჯელაღსრულების დაწესებულებაში დღეს 30 პატიმარს ესაუბრა.

იმის მიუხედავად, რომ ზღვაზე ოთხბალიანი შტორმია და ბანაობა აკრძალულია, ბათუმის სანაპირო ზოლში მობანავეს ბევრს ნახავთ. მაშველები მოუწოდებენ მოქალაქეებს, არ იბანაონ, ვიდრე სამაშველო კოშკებზე მაშველები თეთრ ალმებს არ გადმოკიდებენ. ბათუმის სანაპირო ზოლზე დღეს მთელი დღე წითელი ალმებია აღმართული.

ბათუმის შოთა რუსთაველის სახელმწიფო უნივერსიტეტში დასრულდა სტუდენტური თვითმმართველობის თავჯდომარის არჩევნები. თვითმმართველობის 92 წევრიდან სხდომას 82 ესწრებოდა.

სტუდენტური თვითმმართველობის თავმჯდომარედ ფინანსებისა და საბანკო საქმის სპეციალობის მე-3 კურსის სტუდენტი, ზურაბ პაპუნიძე აირჩიეს.

ზურაბ პაპუნიძის კანდიდატურა თავმჯდომარის პოსტზე ერთადერთი იყო. მან 69 ხმა მიიღო. კენჭისყრაში სულ 76 სტუდენტი მონაწილეობდა, 7 ბიულეტენი გაბათილდა.

თავმჯდომარის ასარჩევად ხმათა უმრავლესობა იყო საჭირო.

მაშველები ამ დრომდე ეძებენ ზღვაში გაუჩინარებულ ორ მამაკაცს. სამაშველო სამუშაოებს შტორმი ართულებს. შტორმის დროს მაშველებმა გუშინ, 5 ივლისს, 20 დამსვენებლის გადარჩენა მოახერხეს.

რატომ შედიან ადამიანები შტორმის დროს ზღვაში საბანაოდ და რა მექანიზმი აქვთ მაშველებს, რომ მათ ამ დროს ბანაობა შეუზღუდონ? – „ბათუმელელები“ მამუკა თურმანიძეს, საგანგებო სიტუაციების მართვის სააგენტოს აჭარის მთავარი სამმართველოს უფროსის მოადგილეს ესაუბრა.

„შავი ზღვის აკვატორიაში გუშინ ფიქსირდებოდა 5 ბალი შტორმი. პლაჟზე განთავსებულ კოშკურებზე ყველგან აღმართული იყო წითელი ალმები. ამის მიუხედავად, მაინც შევიდნენ ადამიანები ზღვაში საბანაოდ. მაშველებმა სიცოცხლის ფასად მოახერხეს 20 დამსვენებლის გადარჩენა, მათ შორის, ჩვენდა სამწუხაროდ 18 დამსვენებელი ალკოჰოლური თრობის ქვეშ იმყოფებოდა. არა მხოლოდ ხუთბალიან შტრომში, არამედ წყნარ ზღვაშიც კი იკრძალება ნასვამ მდგომარეობაში შესვლა,“ – გვიყვება მამუკა თურმანიძე.

სიმთვრალეს მაშველები მთავარ ფაქტორად ასახელებენ, რაც ზღვაში ბანაობის დროს კრიტიკულ სიტუაციას ქმნის. მამუკა თურმანიძე ამბობს, რომ „უდისციპლინო დამსვენებელი“ უქმნის პრობლემას, პირველ რიგში, საკუთარ სიცოცხლეს. პირადი გამოცდილების მიხედვით ამატებს მეორე მიზეზსაც – გამოუცდელობა.

„ხშირად ადამიანებს ჰგონიათ, რომ კარგად იციან ცურვა. როცა ცხადდება ამინდის პროგნოზი და დღეს უმეტესად ზუსტია ეს პროგნოზები და წითელი ალამია აღმართული, არ უნდა შეხვიდე ზღვაში. ხვალაც შტორმი იქნება ზღვაზე. ამიტომ თქვენი მედიასაშუალებითაც მინდა მოვუწოდო დამსვენებლებს, რომ არ შევიდნენ ზღვაში საბანაოდ, ვიდრე თეთრ ალმებს არ დაინახავენ,“ – ამბობს მამუკა თურმანიძე.

საგანგებო სიტუაციების მართვის სააგენტოს აჭარის მთავარი სამმართველოს უფროსის მოადგილის განმარტებით, მაშველებს საქნციების გამოყენების უფლება არ აქვთ, თუმცა „მათ შეუძლიათ გამოიძახონ საპატრულო პოლიცია, თუკი შეამჩნევენ, რომ დამსვენებელი აშკარად ნასვამია და გაფრთხილების მიუხედავად, მაინც ცდილობს ზღვაში შესვლას. ასეთი შემთვხვევა წელს არ გვქონია,“ – ამატებს მამუკა თურმანიძე.

მისივე თქმით, მიმდინარე სეზონზე ბათუმის სანაპირო ზოლში ორი უბედური შემთხვევა დაფიქსირდა. 29 ივნისს 15 წლის მოზარდი დაიხრჩო. მამუკა თურმანიძის განმარტებით, მოზარდი მდინარეში იყო საბანაოდ შესული.

წუხელ ზღვაში გაუჩინარებული 25 წლის მამაკაცის ძებნა დილის 6 საათიდან განაახლა ორმა სწრაფმავალმა კატარღამ გონიოში. მუშაობენ მყვინთავებიც. უკვე მეოთხე დღეა გრძელდება კობა ბაკურიძის ძებნა ორი სწრაფმავალი სკუტერის და ერთი კატარღის მეშვეობით.

აჭარის სამაშველო სამსახურის ინფორმაციით, წუხელ, დაახლოებით 20 საათზე, ზღვაში შევიდა 25 წლის ახალგაზრდა მამაკაცი და გაუჩინარდა. შემთხვევა მოხდა გონიოში, პოლიციის საგუშაგოს მიმდებარე პლაჟზე.

სამაშველო სამსახურში ამბობენ, რომ 5-ბალიანი შტორმის გამო ზღვაში სამუშაოები შეფერხდა. ამ უწყების ინფორმაციით, დღეს დილიდან განახლდა სამაშველო სამუშაოები – ორი კატერი და ორი მყვინთავი ეძებს გაუჩინარებულს.

სამაშველო სამსახურის ინფორმაციით, ასევე გრძელდება 44 წლის კობა ბაკურიძის ძებნაც. კობა ბაკურიძე ანბანის კოშკის მიმდებარე ტერიტორიაზე 3 ივლისს შევიდა ზღვაში საბანაოდ. ამ დრომდე მისი ძებნაც უშედეგოდ მიმდინარეობს.

სამაშველო სამსახურის ინფორმაციით, შტორმი ბათუმის სანაპიროზე დღესაც შენარჩუნდება. სანაპიროზე წითელი ალმებია აღმართული, შესაბამისად, ზღვაში შესვლა აკრძალულია.

ზურაბ გორგილაძის ქუჩაზე,  ხელოვნების მუზეუმის სკვერში შადრევანი არ მუშაობს. შადრევნის აუზში დაგუბებული წყალი მწვანეა.

ბათუმის ტურისტული ობიექტების მართვის სამსახურის უფროსის, ალექსანდრე თევზაძის თქმით, შადრევანი არ მუშაობს, რადგან ქალაქში ამჟამად შადრევნების პროფილაქტიკური სამუშაოები მიმდინარეობს. მისივე თქმით, აღნიშნული შადრევანი ხვალიდან იფუნქციონირებს.