9 ივლისს გამოქვეყნებული სამეცნიერო ბლიც-ანალიზისთანახმად, გასულ კვირას ევროპის 12 ქალაქში დაახლოებით 2300 ადამიანი გარდაიცვალა სიცხისგან გამოწვეული მიზეზებით.
კვლევა 2 ივლისამდე დასრულებულ 10 დღეს მოიცავდა, რომლის დროსაც დასავლეთ ევროპის დიდი ნაწილი უკიდურესმა სიცხემ მოიცვა, ესპანეთში ტემპერატურამ 40C გრადუსს გადააჭარბა, ხოლო საფრანგეთსა და საბერძნეთში ხანძრები გაჩნდა.
ამ პერიოდში 2300 ადამიანი დაიღუპა, აქედან 1500 შემთხვევა (65%) კლიმატის ცვლილებას უკავშირდებოდა – წერს Reuters-ი ლონდონის იმპერიული კოლეჯისა და ლონდონის ჰიგიენისა და ტროპიკული მედიცინის სკოლის მეცნიერების მიერ ჩატარებულ კვლევაზე დაყრდნობით.
„კლიმატის ცვლილებამ ტემპერატურა საგრძნობლად გაზარდა, ვიდრე ის [მის გარეშე] იქნებოდა, რაც თავის მხრივ ბევრად უფრო საშიშს ხდის მას“, – ციტირებს „როიტერსი“ ლონდონის იმპერიული კოლეჯის მკვლევარს, დოქტორ ბენ კლარკს.
კვლევამ 12 ქალაქი მოიცვა, მათ შორის: ბარსელონა, მადრიდი, ლონდონი და მილანი. მილანი ამ მხრივ ყველაზე მეტად დაზარალდა, სადაც სიცხით გამოწვეული 499 სიკვდილიდან 317 კლიმატის ცვლილებას მიეწერება, შემდეგ მოდის პარიზი და ბარსელონა.
ლონდონში სიცხით გამოწვეული 273 სიკვდილი დაფიქსირდა, რომელთაგან 171 შემთხვევა მკვლევრებმა კლიმატზე ადამიანის გავლენას მიაწერეს.
კვლევაში წერია, რომ გარდაცვალების 88%-ს 65 წლის და უფროსი ასაკის ადამიანები შეადგენდნენ, რაც აჩვენებს, რომ სითბური ტალღების დროს ნაადრევი სიკვდილის ყველაზე მაღალი რისკის ქვეშ არიან ჯანმრთელობის ქრონიკული პრობლემების მქონე ადამიანები.
გასული თვე იყო პლანეტის ისტორიაში მესამე ყველაზე ცხელი ივნისი, 2024 და 2023 წლების ანალოგიური თვეების შემდეგ – განაცხადა ევროკავშირის კოპერნიკის კლიმატის ცვლილების სამსახურმა ოთხშაბათს გამოქვეყნებულ ყოველთვიურ ბიულეტენში.
ჯაზფესტივალის მოახლოებასთან ერთად, თიბისი კონცეპტმა მომხმარებლებს განსაკუთრებული შეთავაზებები, სწორედ ბათუმში მოუმზადა.
შეთავაზებები, ტრადიციულად, მრავალფეროვანია და ყველა იმ კატეგორიას აერთიანებს, რომელიც ბათუმში სტუმრობისას დაგჭირდებათ.
სასტუმროები:
Rooms Batumi
ჯაზ ფესტივალისთვის, თიბისი კონცეპტმა და Visa-მ სასტუმროში- Rooms Batumi, 31 ივლისის ჩათვლით, 20%-იანი ფასდაკლება მოგიმზადათ. შეთავაზება ვრცელდება მხოლოდ კვირის დღეებში, შაბათ-კვირის გარდა.
Le Meridian
თიბისი კონცეპტის შეთავაზების ფარგლებში, 28 დეკემბრის ჩათვლით, შესაძლებლობა გაქვთ, ისარგებლოთ 15%-იანი ფასდაკლებით, ბათუმის სასტუმროში – Le Meridian.
31 დეკემბრამდე, შესაძლებლობა გაქვთ, ისარგებლოთ 20%-იანი ფასდაკლებით სასტუმროში – La Quinta by Wyndham Batumi.
Alliance Palace ბათუმი
9 ივლისიდან-17 ივლისის ჩათვლით, თიბისი კონცეპტის შეთავაზების ფარგლებში, შესაძლებლობა გაქვთ, ესტუმროთ სასტუმროს – Alliance Palace ბათუმი და ისარგებლოთ 30%-იანი ფასდაკლებით.
ორბი სითი
სასტუმროში ორბი სითი კი, 30%-იანი ფასდაკლებით, 9 ივლისიდან-15 ივლისის ჩათვლით, ისარგებლებთ.
ნიუ ვეივ ბათუმი
გრძელვადიანი შეთავაზება გელოდებათ ნიუ ვეივ ბათუმშიც. აღნიშნულ სასტუმროში 15%-იანი ფასდაკლებით, 30 სექტემბრამდე ისარგებლებთ.
კაფეები:
თიბისი კონცეპტის და Mastercard-ის შეთავაზებების ფარგლებში, ბათუმის შერჩეულ კაფეებში, მთლიანი ივლისის განმავლობაში, ყოველ პარაკევს, შაბათს და კვირას, თიბისი კონცეპტ Mastercard სადებეტო ბარათით გადახდისას თანხის 30%-ს, ჯამში მაქსიმუმ 100 ლარს მომენტალურად დაიბრუნებთ. კაფეების ჩამონათვალი ასეთია: ლუკა პოლარე, 8000 მოსავალი, უმამი, მედეა, ბოტანიკო, ლევილი, ლიმონი, ვერანდა აკროპოლი.
თავის მოვლა:
11, 12 და 13 ივლისს, ეწვიეთ PSP-ს ბათუმის ფილიალებს, გადაიხადეთ თიბისის ახალი ან ძველი სადებიტო ბარათებით და დაიბრუნეთ 30% ულიმიტოდ.
შოპინგი:
11-13 ივლისს, ეწვიოთ Dressup ჯგუფის შერჩეულ ფიზიკურ ობიექტებს ბათუმში და დაიბრუნოთ 10% ულიმიტოდ: Jeans Gallery, Factory Outlet, Levi’s, Calvin klein Jeans, Calvin Klein Underwear, GANT, GUESS, Kid’s Gallery, Lee & Wrangler, ETAM, Jack & Jones, Lacoste, Samsonite, TOMMY HILFIGER, G-Star raw. შეთავაზება მოქმედებს, აღნიშნული მაღაზიების ყველა ფილიალში, როგორც თიბისი კონცეპტის ახალი, ისე ძველი სადებიტო ბარათებით გადახდისას.
თიბისი კონცეპტის ახალი და ძველი სადებიტო ბარათების მფლობელები, 10-17 ივლისის ჩათვლით, რონიკოს ბათუმის ფილიალებში, შერჩეული სათვალეების ბრენდებზე, 20%-იანი ფასდაკლებით ისარგებლებენ: Porshe Design Furla Escada Rodenstock George Piralli Roli Giorgio Armani Morel Vogue
9-17 ივლისის ჩათვლით, მათ 20%-იანი ფასდაკლება ექნებათ Kenari-ის ბათუმის ფილიალებშიც. ფასდაკლება იმოქმედებს შემდეგ ბრენდებზე: Giorgio Armani, Burberry, Georgio Piralli, Balenciaga, Kenzo.
ბათუმის ყველა კატეგორიის შეთავაზების დეტალური პირობები იხილეთ ბმულზე.
11-13 ივლისს დაესწარი შავი ზღვის რიგით მე-18 ჯაზფესტივალს და ისარგებლე განსაკუთრებული შეთავაზებებით შენთვის საჭირო ყველა კატეგორიაში!
აფხაზეთის კერძო კინოფონდის დირექტორმა ალექსანდრე ბასარიამ ბოდიში მოიხადა რუს ტურისტებთან დაკავშირებით გაკეთებული განცხადებების გამო, რომელშიც ის ამბობდა, რომ რუსი ტურისტები დასვენებაზე ფულს ზოგავენ, რის შედეგადაც აფხაზეთში მცირე ბიზნესი ზარალდება.
ამავე საკითხზე სპეციალური განცხადება გაავრცელა თვითგამოცხადებული რესპუბლიკის ტურიზმის სამინისტრომაც.
საქმე ის არის, რომ ოკუპირებულ აფხაზეთში ბოლო კვირაა ერთ-ერთი ყველაზე ხშირად განხილული თემა სწორედ რუსი ტურისტების ფულის ეკონომიურად ხარჯვაა, რის გამოც სოციალურ ქსელებში ადგილობრივები და რუსეთის მოქალაქეები ერთმანეთს ედავებიან.
ამ თემას რამდენჯერმე გამოეხმაურა რუსული პროპაგანდისტული მედია. ერთ-ერთი გამოცემის მიერ მომზადებული სათაურია ასეთია – „დოშირაკის” სკანდალმა აფხაზეთში ტურიზმი ჩამოანგრია: რუსები მასიურად აუქმებენ სამგზავრო პაკეტებს”.
ალექსანდრე ბასარიამ ვიდეო მესიჯისაკუთარ ფეისბუქგვერდზე გამოაქვეყნა, სადაც თქვა, რომ ნანობს გაუაზრებელ ნათქვამს:
„მშვენივრად მესმის ადამიანებს გრძნობები, რომლებიც ჩემი უადგილო სიტყვებით განაწყენდნენ. აფხაზეთის მრავალეროვანი ხალხი ყოველთვის გამოირჩეოდა სტუმართმოყვარეობით. ახლა მესმის, რომ სწორედ ისეთი პროვოკაციული განცხადებები უქმნის საფრთხეს ჩვენი ქვეყნის უსაფრთხოებას, როგორიც მე დავუშვი. ასევე მინდა გითხრათ, რომ ჩემი შექმნილი ფონდი – „აფხაზეთის კინო“ – ეს არის კერძო ორგანიზაცია და არანაირი კავშირი არ აქვს სახელმწიფო სტრუქტურებთან.
ძვირფასო თანამემამულენო, აფხაზეთის პატივცემულო სტუმრებო, გულწრფელად გთხოვს პატიებას, ძალიან ვნანობ ჩემს დაუფიქრებელ საქციელს“, – ამბობს ის ვიდეოში.
ოკუპირებული აფხაზეთის ტურიზმის დეფაქტო სამინისტრომსპეციალურ განცხადებაში აღნიშნა, რომ სტუმრები რუსეთიდან არ უქმნიან საფრთხეს თვითგამოცხადებული რესპუბლიკის ეროვნულ უსაფრთხოებას.
„ისინი [რუსი ტურისტები] ტურისტული ნაკადის საფუძველი არიან და მრავალი წლის განმავლობაში ჩვენი რესპუბლიკის უმნიშვნელოვანეს სტუმრებად რჩებიან. ჩვენ გვიხარია, რომ ვხედავთ ყველას, ვინც მოგზაურობის ფორმატის მიუხედავად, აფხაზეთს დასასვენებელ ადგილად ირჩევს.
აფხაზეთი რჩება რუსეთის ფედერაციის საიმედო პარტნიორად და ნებისმიერი მცდელობები სიტუაციის სხვაგვარად წარმოჩენისა, არ შეესაბამება რეალობას” – წერია დე ფაქტო სამინისტროს განცხადებაში.
საზღვაო ტრანსპორტის სააგენტოს დირექტორს, ალექსი ახვლედიანს უფლებამოსილება შეუწყდა. ინფორმაციას ამის შესახებ ეკონომიკისა და მდგრადი განვითარების სამინისტრო ავრცელებს.
სამინისტროს მიერ გავრცელებული ინფორმაციით, შესაბამის ბრძანებას ხელი 2025 წლის 9 ივლისს მოეწერა.
ალექსი ახვლედიანი საზღვაო ტრანსპორტის სააგენტოს დირექტორად 2023 წლის მაისიდან მუშაობდა.
ალექსი ახვლედიანი 7 ივლისს დააკავეს მას შემდეგ, რაც საგარეჯოში მდებარე მის სახლში, აჭარის მთავრობის ყოფილმა თავმჯდომარემ, თორნიკე რიჟვაძემ, გამოძიების ვერსიით, თვითმკვლელობა სცადა.
გამოძიების ვერსიით, საზღვაო ტრანსპორტის სააგენტოს დირექტორს ეკუთვნოდა იარაღი, საიდანაც გაისროლეს.
შინაგან საქმეთა სამინისტრო ალექსი ახვლედიანს ცეცხლსასროლი იარაღის დაუდევრად შენახვისთვის, საქართველოს სისხლის სამართლის კოდექსის 238-ე მუხლით ედავება. 8 ივლისს გამართული სასამართლო სხდომიდან ალექსი ახვლედიანი 30 000 ლარი გირაოთი გაათავისუფლეს.
ევროპარლამენტმა 490 ხმით, 147-ის წინააღმდეგ საქართველოს შესახებ კრიტიკული რეზოლუცია მიიღო.
ევროპარლამენტი დაეთანხმა ზეპირ შესწორებას „ნეტგაზეთისა“ და „ბათუმელების“ თანადამფუძნებლის, მზია ამაღლობელის ჯანმრთელობის მდგომარეობასთან დაკავშირებით.
„ევროპარლამენტი კიდევ ერთხელ ადასტურებს თავის მიზანს მზია ამაღლობელის დაუყოვნებლივი და უპირობო გათავისუფლებისა და მის წინააღმდეგ პოლიტიკურად მოტივირებული ყველა ბრალდების მოხსნის შესახებ. გამოხატავს ღრმა შეშფოთებას პატიმრობაში მისი მხედველობის კრიტიკული გაუარესების გამო და მოუწოდებს სანდო სამედიცინო მომსახურების დაუყოვნებლივ ხელმისაწვდომობისკენ“, – ჩაიწერა დოკუმენტში.
საქმე ისაა, რომ მზია ამაღლობელი დააკავეს 12 იანვარს. მას კვლევები ჩაუტარდა კლინიკა „ვივამედში“, რომლის მიხედვითაც, 6 თებერვლის მდგომარეობით, მზია ამაღლობელი მარცხენა თვალში პრაქტიკულად ვერ ხედავს, ხოლო მარჯვენა თვალში მხედველობა შემცირდა და ის მხოლოდ 10%-ია.
მზია ამაღლობელის მხედველობა მკვეთრად გაუარესდა საპატიმრო დაწესებულებაში მოთავსების შემდეგ. ამის დასტურია იმავე „ვივამედში“ 4 თებერვალს ჩატარებული კვლევები, რის მიხედვითაც დაპატიმრებული ჟურნალისტის მხედველობა მარცხენა თვალში 4%-ი, ხოლო მარჯვენა თვალში 30% იყო.
მზია ამაღლობელის ადვოკატებმა და თავად მზია ამაღლობელმაც უკვე მიმართეს პენიტენციურ დაწესებულებას ხელახალი კვლევების ჩასატარებლად. ჯერჯერობით, მზია ამაღლობელს ამ მოთხოვნაზე დასტური არ მიუღია.
რაც შეეხება ევროპარლამენტის პირველ ანგარიშს საქართველოზე, როგორც კანდიდატ ქვეყანაზე – გაფართოების შესახებ ყოველწლიური ანგარიშები წარმოადგენს ევროპარლამენტის პასუხს ევროკომისიის ანგარიშებზე კანდიდატი და პოტენციური კანდიდატი სახელმწიფოების შესახებ.
ამ შემთხვევაში ევროპარლამენტმა შეაფასა საქართველოს პროგრესი კომისიის 2023 და 2024 წლების ანგარიშების საფუძველზე და მიიღო რეზოლუცია, რომელიც წარმოადგენს პარლამენტის ოფიციალურ პოზიციას გაწევრიანების კანდიდატ საქართველოსთან ურთიერთობის შესახებ.
ზუგდიდელ არტისტსა და აქტივისტს, როსტევან [როსტო] ზარანდიას დღეს, 9 ივლისს, მოსამართლე ირაკლი აბშილავამ 5-დღიანი პატიმრობა მიუსაჯა.
ზუგდიდელი აქტივისტების ინფორმაციით, როსტევან ზარანდიას ზუგდიდის მერიის პიარსამსახურის ხელმძღვანელმა, მაგდალინა თოდუამ უჩივლა ფეისბუქზე კომენტარისთვის – „ფოჩო“ და „ტვენგე“, რაც მეგრულად „სულელს“ და „შტერს, ბატს“ ნიშნავს.
დღეს, 9 ივლისს, ზუგდიდელმა აქტივისტმა, მარიამ სიჭინავამ სასამართლო სხდომის დასრულების შემდეგ ფეისბუქზე ჩართვაში აღნიშნა, რომ როსტო ზარანდიამ დააყენა შუამდგომლობა სასამართლოზე მეგრული ენის თარჯიმნის მოწვევაზე, რომ ნათელი ყოფილიყო ამ სიტყვების მნიშვნელობა, თუმცა ეს მოთხოვნა მოსამართლემ არ დააკმაყოფილა, იმ მიზეზით, რომ ამ სიტყვების შინაარსი მისთვის ნათელი იყო.
როსტო ზარანდია დაკავებამდე არაერთხელ დააჯარიმეს მზია ამაღლობელის სტენსილის გამო, რომელიც მან სამეგრელო-ზემო სვანეთის სამხარეო პროკურატურის კედელზე შეასრულა.
სიმღერა „სულიკოს“ შესრულების ტრადიციას არამატერიალური ძეგლის სტატუსი მიენიჭა.
საქართველოს კულტურული მემკვიდრეობის დაცვის ეროვნული სააგენტოს გენერალური დირექტორის შესაბამისი ბრძანება ძალაში დღეს, 2025 წლის 9 ივლისს შევიდა.
„მიენიჭოს არამატერიალური კულტურული მემკვიდრეობისძეგლის სტატუსი არამატერიალური კულტურული მემკვიდრეობის ობიექტს: „სიმღერა „სულიკოს“ შესრულების ტრადიციას“ – აღნიშნულია სააგენტოს დირექტორის ბრძანებაში.
ამავე ბრძანებით, სააგენტოს საინფორმაციო სისტემების სამსახურს დაევალა მითითებული ძეგლის მონაცემების არამატერიალური კულტურული მემკვიდრეობის ობიექტთა სახელმწიფო რეესტრში ასახვა.
სააგენტოს ადმინისტრაციას კი დაევალა ამ ბრძანების ამოქმედებიდან ერთი თვის ვადაში ძეგლის მონაცემების საქართველოს კულტურის სამინისტროს ინტერნეტგვერდზე ასახვის მიზნით შესაბამისი ღონისძიებების განხორციელება.
ლექსი „სულიკო“ 1895 წელს დაწერა აკაკი წერეთელმა.
„ლექსი „სულიკო“ დაიწერა 1895 წელს. იმავე წელს დაიწერა სიმღერაც, მუსიკის ავტორი ბარბარე (ვარინკა) მაჭავარიანი-წერეთელია.
_____________
ფოტოზე: აკაკი წერეთელი, ვარინკა მაჭავარიანი-წერეთელი. წყარო: ივერიელი
შს სამინისტროს ცნობით, აჭარაში 1986 წელს დაბადებული, წარსულში ნასამართლევი ზ.კ. განზრახ მკვლელობის მცდელობის ბრალდებით დააკავეს.
დაჭრის შემთხვევა ბათუმში 6 ივლისს მოხდა.
„გამოძიებით დადგინდა, რომ ბრალდებულმა, ბათუმში, ურთიერთშელაპარაკების ნიადაგზე დაწყებული დაპირისპირებისას, 2001 წელს დაბადებული ლ.ჩ ცივი იარაღის გამოყენებით დაჭრა და შემთხვევის ადგილიდან მიმალვას შეეცადა, რა დროსაც ის სამართალდამცველებმა შეაჩერეს და ბრალდებულის სახით დააკავეს.
დაჭრილი ლ.ჩ. საავადმყოფოში მოათავსეს, სადაც შესაბამისი სამედიცინო დახმარება ჩაუტარდა“ – იუწყება შსს.
უწყების ცნობით, ნივთმტკიცებად ამოღებულია დანაშაულის ჩადენის იარაღი – დანა.
გამოძიება სისხლის სამართლის კოდექსის 19 – 108 -ე მუხლით მიმდინარეობს. დანაშაული 15 წლამდე ვადით თავისუფლების აღკვეთას ითვალისწინებს.
ბათუმის საქალაქო სასამართლომ ბრალდებულს აღკვეთის ღონისძიების სახედ პატიმრობა უკვე შეუფარდა.
უკრაინის შეიარაღებული ძალების ცნობით, 9 ივლისს, გამთენიისას, რუსეთმა უკრაინას 741 საჰაერო თავდასხმის აპარატით შეუტია. უკრაინის თავდაცვამ მათგან 718-ის განეიტრალება შეძლო.
უკრაინის პრეზიდენტმა ვოლოდიმირ ზელენსკიმ განაცხადა, რომ ძირითადი დარტყმა ლუცკს მიაყენეს. სამიზნე იყო ასევე დნეპრის, ჟიტომირის, კიევის, კიროვოგრადის, ნიკოლაევის, სუმის, ხარკოვის, ხმელნიცკის, ჩერკასის და ჩერნიგოვის ოლქები.
„ეს დემონსტრაციული თავდასხმაა, განსაკუთრებით ახლა, როდესაც მშვიდობის მიღწევის, ცეცხლის შეწყვეტის ამდენი მცდელობა იყო და მხოლოდ რუსეთი უარყოფს ყველაფერს. კიდევ ერთი დასტური იმისა, რომ სანქციებია საჭირო – მტკივნეული სანქციები ნავთობის წინააღმდეგ, რომელიც მოსკოვის საომარ მანქანას სამ წელზე მეტი ხნის განმავლობაში ფულით ავსებდა ომის დროს. მეორადი სანქციები მათ წინააღმდეგ, ვინც ამ ნავთობს ყიდულობს და მკვლელობებს აფინანსებს“, – წერს ზელენსკი სოციალურ ქსელებში.
მან მოკავშირეებს რუსეთზე ზეწოლის გაზრდისკენ მოუწოდა.
უკრაინულ მედიაში ვრცელდება ინფორმაცია რუსეთის თავდასხმის შედეგად დაშავებულების, ნგრევისა და ხანძრის შესახებ.
კიევის ოლქში, რუსული თავდასხმის შედეგად, სამრეწველო საწარმოს ტერიტორიაზე მასშტაბური ხანძარი გაჩნდა, რომელმაც 8000 კვადრატული მეტრი მოიცვა.
________
ფოტო: უკრაინის საგანგებო სიტუაციების სამსახური. ДСНС України/facebook
აჭარის მთავრობის აპარატმა ადმინისტრაციული შენობების შიდასარემონტო სამუშაოებზე 293 000 ლარით ტენდერი გამოაცხადა.
სარემონტო სამუშაოები ბათუმში, აჭარის მთავრობის აპარატის ორ ადმინისტრაციულ შენობაში უნდა ჩატარდეს – კონსტანტინე გამსახურდიას ქუჩა N9-ში, სადაც მთავრობის თავმჯდომარის სამუშაო კაბინეტია და მთავრობის სხდომები იმართება და ახმედ მელაშვილის ქუჩა N26-ში.
სატენდერო პირობებში აღნიშნულია, რომ ადმინისტრაციულ შენობებში სამუშაოები უნდა ჩატარდეს ეტაპობრივად და მთავრობის აპარატის საქმიანობის პარალელურ რეჟიმში [საქმიანობის შეუფერხებლად].
ამასთან, „მიმწოდებელმა უნდა უზრუნველყოს საკუთარი ძალებით რემონტს დაქვემდებარებული ცალკეული საოფისე ოთახების ავეჯისგან გამოთავისუფლება [დაუზიანებლად] და დასრულების შემდეგ კვლავ საწყის მდგომარეობაში დაბრუნება“.
ტენდერში გამარჯვებულს მოუწევს სხვადასხვა, მათ შორის სადურგლო და სახუროო, იატაკისა და კედლის საფარის, ღებვა-შემინვის, ელექტრო-სამონტაჟო და შენობის მოწყობის სხვა სამუშაოების ჩატარება.
ტენდერს თან ახლავს სამუშაოების დეტალური ჩამონათვალი, რომლის მიხედვითას მელაშვილის ქუჩაზე მდებარე შენობაში ძირითადად „კორესპონდენციის განყოფილების [მოქალაქეთა მიღების] ოთახის შიდასარემონტო სამუშაოები“ ჩატარდება;
კონსტანტინე გამსახურდიას ქუჩაზე მდებარე შენობაში კი – გაარემონტებენ კაბინეტებს სხვადასხვა სართულზე; ასევე სველ წერტილებს.
ტენდერში წინადადებების მიღება 2025 წლის 15 ივლისს დაიწყება და 18 ივლისს შეწყდება. სამუშაოები კი, ტენდერში გამარჯვებულმა, ხელშეკრულების გაფორმებიდან 120 დღეში უნდა დაასრულოს.
აჭარის მთავრობისთვის 6 406 500 ლარია გათვალისწინებული 2025 წლის რესპუბლიკურ ბიუჯეტში. აქედან 2,9 მილიონი ლარი მთავრობის აპარატში დასაქმებული 64 საჯარო მოხელის ხელფასებში დაიხარჯება; დანარჩენი კი – აპარატის სხვა ხარჯებია.
თორნიკე რიჟვაძე, რომელიც პირველ საუნივერსიტეტო კლინიკაში მართვით სუნთქვაზე იმყოფებოდა, თურქეთის კლინიკაში გადაიყვანეს.
ამის შესახებ განცხადება დღეს კლინიკურმა დირექტორმა გააკეთა.
„წუხელ, ღამით, 2 საათზე, თორნიკე რიჟვაძე გადაყვანილ იქნა სტამბოლის საავადმყოფოში, საჰაერო გზით. თვითონ ოჯახის წევრებმა გამოიძახეს რეანომობილი. თორნიკე იყო აბსოლუტურად სტაბილურ მდგომარეობაში, კონტაქტში შემოდიოდა, გაუმჯობესებული პარამეტრებით, მაგრამ მართვით სუნთქვაზე დავტოვეთ, რადგან არ შეიძლებოდა მართვითი სუნთქვის გარეშე საჰაერო ფრენის დროს.
მძიმე პაციენტია, რა თქმა უნდა, მაგრამ ბევრად გაუმჯობესებული პარამეტრებით ჩაიბარეს თურქმა ექიმებმა“- ეს განცხადება დღეს, 9 ივლისს, პირველი საუნივერსიტეტო კლინიკის კლინიკურმა დირექტორმა ლალი ტურძელაძემ გააკეთა მედიასთან.
ამავე კლინიკის დირექტორი ლევან რატიანი გუშინ მედიასთან ამბობდა, რომ პაციენტის ზოგადი მდგომარეობა გაუმჯობესებული იყო. „გაუმჯობესება ნიშნავს, რომ ტრავმულ-ჰემორატიული შოკის კლინიკა აღარ არსებობს, ანუ ალაგებულია, ლიკვიდირებულია“- თქვა მან მედიასთან.
შსს-ს ინფორმაციით, აჭარის მთავრობის ყოფილმა თავმჯდომარემ 7 ივლისს თვითმკვლელობა ცეცხლსასროლი იარაღით სცადა. ამ დროს ის საზღვაო ტრანსპორტის სააგენტოს ხელმძღვანელის, ალექსანდრე ახვლედიანის სახლში იმყოფებოდა და თვითმკვლელობაც მის სახელზე რეგისტრირებული იარაღით სცადა.
დაწყებული იყო გამოძიება ამ ფაქტზეც, თუმცა ახვლედიანი გუშინ სასამართლო დარბაზიდან გირაოთი გაათავისუფლეს.
თვითმკვლელობის მცდელობის დღეს, პროპაგანდისტულმა მედიებმა გაავრცელეს წერილი, რომელიც თითქოს თორნიკე რიჟვაძეს ჯიბეში უპოვეს.
წერილში საუბარია კორუფციასა და ნარკოდანაშაულის მფარველობაზე, რომელსაც თითქოს რიჟვაძეს აბრალებდნენ.
უკრაინის შეიარაღებული ძალების გენერალური შტაბის დღევანდელი მონაცემებით, ომის დაწყებიდან 2025 წლის 9 ივლისამდე პერიოდში, რუსეთის არმიის საბრძოლო დანაკარგი არის:
ცოცხალი ძალა – დაახლოებით 1 029 660 ადამიანი [გასულ დღე-ღამეში +1 050]
ტანკი – 11 000 ერთეული [+5]
ჯავშანტექნიკა – 22 969 ერთეული [+2]
საარტილერიო სისტემა – 30 102 ერთეული [+68]
MLRS – 1 434 ერთეული [+0]
საზენიტო საბრძოლო სისტემა – 1 193 ერთეული [+1]
თვითმფრინავი – 421 ერთეული [+0]
ვერტმფრენი – 340 ერთეული [+0]
უპილოტო საფრენი აპარატის ოპერატიულ-ტაქტიკური დონე – 44 457 ერთეული [+227]
ფრთოსანი რაკეტა [ჩამოაგდეს] – 3 439 ერთეული [+0]
გემი/ნავი – 28 ერთეული [+0]
წყალქვეშა ნავი – 1 ერთეული [+0]
მანქანები და საწვავის ავზები – 54 575 ერთეული [+119]
სპეცტექნიკა – 3 929 ერთეული [+2]
უკრაინის გენერალური შტაბის განცხადებით, საომარი მოქმედებების მაღალი ინტენსივობის გამო მონაცემები იცვლება.
უკრაინის სამხედრო დანაკარგებზე ინფორმაცია ჯერ არ განუახლებია რუსეთს.
რუსეთის თავდაცვის სამინისტროს მიერ გავრცელებული მონაცემებით, ომის დაწყებიდან 2025 წლის 8 ივლისამდე პერიოდში სულ განადგურებულია უკრაინის:
663 თვითმფრინავი
283 ვერტმფრენი
68 251 უპილოტო საფრენი აპარატი
614 საზენიტო სარაკეტო სისტემა
24 162 ტანკი და სხვა ჯავშანტექნიკა
1 576 მრავალჯერადი სარაკეტო გამშვები
27 129 საველე არტილერია და ნაღმმტყორცნი
37 832 სპეციალური სამხედრო მანქანა
რუსეთის თავდაცვა, ამ მონაცემებთან ერთად, უკრაინის არმიის ცოცხალი ძალის დანაკარგების შესახებ სტატისტიკას არ აქვეყნებს.
ეს ის მონაცემებია, რომელსაც უკრაინა და რუსეთი ოფიციალურად ავრცელებენ, თუმცა ომის პირობებში შეუძლებელია ზუსტად გადამოწმება, რამდენად შეესაბამება მხარეების მიერ გავრცელებული ინფორმაცია დანაკარგების შესახებ რეალურ რიცხვებს.
—
რუსეთი უკრაინაში 2022 წლის 24 თებერვალს გამთენიისას შეიჭრა და სრულმასშტაბიანი ომი დაიწყო.
„გაზპრომის“ კონტრაქტორი ლოგისტიკური კომპანიის ხელმძღვანელი იური ვორონოვი თავში მიყენებული ჭრილობით დაიღუპა.
„გაზპრომ-ინვესტის“ სატრანსპორტო სამსახურის ტოპმენეჯერზე, ლეონიდ შულმანზე ითქვა, რომ თავი მოიკლა. მას „უპოვეს“ წერილი, სადაც ფეხის გაუსაძლის ტკივილზე ჩიოდა და არ სურდა ოჯახს ტვირთად დასწოლოდა.
იმავე წლის თებერვალში საკუთარ სახლში მკვდარი იპოვეს კორპორაციული უსაფრთხოების საკითხებში გაზპრომის „ერთიანი განსახლების ცენტრის“ გენერალური დირექტორი ალექსანდრ ტიულიაკოვი. ცხედართან ქაღალდი ნახეს, თუმცა მედია არ ფლობს ინფორმაციას მის შინაარსზე.
ამავე წლის აპრილში მოსკოვში რუსი მილიონერის, ვლადისლავ ავაევის, მისი ქალიშვილისა და ცოლის ცხედრები იპოვეს. წინასწარი გამოძიების მიხედვით, ავაევმა ცოლსა და 13 წლის ქალიშვილს ცეცხლსასროლი იარაღიდან ესროლა, შემდეგ კი თავი მოიკლა.
ეს სერია არ დასრულებულა. 2025 წლის 7 ივლისს რუსეთის ტრანსპორტის ყოფილი მინისტრის, რომან სტაროვოიტის ცხედარი იპოვეს. მას ჭრილობა ცეცხლსასროლი იარაღიდან ჰქონდა მიყენებული. რუსეთის საგამოძიებო კომიტეტი მთავარ ვერსიად თვითმკვლელობას განიხილავს.
რუსეთში „ფანჯრიდან გადავარდა” ნავთობკომპანიის 62 წლის ტოპმენეჯერი რუსი ბიზნესმენი, “ტრანსნეფტის” ვიცე-პრეზიდენტი, ანდრეი ბადალოვი.
პუტინის რუსეთში მსგავსი ისტორიები განსაკუთრებით უკრაინაში რუსეთის შეჭრის შემდეგ გახშირდა.
უკრაინაში ომის დაწყების შემდეგ რადიკალურად იცვალა სახე ბიძინა ივანიშვილის „ქართულმა ოცნებამაც“. ბოლო პერიოდში ივანიშვილის კარზე ძალაუფლება არაერთმა გავლენიანმა ჩინოვნიკმა დაკარგა. მაგალითად, ორგზის პრემიერად დანიშნულმა ირაკლი ღარიბაშვილმა, სუს-ისა და შს მინისტრებმა, რომლებიც საპროტესტო აქციების დარბევის გამო დასავლეთის სანქციების ქვეშ მოექცნენ.
ამავე დროს, დაჭრილია აჭარის მთავრობის ყოფილი თავმჯდომარე თორნიკე რიჟვაძე – შსს-ს ვერსიით, მან 7 ივლისს, ცეცხლსასროლი იარაღით თვითმკვლელობა სცადა. იმავე დღეს, პროსახელისუფლებო მედიებმა გაავრცელეს წერილი, რომელიც თითქოს რიჟვაძემ თვითმკვლელობამდე დაწერა. წერილის ავთენტურობა ჯერჯერობით არ არის დადასტურებული.
როდის უპირისპირდება რეჟიმი სისტემის მსახურებს და რით ჰგავს საბჭოთა ან პუტინის რეჟიმს ივანიშვილის სისტემა? – ამ თემაზე „ბათუმელები“ საბჭოთა წარსულის მკვლევარს, ისტორიკოს ირაკლი ხვადაგიანს ესაუბრა.
ირაკლი ხვადაგიანი
ირაკლი, რა საერთო აქვს ივანიშვილის რეჟიმს პუტინის რეჟიმთან? რაშია მსგავსება ან განსხვავება? ან კიდევ, საბჭოთა რეპრესიული სისტემიდან რა აქვთ ამ რეჟიმებს ათვისებული?
ძალიან ჰგავს ეს პროცესი და ტენდენცია იმას, რაც რუსეთშია. ორივე მათგანი, რა თქმა უნდა, გაგრძელებაა იმ საბჭოთა რეჟიმის, ოღონდ ახალი, შევსებული და რაღაცნაირად ადაპტირებული ვარიანტია საბჭოური, რუსული ტოტალიტარული გამოცდილების. თუმცა, ექსკლუზიურად საბჭოურისაც არა, რადგან ვიცით, რომ ტოტალიტარული რეჟიმები ჰგვანან ერთმანეთს, სწავლობენ ბევრ რამეს ერთმანეთისგან და ამ ყველაფერს ემატება ადგილობრივი სახასიათო ელემენტები.
ამიტომ ცხადია, როცა საუბარი გვაქვს ამ სისტემაზე, რეჟიმზე, ეს არის ერთგვარი მაფიოზური დაჯგუფება, ხშირად ბელადზე ორიენტირებული. ერთი ადამიანია ამ დაჯგუფების უპირობო ლიდერი, მმართველი და ორგანიზატორი და აქედან გამომდინარე, ის არის ძალაუფლების წყარო და არანაირი ბალანსი, გაზიარება, ერთობლივი პარტნიორული მართვა აქ არ მოიაზრება. ერთი ადამიანი და მისი მორჩილი კადრების პირამიდაა ყოველგვარი ნორმატიული ჩარჩოს მიღმა. აქ არ არის რაღაც დაწერილი წესები, რომელიც უზრუნველყოფს კონკრეტული მონაწილის ავტონომიურობას.
ან ხარ ამ სისტემის ნაწილი და ასრულებ ბელადის დავალებას, ან ხარ არავინ. აი, ეს არის საფასური და რა თქმა უნდა, ტოტალიტარიზმის ამ თანამედროვე ჰიბრიდის პირობებშიც ასეთია ლოგიკა, უბრალოდ მასშტაბები ქმნის გარკვეულ განსხვავებებს.
როდის უპირისპირდება რეჟიმი თავის მორჩილებს და რა სურათი გვაქვს ივანიშვილთან და მის გარემოცვაში?
რასაც წარსული და თანამედროვე გამოცდილება გვაჩვენებს, დაპირისპირება თავად რეჟიმის არსია, რადგან ის მუდმივად დგას შიდა წმენდებზე.
კასრში ვირთხების გამოყვანა ემსახურება იმას, რომ ვირთხა ჭამს თანამებრძოლს და ამ სისტემაშიც, შიგნით, მუდმივად ხდება „ბუნებრივი გადარჩევა“, სადაც უფრო სიცოცხლისუნარიანი იმარჯვებს, ინარჩუნებს პოზიციებს და ეს არის დაუსრულებელი ციკლი, რომელსაც არეგულირებს „მეპატრონე“.
აქ განსხვავდება ინტენსივობა და ანგარიშსწორების ხარისხი.
რაღაც ეტაპზე ეს არის შიდა კლანური კონკურენცია და ბრძოლა შიგნით უფრო მეტი რესურსების მოპოვებისთვის, ერთგვარი შიდა ფარული ომი, რასაც შიდა მმართველი ხედავს, მაგრამ არ უშლის ხელს, რადგან მას სჭირდება ეს იმისთვის, რომ ეს შიდა ბალანსი შეინარჩუნოს, რომ მართოს კონკურენციაში მყოფი კლანები და მისი ამოცანები შეასრულებინოს, ოღონდ არ მისცეს არცერთს ისეთი გაძლიერების საშუალება, რომ თვითონ მმართველისთვის გახდნენ სახიფათო.
ამ ეტაპზე ხდება ქონების გადანაწილება, პრივილეგიების, პოსტების და ასე შემდეგ.
ეს ეტაპები ჰქონდა ივანიშვილსაც.
როგორ მოხდა დაპირისპირება კლანებს შორის, იქნება ეს კალაძის, კობახიძის თუ ღარიბაშვილის და როდესაც კრიზისი არის უფრო მძაფრი, უფრო ეგზისტენციალური საფრთხეები აქვს მთავარ მმართველს, ამ შემთხვევაში საფასური იზრდება და მხოლოდ ფული, პრივილეგია ან პოსტი აღარ არის ის, რასაც რეჟიმის მსახური კარგავს, არამედ კარგავს სიცოცხლესაც, რისი მაგალითებიც გვაქვს რუსეთში.
ბიძინა ივანიშვილის ეგზისტენციალური საფრთხის გამოა ის, რაც დაემართა, მაგალითად, თორნიკე რიჟვაძეს, ირაკლი ღარიბაშვილს ან იმ მაღალჩინოსნებს, რომლებიც ემსახურნენ რეჟიმს, მაგრამ ახლა აღარ არიან საჭირო?
კი, რა თქმა უნდა. ლოგიკა ეს არის, რომ ივანიშვილს აქვს გამოწვევები, ის არის სამიზნე სანქციების, მისი ძალაუფლების გასაღები რაც არის – ფინანსური რესურსები, შემცირდა, ამიტომ მას სჭირდება ყველანაირი კონსოლიდაცია ამ ფინანსური რესურსების. პრაქტიკაში რასაც ვადევნებთ თვალს, პანიკური რეაქცია აქვს ახლა ივანიშვილს, ცდილობს ყველაფრის ამოქაჩვას, ცენტრალიზაცია უნდა განახორციელოს, გამომდინარე იქიდან, რომ არ არის საკმარისი ის რესურსები, რომელიც მას ამ წუთას გააჩნია.
რუსეთში რასაც ვხედავთ, ანალოგიურია, ხომ?! ბოლო წლების მაგალითები, რომ ფანჯრებიდან ცვივიან ყოფილი ოლიგარქები, მაღალჩინოსნები და ასე შემდეგ, იმის სიგნალია, რომ სისტემამ დაიწყო ყველანაირი რესურსების ამოქაჩვა, მობილიზება. რუსებს კრიზისი აქვთ, ეკონომიკა ჩამონგრევის პირასაა, სამხედრო საომარი მანქანა ისრუტავს ამ რესურსებს და კიდევ და კიდევ მეტი უნდა, მაგრამ ამის მიუხედავად ვერ აღწევს დასახულ მიზნებს და ეს არის, ასე ვთქვათ, დიდი რეკეტი.
პუტინს აქვს ომი და გასაგებია, რომ მას ამისთვის სჭირდება რესურსები, მაგრამ ივანიშვილის შფოთვები მხოლოდ სანქციებს უკავშირდება, თქვენი აზრით?
შეიძლება ვთქვათ, რომ ივანიშვილსაც აქვს ომი, ოღონდ საკუთარ ხალხთან, საქართველოს წინააღმდეგ.
ამ ეტაპამდე, სანამ ის გახდებოდა სანქციების სუბიექტი, მას ჰქონდა კომფორტი, რომ ერთი მხრივ თავისი კაპიტალით ემოძრავა და გაეზარდა ეს კაპიტალი საერთაშორისო ბაზარზე ოპერირებით და როგორც ხედავთ, მას მთელი ქვეყანა ისედაც განაწილებული აქვს თავისი მაფიოზური დაჯგუფების ხელში, დამატებით შემოსავალს იღებდა აქედან და ამ ვერტიკალსაც ინარჩუნებდა პრინციპით – „ძარცვე, ოღონდ იყავი ლოიალური და ჩემი წილი მოიტანე ყულაბაში“. ეს განსაზღვრავდა ერთგულებასაც და მოტივაციასაც ამ ტურბულენტური ქსელის მონაწილეებისთვის.
ის ღიად დაუპირისპირდა დასავლეთს, გარდა ამისა, რუსეთის იმედი კი აქვს, მაგრამ იმასაც ვხედავთ, რუსეთში რა მდგომარეობაა, მას იქეთ სჭირდება სახსრების მობილიზება, ამიტომ უკიდურესად მძიმე მდგომარეობაშია ივანიშვილი, რადგან ის ასევე დაპირისპირებულია ამ ქვეყნის მოქალაქეების უმრავლესობასთან, დიქტატორული გარემო და სისტემა ჩამოაყალიბა, რასაც სჭირდება რესურსი.
სადამსჯელო რეპრესიულ აპარატს სჭირდება სტაბილური შემოსავალი, რაც განსაზღვრავს ამ დამსჯელი ვერტიკალის ლოიალურობას სისტემის მიმართ. ამის რესურსი მოაკლდა ივანიშვილს და ამ სახსრების ამოქაჩვის პროცესი მიმდინარეობს ახლა.
პრაქტიკამ აჩვენა, რომ რეჟიმის ჯილდოები ვერ იცავს მორჩილებს და ამის მაგალითია ძალოვანი უწყებების წარმომადგენლები, რომლებიც დააჯილდოეს მედლებით, მაგრამ მაინც დაკარგეს თანამდებობა, გავლენა და მოხვდნენ მაგნიტსკის სიაშიც. ეს ნიშნავს, რომ როდესაც რეჟიმს სჭირდება მსხვერპლი, მაგალითად, ფული, ასეთ დროს რეჟიმის მორჩილიც ადვილად შეიძლება გახდეს სამიზნე?
რა თქმა უნდა და ჩვენ შეგვიძლია მათ მორალის საზომიდან ვუთხრათ, რომ აი, შენ ხომ რეჟიმს ემსახურე, პირადი კომფორტი ხომ უფრო მაღლა დააყენე ვიდრე მოქალაქეების უფლებები, დაჩაგრე და აწამე იმის ხარჯზე, რომ ჯილდო მიგეღო… ახლა ეს ჯილდოებიც გაქრა და აღმოჩნდნენ სადღაც მოსროლილი.
თუმცა ამ ადამიანების უმრავლესობას ეს არჩევანი აქვს გაკეთებული თავის დროზე და გაცნობიერებული აქვთ, რომ თუნდაც მოკლევადიანი ხეირისთვის ამ ნაბიჯზე წამსვლელები იყვნენ.
მათი მენტალიტეტი იმაზეა აწყობილი, რომ ერთი ნაბიჯით, ერთხელ, მოკლე დროში იშოვონ რაც შეიძლება მეტი და იმის იქეთ რაღაც სტრატეგიული გათვლების არც სურვილი აქვთ, არც რესურსი და არც მოტივაცია.
გრძელვადიან პერსპექტივაში, საბოლოოდ, ეს მაინც წამგებიანი და დამღუპველი იქნება მათთვის. ერთგვარი აზარტი აქვს მათთვის იმას, რომ ვიღაცას მოეთხოვა შიდა კლანურად პასუხი, მაგრამ ვიღაცები გადარჩნენ.
ყოფილა შემთხვევები თუნდაც საბჭოთა რეჟიმის დროს, რომ ამ სისტემიდან ვიღაც გადარჩენილა, გამომძვრალა და რა შემთხვევაში ხდება ეს?
ძალაუფლება და ფული ამ შემთხვევაში ერთი მოცემულობის ნაწილია. ძალაუფლება, პოსტი არის ვიზა, ერთგვარი ჩარჩო ფულის მოსაპოვებლად კანონის გვერდის ავლით და ხშირ შემთხვევაში – პირდაპირ დაკანონებულიც. ამ სისტემური უსამართლობის ნიმუშია სახელმწიფო ფუნქციონერების ხელფასი, რაც არის ძალიან დიდი და ამის მიღმაც ბევრი კორუფციული გარიგების და რეკეტის საშუალება ეძლევათ.
საბჭოური ტოტალიტარიზმის შემთხვევაშიც ასე იყო დიდწილად, როცა პარტიული პოსტი იყო, ასე ვთქვათ, ფულის საჭრელი მანქანა.
თუმცა ყოფილა შემთხვევა, როცა შიდა წმენდებს და ციკლურ მსხვერპლშეწირვას გადაურჩნენ ადამიანები და ეს არის ის ინტუიციური მეხსიერება, რაც ახალისებს სადამსჯელო სტრუქტურებში მომუშავე ადამიანებს, რომ შეიძლება მათაც მოახერხონ გადარჩენა.
ამის ბევრი მაგალითია, თუნდაც საბჭოთა ბოლშევიკი ანასტას მიქოიანი, რომელიც საკმაოდ მნიშვნელოვან პოსტებს იკავებდა და არცერთი შიდა წმენდის კამპანია მას არ შეხებია. ლენინიდან ბრეჟნევამდე იცხოვრა და ბუნებრივი სიკვდილით გარდაიცვალა.
რამ გადაარჩინა?
გადარჩენის შანსებს განსაზღვრავდა ის, რომ ამ სისტემის მსახურებს სწორად ეგრძნოთ, საიდან უბერავს ქარი და აღმოჩენილიყვნენ გამარჯვებულის ბანაკში.
მნიშვნელოვანი იყო, თუ ვინ უფრო ერთგულად ემსახურებოდა ბელადს, ვინ უფრო ახერხებდა მოწინააღმდეგის კომპრომეტირებას და ვინ უფრო „ჭკვიანურად“ სარგებლობდა დიდი ტერორის კამპანიების დროს შექმნილი გარემოთი, როცა თუნდაც ერთი აგენტურული შეტყობინება საკმარისი იყო ადამიანისთვის ბრალის წასაყენებლად.
როგორ ფიქრობთ, ივანიშვილის კორუფციულ კლანში ყველაზე სუსტი რიჟვაძე აღმოჩნდა? რადგან ასეთი შედეგი სხვების შემთხვევაში ჯერ არ დამდგარა.
ამ ეტაპზე არ ვიცით ამ მაფიოზური დაჯგუფების შიდა სამზარეულოს შესახებ და მედიის განადგურებაც ზუსტად ამას ისახავს მიზნად, რომ არ ვიცოდეთ სინამდვილეში რა ხდება და რა პროცესები მიდის იქ. ამიტომ ჯერ ნაადრევია დასკვნების გამოტანა, რადგან არ ვიცით მომდევნო ფაზები და შიდა მასშტაბური კამპანიები ამ ოლიგარქიული რეკეტის საითკენ წავა, ვინ გახდება სამიზნე და ვინ როგორ მოახერხებს თავის დაღწევას.
საწყისი ფაზაა და ბოლო რამდენიმე თვეა რაც ამაზე ცხადად დაიწყო საუბარი. მსგავსი რეჟიმების გამოცდილება და პარალელურად მიმდინარე პროცესები გვაჩვენებს, ეს უფრო ღრმად წავა და უფრო ტრაგიკული სურათების მოწმე გავხდებით თუ არა.
რუსეთში ბოლო დროს გარდაცვლილი გავლენიანი პირების ისტორიებში ფიგურირებს „თავი მოიკლა“ და წერილი, რომელიც აღმოჩნდება ხოლმე გარდაცვალების შემდეგ. თორნიკე რიჟვაძის ამბავშიც გამოჩნდა წერილი. თქვენი აზრით, იგრძნობა აქაც რუსული რეჟიმის კვალი?
არაფერი ახალი აქაც არ არის, ეს ჟანრის კანონია სამწუხაროდ.
წერილის ელემენტიც არის ის, რომ ოფიციალური ჩარჩო მიუსადაგონ და სისტემამ თავი გაითავისუფლოს პასუხისმგებლობიდან. ძალიან შეთითხნილი სურათია, რაც დამახასიათებელია ამ ტიპის შიდა გარჩევებისა და წმენდებისთვის და ძალიან ჰგავს როგორც წარსულ მაგალითებს, ასევე რუსეთში თუ სხვა ტოტალიტარულ ქვეყნებში მიმდინარე პროცესებს.
საბჭოთა რეპრესიებიდან ბერიას და მაშინდელი სომხეთის კომპარტიის პირველი მდივნის, აღასი ხანჯიანის შეხვედრა გაიხსენეს ამ დღეებში ფეისბუქზე. როცა ამ შეხვედრის შემდეგ ხანჯიანი მკვდარი იპოვეს, მას ორი წერილი ედო ჯიბეში ერთი ცოლისთვის და მეორე ბერიასთვის, სადაც წერდა რომ „ძლიერ გაიხლართა და სხვა გზას ვეღარ ხედავს”. არ ფიქრობთ, რომ რაღაც ამდაგვარი იყო რიჟვაძის წერილის შინაარსიც?
კი, რა თქმა უნდა, ლოგიკა ერთი არის. ნამდვილად მისი დაწერილიც რომ იყოს, ეს ხომ არის შედეგი რაღაც პროცესის და ცხადია, რა პროცესისაც, რომ მიდის ფულის ამოქაჩვის ძალისმიერი კამპანია, რომელიც ძალიან მტკივნეულია ამ კორუმპირებული სისტემის წარმომადგენლებისთვისაც.
როცა შიდა გარჩევებში ასეთი რაღაც ხდება, როგორ უნდა შეიფუთოს ეს, რომ სისტემამ აიცილოს პასუხისმგებლობა – თავისთავად, მიდის უკვე ბევრჯერ ნანახ და გადაღეჭილ მაგალითებამდე.
ბოლოს მაინც მინდა გკითხოთ, ისტორია გვაჩვენებს, რომ რეჟიმები არა მხოლოდ სისტემის მსახურებს ჭამს, არამედ მათ შემქმნელებსაც. ამის მაგალითია ფაშისტური და საბჭოთა რეჟიმები, თუმცა დღევანდელი ტოტალიტარული რეჟიმები თითქოს უფრო დიდხანს ინარჩუნებენ სიცოცხლეს და რატომ?
დიქტატორების დამხობის და ჩამოშლის ბევრი სურათი იყო წინა ათწლეულში, ვნახეთ ისიც, ასადს რა დაემართა, სად არის ამჯერად და როგორ შეავსო, ასე ვთქვათ, განდევნილი და დამარცხებული დიქტატორების კლუბი მოსკოვში, იანუკოვიჩის მეზობლად.
რა თქმა უნდა, ეს სია ღიაა და რუსეთის ინტერესების მსახური ყველა ავტორიტარის პერსპექტივა მსგავსია.
ან რევოლუციით მოეღებათ მათ ბოლო ან ერთობლივი შიდა და გარე პროცესების ზემოქმედებით. ჩვენთან მიმდინარეობს ეს პროცესი და დიდი ალბათობით, დიდი სურვილი მაქვს ამისი, რომ რაც შეიძლება მალე და უმტკივნეულოდ ვნახოთ, რომ ივანიშვილიც ზუსტად ამ კლუბის წევრი გახდება და კიდევ ერთი მაგალითი იქნება იმის, თუ როგორი შეუძლებელია თანამედროვე სამყაროში დიქტატურის სწრაფი და ეფექტიანი ჩამოყალიბება, როცა სხვა პროცესები ამ ყველაფერს ხელს უშლის.
ბათუმში, რუსთაველის ქუჩაზე მსუბუქი ავტომანქანა ორ ქვეითს დაეჯახა. დაშავებული ქალები უცხო ქვეყნის მოქალაქეები არიან. შემთხვევა 8 ივლისს მოხდა.
შსს-ს პრესცენტის ინფორმაციით, გამოძიება დაიწყო სისხლის სამართლის კოდექსის 276-ე მუხლის შესაბამისად, რაც ავტოსატრანპორტო საშუალების მოძრაობის, ან ექსპლუატაციის წესების დარღვევას გულისხმობს.
პირველი საუნივერსიტეტო კლინიკის დირექტორის, ლევან რატიანის ინფორმაციით, აჭარის მთავრობის ყოფილი თავმჯდომარის, თორნიკე რიჟვაძის ჯანმრთელობის მდგომარეობა გაუმჯობესდა და ამ ეტაპზე უტარდება პროტოკოლით გათვალისწინებული კვლევები.
„პაციენტის ზოგადი მდგომარეობა ამ ეტაპზე არის დადებითი დინამიკით, კლინიკა გაუმჯობესებულია. კლინიკის გაუმჯობესება ნიშნავს, რომ ტრავმულ-ჰემორატიული შოკის კლინიკა აღარ არსებობს, ანუ ალაგებულია, ლიკვიდირებულია.
ფილტვის ხელოვნური ვენტილაციის პარამეტრები, რეჟიმები გამარტივებულია. ნევროლოგიური სტატუსის მხრივ კონტაქტი მყარდება, კონტაქტურია, ადეკვატურია. ასრულებს მარტივ დავალებებს. გრძელდება დაგეგმილი მკურნალობა პროტოკოლის გათვალისწინებით“, – აცხადებს ლევან რატიანი.
თორნიკე რიჟვაძე ცეცხლსასროლი იარაღიდან მიყენებული ჭრილობით შეიყვანეს კლინიკაში. ექიმების განმარტებით, მას ფილტვი აქვს დაზიანებული. ბოლო მონაცემებით, თორნიკე რიჟვაძის მდგომარეობა სტაბილურად მძიმეა, იგი მართვით სუნთქვაზე იმყოფება.
მომხდარიდან მალევე პროსახელისუფლებო მედიებმა გაავრცელეს წერილი, რომელიც თითქოს თორნიკე რიჟვაძემ თვითმკვლელობის მცდელობამდე დაწერა და რომელშიც რიჟვაძემ ბიძინა ივანიშვილს და კობახიძეს ოჯახის დაცვა სთხოვა.
ინფორმაცია იმის შესახებ, რომ თორნიკე რიჟვაძემ თვითმკვლელობის სცადა, შსს-მ 7 ივლისს გაავრცელა.
ბათუმში, ტაძრის ქუჩაზე მშენებლობიდან მუშა ჩამოვარდა. სასწრაფო-სამედიცინო სამსახურის პრესცენტრის ინფორმაციით, დაშავებული კაცი ბათუმის რესპუბლიკურ საავადმყოფოში გადაიყვანეს.
კლინიკაში ამ ეტაპზე ვერ გვაწვდიან ინფორმაციას დაშავებულის ჯანმრთელობის მდგომარეობის შესახებ.
ტაძრის ქუჩაზე მცხოვრები მოქალაქეების თქმით, საცხოვრებელი კორპუსის მშენებლობა თითქმის დასრულებულია და ოჯახების ნაწილი ამ კორპუსში უკვე ცხოვრობს. ხარაჩოზე მყოფი მუშა კორპუსის ფასადს ღებავდა.
„ბათუმელები“ ელოდება ინფორმაციას შინაგან საქმეთა სამინისტროდან.
„რეჟიმი უფრო და უფრო მეტი სისასტიკით ცდილობს, თავი გადაირჩინოს, გადაარჩინოს ნაძარცვი და ნაქურდალი,“ – მიიჩნევს პოლიტიკოსი, თბილისის პოლიტიკური სწავლების სკოლის დამფუძნებელი, „ქართული ოცნების“ ყოფილი აღმასრულებელი მდივანი არმაზ ახვლედიანი. მას თორნიკე რიჟვაძეზე ვესაუბრეთ, რომელიც ცეცხლსასროლი იარაღითაა დაჭრილი და შსს-ს ვერსიით, თვითმკვლელობა სცადა.
„ის, ვინც თითქოს ყველაზე დაცულად გრძნობს თავს, ვინც ამ რეპრესიული სისტემის შემოქმედია, ხვალ შეიძლება თავად გახდეს მსხვერპლი, რადგან ეს არის ტოტალური, აღვირახსნილი უსამართლობა, უკანონობა. ჩემთვის თორნიკე რიჟვაძის შემთხვევა ამის დემონსტრირებაა…
ჯერ კიდევ არის მცირე შანსი, რომ შევძლოთ ამ კრიმინალური ბანდისგან საქართველოს გათავისუფლება,“ – ამბობს არმაზ ახვლედიანი.
„ბათუმელებმა“ მასთან ინტერვიუ ჩაწერა.
ბატონოარმაზ, რაზე მიუთითებს თქვენთვისთორნიკერიჟვაძისშემთხვევა? აჭარისმთავრობისყოფილითავმჯდომარედაჭრილიადაკლინიკაშირჩება.
ამ უკიდურესად სასტიკი, ავტორიტარული სისტემის პირობებში ნებისმიერი ადამიანი დაუცველია. ის, ვინც თითქოს ყველაზე დაცულად გრძნობს თავს, ვინც ამ რეპრესიული სისტემის შემოქმედია, ხვალ შეიძლება, თავად გახდეს მსხვერპლი, რადგან ეს არის ტოტალური, აღვირახსნილი უსამართლობა, უკანონობა. ჩემთვის თორნიკე რიჟვაძის შემთხვევა ამის დემონსტრირებაა.
როგორც გითხარით, დღეს ნებისმიერი ადამიანი დაუცველია, მათ შორის რეჟიმის შემოქმედიც, შემკვეთიც და შემსრულებელიც. ასეთ სასტიკ, კრიმინალურ სისტემებს ეს ისტორიულად ახასიათებს. ამის არაერთი მაგალითია წარსულში.
თორნიკე რიჟვაძის შემთხვევა გვეუბნება, რა არის ახლა მთავარი! გარდა იმისა, რომ ბატონი თორნიკე სწრაფად და სრულად უნდა გამოჯანმრთელდეს, ვერაგი, ანტიჰუმანური, ანტიეროვნული, მახინჯი, რეპრესიული სისტემა უნდა განადგურდეს, რომ ასეთი სისასტიკე, ასეთი დანაშაული, ანომალია აღარ ხდებოდეს საქართველოში.
მაშინ, როცა ქვეყანაში ყველა და ყველაფერი დაქვემდებარებულია ერთ არალეგიტიმურ ცენტრს, დამაჯერებელი აღარაა არაფერი – ცხადია, არც წერილი და არც მისი შინაარსი!
ზედმეტია საუბარი ობიექტურობასა და ობიექტურ გამოძიებაზე, იმ ადამიანების მხრიდან წესიერებაზე, რომელთაგანაც ეს განცხადებები გვესმის. ამ პირობებში, რა თქმა უნდა, ვერაფერს ვირწმუნებთ!
ჩვენ ბათუმელები ვართ, ვინ ვინ და ყველაზე უკეთ ვიცით, სასტიკი, ავტორიტარული რეჟიმის პირობებში რა დღეში აღმოჩნდა ჩვენი ქალაქი, ჩვენი რეგიონი… ბათუმი ამათი დანაშაულებრივი ექსპერიმენტის პოლიგონად იქცა. კორუფციამ მიიღო წარმოუდგენელი მასშტაბი. ქალაქი, უბრალოდ, გავერანდა, ბიზნეს-პოლიტიკურმა გარიგებებმა სრულად უგულებელყო, ფეხქვეშ გათელა ბათუმელების ინტერესები.
ივანიშვილის კრიმინალური დაჯგუფება ცდილობს მოაწყოს ქუჩური, კრიმინალური გარჩევები: თავად კრიმინალები ებრძვიან კრიმინალს, თავად კორუფციონერები ებრძვიან კორუფციას. რა თქმა უნდა, ეს ანომალიაა. მთელი ქვეყანა მოიცვა გაუგონარმა კორუფციამ. რეჟიმი უფრო და უფრო მეტი სისასტიკით ცდილობს, თავი გადაირჩინოს, გადაარჩინოს ნაძარცვი და ნაქურდალი.
რეჟიმი ინარჩუნებს გავლენებს ძალაუფლების მიტაცებით. სწორედ ამიტომაა, რომ გაუქმებულია დემოკრატია, გაუქმებულია სამართლიანი სასამართლო და ყველაფერი ჯანსაღი, რაც ჯერ კიდევ აქა-იქ შემოგვრჩა ქვეყანაში, ამ პოლიციური რეჟიმის პირდაპირი სამიზნეა. მითქვამს და გავიმეორებ: მზია ამაღლობელი დღეს ციხეშია სწორედ იმიტომ, რომ ამ რეჟიმისთვის ძალიან მწარე აღმოჩნდა მისი და მისი მედიასაშუალების მართალი, ობიექტური მხილება.
მათი სამიზნე ვართ ყველა, ვინც ვეწინააღმდეგებით რეჟიმს!
არ გამოვრიცხავ, ცხადია. ეს არის ქვეყანა, სადაც არც ობიექტური გამოძიება არსებობს და არც პოლიტიკური კონიუნქტურისგან თავისუფალი სასამართლო. ასეთი გარჩევები მიღებულია ახლა საქართველოში, ამის ზეობა გვაქვს ქვეყანაში.
ეს ხდებოდა მანამდეც, მაგრამ ივანიშვილმა ეს ზენიტში აიყვანა.
თქვენიდაკვირვებით, რაეტაპზეაახლაივანიშვილისრეჟიმი? თქვენახსენეთ, რომ „რეჟიმითავისგადარჩენასცდილობს“. იქნებპირიქით, ამმეთოდებითივანიშვილიცდილობსტოტალურიშიშისდამკვიდრებას „ოცნების“ დაჯგუფებაში, რომრეჟიმიარავისდაინდობს?
ეს ავტორიტარიზმის ყველაზე მახინჯი ფორმაა, რომელიც უკვე დამკვიდრდა და სწრაფად იხვეწება სისასტიკესა და ვერაგობაში. შესაბამისად, თუ საზოგადოება და მის მიერ შერჩეული ახალი პოლიტიკური ძალები დროულად, უმოკლეს ვადაში ვერ შეძლებენ საქართველოს ამ უბედურებისგან გათავისუფლებას, შემიძლია გარანტირებულად გითხრათ, რომ მრავალი წლის განმავლობაში ჩავრჩებით კორუფციისა და რუსული ავტორიტარიზმის ამ გაუგონარ ჭაობში და იქიდან ამოსვლა იქნება ძალიან რთული! რაც დრო გავა, მით რთული იქნება ეს!
უნდა ვხდებოდეთ, რომ არაფერი ეროვნული, არაფერი სახელმწიფოებრივი, არაფერი ადამიანზე ორიენტირებული ამათ არც ერთ ქმედებაში არ არის, პირიქით კია, ნამდვილად!
ჯერ კიდევ არის მცირე შანსი, რომ შევძლოთ ამ კრიმინალური ბანდისგან საქართველოს გათავისუფლება, არამხოლოდ გათავისუფლება, არამედ მმართველობაში ისეთი ხალხის მოყვანა, ვინც არსით ეწინააღმდეგება ანომალიურს, არადემოკრატიულს, უსამართლოს, არაჰუმანურს…
ჩვენ გვჭირდება საქართველოში სწორედ პოლიტიკოსთა ასეთი გუნდი, მხარდაჭერილი საზოგადოების მიერ, რომელიც უმოკლეს ვადებში შეძლებს ფუნდამენტური რეფორმების დაწყებას და ბოლომდე მიყვანას; შეძლებს სამართლიანი წესრიგის დამყარებას, რის შემდეგაც საქართველო დადგება მოუბრუნებლად და უალტერნატივოდ სწორი, სამართლებრივი, ევროპული განვითარების გზაზე. წერტილი დაესმება ბათუმსა და ყველგან, საქართველოში აღვირახსნილ უკანონობას, როცა ბიზნესის და პოლიტიკის კრიმინალური გარიგება წესად იქცა.
ამას შეუძლებელს გახდის სწორი სისტემა და, რაც მთავარია, სისტემის შემოქმედი – თავდადებული, პატრიოტი, კეთილსინდისიერი ადამიანები, რომლებსაც ეცოდინებათ, რომ რაც უნდა ვარსკვლავები ჩამოწყვიტონ ციდან, მათი მმართველობის დრო მაინც შეზღუდულია, განსაზღვრულია სამართლიანი ნორმებით, კონკრეტული ვადითა და შეკვეთით. აი, ეს სჭირდება საქართველოს.
ეს იყო ბიძინა ივანიშვილის ამოცანაც 2012 წელს, როდესაც მიხეილ სააკაშვილი შეცვალა, მაგრამ მან გაცილებით უარესი ჩაიდინა, ვიდრე სააკაშვილმა.
ოპოზიციის ამ ორ ნაწილს შორის დიდი სხვაობაა. ვერაფრით გავიზიარებ ამ სპეცოპერაციაში, ივანიშვილმა არჩევნები რომ დაარქვა, მონაწილეობას.
საუბედუროდ, დღევანდელ ოპოზიციურ სპექტრს არ შეუძლია საქართველოში რადიკალური ცვლილების მიღწევა, მას არ შესწევს უნარი, ივანიშვილის რეჟიმი დაასრულოს და სწორი გზით ატაროს ქვეყანა. ამას სჭირდება ახალი პოლიტიკური დღის წესრიგის შემქმნელი პოლიტიკური კლასი, რომელიც ჯერჯერობით არ არსებობს – სიმართლე ეს არის, მაგრამ მისი შექმნა შესაძლებელია ამ პოლიციური, გაუსაძლისი რეჟიმის პირობებშიც კი, ეს ჯერ კიდევ შესაძლებელია! მხოლოდ ასე შევძლებთ ამ ანტიეროვნული რეჟიმის დამარცხებას.
ეს უნდა შევძლოთ უმოკლეს დროში ან ქვეყანა მრავალი წლით ჩარჩება უძრაობის, რეპრესიებისა და უპერსპექტივობის ჭაობში.
საზღვაო ტრანსპორტის სააგენტოს დირექტორის, ალექსი ახვლედიანის ადვოკატის თქმით, მისი დაცვის ქვეშ მყოფი ბრალს არ აღიარებს.
გამოძიება ალექსი ახვლედიანს კუთვნილი იარაღის დაუდევრად შენახვას ედავება, რომელი იარაღითაც, შსს-ს ვერსიით, აჭარის მთავრობის ყოფილმა თავმჯდომარემ, თორნიკე რიჟვაძემ თვითმკვლელობა სცადა.
პროკურატურამ ახვლედიანს ბრალდება უკვე წარუდგინა.
საზღვაო ტრანსპორტის სააგენტოს დირექტორს გამოძიება სისხლის სამართლის კოდექსის 238-ე მუხლით ჩადენილ დანაშაულს ედავება, რაც გულისხმობს ცეცხლსასროლი იარაღის დაუდევრად შენახვას, რამაც მძიმე შედეგი გამოიწვია.
წინასწარი დაკავების იზოლატორში მყოფი ალექსი ახვლედიანი მისმა ადვოკატმა, ლალი აფციაურმა მოინახულა, შემდეგ კი ჟურნალისტებთან კომენტარი გააკეთა:
„ბრალთან დაკავშირებით ჩვენი პოზიცია ასეთია: ვინაიდან ცეცხლსასროლი იარაღი ინახებოდა სპეციალურ ქეისში, დახურულ მდგომარეობაში, ცალკე ოთახში.
ფანჩატური ვის როგორ წარმოუდგენია, არ ვიცი, მაგრამ (მე რაც მაქვს ნანახი და შემდგომში ალბათ, თქვენთვისაც გახდება ცნობილი სურათების მეშვეობით), ეს არის იზოლირებული, ჩვეულებრივი შენობა, უბრალოდ შუშით შემინულია და იკეტება კარი.
ეს ქეისი ჰქონდა დატოვებული ამ ოთახში. ყველაზე მარტივად შემიძლია აგიხსნათ, რომ არის იქ კამერების ჩანაწერები, ალბათ გასაჯაროვდება და ნახავთ თქვენი თვალით.
კამერები აქვს ამოღებული გამოძიებას, სადაც ჩანს ყველაფერი ნათლად, რეალურად, იმას, რასაც მე თქვენ გიყვებით,“ – თქვა ალექსი ახვლედიანის ადვოკატმა, ლალი აფციაურმა ჟურნალისტებთან საუბრისას.
ლალი აფციაურის თქმით, ახვლედიანი იარაღს სპეციალურ ქეისში ინახავდა.
„ვიმეორებ კიდევ ერთხელ, იარაღს ინახავდა სპეციალურ ქეისში, რომელსაც ატარებდა თან. არ მგონია ახლა, რომ სპეციალური ქეისით ვიღაცა დადიოდეს სააბაზანოში. დატოვა დახურულ სივრცეში. არ მიიჩნევს, რომ დაუდევრად დატოვა, იმიტომ, რომ თავის საკუთარ სახლში, დახურულ, ჩაკეტილ სივრცეში აქვს დატოვებული. აღარავინ არ იყო [ფანჩატურში], წასული იყო… შესაძლებელია იქამდე იყვნენ სტუმრები, მე არ ვიცი. იმ კონკრეტულ შემთხვევაში არ იმყოფებოდა არავინ და ამას ნახავთ კამერებში,“ – თქვა ლალი აფციაურმა.
ჟურნალისტების კითხვაზე, ჩანს თუ არა კადრებში თორნიკე რიჟვაძე, ლალი აფციაურმა თქვა: „დიახ, ეს ყველაფერი ჩანს“.
ალექსი ახვლედიანისთვის აღკვეთის ღონისძიების შეფარდების საკითხზე სასამართლო პროცესი სავარაუდოდ დღეს გაიმართება.
რუსულ მედიაში ინფორმაცია ვრცელდება რუსეთის ტრანსპორტის სამინისტროს კიდევ ერთი თანამშრომლის სიკვდილის შესახებ.
ანდრეი კორნეიჩუკი რუსეთის სარკინიგზო ტრანსპორტის ფედერალური სააგენტოს ერთ-ერთი დეპარტამენტის ქონების მართვის განყოფილების უფროსის მოადგილის პოზიციას იკავებდა.
მედია Baza-ს ცნობით, 42 წლის კორნეიჩუკი ტრანსპორტის სამინისტროს შენობაში გარდაიცვალა, მას შემდეგ, რაც ცნობილი გახდა მინისტრის თვითმკვლელობის შესახებ. წყაროების ცნობით, ის შეხვედრის დროს მოულოდნელად წამოდგა, შემდეგ იატაკზე დაეცა და გარდაიცვალა.
რუსული პროპაგანდისტული მედია RIA წერს, რომ წინასწარი ინფორმაციით, გარდაცვალების მიზეზი გულის მწვავე უკმარისობაა.
გუშინვე, 7 ივლისს, ინფორმაცია გავრცელდარომ საკუთარ მანქანაში აღმოაჩინეს რუსეთის ტრანსპორტის ყოფილი მინისტრის რომან სტაროვოიტის ცხედარი, რომელსაც ჭრილობა ცეცხლსასროლი იარაღიდან ჰქონდა მიყენებული. რუსეთის საგამოძიებო კომიტეტი მთავარ ვერსიად თვითმკვლელობას განიხილავს.
სტაროვოიტი პუტინის ბრძანებით 7 ივლისს პუტინის ბრძანებით გაათავისუფლეს თანამდებობიდან. გადაწყვეტილების მიზეზი დოკუმენტში არ იყო მითითებული.
მედიის ცნობით, ინფორმაციით, სტაროვოიტის ტრანსპორტის მინისტრის პოსტიდან გათავისუფლებაზე გავლენა მოახდინა გამოძიებამ, რომელიც ეხებოდა კურსკის ოლქის საზღვართან გამაგრებითი ნაგებობების მშენებლობის დროს შესაძლო თანხის გაფლანგვას, სატრანსპორტო კოლაფსს და სფეროში სტაგნაციას.
მანამ, სანამ 2024 წლის მაისში ტრანსპორტის მინისტრად დაინიშნებოდა, რომან სტაროვოიტი კურკის ოლქის გუბერნატორი იყო.
Baza წერს, რომ რომან სტაროვოიტს, შესაძლოა სუიციდი ჩაედინა 5-6 ივლისის ღამეს, შესაბამისად, გამოდის, რომ პუტინმა მისი თანამდებობიდან გათავისუფლების ბრძანებას ხელი მისი სიკვდილის შემდეგ მოაწერა.
საქართველოს პროკურატურა საზღვაო ტრანსპორტის სააგენტოს დირექტორის, ალექსი ახვლედიანისადმი წარდგენილ ბრალდებაში წერს თავის ვერსიაზე, თუ როგორ სცადა, სავარაუდოდ თვითმკვლელობა, აჭარის მთავრობის ყოფილმა თავმჯდომარემ, თორნიკე რიჟვაძემ.
პროკურატურა წერს, რომ გამოძიების თანახმად, თორნიკე რიჟვაძე 6 ივლისს, საღამოს საათებიდან სტუმრად იმყოფებოდა ქალაქ საგარეჯოში, თავისი მეგობრის, ალექსის ახვლედიანის სახლში.
პროკურატურის ვერსიით, თორნიკე რიჟვაძემ, 7 ივლისს, შუაღამის შემდეგ, დაახლოებით 01:10 საათიდან 01:30 საათამდე პერიოდში, მალულად აიღო ალექსი ახვლედიანის კუთვნილი „გლოკის“ სისტემის ცეცხლსასროლი იარაღი, რომელიც ახვლედიანს დაუდევრად ჰქონდა დატოვებული თავისი საცხოვრებელი სახლის მიმდებარედ არსებულ შემინულ ფანჩატურში, „შემდეგ ასევე მალულად გადაიტანა სტუმრისთვის განკუთვნილ საძინებელ ოთახში და მარტო დარჩენილმა, თვითმკვლელობის მიზნით ისროლა გულმკერდის არეში, რამაც მძიმე ხარისხის ჯანმრთელობის დაზიანება გამოიწვია“.
ინფორმაცია იმის შესახებ, რომ თორნიკე რიჟვაძემ თვითმკვლელობის სცადა, 7 ივლისს გაავრცელა შსს-მ.
თორნიკე რიჟვაძე ცეცხლსასროლი იარაღიდან მიყენებული ჭრილობით შეიყვანეს კლინიკაში. ექიმების განმარტებით, მას ფილტვი აქვს დაზიანებული. ბოლო მონაცემებით თორნიკე რიჟვაძის მდგომარეობა სტაბილურად მძიმეა, იგი მართვით სუნთქვაზე იმყოფება.
მომხდარიდან მალევე პროსახელისუფლებო მედიებმა გაავრცელეს წერილი, რომელიც თითქოს თორნიკე რიჟვაძემ თვითმკვლელობის მცდელობამდე დაწერა და რომელშიც რიჟვაძემ ბიძინა ივანიშვილს და კობახიძეს ოჯახის დაცვა სთხოვა.
პროკურატურამ ცეცხლსასროლი იარაღის დაუდევრად შენახვის ფაქტზე, რამაც მძიმე შედეგი გამოიწვია, საზღვაო ტრანსპორტის სააგენტოს დირექტორს, ალექსი ახვლედიანს, ბრალდება წარუდგინა.
„საქართველოს შინაგან საქმეთა სამინისტროს ცენტრალური კრიმინალური პოლიციის მიერ სისხლის სამართლის საქმეზე ჩატარებული გამოძიებით დადგინდა, რომ 6 ივლისს, საღამოს საათებიდან თ.რ. სტუმრად იმყოფებოდა ქალაქ საგარეჯოში, თავისი მეგობრის ა. ა.-ს სახლში.
7 ივლისს, დაახლოებით 01:10 საათიდან 01:30 საათამდე პერიოდში, თ.რ.-მ მალულად აიღო ა. ა.-ს კუთვნილი „გლოკის“ სისტემის ცეცხლსასროლი იარაღი, რომელიც ა.ა.-ს დაუდევრად ჰქონდა დატოვებული თავისი საცხოვრებელი სახლის მიმდებარედ არსებულ შემინულ ფანჩატურში, შემდეგ ასევე მალულად გადაიტანა სტუმრისთვის განკუთვნილ საძინებელ ოთახში და მარტო დარჩენილმა, თვითმკვლელობის მიზნით ისროლა გულმკერდის არეში, რამაც მძიმე ხარისხის ჯანმრთელობის დაზიანება გამოიწვია.
სამართალდამცველებმა ა.ა. იმავე დღეს დააკავეს.
დაკავებულს ბრალდება საქართველოს სისხლის სამართლის კოდექსის 238-ე მუხლით (ცეცხლსასროლი იარაღის დაუდევრად შენახვა, რამაც მძიმე შედეგი გამოიწვია) წარედგინა, რაც სასჯელის სახედ და ზომად სამ წლამდე თავისუფლების აღკვეთას ითვალისწინებს.
ეკონომიკის სამინისტრო არ პასუხობს კითხვას, შეუჩერდა თუ არა უფლებამოსილება საზღვაო ტრანსპორტის სააგენტოს დირექტორს, ალექსი ახვლედიანს.
საზღვაო ტრანსპორტის სააგენტო სწორედ ეკონომიკის სამინისტროს დაქვემდებარებაშია.
“ეკონომიკისა და მდგრადი განვითარების სამინისტრო აღნიშნულ საკითხთან დაკავშირებით სრულად იცავს შრომის კანონმდებლობას და იმოქმედებს სასამართლოს მიერ მიღებული შესაბამისი გადაწყვეტილების საფუძველზე,” – უთხრეს “ბათუმელებს” სამინისტროში.
ეკონომიკის მინისტრი ნიშნავს და ათავისუფლებს სააგენტოს დირექტორს.
პროკურატურის ინფორმაციით, ახვლედიანისთვის ბრალი ჯერ არ წარუდგენიათ.
„ჯერ არის ვადა, გავავრცელებთ რელიზს“, – მოკლე განმარტებით შემოიფარგლა პროკურატურის პრესსამსახური ალექსი ახვლედიანის შესახებ დასმულ კითხვაზე.
ალექსი ახვლედიანი გუშინ, 7 ივლისს დააკავეს მას შემდეგ, რაც საგარეჯოში მდებარე მის სახლში, აჭარის მთავრობის ყოფილმა თავმჯდომარემ, თორნიკე რიჟვაძემ, გამოძიების ვერსიით, თვითმკვლელობა სცადა.
გამოძიების ვერსიით, საზღვაო ტრანსპორტის სააგენტოს დირექტორს ეკუთვნოდა იარაღი, საიდანაც გაისროლეს.
შინაგან საქმეთა სამინისტრო ალექსი ახვლედიანს ცეცხლსასროლი იარაღის დაუდევრად შენახვისთვის, საქართველოს სისხლის სამართლის კოდექსის 238-ე მუხლით ედავება.
ალექსი ახვლედიანი თავდაპირველად საგარეჯოს პოლიციის განყოფილებაში, მოგვიანებით კი თბილისში, დიღმის იზოლატორში გადმოიყვანეს.
როგორც ალექსი ახვლედიანის ადვოკატმა, ლალი აფციაურმა ტვ პირველს უთხრა „ალექსი ახვლედიანს მძიმე ემოციური მდგომარეობა აქვს“.
სამოქალაქო აქტივისტს ალბი კორძაიას ბათუმის საქალაქო სასამართლოს მოსამართლემ, ეკატერინე კახნიაშვილმა 5 დღიანი პატიმრობა მიუსაჯა.
სასამართლო პროცესი ბათუმში გაიმართა. სხდომას ალბი კორძაია არ ესწრებოდა.
„სასამართლო ბიძინა ჟამერაშვილის საქმეზე ჩატარდა დღეს, ბათუმის საქალაქო სასამართლოში. მოსამართლე ეკატერინე კახნიაშვილი. განაჩენი პატიმრობა 5 დღე.
ვემზადები, მივდივარ ზაჰესის იზოლატორთან,“ – დაწერა აქტივისტმა სასამართლო პროცესზე გამოტანილი გადაწყვეტილების შემდეგ.
28 ივნისს ალბი კორძაიამ ფეისბუქზე გაავრცელა ვიდეო, თუ როგორ მოსთხოვა მათე დევიძის წინააღმდეგ მიცემული ჩვენების გამო პასუხი პოლიციელ ბიძინა ჟამერაშვილს.
ალბი კორძაია ვიდეოში, რაც დღეს, 8 ივლისს, მისი პატიმრობის საფუძველი გახდა, პოლიციელ ბიძინა ჟამერაშვილს მიმართავს და ეკითხება:
„ბიჭები ციხეში უნდა იყვნენ და შენ ბათუმში უნდა ისვენებდე?! ბიჭები გყავს ციხეში გაშვებული შე უნამუსო, შე ნამუსგარეცხილო. გამოხვედი, ცრუ ჩვენება მიეცი სასამართლოზე და მაგის მერე ბათუმში ისვენებ ბიჭო,“ – ისმის ვიდეოში ალბი კორძაიას ხმა.
„დიდი პრემია ავიღე“, – ირონიულად პასუხობს მას ამავე ვიდეოში ბიძინა ჟამერაშვილი.
ვიდეო თავად აქტივისტმა გადაიღო და გაავრცელა.
ვიდეოს გავრცელებიდან ორ დღეში, 30 ივნისს, ალბი კორძაიამ დაწერა, რომ საპატრულოდან დაურეკეს და აცნობეს, რომ ბიძინა ჟამერაშვილი მას შეურაცხყოფის მიყენებას ედავებოდა.
რადგან სადავო ეპიზოდი ბათუმში მოხდა, საქმე ბათუმის საქალაქო სასამართლომ განიხილა და მოსამართლე ეკატერინე კახნიაშვილმა აქტივისტი ხუთდღიან პატიმრობაში გაუშვა.
აქტივისტ ალბი კორძაიას ბოლო ერთ თვეში ადმინისტრაციული პატიმრობა მეორედ შეუფარდეს.
ბიძინა ჟამერაშვილი მათე დევიძის საქმის ფიგურანტი პოლიციელია. ის 7 თებერვალს დაკითხა სასამართლომ 21 წლის მათე დევიძის სასამართლო პროცესზე.
ბიძინა ჟამერაშვილი საქმეში დაზარალებულადაა ცნობილი.
მათე დევიძეს მოსამართლე ნინო გალუსტაშვილმა საპატიმრო სასჯელის სახით 4 წელი და 6 თვე მიუსაჯა.
ჭიათურელი მაღაროელი მერაბ სარალიძე 20 დღეა ციხეში, პროტესტის ნიშნად შიმშილობს.
სარალიძე 29 აპრილს, გამთენიისას დააკავეს. გამოძიება მას სისხლის სამართლის კოდექსის 118-ე მუხლის მე-2 ნაწილით გათვალისწინებული დანაშაულის ჩადენას ედავება, რაც ჯგუფურად, ჯანმრთელობის განზრახ ნაკლებად მძიმე დაზიანებას გულისხმობს.
მერაბ სარალიძესთან ერთად დაკავებულია კიდევ სამი მაღაროელი – გიორგი მეფარიძე, აჩიკო ჭუმბურიძე და თენგო გველესიანი.
მათ 4-დან 6 წლამდე პატიმრობა ემუქრებათ.
დღეს, 8 ივლისს, მერაბ სარალიძის მეუღლე ჟანა გოგატიშვილი ფეისბუქზე გამოეხმაურა მეუღლის შიმშილობას. მისი თქმით, მერაბის ჯანმრთელობის მდგომარეობა მძიმეა.
„როცა მე და მერაბმა ოჯახი შევქმენით, დედა უკვე გარდაცვლილი ჰყავდა. ობლობაში გაიზარდა, დედისერთაა. არ გვქონდა საკუთარი ჭერი. შრომის იმედად დავიწყეთ თანაცხოვრება. ყველაფერს აკეთებდა, რომ შეგვძლებოდა შვილებისთვის კარგი მომავალი შეგვექმნა. მაშინაც არ აცდენია გზას, არ დაუკარგავს სინდისი და პატიოსნება, როცა უკიდურესად გვიჭირდა.
შრომით ვზრდით ორ შვილს, ვიყიდეთ სახლი, ფეხზე დავდექით და საუკეთესო თუ არა, ნორმალურ პირობებში ვაგრძელებდით ცხოვრებას.
ახლა ციხეში შიმშილობს და ძალიან მძიმეა მისი მდგომარეობა. განა რას ითხოვდნენ უსამართლოს, ჩვენც ხომ ადამიანები ვართ, ურთულეს პირობებში სიცოცხლის ფასად უწევთ შრომა. ორჯერ ძლივს გადაურჩა სიკვდილს. ერთხელ დიდი ქვა დაეცა, მძიმე ტვინის შერყევით იწვა. კასკა რომ არა, ალბათ ვერც გადარჩებოდა.
ასევე შიმშილობენ მისი მეგობრები კარავში. სამს პირი აქვს ამოკერილი, მათი მდგომარეობაც ყოველ დღე მძიმდება.
ძალიან მიჭირს ამ რეალობის გამკლავება. ჯანმრთელობის მდგომარეობაც არ მიწყობს ხელს, რომ ორი შვილის მარტო რჩენა და გაზრდა შევძლო. პასუხებს ვეღარ ვპოულობ ჩემი შვილების შეკითხვებზე.
ბიჭი წელს შედის სკოლაში, სულ მეკითხება მამიკოს ამბავს, მოენატრა. გოგო მე-6 კლასში გადავიდა, მამას ტელეფონზე ვერ ესაუბრება, ტირის და ნერვიულობს ბავშვი. მანამდეც ჰქონდა ნერვული პრობლემები, მაგრამ ახლა გაუმძაფრდა, ექიმთან დამყავს ამის გამო.
ჩვენ ერთმანეთი გვჭირდება ცხოვრებისთვის, მეტს არაფერს ვითხოვთ.
მივმართავ ყველას, თუკი შეგრჩათ რაიმე ადამიანური, მიიტანოთ გულთან ჩემი და ჩემი თანამოქალაქეების გასაჭირი!
გათავისუფლდნენ უსამართლოდ დაკავებული მერაბ სარალიძე, აჩიკო ჭუმბურიძე, თენგო გველესიანი, გიორგი ნეფარიძე – მშრომელი, პატიოსანი ხალხი, რომელთაც კარგის მეტი არასდროს არაფერი სდომებიათ ქალაქისთვის“, – წერს ფეისბუქზე ჟანა გოგატიშვილი.
15 დღეზე მეტია პროტესტის ნიშნად შიმშილობს მაღაროელი ტარიელ მიქაცაძეც, რომელიც რამდენიმე დღის წინ ცუდად გახდა და კლინიკაში გადაიყვანეს. ჯანმრთელობის გაუარესების გამო მოუწია კლინიკაში გადაყვანა მირზა ლოლაძესაც, რომელსაც პირი აქვს ამოკერილი. კლინიკიდან გამოწერის შემდეგ ისინი შიმშილობას კვლავ აგრძელებენ.
მოშიმშილე და დაკავებული მაღაროელები „ჯორჯიან მანგანეზის“ მაღაროებში მუშაობდნენ.
გიორგი მეფარიძე კი შუქრუთის მცხოვრებია და უკვე წლებია, სოფელ შუქრუთში კომპანიის სამთო-მოპოვებითი საქმიანობის შედეგად გამოწვეულ ზიანს და სახლების დანგრევას აპროტესტებს.
ჭიათურელი მაღაროელების პროტესტი მას შემდეგ დაიწყო, რაც „ჯორჯიან მანგანეზმა“, რომლის მფლობელობაშია ყველა მაღარო ჭიათურაში, მუშაობა შეაჩერა და თანამშრომლები ნაწილობრივ – 60%-იან ანაზღაურებაზე გადაიყვანა, თუმცა კომპანია დასაქმებულებს არც ამ თანხას უხდის და აღარც სამუშაოების განახლებას აპირებს.
აჭარის მთავრობის ყოფილი თავმჯდომარის, თორნიკე რიჟვაძის ჯანმრთელობის მდგომარეობა სტაბილურად მძიმეა.
ამის შესახებ პირველი საუნივერსიტეტო კლინიკის კლინიკურმა დირექტორმა, ლალი ტურძელაძემ განაცხადა „ინტერპრესნიუსთან“.
მისი თქმით, თორნიკე რიჟვაძის ჯანმრთელობის მდგომარეობა სტაბილურად მძიმე რჩება და იგი კვლავ მართვით სუნთქვაზე იმყოფება.
7 ივლისს, შსს-მ გაავრცელა განცხადება აჭარის მთავრობის ყოფილი თავმჯდომარის თორნიკე რიჟვაძის მიერ თვითმკვლელობის მცდელობაზე.
თორნიკე რიჟვაძე ცეცხლსასროლი იარაღიდან მიყენებული ჭრილობით შეიყვანეს კლინიკაში. შსს-ს მიერ გავრცელებული ინფორმაციის თანახმად, ექიმების განმარტებით, მას ფილტვი აქვს დაზიანებული.
მომხდარიდან მალევე პროსახელისუფლებო მედიებმა გაავრცელეს წერილი, რომელიც თითქოს თორნიკე რიჟვაძემ თვითმკვლელობის მცდელობამდე დაწერა და რომელშიც რიჟვაძე ბიძინა ივანიშვილს და კობახიძეს ოჯახის დაცვა სთხოვა.
გარემოს ეროვნული სააგენტოს აჭარის რეგიონული ჰიდრომეტეოროლოგიური ობსერვატორიის ინფორმაციით, 8 ივლისის 21 საათიდან 9 ივლისის 21 საათამდე აჭარაში მოსალოდნელია ცვალებადი მოღრუბლულობა, უმეტესად უნალექოდ.
იქროლებს ცვალებადი მიმართულების ქარი 8-13 მეტრი წამში;
ჰაერის ტემპერატურა სანაპირო ზოლსა და მთიან რაიონებში:
დღისით: 25 – 30 გრადუსი სითბო
ღამით: 15 – 20 გრადუსი სითბო
მაღალმთიან ზონაში:
დღისით: 22 – 27 გრადუსი სითბო
ღამით: 8 – 13 გრადუსი სითბო
ზღვის ღელვა 2-3 ბალი იქნება, ზღვის წყლის ტემპერატურა +24 გრადუსია.
სინოპტიკოსების ცნობით, 10 და 11 ივლისს ბათუმსა და მთლიანად აჭარაში მოსალოდნელია უნალექო ამინდი.
უკრაინის შეიარაღებული ძალების გენერალური შტაბის დღევანდელი მონაცემებით, ომის დაწყებიდან 2025 წლის 8 ივლისამდე პერიოდში, რუსეთის არმიის საბრძოლო დანაკარგი არის:
ცოცხალი ძალა – დაახლოებით 1 028 610 ადამიანი [გასულ დღე-ღამეში +1 070]
ტანკი – 10 995 ერთეული [+0]
ჯავშანტექნიკა – 22 967 ერთეული [+4]
საარტილერიო სისტემა – 30 034 ერთეული [+41]
MLRS – 1 434 ერთეული [+2]
საზენიტო საბრძოლო სისტემა – 1 192 ერთეული [+0]
თვითმფრინავი – 421 ერთეული [+0]
ვერტმფრენი – 340 ერთეული [+0]
უპილოტო საფრენი აპარატის ოპერატიულ-ტაქტიკური დონე – 44 230 ერთეული [+172]
ფრთოსანი რაკეტა [ჩამოაგდეს] – 3 439 ერთეული [+0]
გემი/ნავი – 28 ერთეული [+0]
წყალქვეშა ნავი – 1 ერთეული [+0]
მანქანები და საწვავის ავზები – 54 456 ერთეული [+86]
სპეცტექნიკა – 3 927 ერთეული [+0]
უკრაინის გენერალური შტაბის განცხადებით, საომარი მოქმედებების მაღალი ინტენსივობის გამო მონაცემები იცვლება.
უკრაინის სამხედრო დანაკარგებზე ინფორმაცია განაახლა რუსეთმაც.
რუსეთის თავდაცვის სამინისტროს მიერ გავრცელებული მონაცემებით, ომის დაწყებიდან 2025 წლის 8 ივლისამდე პერიოდში სულ განადგურებულია უკრაინის:
663 თვითმფრინავი
283 ვერტმფრენი
68 251 უპილოტო საფრენი აპარატი
614 საზენიტო სარაკეტო სისტემა
24 162 ტანკი და სხვა ჯავშანტექნიკა
1 576 მრავალჯერადი სარაკეტო გამშვები
27 129 საველე არტილერია და ნაღმმტყორცნი
37 832 სპეციალური სამხედრო მანქანა
რუსეთის თავდაცვა, ამ მონაცემებთან ერთად, უკრაინის არმიის ცოცხალი ძალის დანაკარგების შესახებ სტატისტიკას არ აქვეყნებს.
ეს ის მონაცემებია, რომელსაც უკრაინა და რუსეთი ოფიციალურად ავრცელებენ, თუმცა ომის პირობებში შეუძლებელია ზუსტად გადამოწმება, რამდენად შეესაბამება მხარეების მიერ გავრცელებული ინფორმაცია დანაკარგების შესახებ რეალურ რიცხვებს.
—
რუსეთი უკრაინაში 2022 წლის 24 თებერვალს გამთენიისას შეიჭრა და სრულმასშტაბიანი ომი დაიწყო.
ამერიკის შეერთებული შტატები უკრაინისთვის თავდაცვითი იარაღის მიწოდებას განაახლებს. გადაწყვეტილება პრეზიდენტ ტრამპის ადმინისტრაციამ მიიღო რუსეთის გააქტიურებული სამხედრო მოქმედებების ფონზე.
„როიტერსის“ ცნობით, ვაშინგტონი კიევს გადასცემს ჰაერსაწინააღმდეგო თავდაცვის სისტემებს, მათ შორის Stinger-ისა და Patriot-ის ტიპის შეიარაღებას. იარაღის ზუსტი რაოდენობა ჯერჯერობით არ სახელდება.
უკრაინის პრეზიდენტის, ვოლოდიმირ ზელენსკის განცხადებით, მხარეებს შორის მოლაპარაკება მოიცავს არა მხოლოდ იარაღის მიწოდებას, არამედ ერთობლივ წარმოებასაც.
აშშ-ის პრეზიდენტმა ტრამპმა განაცხადა, რომ უკრაინას საკუთარი თავის დაცვა უნდა შეეძლოს.
პენტაგონის ცნობით, ახალი დახმარება მიზნად ისახავს უკრაინის საჰაერო თავდაცვის გაძლიერებას. მიწოდება ეტაპობრივად განხორციელდება.
ხელვაჩაურის სასამართლომ ნაწილობრივ დააკმაყოფილა სარჩელი, რომელიც ხულოს საკრებულოში ოპოზიციური ფრაქციის შექმნას ეხებოდა.
ხულოს საკრებულომ ოპოზიციონერ წევრებს ფრაქციის შექმნაზე უარი უთხრა. საკრებულოს წევრებს ფრაქციის შექმნის უფლებას კანონი აძლევს.
როგორც „ბათუმელებს“ ბესიკ შაინიძემ უთხრა, ხულოს საკრებულოს წევრმა კოალიციიდან -„ძლიერი საქართველო“, ხელვაჩაურის საქალაქო სასამართლოს მოსამართლემ, ნუგზარ მგელაძემ ნაწილობრივ დააკმაყოფილა სარჩელი. კერძოდ, მოთხოვნა დაკმაყოფილდა იმ ნაწილში, რომ ხულოს საკრებულომ ხელახლა უნდა იმსჯელოს ოპოზიციური ფრაქციის შექმნაზე.
„მოსამართლემ ასევე თქვა, რომ ფრაქციის შექმნა არ მოდის წინააღმდეგობაში კანონთან და საკრებულოს უარის თქმა საფუძველს მოკლებულია, თუმცა ის ვერ დაავალდებულებს საკრებულოს ახალი ფრაქციის შექმნას, ამაზე უნდა იმსჯელოს საკრებულომ,“ – გვითხრა ბესიკ შაინიძემ, ხულოს საკრებულოს წევრმა.
ხულოს მოქმედი საკრებულოს სამ წევრს: ბესიკ შაინიძეს პარტიიდან – „ლელო“, ზაზა ვანაძეს – „სტრატეგია აღმაშენებელი“ და მინდია რიჟვაძეს – „გახარია საქართველოსთვის“ ფრაქციის შექმნა 2024 წლის ბოლოს გადაუწყვეტიათ, მას შემდეგ, როცა გახარიას თანაგუნდელი უმაღლესი საბჭოს დეპუტატი გახდა და ოპოზიციური ფრაქცია დაიშალა.
ხულოს საკრებულომ ახალი ფრაქციის რეგისტრაციაზე 2024 წლის 23 დეკემბერს უარი თქვა. ხულოს საკრებულოს უმრავლესობა იმ არგუმენტს დაეყრდნო, რომ წინასაარჩევნოდ „სტრატეგია აღმაშენებელი“ „ნაციონალურ მოძრაობასთან“ ერთად კოალიციაში გაერთიანდა, „ნაციონალურ მოძრაობას“ კი, უკვე აქვს ფრაქცია ხულოს საკრებულოში.
თიბისიმ და Glovo-მ ერთგულ მომხმარებლებს გრძელვადიანი შეთავაზებები მოუმზადეს – 7 ივლისიდან 7 აგვისტოს ჩათვლით, Glovo-ში ახალი თიბისი ბარათით, ახალი თიბისი კონცეპტ ბარათებით ან ერთგული საკრედიტო ბარათით მინიმუმ 10-ჯერ გადახდისას, მათ ერთგულ ყულაბაში, 50 ლარი დაუბრუნდებათ.
შეთავაზება მოქმედებს Glovo-ს აპლიკაციის ნებისმიერ კატეგორიაში, ნებისმიერი ოდენობის თანხის შეკვეთაზე. მთავარია, ტრანზაქციებს შორის ინტერვალი არ იყოს 10 წუთზე ნაკლები.
შეთავაზების განმავლობაში, მომხმარებლებს 50 ლარი ერთგულ ყულაბაში ერთჯერადად დაუბრუნდებათ, საიდანაც თანხის გადარიცხვა თიბისის ნებისმიერ საკუთარ ანაგრიშზე შეუძლიათ.
აღნიშნული შეთავაზების დეტალური პირობები იხილეთ ბმულზე.
ასევე, 7 ივლისიდან, თიბისის მომხმარებელი Glovo-ში დამატებითი შეთავაზებით ისარგებლებენ- 3 თვის განმავლობაში, ახალი თიბისი ბარათით და ერთგული საკრედიტო ბარათით Glovo Prime-ის გამოწერისას, გადახდილი თანხის 100% მომენტალურად დაუბრუნდებათ, რაც იმას ნიშნავს, რომ პაკეტს სრულიად უფასოდ შეიძენენ. ახალი თიბისი კონცეპტ ბარათების მომხმარებლებისთვის კი, ამ პაკეტის 100%-იანი ქეშბექით შეძენა, 6 თვის განმავლობაში იქნება შესაძლებელი.
Glovo Prime-ის შეთავაზების დეტალური პირობების სანახავად, გადადით ბმულზე.
აიღე, ახალი თიბისი ბარათი და მუდმივად ისარგებლე გამორჩეული შეთავაზებებით.
7 ივლისს, ბიზნესმენ გიორგი რამიშვილს [„ზარალა“], რომელსაც პროკურატურა ცეცხლსასროლი იარაღის მართლსაწინააღმდეგო ტარებას ედავება, 70 000 ლარიანი გირაო დააკისრეს და სასამართლო დარბაზიდან გაათავისუფლეს.
მოსამართლე ნანა შამათავას თქმით, აღკვეთის ღონისძიების სახით ყველაზე მკაცრი სასჯელი, პატიმრობის გამოყენება არ არის საჭირო.
პროკურატურა ბიზნესმენის პატიმრობას ითხოვდა, თუმცა მოსამართლემ გადაწყვეტილება ადგილზე თათბირის შედეგად მიიღო.
ბიზნესმენი გიორგი რამიშვილი 6 ივნისს დააკავეს.
შსს-ს ცნობით, ბიზნესმენი დააკავეს გამოძიების ფარგლებში, რომელიც მიმდინარეობს სისხლის სამართლის კოდექსის 236-ე მუხლით, რაც ცეცხლსასროლი იარაღის უკანონო შენახვა-ტარებას გულისხმობს.
ბრალი, რომელსაც გიორგი რამიშვილს ედავებიან, 4-დან 7 წლამდე პატიმრობას ითვალისწინებს.
თავად გიორგი რამიშვილმა 7 ივლისს სასამართლო სხდომაზე განაცხადა, რომ „მისი შეცდომისთვის 4-დან 7 წლამდე სასჯელი ძალიან ზედმეტია“.
„ეს არის შეცდომა, რაც ნებისმიერ ადამიანს შეიძლება მოუვიდეს. უცხოეთში მივდიოდი. ჩანთიდან რამდენჯერმე რაღაც ამოვიღე კიდეც და ვერ შევამჩნიე, პატარა იარაღია. მივაწოდე ჩანთა კონტროლს და იქვე აღვნიშნე, რომ რაღაცა შეცდომა იყო. მაგრამ ასეთი რანგის შეცდომის დასჯა 4-დან 7 წლამდე ძალიან ზედმეტია.
ძალიან ვნანობ. კანონი არასდროს დამირღვევია, რაც თავი მახსოვს. ყველა ჩემს მანქანას მართავს მძღოლი. ჯარიმა კიდევ იმისაა, რომ გადაიხადო. შემთხვევით იყო ჩანთაში და რომ მცოდნოდა, ხომ 100%-იანი შანსია, რომ ამოვარდება. არ იქნებოდა ადეკვატური.
გაქცევაზე და მიმალვაზე ლაპარაკი ზედმეტია. ოჯახი აქ მყავს, 7000 თანამშრომელი. რა მჭირს გასაქცევი? არასდროს მსგავსი რამ არ მომხდარა“, – განაცხადა მან.
გიორგი რამიშვილი „სილქ როუდ“ ჯგუფის დამფუძნებელია. ასევე „ევრონიუს-ჯორჯიას“ დამფუძნებელი კომპანიის – „სილქნეტის“ სამეთვალყურეო საბჭოს თავმჯდომარეცაა.
გიორგი რამიშვილის სახელს წინა ხელისუფლების დროს სხვადასხვა ბიზნესპროექტი უკავშირდება, მათ შორის, ყველაზე ცნობილი ტრამპ თაუერის მშენებლობა, ასევე, 16 სასტუმროს მშენებლობა აჭარის სანაპირო ზოლში.
მისი სახელი 2018 წელს სპორტის მაშინდელი მინისტრის, ლევან ყიფიანისა და ყოფილი პროკურორის, ოთარ ფარცხალაძის სკანდალის შემდეგაც გამოჩნდა. მაშინ ითქვა, რომ ისინი კონფლიქტის შემდეგ გიორგი რამიშვილმა შეარიგა, რომელიც ოთარ ფარცხალაძის მეჯვარეა.
თორნიკე რიჟვაძის ამბავს აჭარის არალეგიტიმურ მთავრობაში არ იმჩნევენ. მინისტრები და დეპუტატები, რომლებიც ყოველდღიურად, ან დღეში რამდენჯერმე დებდნენ საქებარ და მაამებელ პოსტებს აჭარის მთავრობის თავმჯდომარის შესახებ და თორნიკე რიჟვაძეს „ბატონ თავმჯდომარედ“ მოიხსენებდნენ, დღეს დუმილს არჩევენ.
ან მას რამდენიმე სიტყვით გამოჯანმრთელებას უსურვებენ.
თორნიკე რიჟვაძე, აჭარის არალეგიტიმური მთავრობის უკვე ყოფილი თავმჯდომარე, კლინიკაშია ცეცხლსასროლი იარაღის გასროლით მიყენებული მძიმე ჭრილობით და მართვით სუნთქვაზე. გამოძიების ვერსიით, თორნიკე რიჟვაძემ თავის მოკვლა სცადა.
„ბათუმელებმა“ აჭარის არალეგიტიმური ხელისუფლების რამდენიმე აქტიური წარმომადგენლის ფეისბუქპროფილს გადახედა.
თორნიკე რიჟვაძის შემცველი, აჭარის არალეგიტიმური მთავრობის თავმჯდომარე, სულხან თამაზაშვილი თორნიკე რიჟვაძის შესახებ არაფერს წერს. ბოლო ფეისბუქპოსტი მას 4 დღის წინ აქვს გამოქვეყნებული – აბიტურიენტებს ულოცავს ეროვნული გამოცდების დაწყებას.
სულხან თამაზაშვილის ფეიქბუპოსტი
სულხან თამაზაშვილის მსგავსად 4 დღის წინ აქვს გამოქვეყნებული ბოლო პოსტი აჭარის არალეგიტიმური უმაღლესი საბჭოს დეპუტატს, ფატი ხალვაშს – თითქოს დღეს არაფერი მომხდარა. ცოტა ქვევით თუ ჩასქროლავთ, ნახავთ, რომ ფატი ხალვაში ზედიზედ და ყოველდღიურად აზიარებდა თორნიკე რიჟვაძის აქტივობებს – მანამდე, ვიდრე თორნიკე რიჟვაძემ ფეისბუქში დაწერა, რომ პოსტს ტოვებს და „ოცნების“ წევრად რჩება.
სქრინი ფატი ხალვაშის ფეისბუქგვერდიდან
არალეგიტიმური უმაღლესი საბჭოს დეპუტატებს შორის „ოცნებიდან“ ფეისბუქგვერდზე თორნიკე რიჟვაძის ამბავი მხოლოდ ცოტნე ანანიძეს შეუმჩნევია. „გამოჯანმრთელებას ვუსურვებ თორნიკე რიჟვაძეს“, – დაუწერია ფეისბუქგვერდზე ცოტნე ანანიძეს.
ეს დეპუტატი და „ოცნების“ არალეგიტიმური მთავრობის რომელიმე წარმომადგენელი არაფერს ამბობს რეალობაზე, სადაც აჭარის მთავრობის ყოფილი თავმჯდომარე თვითმკვლელობამდე მიდის: ვინ ემუქრებოდა მას? რატომ ვერ დაიცვა თავი „ოცნების“ ერთ-ერთმა ლიდერმა, რომელსაც მედიაში გავრცელებული ინფორმაციით 300 მილიონის ივანიშვილისთვის მიტანას სთხოვდნენ? როგორ მოხვდა თორნიკე რიჟვაძე საგარეჯოში და რატომ?
თორნიკე რიჟვაძის საქმის შესახებ არც პროკურატურას გაუვრცელებია ინფორმაცია.
„ოცნების“ რამდენიმე დეპუტატს თორნიკე რიჟვაძის შესახებ ფეისბუქში არაფერი დაუწერიათ, თუმცა მედიაში გავრცელებული ინფორმაციის მიხედვით, რამდენიმე მათგანი, მაგალითად, დავით გაბაიძე და დავით ბაციკაძე დღეს, თორნიკე რიჟვაძის მოსანახულებლად თბილისის რესპუბლიკურ საავადმყოფოში მივიდნენ.
იმის მიუხედავად, რომ აქამდე ლაშა სირაბიძე აქტიურად დებდა პოსტებს თორნიკე რიჟვაძის შესახებ, დღეს ის საერთოდ არ იმჩნევს ამბავს ყოფილი თავმჯდომარის შესახებ.
სქრინი ლაშა სირაბიძის ფეისბუქგვერდიდან
თორნიკე რიჟვაძე აქტუალური არც დავით თედორაძისთვისაა. მის ფეისბუქგვერდზე ბოლო ამბავი „მწერებთან და მღრნელებთან ბრძოლის საუკეთესო საშუალებებს ეხება“. ეს პოსტი არალეგიტიმური უმაღლესი საბჭოს დეპუტატს 24 ივნისს გამოუქვეყნებია.
სქრინი დავით თედორაძის ფეისბუქგვერდიდან
თორნიკე რიჟვაძის დაჭრას არც ის მინისტრები იმჩნევენ, რომლებიც თორნიკე რიჟვაძის მთავრობაში მინისტრები იყვნენ. აჭარის არალეგიტიმური მთავრობის ჯანდაცვის მინისტრი ნინო ნიჟარაძე, ასევე განათლების მინისტრი მაია ხაჯიშვილი თორნიკე რიჟვაძის ამბავს სოციალურ ქსელში არ გამოხმაურებიან.
თორნიკე რიჟვაძის ამბავს არც ელისო ბოლქვაძე გამოხმაურებია, აჭარის არალეგიტიმური მთავრობის კულტურის მინისტრი. მის ფეისბუქპროფილზე ბოლო ამბავი 4 მარტსაა გამოქვეყნებული: როგორ წარადგინა თორნიკე რიჟვაძემ ელისო ბოლქვაძე მინისტრად.
ელისო ბოლქვაძის ფეისბუქგვერდი
თორნიკე რიჟვაძის შესახებ ახალ ამბავს არ გამოხმაურებია ბათუმის მერის მოვალეობის შემსრულებელი გიორგი მურვანიძე, თუმცა ყოფილი მერი – არჩილ ჩიქოვანი იმ კლინიკაში მივიდა, სადაც თორნიკე რიჟვაძის გადარჩენისთვის იბრძვიან. არჩილ ჩიქოვანმაც თანამდებობა მას შემდეგ დატოვა, რაც თორნიკე რიჟვაძემ განაცხადა თანამდებობის დატოვებაზე. ორივე მათგანმა თანამდებობა ფეისბუქპოსტით დატოვა.
პოსტი გამოუქვეყნებია ბათუმის საკრებულოს თავმჯდომარეს, ირაკლი თავდგირიძეს. ის აჭარის მთავრობის ყოფილ თავმჯდომარეს გამოჯანმრთელებას გისურვებთ.
ირაკლი თავდგირიძის ფეისბუქგვერდი
რა ხდება?
შს სამინისტროს ცნობით, დღეს, 7 ივლისს, საგარეჯოში მდებარე კლინიკა „ჯეოჰოსპიტალსში“ შეიყვანეს აჭარის მთავრობის ყოფილი თავმჯდომარე, თორნიკე რიჟვაძე, რომელსაც გულმკერდის არეში ცეცხლსასროლი ჭრილობა აღენიშნებოდა.
შსს-ს მიერ გავრცელებული ინფორმაციის თანახმად, ექიმების განმარტებით, ფილტვი აქვს დაზიანებული და მისი ჯანმრთელობის მდგომარეობა სტაბილურად მძიმეა.
პროპაგანდისტული მედიის ცნობით, თორნიკე რიჟვაძემ თვითმკვლელობის მცდელობის წინ წერილი დატოვა და ივანიშვილს, ასევე ირაკლი კობახიძეს ოჯახის დაცვა სთხოვა. ამავე დროს, წერილის შესახებ შს სამინისტროს არაფერი განუცხადებია.
კლინიკა „ჯეოჰოსპიტალსში „ბათუმელებს“ დაუდასტურეს, რომ არავითარი წერილი ჟურნალისტებისთვის მედპერსონალს არ მიუწოდებია.
პირველ საუნივერსიტეტო კლინიკაში, სადაც თორნიკე რიჟვაძე მძიმე მდგომარეობით იმყოფება, უარყოფენ მედიისთვის რაიმე წერილის მიწოდებას.
პაციენტის შესახებ მსგავსი ინფორმაციის გავრცელება კანონმდებლობით აკრძალულია.
„რეჟიმი ჭამს საკუთარ შვილებს. დიქტატურა ყოველთვის ასე მთავრდება. გამონაკლისები ისტორიაში არ ყოფილა.
მიდით ქოცებო, მიაწექით. გაიფარჩაკეთ ბოლომდე თავი.
ბოლოს მაინც ჩვენ ვიმარჯვებთ!
ოლიგარქია უნდა დაემხოს!“ – წერს ნიკა გვარამია ფეისბუქზე.
ამავე სტატუსში ის მხარდაჭერას უცხადებს მსახიობ ვანიკო თარხნიშვილს, რომელსაც გუშინ, 6 ივლისს, უცნობი პირები თავს დაესხნენ და ფიზიკურად გაუსწორდნენ.
მსახიობი ამ თავდასხმას საპროტესტო სიმღერას – „ოლე ოლა“.. უკავშირებს.
„ჩემი მხარდაჭერა ყველაზე კეთილ და მშვიდობიან კაცს, ვანიკო თარხნიშვილს!
„რაც შეეხება ლელოს და გახარიას პარტიის გადაწყვეტილებას, ტალეირანის სიტყვებით რომ ვთქვათ „ეს დანაშაულზე მეტია, ეს შეცდომაა“. სამწუხაროა“ – წერს ნიკა გვარამია.
დღეს, 7 ივლისს, შსს-მ გაავრცელა განცხადება აჭარის მთავრობის ყოფილი თავმჯდომარის თორნიკე რიჟვაძის მიერ თვითმკვლელობის მცდელობაზე.
რიჟვაძე ცეცხლსასროლი იარაღიდან მიყენებული ჭრილობით შეიყვანეს კლინიკაში, ახლა ის მართვით სუნთქვაზე იმყოფება.
დღეს დილითვე პროპაგანდისტულმა მედიებმა გაავრცელეს წერილი, რომელიც თითქოს თორნიკე რიჟვაძემ თვითმკვლელობის მცდელობამდე დაწერა.
პარტია „ახალის“ ლიდერი, ნიკა გვარამია ციხეშია. მას 8 თვით მიუსაჯესპატიმრობა და 2 წლით აეკრძალა საჯარო სექტორში თანამდებობის დაკავებაც ე.წ. „წულუკიანის კომისიაზე“ გამოუცხადებლობის გამო.
დღეს, 7 ივლისს, იპოვეს რუსეთის ტრანსპორტის ყოფილი მინისტრის, რომან სტაროვოიტის ცხედარი, მას ჭრილობა ცეცხლსასროლი იარაღიდან ჰქონდა მიყენებული. რუსეთის საგამოძიებო კომიტეტი მთავარ ვერსიად თვითმკვლელობას განიხილავს.
რუსული პროპაგანდისტული მედია Tass-ი რუსეთის საგამოძიებო კომიტეტის ოფიციალურ წარმომადგენელზე, სვეტლანა პეტრენკოზე დაყრდნობით წერს, რომ ყოფილმა მინისტრმა რომან სტაროვოიტმა საკუთარ მანქანაში მოიკლა თავი ცეცხლსასროლი იარაღით.
სტაროვოიტი პუტინის ბრძანებით დღეს, 7 ივლისს დილით გაათავისუფლეს თანამდებობიდან. რუსეთის პრეზიდენტის გადაწყვეტილების მიზეზი დოკუმენტში არ იყო მითითებული.
სტაროვოიტი ტრანსპორტის სამინისტროს 2024 წლის მაისიდან ხელმძღვანელობდა.
„ნაციონალური მოძრაობის“ თავმჯდომარე თინა ბოკუჩავა ფეისბუქზე ეხმიანება დღეს, 7 ივლისს გავრცელებულ ინფორმაციას იმის შესახებ, რომ აჭარის მთავრობის ყოფილმა თავმჯდომარემ, თორნიკე რიჟვაძემ თვითმკვლელობა სცადა.
„თორნიკე რიჟვაძის შავბნელი ისტორია (თვითმკვლელობის ვერსია აშკარად შეთხზულია) ყველა ქოცისთვის გაკვეთილი და გამოფხიზლების საფუძველი უნდა იყოს – მინისტრისთვის თუ პროკურორისთვის, პროპაგანდისტისთვის თუ ბიზნესმენისთვის – ყველა ივანიშვილის მოღალატეობრივი სისტემის ჭანჭიკი ხართ და ეს სიბნელე თქვენამდეც მოვა, აუცილებლად მოვა.
ზოგს დაგიჭერთ, ზოგს ქვეყნიდან გაგაქცევთ (ვისაც არ გაგიმართლებთ, ოხანაშვილი დაგადგებათ თავზე და გაიაშვილის დახმარებით, აირზენას სპეცრეისით ისევ საქართველოში აღმოჩნდებით, გახარიასავით ხომ არ უმართლებს ყველას).
მძიმე სათქმელია და კი, ზოგს თვითმკვლელობამდე მიგიყვანთ და ზოგს უბრალოდ გაგაქრობთ.
ნურავის დაავიწყდება რა აქვს ამ კაცს ნაკეთები 90-იანი წლების რუსეთში. ან ხელისუფლებაში როგორ მოვიდა, მას 10 თვის ბარბარე რაფალიანცის ერთი ციდა გვამზე გადავლაც შეუძლია.
მისთვის ადამიანის სიცოცხლეს ჩალის ფასი აქვს, განსაკუთრებით, მათი სიცოცხლის, ვინც იყიდა.
ის ხომ თვლის, რომ თქვენი სხეულიც და სულიც მას ეკუთვნის. ასე იცის ეშმაკთან გარიგებამ. გერმანელი ავტორები უყვარს თქვენს პატრონს და „ფაუსტი“ წაიკითხეთ, ბიჭებო.
წაიკითხეთ და მერე ხმა ამოიღეთ სანამ მიწიერი ჯოჯოხეთის დასრულება ერთად შეგვიძლია ამ ქვეყანაში. სანამ განკითხვის დღეს მარტო დარჩებით.
თავისუფლება პოლიტპატიმრებს! ბოლოს მაინც ჩვენ მოვიგებთ! – წერს თინა ბოკუჩავა.
შს სამინისტროს ცნობით, დღეს, 7 ივლისს, საგარეჯოში მდებარე კლინიკა „ჯეოჰოსპიტალსში“ შეიყვანეს აჭარის მთავრობის ყოფილი თავმჯდომარე, თორნიკე რიჟვაძე, რომელსაც გულმკერდის არეში ცეცხლსასროლი ჭრილობა აღენიშნებოდა.
შსს-ს მიერ გავრცელებული ინფორმაციის თანახმად, ექიმების განმარტებით, მას ფილტვი აქვს დაზიანებული და მისი ჯანმრთელობის მდგომარეობა სტაბილურად მძიმეა.
„ქვეყანაში სრული განუკითხაობაა. ყველაფრის უფლება საკუთარ ხელში აიღეს იმ ადამიანებმა, ვისაც „მმართველი პარტია“ ჰქვია. დაწერილი სცენარებითა და მოგონილი ზღაპრებით ჰგონიათ, რომ ხალხის მოტყუება შესაძლებელია,“ – წერს ფეისბუქზე სალომე ზურაბიშვილი.
საქართველოს მეხუთე პრეზიდენტი ბიზნესმენების დაკავებას და ყოფილი მაღალჩინოსნის თვითმკვლელობის მცდელობის ფაქტს ეხმაურება.
„ამ დროს, ამ მოჩვენებითი რეალობის ფარდის მიღმა, ქვეყანა დააბრუნეს მაფიოზურ-კრიმინალურ სივრცეში.
ამ ყველაფერში ჩანს რუსული კვალი-ეს მეთოდები, ეს განუკითხაობა, ეს ცრუ რეალობა და ადამიანური ღირსებისგან დაცლილი რეჟიმი. დემოკრატიაზე და ევროპულ მომავალზე უარის თქმას ლოგიკურად მოჰყვება ეს მაფიოზური „მმართველობა“.
დღეს ამ ქვეყანაში ყველა საფრთხეშია! დაცული არავინაა!
შექმნილი ვითარება-ყოფილი მაღალჩინოსნების დაკავება, ძალადობის მუქარა ან სავარაუდო მიყვანა თვითმკვლელობამდე, ცნობადი ბიზნესმენების დემონსტრაციული რეკეტი-ნიშნავს ერთს: სახელმწიფო დანგრეულია!
ძალადობასა და შიშზე დაფუძნებული მმართველობა, რომელიც აღარ არჩევს „თავისიანებსა“ და „სხვებს“, დიქტატურის კლასიკური ბოლო ეტაპია და მოვლენები სწრაფად ვითარდება,“ – წერს სალომე ზურაბიშვილი.
