აშშ-ის პრეზიდენტმა დონალდ ტრამპმა განაცხადა, რომ რუსეთის პრეზიდენტთან, ვლადიმერ პუტინთან სატელეფონო საუბარს უკრაინაში ცეცხლის შეწყვეტის შესახებ შეთანხმებასთან დაკავშირებით პროგრესი არ მოჰყოლია.
ტრამპმა ვაშინგტონში, საჰაერო ძალების ბაზაზე ჟურნალისტებს განუცხადა, რომ პუტინთან სატელეფონო საუბრისას განიხილა ომი უკრაინაში და ირანში არსებული სიტუაცია.
„მე ვერ მივაღწიე მასთან ვერანაირ პროგრესს“ – განაცხადა ტრამპმა.
ტრამპმა ასევე განაცხადა ჟურნალისტებთან, რომ შეერთებული შტატები კიევისთვის იარაღის მიწოდებას აგრძელებს და „ცდილობენ უკრაინის დახმარებას“.
„ჩვენ უნდა ვიყოთ დარწმუნებული, რომ საკმარისი რაოდენობით გვაქვს [იარაღი]“, – აღნიშნა ტრამპმა.
კრემლის ცნობით, პუტინსა და ტრამპს შორის სატელეფონო საუბარი 3 ივლისს თითქმის ერთ საათს გაგრძელდა.
ბრიტანული გამოცემის, „ფაინენშალ ტაიმსის“ ცნობით, ტრამპი დღეს, 4 ივლისს, უკრაინის პრეზიდენტ ვოლოდიმირ ზელენსკისთან სატელეფონო საუბარს გამართავს.
__________
დონალდ ტრამპი. ფოტო: ევროპის პრესფოტო სააგენტო. EPA/YURI GRIPAS
