Batumelebi

„ვაშინგტონ პოსტის“ პრესის თავისუფლების ინიციატივების დირექტორმა, ჯეისონ რეზაიანმა გამოცემის „ნიუსლეთერში“ გამოაქვეყნა ჟურნალისტისა და მედიამენეჯერის, მზია ამაღლობელის სასამართლო პროცესის შესახებ ინტერვიუ. 14 ივლისის პროცესს ბათუმში ესწრებოდა კილან გალაჰერი, რომელიც მზია ამაღლობელის სამართლებრივი გუნდის წევრია და ასევე ნობელის პრემიის ლაურეატი ჟურნალისტის, მარია რესას ადვოკატი. ჯეისონ რეზაიანი, რომელიც „ვაშინგტონ პოსტის“ ავტორი და თავადაც ყოფილი პოლიტპატიმარია, სწორედ კილან გალაჰერს ესაუბრა. 

„ბათუმელები“ გთავაზობთ ინტერვიუს ქართულ თარგმანს. 

ავტორი: ჯეისონ რეზაიანი, „ვაშინგტონ პოსტის“ პრესის თავისუფლების ინიციატივების დირექტორი

______________________

პროტესტის ხმა ძლიერად ისმოდა ბათუმში, საქართველოში, სასამართლოს იმ შენობასთან, სადაც ჟურნალისტმა მზია ამაღლობელმა ორშაბათს ჩვენება მისცა.

„ისინი ქუჩაში იდგნენ და მზიას მხარდამჭერ გზავნილებს სკანდირებდნენ – სურდათ, რომ ეს მასაც გაეგო“, – ამბობს ადამიანის უფლებების საერთაშორისო ადვოკატი კილან გალაჰერი, რომელიც მზია ამაღლობელის სამართლებრივი გუნდის წევრია. გალაჰერი ასევე იცავს ნობელის ლაურეატ მარია რესას, ჰონკონგში დაპატიმრებულ გამომცემელს ჯიმი ლაის და მოკლული მალტელი ჟურნალისტის, დაფნე კარუანა გალიციას ოჯახს.

პროტესტის გზავნილების ნაწილი კრიტიკული იყოს მოსამართლის მიმართ, რომელმაც დღის ბოლოს სხდომა უფრო პატარა დარბაზში გადაიტანა, აქციის ხმაურისგან შორს.

გალაჰერისთვის, ლონდონში მცხოვრები ადვოკატისთვის პროტესტი მოწმობს, რომ საზოგადოება მხარს უჭერს მზია ამაღლობელს, რომელიც იანვრის შემდეგ პატიმრობაშია პოლიციელზე თავდასხმის ბრალდებით.

იანვარში, შავიზღვისპირა ქალაქ ბათუმში მიმდინარე საპროტესტო აქციის დროს, ცნობილმა ჟურნალისტმა სილა გააწნა ბათუმის პოლიციის უფროსს ირაკლი დგებუაძეს, რომელმაც ის შეურაცხყო და ემუქრებოდა.

საქართველოში პოლიციელზე თავდასხმა მძიმე ბრალდებაა და სულ მცირე ოთხწლიან პატიმრობას ითვალისწინებს. ამაღლობელის სამართლებრივი დაცვის გუნდი ამბობს, რომ სილა არ შეიძლება გახდეს ასეთი მკაცრი მუხლით დევნის საფუძველი. პრესის თავისუფლების ორგანიზაციებიც აცხადებენ, რომ ბრალდება ჩადენილი ქმედების არაპროპორციულია და ერთგვარი შურისძიებაა ამაღლობელის საქმიანობის გამო, საქართველოში კორუფციის და ძალაუფლების ბოროტად გამოყენების მხილებისთვის.

ამაღლობელი, რომელიც ონლაინ გამოცემების „ბათუმელებისა“ და „ნეტგაზეთის“ დამფუძნებელია, პირველი ქალი ჟურნალისტია საქართველოში, რომელიც პოლიტიკურად მოტივირებული ბრალდებებით დააპატიმრეს მას შემდეგ, რაც კავკასიის ამ ქვეყანამ საბჭოთა კავშირისგან დამოუკიდებლობა მოიპოვა.

მისი საქმე იქცა სიმბოლოდ იმისა, თუ როგორ უარესდება პრესის თავისუფლება საქართველოში, სადაც მმართველი პარტია „ქართული ოცნება“ უფრო და უფრო მეტად უახლოვდება მოსკოვს და იღებს უცხოური აგენტების კანონს, რომელიც მიზანში იღებს უცხოური დაფინანსებით მომუშავე მედია ორგანიზაციებს.

ჩვენ გალაჰერს ორშაბათის სასამართლო სხდომის შემდეგ ვესაუბრეთ.

• რატომაა ეს საქმე ასე მნიშვნელოვანი საქართველოში მედიის თავისუფლებისთვის?

მნიშვნელოვანია თვითონ მზიას პიროვნების გამო. მზია ძალიან პატივსაცემი პროფესიონალია, ორი მედიაორგანიზაციის დამფუძნებელი და ვეტერანი ჟურნალისტი. ის ორი ათეული წლის განმავლობაში გამოირჩეოდა იმით, რომ ძალაუფლებაში მყოფთ ღიად ეუბნებოდა სიმართლეს. სწორედ ამიტომაც, მისი ასეთი ფორმით მიზანში ამოღებამ მთელ საქართველოში მღელვარება გამოიწვია.

ეს არის საქმე, რომელიც თავიდანვე შექმნილია სამაგალითოდ, იმისთვის, რომ შეაშინოს და დააფრთხოს ყველა, ვინც საქართველოში ჟურნალისტობას ან აქტივისტობას მოინდომებს.

და მეორეც, ეს საქმე მნიშვნელოვანია, რადგან ის უფრო ფართო ტენდენციის ნაწილია. რასაც ჩვენს ახლა ვხედავთ საქართველოში, არის უზომოდ არაპროპორციული და დრაკონული სამართლებრივი პროცესები, გამამტყუნებელი განაჩენები და სასჯელები ისეთ ქმედებებზე, რომლებიც რეალურად მშვიდობიანი პროტესტია.

გასული შემოდგომის შემდეგ ვაკვირდებით მსგავს დრაკონულ ბრალდებებს ადამიანების მიმართ, რომლებიც უბრალოდ ეწინააღმდეგებიან საქართველოს ხელისუფლებას. მზიას საქმეც ამ ტენდენციის ნაწილია.

• როგორ ეპყრობიან მას საპატიმროში?

სამწუხაროდ, მისი მხედველობა ძალიან სწრაფად უარესდება. არსებობს საერთაშორისო სამართლის ერთ-ერთი ძირითადი პრინციპი, რომლის მიხედვითაც დაკავებულს უნდა შეეძლოს მიიღოს ისეთი ხარისხის სამედიცინო მომსახურება, როგორიც თავისუფალ გარემოში ექნებოდა. სერიოზულად შემაშფოთებელია ის ფაქტი, რომ ეს პრინციპი არ სრულდება, მხედველობის მკვეთრი გაუარესება ამის აშკარა მაჩვენებელია.

ასევე, ისიც უნდა აღვნიშნოთ, რომ მზია გარკვეული პერიოდის განმავლობაში შიმშილობდა პროტესტის ნიშნად. ის ძალიან გამხდარია და სრულიად განსხვავებულად გამოიყურება, ვიდრე შვიდი, რვა თვის წინ გადაღებულ ფოტოებში.

• როგორ პასუხობს ხალხი საქართველოში მზიას დაკავებას?

მისი დაკავება ბევრმა დამოუკიდებელი მედიისთვის გამაფრთხილებელ გასროლად შეაფასა. ეს სიმბოლური საქმეა, რომელიც ასახავს, როგორ ირღვევა საქართველოში მედიის თავისუფლება, განსაკუთრებით კი „აგენტების კანონის“ ფონზე.

მზიას წარმოაჩენენ (მმართველი პარტია), როგორც უცხო ქვეყნის აგენტს, მაშინ როდესაც სინამდვილეში ის ძალიან ამაყი ქართველია. როცა ბათუმში სეირნობ, კედლებზე აუცილებლად შეგხვდება გრაფიტი – „თავისუფლება მზიას!“.

ეს საქმე ბევრ ადამიანს აღელვებს, ნაწილობრივ იმიტომ, რომ მზიამ დააარსა ორი მნიშვნელოვანი მედია პლატფორმა – „ბათუმელები“ და „ნეტგაზეთი“. მის საქმეს იცნობენ და ის ადგილობრივებისთვის მართლაც ბევრს ნიშნავს. საქართველო ძალიან სწრაფად ემსგავსება რუსეთს, მაგრამ აქ სერიოზული წინააღმდეგობაც არსებობს.

• რა მოხდა ორშაბათს სასამართლოში?

არაერთი სასამართლო სხდომა გაიმართა უკვე, თუმცა მზიამ პირველად მისცა ჩვენება.

საქართველოში მხოლოდ ერთი ქალთა სპეციალური პენიტენციური დაწესებულებაა, ამიტომ იმისთვის, რომ ბათუმში სხდომას დაესწროს, მას დაახლოებით ექვსი საათი მგზავრობა უწევს ციხის მინივენით. სხდომა, როგორც წესი, პირველ საათზე იწყება და 6-ზე სრულდება. დასრულების შემდეგ, მას კვლავ 6 საათი სჭირდება უკან დასაბრუნებლად. წარმოიდგინეთ, რამდენად დამღლელია ეს ყველაფერი – ეს არის 18-საათიანი დღე და წარმოუდგენლად მძიმეა.

მე დღეს ვუყურებდი მტკიცე, პრინციპულ და ძლიერ ადამიანს, რომელიც მკაფიოდ და შთამბეჭდავად აღწერდა, რამდენად აბსურდულია ეს მთელი პროცესი. მან სიტყვით გამოსვლა საკუთარი საქმიანობის აღწერით დაიწყო – რატომ არის ადამიანი, რომელიც ყოველთვის ეწინააღმდეგება მათ, ვინც ძალაუფლებას ბოროტად და უსამართლოდ იყენებს.

ამ პროცესზე ასევე ძალიან ფართოდ იყვნენ წარმოდგენილი საელჩოები – ნორვეგია, დანია, ესტონეთი, გერმანია, ნიდერლანდები, პოლონეთი, შვედეთი, ევროკავშირი. როდესაც სასამართლო პროცესზე შევდიოდი, ხალხში, არაერთ ადამიანს ეჭირა ხელში ჩემი დაცვის ქვეშ მყოფის, მარია რესას წიგნის „როგორ დავამარცხოთ დიქტატორი“, ქართულენოვანი გამოცემა.

სასამართლოს დარბაზში, ჩემგან რამდენიმე რიგის მოშორებით მჯდომ ქალს მთელის სხდომის განმავლობაში წიგნი მაღლა ჰქონდა აწეული. ეს ბევრს ამბობს.

_____________

ფოტოზე: კილან გალაჰერი ბათუმში, მზია ამაღლობელის სასამართლო პროცესის დაწყებამდე. ფოტო: „ბათუმელები“

„ევროპაში ვიზით წახვალ თუ უვიზოდ, არ არის ეგზისტენციალური საკითხი“ – თქვა „ქართული ოცნების“ პრემიერ-მინისტრმა ირაკლი კობახიძემ 17 ივლისს.

ირაკლი  კობახიძის განცხადებას საზღვაო სფერო წარმომადგენლები გამოეხმაურნენ და არგუმენტები მოიყვანეს, თუ რამდენად გაართულებს მათ დასაქმებას უვიზო რეჟიმის გაუქმება.

ქართველ მეზღვაურთა თქმით, ერთ-ერთი მნიშვნელოვანი დარგი, რომელზეც ვიზალიბერალიზაციის შეჩერება დრამატულად აისახება, სწორედ საზღვაო სფეროა. მეზღვაურები ღიად ამბობენ, რომ უვიზო მიმოსვლის შეჩერება მათ მინიმუმ ერთი ათწლეულით დახევთ უკან, ამასთან გაუარესდება, გართულდება გემებზე დასაქმება.

საქართველოში დაახლოებით 20 ათასი მეზღვაურია. უვიზო მიმოსვლის სიკეთით მათი უმრავლესობა სარგებლობს.

ევროპასთან უვიზო მიმოსვლა ქართულ პასპორტს ერთ-ერთ ძლიერ პასპორტად აქცევს და ქართველ მეზღვაურებს სხვა ქვეყნის მოქალაქე მეზღვაურებთან შედარებით პრივილეგირებულ მდგომარეობაში აყენებს.

„საქართველოს მეზღვაურთა გაერთიანებამ“ განცხადება გაავრცელა, სადაც წერდნენ, რომ რეალურად სწორედ ვიზალიბერალიზაციის შემდეგ გაიზარდა მოთხოვნა ქართველ მეზღვაურებზე

„იქნებ საზღვაო ტრანსპორტის სააგენტომ აუხსნას მთავრობის მეთაურს, რომ რაც უვიზო მიმოსვლა დავიწყეთ ევროპაში, მკვეთრად გაიზარდა მოთხოვნა ქართველ მეზღვაურებზე. დასაქმდა უფრო მეტი მეზღვაური და უფრო ხელსაყრელი პირობებით.

ქართველ მეზღვაურებს თუ შენგენი დასჭირდა, ისევ ფილიპინელები და ინდოელები ჩაგვანაცვლებენ. გაქრება ის პრიორიტეტი რაც გვქონდა, სხვა ქვეყნის მეზღვაურებთან შედარებით.

ყველამ კარგად იცის, რომ დღეს საზღვაო კომპანიები ყველა შაურს ითვლიან რაც მეზღვაურის გემზე აყვანას და დასაქმებას უკავშირდება. კომპანიები კონკურენციის დროს იმ მეზღვაურს ანიჭებს უპირატესობას, რომელიც უფრო ნაკლებ ხარჯს მოითხოვს.

ამიტომ ქართველ მეზღვაურებს უარს ეტყვიან ხშირად, ან აიძულებენ დაბალ ხელფასზე დათანხმდენ მუშაობას, როგორც ფილიპინელები და ინდოელები თანხმდებიან. უბრალოდ  ტეხავს რა როცა ჩვენი ქვეყანა ისევ მეორე მეორე ქვეყნების სიაში მოხვდება დამსაქმებლების თვალში.

დიდი იმედი მაქვს, რომ ეგრე არ მოხდება, მაგრამ დღეს პრემიერმა ისე თქვა – „მაგით არავის არაფერი დიდად არ დააკლდებაო“, მგონი მეზღვაურები დავავიწყდით. ჩვენ ნამდვილად დაგვეტყობა ეგ ცვლილებები, მითუმეტეს რეიტინგებს,“ – ნათქვამია „საქართველოს მეზღვაურთა გაერთიანების“ მიერ გავრცელებულ განცხადებაში.

„ბათუმელები“ ესაუბრა ერთ-ერთი საერთაშორისო კომპანიის გემზე დასაქმებულ  მეზღვაურს. სულო ჩებინოვი ამბობს, რომ უვიზო რეჟიმის გაუქმება, მთლიანად დარგს დაარტყამს.

„ჩემი დაკვირვებით, წლიდან წლამდე ქართველ მეზღვაურებზე მოთხოვნა სტაბილურად იზრდება. მოთხოვნა ისედაც რამდენიმე ფაქტორის გამო არსებობს, პროფესიონალიზმი, ენების ცოდნა, პასუხისმგებლობა, მაგრამ მათ შორის ერთ-ერთი ყველაზე მნიშვნელოვანი უპირატესობა, რაც დღეს გვაქვს, არის შენგენის ზონასთან უვიზო მიმოსვლა.

ჩვენთვის ეს არ არის მხოლოდ მოგზაურობის გამარტივება. ეს საშუალებას მაძლევს, რომ როგორც მეზღვაური, დავსაქმდე იმ გემებზე, რომლებიც ოპერირებენ ევროპულ პორტებში ხშირად ისე, რომ არც კომპანია და არც გემი არ აწყდება ბიუროკრატიულ სირთულეებს.

მე თავად ვმუშაობ გერმანულ გემთმფლობელ კომპანიაში, სადაც პრიორიტეტულ კადრად იმ შემთხვევაში ითვლები როცა ისეთი ქვეყნიდან ხარ, რომელსაც შენგენის ზონასთან უვიზო რეჟიმი აქვს ან გამარტივებული პროცედურებით სარგებლობს,“ – ამბობს სულო ჩებინოვი „ბათუმელებთან“ საუბრისას.

მეზღვაურის თქმით, უვიზო რეჟიმის არსებობა, განსაკუთრებით მნიშვნელოვანია  მაშინ, როცა ხდება ე.წ. „early joining“, ანუ კომპანია მეზღვაურს სთხოვს გემზე ასვლას კონტრაქტით დათქმულ ვადაზე ადრე.

„ასეთ შემთხვევებში დრო გადამწყვეტ ფაქტორს წარმოადგენს, შენგენის ვიზის მიღებას კი მინიმუმ 15 დღე მაინც სჭირდება და უამრავი დოკუმენტის შეგროვებაა საჭირო.

ვიზალიბერალიზაცია პირდაპირ მაძლევს შესაძლებლობას, ასეთი შანსები გამოვიყენო, დროულად ავიდე გემზე, დავიწყო კონტრაქტი და არც კომპანია დავაყოვნო და არც ჩემი კარიერა დავაზიანო.

საკუთარი მაგალითითაც დავადასტურებ: ექვსთვიანი კონტრაქტის შემდეგ გემი შევიდა გერმანიის პორტში და უვიზო მიმოსვლის წყალობით ჩემი ჩანაცვლება უპრობლემოდ მოხდა, სწრაფად და მარტივად. ჩემ გვერდით კი იყვნენ სხვა ქვეყნის მეზღვაურები მათ შორის ცენტრალური და აღმოსავლეთ აზიიდან, და რუსეთიდან, რომლებსაც შენგენის ვიზა არ ჰქონდათ. მათი ჩანაცვლება ვერ მოხდა და იძულებული გახდნენ, დარჩენილიყვნენ გემზე კონტრაქტის დასრულების შემდეგაც. ზოგჯერ ასეთ შემთხვევებში მეზღვაურები თვეების განმავლობაში ელიან სხვა ქვეყანას, რომლიდანაც შეძლებენ სახლში დაბრუნებას.

აქ ჩანს, რატომ არის ასეთი ღირებული ჩვენი პასპორტი ამ ეტაპზე. როცა გემთმფლობელი ირჩევს, რომელ ქვეყნიდან აიყვანოს მეზღვაური, უყურებს არა მხოლოდ გამოცდილებას, არამედ იმასაც, ვინ ქმნის ნაკლებ სირთულეს მისთვის.

ძალიან მარტივად რომ ვთქვა, ვიზა ლიბერალიზაცია ჩემი პროფესიის სტაბილურობის ნაწილია. თუ ეს ბერკეტი დაგვეკარგა, ეს პირდაპირ იმოქმედებს ჩვენზე, როგორც მეზღვაურებზე და როგორც ქვეყანაზე, რომელსაც ეს სექტორი განსაკუთრებულად სჭირდება,“ – ამბობს სულო ჩებინოვი.

———————-

ვიზალიბერალიზაციის 2024 წლის დეკემბრის ანგარიშის შესაბამისად, ევროკავშირი საქართველოსგან ითხოვს 8 რეკომენდაციის შესრულებას, წინააღმდეგ შემთხვევაში არ გამორიცხავს, დაიწყოს უვიზო მიმოსვლის შეჩერების პროცესი.

რეკომენდაციები ითვალისწინებს საქართველოს ყველა მოქალაქის ფუნდამენტური უფლებების დაცვას, მათ შორის გაერთიანების, შეკრებისა და გამოხატვის თავისუფლების, პირადი ცხოვრების ხელშეუხებლობის, საჯარო საქმიანობაში მონაწილეობის უფლების დაცვასა და დისკრიმინაციის აკრძალვას. ასევე, „უცხოური გავლენის გამჭვირვალობის“  შესახებ კანონის გაუქმებას, სავიზო პოლიტიკის ევროკავშირთან შესაბამისობას და სხვა.

ამავე თემაზე:

კობახიძე: ევროპაში ვიზით წახვალ თუ უვიზოდ, არ არის ეგზისტენციალური საკითხი

„ჩვენ ვაღიარებთ მხოლოდ თავისუფალ არჩევნებს, უარი რუსულ სპეცოპერაციას“, –  დღეს, 19:00 საათზე, თბილისის სახელმწიფო უნივერსიტეტიდან პარლამენტის მიმართულებით საპროტესტო მსვლელობა იგეგმება. ბათუმელი აქტივისტების ნაწილი ამ აქციას შეუერთდება, მათგან უმეტესობა უკვე დედაქალაქშია.

პარტია „ახლის“ წევრის, ლევან გორგილაძის ინფორმაციით, უკვე თბილისში იმყოფება ბათუმის საკრებულოს ოპოზიციური ფრაქციის ყველა წევრი მათი პარტიიდან.

დღევანდელი აქციის ორგანიზატორებმა მიმართვაც გაავრცელეს:

„ვადასტურებთ უპრეცედენტოდ მტკიცე და მართალი პროტესტის ამოცანების ერთგულებას. კიდევ ერთხელ ვაცხადებთ, რომ ვაღიარებთ მხოლოდ ახალ, თავისუფალ, საპარლამენტო არჩევნებს და უარს ვამბობთ თვითმმართველობის არჩევნებად წოდებულ რუსულ სპეცოპერაციაში მონაწილეობაზე, რომელმაც ჩვენი ქვეყანა განუკითხაობისა და ძალადობის მორევში გადაუშვა.

მშვიდობისა და სტაბილურობის მთავარ საფრთხეს დღეს ივანიშვილის პოლიტიკური დაჯგუფება წარმოადგენს, რომელმაც მიიტაცა ძალაუფლება და ცდილობს თავისუფალი საზოგადოების დამორჩილებას, ნაცვლად იმისა, რომ ანგარიშვალდებული იყოს და ემსახუროს მას.

„ქართული ოცნება” ცდილობს ბანდიტური წყობილების დამყარებას ქვეყანაში და 90-იანი წლების ძალმომრეობის ქაოსში გვაბრუნებს.

ამის საპირისპიროდ, ჩვენ გვჯერა, რომ უსაფრთხო, დაცული და ღირსეული ცხოვრება შესაძლებელია მხოლოდ ევროპული ტიპის დემოკრატიაში, სადაც კანონი, სასამართლო და ხელისუფლება ემსახურება ხალხს და არა კორუმპირებულ ჩინოვნიკებს.

ქართველი ხალხის საბოლოო გამარჯვებას სჭირდება ივანიშვილის და მისი პარტიის თანმიმდევრული იზოლაცია არა მხოლოდ ეროვნულ და საერთაშორისო, არამედ ყველა, მათ შორის, ადგილობრივ დონეზეც; სწორედ ამიტომ, გადაწყვეტილი გვაქვს ბოლომდე ვუერთგულოთ ავტორიტარულ რეჟიმთან დაპირისპირებულ სახალხო წინააღმდეგობის მოძრაობას.

ამ მიზნით, 19 ივლისს, გავმართავთ საპროტესტო აქციას და მოსვლას გთხოვთ ყველას, ვინც თვლით, რომ ხსნა მხოლოდ რეჟიმის ცვლილებაშია, ხოლო ცვლილებების გზა რეჟიმთან სახალხო და დემოკრატიულ წინააღმდეგობაზე გადის.

ჩვენ ვაღიარებთ მხოლოდ თავისუფალ არჩევნებს! ჩვენი ბრძოლა სამართლიანია, ვიდგეთ მტკიცედ და აუცილებლად გავიმარჯვებთ ერთად!“ – ვკითხულობთ მარშის აღწერაში.

ვინ დააკავა მზია ამაღლობელი? – პატიმრობაში ყოფნიდან 6 თვის თავზეც კი ამ კითხვაზე არც სასამართლოს და არც პროკურატურას პასუხი არ აქვს.

მზია ამაღლობელის საქმის განხილვა დასასრულს უახლოვდება, გამოძიებამ დამალა იმ მეორე პოლიციელის ვინაობა, ვინც 12 იანვრის ღამეს მზია ამაღლობელი რეალურად დააკავა.

მოწმე პოლიციელებმა, რომლებმაც სასამართლოზე ჩვენება მზია ამაღლობელის წინააღმდეგ მისცეს, თქვეს, რომ 12 იანვრის ღამეს, სისხლის სამართლის წესით მზია ამაღლობელი ორმა პოლიციელმა, ბერდია ფერაძემ და გიორგი ბჟალავამ დააკავა.

იმავეს ამტკიცებს გიორგი ბჟალავა, რომ ბერდია ფერაძესთან ერთად სწორედ მან დააკავა მზია ამაღლობელი.

ბჟალავა სასამართლოს წინაშე მოწმის სახით 7 აპრილს წარსდგა.

პროცესზე, ფიცის ქვეშ, გიორგი ბჟალავამ თქვა, რომ ის არის მზია ამაღლობელის დამკავებელი.

„12 იანვარს აქციაზე ნიღაბი მეკეთა. აი, ეს ვარ მე (მიუთითა ნიღბიან პირზე ვიდეოში), შიგნითაც, როცა შევედი შენობაში, ნიღაბი მეკეთა,“ – თქვა გიორგი ბჟალავამ და შენობაში ნიღბით ყოფნა სიცივით ახსნა.

კადრებში, რომელიც 12 იანვრის ღამესაა გადაღებული და მზია ამაღლობელის საქმეში პროკურატურის მიერ წარდგენილი ერთადერთი მტკიცებულებაა, ჩანს, რომ პოლიციელი, რომელიც მზია ამაღლობელს აკავებს, არ არის გიორგი ბჟალავა.

იმ დროს, როცა დაკავებული მზია ამაღლობელი ბერდია ფერაძეს და ერთ უცნობ პოლიციელს სამმართველოს ეზოს სიღრმეში მიჰყავთ, გიორგი ბჟალავა პოლიციის შესასვლელ ჭიშკართან დგას.

ადვოკატების თქმით, ყველა იმ მოწმე პოლიციელმა, რომლებმაც თქვეს, რომ მზია ამაღლობელი გიორგი ბჟალავამ დააკავა, ცრუ ჩვენება მისცა.

ეს ნიშნავს, რომ კითხვის ნიშნის ქვეშ დგება სხვა გარემოებების უტყუარობა, რაც ამ პოლიციელებმა სასამართლოს მზია ამაღლობელის საქმის ირგვლივ გაუზიარეს; ამასთან კითხვის ნიშნის ქვეშ დგას მზია ამაღლობელის დაკავების კანონიერება.

14 ივლისს გამართულ სასამართლო პროცესზე დაცვის მხარემ სწორედ ის ვიდეო მტკიცებულებები გამოიკვლია – დადასტურდა, რომ მზია ამაღლობელის დამკავებელი ორი პოლიციელიდან ერთი არ არის გიორგი ბჟალავა.

„სასამართლოს ვაჩვენეთ, რომ ის პოლიციელი, რომელმაც ვითომდა დააკავა მზია ამაღლობელი, სისხლის სამართლის წესით, გიორგი ბჟალავა, არის ცრუ მოწმე.

ასევე კადრებზე ვაჩვენეთ მოსამართლეს, რომ მზია ამაღლობელს აკავებს სხვა პოლიციელი, რომელიც გამოძიებამ არ გაამხილა ვინ არის. მნიშვნელოვანია ის საკითხი, თუ რატომ დამალა გამოძიებამ პოლიციელის ვინაობა.

იგივე პოლიციელი, როდესაც მას ერთი ხელით მიჰყავს მზია ამაღლობელი, მეორე ხელით ცდილობს შეაკავოს ირაკლი დგებუაძე, რომელიც უკან მიჰყვება დაკავებულ ქალს, აგინებს და ცდილობს ადგილზევე ფიზიკურ ანგარიშსწორებას. ეს კარგად ჩანს ვიდეო კადრებში.

სავარაუდოდ, სწორედ, ამიტომ, ეს პოლიციელი საქმეში არ გამოაჩინეს, რადგან მას მოუწევდა ამ გარემოებაზე საუბარი. თუმცა ეს კადრები ვაჩვენეთ სასამართლოს,“ – უთხრა „ბათუმელებს“  მზია ამაღლობელის ადვოკატმა მაია მწარიაშვილმა.

ადვოკატის თქმით, ეს ის ცნობილი კადრებია, როცა ირაკლი დგებუაძე აგინებს მზია ამაღლობელს და იმუქრება, რომ „სისხლით დაიჭერს“.

ცნობისათვის, ირაკლი დგებუაძემ სასამართლოზე დაკითხვის დროს აღიარა, რომ ხმა, რომელიც ვიდეოში ისმის, მას ეკუთვნის.

„შესაბამისად, მხოლოდ ეს ვიდეოც უტყუარი მტკიცებულებაა იმისა, ეს ადამიანი როგორ მოიქცეოდა დახურულ სივრცეში. იქ სადაც არც კადრი იყო, არც კამერა და არც ჟურნალისტი.

ის კადრები [სამმართველოს შენობის ვიდეო სამეთვალყურეო კამერის ჩანაწერები] მოგეხსენებათ გამოძიებამ არ გამოაჩინა. დამალა საზოგადოების თვალისა და ყურისგან, მათ შორის დაცვისგანაც. ჩვენ ვითხოვდით ამ კადრებს.

საბოლოოდ, მივიღეთ სურათი, რომ ბატონი დგებუაძის ერთი მოადგილე გოჩა ვანაძე არის ცრუ მოწმე, მზია ამაღლობელის ადმინისტრაციული სამართალდარღვევის საქმეზე. ამ საქმეში გოჩა ვანაძე იძლევა ცრუ ჩვენებას, რომ თითქოს მან დააკავა მზია და საუბრობს გარემოებებზე, რომელ გარემოებაშიც მზია ამაღლობელი საერთოდ არ ყოფილა.

ხოლო სისხლის საქმეში ჩვენებას იძლევა ბატონი დგებუაძის მეორე მოადგილე გიორგი ბჟალავა, რომელიც ასევე ცრუობს, რომ მან დააკავა მზია ამაღლობელი,“ – ამბობს მაია მწარიაშვილი.

დღეს, 18 ივლისს,  „ნაციონალური მოძრაობის“ პოლიტიკური საბჭოს თავმჯდომარეს, ლევან ხაბეიშვილს, „ტვ პირველზე“ ჩართვის დროს, პირდაპირ ეთერის მსვლელობისას, უცნობმა პირებმა ჯერ კვერცხები ესროლეს, შემდეგ კი შეაგინეს.

ლევან ხაბეიშვილი გაეკიდა თავდამსხმელებს და მათი ვინაობის გარკვევა სცადა.

კადრებში რამდენიმე ადამიანი ჩანს.

„ეს იქნებოდა დაორგანიზებული, იცოდნენ სადაც ვიყავი და ამას გააკეთებდნენ, რომ დღეს კვერცხი ისროლეს და ხვალ იარაღს გესვრით. ოღონდ პასუხი მიიღო უკვე ამან, ვინც დღეს გამოიარა. თქვენი არავის არ ეშინია ბიჭო.

ეს არის ის რეალობა, რაზეც მე ვსაუბრობდი – დახვედრა, სროლა, მოვკლავთ, ამას ვიზამთ… დედას გიტირებ კობახიძე შე ზღმურტლიანო და მდინარაძე, კიდევ. და ბიძინა ივანიშვილს თუ არ დავამხობთ, მაგასაც ვნახავთ“- განაცხადა ლევან ხაბეიშვილმა თავდასხმის შემდეგ.

თურქეთ-საქართველოს საზღვარი დროებით ჩაკეტილია. საზღვრის ორივე მხარეს მოქალაქეები არიან და ამ დროისათვის [18:30 საათი]საზღვრის კვეთას ვერ ახერხებენ.

“ბათუმელები” კომენტარისთვის დაუკავშირდა შემოსავლების სამსახურს, სადაც გვითხრეს, რომ არ აქვთ ინფორმაცია რის გამოა შეფერხებული საზღვრის კვეთა და საპატრულო პოლიციასთან გადაგვამისამართეს.

შინაგან საქმეთა სამინისტროდან ჯერჯერობით არ გვაქვს ინფორმაცია, რის გამოა საზღვარი ჩაკეტილი.

ინფორმაციას მიღებისთანავე განვაახლებთ.

ბათუმის ბულვარში კაცი ჩაცხრილეს

როგორც „ბათუმელებს“ შსს-ში უთხრეს, მოკლული კაცი უცხო ქვეყნის მოქალაქეა.

„შინაგან საქმეთა სამინისტროს საზოგადოებრივი უსაფრთხოების მართვის ცენტრ 112-ში შემოვიდა შეტყობინება, ბათუმში, ნინოშვილის ქუჩაზე, მდებარე ერთ-ერთ ობიექტში განხორციელებული სროლის თაობაზე.

შეტყობინების მიღებისთანავე ადგილზე დაუყოვნებლივ გამოცხადდნენ შინაგან საქმეთა სამინისტროს შესაბამისი დანაყოფების წარმომადგენლები.

დადგინდა, რომ ცეცხლსასროლი იარაღიდან გასროლის შედეგად, მოკლულია უცხო ქვეყნის მოქალაქე.

განზრახ მკვლელობისა და ცეცხლსასროლი იარაღის უკანონო შეძენა-შენახვა-ტარების ფაქტებზე გამოძიება საქართველოს სისხლის სამართლის კოდექსის 108-ე და 236-ე მუხლებით მიმდინარეობს.

სამართალდამცველების მიერ ტარდება ყველა შესაბამისი საგამოძიებო მოქმედება“-ამბობს შსს.

შემთხვევა დღეს, 18 ივლისს, მოხდა ბათუმში.

______________

ამ თემაზე:

ბათუმის ბულვარში კაცი ჩაცხრილეს

See more

დღეს, 18 ივლისს, დაახლოებით 15:00 საათზე, ბათუმში, ბულვარში, კაფეში კაცი ჩაცხრილეს.

ვიდეოკადრების მიხედვით, კაცს ზურგის არეში 5 ტყვია აქვს მოხვედრილი.

სროლა მოხდა ერთ-ერთ რესტორანში.

ადგილზე იმყოფება პოლიცია და სასწრაფო.

პოლიციის ინფორმაციით, მოკლული კაცი უცხო ქვეყნის მოქალაქეა.

ვიდეო:

გონიოში მშენებარე ობიექტიდან ხარაჩოს ჩამოვარდნის გამო დაშავებული ახალგაზრდა კაცი, კლინიკაში გარდაიცვალა. 30 წლის კაცი ამ ობიექტზე მუშაობდა.

„ბათუმელების“ ინფორმაციით, დაშავებულ კაცს სიცოცხლისთვის შეუთავსებელი ტრავმები ჰქონდა.

შემთხვევა გუშინ, 17 ივლისს მოხდა გონიოში, კომპანია „ნექსთის“ ობიექტზე.

„ბათუმელები“ დაუკავშირდა კომპანიას და ჰკითხა, რამ გამოიწვია რკინის კონსტრუქციის ჩამოშლა, რასაც ადამიანის სიცოცხლე ემსხვერპლა?

„ობიექტზე მშენებლობა არის დასრულებული, 26 სართული აშენებულია. ამჟამად მიმდინარეობს მოსაპირკეთებელი სარემონტო სამუშაოები. ამ მიზნით 17 ივნისიდან ობიექტზე დაწყებული იყო ხარაჩოს მოწყობის სამუშაოები. გუშინ მოხდა ამ ხარაჩოს ჩამოშლა. რამ გამოიწვია ხარაჩოს გაშლა და ჩამოშლა, ამას არკვევს გამოძიება“, – ამბობს კომპანიის იურისტი ვახო გედენიძე.

ამ ხარაჩოების მოწყობას არ ამოწმებს შრომითი უსაფრთხოების სპეციალისტი? – ვკითხეთ იურისტს.

მისი თქმით, სამუშაოებს კონტრაქტორი პირი ასრულებდა.

„ჩვენ დავიქირავეთ კონტრაქტორი პირი, რომელიც აწყობდა ხარაჩოებს. ასევე დავიქირავეთ პირი, რომელიც იყო პასუხისმგებელი ამ სამუშაოების განხორციელებაზე, უსაფრთხოდ და დადგენილი სტანდარტებით. სამუშაოებს ასრულებდა ფიზიკური პირი, კახა ბერიძე და მის მიერ დასაქმებული პირები, ხოლო ზედამხედველობას ახორციელებდა გიორგი კუპრაძე“, – გვეუბნება იურისტი.

კომპანია არ გრძნობს პასუხისმგებლობას? – ვკითხეთ იურისტს. მისი თქმით, ყველა პირს, რომელიც ობიექტზე შემოდის, ინსტრუქტაჟი უტარდება.

„კონტრაქტორი გვაწვდის სიას და მე მევალება წარვადგინო ამ პიროვნებების „ფორმა 100“, ანუ ჯანმრთელობის ცნობა. ობიექტზე ისე სხვა პირი ვერ შემოვა. სამუშაოების დაწყებამდე ყველა პირს უტარდება ინსტრუქტაჟი უსაფრთხოებასთან დაკავშირებით, ყველას გადავეცით ინდივიდუალური დაცვის საშუალებები, ღვედები და ყველა სწავლება ჩაუტარდათ.

მაგრამ კონკრეტულად ხარაჩოს ჩამოშლა რამ გამოიწვია, ჩვენ ამის მიზეზი არ ვიცით. ჯერჯერობით, არავინ არ იცის. ჩვენი მხრიდან რაც გვევალებოდა, ყველაფერი შესრულებული გვაქვს“, – ამბობს იურისტი ვახო გედენიძე.

 14 ივლისს ბათუმის საქალაქო სასამართლოში „ბათუმელებისა“ და „ნეტგაზეთის“ დამფუძნებელმა, ჟურნალისტმა და მედიამენეჯერმა, მზია ამაღლობელმა მისცა ჩვენება. „ბათუმელები“ გთავაზობთ მზია ამაღლობელის სასამართლოში მიცემული ჩვენების სტენოგრამას, მცირე შემოკლებით.

„ბათუმელებმა“ გამოაქვეყნა მზია ამაღლობელის ჩვენების პირველი ნაწილიც, სადაც მზია ამაღლობელმა სასამართლოს უამბო, რა გარემოებებში დააკავეს პოლიციის შენობასთან სტიკერის გაკვრისთვის 11 იანვარს. გათავისუფლებიდან მოკლე ხანში მზია ამაღლობელი სისხლის სამართლის წესით დააკავეს ბათუმის პოლიციის უფროსზე სილის გაწვნისთვის. სწორედ ამ ეპიზოდზე ისაუბრა მზია ამაღლობელმა სასამართლოში და მოსამართლეს მოუყვა იმის შესახებაც, რა ხდებოდა მისი დაკავების შემდეგ – როგორ შეაფურთხა მას პოლიციის უფროსმა ირაკლი დგებუაძემ. 

ამავე თემაზე: მზია ამაღლობელის ჩვენება I ნაწილი – „ათამდე გამომძიებელი ჰყავს ამ საქმეს. არც ერთს უცდია ფორმალურად მაინც ემუშავა გამოძიებაზე“

მზია ამაღლობელი: განაპირას ვიყავი აქციის მონაწილეებისგან… ზოგადად, ჩემი მხედველობის გამო, განაპირას დავდივარ, რომ არ მოვექცე, ასე ვთქვათ, შუა ნაწილში.

ახლობლებთან ვსაუბრობდი, როცა რაღაცნაირი ხმაური ატყდა. „აკავებენ“ – ოღონდ ამას მერე მოვკარი ყური.

არ ვიცი როგორ მოხდა, მაგრამ მარჯვენა განაპირა მხარეს ვიდექი და უცებ, როცა მიმოვიხედე, აღმოჩნდა, რომ მარცხენა მხარეს ვარ, სადღაც ჭიშკართან ახლოს, პოლიციელების და ნიღბიანების გარემოცვაში.

გეფიცებით, ვერაფრით ვერ ვხვდები, რამდენჯერაც არ დავუბრუნდი ამ მომენტს, როგორ აღმოვჩნდი იქ. თქვენ რომ შემომიტანეთ ვიდეოები, მერე აღვიდგინე, რომ როგორც ჩანს, პოლიციური მანევრირება ჰქონდათ ასეთი.

… მანამდე პოლიციის შენობის გარეთ აქციის მონაწილეების გათავისუფლებას ელოდებოდნენ სრულიად მშვიდ გარემოში.

უკვე მოკითხვის პროცესი იყო ერთმანეთის და წასვლას ვაპირებდით.

ძალიან ცუდად ვიყავი. ჩემს ძმისშვილს ვთხოვე, იქნებ გამაყუჩებელი გქონდეს-მეთქი. შიგნით [პოლიციის შენობაში] არ ჰქონდათ გამაყუჩებელი და ფეხზე ძლივს ვიდექი.

• ადვოკატი: გაბაიძეების დაკავება როგორ იწყება, ცოტა უკან მიგაბრუნებთ ისევ, რომ ცხადად დავინახოთ და მერე რა ხდება თქვენ დაკავებამდე…

მზია ამაღლობელი: გაბაიძეების დაკავება არ დამინახავს. გიგი იყო ჩემ გვერდით, ასევე, ჩემი ძმისშვილები, ახლობლები…

ადამიანები, აქციის სხვადასხვა მონაწილეები იყვნენ, მაგრამ ვხედავდი ციალას და მინდოდა, როგორც კი გათავისუფლდებოდა, დავლაპარაკებოდი და წავსულიყავი.

თან ადვოკატს მინდოდა დავლაპარაკებოდი, სხვა დაკავებულების შესახებ მინდოდა გამეგო და წავსულიყავი.

… [ჩოჩქოლის ატეხის შემდეგ] ტელერეპორტაცია რომ მოხდება, ისე, მარჯვენა მხრიდან მარცხენა მხარეს როგორ აღმოვჩნდი არ ვიცი, მაგრამ როცა მიმოვიხედე, მართლა მარტო მე ვიყავი. პოლიციელები იყვნენ ირგვლივ, თან ნიღბიანი პოლიციელები და მესმოდა ხმები: „არ დააკავოთ“ „რატომ დააკავეთ“…

• ადვოკატი: თქვენ აღწერთ სიტუაციას მას შემდეგ, რაც პოლიცია ერთბაშად გამოვარდა?

მზია ამაღლობელი: კი, ზუსტად მაგას ვამბობ. ეს გამოვარდნა იმდენად სწრაფად მოხდა, რომ გამოვარდნა კი ვერ დავინახე, არამედ მათ ალყაში აღმოვჩნდი.

დააკავესო როცა ამბობდნენ, ბუნებრივია, თვალი წამივიდა ჭიშკრისკენ, დავინახე, გიგის [გიორგი გაბაიძის] ყვითელი ქურთუკი როგორ ჩაიკარგა ჭიშკრის მიღმა და მივხვდი, რომ გიგი დააკავეს.

• ადვოკატი: თქვენ აღწერეთ – გარეთ სიმშვიდეა, პოლიციელები არ დგანან. ერთბაშად აღმოჩნდით მათ ალყაში. მინდა დამიზუსტოთ მაინც, ხომ არ გაგიგონიათ ამ დროს, რომ ვინმე იგინებოდა პოლიციის მისამართით და განსაკუთრებით გიგი გაბაიძე თუ იგინებოდა ან რაიმეს თუ გამოხატავდა ვინმე პოლიციელის მისამართით…

მზია ამაღლობელი: ისეთივე მტკიცებით ფორმაში შემიძლია ვთქვა, გიგი რომ არ იგინებოდა, როცა ვამბობ, რომ ვანაძე ცრუობს, როცა ამბობს, რომ მე ვიგინებოდი.

არ გამიგია გიგის გინება. ჩემ გვერდით იყო და რა ვიცი, ჩემთვის უნდა შეეგინებინა მაშინ, ვისთვის უნდა შეეგინებინა, აქციის მონაწილეები იყვნენ მარტო იქ.

• ადვოკატი: განაგრძეთ. მე გაგაწყვეტინეთ, პოლიციელების გარემოცვაში აღმოვჩნდი მოულოდნელადო…

მზია ამაღლობელი: როგორც გითხარით, პოლიციელების და შავნიღბიანი ადამიანების გარემოცვაში აღმოვჩნდი – არ ვიცი, ისინი რამდენად იყვნენ პოლიციელები.

ეს იყო ძალის დემონსტრირება, ჭყლეტა შექმნეს.

წინ და უკან რაღაც მასა მიდიოდა, აწვებოდნენ ხალხს. მეც ტალღისებურად ვმოძრაობდი, ვერ ვიკავებდი თავს. ვცდილობდი ვინმეს ჩავჭიდებოდი, იმიტომ, რომ შეუძლებელი იყო იქ ფეხზე მყარად მდგარიყავი, ისეთი მოცემულობა ჰქონდათ შექმნილი.

ზურგიდან ძლიერი ბიძგი და დარტყმა ვიგრძენი. მარცხენა მხარეს ძლიერი დარტყმის შედეგად ჩავვარდი. დროის გარკვეულ მონაკვეთში მგონი გონება მქონდა დაკარგული, იმიტომ, რომ როცა გონზე მოვედი, ფეხებით გადამთელეს, ასე ვთქვათ.

აი, ტალღა პოლიციის, გადამივლიდა – გადმომივლიდა. ვიღაც შეიძლება ფეხს მარიდებდა. გადამთელეს ამ სიტყვის სრული მნიშვნელობით. მე მგონი ორ მომენტში მოკლე დროით გონება დავკარგე. არ ვიცი ვინ გამომიყვანა იქიდან, ან კიდევ ვინ წამომაყენა ფეხზე. მართლა არ ვიცი.

ერთადერთი ვიცი ის, რომ ეზოს შენობას რაღაც გალავანივით ჰქონდა, გაზონივით ჰქონდა და იქ ვიღაც მეკითხებოდა, როგორ ვარ.

გონზე რომ მოვედი, ჩემი ძმისშვილი მოვიდა, როგორ ხარო და შემდეგ ცოტა მოვფხიზლდი. არ მინდოდა, რომ ასე დავენახე და შევეცადე ძალა მომეკრიბა. კარგად ვარ-მეთქი ვუთხარი, რაღაც დრო მჭირდება, გავიდეთ შორს-მეთქი. წავედი იქეთ და ამ დროს ფეხი რომ გადავადგი, აღმოვაჩინე, რომ ცალ ფეხზე უკვე ფეხსაცმელი არ მეცვა. კედი მეცვა, თასმებით შეკრული. არ ვიცი როდის დამეკარგა. ჩემს ძმისშვილს ვთხოვე, რომ იქნებ ფეხსაცმელი დამიძებნო, მე აქ ვიქნები-მეთქი. თან მინდოდა ჩემგან მოშორებით ყოფილიყო, რომ არ დაენახა, როგორ ცუდად ვიყავი.

იქვე რაღაცას მივეყრდენი და რომ გავიხედე ჭიშკრისკენ, ჩემი მეგობრის, „ბათუმელების“ რედაქტორის, ეთერ თურაძის წითელ ქურთუკს მოვკარი თვალი ჭიშკართან შავი, ნიღბიანი ადამიანების გარემოცვაში თვალი და…

• ადვოკატი: თუ შეძლებთ ამ გარემოებებზე საუბარს, თქვენ როგორც სასამართლოს მოუყევით, როდესაც დაგაკავეს ადმინისტრაციული წესით, ცუდად იყავით და ტკივილგამაყუჩებელი გჭირდებოდათ. ანუ ვერ ხართ კარგად ისედაც. გარეთ გამოსვლის შემდეგ ძალიან მოკლე დროში მოყევით საპოლიციო ჭეჭყვაში, დავარდით, გადაგიარეს, ცალი ფეხსაცმელი დაკარგეთ, ძალიან ცუდად ხართ, შეუძლოდ ხართ, ცოტა გონების კარგვა მქონდაო – თქვით. მაინტერესებს, ასეთ მდგომარეობაში მყოფი რატომ დარჩით?

მზია ამაღლობელი: თქვენ რომ ხედავდეთ, რომ მე ცუდად ვარ, სადმე წახვალთ?! ან რომ ხედავდეთ, საფრთხე მელის, წახვალთ?! როგორ ცუდადაც არ უნდა იყოთ…

ეთერი როცა დავინახე პოლიციელების გარემოცვაში და როცა იცი, რომ აკავებენ… როცა ვიცი, რომ მე სტიკერის გამო დამაკავეს, როცა ვიცი, რომ გიორგი გაბაიძე დააკავეს, ვხედავ, რომ ეთერი არის პოლიციელების გარემოცვაში და ვიცი, რომ ეთერის დააკავებენ… აი, სად წავალ?! როგორ ცუდად უნდა ვიყო… ფეხზე კი არა, საერთოდ ტანზე რომ არ მცმოდა, მაინც მივიდოდი.

ჩემს ძმისშვილს ვუთხარი, იქნებ ფეხსაცმელი დამიძებნო-მეთქი. როგორც კი მომშორდა, შევეცადე განაპირა-განაპირა შემომევლო და მივსულიყავი ჭიშკართან. მარჯვენა მხრიდან მივედი ჭიშკართან.

როგორ გავიკვლიე გზა იქამდე, რომ ეთერთან მივსულიყავი, არ ვიცი.

ეთერთან მივედი, მინდოდა, რომ მარტო არ ყოფილიყო და იქიდან გამომეყვანა.

• ადვოკატი: ჩვენ აქ წინა პროცესზე დეტალურად გავიარეთ ზუსტად ის ვიდეოკადრი, ბოლო წუთს რომ ჩანხართ, დგახართ ჭიშკართან და ეთერის გვერდით. ეს პროცესი თუ გახსოვთ? აქ თქვენ ეთერის გვერდით დგახართ იმიტომ, რომ მარტო არ დატოვეთ. ასე გავიგო?

მზია ამაღლობელი: სიმართლე გითხრათ, ეთერმა დამინახა თუ არა… კი, მხედავდა, მაგრამ რაღაცნაირი პროვოკაციული გარემო იყო. სრული პასუხისმგებლობით ვამბობ, წარმოიდგინეთ, პოლიციასთან ძალიან ახლოს რომ ხარ…

მე ყოველთვის ვცდილობდი და თანამშრომლებსაც იმავეს ვეუბნებოდი, დისტანცირდით… მხოლოდ ინტერვიუები და სხვა კომუნიკაციაში არასდროს არ შეხვიდეთ.

ამ დროს რამდენიმე წუთით ადრე პოლიციელების გარემოცვაში რომ ვიყავი, რა მომივიდა – გადამიარეს. ოღონდ „გადამიარეს“, ძალიან მსუბუქი ნათქვამია.

როცა მივედი ეთერთან ახლოს, ეთერი ვიღაცას ეკითხებოდა – „რატომ დააკავეთ?“ შევეცადე, მეც ჩავრთულიყავი ამ საუბარში – „რატომ დააკავეთ ჩემი ოჯახის წევრი“…

ვცდილობდი გამეგო, რატომ დააკავეს ეს ადამიანი. მე სხვა ინტერესი არ მქონდა. პასუხი იყო ძალიან აგდებული, ისეთი რა, რომ მოგიგდებენ პასუხს – „ვინ? აი, მთვრალი რომ იყო? რომ იგინებოდა?“

მაშინ როცა ვიცი, შენ რომ დაგაკავეს, იმის გამო მოვიდა იქ [გიორგი გაბაიძე]… თან ეს მინდა ვუთხრა, რომ რა მთვრალი, რას იგინებოდა, ადამიანი მე რომ დამაკავეს, იმის შემდეგ მოვიდა აქ და რა სისულელეს ამბობ…. ეს მინდა ვუთხრა…

მაგრამ ის, ვინც საუბრობდა [დგებუაძე] დაკავებულზე, გიგიზე, მისი მხრიდან იყო ძალიან უპასუხისმგებლო და აგდებული, დამამცირებელი საუბარი.

რაღაცნაირი მოქცევა იყო…. ვიღაც გეუბნება: „მიდი, რა, გაიარე…“ თან ისე, რომ – „ვისაც მინდა, რატომაც მინდა, დავაკავებ…“

ასეთი განცდა დამრჩა და რაღაცნაირად, ბრაზის და უმწეობის ზღვარი მქონდა, როგორც ჩანს.

სიმართლე გითხრათ, ის კადრი, სილის გაწვნის კადრი, საპატიმროში ვიდეო რომ ვნახე, მკაფიოდ მაშინ აღვიდგინე.

შემიძლია გითხრათ, რომ თქვენ თუ გქონიათ ან ამ დარბაზში თუ გქონიათ ვინმეს ისეთი ქცევა, შემდეგ რომ გაოცებულხართ… ჩემთვის ეს სილა იყო.

ოღონდ ძალიან მინდა გთხოვოთ, არ ჩათვალოთ ისე, რომ თითქოს სინანულში ჩავვარდი.

არა, არანაირი სინანული. უბრალოდ რადგანაც ეს მოხდა, ეს ფაქტი მოხდა, ე.ი. გარდაუვალი იყო. სხვანაირად არ შემეძლო მოვქცეულიყავი.

ეს არ იყო დაგეგმილი და გააზრებული ქცევა.

ეს იყო იმპულსური რეაქცია შეურაცხმყოფელ, დამამცირებელ, უპასუხისმგებლო, თავკერძა, ყეყეჩ კომუნიკაციაზე.

• ადვოკატი: ამ საკითხზე ე.წ. დაზარალებულიც საუბრობდა. საერთოდ თუ იცნობდით ბატონ დგებუაძეს, ოდესმე თუ გქონიათ მასთან რაიმე კომუნიკაცია ან თუ გქონიათ, რა კომუნიკაცია შეიძლებოდა ეს ყოფილიყო? იქვე ბესელია გამოდის, თქვენ სადაც დგახართ და შემდეგ გამოდის დგებუაძე. ანუ თქვენთვის იქ ეს ამბავი ცხადი იყო? იცოდით ვინ იყო დგებუაძე? ნანახი გყავდათ? ამ საკითხზე თუ შეგიძლიათ განმარტება მისცეთ სასამართლოს. 

მზია ამაღლობელი: არა და არ ვიცი თავად ე.წ. დაზარალებულ დგებუაძეს რაში დასჭირდა, როცა ჩვენებაში ჩაწერა, რომ ჩვენ ვიცნობდით ერთმანეთს და ვსაუბრობდით.

მე არც ბესელიას და არც დგებუაძეს არ ვიცნობდი. არ ვიცი, არ ყოფილან ესენი ისეთი პირები…

ვიცი, პასუხისმგებლობიანი პირები როგორ იქცევიან, როცა ბრიფინგებს აწყობენ რაღაც თემებზე, ქალაქს რა აწუხებს… პირიქით, სულ ყველასგან ის მესმოდა, რომ დასდევდნენ მიკროფონით არამხოლოდ ამათ, ამ პოლიციელებს, რომ კომენტარი მიეღოთ.

• ადვოკატი: იმ დღეს დგებუაძე პირველად როდის ნახეთ? სად ნახეთ?

მზია ამაღლობელი: სილის გარტყმის დროს ვერ აღვიქვი ვინ იყო. დგებუაძეს სახეში რომ შევხედე, ძალიან ცუდი ვითარება იყო. ძალიან ცუდ ვითარებაში შევხედე სახეში.

როგორ გითხრათ, როცა დამაკავეს და სამმართველოს შენობაში როცა შემიყვანეს…

• ადვოკატი: მოდით მივყვეთ თანმიმდევრულად. დაკავების მომენტი თუ გახსოვთ ამ ინციდენტის შემდეგ?

მზია ამაღლობელი: როცა გავიაზრე, რომ დამაკავეს, უკვე ჭიშკრის მიღმა ვიყავი. რამდენიმე ადამიანი მიჭერდა მკლავებზე ხელს და ძალიან სწრაფად მივყავდი.

მესმოდა გინების ხმა და მესმოდა სწრაფი ნაბიჯების ხმა ზურგს უკან. აი, სულ ის განცდა მქონდა ოღონდ, რომ ვიღაც ახლა კეფაში ჩამარტყამს.

არ ვიცი, ამაზე რატომ მეცინება, მაგრამ ვბრაზობ ხოლმე, როცა მახსენდება, როგორ აღმოვჩნდი ამ მოცემულობაში.

სამმართველოს შენობაში რომ შემიყვანეს, პირველივე სართულზე, პირველივე ოთახი რაც იყო, ისე შემაგდეს, რომ კარები ჩემი შეგდებით გაიღო, ასე ვთქვათ.

მითხრეს, რომ დივანი იყო და იქ დავმჯდარიყავი. ფეხზე ვერ ვიდექი და დავჯექი.

მიჭირდა დგომა და ამიტომ დავჯექი.

როცა ცოტა გავიაზრე რა ხდებოდა და მიმოვიხედე, ოთახში დამხვდა ახალგაზრდა ქალი პოლიციელი და ერთი მამაკაცი. ზოგადად, ძალიან ვიწრო ოთახი იყო, ერთი მაგიდა მისადგამი და ამ დივნის წინ იყო რაღაცა პატარა კარადა.

რამდენიმე წუთში, ზუსტ დროს ვერ ვიხსენებ, 5-10 წუთი ალბათ, ვიღაც ახალგაზრდა შემოვარდა ყვირილით, გინებით. აი, ის ხმა იყო, ზურგს უკან რაც მესმოდა.

რაღაცნაირი ტონი ჰქონდა, იმპერატიული, ამით დამამახსოვრდა ხმა.

ეს ახალგაზრდა შემოვარდა ისევ გინებით.

• ადვოკატი: იგინებოდა, თუ თქვენ გაგინებდათ?

მზია ამაღლობელი: მაგინებდა. ზოგადად არ იგინებოდა.

მოიწევდა ჩემკენ დედის გინებით.

მეორე-მესამე შემოსვლაზე უფრო შემოქმედებითად მიუდგა ამ გინებას და რა ვიცი, ძალიან შეურაცხმყოფელია ყოველ ჯერზე როცა ვიხსენებ, განსაკუთრებით გენდერულ ნიშანს უსვამდა ხოლმე ხაზს ამ გინების დროს.

როგორც ქალს, რომ მეგრძნო თავი დამცირებულად, განსაკუთრებით ამას უსვამდა ხაზს გინების დროს.

ეს რომ შემოვარდა, იმდენად ვიწრო ოთახი იყო, განცდა მქონდა, რომ თავზე მადგა.

ვცდილობდი არ შემეხედა. ის მაინც – „როგორ დამარტყი, რატომ“ და უსასრულოდ იგინებოდა.

მოიწევდა ყოველ ჯერზე ჩემკენ.

• ადვოკატი: ჩვენ ბატონი დგებუაძის გინება მოსმენილი გვაქვს, მაგრამ შეგიძლიათ სასამართლომ რომ წარმოიდგინოს.. იმ მომენტში, თქვენ ახლა რაზეც ჰყვებით [გინება იყო გენდერული ნიშნითო] შეგიძლიათ გაიხსენოთ სიტყვები?

მზია ამაღლობელი: ერთადერთი ეს შემიძლია ვუთხრა ბატონ პროკურორებს, წარმოიდგინონ მათი ოჯახის წევრი ქალები, რა შემთხვევაში შეიძლებოდა ყოფილიყვნენ შეურაცხყოფილი დგებუაძეს რომ ეგინებინა, რა სიტყვები უნდა გამოეყენებინა მას.

მოსამართლეს შემიძლია ციხიდან წერილობით გამოვუგზავნო დგებუაძის ყველა ის სიტყვა, რა სიტყვებითაც მაგინებდა.

არ მინდა ამ დარბაზში საუბარი და უბრალოდ გახსენებაც, ძალიან მძიმეა ჩემთვის. ასეთ მოცემულობაში პირველად ვიყავი, თან იმდენად გაოგნებული ვიყავი, რომ პირველი გინების შემდეგ როცა გაიყვანეს, ჩემკენ როცა მოიწევდა, იქვე მყოფ მამაკაცს ვუთხარი – ვინ არის ეს კაცი, სულ ამ ლექსიკით საუბრობს-მეთქი.

როგორ, არ იცნობო? ეს ირაკლი დგებუაძეაო. სახელი და გვარი ვიცოდი, რა თქმა უნდა, მაგრამ არ ვიცოდი იქ ბესელია იყო უფროსი რეგიონის თუ ბათუმის. დეტალურად ვერ აღვიქვი, რომელი რომელი იყო.

რა პოზიციაზეა-მეთქი და ბათუმის პოლიციის უფროსიაო.

იქ, ოთახში, როცა დგებუაძე, ე.წ. დაზარალებული, შემოდიოდა და მაგინებდა, სხვებიც შემოდიოდნენ…

შემოყვებოდნენ, რომ გაეყვანათ, იმიტომ, რომ ჩემკენ მოიწევდა.

ისინი არ ვიცი ვინ იყვნენ, მაგრამ დარწმუნებით შემიძლია ვთქვა, რომ ის ორი პოლიციელი ქალი, ერთი ცირა ჩოგაძე იყო, ერთი ნანა მახარაძე ან ანა მახარაძე.

არ ვიცი… ცირა ჩოგაძე ნამდვილად ვიცი, აქ ჩვენების დროს ვიღაცას [გულისხმობს მოწმე პოლიციელებს] დავაზუსტებინე. მინდოდა მცოდნოდა, ვინ ისმენდა ამ ყველაფერს.

იმიტომ, რომ ჩვენება ამ ხალხს არ მიუცია.

• ადვოკატი: თუ შეგიძლიათ აღიდგინოთ, რა ინტენსივობით იყო, რამდენჯერ შემოვარდა დგებუაძე, ამ დროს სხვა თანამშრომლები რას შვრებოდნენ? ეს გინება იყო, მუქარა იყო ამავდროულად თუ რა იყო?

მზია ამაღლობელი: მუქარის აღქმა არ მქონდა. სიტყვიერი მუქარის აღქმა, რადგანაც ფიზიკურად მოიწევდა და სულ მქონდა განცდა, რომ უნდა დაერტყა. მართლა არ ვიცი, სხვა პოლიციელებს რომ არ შეეჩერებინათ, წიხლებით გადამივლიდა კი არა, გამლახავდა, რასაც ჰქვია.

• ადვოკატი: ფიზიკურად რომ მოიწევდა, ხელს უშლიდნენ სხვა პოლიციელები?

მზია ამაღლობელი: სხვა პოლიციელებს გაჰყავდათ, კი.

მოიწევდა-მეთქი იმიტომ ვამბობ, რომ ვცდილობდი, როცა მაგინებდა, გონებაში სულ იმას ვამბობდი, რომ ეს ჩემს თავს არ ხდება. მინდოდა, რომ ჩამეკეტა.

ახალ პროვოკაციაზე არ მინდოდა წამოვგებულიყავი. დივანზე რომ ვიჯექი, ისე ახლოს მოვიდა ფეხები, ავხედე. მივხვდი, რომ უნდა დამარტყას და როცა ავხედე, აი, გაჩერდა და სახეში შემაფურთხა.

• ადვოკატი: რა ტიპის ვერბალურ შეურაცხყოფას გაყენებდათ და პირველად მაშინ ახედეთ, როცა შეგაფურთხათ?

მზია ამაღლობელი: შიში არ ვიცი… უფრო განრიდება, არიდება იყო. მინდოდა ამერიდებინა, არ გინდა, რომ ეს შუახნის ადამიანი ვიღაცამ ასე მიზანმიმართულად გაგლახოს… ხომ ხვდებით, არა.

არ ვიცი, როგორ გითხრათ, დღემდე ვერ ვპატიობ ჩემს თავს ზუსტად იმ ჩემს სიჩუმეს.

ვერაფრით ვერ ვხვდები, როგორ არ დავლეწე იქაურობა, ოღონდ მართლა. როგორ არ ვიყვირე, აი, არ ვიცი.

• ადვოკატი: ალბათ შეურაცხყოფისგან და უსუსურობისგან. ახლა რაზეც საუბრობთ, რადგანაც მარტო ხართ პოლიციის შენობაში, სრულიად დაუცველი და ერთადერთი, დგებუაძემ რომ არ გაგლახოთ სხვა პოლიციელები გშველიან. ეს სიჩუმე როგორ შეძელით? მაგრამ ესეც შიშის იყო ალბათ?

მზია ამაღლობელი: არ ვიცი რა იყო. ვერ ვარქმევ ამას სახელს დღემდე და ალბათ ვერასდროს ვერ ვაპატიებ ჩემს თავს ამას.

ბოდიში, მართლა ვბრაზობ ახლა ჩემს თავზე.

• ადვოკატი: უნდა დავუბრუნდე იმ მომენტს, ბატონმა დგებუაძემ რომ შეგაფურთხათ. ბოლო შემოვარდნაზე შეგაფურთხათ ხომ ალბათ?! შემდეგ რა ხდება, როგორ გააკავეს?

მზია ამაღლობელი: როცა შემაფურთხა… იმდენად ცუდად ვიყავი, ერთადერთი, რაც მოვახერხე, იყო ის, რომ წამოვვარდი – წყალი მომიტანეთ და საპირფარეშოში გამიყვანეთ-მეთქი.

მინდოდა, რომ სახე დამებანა… არ ვიცი რა იყო ეს.

ერთ-ერთი ქალი პოლიციელი, ვიწრო ოთახი იყო, ჩემი ცოტა გაწევა მოუწია იქით, რომ კარადამდე მისულიყო და ჭიქა აეღო და ალბათ წყალი მოეტანა.

კარებისკენ მიდიოდა, როცა ხმამ შეაჩერა… „არა, არანაირი წყალი, არც საპირფარეშოში გაიყვანთ. ჩაიფსას“.

დერეფანში მარტო არ იყო.

მე ხომ არ მაყენებდა მარტო შეურაცხყოფას. საკუთარი თანამშრომლების თანდასწრებით, ძალიან ბევრი ადამიანის თანდასწრებით ასე იქცეოდა.

მახსოვს, რომ უბრალოდ დავჯექი და გონება გავთიშე.

რომ არ მეტირა. არ ვიცი. ხომ გითხარით.

იმ დღეს პოლიციის სამმართველოს შენობაში ყველა იყო მომართული იმისთვის, რომ არაადამიანურად მეგრძნო თავი.

განსაკუთრებით მამაკაცები. ქალები სრულიად უხმოდ იდგნენ.

ქალი პოლიციელები სრულიად უხმოდ იყვნენ.

ხელბორკილის დასადებად რომ შემოვიდნენ, ვიღაც მამაკაცი შემოვიდა და „ამას ხელბორკილი რატომ არ ადევსო“.

ეს კაცი მერე „ტვ პირველის“ კადრებიდან აღვიქვი. ნატო გოგელია [ტვ „პირველის ჟურნალისტი] ეუბნებოდა „კასკაო…“ „კასკა არ გქვია შენო“ და როგორც აღმოჩნდა, ათაბეგაშვილი იყო. „ამას ხელბორკილი რატომ არ უკეთიაო“…

ხელბორკილი რომ გამიკეთეს, მეორედ შემოვიდა და „წინ რატომ უკეთია ხელბორკილი, ახლავე უკან შეუკარით ხელებიო“ და ნიშნისმოგებით… ისე რომ შემოგხედავენ, ყოველი შემოხედვისას ფეხქვეშ რომ გაგიგდებს… ესეთი დამოკიდებულება ჰქონდათ.

….მეორედ როცა მოვიდნენ, ნივთმტკიცება, ქურთუკი ამოიღეს და ეს სვიტერი, რომ ეს ფურთხი [დგებუაძის] მოეკვლიათ.

სახალხო დამცველი როცა შემოდის და მეკითხება რა გინდა, სულ იმას ვეუბნები, რომ იქნებ სპეციალურ საგამოძიებო სამსახურს მოკითხოთ ეს საქმე.

ყოველ ჯერზე ოფიციალურ პასუხს მიგზავნიან – მოვიკითხეთ, მაგრამ არაფერი არ არის, მოვიკითხეთ, მაგრამ არაფერი არ არის…

• ადვოკატი: იძულებული ვარ.. მზია ეს ჩვენება თქვენ ხომ მიეცით სპეციალურ საგამოძიებო სამსახურს? იქ იყო ერთხელ კომუნიკაცია გამომძიებელთან, ხომ?

მზია ამაღლობელი: როცა ამ დეტალებს ვიხსენებდი, იმდენად ახლოს მოვიდა, რაღაც [ნერწყვი] შეიძლება სვიტერზეც მოხვედრილიყო, კი.

სვიტერის [გამოკვლევა] ჩემი ინიციატივა იყო. სადაც ვიდეო არ არის, ე.ი. იქ არაფერი არ ხდება…

ხომ ხვდებით.

____________________

• რა ხდება?

მზია ამაღლობელი გამოცემების – „ბათუმელებისა“ და „ნეტგაზეთის“ თანადამფუძნებელი და დირექტორია. ის 6 თვე უკანონო პატიმრობაში იმყოფება – სილის გაწვნის გამო მას პროკურატურა პოლიციელზე თავდასხმას ედავება.

ავტორიტეტული უფლებადამცველების შეფასებით კი, სილის გაწვნა, რასაც არანაირი ზიანი არ მოჰყოლია, არათუ თავდასხმა, საერთოდ არ არის სისხლის სამართლის დანაშაული.

სილის გაწვნა რომ თავდასხმა არ არის, ამას ადასტურებს უზენაესი სასამართლოს პრაქტიკაც.

მზია ამაღლობელის საქმის გარშემო გაერთიანდნენ პრესის თავისუფლების საკითხებზე მომუშავე წამყვანი გლობალური ორგანიზაციები.

ჟურნალისტთა დაცვის კომიტეტის [CPJ], პრესის საერთაშორისო ინსტიტუტის [IPI] და რეპორტიორები საზღვრებს გარეშეს [RSF] წარმომადგენლები 13 ივლისს რუსთავში, ქალთა კოლონიასთან მივიდნენ და ასე გამოხატეს სოლიდარობა უკანონოდ დაკავებული მზია ამაღლობელის მიმართ. ისინი ბათუმის სასამართლოში 14 ივლისს პროცესსაც დაესწრნენ.

მზია ამაღლობელის „დაუყოვნებლივი და უპირობო გათავისუფლებისა და მის წინააღმდეგ პოლიტიკურად მოტივირებული ყველა ბრალდების მოხსნის“ შესახებ, ჩანაწერი გაკეთდა ასევე ევროპარლამენტის რეზოლუციაში.

ამავე რეზოლუციით, ევროპარლამენტი „გამოხატავს ღრმა შეშფოთებას პატიმრობაში მისი [მზია ამაღლობელის] მხედველობის კრიტიკული გაუარესების გამო და მოუწოდებს სანდო სამედიცინო მომსახურების დაუყოვნებლივ ხელმისაწვდომობისკენ“.

მზია ამაღლობელის საქმის განხილვა დაიწყო ასევე სტრასბურგის ევროპულმა სასამართლომ.

ბათუმის საქალაქო სასამართლოში მზია ამაღლობელის საქმის არსებითი განხილვა, სავარაუდოდ, ივლისის ბოლოს დასრულდება.

აჭარის პროკურორი ზაზა მეტონიძე აღარ არის. იგი დასავლეთ საქართველოს საოლქო პროკურორის თანამდებობაზე გადაიყვანეს. ინფორმაციას საქართველოს პროკურატურა ავრცელებს.

საქართველოს პროკურატურის პრესცენტრში დღეს, 17 ივლისს, ვერ გვითხრეს, ვინ დაინიშნა აჭარის პროკურორად.

„ბათუმელების“ ინფორმაციით კი, რომელსაც რამდენიმე ინფორმირებული წყარო ადასტურებს, აჭარის ახალი პროკურორი გიორგი ცხოვრებაძეა.

გიორგი ცხოვრებაძე აქამდე ზესტაფონის რაიონულ პროკურორად მუშაობდა.

ბათუმის პროკურორად კი, „ბათუმელების“ ინფორმაციით, ირაკლი გაჩეჩილაძე დანიშნეს. ირაკლი გაჩეჩილაძე ოზურგეთის რაიონული პროკურატურის პროკურორი იყო.

ირაკლი გაჩეჩილაძემ ბათუმის პროკურორის პოსტზე გიორგი ბახტაძე ჩაანაცვლა.

____________________

მთავარ ფოტოზე: საქართველოს გენერალური პროკურორი გიორგი გვარაკიძე და აჭარის ყოფილი პროკურორი ზაზა მეტონიძე. ფოტო: საქართველოს პროკურატურა

ევროპასთან უვიზო მიმოსვლის გაუქმების საფრთხე რეალური გახდა „ქართული ოცნების“ ანტიევროპული პოლიტიკის გამო. რა ელოდება საქართველოს ევროპისგან დაშორებით და რას კარგავს ქართველი ხალხი? – ამ თემაზე „ბათუმელები“ პოლიტოლოგ გიორგი ბადრიძეს ესაუბრა.

• ბატონო გიორგი, დღეს უკვე დაიწყო მორიგი პროპაგანდა ირაკლი კობახიძემ ვიზალიბერალიზაციაზე და განაცხადა, რომ ევროკავშირი უვიზო მიმოსვლის საპირწონედ ითხოვს სუვერენიტეტის დათმობას და „ქართული ოცნება“ აირჩევს სტაბილურობასო. როგორ ფიქრობთ, ისევ იმუშავებს მსგავსი პროპაგანდა ხალხზე? და რას კარგავს ქვეყანა ვიზალიბერალიზაციის გაუქმებით?

მე კარგად მახსოვს, 2017 წელს, ზუსტად იგივე კობახიძე ამბობდა, რომ ეს იყო დიდი მიღწევა, როდესაც ევროკავშირმა მისცა საქართველოს უვიზოდ მიმოსვლის შესაძლებლობა. ის ამტკიცებდა, – სიტყვა-სიტყვით ვიმეორებ, რომ „ეს იყო დიდი პრივილეგია და ასევე პასუხისმგებლობა“.

ან მაშინ გვატყუებდა კობახიძე, ან ახლა ტყუის, რადგან ზუსტად ამის საპირისპიროს ამბობს.

ვიზალიბერალიზაცია და უვიზო მიმოსვლა ტექნიკური საკითხი არ არის, ეს არის ევროპასა და საქართველოს შორის ურთიერთობის ხარისხის საკითხი.

ევროკავშირს მხოლოდ იმ ქვეყნებთან აქვს უვიზო მიმოსვლა, რომლებსაც მიიჩნევს ახლობლად, მოკავშირედ და რომლის მოქალაქეებიც, სულ მცირე, არ წარმოადგენენ უკანონოდ, ვადაზე მეტხანს დარჩენის, სხვადასხვა დანაშაულის ჩადენის რისკს მის ტერიტორიაზე და ასე შემდეგ.

საქართველო მდიდარ ქვეყნებს შორის რომ არ იყო, ეს 2017 წელსაც იცოდნენ, მაგრამ მაინც მიიღეს ეს გადაწყვეტილება, მიუხედავად იმისა, რომ საქართველო რისკის ზონაში შედიოდა თავისი ეკონომიკური ვითარების გამო. ეს გადაწყვეტილება მიიღეს იმის წასახალისებლად, რასაც ქართველი ხალხისგან აღიქვამდნენ, რომ ხალხს ჰქონდა გამოხატული სურვილი გამხდარიყვნენ ევროპის ნაწილი.

და ასეც იყო.

ევროკავშირს აქვს თავისი კონკრეტული სტანდარტები, რომელიც ყოველთვის იყო ცნობილი. ეს არის დემოკრატიული ინსტიტუტები, ეს არის დემოკრატიული პროცესი, ეს არის ადამიანის უფლებები და ქვეყანა, რომელიც ამ პრინციპებს შეგნებულად, სისტემატურად არღვევს, ბუნებრივია, აღარ განიხილება ისეთივე მოკავშირედ, როგორადაც განიხილებოდა საქართველო მანამდე, სანამ ჰქონდა მას პრეტენზია, რომ სურდა ევროკავშირის წევრი გამხდარიყო.

შესაბამისად, შესაძლო გადაწყვეტილება უვიზო მიმოსვლის შეწყვეტის შესახებ, იქნება ევროკავშირის მიერ იმის აღიარება, რომ ივანიშვილის ხელისუფლება იმის საპირისპიროს აკეთებს, რასაც ევროკავშირი ელის კანდიდატი ქვეყნისგან.

დღეს სრულიად აშკარად გამოიხატა, რომ „ოცნების“ ხელისუფლება აკეთებს ყველაფერს იმის საპირისპიროდ, რაც არის მოთხოვნილი ევროკავშირის კანდიდატი ქვეყნისგან. მაშინ ევროკავშირის წევრი ქვეყნები თავიანთ მოქალაქეებს ვეღარ აუხსნიან, თუ რატომ არის უვიზო მიმოსვლა ღარიბ ქვეყანასთან, სადაც დემოკრატიის ნაცვლად ააშენეს რუსული პოლიტიკური სისტემა.

• დღეს მდინარაძემაც წამოსწია პროპაგანდის ის ხაზი, სადაც იმეორებენ, რომ თითქოს ოჯახების სიწმინდეს და ქართულ ღირებულებებს იცავენ ამით. „ოცნების“ მომხრეებს ახლა მაინც ხომ უნდა გაუჩნდეთ კითხვა, 2017 წელს არ ზრუნავდა კობახიძე ოჯახის სიწმინდეზე? მაშინ ხომ ამბობდა, რომ ვიზალიბერალიზაცია პრივილეგია იყო?

მამუკა მდინარაძე რას წარმოადგენს, მე აღარ შევალ ამის განხილვაში, მაგრამ სრულიად ბუნებრივია, რომ ის ღიად არ ეუბნება თავის მომხრეებს: ჩვენ იმიტომ ვამბობთ უარს ევროკავშირზე, რომ თქვენ, ჩემო ამომრჩეველო, არ გქონდეთ უფლებები, არ შეგეძლოთ თავისუფალ არჩევნებში მონაწილეობა, რომ თქვენ არ შეგეძლოთ სარგებლობა დამოუკიდებელი და სამართლიანი სასამართლოთი და ამაზე უარს რომ გეუბნებით, ამიტომ გვაქვს დაპირისპირება ევროკავშირთანო.

ამას ვერ ეტყვიან.

ამიტომ უნდა გამოიგონონ რაღაც აბსურდული ბრალდება ევროკავშირის მიმართ.

ევროკავშირი, რა თქმა უნდა, არ შეცვლილა და ადამიანის უფლებების დაცვა იქ ყოველთვის ფუნდამენტურ პრინციპს წარმოადგენდა. ოღონდ ამ ლგბტქ საკითხზე რომ აქვთ ხოლმე ასეთი გართულება „ოცნების“ წარმომადგენლებს, მათ მომხრეებსაც უნდა ესმოდეთ, რომ ევროკავშირში ყველას უფლებაა დაცული, ყველა მოქალაქის და ქვეყნები, რომლებიც ღიად არღვევენ უმცირესობების უფლებებს, არასდროს არ იცავენ უმრავლესობის უფლებებსაც და ასევე ღიად არღვევენ მათ უფლებებსაც.

რუსეთის მოდელზე რახან გადადის ივანიშვილის ხელისუფლება, ძალიან მარტივად შემიძლია გაჩვენოთ, რომ რუსეთში ღიად და კანონით არის შემოღებული უმცირესობების დისკრიმინაცია, მაგრამ აბა გაბედოს სლავმა, ეთნიკურმა რუსმა, მართლმადიდებელმა და ხმა ამოიღოს მაგალითად კორუფციაზე, როგორც ეს გააკეთა რუსმა ნაციონალისტმა ალექსეი ნავალნიმ და ყველამ ნახა, რა დღე დააყენა შემდეგ ვითომ ტრადიციული ფასეულობების დამცველმა რუსულმა ხელისუფლებამ.

ეს უნდა მიიღონ მხედველობაში იმ ადამიანებმა, რომლებიც ასე მიამიტურად უსმენენ ამ სულელურ და უწესო პროპაგანდას.

• კობახიძემ თავის პროპაგანდაში კვლავ ჩართო ასეთი ნარატივი, რომ აი, რით განსხვავდება ბრიუსელი და მოსკოვი? საბჭოთა კავშირიც გვკარნახობდა და თუ არ შეასრულებდი, გსჯიდნენო. ამ კრემლისტურ პროპაგანდას როგორ შეგიძლიათ უპასუხოთ?

ბრიუსელი არის მიზიდულობის ძალა, თავისი განვითარებით, თავისი ეკონომიკური კეთილდღეობით, თავისი კულტურული, სამეცნიერო და სხვა უამრავი მიღწევებით, რის გამოც შევიდნენ ევროკავშირში ის ქვეყნები, რომლებიც შევიდნენ.

არცერთ ამ ქვეყანას ევროკავშირი არ გაჰკიდებია და ძალით არ შეუყვანიათ. პირიქით, უამრავი წინაპირობაა შესასრულებელი იმისთვის, რომ მიგიღონ ევროკავშირში.

რუსული სისტემა გულისხმობს, გინდა თუ არ გინდა, ძალით, მის დაქვემდებარებაში ყოფნას. და თუ შენ არ გაქვს სურვილი, რომ იყო მოსკოვის ყმა, ის ომით და ძალმომრეობით გიზიდავს მასში.

ზოგადად, დასავლური და რუსული სისტემა კიდევ იმით განსხვავდება ერთმანეთისგან, რომ დასავლური სისტემა დაფუძნებულია დემოკრატიის პრინციპზე, ადამიანის უფლებების და ადამიანის კეთილდღეობის პრინციპზე და რუსული სისტემა დამოკიდებულია ძალმომრეობაზე, ადამიანის უუფლებობაზე და როგორც ვთქვი, ეს ასევე გულისხმობს უმრავლესობის წარმომადგენლების უუფლებობასაც.

აი, ეს არის განსხვავება და ამათი გაიგივება შეუძლია მხოლოდ სრულიად უცოდინარ ან სრულიად უსინდისო ადამიანს, რომელიც ასე ღიად თვალში ნაცარს აყრის ჩვენს მოქალაქეებს.

• ვიზალიბერალიზაციის საკითხს ბევრი ადამიანი გამოეხმაურა ფეისბუქზე. ბევრი წერდა, რომ უვიზო მიმოსვლამ ძალიან ბევრი ოჯახი გადაარჩინა შიმშილს და სიკვდილს, რადგან ვიცით, რომ თავისუფალი მიმოსვლა არ არის მხოლოდ ევროპაში მოგზაურობა და ეს დაკავშირებულია სამუშაო ადგილებთან, მკურნალობასთან, განათლების მიღებასთან და ასე შემდეგ. იქნებ კიდევ შევახსენოთ ადამიანებს, რა შეიძლება დაკარგონ ევროპასთან თავისუფალი მიმოსვლით?

არა მგონია არ იცოდნენ ამის შესახებ ადამიანებმა, არ იღებდნენ ამ სიკეთეებს ან არ იცნობდნენ ისეთ ოჯახებს, რომლებიც პირდაპირ დამოკიდებული არიან ევროპიდან მათი ახლობლების მხრიდან ფულის გადმორიცხვაზე.

„ქართული ოცნების“ წარმომადგენლებსაც ძალიან უყვართ იქ სიარული გასართობად, შოპინგისთვის და შემდეგ გვეტრაბახებიან ამ ყველაფრით, თუ როგორ დადიან და ძალიან ხშირად ჩვენ ხარჯზე ევროპის დედაქალაქებში. მათთვის ჯერ არ შემიმჩნევია, რომ სასწავლებლად, საცხოვრებლად ან სამუშაოდ თავიანთი შვილები გაეგზავნოთ სადმე რუსულ პროვინციაში.

ასე, რომ ამ პრივილეგიის დაკარგვა, ყველას შეეხება, მაგრამ მთავარი აქ არის არა მხოლოდ ის დანაკარგი, რომელიც ფიზიკურად შეუზღუდავს ადამიანს უვიზოდ, ბილეთის აღების შესაძლებლობას, ყოველგვარი ზედმეტი ძალისხმების გარეშე, არამედ ეს იქნება სიმბოლო საქართველოს დაშორებისა იმ საერთო ცივილიზაციური და პოლიტიკური სფეროდან, რომელსაც ის თავისად განიხილავდა მრავალი თაობის და საუკუნის განმავლობაში.

ამით მამუკა მდინარაძეები გვეუბნებიან, რომ ჩვენ არ ვართ დასავლური, ევროპული, ქრისტიანული ცივილიზაციის ნაწილი, არამედ ვართ აი, ამ მონღოლური ურდოს ნაწილი, რომელიც არის რუსეთი.

რაც არ უნდა დიდი ჯვარი დაიჭიროს ამ ხალხმა ხელში, სინამდვილეში ლაპარაკია სწორედ ამ მონღოლურ კაბალაში და მონღოლების ყმობაში დაბრუნებაზე.

• თუკი მოხდება ისე, რომ მართლა შეგვიჩერდება უვიზო მიმოსვლა ევროპასთან, შეძლებს კი საქართველო ოდესმე ამ პრივილეგიის დაბრუნებას თუ სამუდამოდ დავკარგავთ ამ სიკეთეს „ქართული ოცნების“ პროპაგანდის და მავნე პოლიტიკის გამო?

როგორც კი საქართველო მოიპოვებს ნორმალურ ხელისუფლებას, პირველივე დღიდან, ბუნებრივია, აღდგება მუშაობა ევროკავშირთან ამ ურთიერთობების, ამ ინტეგრაციის აღდგენაზე, ოღონდ შემიძლია წარმოვიდგინო, რომ ევროკავშირის არაერთ ქვეყანაში უფრო მეტი ეჭვით და სკეპტიციზმით შეიძლება მოეკიდონ საქართველოს, რადგან ფაქტია, რომ აგერ უკვე 12 წელია მას მართავს რუსული ოლიგარქიული რეჟიმი, რომელიც მათ მიიღეს პარტნიორად, მაგრამ მათ ძალაუფლების და დიდი კორუფციული ქონების შენარჩუნება ამჯობინეს დემოკრატიულ პრინციპებს და ევროპაში ინტეგრაციას და ევროპის ქვეყნებს ყოველდღე სასწაულ ბრალდებებს უყენებენ. ხან გარყვნილებას აბრალებენ და ხან ომში ჩვენი ჩათრევის სურვილს.

მე ხაზს გავუსვამ, რომ ევროკავშირი არის მსოფლიოში უნიკალური გაერთიანება, რომელმაც უზრუნველჰყო კაცობრიობის ისტორიაში ყველაზე ხანგრძლივი, უწყვეტი მშვიდობის პერიოდი, დაწყებული მისი შექმნიდან გაგრძელებული დღემდე.

მსოფლიოში არცერთ რეგიონში 80 წლის განმავლობაში უწყვეტი მშვიდობა და კეთილდღეობა არ ყოფილა. ასე რომ, ევროკავშირი არის მშვიდობის პროექტი და სწორედ მას აბრალებენ ომის გაჩაღების სურვილს, რაც არის გათვლილი სრულიად ბრიყვი, უმეცარი, უცოდინარი ადამიანებისთვის.

• ვიცით, რომ ძალიან აქტიურად ალაპარაკდა სომხეთი ევროინტეგრაციაზე. რამდენად არის შესაძლებელი, რომ სომხეთმა შეძლოს ევროინტეგრაცია, აზერბაიჯანმა და ამ დროს, საქართველო ჩარჩეს რუსულ ჭაობში? გეოპოლიტიკურად თუ არსებობს ამის შანსები?

მთავარი პრობლემა, ჩვენი კუთხიდან თუ შევხედავთ, არის ის, რომ რუსეთი დღეს უკვე ცდილობს სომხეთის ევროპისკენ მიმავალი გზის გადაჭრას საქართველოს მეშვეობით.

ზუსტად ისე, როგორც აზერბაიჯანს შეიძლება შეუქმნას პრობლემები თურქეთთან და საერთაშორისო ბაზრებთან დაკავშირებით საქართველოს მეშვეობით და ეს წარმოქმნის რეალურ შესაძლებლობას, რომ რუსეთმა შესაძლოა გააჩაღოს კონფლიქტი საქართველოსა და სომხეთს ან საქართველოსა და აზერბაიჯანს შორის.

კონფლიქტი იყო ყოველთვის საფუძველი სამხრეთ კავკასიაზე რუსეთის კონტროლის. და თუ დავაკვირდებით, აზერბაიჯანი აქტიურად აწარმოებს მოლაპარაკებებს სომხეთთან, რათა პრაქტიკულად გახსნას საქართველოს ალტერნატიული დერეფანი, რომელიც მას დააკავშირებს თურქეთთან და ამაში დამნაშავე არის პირადად „ქართული ოცნება“ და ბიძინა ივანიშვილი, რადგან მან პრაქტიკულად წაართვა საქართველოს მისი ბუნებრივი გეოპოლიტიკური, გეოეკონომიკური ფუნქცია დამაკავშირებლის კასპიის რეგიონისა შავ ზღვასთან.

იმიტომ, რომ მას დღეს აღიქვამენ უკვე არასანდო პარტნიორად არა მარტო ევროკავშირში, არამედ ჩვენს უშუალო სამეზობლოშიც.

მე არ ვიცი შეძლებს თუ არა სომხეთი საქართველოს გარეშე ევროკავშირში გაწევრიანებას, რადგან მას ფიზიკურად არ ექნება დამაკავშირებელი, მაგრამ, ის, რომ სომხეთს შეუძლია დღეს აზერბაიჯანთან სამშვიდობო შეთანხმების დადების შემდეგ აქტიურად ჩაანაცვლოს საქართველო, როგორც სატრანზიტო ელემენტმა, ეს რეალურად შესაძლებელია.

• დღეს ეროვნული ბანკის ხელმძღვანელი შეხვდა ჩინეთის ტრანსსასაზღვრო ბანკთაშორისი გადახდების სისტემის ხელმძღვანელს და როგორ ფიქრობთ, ელოდება ივანიშვილი, რომ, შესაძლოა SWIFT-იდანაც გაითიშოს საქართველო? ასეთ შემთხვევაში ჩინეთი რას მისცემს საქართველოს, იქნება კი დასავლეთის ალტერნატივა ჩვენთვის?

ჯერ ერთი, ჩინეთი ევროკავშირს და დასავლეთს საქართველოში ვერ ჩაანაცვლებს, იმიტომ, რომ ამის არც სურვილი აქვს და არც ინტერესი. ჩინეთი დიდი ხანია ძალიან კონკრეტული პრინციპებით მოქმედებს და ეს პრინციპი გულისხმობს, რომ ის არასდროს კავკასიაში რუსეთის საწინააღმდეგოდ არ იმოქმედებს.

ყველაფერი, რასაც ჩინეთი გააკეთებს, იქნება მხოლოდ და მხოლოდ რუსეთთან კოორდინაციაში. ჩინეთი კავკასიას და საქართველოს თვლის რუსეთის ვასალად და სხვანაირად ის, დამოუკიდებლად, საქართველოში არ მოიქცევა და არც ჩინური საბანკო სისტემა შემოვა საქართველოში ძალიან მარტივი მიზეზით, რადგან მას არ აქვს საქართველოში საკმარისი პოლიტიკური ან ეკონომიკური ინტერესი.

ასეთი ინტერესი რომ ჰქონდეს, მაშინ საქართველოში დიდი ხნის წინ გვექნებოდა ნანახი ჩინური ინვესტიციები, რომლებიც მოახდენდნენ სერიოზულ გავლენას ჩვენს ეკონომიკურ განვითარებაზე.

იმ ჩინელი მშენებლების გარდა, რომელიც შეიძლება პერიოდულად ნახოთ ჩვენს გზებზე და რომლებიც ევროპული ფულით აშენებენ ჩვენს ინფრასტრუქტურას, სხვა არანაირი განსაკუთრებული ჩინური აქტივობა საქართველოში არ არსებობს.

• ამ შეხვედრების მიზანი რა არის მაშინ?

ვერ გეტყვით, რადგან მათი განცხადებები ჩემთვის დიდი ხანია სანდო აღარ არის და არც ჩინეთი არ არის საქართველოში სტრატეგიული მოთამაშე და ვერც გახდება, რადგან სულ მცირე, ის რუსეთთან კოორდინაციაში მოქმედებს.

• როგორ ფიქრობთ, შეძლებს „ოცნება“, რომ ხალხი შეაგუოს ვიზალიბერალიზაციის დაკარგვას თუ ექნება ამას წინააღმდეგობა?

თუ „ქართული ოცნება“, ბიძინა ივანიშვილი მიაღწევს ამ მიზანს, რომ შეაგუოს ამას ხალხი, ეს ნიშნავს, რომ ხალხი აღმოჩნდება არა მარტო პოლიტიკურად იზოლირებულ ქვეყანაში, არამედ ბევრად უფრო ძლიერ ეკონომიკურ გასაჭირში.

და ამას თავისთავზე იგრძნობს ყველა. მე მეშინია, რომ მერე უფრო ძნელი არ აღმოჩნდეს ამ ორმოდან ამოსვლა, რომელშიც ჩვენ პრაქტიკულად შევყავართ ბიძინა ივანიშვილს, მხოლოდ და მხოლოდ თავისი პირადი ძალაუფლების და ფინანსური ინტერესების უზრუნველსაყოფად.

სახელმწიფო გრანტის მართვის სააგენტო 21 ივლისს გეგმავს საჯარო კონკურსის გამოცხადებას სახელმწიფო გრანტის გაცემის მიზნით.

30 ივნისს  „ოცნების“ მთავრობამ სააგენტოს დაფინანსება 304 ათასი ლარით გაუზარდა. უშუალოდ გრანტების გასაცემად კი, 2025 წელს ბიუჯეტიდან სააგენტოსთვის 20 მილიონი ლარის გამოყოფა იგეგმება.

სააგენტო აცხადებს, რომ მთავრობის მიერ დაფინანსების გაზრდის შედეგად „გაუჩნდა შესაძლებლობა, გამოყოს ფინანსური რესურსი სააგენტოს საქმიანობის შესახებ ცნობადობისა და ინფორმირების გაზრდის მიზნით.“

ამ „მიზნის“ მისაღწევად სააგენტო სოციალური მედიის [Facebook, Instagram პლატფორმაზე] შექმნისა და მართვის მომსახურებას, ასევე ამ გვერდებზე განსათავსებელი დიზაინერული შინაარსის პროდუქტებს ტენდერის გარეშე შეისყიდის – ჯამში 24 ათას 68 ლარად.

თუმცა მომსახურების ვადა სულ 2 თვე და 10 დღე იქნება [2025 წლის 22 ივლისი – 30 სექტემბრის ჩათვლით პერიოდი].

„მომსახურების დეტალური აღწერა: სააგენტოსთან შეთანხმებული ფორმითა და შინაარსით პოსტების გამოქვეყნება საჭიროებისამებრ, თვეში არაუმეტეს 10 პოსტი; ვიზუალური კონტენტის დამზადება, კერძოდ ფოტოები, ბანერი, ინფოგრაფიკა – თვეში არაუმეტეს 10 ვიზუალური კონტენტი [საჭიროებისამებრ]; ვიზუალური კონტენტის მოკლე ვიდეო რგოლის მონტაჟი [≤ 1 წუთი] – თვეში არაუმეტეს 5 ვიდეო რგოლი; სტატისტიკის დეტალური ანგარიშის მომზადება – ყოველთვიურად.“

„ამჟამად სააგენტოს არ გააჩნია ოფიციალური ვებგვერდი და ასევე არ ფლობს სოციალური მედიის პლატფორმას. სააგენტო საბიუჯეტო შუა წელს შეიქმნა და ამდენად მას არ გააჩნია სრული საშტატო/ორგანიზაციული მხარდაჭერა და ამჟამად იმყოფება ჩამოყალიბების ეტაპზე. საქართველოს მთავრობის 2025 წლის 30 ივნისის განკარგულებით სააგენტოს დამატებით გამოეყო თანხა – საქმიანობის შესახებ საზოგადოების ინფორმირების უზრუნველსაყოფად.

მიმდინარე წლის 21 ივლისს სახელმწიფო გრანტის მართვის სააგენტო გეგმავს სახელმწიფო გრანტის გაცემის მიზნით საჯარო კონკურსის გამოცხადებას, რაც წარმოადგენს მის ძირითად ფუნქციას. ამდენად საზოგადოებისთვის ინფორმაციის დროული და კვალიფიციური მიწოდება უმნიშვნელოვანესია“ – წერს სახელმწიფო გრანტის მართვის სააგენტო შესყიდვების სააგენტოს, რომლისგანაც გამარტივებულ შესყიდვაზე თანხმობას ელოდება.

„ოცნების“ მთავრობამ სახელმწიფო გრანტის მართვის სააგენტოს საშტატო ნუსხა და ხელფასები 2025 წლის მაისში დაამტკიცა. სააგენტოს თავმჯდომარის ხელფასი თვეში 10 ათას 585 ლარი იქნება; მოადგილის – 8 ათას 760 ლარი, ხოლო დეპარტამენტის უფროსის – 7 ათას 300 ლარი.

„ოცნების“ მთავრობის 2025 წლის 30 ივნისის განკარგულებით კი, სააგენტოს დაფინანსება გაიზარდა და 510 ათას 200 ლარის ნაცვლად 814 ათას 472 ლარი გახდა.

აქვე აღსანიშნავია, რომ „ქართულმა ოცნებამ“ აკრძალა მთავრობის თანხმობის გარეშე უცხოური გრანტის მიღება.

ფოტოზე: გრანტის მართვის სააგენტოს თავმჯდომარე თამარ ზოდელავა.

ამავე თემაზე:

სახელმწიფო გრანტის მართვის სააგენტოს უფროსის ხელფასი 10 585 ლარი იქნება

See more

 

 

 

გონიოში მშენებარე კორპუსის ხარაჩო ჩამოიგრა.

საგანგებო სიტუაციების მართვის სამსახურის ინფორმაციით, რკინის კონსტრუქციის ჩამოშლის შედეგად დაშავდა ერთი ადამიანი.

მათივე ინფორმაციით, დაშავებული კაცი გადაყვანილია კლინიკაში.

შემთხვევა დღეს, 17 ივლისს მოხდა.

შსს-ს ინფორმაციით, გამოძიება დაწყებულია სსკ-ის 240-ე მუხლით, რაც გულისხმობს მშენებლობის ან ექსპლუატაციის დროს უსაფრთხოების წესების დარღვევას, რასაც მოჰყვა ჯანმრთელობის ნაკლებად მძიმე ან მძიმე დაზიანება.

ახალგაზრდა იურისტთა ასოციაციის თავმჯდომარე, ნონა ქურდოვანიძე ფეისბუქზე წერს, რომ დღეს, 17 ივლისს, მოინახულა პატიმრობაში მყოფი მასწავლებელი, აქტივისტი ნინო დათაშვილი, რომელსაც ჯანმრთელობის პრობლემები აქვს და კვლევები სჭირდება.

„ნინო დათაშვილს შევხვდი დღეს. მხნედ არის, თუმცა, მისი ჯანმრთელობის მდგომარეობის გათვალისწინებით, აუცილებელია, დაუყოვნებლივ ჩაუტარდეს ყველა საჭირო გამოკვლევა და დროულად ჰქონდეს წვდომა შესაბამისი პროფილის ექიმთან.

ნინოს საქმეზე საია ახორციელებს სასამართლო პროცესების მონიტორინგს. მის მიმართ აღკვეთის ღონისძიების სახით გამოყენებული პატიმრობა სრულიად დაუსაბუთებელია და გამოყენებულია აქტივისტი ქალის დასასჯელად“ – წერს ნონა ქურდოვანიძე.

სამოქალაქო განათლების მასწავლებელი ნინო დათაშვილი სასამართლოს მანდატურზე თავდასხმის ბრალდებით 20 ივნისს დააკავეს.

საქმე ეხება 9 ივნისს თბილისის საქალაქო სასამართლოში მომხდარ ინციდენტს. 9 ივნისს ნინო დათაშვილი  სინდისის პატიმრების სასამართლო პროცესზე იმყოფებოდა. სწორედ ამ დროს მოხდა ინციდენტი, რის გამოც პროკურატურა მასწავლებელს, მანდატურზე თავდასხმას ედავება, თუმცა ნინო დათაშვილი თავდაპირველად თავად გახდა მანდატურებისგან ფიზიკური შეურაცხყოფის მსხვერპლი.

„ინციდენტს, რაც მოხდა, თავისი საწყისი ისტორია აქვს და დავამტკიცებთ, ვიდეოებით, რა მოხდა და როგორ მოხდა.

რამდენიმე ადამიანის გაკავებული, 150 სანტიმეტრი ვარ სიმაღლეში, როგორ დავესხი თავს მანდატურებს? განმიმარტონ, რას ნიშნავს სიტყვა თავდასხმა?

150-სანტიმეტრიანმა ადამიანმა, გაკავებულმა, რომელსაც მიჭერდა ყველა…. განმიმარტეთ თავდასხმა რას ნიშნავს და 4 კაცის მიერ გაკავებული ქალი, როგორ ესხმის თავს მანდატურებს?“ – დაუსვა კითხვა პროკურორებს ნინო დათაშვილმა სასამართლო პროცესზე.

არც პროკურატურამ და არც მოსამართლემ ნინო დათაშვილის არგუმენტები არ გაიზიარეს. მოსამართლე ეკა ბარბაქაძემ მასწავლებელს აღკვეთის ღონისძიების სახით პატიმრობა შეუფარდა.

სამოქალაქო განათლების მასწავლებელ ნინო დათაშვილს პროკურატურამ ბრალი სამსახურებრივი მოვალეობის შესრულების დროს საჯარო მოსამსახურეზე თავდასხმის მუხლით წარუდგინა.დანაშაული, რომელსაც ნინო დათაშვილს ედავებიან, ჯარიმას ან 4-დან 7 წლამდე თავისუფლების აღკვეთას ითვალისწინებს.

სამოქალაქო მასწავლებლის საქმეზე წინასასამართლო სხდომა 7 აგვისტოს გაიმართება.

საქართველოს სახალხო დამცველი ნინო დათაშვილთან დაკავშირებით განცხადებას ავრცელებს, რომლის მიხედვითაც ის 27 ივნისს, 11 და 16 ივლისს, N5 პენიტენციურ დაწესებულებაში მოინახულეს.

სამოქალაქო აქტივისტი, სამოქალაქო განათლების მასწავლებელი ნინო დათაშვილი სასამართლოს მანდატურზე თავდასხმის ბრალდებით 20 ივნისს დააკავეს.

15 ივნისს აქტივისტმა ნინო კალანდიამ ნინო დათაშვილისთვის შექმნილ ფეისბუქჯგუფში დაწერა, რომ მას ხერხემალთან დაკავშირებული სერიოზული პრობლემა აქვს, თუმცა ექიმი მასთან არ შესულა. მან ნინო დათაშვილის ჯანმრთელობის მდგომარეობით დაინტერესება სახალხო დამცველს მოსთხოვა.

სახალხო დამცველის მიერ დღეს, 17 ივლისს გავრცელებული განცხადების მიხედვით, შეხვედრისას ნინო დათაშვილმა რწმუნებულებთან სხვადასხვა საკითხზე ისაუბრა, რის შესახებაც ომბუდსმენის აპარატმა რეაგირების მიზნით, საქართველოს გენერალურ პროკურატურას, შინაგან საქმეთა სამინისტროსა და სპეციალური პენიტენციური სამსახურის სამედიცინო დეპარტამენტს მიმართა:

„ნინო დათაშვილმა სახალხო დამცველის რწმუნებულებს 11 ივლისს მოსთხოვა, მის შესახებ მიწოდებული ინფორმაცია არ გამხდარიყო საჯარო. შესაბამისად, აპარატს არ გაუსაჯაროებია განსაკუთრებული კატეგორიის პერსონალური ინფორმაცია ნინო დათაშვილის ჯანმრთელობის მდგომარეობის შესახებ“.

სახალხო დამცველი ასევე ეხმაურება და დეზინფორმაციას უწოდებს მის მიმართ გაჟღერებულ პრეტენზიებს პატიმრების უფლებების დარღვევებზე დროულ რეაგირებებთან დაკავშირებით.

„მაღალი საზოგადოებრივი ინტერესის გათვალისწინებით, აღნიშნულზე გვსურს განვმარტოთ შემდეგი: აპარატის რეაგირების თაობაზე დეზინფორმაციის გავრცელება სოციალურ ქსელებსა თუ ცალკეული მედიასაშუალებების მხრიდან განსაკუთრებულ ზიანს აყენებს თითოეული პატიმრის უფლებების დაცვის პროცესს.

სახალხო დამცველის აპარატის ცხელი ხაზი ფუნქციონირებს 24 საათიან რეჟიმში. ნებისმიერ დროს დახურული ტიპის დაწესებულებიდან მიღებულ ინფორმაციაზე, რომელიც ეხება როგორც სავარაუდო არასათანადო მოპყრობის ფაქტებს, ასევე ჯანმრთელობის დაცვის საკითხებს, ხდება დაუყოვნებელი რეაგირება. სახალხო დამცველის რწმუნებულები ადგილზე ახორციელებენ ვიზიტს და ახდენენ პირველად რეაგირებას. ამასთან, განისაზღვრება შემდგომში გასატარებელი ღონისძიებები, მათ შორის, საჭიროების შემთხვევაში, იგეგმება აპარატში დასაქმებული ექიმის ჩართულობა.

სახალხო დამცველი, როგორც წამების პრევენციის ეროვნული მექანიზმი, უპირველესად მოქმედებს დაკავებულ პირთა საუკეთესო ინტერესებიდან გამომდინარე და მათი მოთხოვნის შესაბამისად, იცავს მათ შესახებ პერსონალურ ინფორმაციას, მათ შორის მათი ჯანმრთელობის მდგომარეობის შესახებ. მაღალი საზოგადოებრივი ინტერესის მიუხედავად, ინფორმაციის გასაჯაროება ხდება მხოლოდ თავისუფლებააღკვეთილი პირის თანხმობის შემთხვევაში.

ამასთან, უნდა აღინიშნოს, რომ სახალხო დამცველის რწმუნებულებს არასდროს ჰქონიათ და არ აქვთ უფლებამოსილება – თავად ჩაატარონ სამედიცინო გამოკვლევები პენიტენციურ დაწესებულებებში“.

„ეს არის ბოროტი კანონი, რომელიც მისი კიდევ უფრო ბოროტად გამოყენების შესაძლებლობას იძლევა.

შუა საუკუნეების თემური წყობილების დროს თუ შეიძლება ასეთი კანონმდებლობა დავუკავშიროთ. არაადამიანური და ღირსების შემლახავია, გაიძულებს ოჯახის წევრს არ დაეხმარო, მეგობარს არ დაეხმარო“ – განმარტავს იურისტი ნიკა სიმონიშვილი ფინანსურ დანაშაულთან დაკავშირებული საკანონმდებლო ცვლილებების შესახებ, რომელსაც „ოცნებამ“ ორი მოსმენით მხარი დაუჭირა და მესამე მოსმენას საშემოდგომო სესიებზე გეგმავენ.

ცვლილება მთელ რიგ შეზღუდვებს ითვალისწინებს, რაც, იურისტის განმარტებით, ფაქტობრივად ფინანასურ დანაშაულში მხილებული პირს საზოგადოებისგან გარიყავს და ქუჩაში, დახმარების გარეშე დატოვებს.

კიდევ რას ითვალისწინებს ცვლილებების პაკეტი და როგორ შეიძლება მოხდეს მისი აღსრულება, როცა კანონი ოჯახის წევრისთვის ღამის გათევის შესაძლებლობის მიცემას აგიკრძალავს? – ამ თემაზე ჩვენს კითხვებს იურისტი ნიკა სიმონიშვილი პასუხობს.

• ბატონო ნიკა, საზოგადოებისთვის ისევ ბუნდოვანია, ზუსტად რას გულისხმობს და როგორ შეიძლება შეეხოს ფინანსურ დანაშაულში მხილებულის ოჯახის წევრს ცვლილებები კანონში, როგორ მოხდება აღსრულება. მართალია „ოცნებამ“ დაადასტურა, რომ ბაჩიაშვილის საქმით არის პროექტი ინსპირირებული, თუმცა როგორ შეეხება ეს მთელ ქვეყანას, როცა კანონად იქცევა? – მარტივად, რომ აგვიხსნათ, ბევრი დეტალია, რაც დაბნეულობას და კითხვებს იწვევს.

პირველი, რაც უნდა ვთქვათ, არის ის, რომ შეიძლება „ქართული ოცნება“ ამას იღებს კონკრეტული პირების წინააღმდეგ და ეს ნამდვილად ასეა, მაგრამ შეეხება უამრავ ჩვეულებრივ შემთხვევას და ჩვეულებრივ ადამიანს. მე შემიძლია დავასახელო კონკრეტული მაგალითებიც კი, როდესაც ეს საკანონმდებლო ცვლილება შეეხება არამარტო გიორგი ბაჩიაშვილს და სხვა ადამიანებს, რომელთა მიმართაც ივანიშვილს აქვს კონკრეტული მოთხოვნები [რამდენად სამართლიანია, ეს მეორე საკითხია], მაგრამ შეეხება ჩვეულებრივ ადამიანებსაც, რიგით შემთხვევებს, რიგით საქმეებს, თან არაერთს.

შეეხება ისეთ საქმეებს, სადაც, მაგალითად, თუ ჩემი ოჯახის წევრი არის მსჯავრდებული მძიმე ფინანსურ დანაშაულში, როდესაც ის ციხიდან გამოვა, ძალიან მარტივად რომ ვთქვათ, მას თუ ჩემთან სახლში ვაცხოვრებ, ამის გამო მეც დამიჭერენ და ჩემს ოჯახის წევრსაც.

მოვიკითხოთ, თუნდაც სანაცნობოში, სამეზობლოში, სანათესავოში შემთხვევები, როდესაც პირები არიან მძიმე ფინანსურ დანაშაულებში მხილებული, სადაც 100 ათას ლარს აღემატება ზიანი. თუ თქვენ ნახავთ თქვენს გარშემო ასეთ შემთხვევებს, ყველა ამ შემთხვევას შეეხება.

ცხადია, მარტო გიორგი ბაჩიაშვილის საქმესა და ბიძინა ივანიშვილის „მოვალეებს“ არ შეხება ეს კანონი. შეიძლება პირველადი მიზანი არის ეს და არ იღებენ ცვლილებებს სხვა ადამიანების წინააღმდეგ, მაგრამ შეეხება ძალიან ბევრ ადამიანს, რომლებიც არიან იმ მუხლებით მსჯავრდებულები, რაც ფინანსურ დანაშაულებს ითვალისწინებს და ასევე, მათ ოჯახის წევრებს, მეგობრებს, ნათესავებს, ახლობლებს.  იმ ადამიანებს, რომლებიც გაბედავენ და დაეხმარებიან მათ ფინანსურად იქნება ეს, საცხოვრებლით, მანქანით, ფულით, საკვებით თუ სხვადასხვა პროდუქტით.

• და ეს „გაბედვა“ როგორ უნდა აკონტროლონ, აღსრულება როგორ მოხდება? ვთქვათ, სტუმრად მივიღე ყოფილი მსჯავრდებული, როგორ შემამოწმებს ღამე გავათევინე თუ არა, რა წერია ამაზე პროექტში?

არაფერი არ წერია. ახალი საკანონმდებლო ცვლილება ორი მოსმენით არის მიღებული და მესამე მოსმენა ჯერჯერობით არ ყოფილა, მაგრამ არ გაუჭირდებათ, რომ მიიღონ.

კანონპროექტი გვეუბნება, რომ დანაშაულით მიყენებული ზიანის ასანაზღაურებლად მსჯავდებულ პირს პირდაპირ ჩამოერთმევა დანაშაულის შედეგად შეძენილი ქონება და გადაეცემა დაზარალებულს. მეორე არის ის, რომ თუ ეს ქონება არ ჰყოფნის ზიანის ანაზღაურებას, რაც აქვს ზოგადად მსჯავრდებულს, ის გაიყიდება. ნებისმიერი ქონება: ეს შეიძლება იყოს ფული, საბანკო ანგარიშებზე არსებული თანხა, მოძრავი თუ უძრავი ნებისმიერი ქონება აღსრულებას დაექვემდებარება.

ანუ, დავრჩები სრულიად უქონელი, არც ფული მექნება, არც სახლი არც კარი, არანაირი ქონება არ მექნება. როდესაც სასჯელაღსრულების დაწესებულებას დატოვებს მსჯავრდებული, მას შეიძლება საქართველოდან გასვლაც შეეზღუდოს. გამოდის ციხიდან და საქართველოს ვერ ტოვებს, უნდა დარჩეს ყველა შემთხვევაში.

• და პირდაპირ ქუჩაში რჩება?

პირდაპირ ქუჩაში რჩება. მას ზიანის ასანაზღაურებლად გაუყიდიან ქონებას. ასევე, თუ ჩათვალეს, რომ დანაშაულის შედეგად არის მოპოვებული ეს ქონება, ის პირდაპირ გადაეცემა დაზარალებულს. თუ ფულის გათეთრების დანაშაულია, ოჯახის წევრისგან, ან ახლო ნათესავისგან შეიძლება ამოიღონ ეს ქონება. ესეც არის შესაძლებელი, თუ ფულის გათეთრების დანაშაულს შეეხება და ის არის სრულიად უსახლკარო და უქონელი.

ყოველგვარი ქონების გარეშე რჩები ასე გარეთ, ვერსად ვერ მიდიხარ, სამაგიეროდ გრჩება შესაძლებლობა, რომ თუ რაიმე თანხა ჩაგერიცხება ანგარიშზე, საარსებო მინიმუმის ორმაგ ოდენობაზე მეტი რაც იქნება, დაახლოებით 520 ლარზე არის ბოლო მდგომარეობით საუბარი, ავტომატურად მოგეჭრება და წავა დაზარალებულის დასაკმაყოფილებლად.

თუ „ქეშად“, ანუ ნაღდი ფულის სახით იღებ თანხას, ასეთ შემთხვევაში ეს არის დანაშაული იმ პირის მხრიდან, ვინც ამ თანხას გაძლევს „ქეშად“. შენი მხრიდანაც ასევე ეს იქნება დანაშაული, თუ ამ თანხას მიიღებ.

520 ლარს ზემოთ თანხა თუ ჩამერიცხება, მაგალითად, ავტომატურად ინკასო იქნება დადებული ამ ანგარიშზე და 520 ლარს ზემოთ მოიჭრება თანხა და გადაეცემა დაზარალებულს; ამავდროულად, თუ მივიღებ სარგებელს 520 ლარზე ზემოთ, სხვადასხვა ფორმით, ეს იქნება საკვები თუნდაც, ან სხვადასხვა ნივთები, ტანსაცმელი, საყოფაცხოვრებო პროდუქტი, ტექნიკა, მობილური ტელეფონი ან არ ვიცი სხვადასხვა საყოფაცხოვრებო ტექნიკა, ავტომობილი, ასევე საცხოვრებელი, გარეთ როცა დავრჩები თუ ვინმე მაცხოვრებს და ეს აღემატება 520 ლარს, ანუ ორმაგ საარსებო მინიმუმს. [

ქუჩაში ხომ ვრჩები, მაგრამ ამავდროულად ვინმე თუ შემიფარებს და თვიური ღირებულება აი ამ ცხოვრების აღემატება 520 ლარს, მეც დამიჭერენ და ვინც მეხმარება იმასაც დაიჭერენ, მსჯავრდებულის შემთხვევაში ეს არის თავისუფლების აღკვეთა 3 წლამდე, მაგრამ ვინც ეხმარება მისთვის უფრო მეტი სასჯელი არის გათვალისწინებული კანონით.

• ესე იგი სასჯელის მოხდის შემდეგ განდეგილივით უნდა იცხოვროს სადღაც მთის წვერზე ამ ადამიანმა?

კი, თან აღსრულებაზე ხანდაზმულობის ვადა ამას არ აქვს, ანუ ასეთ შემთხვევებზე, სანამ ამ ვალს არ დაფარავს, მანამდე ფაქტობრივად გარიყულია საზოგადოებიდან.

ამ შემთხვევაში ჩვენ ვხედავთ იმას, რომ ეს არის ცალსახად სადამსჯელო ღონისძიება ადამიანის სიცოცხლის, მისი ღირსების შეურაცხმყოფელი რეგულაციები, რომლითაც ადამიანის სიცოცხლეს ემუქრები, ადამიანის ღირსებას ურტყამ პირდაპირ. ცხოვრების შესაძლებლობას აძლევ, თან ამავდროულად ერევი ოჯახური ცხოვრების ისეთ დაცულ სფეროში, სადაც სახელმწიფოს ჩარევის უფლება არ გააჩნია.

ოჯახის წევრი თუ დაეხმარება – დაიჭერენ, ფაქტობრივად კრძალავ იმას, რომ მაგალითად ცოლმა-ქმარი, ან დედა-შვილი, ოჯახის წევრები ერთმანეთს დაეხმარონ.

ფაქტობრივად, „ქართული ოცნება“ ამ ცვლილებით გვაიძულებს ადამიანობაზე უარი ვთქვათ. სამართალს, რომ თავი დავანებოთ, ადამიანობაზე უარის თქმას გვაიძულებს ამით „ოცნება“.

„მეგობარს არ უნდა დაეხმარო“ – ასეთი კანონი მე პირადად შევეცადე მომეძებნა, მაგრამ ვერ ვიპოვე იმ ქვეყნების მაგალითზე, რომელთა კანონმდებლობაც ჩემთვის მეტ-ნაკლებად იძებნება. არ ვიცი, სადმე, აფრიკის რომელიმე ტომში თუ აქვთ ასეთი წესი ან რომელიმე განუვითარებელ ქვეყანაში, სადაც ცივილიზაციას არ შეუღწევია. განვითარებულ, ცივილიზებულ სახელმწიფოებში ასეთი წესი მე არსად მეგულება.

„ქართულ ოცნებას“ არადემოკრატიული კანონის მიღება როცა უნდა ხოლმე, ცდილობს ეს ყველაფერი დაასაბუთოს იმით, რომ თურმე რომელიღაც ქვეყანაში, სადღაც არის ასეთი კანონი. მე მგონი ასეთი რეგულაცია რუსეთში და ბელარუსშიც არ მოიძებნება, ეს არის რაღაც შუა საუკუნეების კანონმდებლობა.

• გორდულაძის მოფიქრებულია? [არჩილ გორდულაძე – „ოცნების“ პარლამენტარი, რომელიც კანონპროექტის ერთ-ერთი ავტორია]

მეეჭვება.

უფრო სხვისი მოფიქრებულია, გორდულაძემ ეს ალბათ ტექნიკურად დაწერა, მაგრამ მოფიქრებით სად მოიფიქრეს, არ ვიცი.

მეც მაინტერესებს ვინ მოიფიქრა ასეთი არაადამიანური კანონმდებლობა, მართლა მაინტერესებს, როგორც ადამიანს, ამ ქვეყნის მოქალაქეს.

ასეთი რეგულაციები ალბათ ბოლოს საბჭოთა პერიოდის დროს თუ იყო, რომ ადამიანების დახმარება ან თანამშრომლობა იყო დასჯადი.

ეს არის ყველაზე არაცივილიზებული, არაადამიანური კანონი, ეს თამამად შემიძლია ვთქვა.

ასეთი არაადამიანური კანონი „ოცნებას“ ჯერ არ მიუღია. ჯერ არ მიუღიათ, მაგრამ მიიღებენ.

• დავუბრუნდეთ ოჯახის წევრისგან ქონების ამოღების ამბავს, რამე დათქმები ახლავს ამას?

ოჯახის წევრიდან ქონების ამოღებაზე არის ორი დათქმა. პირველი არის ის, რომ ეს არის შესაძლებელი მხოლოდ ფულის გათეთრებასთან დაკავშირებულ დანაშაულზე, ანუ, სისხლის სამართლის 194-ე მუხლით ჩადენილ დანაშაულზე და მეორე – ეს უნდა იყოს დანაშაულის საგანი, ანუ, ფულის გათეთრების შედეგად უნდა იყოს ეს ქონება მოპოვებული.

ასეთ შემთხვევაში არის შესაძლებელი მოხდეს ამ ქონების პირდაპირ ჩამორთმევა და ამოღება, მაგრამ აქ ერთი რაღაც არ უნდა დაგვავიწყდეს ჩვენ, რომ ეს მოქმედი რეგულაციითაც არის შესაძლებელი.

• ასევე, დაუსაბუთებელი ქონების შემთხვევაში?

დაუსაბუთებელი ქონების ამოღება ნებისმიერ დანაშაულთან მიმართებით არის შესაძლებელი სამოქალაქო სამართალწარმოების წესით. ეს ერთი და მეორე, მე თუ ვარ, მაგალითად, მსჯავრდებული რაიმე ფინანსურ დანაშაულში, ანუ არ აქვს ამას მნიშვნელობა.

მაგალითად, მე შევიძინე რაღაც ქონება და გადავუფორმე ოჯახის წევრს, ასევე არის შესაძლებელი, რომ ამ მოჩვენებითი გარიგების გამო, დამატებით სამართალწარმოება წარიმართოს ჩემი და ოჯახის წევრის ან მეგობრის, ან ჩემთან დაკავშირებული პირის მიმართ, რომ ქონების გადაფორმება მოხდა ფიქტიურად, ანუ მოჩვენებით, ფორმალურად გადავაფორმე მესამე პირზე. ასეთ შემთხვევაში არის ასევ შესაძლებელი, რომ დავა წარიმართოს მოქმედი კანონმდებლობის პირობებით და ასეთი საქმეები სასამართლოებში რეალურად არის.

მთელი ამბავი იმაშია, რომ ამ ყველაფერს, გარდა ბიძინა ივანიშვილისა, ვერავის ვერაფრით ვერ ვუკავშირებ.

საქმე იმაშია, რომ ეს პროცედურები, რაც კანონმდებლობით აქამდე არსებობდა გაუმარტივეს, მოუწმინდეს, მოუსუფთავეს და ეს მთელი ბიუროკრატიული სირთულეები ბიძინა ივანიშვილს „ოცნების“ პარლამენტში თავიდან აარიდეს – მარტივი წესით არის შესაძლებელი, რომ სისხლის სამართლის წარმოების ფარგლებში, ეს ყველაფერი ერთიანად, ერთბაშად გადაწყდეს და დასრულდეს.

• ფულის გათეთრების თემას მინდა დავუბრუნდეთ. როცა ოჯახის წევრზე შეხების შესაძლებლობას გაძლევს კანონი, მას მხოლოდ ქონებას ართმევენ თუ დანაშაულის თანამონაწილედ თვლიან? ხომ შეიძლება ის არც იყოს ზოგ შემთხვევაში თანამონაწილე, თუმცა მაინც გამოიყენონ ეს კანონი და მას სხვა ქონებებიც ჩამოართვან?

მოდი ვთქვათ ფულის გათეთრება საერთოდ რა არის და რა შემთხვევებს უნდა შეეხოს ცვლილებები. შემდეგ როგორ აღსრულდება – ეს მეორე საკითხია.

ფულის გათეთრება უფრო ყოფითი ტერმინია, სამართლებრივად ეს არის უკანონო შემოსავლის ლეგალიზაცია. უკანონოდ უნდა მივიღო რაღაც შემოსავალი და ამ უკანონო შემოსავლის ლეგალიზებისთვის, უნდა განვახორციელო მთელი რიგი სამართლებრივი მოქმედებები, რომ რამენაირად გავათეთრო.

აი, მაგალითად, კორუფციული გარიგებით მაქვს თანხა მიღებული, ქრთამი და იმისთვის, რომ ეს თანხა რაღაცნაირად სამართლებრივ ჩარჩოებში მოვაქციო, მჭირდება, რომ ეს ფული სწორად დავხარჯო, რომ ქონება გათეთრდეს. თუ უკანონოდ მივიღე შემოსავალი და ამით შევიძინე ბინა ჩემი ოჯახის წევრის სახელზე, ეს ფულის გათეთრების შედეგად შეძენილი ქონება დანაშაულის საგანია და შეიძლება ჩამორთმევას დაექვემდებაროს ახალი რეგულაციების მიხედვით.

თუმცა, სად არის ზღვარი, არის ძალიან კარგი კითხვა.

როცა ვამბობ, რომ მხოლოდ დანაშაულის საგანი ექვემდებარება ჩამორთმევას, დანაშაულის საგანი რა შეიძლება იყოს და რა არ შეიძლება იყოს, ეს არის ძალიან სერიოზული საკითხი.

პრაქტიკულად ეს როგორ გადაწყდება და აღსრულდება, ამაზე ერთი დიდი წითელი კითხვითი ნიშანი უნდა დავსვათ აუცილებლად, იმიტომ, რომ პოლიტიკურად მოტივირებულ საქმეებში სასამართლო არ არის დამოუკიდებელი, არ არის მოუკერძოებელი, გარკვეული პირების ინტერესებით მოქმედებს. ასეთ შემთხვევაში შესაძლებელია, რომ ეს ბოროტად იყოს გამოყენებული და ისეთი ქონებაც ჩაითვალოს დანაშაულის საგნად, რომელიც დანაშაულის შედეგად არ არის შეძენილი.

• როგორ უნდა შეისწავლონ მოქალაქეებმა ეს ყველაფერი? მაგალითად პენსიონერ დედას რომ გაუფორმებს მინისტრი ქონებას, გვიხსნიან, რომ მინისტრის დედა ან მამა გამდიდრდა. ამავე დროს, რომელიმე რეგიონში ოჯახის წევრის დანაშაულის გამო შეიძლება ლეგალური ქონების დაკარგვის რისკის ქვეშაც დადგე. არა?! 

როცა დავიწყე საუბარი, ვთქვი, რომ ეს არის ყველაზე არაადამიანური კანონი, რომელსაც „ქართული ოცნება“ იღებს.

ისევ ვამბობ, რომ ეს არის არასამართლებრივი, არაადამიანური, არაქართველური, არაქრისტიანული, არანორმალური კანონი, ამიტომ აქ „წესით“ რა მოხდება და როგორ მოხდება, ამაზე ვერ ვილაპარაკებთ.

მითუმეტეს, პოლიტიკური ინტერესი სადაც შეიძლება იყოს, თუ პირმა იცის და აქვს განზარახვა, რომ ეხმარება დანაშაულში მხილებულ ფულის გამთეთრებელს, შესაძლოა, მისი ქმედებაც დანაშაულად დაკვალიფიცირდეს. თუ არ იცის – მაშინ ჩამოერთმევა ქონება და დანაშაულად ვერ დაკვალიფიცირედება, მაგრამ თუ მოუნდებათ, შეიძლება „აღმოჩნდეს“, რომ კარგად სცოდნია ყველაფერი და რამე მტკიცებულებას მოუძებნიან.

როცა ვლაპარაკობთ პოლიტიკურ ინტერესზე, ყველაფერი შესაძლებელია. ამ არაადამიანური კანონის აღსრულება კიდევ უფრო არაადამიანურადაც არის შესაძლებელი. ერთია რა დაწერე და მეორეა ის, რომ გასაქანი ძალიან დიდი აქვთ, შეიძლება გაზრახვის ელემენტები დაინახონ, ამას ვერ გამოვრიცხავთ.

ეს ხალხი არასამართლებრივი ჩარჩოების ისეთ მასშტაბებშია გადასული, როგორ ვთქვა ამას არ გააკეთებენ მეთქი. როცა სამართლებრივ სივრცეში შემოდის კრიმინალური წესები, ეს პრაქტიკაში რანაირად იმუშავებს, ამის თქმა ძალიან გამიჭირდება.