2025 წლის პირველი იანვრიდან 30 ივნისამდე, 6 თვეში, „ოცნების“ ანგარიშზე ბიზნესმენებმა 7 მილიონამდე ლარი ჩარიცხეს. მათგან ბევრი აჭარიდან არის, ან ბათუმში აქვს ბიზნესი. ვინ არიან და რას საქმიანობენ მმართველი პარტიის მხარდამჭერები და რამდენად უპირობოა ეს მხარდაჭერა, ამაზე რამდენიმე კვირის წინაც დავწერეთ. ამჯერად გიყვებით იმ შემწირველებზე, რომლებიც წინა სტატიაში ვერ მოხვდნენ.
„ოცნების“ ყულაბა ისევ აჭარიდან ივსება – ვინ არიან შემწირველები?
2025 წლის აპრილში ვლადიმერ და ბექა გასიტაშვილებმა „ქართულ ოცნებას“ 110 000 ლარი შესწირეს. ისინი რამდენიმე სამშენებლო კომპანიის მფლობელები ან თანამფლობელები არიან, მათ შორის ერთ-ერთი, შპს „ტემპო ჰოლდინგი“, ბათუმში ადლიის დასახლებაში მრავალფუნქციური ობიექტის მშენებლობას გეგმავს. ბათუმის მერიამ საკრებულოსთან შეთანხმებით ამ პროექტის განაშენიანების გეგმა 2023 წელს დაამტკიცა.
პროექტის რენდერი
შპს „ტემპო ჰოლდინგის“ წილებს ხუთი თანამესაკუთრე ინაწილებს, მათ შორის არის გიორგი დავითაძე, ისიც „ოცნების“ შემწირველია, 2025 წლის 25 აპრილს მან ოცნებას 50 000 ლარი შესწირა, კომპანიაში ის 26.26 პროცენტს ფლობს.
„ტემფო ჰოლდინგში“ ბექა გასიტაშვილი 9,9 პროცენტი, ვლადიმერ გასიტაშვილს კი 19,19 პროცენტი ეკუთვნის. მან „ოცნებას“ გასული წლის სექტემბერშიც შესწირა 50 000 ლარი.
შპს „ტემპო ჰოლდინგის“ 26 პროცენტის მფლობელია თორნიკე ფაღავა, ისიც „ოცნების“ შემწირველია. 2025 წლის 25 აპრილს მან მმართველი პარტიის ანგარიშზე 50 000 ლარი შეიტანა. თორნიკე ფაღავა „ქართული ოცნების“ საპარლამენტო სიაში 103-ე ნომრად ჩაწერეს, თუმცა ის პარლამენტში ვერ შევიდა, კომპანიის 20 პროცენტს კი ბონდო კონცელიძე ფლობს.
საჯარო რეესტრის მონაცმებით, ბექა გასიტაშვილი ფლობს ასევე შპს „ცენტრალს“, შპს „იჰოტელსფეისი“, შპს „ტემპო აა“ – ს 11 პროცენტს.
2025 წლის 26 ივნისს „ოცნებას“ 50 000 ლარი შესწირა ვადიმ კოროლევმა, ის 2015 წლამდე ხელმძღვანელობდა საკრუინგო კომპანია „ქვინსვეი სერვისიზს“. ბოლო ამონაწერის მიხედვით, კომპანია საბერძნეთში დაფუძნებულ „კონსტანტინოს ტერზის“- ს ეკუთვნის.
27 ივნისს ჯემალ ჩურუკბამ „ოცნებას“ 30 000 ლარი შესწირა, ის შპს „პრემიუმ პლაზას“ 100 პროცენტის მფლობელია. რეესტრის მონაცემებით, ჯემალ ჩურუკბა ფლობს ასევე შპს „არედოს“ , შპს „თი ეს ჯორჯია“-ს და შპს „ეიმ & პრემიუმ ჯგუფის“ წილებს, ის არის კიდევ რამდენიმე კომპანიის მფლობელი ან თანამფლობელი.
ლაშა წულუკიძე შპს „ჩაქვი ინვესტ გრუპ“-ის 30 პროცენტის მფლობელია. 2025 წლის 23 ივნისს მან „ოცნებას“ 25 000 ლარი შესწირა. მმართველ პარტიას ფინანსურად ის პირველად დაეხმარა. ის შპს „გაზის სახლის“ და შპს „პროექტსერვისის“ დამფუძნებელი და 100 პროცენტის მფლობელია. ის ფლობს „ლბ ჯგუფის“ 50 პროცენტს, არის შპს „ნიუნეტის“ თანამესაკუთრე. ფლობს შპს „აჯარათრეველის“ 25 პროცენტს.
სერგო სურმანიძემ „ოცნებას“ 25 000 ლარი შესწირა, ის შპს „გ და მ ლოჯისტიკის“ თანამესაკუთრეა.
20 ივნისს როლანდ დევაძემ „ოცნებას“ 50 000 ლარი შესწირა. რეესტრის მონაცემებით, ის 2016 წელს დაფუძნებული კომპანიის შპს „მეგა მორ სერვის“-ის დირექტორად ფიქსირდება. ეს მისი პირველი ფინანსური შეწირულობაა.
„ოცნებას“ 45 000 ლარი შესწირა თეიმურაზ სურმანიძემ. ის ფლობს შპს „Poti Ferry Agancy“-ის 50 პროცენტს. ის არის „საზღვაო სააგენტოებისა და ბროკერების ასოციაციის“ მმართველობის ორგანოს წევრი, შპს „სითი ბილდერის“ თანამესაკუთრე, შპს „მოკონზი“, „შიფინგ ენდ ფორვარდინგ ეიჯენსი“-ის 50 პროცენტის მფლობელი. ის ფლობს ასევე შპს „ეკოსტიმ“-ის 100 პროცენტს. მან „ოცნებას“ პირველად შესწირა.
„ოცნებას“ 50 000 ლარი შესწირა ვლადიმერ შელიამ – ის შპს „საზღვაო საკრუინგოს“ დირექტორი და 26 პროცენტის მფლობელია. ის არის ასევე შპს „საოკეანო საკრუინგო კომპანიის“ ხელმძღვანელი, რომელსაც მარშალის კუნძულებზე დაფუძნებული კომპანია ფლობს.
ვლადიმერ შელია არის ასევე შპს „ქოლუმბია შიფმენეჯმენტთის“ დირექტორი, ამ კომპანიას კვიპროსზე დაფუძნებული კომპანია ფლობს. 50 000 ლარი ვლადიმერ შელიამ „ოცნებას“ 2021 წელსაც შესწირა.
18 ივნისს გრიგოლ ჩახვაძემ „ოცნებას“ 20 000 ლარი შესწირა, ის შპს „მედ ემერჯენსის“ 7 პროცენტის მფლობელია.
გოჩა ჯორბენაძემ „ოცნებას“ 40 000 ლარი შესწირა, ის შპს „ასტრო ლაუნჯის“ 100 პროცენტის მფლობელია. შპს „ჯეო ლოჯისტიკ“ – ის დირექტორმა როინ მიქელაძემ „ოცნებას“ 30 000 ლარი შესწირა. ის ფლობს ასვე შპს docker’s power – ის 100 პროცენტს. მისმა პარტნიორმა გიორგი მოწყობიმა კი მმართველ პარტიას 50 000 ლარი ჩაურიცხა.
გიორგი მოწყობილი არის ასევე შპს „ბეგინ ენერჯის“ დირექტორი, ამ კომპანიის 100 პროცენტს გიბრალტარში დაფუძნებული კომპანია ფლობს. ის არის ასვე შპს „ჯეო ტრეიდინგის“ თანამესაკუთრე და დირექტორი.
____
