პუტინის იდეოლოგი ალექსანდრე დუგინი კვლავ „ქართული ოცნებას“ აქებს. დუგინი წერს, რომ ქართველები „გახარებული არიან“ ტრამპის მიერ ზელენსკიზე თავდასხმის ყურებისას და “უხარიათ”, რომ მხარი „ქართულ ოცნებას“ დაუჭირეს.
„ქართველები, ალბათ, ახლა უყურებენ როგორ ანადგურებს ტრამპი ზელენსკის და უხარიათ: რა ყოჩაღები ვართ, რომ მხარს ვუჭერთ „ქართულ ოცნებას“; […] გადაარჩინეს ქვეყანა. უკრაინა ყველას აძლევს ამაზრზენ მაგალითს იმისა, თუ როგორი არ უნდა იყო არასდროს და რა არ უნდა გააკეთო არავითარ შემთხვევაში“ – წერს დუგინი ტელეგრამზე.
დუგინის კომენტარის პარალელურად რუსული პროპაგანდისტული მედიები ავრცელებენ „ოცნების“ საგარეო საქმეთა მინისტრის მაკა ბოჭორიშვილის განცხადებას, რომელიც მან გუშინ, 19 თებერვალს, საზოგადოებრივი მაუწყებლის ეთერში საუბრისას გააკეთა.
„ჩვენ იმასაც გვეუბნებოდნენ, რომ რაღაც მატარებელი მიქრის და თუ ამ მატარებელს გამოვტოვებთ, მერე ჩვენი დრო არასდროს მოვა და აუცილებლად უნდა ვიჯდეთ ამ მატარებელში, თუმცა დღეს მე მგონი კარგად ვხედავთ, რამდენად მომგებიანი შეიძლება ყოფილიყო საქართველოსთვის იმ მატარებელში ჯდომა, რა მატარებელშიც, ვთქვათ, უკრაინის ამჟამინდელი ხელისუფლება ზის“ – თქვა ბოჭორიშვილმა.
„საქართველოს საგარეო საქმეთა სამინისტროს ხელმძღვანელი: რესპუბლიკას უხარია, რომ უკრაინასთან „ერთ მატარებელში“ არ არიან“ – წერს რუსული პროპაგანდისტული მედია smotrim-ი.
დაახლოებით მსგავსი სათაურით ავრცელებენ ბოჭორიშვილის ციტატას ისეთი რუსული პროპაგანდისტული გამოცემები, როგორიცაა: სააგენტო „ტასი“, lenta.ru და ა.შ.
