დაცვის პოლიციელმა ბათუმში ცოლს თავში მუშტი ჩაარტყა, თმა მოქაჩა და მარჯვენა ყური დაუზიანა, მაგრამ იგი ციხეში არ გაუშვიათ. მას სასამართლომ მხოლოდ ერთი წლით პირობითი მსჯავრი შეუფარდა.
მზია ამაღლობელი გამოცემა „ბათუმელების“ და „ნეტგაზეთის“ თანადამფუძნებელი და დირექტორია. სილის გაწვნის გამო მას პროკურატურა პოლიციელზე თავდასხმას ედავება. ბრალის დადასტურების შემთხვევაში, მზია ამაღლობელს 4-დან 7 წლამდე თავისუფლების აღკვეთა ელის.
საქმე, რომელზეც გიყვებით, ბათუმში 2023 წელს მოხდა. ამ საქმეზე უზენაესმა სასამართლომ გადაწყვეტილება 2025 წელს მიიღო.
განჩინების მიხედვით, საზოგადოებრივი ჯანდაცვის ცენტრის დაცვის უმცროსმა ინსპექტორმა, ნუგზარ სამნიძემ არარეგისტრირებულ ქორწინებაში მყოფ ქალზე ფიზიკურად იძალადა:
„კერძოდ, თავისა და მარჯვენა მკლავის არეში ჩაარტყა მუშტი, მოქაჩა თმა, მარჯვენა ყურზე ძლიერად ჩამოქაჩა საყურე და დაუზიანა ყური, ასევე – ფრჩხილებით დაუკაწრა სახე. ნუგზარ სამნიძის ფიზიკური ძალადობის შედეგად, ნ.ჩ.-მ განიცადა ფიზიკური ტკივილი…“ – აღნიშნული იყო ბრალდების შესახებ დადგენილებაში.
პოლიციელმა ქალზე ბათუმში, ბაგრატიონის ქუჩაზე გაჩერებულ ავტომანქანაში იძალადა, თანაც „გენდერული ნიშნით შეუწყნარებლობის მოტივით…“.
ბათუმის საქალაქო სასამართლოს განაჩენი პროკურორ აკაკი მოქერიას გაუსაჩივრებია ამ მოტივით:
„….საქმეში წარმოდგენილი მტკიცებულებები ნათლად გამოკვეთს ქალის მიმართ ნუგზარ სამნიძის მესკუთრულ დამოკიდებულებას. დაზარალებულმა დაადასტურა, რომ ნუგზარ სამნიძე ეჭვიანობის გამო უკრძალავდა მუშაობას, ეუბნებოდა, რომ სამსახური არ სჭირდებოდა, ქალი უნდა ყოფილიყო სახლში. მსჯავრდებულს, როგორც შინაგან საქმეთა სამინისტროს თანამშრომელს, უპირველესად, თავად ევალებოდა კანონის პატივისცემა, თუმცა მიუხედავად ამისა, მან ფიზიკურად იძალადა მეუღლეზე და სხეულის სხვადასხვა არეებში მიაყენა დაზიანებები.“
პოლიციელს სასჯელის ვადაში ჩაეთვალა პატიმრობაში ყოფნის დროც: ცოლის ცემაში ბრალდებული პოლიციელი მხოლოდ 2 დღე დარჩენილა იზოლატორში, ვიდრე იგი აღკვეთი ღონისძიების ეტაპიდან არ გაათავისუფლეს.
ამ საქმეზე ზემდგომ ინსტანციებში არაფერი შეცვლილა.
