Batumelebi

ქობულეთის მერიაში რეორგანიზაცია დაიწყო. მერიის ინფორმაციით, რეორგანიზაციის შემდეგ გამოჩნდება არის თუ არა მერიაში შტატები შესამცირებელი. ქობულეთის მერის, მირიან ქათამაძის თქმით, პირველ ეტაპზე მომზადდება შესაბამისი სამართლებრივი აქტების პროექტები და შემუშავდება ორგანიზაციული სტრუქტურის პროექტი, ხოლო ამის შემდეგ არის გაწერილი „რეორგანიზაციის გამო შტატების შემცირებისას გასათავისუფლებელ მოხელეთა მობილობა“.

„ბათუმელების“ კითხვაზე, რამდენი შტატის შემცირება იგეგმება რეორგანიზაციის შემდეგ? – ქობულეთის მერი, მირიან ქათამაძე, ამბობს, რომ  რეორგანიზაცია მაინც და მაინც შტატების გაუქმებას არ გულისხმობს. თუმცა დასძენს, რომ რეორგანიზაციის პროცესში გაირკვევა, გაუქმდება თუ არა რომელიმე სამსახური.

„არც იმას გამოვრიცხავ, რომ ზოგიერთი სამსახური სხვა სახით ჩამოყალიბდეს ან რამდენიმე სამსახური გაერთიანდეს. შესაძლებელია, შესწავლის შემდეგ აღმოჩნდეს ისეთი სამსახური, რომლის არსებობა მუნიციპალიტეტის მერიაში გამართლებული არ არის,“ – ამბობს ის.

რეორგანიზაციის ეტაპების განხორციელებაზე პასუხისმგებელი სამუშაო ჯგუფის შემადგენლობა 14 თებერვლამდე გახდება ცნობილი.

უმაღლესი საბჭოს ყოფილი თავმჯდომარე, ავთანდილ ბერიძე, ერთ-ერთია იმ თანამდებობის პირებს შორის, რომელთა ქონებრივი დეკლარაციის სიზუსტეს საჯარო სამსახურის ბიურო დაადგენს. საჯარო სამსახურის ბიურომ იმ თანამდებობის პირთა სია გამოაქვეყნა, რომლებიც ქონებრივ დეკლარაციას ყოველწლიურად ავსებენ და რომელთა დეკლარაციაც გადამოწმდება. სიაში სულ 290 პირია. დარღვევის აღმოჩენის შემთხვევაში, თანამდებობის პირებს დააჯარიმებენ.

აჭარის რეგიონიდან სულ 16 ადამიანის ქონებრივ დეკლარაციას გადაამოწმებენ:

ირაკლი პატარიძე, 2017 წლიდან ბათუმის საკრებულოს განათლების კომისიის თავმჯდომარე. იგი ამავდროულად ბიზნესსაქმიანობას ეწევა;
ლევან მაისურაძე – აჭარის საპატრულო პოლიციის ყოფილი უფროსი;
დავით მაკარაძე – აჭარის ფინანსთა და ეკონომიკის მინისტრის პირველი მოადგილე;
ლევან გელოვანი – მოსამართლე;
ნათია კაპანაძე – აჭარის საზოგადოებრივი ტელევიზიისა და რადიოს დირექტორი;
ასლან ქათამაძე – ქობულეთის არქიტექტურის სამსახურის უფროსი;
ალეკო თევზაძე – ტურისტული ობიექტების მართვის სააგენტოს უფროსი;
სულიკო სურმანიძე – ქედის მერიის ზედამხედველობის სამსახურის უფროსი;
მირზა ბახტაძე – ხელვაჩაურის მერიის ადმინისტრაციული სამსახურის უფროსი;
დურსუნ ჩხეიძე – ხელვაჩაურის საკრებულოს წევრი;
თემურ დუმბაძე – ხელვაჩაურის საკრებულოს წევრი [ენმ];
თამაზ მურადიშვილი – ხელვაჩაურის მერიის ინფრასტრუქტურის სამსახურის უფროსი;
ზაზა ზოიძე – შუახევის მერიის ჯანმრთელობისა და სოციალური დაცვის სამსახურის უფროსი;
სოსლან ზოიძე – შუახევის საკრებულოს წევრი[ენმ];
ირაკლი ჯორბენაძე – ხულოს საკრებულოს წევრი[ენმ].

რის მიხედვით შეარჩია ბიურომ ადამიანები, ვის ქონებრივ დეკლარაციებსაც გადაამოწმებს? – ბიუროში გვითხრეს, რომ თანამდებობის პირები სისტემამ შეარჩია შემთხვევითი შერჩევის პრინციპით.

ელგუჯა მაკალათია, საჯარო სამსახურის ბიუროს წარმომადგენელი განმარტავს, რომ თანამდებობის პირების დასახელება არასამთავრობო ორგანიზაციებსაც შეეძლოთ, მაგრამ მესამე სექტორმა ეს შანსი წელს არ გამოიყენა.

„წელს მთლიანად სისტემამ შეარჩია და ამას აკვირდებოდა რამდენიმე არასამთავრობო ორგანიზაციის წარმომადგენელი. მესამე სექტორს აკადემიურ წრეებთან ერთად შეუძლია კომისიის შექმნა და თანამდებობის პირების დასახელება, ვის მიმართაც მაღალი საზოგადოებრივი ინტერესი არსებობს, ან რისკი. ასეთი კომისია წელს არ შექმნილა,“ – გვითხრა ელგუჯა მაკალათიამ.

თანამდებობის პირის დასახელება, ვისი დეკლარაციაც უნდა გადამოწმდეს, მოქალაქესაც შეუძლია. დასაბუთების შემთხვევაში, მოქალაქის მიმართვას ასევე საჯარო სამსახურის ბიუროში შექმნილი სპეციალური კომისია განიხილავს.

საქმე, რომელშიც იუსტიციის უმაღლესი საბჭოს მდივანს – გიორგი მიქაუტაძეს დაზარალებულის სტატუსი აქვს, დღეს, 12 თებერვალს განიხილავდა ხელვაჩაურის რაიონული სასამართლოს მოსამართლე ხვიჩა კიკილაშვილი.

საუბარია 2016 წლის აგვისტოში გონიოს პლაჟზე მომხდარ ინციდენტზე, რომლის შემდეგაც გამოძიება არასრულწლოვნის ცემის ფაქტზე დაიწყო. არასრულწლოვნის მშობლების თქმით, ბავშვს მოსამართლე გიორგი მიქაუტაძემ სცემა [იმ დროს გიორგი მიქაუტაძე თბილისის საქალაქო სასამართლოს თავმჯდომარე იყო].

ბავშვის ცემის ფაქტზე დაწყებულ გამოძიებას იმავე დღეს პროკურატურამ კვალიფიკაცია შეუცვალა და ძიება მოსამართლის სიცოცხლის მოსპობის მუქარით გააგრძელა. იმ დღეს კიდევ ერთი ამბავი მოხდა – არასრულწლოვნის მშობლები, თამარ ხაჭაპურიძე და კახაბერ ხაჩიძე, შვილების თანდასწრებით შუაღამისას დააპატიმრეს.

მოგვიანებით პროკურატურამ ხელახლა დაიწყო გამოძიება მოზარდის ცემის ფაქტზე, მაგრამ პროკურატურამ ძიება ვერ დაასრულა. არასრულწლოვანს, რომელსაც ექსპერტიზის დასკვნით სხეულის დაზიანება ჰქონდა, დაზარალებულის სტატუსი არ აქვს. დაზარალებულის სტატუსი გიორგი მიქაუტაძეს მიანიჭეს, რომელმაც გამოძიებას უთხრა, რომ ბავშვის მშობლები მას გონიოს პლაჟზე ფიზიკური განადგურებით დაემუქრნენ.

„რა ეტაპზეა 2016 წელს ბავშვის ცემის ფაქტზე დაწყებული გამოძიება?“ – ეს შეკითხვა „ბათუმელებმა“ პროკურორ დავით ხარძეიშვილს დაუსვა.

„მიმდინარეობს გამოძიება. ჩვენ რამდენიმე უწყება და თხოვნა გავუგზავნეთ, რომ ჩამოსულიყო და მიეცა ჩვენება, მაგრამ, როგორც ჩანს, თავს არიდებს,“ – გვითხრა პროკურორმა.

დავით ხარძეიშვილს ასევე ვკითხეთ, დაიკითხა თუ არა ამ საქმეზე გიორგი მიქაუტაძე. ამ შეკითხვას პროკურორმა ორი სიტყვით უპასუხა: „კი, დაკითხულია“.

დღევანდელ სასამართლო სხდომას არც გიორგი მიქაუტაძე დასწრებია და არც მოსამართლის მუქარაში ბრალდებული ცოლ-ქმარი.

არასრულწლოვნის მშობლებს – თამარ ხაჭაპურიძესა და კახაბერ ხაჩიძეს თავდაპირველად, წინასწარი პატიმრობა, ასევე მოსამართლე ხვიჩა კიკილაშვილმა შეუფარდა. მაშინ „ახალგაზრდა იურისტთა ასოციაციამ“ თქვა, რომ ამ კონკრეტულმა მოსამართლემ – ხვიჩა კიკილაშვილმა კოლეგიალობა კანონზე მაღლა დააყენა.

გასაჩივრების შემდეგ წინასწარი პატიმრობა გირაოთი შეიცვალა და ცოლ-ქმარი გაათავისუფლეს. ამჟამად ოჯახი დიდ ბრიტანეთში იმყოფება. ადვოკატებმა დღევანდელ პროცესზე სამედიცინო დაწესებულებაში ჩაწერის ცნობები წარმოადგინეს იმის დასადასტურებლად, რომ სხდომებს ოჯახი საპატიო მიზეზით ვერ ესწრება. ერთ-ერთი ცნობით, კახაბერ ხაჩიძეს 12 თებერვალს ჰქონდა ჩანიშნული ვიზიტი ექიმთან ლონდონში.

„თუ საპატიოა გამოუცხადებლობა, მაშინ როგორ გავაგრძელოთ სხდომა? მათ აქვთ სხდომაზე დასწრების უფლება,“ – აღნიშნა მოსამართლემ.

„ეს თარიღების დამთხვევა ხდება პროცესის გაჭიანურების მიზნით. თუ თავს არიდებენ გამოცხადებას, შესაძლოა, ვიმსჯელოთ აღკვეთი ღონისძიების შეცვლაზე,“ – თქვა პროკურორმა დავით ხარძეიშვილმა.

მოსამართლე ხვიჩა კიკილაშვილმა ხაზი გაუსვა იმას, რომ უკვე მეექვსე შემთხვევაა, როცა ლონდონში მყოფი თამარ ხაჭაპურიძე და კახაბერ ხაჩიძე სამედიცინო დაწესებულებაში ვიზიტის მოტივით არ ცხადდებიან სასამართლოში.

„ამის მიუხედავად კიდევ ერთხელ უნდა მივცეთ შანსი. ამ ეტაპზე სასამართლო თავს შეიკავებს სხვა შეფასებისგან,“ – დასძინა მოსამართლემ.

მორიგი სხდომა 23 თებერვალს გაიმართება. მომავალ სხდომაზე ხვიჩა კიკილაშვილისთვის ცნობილი გახდება, რა გადაწყვეტილებას მიიღებს გიორგი მიქაუტაძე მის დანიშვნაზე. მოსამართლე უკვე მონაწილეობდა მოსამართლეების კონკურსში. გასაუბრების წარმატებით გავლის შემდეგ ხვიჩა კიკილაშვილი, რომელსაც მოსამართლეობის უფლებამოსილების ვადა ერთ წელში ეწურება, უვადოდ დაინიშნება. ამის შესახებ გადაწვეტილება გიორგი მიქაუტაძემაც უნდა მიიღოს.

„ხომ არ აწყობდა სხდომის გადადება თავად მოსამართლეს, რადგან რამდენიმე დღეში მისი უფლებამოსილების საკითხი გაირკვევა?“ – ეს „ახალგაზრდა იურისტთა ასოციაციის“ იურისტს, პაატა დიასამიძეს ვკითხეთ. ის სასამართლოში თამარ ხაჭაპურიძის ინტერესებს იცავს.

„სასამართლომ იმსჯელა და მიიღო გადაწყვეტილება, მას ამის უფლებამოსილება ჰქონდა. თამარ ხაჭაპურიძის მიერ წარმოდგენილი იყო სამედიცინო ცნობები. მისი სურვილი იყო ის, რომ გამოუცხადებლობა ჩათვლოდათ საპატიოდ,“ – გვითხრა პაატა დიასამიძემ.

პროკურორთან გასაუბრების შემდეგ „ბათუმელებმა“ ადვოკატებს ჰკითხა: რატომ არ მისცა ჩვენება არასრულწლოვანმა გამოძიებას ცემის საქმეზე? – ადვოკატი სულხან კაპანაძე ამბობს, რომ არასრუწლოვანი მკურნალობის კურსს ბრიტანეთში გადის, თუმცა ვიდრე ის ქვეყნიდან გაემგზავრებოდა, პროკურატურას გამოკითხვისთვის რამდენიმე თვე ჰქონდა.

„ამის მიუხედავად, ბრალდების მხარეს აქვს შესაბამისი მტკიცებულებები, არსებობს ექსპერტიზის დასკვნა, არსებობს გადაღებული ვიდეო, სადაც ჩანს, როგორ  სცემს მოსამართლე გიორგი მიქაუტაძე არასრულწლოვანს. ეს ხელს არ უშლის საქმის დასრულებას,“ – განმარტავს კახაბერ ხაჩიძის ინტერესების დამცველი, სულხან კაპანაძე.

სახალხო დამცველი აჭარაში რეგიონული წარმომადგენლის თანამდებობაზე კონკურსს აცხადებს. გამარჯვებული სამი თვის გამოსაცდელი ვადით იმუშავებს, თანამდებობრივი სარგო კი, შეთანხმებით განისაზღვრება.

კონკურსის მოთხოვნების მიხედვით, კონკურსანტი უნდა იყოს უმაღლესი განათლებით, სამუშაო გამოცდილება ერთი წელი, პროფესიით იურისტი.

სახალხო დამცველის რეგიონულ წარმომადგენელს ევალება:

• აჭარის ავტონომიურ რესპუბლიკაში სახალხო დამცველის აპარატის წარმომადგენლობა; სახალხო დამცველის აპარატში შემოსული განცხადებების/საჩივრების საფუძველზე ან სახალხო დამცველის ინიციატივით დაწყებული, ადამიანის უფლებათა დარღვევასთან დაკავშირებული საქმის შესწავლა და შესაბამისი დასკვნების/რეკომენდაციების/წინადადებების პროექტის მომზადება;
• აჭარის ავტონომიურ რესპუბლიკაში გენდერული თანასწორობის კუთხით მდგომარეობის შესწავლა, ძირითადი ტენდენციების გამოკვეთა და სპეციფიკური მახასიათებლების შესაბამის ანგარიშებში ასახვა;
• საქმესთან დაკავშირებით დამატებითი ინფორმაციის მოძიების/ინფორმაციის დაზუსტების მიზნით შესაბამის პირებთან შეხვედრა და მათგან შესაბამისი ახსნა–განმარტების მიღება;
• რეგიონული დეპარტამენტისა და გენდერული თანასწორობის დეპარტამენტის უფროსებისათვის წინადადებების წარდგენა მის კომპეტენციაში შემავალი საკითხების მოწესრიგებისა და გადაწყვეტის მიზნით;
• სახალხო დამცველის რეკომენდაციების შესრულებაზე მონიტორინგი;
• შესასწავლ საქმესთან დაკავშირებული გამოთხოვილი ინფორმაციის კანონმდებლობით დადგენილ ვადაში და ფორმით მოწოდებაზე მონიტორინგი;
• მოთხოვნის შემთხვევაში, მის მიერ განსახილველ/განხილულ საქმეებთან დაკავშირებული ინფორმაციის მიწოდება ხელმძღვანელისათვის;
• სახალხო დამცველის/სახალხო დამცველის მოადგილის/დეპარტამენტის უფროსის მითითებებისა და დავალებების შესრულება;
• საჭიროების შემთხვევაში, რეგიონული დეპარტამენტის აჭარის სამმართველოს სხვა თანამშრომელთა ფუნქციების შესრულება;
• რეგიონული დეპარტამენტისა და გენდერული თანასწორობის დეპარტამენტის უფროსების იმ დავალებების შესრულება, რომელიც გამომდინარეობს მისი საქმიანობიდან და ძირითადი მოვალეობებიდან.
• დამატებითი ინფორმაციაიხილეთ  აქ. 

ქობულეთში, სოფელ ბობოყვათში, საპატრულო პოლიციისა და მსუბუქი ავტომანქანა ერთმანეთს შეეჯახა. ავარიის შედეგად ოთხი მოქალაქე დაშავდა, რომლებსაც საშუალო სიმძიმის დაზიანებები აღენიშნებათ. დაშავებულები ქობულეთის საავადმყოფოში არიან გადაყვანილნი.

შს სამინისტროს პრესსამსახურში აცხადებენ, რომ გამოძიება სსკ-ის 276-ე მუხლის პირველი ნაწილით მიმდინარეობს, რაც სატრანსპორტო საშუალების ექსპლუატაციის წესების დარღვევას გულისხმობს, რამაც გამოიწვია ჯანმრთელობის დაზიანება.

დასაქმების ვებგვერდებზე სადისტრიბუციო კომპანიების მიერ გამოცხადებულ ვაკანსიებს თუ გადახედავთ, უმრავლეს შემთხვევაში განაცხადში იპოვით მოთხოვნას იმის შესახებ, რომ კანდიდატს აუცილებლად უნდა ჰქონდეს „იპოთეკური ვალდებულებებისგან თავისუფალი უძრავი ქონება (ბინა ან მიწის ნაკვეთი)“.

ხშირად კომპანიები, რომლებიც პრისელერებს ან დისტრიბუტორებს ეძებენ, ასევე განსაზღვრავენ, რომ სამუშაოს მაძიებელი, რომელსაც დაასაქმებენ, აუცილებლად უნდა იყოს მამრობითი სქესის.

დასაქმების ცნობილ ვებგვერდზე, hr.ge-ზე, ამ დრომდე აქტიურია სადისტრიბუციო “კომპანია ორბიტას” და კომპანია „ორიენტის“ განცხადებები. ორივე კომპანია სამუშაოს მაძიებელს კომპანიაში დასაქმების ერთ-ერთ პირობად უძრავი ქონების გარანტად ჩადებას სთხოვს.

რატომ ითხოვს კომპანია უძრავ ქონებას დასაქმებულებიდან?

„იქიდან გამომდინარე, რომ დიდ ფულთან აქვს შეხება [დისტრიბუტორს], არის რისკები. ბევრი შემთხვევა ყოფილა, როცა დისტრიბუტორს „შეუჭამია“ კომპანიის კუთვნილი თანხა. ამით კომპანია იზღვევს თავის თანხას თავის თანამშრომელთან,“ – ამბობს გიორგი თურმანიძე, კომპანია „ორბიტას“ ადამიანური რესურსების მართვის მენეჯერი.

რატომ არ სარგებლობს კომპანია სადაზღვევო კომპანიების მომსახურებით და რატომ არ აზღვევს რისკებს, რაც შეიძლება სამუშაო პროცესში გაჩნდეს? „ორბიტაში“ ამბობენ, რომ ეს სერვისი  ძვირია. ამასთან, რაც უფრო დიდია რისკები, სადაზღვევოები მით უფრო მაღალ პროცენტს ითხოვენ.

„არიან სადაზღვევო კომპანიები, რომლებიც აზღვევენ ამ თანხებს, მაგრამ ისეთი ძვირია ეს მომსახურება, რომ, ფაქტობრივად, ძალიან ცოტა კომპანია იყენებს ასეთ დაზღვევას. მეორეც, როდესაც პრისელერს არანაირი ვალდებულება არ აქვს, გარდა შრომითი ხელშეკრულებისა და როცა იცის, რომ კომპანიას თანხა აქვს დაზღვეული სადაზღვევო კომპანიაში, ის მაინც გულგრილად ექცევა. პასუხისმგებლობას აღარ იღებენ და ცოტა გულგრილად იქცევიან ვიდრე, მაგალითად, იმ შემთხვევაში, თუ მას უზრუნველყოფა აქვს ჩადებული და ვალდებულებები გააჩნია,“ – ამბობს გიორგი თურმანიძე.

„ორბიტას“ განაცხადში ასევე მითითებულია, რომ სამუშაოს მაძიებელი აუცილებლად უნდა იყოს მამაკაცი. კითხვაზე, თუ რატომ არის ვაკანსია გენდერული თვალსაზრისით შეზღუდული, გიორგი თურმანიძე პასუხობს, რომ ქალები ამ ტიპის სამუშაოს არაჯეროვნად ასრულებენ.

„კომპანიაში ყოფილა პრისელერად მანდილოსანი შერჩეული, მაგრამ არ ვიცი რისგან გამომდინარე, მამაკაცს უფრო შედეგი ჰქონია, ვიდრე ქალბატონს. საიდან მოდის ეს, ვერ გეტყვით. უფრო კაცური სამსახურია, მე ვფიქრობ,“ – ამბობს გიორგი თურმანიძე. მისი თქმით, ბოლო 4 წელიწადში  კომპანიაში სულ 10 ქალი პრისელერი და ორი ქალი სუპერვაიზერი მუშაობდა.

კიდევ ერთი კომპანია, შპს „ორიენტი“, სადაც პრისელერის შრომის ანაზღაურება ფიქსირებული 750-1750 ლარის ფარგლებშია, ხოლო დისტრიბუტორის  550-დან 1200 ლარამდე, აუცილებელ მოთხოვნებში წერს, რომ კანდიდატს უნდა გააჩნდეს ბინა ან მიწის ნაკვეთი, რომლის ღირებულებაც საშუალოდ 40 ათასი ლარი იქნება. „ბათუმელები“ შეეცადა კომპანიის მენეჯმენტთან გასაუბრებას, მაგრამ რამდენიმე მცდელობის მიუხედავად, კომპანიის წარმომადგენლებისთვის კითხვების დასმა ვერ შევძელით.

„რამდენი გაქვს ხელფასი?” – ეს ერთ-ერთი ყველაზე არაეთიკური კითხვაა სხვა მრავალს შორის. თუმცა ჩინოვნიკებისა და საჯარო პირების ხელფასი, ვისაც შენ აფინანსებ, საიდუმლო არ არის და თუ ინტერესი გკლავს, ვის რამდენი აქვს ანაზღაურება, სულაც არ ხარ უტაქტო. რამდენი ადამიანის ანაზღაურების გამოცნობა შეგიძლია?  ტესტის საშუალებით გაიგე, ვის შეიძლება ჰქონდეს  მითითებული ანაზღაურება თვეში და მონიშნე ფოტოებზე სწორი პასუხი. თანხა მითითებულია ეროვნულ ვალუტაში. არასწორი პასუხის შემთხვევაში, ფოტო გაწითლდება და ტესტი მწვანედ გიჩვენებთ სწორ ვარიანტს.

ასევე ნახეთ:

„პოლიციელებს საშუალებას არ აძლევენ, ისარგებლონ კანონით გათვალისწინებული შვებულებით. ასევე ირღვევა მათი სამუშაო დრო და ისინი 24-საათიან რეჟიმში მუშაობენ. არის შემთხვევები, როცა მათ არც „სმენებს“ შორის ეძლევათ დასვენების შესაძლებლობა,“ – განაცხადა დღეს, 12 თებერვალს, „ნაციონალური მოძრაობის“ წარმომადგენელმა, გია ხალვაშმა, ბრიფინგზე.

„ბათუმელების“ კითხვაზე, შეუძლია თუ არა დაასახელოს კონკრეტული ადამიანები, ვინც ვერ სარგებლობს შვებულებით ან არანორმირებული გრაფიკით მუშაობენ, გია ხალვაში ამბობს, რომ მათი ვინაობის დასახელებისგან თავს იკავებს, რადგან ეს შესაძლებელია მათი სამუშაოდან დათხოვნის საფუძველი გახდეს.

„მე თითქმის ყოველდღე მხვდებიან კრიმინალური პოლიციის, საპატრულო პოლიციის თანამშრომლები, რომლებიც ამ პრობლემაზე მიყვებიან. ვფიქრობთ, დაღლილი და უძინარი პოლიციელი ვერ დაიცავს მოქალაქეებს, რადგან მათი უფლებები დაუცველია,“ – ამბობს გია ხალვაში.

მისი თქმით, პოლიციელები ამ თემაზე ხმამაღლა სამსახურის დაკარგვის გამო ვერ საუბრობენ. „გადაღლა შრომისუნარიანობაზე მოქმედებს და, ბუნებრივია, გვექნება პრეტენზიები, რომ პოლიციელმა უფლებამოსილებას გადააჭარბა ან არასწორად მოიქცა და ა.შ. ნორმირებული სამუშაო დრო არის კვირაში 40 საათი, ანუ ხუთი დღე, გამოსასვლელი დღე ისედაც  არ არის პოლიციაში და ესეც უკვე ითვლება არანორმირებულად“, – ამბობს ხალვაში.

მისი თქმით, არანორმირებული სამუშაო გრაფიკით პოლიციელები მხოლოდ ბათუმში მუშაობენ და თბილისში ან სხვა რეგიონებში მსგავსი სიტუაცია არ არის:

„პოლიციის შესახებ კანონის 52-ე და 53-ე მუხლები ითვალისწინებს პოლიციის შვებულებას და სამუშაო დროს, თუმცა კანონი უხეშად ირღვევა. 24-საათიანი მუშაობის შემდეგ პოლიციელები ორი დღე ისვენებენ, მაგრამ ერთი დღე, ფაქტობრივად, მათ სრულიად გამოუყენებელი აქვთ, არ რჩებათ დრო ოჯახის წევრებთან, ახლობლებთან ურთიერთობისთვის“.

გია ხალვაში ამბობს, რომ ენმ-მ უმაღლეს საბჭოში წარადგინა კანონპროექტი, რომელიც ითვალისწინებდა პოლიციელის შვებულებით სარგებლობას და სავალდებულო დასვენების უზრუნველყოფას, თუმცა ეს კანონპროექტი უმრავლესობამ ჩააგდო.

პოლიცია ცენტრალურ მმართველობას დაქვემდებარებული ორგანოა და, შესაბამისად, კანონში ცვლილების შეტანა საქართველოს პარლამენტის პრეროგატივაა.

გია ხალვაში საპატრულო პოლიციიდან 11-12 მარტის ბათუმის მოვლენების შემდეგ დაითხოვეს.

14 თებერვალს, 19:00 საათზე, ბათუმში, აჭარის მთავრობის ადმინისტრაციულ შენობასთან, “აუდიტორია 115” საპროტესტო აქციას გამართავს. სტუდენტები და ყველა ის ადამიანი, ვინც ფიქრობს, რომ სახელმწიფო შრომის უსაფრთხოებას არასათანადოდ იცავს, მთავრობის უმოქმედობას გააპროტესტებენ.

“2011 წლიდან 2017 წლამდე 1209 მშრომელი დაიღუპა და დასახიჩრდა სახელმწიფოს ეკონომიკური პოლიტიკისა და შრომის უსაფრთხოების არარსებობის გამო. ეს არის ომი ხალხსა და ბიზნესელიტის ინტერესებზე მორგებულ სახელმწიფოს შორის. მაშინ, როცა გვარწმუნებენ არჩევანის თავისუფლებაში, მოქალაქეებს არჩევანის გაკეთება შიმშილსა და უმძიმეს პირობებში შრომას შორის უწევთ. ეს არ არის არჩევანი. ეს არ არის თავისუფლება. სახელმწიფო თავისი უმოქმედობით გვაიძულებს ვაშენოთ ისეთი მკვლელი სახლები, რომლებიც მსხვერპლად მშენებლების სიცოცხლეს ითხოვს! მოთმენას აღარ ვაპირებთ, არ შევეგუებით ადამიანების ყოველდღიურ მკვლელობას! სიჩუმე მკვლელობაში თანამონაწილეობაა. წინააღმდეგობის დროა!” – ნათქვამია აუდიტორია 115-ის განცხადებაში.

9 თებერვალს თბილისში, ნინო ჟვანიას ქუჩაზე მიმდინარე მშენებლობიდან  ახალგაზრდა ბიჭი, 26 წლის ჯარჯი ჯანჯალაშვილი გადმოვარდა და დაიღუპა. დაღუპული მუშა 1209-ე იყო იმ ადამიანებს შორის, რომლებიც ბოლო 6 წლის განმავლობაში, უსაფრთხოების ნორმების არარსებობის გამო მშენებლობაზე დაიღუპნენ.

აუდიტორია 115 სტუდენტების მიერ დაფუძნებული მემარცხენე მოძრაობაა.

აჭარის ჯანდაცვის მინისტრის მოადგილე, რამაზ ჯინჭარაძე „ბათუმელებთან“ საუბარში აცხადებს, რომ  უსახლკარო ოჯახების პრობლემების მოსაგვარებლად ხელისუფლება ფორმულას ეძებს. მისი თქმით,  განიხილება რამდენიმე ვერსია, მათ შორის ბინების მშენებლობაც.

„ეკომიგრანტების ძალიან მცირე ნაწილი იქნა ჩვენ მიერ დაკმაყოფილებული. არა იმიტომ, რომ ისინი თვითნებურად იყვნენ ჩასახლებული, არამედ რიგითობის მიხედვით მოუწიათ პროგრამაში ჩართვა. რაც შეეხება დანარჩენ კატეგორიებს, ვმუშაობთ ვერსიებზე, თუ როგორ უნდა მოხდეს მათი პრობლემის მოგვარება და ამ ვერსიებს უახლოეს პერიოდში გავაჟღერებთ,“-ამბობს რამაზ ჯინჭარაძე.

რა დროს მოიცავს მათ მიერ დასახელებული „უახლოესი პერიოდი“? – რამაზ ჯინჭარაძე კონკრეტულ ვადებს ვერ ასახელებს.

„ჩვენ განვიხილავთ ბინების მშენებლობების ვერსიაც, ბიზნესთან ურთიერთობების ვერსიასაც და ა.შ  არიან ოჯახები, რომლებიც მერიას ჰყავს აღრიცხვაზე და ცხოვრობენ ქირით, მათ არ დაურღვევიათ კანონი და არ შესახლებულან სადმე უკანონოდ. იმიტომ გაიწელა ეს პროცესი ამდენი ხანი, რომ მოსაძებნია ფორმულა, რომელიც მოერგება იმ ოჯახებს, რომლებიც არ არღვევენ კანონს და არიან საცხოვრებლის მიღების მოლოდინში. რაც მთავარია, არც ერთი ოჯახის მიმართ არ უნდა დაირღვეს სამართლიანობის პრინციპი,“-ამბობს მინისტრის მოადგილე.

დღეს, 10 თებერვალს, ე.წ „ოცნების ქალაქში“ ჩასახლებულმა ოჯახებმა საპროტესტო აქცია გამართეს. ისინი ხელისუფლებას მათთვის საცხოვრებელი კორპუსების აშენებას სთხოვენ.

„ბათუმელების“ ინფორმაციით, აჭარის განათლების ფონდის ხელმძღვანელს, ირაკლი თავბერიძეს, აჭარის განათლების მინისტრის პირველ მოადგილედ ნიშნავენ. მის შემცვლელად კი შუახევის ყოფილ გამგებელს, ტარიელ ებრალიძეს განიხილავენ.

ტარიელ ებრალიძე „ბათუმელებთან“ აჭარის განათლების ფონდის ხელმძღვანელად დანიშვნას არ ადასტურებს, თუმცა არ უარყოფს, რომ ამ საკითხზე კონსულტაციები მიმდინარეობს.

„ამ თემაზე იყო საუბარი, თუმცა ამის შესახებ საბოლოო გადაწყვეტილება, ანუ ბრძანება ჩემი დანიშვნის შესახებ, არ ყოფილა,“ – ამბობს ებრალიძე.

განათლების სამინისტროში დანიშვნის ფაქტს არც ირაკლი თავბერიძე ადასტურებს, თუმცა არც ის უარყოფს, რომ მისი შესაძლო დაწინაურება განიხილება.

„რაღაც საუბრები არის, მაგრამ ჯერჯერობით ფონდში ვმუშაობ, აქ ვარ. მოდით, დაველოდოთ მოვლენებს“, – ამბობს ირაკლი თავბერიძე.

აჭარის განათლების სამინისტროს პრესსამსახურში „ბათუმელებს“ უთხრეს, რომ ირაკლი თავბერიძის „დანიშვნის ბრძანება კანცელარიაში ჯერჯერობით არ დევს“.

”ბათუმელების” ინფორმაციით კი, ირაკლი თავბერიძეს განათლების ფონდის თანამშრომლებმა გამოსამშვიდობებელი ვახშამი უკვე გაუმართეს.

ეს არ არის პირველი შემთხვევა, როცა თანამდებობებზე დანიშნული პირები იმის გამო, რომ ამის შესახებ საჯაროდ არ უთქვამს ზურაბ პატარაძეს, თანამდებობებზე დანიშვნას არ ადასტურებენ.  ასე მოიქცა ბაგრატ მანველიძე. ,,ეს სიმართლეს არ შეესაბამება”, – უთხრა მან ”ბათუმელებს”, როცა განათლების სამინისტროში მისი დანიშვნის შესახებ ვკითხეთ. ამ სიტყვებიდან მეორე დღეს კი ის სამინისტროში გამოცხადდა მინისტრის მოადგილის რანგში.

ირაკლი თავბერიძე  განათლების ფონდს 2011 წლიდან ხელმძღვანელობს. ფონდში მუშაობამდე ის რამდენიმე კერძო კომპანიაში მუშაობდა იურისტად, მანამდე კი ფრაქცია „ნაციონალური მოძრაობის“ იურისტი იყო უმაღლეს საბჭოში.

შუახევის ყოფილი გამგებელი, ტარიელ ებრალიძე, თვითმმართველობის არჩევნების შემდეგ არსად მუშაობს. 6 თებერვალს მან „ბათუმელებს“ უთხრა, რომ შაბათობით ხიჭაურის უნივერსიტეტში ლექციებს კითხულობს, მაგრამ ელოდება, რომ მთავრობა თანამდებობაზე დანიშნავს.

„მუსლიმ ქალთა საჭიროებები“- ეს არის კვლევა, რომელიც აჭარის სამ მუნიციპალიტეტში – ხულოში, შუახევსა და ქედაში, ასევე ბათუმში ჩაატარდა. კვლევა „ქართველ მუსლიმთა კავშირმა“ ჩაატარა „ტოლერანტობის, სამოქალაქო ცნობიერებისა და ინტეგრაციის მხარდაჭერის პროგრამის“ ფარგლებში. კვლევის პრეზენტაცია დღეს, 9 თებერვალს, ბათუმის „დემოკრატიული ჩართულობის“ ცენტრში გაიმართა.

კვლევაში სულ 44 მუსლიმი ქალი მონაწილეობდა. კვლევის ავტორის, ლელა ჯავახიშვილის თქმით, გამოიკვეთა რამდენიმე პრობლემა, მათ შორის გენდერული ნიშნით ჩაგვრის, დასაქმებისა და პოლიტიკურ აქტივობაში ჩართვის მხრივ.

პრეზენტაციაზე აღინიშნა, რომ სოფლად მცხოვრებ მუსლიმ ქალებს ნაკლები შესაძლებლობები აქვთ საზოგადოებრივ აქტივობებში ჩართვის, გართობისა და დასაქმების.

„ტოლერანტობისა და მრავალფეროვნების ინსტიტუტის“  წარმომადგენლის, მაკო ღავთაძის თქმით, მსგავსი პრობლემის წინაშე შესაძლებელია იდგეს არამუსლიმი ქალიც. „თუ დაინახეთ ის, რომ მუსლიმი ქალებისთვის არის განსაკუთრებულად ხელმიუწვდომელი გარემო?“ – ჰკითხა მან კვლევის ავტორს.

ლელა ჯავახიშვილის თქმით, კვლევაში მონაწილე ქალები არ საუბრობენ იმაზე, რომ რელიგიაა მათთვის შემაფერხებელი.

„მათი პერსპექტივიდან ჩანს ისე, რომ რელიგიური ნიშნით მათი სოციალური ცხოვრება არ იზღუდება და მათ ისევე შეუძლიათ სხვადასხვა აქტივობაში მიიღონ მონაწილეობა, როგორც მართლმადიდებელმა ქალებმა, ძირითადი პრობლემა სოციალური მდგომარეობიდან მოდის, ამიტომ ყურადღება არ გავამახვილე რელიგიის საკითხზე,“ – აღნიშნა ლელა ჯავახიშვილმა.

მისი თქმით, განსხვავება ქალაქსა და სოფელში მცხოვრებ ქალებში უფროა, რადგან სოფლად მცხოვრებლებს არ აქვთ ხელმისაწვდომი გარემო.

შემდეგი კითხვა სკოლებში რელიგიური ატრიბუტიკის გამოყენებას შეეხებოდა.  ზოგადი განათლების შესახებ კანონის თანახმად სკოლაში რელიგიური თანასწორობისა და ნეიტრალიტეტის დაცვა აუცილებელია, მაგრამ კანონი ამავდროულად მხარს უჭერს რელიგიურ ინდივიდუალიზმს: „თავსაფარი მუსლიმებისთვის რელიგიური ინდივიდუალიზმის გამოხატულებაა, ამის გამო კი მათ პრობლემები ექმნებათ,“ – ამბობს მკვლევარი.

კვლევაში საუბარი იყო იმაზე, რომ  რელიგიური ნიშნით ჩაგვრა ძირითადად მართლმადიდებელი მოსწავლეების მხრიდან ხორციელდება.

„ბათუმელების“ კითხვაზე, კონკრეტულად რა ფორმით ხდება ჩაგვრა და თუ არსებობს კვლევაში კონკრეტული მაგალითები, ლელა ჯავახიშვილი ამბობს, რომ კონკრეტულ მაგალითებზე ქალები არ საუბრობენ, თუმცა ამბობენ იმას, რომ არის ქილიკისა და მცირე დაპირისპირებების შემთხვევები.

კვლევამ გამოკითხული ქალების თვითდისკრიმინაციაც აჩვენა: „ისინი თვითშეზღუდვას ავლენენ. თვითონ უკრძალავენ თავიანთ თავს ბევრ რამეს, თუმცა ამას არ უკავშირებენ რელიგიას,“ – ამბობს ჯავახიშვილი.

„ბათუმელების“ კითხვაზე, კვლევის მიხედვით, რა არის დაბალი თვითშეფასების მოტივი – კულტურული სტიგმები თუ განათლების ნაკლებობა? ლელა ჯავახიშვილი პასუხობს:

„თვითდისკრიმინაცია შეიძლება არა ერთ ფაქტორს მიეწეროს, მათ შორის რელიგიურ ფაქტორსაც. ეს ქალები რელიგიაში პრობლემას ვერ ხედავენ,  მაგრამ ეს არ გამორიცხავს, რომ ნამდვილად ასეა. თვითდისკრიმინაციის საფუძველი შეიძლება იყოს საზოგადოებიდან წამოსული რეაქცია, ოჯახში არსებული სიტუაცია, ქალების პერსონალური მდგომარეობა, რაც გულისხმობს იმას, რომ შეიძლება თვითონ არიან საკუთარ თავში ჩაკეტილები. შესაძლებელია ეს განპირობებული იყოს  იმით, რომ კონკრეტულ ეტაპზე, რაღაც შემთხვევის გამო, ისინი საკუთარ ნაჭუჭში ჩაიკეტენ.

ზოგჯერ თვითგამორკვევაც ვერ ხდება, ვერ გაურკვევიათ, რატომ ვერ დგამენ ამ ნაბიჯს, მაგრამ ჩემი აზრით, ისინი მაინც საზოგადოებრივ აზრს უწევენ ანგარიშს“.

კვლევაში აღნიშნულია, რომ დასაქმების დროს უპირატესობა ენიჭებათ მართლმადიდებელ კაცებს და შემდეგ მუსლიმებს. „ბათუმელების“ კითხვაზე, რა ფორმით მოხდა ამის დადგენა, ჯავახიშვილი ამბობს, რომ  ამაზე  გამოკითხული პირები საუბრობენ.

„დასაქმება პრობლემაა თავსაფრიანი ქალებისთვის, რადგან თავსაფარი არის გამოხატული რელიგიურობის ნიშანი. იმ მუსლიმ ქალებს, რომლებიც არ ატარებენ თავსაფარს, დასაქმების ისეთივე შანსი აქვთ, როგორც მართლამდიდებელ ქალებს“.

კვლევის პრეზენტაციის შემდეგ აჩვენეს დოკუმენტური ფილმი სამი მუსლიმი ქალის ცხოვრებასა და ღირებულებებზე.

ჩაქვში, უმაღლესი საბჭოს გვერდით მცხოვრებ თამაზ არძენაძეს ხეების გადატანა პრობლემებს უქმნის. ყოველ ჯერზე, როცა ივანიშვილის ბაღისთვის შერჩეული გიგანტური ხე ჩაქვს ტოვებს, თამაზ არძენაძის ეზოში აურზაურია – გზის პირას მდებარე რკინის ღობეები იხსნება და მძიმეწონიანი მანქანები მის ეზოში მოძრაობენ. მოქალაქე ამბობს, რომ დაპირებულ კომპენსაციას არავინ უხდის, სახლის კედლები და ახალგაკეთებული მესერი დაიბზარა.

გასული წლის გაზაფხულზე თამაზ არძენაძის ოჯახში ბიძინა ივანიშვილი და „ქართუ ჯგუფის“ წარმომადგენლები მისულან. მას შემდეგ აქაურობა გადათხრილია. თამაზ არძენაძის ეზოს გავლით ბიძინა ივანიშვილის ბაღში სულ მალე კიდევ ერთ ხეს წაიღებენ, რომელსაც ძირი უკვე გამოთხრილი აქვს.

„გზის გაფართოებაა საჭირო, ამ გზაზე ხე ვერ გაივლისო,“ – გვიყვება თამაზ არძენაძე მასთან ივანიშვილის სტუმრობის დეტალებს. – „ისე შევთანხმდით, რომ ხელშეკრულება არც გაგვიფორმებია. ბიძინა ივანიშვილმა თქვა, აქ მოსახლეობას ვინმემ გული არ ატკინოთო. მიწის ნაკვეთის დათმობის სანაცვლოდ თანხა მაშინვე ჩამირიცხეს, მაგრამ შემოდგომაზე ისევ მოვიდა „ქართუ ჯგუფის“ წარმომადგენელი, ბესო დემეტრაშვილი. გზა ისევ ვიწროა და დროებით თქვენი ეზოთი ვისარგებლებთ, როცა ხე იქნება ჩამოსატარებელიო.

ჩემ წინ მამუკა მიქელაძე აშენებს სახლს, იმან არ დაუთმო მიწა და ამიტომ დარჩა საჭირო ეს. შევთანხმდით, რომ კომპენსაციას მივიღებდი, თანხის რაოდენობაზე არ შევთანხმებულვართ, მაგრამ საერთოდ არაფერს მაძლევენ. თვეში ერთხელ მაინც ღობეს ხსნიან და ჩემი ეზოდან გააქვთ მძიმეწონიან მანქანებს ხეები“.

თამაზ არძენაძემ ეზოში მესერი გვაჩვენა, ასევე სახლის კედელი, რომელიც დაბზარულია. მისი თქმით, ბზარები მას შემდეგ გაჩნდა, რაც ხეების გადატანის პროცესი დაიწყეს. რატომ გაჩნდა ბზარები, ექსპერტებს არ შეუსწავლიათ. თამაზ არძენაძე არც სასამართლოს მიმართავს. ამბობს, რომ პირდაპირ ბიძინა ივანიშვილთან სურს შეხვედრა.

„ვფიქრობ, შუამავალი ხალხი ქმნის პრობლემას. აგერ, ეს ელექტროგადამცემი ბოძიც ნახევრად წაქცეულია. ხის ჩატარების დროს ბოძზე მავთულებს ხსნიან და მერე ხელახლა აერთებენ, მაგრამ საშინელ დღეშია. პრობლემაა სანიაღვრე სისტემაც, რომელიც უნდა მოეწყოთ, რადგან როცა გზა გაფართოვდა, ჩემი სახლის ეზოზე მაღალი გამოვიდა და ახლა მთელი ნიაღვარი წვიმის დროს ჩემთან ჩამოდის, მეზობლებსაც ვაზარალებ,“ – გვითხრა თამაზ არძენაძემ.

„ბათუმელებმა“ სცადა, „ქართუ ჯგუფის“ წარმომადგენელთან, ბესო დემეტრაშვილთან დაკავშირება, მაგრამ მან ჩვენს სატელეფონო ზარებს არ უპასუხა.

რამდენიმე დღის წინ თამაზ არძენაძემ წერილით აჭარის უმაღლეს საბჭოს მიმართა. ის დახმარებას თუ შუამდგომლობას სთხოვს უმაღლესი საბჭოს თავმჯდომარეს. რა მოიმოქმედა მოქალაქის უფლების აღსადგენად უმაღლესმა საბჭო? – ვკითხეთ უწყებას. „მიმდინარეობს მსჯელობა ამ საკითხთან დაკავშირებით. ამ ეტაპზე ვერაფერს გეტყვით,“ – გვითხრეს უმაღლესი საბჭოს პრესცენტრში.

ბოლო მონაცემებით წელს აჭარაში წითელას 149 შემთხვევა აღირიცხა. მონაცემები მზარდია და შემთხვევათა რაოდენობა კლებისკენ არ მიდის – უთხრეს „ბათუმელებს“ აჭარის საზოგადოებრივი ჯანდაცვის ცენტრში. ცენტრის დირექტორი, ნინო ნიჟარაძე კიდევ ერთხელ უსვამს ხაზს ვაქცინაციის მნიშვნელობას:

„აცრა შესაძლებელია პოლიკლინიკებში. ვისაც არ ახსოვს და არ არის დარწმუნებული, გაკეთებული აქვს თუ არა, აუცილებლად უნდა გაიკეთოს აცრა.“

წითელას აცრა კეთდება ერთი და ხუთი წლის ასაკში. წითელა 100-პროცენტიანი გადამდებობით ხასიათდება და დაავადების თავიდან აცილების ერთადერთი გზა ვაქცინაციაა. დაავადებულთა მნიშვნელოვანი ნაწილს შეადგენენ ის ბავშვები, ვისაც აცრა გამოტოვებული აქვს ან მოზრდილი მოსახლეობა, რომელსაც თავის დროზე აცრა არ ჩაუტარებია, ან კიდევ 0-დან ერთ წლამდე ბავშვები, ვინც ჯერ ვერ მოასწრო წითელას საწინააღმდეგო აცრის ჩატარება და კონტაქტის გამო მოხდა დაავადების გადადება.

ბავშვების და 40 წლამდე ასაკის მოსახლეობის ვაქცინაცია უფასოა. წითელას საწინააღმდეგო ვაქცინის გაკეთება პოლიკლინიკებშია შესაძლებელი. ბათუმში, ბარათაშვილის ქუჩაზე მდებარე საოჯახო მედიცინის ცენტრში ამბობენ, რომ აცრა არა მარტო 40 წლამდე ასაკის ადამიანებისთვის, არამედ ყველასთვის უფასოა: „თუმცა თუ პაციენტი საყოველთაო ჯანდაცვის პროგრამით ჩვენთან არ არის რეგისტრირებული ან კერძო დაზღვევა აქვს, სასურველია მიმართოს მისი ოჯახის ექიმს, იმ დაწესებულებას, სადაც არის რეგისტრირებული და იქ ჩაიტაროს აცრა. სხვა პოლიკლინიკაში მისთვის უბრალოდ კონსულტაციაა ფასიანი, აცრა კი ყველასთვის უფასოა,“ – გვითხრა დალი დავითაძემ, ცენტრის დირექტორმა.

აუცრელი ბავშვები, განსაკუთრებით ჩვილები, წარმოადგენენ მაღალი რისკის ჯგუფს წითელათი დაავადების,  გართულებების და გარდაცვალების მხრივ. ასევე, დაავადების განვითარების მაღალი რისკის ქვეშ იმყოფებიან აუცრელი ორსული ქალები.

წითელას სიმპტომებია: მაღალი ტემპერატურა, ხველება, ცემინება, კონიუნქტივიტი, ყელის ტკივილი. სიმპტომების განვითარებიდან მესამე-მეხუთე დღეს ჩნდება წითელი ლაქისებრი ბრტყელი გამონაყარი სახეზე, თმის საფარველის გასწვრივ კისერზე, მხრებსა და მთელ სხეულზე.

წითელა ჰაერწვეთოვანი გზით, დაინფიცირებული პირისგან ცემინებისა და ხველების დროს ვრცელდება. ვირუსი ორი საათის განმავლობაში ცოცხლობს ჰაერში და იწვევს გარშემომყოფი პირების დაინფიცირებას ჰაერის ან დაბინძურებულ საგნებთან შეხების საშუალებით.

დაინფიცირებული პირი სიპტომების გამოვლენამდე ოთხი დღის და გამოვლენის შემდეგ კიდევ ოთხი დღის განმავლობაში შესაძლებელია იყოს ვირუსის გამავრცელებელი.

ამავე თემაზე: რა არის წითელა და როგორ ავიცილოთ იგი თავიდან