აჭარის მთავრობა მუნიციპალიტეტებში აგრომომსახურების ცენტრების მოსაწყობად 3 მილიონ-ნახევარზე მეტ თანხას ხარჯავს. ლოჯისტიკური ცენტრები რეგიონის ყველა მუნიციპალიტეტში მოეწყობა. რა ეტაპზეა სამუშაოები და როდის შევა ექსპლუატაციაში ლოჯისტიკური ცენტრები? – „ბათუმელების“ შეკითხვებს აჭარის სოფლის მეურნეობის სამინისტროს აგროპროექტების მართვის ცენტრის დირექტორი, ჯამბულ აბულაძე პასუხობს.

ბატონო ჯამბულ, რამდენი ლოჯისტიკური ცენტრი მოეწყობა აჭარის მასშტაბით და რა ეტაპზეა სამუშაოები?

ლოჯისტიკური ცენტრი რეგიონის ყველა მუნიციპალიტეტში მოეწყობა. მუნიციპალური ლოჯისტიკური ცენტრების გარდა, ქალაქს შემოერთებულ ტერიტორიაზე იქნება რეგიონული მასშტაბის ლოჯისტიკური ცენტრი. იმავე შენობაში განთავსდება ხელვაჩაურის მუნიციპალიტეტის ლოჯისტიკური ცენტრიც.

რაც შეეხება სამუშაოებს, ქობულეთში მშენებლობა ათ დღეში დასრულდება, ქედაში  – ერთი თვე დასჭირდება სამუშაოების დასრულებას, შუახევსა და ხელვაჩაურში კი მშენებლობა 2017 წლის დეკემბერში დაიწყო და 2018 წლის ზაფხულში დასრულდება.

რაც შეეხება ხულოს მუნიციპალიტეტს, ტერიტორიაზე, სადაც ლოჯისტიკური ცენტრის მოწყობა დაიგეგმა, სასამართლო დავა მიმდინარეობს. რომ არ დაგვიანებულიყო მშენებლობა, ცენტრისათვის სხვა ტერიტორია გამოვნახეთ, უახლოეს დღეებში მომზადდება დოკუმენტაცია და დაიწყება მშენებლობა.

შენობებში დანადგარები განთავსდება, რომელმაც ადგილზე მოწეული პროდუქციის დახარისხება და შეფუთვა უნდა უზრუნველყოს, ასევე  იქნება მშრალი და სამაცივრე მეურნეობა. ლოჯისტიკური ცენტრებისთვის შვიდი სპეცტექნიკა შევისყიდეთ, აქედან ექვსი სატვირთოა, ერთიც – მაცივრით აღჭურვილი ავტომობილი. ასევე, შევისყიდეთ ელექტროტვირთამწეები, სასწორები, ურიკები… მიმდინარე წელს ექსპლუატაციაში შევა ყველა ცენტრი.

კონკრეტულად რა ფუნქცია ექნებათ ცენტრებს?

აგრომომსახურების ცენტრის მიზანი პროდუქციის მიღება, შეფუთვა და რეალიზაციაა. ეს ცენტრები პროდუქციის ადგილზე დიდხანს დასაწყობებისთვის არ არის გათვალისწინებული, გამტარი ფუნქციით უნდა იყოს დატვირთული. პროდუქციის შეფუთვის დასრულების შემდეგ მაქსიმუმ ორი დღით დასაწყობდება და შემდეგ ცენტრალურ ლოჯისტიკურ ცენტრში მოხდება მისი ტრანსპორტირება, საიდანაც სარეალიზაციოდ ქსელში ჩაეშვება.

ვის გადაეცემა სამართავად? სამინისტროს დაქვემდებარებაში იქნება, თუ რომელიმე ორგანიზაციის?

სხვადასხვა კოოპერატივის მიერ ჩამოყალიბებულ, საერთო სასოფლო – სამეურნეო გაერთიანებას გადაეცემა, რომელიც გააკონტროლებს ლოჯისტიკური ცენტრების მუშაობას, თუმცა, ვიდრე მოხდება მსგავსი გაერთიანების ფორმირება, ვფიქრობთ, მანამდე აგროპროექტების მართვის ცენტრის დაქვემდებარებაში იქნება.

თანამშრომლების აყვანას თუ გეგმავთ?  

ვფიქრობთ. თითოეულ ცენტრში ექვსი თანამშრომელი ავიყვანოთ. თანამშრომლებს კონკურსის წესით შევარჩევთ.

ფერმერისთვის, რომელმაც სარგებელი უნდა ნახოს ამ ცენტრით, მომსახურება ფასიანი იქნება?

ფერმერს პროდუქცია ძირითადად ბათუმში ჩამოაქვს გასაყიდად, პროდუქციის ტრანსპორტირებისას არც ტრანსპორტირების ნორმებია დაცული და ვერც რეალურ ფასში ჰყიდიან ეკოლოგიურად სუფთა პროდუქტს. გლეხს ბაზარზე წვდომა არ აქვს, ამიტომაც ხშირად პროდუქციას გადამყიდველებს არარეალურ ფასში სთავაზობენ, სისტემის დანერგვის შემდეგ, გლეხი რეალურ ფასში გაყიდის პროდუქციას, მაგალითად, თუ ცენტრი გლეხის მოწეულ პროდუქტს ერთ ლარად გაყიდის, ამ თანხიდან 10-15 თეთრი დარჩება ცენტრს.

როდესაც ცენტრი პროდუქციის გაყიდის იმავე დღეს ფერმერს გაყიდული პროდუქციის მთლიან თანხას დაუბრუნებს, საიდანაც, შემდეგ ფერმერმა უნდა გადაუხადოს ცენტრს მომსახურების საფასური. დაახლოებით ერთი კვირის ვადაში მოხდება გაყიდული პროდუქციის თანხის ანაზღაურება ფერმერებისთვის.

ფერმერს შესაძლებლობა ექნება ცენტრში სურვილისამებრ მხოლოდ შეაფუთინოს საკუთარი პროდუქცია, რეალიზაცია კი თვითონ გაუწიოს. ასეთ დროს ფერმერი ცენტრს მხოლოდ შეფუთვის მომსახურების თანხას გადაუხდის.

აღნიშნულ საკითხთან დაკავშირებით ფერმერებთან გქონდათ თუ არა კონსულტაცია? რას ფიქრობენ ფერმერები?

ფერმერებს არაერთხელ შევხვდით, გვქონდა საუბარი, ისინი მთავარ პრობლემად პროდუქციის რეალიზაციას ასახელებენ და ამ პრობლემის მოგვარებას ითხოვენ, რის გადაჭრასაც ცენტრების გახსნაში ვხედავთ.

რას ფიქრობთ, რეალიზაციის პრობლემა ხომ არ შეექმნება ცენტრებს?

ჩვენი დაკვირვებებისა და ანალიზის საფუძველზე მივედით იმ დასკვნამდე, რომ არ არის თავისუფალი კონკურენტული საბაზრო გარემო, ცენტრების გახსნა კი კონკურენტული გარემოს შექმნას ემსახურება. ცენტრი სტანდარტის შესაბამისი იქნება და პროდუქციის რეალიზაციის პრობლემაც არ უნდა შეიქმნას, თუმდაც ექსპორტზე გასატანად.

ამ ფოტოების ავტორი კადრების გადასაღებად უკაცრიელ ჩერნობილში გაემგზავრა და ინფრაწითელი კამერით გადაიღო ატომური ელექტროსადგურის შემოგარენი. ადგილიდან, სადაც 30 წლის წინ კატასტროფული აფეთქება მოხდა, ხალხი ცდილობს შორს დასახლდეს, თუმცა მცენარეთა და ცხოველთა სამყარო მიტოვებულ ქალაქში ისევ ცოცხლობს. კამერის ეფექტი ფოტოებს მელანქოლიურ ელფერს სძენს და წლების წინ მომხდარ ტრაგედიას გვახსენებს.

აჭარის მაღალმთიანეთში მცხოვრები მოსახლეობა მესაქონლეობასა და მეკარტოფილეობას მისდევს. ოჯახებს, რომლებიც მესაქონლეობას ეწევიან, საქონელი გამოსაკვებად მთაში გადაჰყავთ და ის მაისიდან ოქტომბრის ბოლომდე რჩებიან. ზამთრის პირას მემთეურები სახლში ბრუნდებიან და საქონელს ბოსელში კვებავენ, მთაში დამზადებულ ყველსა და კარაქს კი ბათუმში ბითუმად ჰყიდიან.

ეს ვიდეო შუახევის მუნიციპალიტეტის სოფელი წყალსაყარშია გადაღებული. სოფელი ბათუმი-ახალციხის ცენტრალურ საავტომობილო მაგისტრალს დაახლოებით 17 კილომეტრითაა დაშორებული. აქ მცხოვრები ოჯახები თავს ძირითადად მესაქონლეობით ირჩენენ. შუახევში მკაცრი ზამთარი იცის, საქონლის მოვლა რომ გაუადვილდეთ და  უამინდობაში გადაადგილება მოსახერხებელი იყოს, საცხოვრებელი სახლები ბოსელთან დახურული კიბითაა დაკავშირებული.

მურმან ქათამაძე ცოლთან, ეთერ მჟავანაძესთან ერთად, ფერმერულ მეურნეობას წლებია ეწევა.

ვიდეო: ეკა ბარამიძე, ია ფრანგიშვილი

ახალი ეროვნული სასწავლო გეგმა, რომელიც სექტემბერში უნდა ამოქმედდეს, მასწავლებელს შინაარსიანი გაკვეთილების ჩატარებას ავალდებულებს. საუბარია იმაზეც, რომ უნდა შეიცვალოს მოსწავლის შეფასების დღეს არსებული მოდელი და მოსწავლე შეფასდეს არა ყოველდღიურად, არამედ შემაჯამებელი ნიშნების მიხედვით.

ამ თემაზე „ბათუმელებს“ განათლების სამინისტროს ეროვნული სასწავლო გეგმების დეპარტამენტის ჰუმანიტარულ და სოციალურ მეცნიერებათა მიმართულების ხელმძღვანელი, თამარ ჯაყელი ესაუბრა.

ქალბატონო თამარ, ითქვა, რომ ახალი სასწავლო გეგმის მიხედვით მასწავლებელი აღარ იქნება ვალდებული ყოველდღე დაწეროს ნიშანი. ეს გადაწყვეტილება უკვე მიღებულია? 

გადაწყვეტილება ნიშნებთან დაკავშირებით ჯერ მიღებული არ არის, ამჟამად საბაზო საფეხურის სასწავლო გეგმის რევიზია მიმდინარეობს, მაგრამ, ვფიქრობთ, რომ შეფასების სისტემა უნდა შეიცვალოს.

ცვლილების შემთხვევაში რა კრიტერიუმით შეაფასებენ მოსწავლეს?

ახალი სასწავლო გეგმის მიხედვით გვაქვს ორი ტიპის შეფასება. ერთი გულისხმობს მიმდინარე შეფასებას, მეორე კი -შემაჯამებელს. ახალ სასწავლო გეგმაში დიდ ყურადღებას ვაქცევთ იმას, რომ წინ წამოიწიოს შინაარსიანი კონტექსტი. ისეთი დავალებები, რაც რაღაც ასპექტით კავშირშია ცხოვრებასთან.

მაგალითად, თუ ბავშვს ვეტყვით, რომ დაიმახსოვრე ეს ლექსიკური ერთეულები, მხოლოდ ამის გამო რატომ დაიმახსოვრებს? მაგრამ თუ ვეტყვით, რომ წერილი მისწეროს თანატოლს, ან დაწეროს ოჯახის შესახებ, მას ინტერესი გაუჩნდება. როცა ბავშვს ეუბნები, რომ გაესაუბრები წყლის აგრეგატულ მდგომარეობაზე, ეს ბავშვს არაფერს ეუბნება. მაგრამ თუ ვეტყვით – როგორ ფიქრობთ, რატომ მოდის წვიმა? ეს უკვე სხვაგვარად აინტერესებს მას. ამ ტიპის დავალებები მოსწავლის შინაგანი ძალების გააქტიურებას იწვევს.

დაახლოებით რამდენი შემაჯამებელი ნიშანი უნდა დაიწეროს სემესტრში ერთ მოსწავლეზე, რომ ის საბოლოოდ შეაფასონ?  

გააჩნია საგანს, მაგრამ ერთ თემაში მინიმუმ ერთი შემაჯამებელი გაკვეთილი აუცილებელია. სემესტრში ეს შეიძლება იყოს 3-4 ან მეტიც.

დღეს, ფაქტობრივად, სკოლაში განმავითარებელი გაკვეთილები არ ტარდება – ერთი მხრივ, არის სრულიად გადატვირთული პროგრამები, სხვადასხვა მოთხოვნა და მასწავლებლებსაც ურჩევნიათ ის დავალებები გააკეთონ, რაც მათი და სკოლის ბედს წყვეტს. ახალი სასწავლო გეგმით კი ძალიან განტვირთულია პროგრამა და წინ შინაარსიანი დავალებებია წამოწეული.

დღეს ბავშვების შესაფასებლად იწერება ნიშნები. ჩვენ გვინდა, რომ ოფიციალური ნიშნები იწერებოდეს მხოლოდ შემაჯამებელ დავალებებში.

განათლების სპეციალისტები ხშირად ამბობენ, რომ დღევანდელი გაკვეთილები, ფაქტობრივად, არ არის ორიენტირებული განვითარებაზე. ახალი სასწავლო გეგმა რას შეცვლის ამ მიმართულებით?

ამიტომ ვამბობთ, რომ  შემაჯამებელი დავალებები აუცილებლად უნდა იყოს შინაარსიანი. არის კატეგორია შეფასების, რომელიც ბავშვის განვითარებაზეა ორიენტირებული და არის განმსაზღვრელი, საერთო მოთხოვნებთან მიმართებაში, სად დგას ეს ბავშვი. შემაჯამებელი დავალება შეიძლება მოიცავდეს განმავითარებელ შეფასებასაც და მიმდინარესაც, ანუ კომპლექსური უნდა იყოს.

რამდენად მზად არიან პედაგოგები სისტემური ცვლილებისთვის?

როგორ უნდა დაიგეგმოს და შესრულდეს დროში სასწავლო გეგმები, აქამდე ასეთი ინსტრუმენტი არ იყო, ახლა ეს ინსტრუმენტი გვაქვს და ეს დაეხმარება მასწავლებლებს მიზნის მიღწევაში. მათ მიეწოდებათ კომპლექსური დავალებების იდეები, წლიური პროგრამებით შედგენილი გზამკვლევები, სადაც დეტალურად იქნება ყველაფერი მოცემული.

ამ კომპლექსური დავალებების შესრულება სავალდებულო იქნება, თუ პედაგოგს შეუძლია არ გამოიყენოს და ძველი მეთოდებით გააგრძელოს მუშაობა?

ჩვენ ვფიქრობთ არა განსჯაზე, არამედ შეფასება-დახმარებაზე. სადაც ვერ გაკეთდება, ვნახავთ რატომ ვერ კეთდება. იმისათვის, რომ დღეს არსებული სიტუაცია შეიცვალოს. თუ სკოლაში შინაარსიანი კონტენტი არ შევიდა, მთლიანად დაიკარგება სწავლის მოტივაცია. ის, რა აქტივობაც დღეს კეთდება სკოლაში, ხშირად სკოლის კედლებს იქეთ საჭირო არ არის. ამიტომ ვამბობთ, რომ სიახლეების დანერგვის პროცესი ცალმხრივი არ არის. მასწავლებელს შეუძლია გაჰყვეს ჩვენ მიერ შექმნილ ინსტრუმენტებს და გაკვეთილის გეგმადაც კი გამოიყენოს.

ინსტრუმენტები იმიტომ კეთდება, რომ მასწავლებლებს გაუადვილდეთ მუშაობა. გზამკვლევებს უნდა მოჰყვეს ტრენინგებიც. ოღონდ აქამდე არსებულისგან ეს ტრენინგები იმით იქნება განსხვავებული, რომ არ იქნება ზოგადი ხასიათის – ადრე ტრენინგები ტარდებოდა ზოგადი ხასიათის და [ახლა] იქნება იმაზე ორიენტირებული, რა უნდა გააკეთოს მასწავლებელმა.

ერთ-ერთი დიდი პრობლემა, რაც სკოლებში სახელდება, არის ის, რომ მასწავლებლების საკმაოდ დიდი ნაწილი ვერ ახერხებს საგაკვეთილო პროცესში ყველა მოსწავლის ჩართვას. ახალი სასწავლო გეგმით ამის შეცვლა თუ იქნება შესაძლებელი?

სასწავლო გეგმა არ არის ჯადოსნური ჯოხი. ვფიქრობთ, ბავშვები  პროცესებში რომ ჩავრთოთ, ამ მხრივ სასიკეთო სიახლეები გვაქვს. სამინისტროში გვყავს მასწავლებლები, ვისაც მიაქვთ სკოლებში ჩვენი შედგენილი დავალებები და ვცდით. ერთი დავალება იყო ასეთი, მეშვიდეკლასელ მოსწავლეებს უნდა დაეწერათ ზღაპარი პირველკლასელებისთვის, მაგრამ სანამ ამას შეადგენდნენ, პატარა კითხვარი უნდა ჩაეტარებინათ და გაერკვიათ, რა ინტერესები ჰქონდათ პირველკლასელებს. ვერ წარმოიდგენთ, რა ხდებოდა ბავშვებში. იმის თქმა მინდა, რომ შინაარსიანი დავალება ეს არის მოსწავლის აქტიურობისთვის მოტივაცია.

კიდევ რა შეიცვალა ეროვნულ სასწავლო გეგმაში არსებითი?

გარდა იმისა, რაზეც ვისაუბრეთ, სასწავლო გეგმას დაემატა თემა. იყო შიშები, საბჭოთა მოდელს ხომ არ ემსგავსება, მაგრამ ასე არ არის. თემას ჩვენ ვიღებთ როგორც შინაარსიან კონტექტს, რომლითაც უნდა დამუშავდეს ახალი სასწავლო მასალა.

თუ ბავშვმა ვერ დაინახა კავშირი სხვადსახვა ინფორმაციას შორის, მის მეხსიერებაში სტრუქტურული ცოდნა ვერ ყალიბდება. სიახლეა ასევე ის, რომ მეშვიდე-მეცხრე კლასებში გვაქვს გრძელვადიანი სასწავლო მიზნები. თუ აქამდე იყო ყოველწლიური, ახლა გვექნება საფეხურებრივი სტანდარტი.

ბათუმის საკრებულოს თავმჯდომარის, სულიკო თებიძის განცხადებით, საკრებულოში „ნაციონალური მოძრაობის“ ფრაქციის თავმჯდომარე, მირდატ ქამადაძე კერძო საადვოკატო საქმიანობას ეწევა, რისი უფლებაც მას კანონით არ აქვს.

საკრებულოს თავმჯდომარის თქმით, მირდატ ქამადაძე ერთი კვირის წინ ქუთაისის სააპელაციო სასამართლოში იმყოფებოდა. „მირდატ ქამადაძის მხრიდან ფიქსირდება მოქმედი კანონმდებლობის უხეში დარღვევის ფაქტები. როგორც ცნობილია, ის წლების განმავლობაში ეწეოდა საადვოკატო საქმიანობას და ირკვევა, რომ ბატონი მირდატი, როგორც საკრებულოს მოქმედი თანამდებობის პირი, კვლავაც აგრძელებს კერძო საადვოკატო საქმიანობას“, – ამბობს სულიკო თებიძე.

მისი განმარტებით, ადგილობრივი თვითმმართველობის კოდექსის, საჯარო დაწესებულებაში ინტერესთა შეუთავსებლობისა და კორუფციის შესახებ კანონის, ასევე ადვოკატთა შესახებ საქართველოს კანონის თანახმად, საკრებულოს თანამდებობის პირს არ აქვს უფლება ეწეოდეს კერძო საადვოკატო საქმიანობას, მიუხედავად იმისა, ის ამ საქმიანობაში იღებს თუ არა ანაზღაურებას.

სულიკო თებიძის თქმით, „აქედან გამომდინარე, ივარაუდება, რომ მირდატ ქამადაძემ ან არ იცის კანონმდებლობა, ან როგორც მისი წინამორბედი პოლიტიკური სუბიექტები, თვითონაც მიჩვეულია კანონმდებლობის დარღვევას.“

სულიკო თებიძე ამბობს, რომ საკრებულო აღნიშნული ფაქტის შესახებ ოფიციალურად მიმართავს ადვოკატთა ასოციაციას და სხვა უფლებამოსილ პირებს. „თავად პროფესიით იურისტ მირდატ ქამადაძეს მოვუწოდებთ, რომ კარგად გაერკვეს კანონმდებლობაში, ან დარჩეს პოლიტიკური თანამდებობის პირის პოზიციაზე, ან გააგრძელოს საადვოკატო საქმიანობა. ორივე საქმიანობის ერთდროული განხორციელება არის მოქმედი კანონმდებლობის უხეში დარღვევა“, -აცხადებს ის.

სულიკო თებიძემ ამ საკითხზე დღეს, 8 თებერვალს, საკრებულოში  ბრიფინგი გამართა.

„ბათუმელები“ კომენტარისთვის მირდატ ქამადაძესაც დაუკავშირდა, რომელიც აცხადებს, რომ ერთი კვირის წინ ქუთაისის სააპელაციო სასამართლოში მართლაც იმყოფებოდა, მათი პარტიის წევრის – პაატა აციმბას სასამართლო პროცესზე და ამის შესახებ საკრებულოს თავმჯდომარეს თვითონ ესაუბრა.

მირდატ ქამადაძე: „სულიკო თებიძე არის ოროსანი, რადგან მე არ ვეწევი კერძო ანაზღაურებად საქმიანობას. მე ვიმყოფებოდი პაატა აციმბას სასამართლო პროცესზე, რომელიც არის ჩემი მეგობარი და მისი ადვოკატი ვარ 2014 წლიდან ამ კონკრეტულ საქმეზე, რაზეც სასამართლო პროცესები მოვიგეთ.

ეს საკითხი, რაზეც დღეს სულიკო თებიძემ ბრიფინგი გააკეთა, თვითონ წამოვწიე საკრებულოში, რომ შემდეგ კითხვები არ გაჩენილიყო. კანონში ცალსახა ჩანაწერი არ არსებობს. განმარტება ვთხოვე საკრებულოს იურისტსაც და პირდაპირი პასუხი არც მას ჰქონდა. იმის ნაცვლად, რომ ამაზე პასუხი გაეცათ, ბრიფინგი გამართეს“.

მირდატ ქამადაძე ამბობს, რომ ის საადვოკატო საქმიანობას არ ეწევა და საკრებულოს მხოლოდ ამ კონკრეტული ფაქტის შესახებ ესაუბრა.

სულიკო თებიძესა და მირდატ ქამადაძეს ურთიერთობა მას შემდეგ დაეძებათ, როცა  2018 წლის 18 თებერვლის სხდომაზე ერთმანეთს „კაცურ კაცობაზე“ მიუთითეს. მაშინ სულიკო თებიძემ სხდომა დატოვა.

ქობულეთის საკრებულოს წევრი „ერთიანი ნაციონალური მოძრაობიდან“ ბონდო თედორაძე ამბობს, რომ ბათუმი-ქობულეთის ცენტრალური გზის ციხისძირის მონაკვეთზე ფიჭვის ხეები გუშინ ღამით გასხლეს. ბონდო თედორაძის ინფორმაციით, გასხლულია 20 ძირი ფიჭვის ხე. „ამას აკეთებენ იმისთვის, რომ ივანიშვილს ხეების გადატანაში ხელი არ შეეშალოს,“ – აცხადებს ქობულეთის საკრებულოს წევრი.

„ხეები ღამით ჩვენ არ გაგვისხლავს. დღისით ჩავატარეთ გეგმიური სამუშაოები,“ – გვითხრა ქობულეთის გამწვანების სამსახურის ხელმძღვანელმა, ზვიად რომანაძემ.

„რატომ არის საჭირო ხეების გასხვლა ამ სიმაღლეზე?“ – მალხაზ რომანაძე განმარტავს, რომ ტოტები გადმოწეული იყო და საფრთხეს უქმნიდა მძიმეწონიანი მანქანების გადაადგილებას. „ტრაილერებს და ასე შემდეგ უქმნიდა საფრთხეს, მეტი არაფერი,“ – ამბობს ის.

ამავე თემაზე: უკან მიდევნებული ბრძანება – ივანიშვილმა ხეები ჯერ ამოთხარა, შემდეგ დაუკანონეს

ქობულეთში ხეების გასხვლა გასულ კვირას დაიწყეს და შაბათს „ნაციონალურმა მოძრაობამ“ აქციაც გამართა. გამწვანების სამსახურში ამბობენ, რომ სამუშაოები გეგმიურია და ბიძინა ივანიშვილის ხეების გადატანასთან კავშირი არ აქვს.

ხეების გადატანა ივანიშვილის ბაღისთვის 2016 წლის ბოლოს დაიწყეს. გასულ, 2017 წელს, სწორედ თებერვალში ამოთხარეს ხეები და ქობულეთიდან შეკვეთილში გადაიტანეს, ხეების გადატანას შარშანაც წინ უძღოდა ხეების გასხლვა. სამუშაოებს გამწვანების სამსახური ატარებდა.

ამავე თემაზე: აჭარაში ამოთხრილი გიგანტური ხეების ახალი პარტია შეკვეთილში [ფოტო]

„მოდით, ასე შევხედოთ ამ საკითხს. არც ერთი ფერმერი არ დარჩება ნერგის გარეშე, ვინც მოწადინებულია. ნებისმიერ ფერმერს, რომელსაც მოწესრიგებული აქვს მიწის ნაკვეთი, შეუძლია ისარგებლოს სამინისტროს პროგრამით, ისინი ეტაპობრივად მიიღებენ ნერგებს,“ – აცხადებს მამუკა თურმანიძე, აჭარის სოფლის მეურნეობის სამინისტროს აგრარული განვითარების დეპარტამენტის უფროსი.

სამინისტრო უმაღლესი საბჭოს წევრის, ელგუჯა ბაგრატიონის მიერ დღეს გაკეთებულ ბრიფინგს გამოეხმაურა. ელგუჯა ბაგრატიონის თქმით, ნერგები ქალაქში მცხოვრებ ადამიანებს მისცეს და კორუფციული სქემა ტრიალებს, რითაც პროკურატურა უნდა დაინტერესდეს. საუბარია ნერგებზე, რომლებიც სამინისტრომ გასცა 2015 და 2016 წლებში.

აჭარის სოფლის მეურნეობის სამინისტროს წარმომადგენელი გამორიცხავს კორუფციას. „ჩვენ ნერგები მივეცით ყველა იმ ფერმერს, ვისაც ჰქონდა რეგისტრირებული მიწის ნაკვეთი, ან მესაკუთრე იყო, ან ფლობდა მას. შესაბამისად ის, რომ ვიღაც ქალაქში ცხოვრობს, არ ნიშნავს იმას, რომ ის მიწის ნაკვეთს არ ფლობს და ფერმერი არ არის,“ – აღნიშნავს მამუკა თურმანიძე.

ელგუჯა ბაგრატიონმა ამ თემაზე ბრიფინგი დღეს რუსთაველის 41-ში გამართა. სამინისტრომ კაკლის ნერგები ამ მისამართზე მცხოვრებ ჯემალ ზაქარაძეს 2015 წელს გადასცა. საჯარო რეესტრის მონაცემებით, ამ მისამართზე ჯემალ ზაქარაძე არ ცხოვრობს. „ბათუმელებს“ რუსთაველის 41-ში მცხოვრებმა ადამიანებმაც უთხრეს, რომ აღნიშნული პირი კონკრეტულ კორპუსში არ ცხოვრობს.

„ჩვენს მონაცემებშიც ჩანს, რომ რუსთაველის 41-შია გადაცემული ნერგები ჯემალ ზაქარაძისთვის. არ გამოვრიცხავ იმას, რომ ადმინისტრირების დროს არის დაშვებული ტექნიკური შეცდომა,“ – გვითხრა მამუკა თურმანიძემ. ის შეხმიანებას დაგვპირდა, საკითხის გარკვევის შემთხვევაში.

დღევანდელ ბრიფინგზე ენმ-ის წევრმა განაცხადა იმის შესახებაც, რომ ბიუჯეტის ფულით შეძენილი ნერგევი საკრებულოს წევრებსაც გადაეცათ.

აჭარის სოფლის მეურნეობის სამინისტრო 2018 წელს ფერმერებისთვის ნერგების მიწოდების პროგრამისთვის 300 ათას ლარს დახარჯავს.

ბათუმში მცხოვრებ 147 აბონენტს ხვალ, 8 თებერვალს, ელექტროენერგიის მიწოდება შეეზღუდება. „ენერგო-პრო ჯორჯიას“ მონაცემებით, გეგმიური სარეაბილიტაციო სამუშაოების გამო ელექტროენერგიის მიწოდება დილის 11 საათიდან 18 საათამდე შეუწყდება გრიბოედოვის, რუსთაველის, ხიმშიაშვილის ქუჩებზე მცხოვრებ ოჯახებს.

„ენერგო-პრო ჯორჯიას“ ინფორმაციით, შუქის გარეშე დარჩება ასევე ხულოში 1100 აბონენტი, შუახევსა და ქედაში – 1000, ქობულეთში – 636, ხოლო ხელვაჩაურში 540 აბონენტი.

„ერთიანი ნაციონალური მოძრაობის“ მონაცემებით, აჭარის სოფლის მეურნეობის სამინისტროს პროგრამის ფარგლებში, ნერგები ბიუჯეტის ხარჯზე აჭარის მუნიციპალიტეტის სხვადასხვა საკრებულოს წევრებმა მიიღეს, მაგალითად, ბათუმის საკრებულოს წევრმა ირაკლი მიქელაძემ, ქობულეთის საკრებულოს წევრებმა: მანუჩარ ნიჟარაძემ და გელა გოგიტიძემ, საკრებულოს ყოფილმა წევრმა მალხაზ ლამპარაძემ, ასევე ხულოს საკრებულოს წევრმა იზოლდა სურმანიძემ.

მიღება-ჩაბარების აქტის მიხედვით, ბათუმის საკრებულოს წევრმა, ირაკლი მიქელაძემ ნერგები შეღავათიან ფასად სამინისტროსგან 2015 წლის დეკემბერში მიიღო [იგი წინა მოწვევის საკრებულოს წევრიც იყო და 2016 წლიდან საკრებულოს ახალი შემადგენლობის არჩევამდე – საკრებულოს თავმჯდომარის მოადგილე]. ოფიციალური დოკუმენტის მიხედვით, მან 35 ცალ ჩანდლერის ჯიშის კაკლის ნერგში 105 ლარი გადაიხადა. ერთი ნერგის ღირებულება მაშინ 10 ლარი იყო.

რამდენად სამართლიანია, როცა ნერგს იღებს ბიუჯეტის ხარჯზე საკრებულოს წევრი და ამ დროს ფერმერი იმავე სიკეთით ვერ სარგებლობს? – ამ კითხვის დასმა ირაკლი მიქელაძისთვის გვინდოდა, მაგრამ მან „ბათუმელების“ სატელეფონო ზარს არ უპასუხა. მოგვიანებით, საკრებულოს პრესსამსახურის უფროსი, ლელა ნემსაძე დაგვიკავშირდა და გვითხრა, რომ კომენტარს ირაკლი მიქელაძე „აჭარის ტელევიზიას“ მისცემს და შეგვიძლია იქედან გავიგოთ დეპუტატის პოზიცია ნერგების მიღებაზე.

ამ საკითხზე „ბათუმელების“ შეკითხვას უპასუხა ქობულეთის საკრებულოს წევრმა, „ქართული ოცნების“ ქობულეთის ორგანიზაციის ხელმძღვანელმა, გელა გოგიტიძემ. მან თქვა, რომ ხურმის და მოცვის ნერგების უმრავლესობა, რაც სამინისტროსგან მიიღო, გახმა.

„გასაკვირი ის იქნებოდა, რომ ამ ნერგებს ასი პროცენტით გაეხარათ. მიწის ნაკვეთზე თუ არ გავედით და პრაქტიკულად არ შევამოწმეთ, ასე ვერაფერს გეტყვით,“ – გვითხრა სოფლის მეურნეობის სამინისტროს აგრარული განვითარების დეპარტამენტის უფროსმა, მამუკა თურმანიძემ.

მისი განმარტებით, ნერგების გახარების მაჩვენებელი 2015 წელს დაბალი იყო, 2016 წლიდან კი ამ პროგრამას ორგანული სასუქებისა და სარწყავი სისტემის თანადაფინანსების ნაწილი დაემატა. „ასევე დავიწყეთ ექსტენციის პროგრამა, რომელიც ფერმერის პრაქტიკულ სწავლებას ითვალისწინებს. შესაბამისად, 2016 წლიდან ნერგების დაახლოებით 90 პროცენტი გახარებულია. ძირითადად, რასაც პრობლემა შეექმნა, იყო თხილი და ხურმა,“ – ამბობს ის.

როცა საკრებულოს წევრებმა მიიღეს ნერგები, იყვნენ თუ არა ნერგების მიმღებთა რიგში სხვა ფერმერები? – მამუკა თურმანიძის განცხადებით, ყველა ფერმერის მოთხოვნა არ დაკმაყოფილდა, მაგრამ ამის მიზეზი იყო არა ის, რომ ნერგი აღარ დარჩა საკმარისი, არამედ ის, რომ ზოგიერთ ფერმერს მიწის ნაკვეთი მზად არ ჰქონდა და სპეციალურმა კომისიამ ნერგების მიწოდება მიზანშეწონილად არ ჩათვალა.

„საკრებულოს წევრებს, ან სხვა თანამდებობის პირებს ფერმერობის სტატუსს ვერ წავართმევთ. ჩვენი პროგრამა ითვალისწინებს ნერგების მიწოდებას თანადაფინანსების პრინციპით,“ – ამბობს აჭარის სოფლის მეურნეობის სამინისტროს აგრარული განვითარების დეპარტამენტის უფროსი, მამუკა თურმანიძე.

აჭარის სოფლის მეურნეობის სამინისტრო 2018 წელს ფერმერებისთვის ნერგების მიწოდების პროგრამაზე 300 ათას ლარს დახარჯავს.

საქართველოს განათლებისა და მეცნიერების სამინისტრო ოზურგეთის მუნიციპალიტეტის ერთ-ერთ სკოლაში მასწავლებლის მიერ მოსწავლის სავარაუდო ცემის ფაქტს გამოეხმაურა.

სამინისტროს განმარტებით, სკოლაში მომხდარი ინციდენტის დეტალებს სამინისტროს შიდა აუდიტის სამსახური იძიებს და დასკვნითი დოკუმენტი ხვალ, 8 თებერვალს, გადაეცემა სკოლის დისციპლინურ საბჭოს.

„აუდიტმა უნდა დაადგინოს, ნამდვილად იყო თუ არა ცემის ფაქტი. ამის შემდეგ დისციპლინური საბჭო მიიღებს გადაწყვეტილებას,“ – გვეუბნებიან სამინისტროს პრესსამსახურში.

ოფიციალური განმარტებით, მოსწავლის ცემა მასწავლებლის სამსახურიდან დათხოვის საფუძველია, თუმცა საბოლოო გადაწყვეტილება სკოლის დისციპლინურმა საბჭომ უნდა მიიღოს.

ოზურგეთის მუნიციპალიტეტის ერთ-ერთი სოფლის საჯარო სკოლის მასწავლებელმა მეშვიდეკლასელ მოსწავლეს სცემა. ფაქტს „ბათუმელებთან“ სკოლის დირექტორი ადასტურებს.

დირექტორის თქმით, მასწავლებელმა მოსწავლეს, სავარაუდოდ, მუსიკის ოთახში ფარდის ჩამოვარდნის გამო სცემა.

„მოხდა ასეთი რამ, რომ სხვა ბავშვის დასმენით, მასწავლებელმა გალახა ბავშვი, რომელიც იყო უდანაშაულო. ეს ამბავი დადგინდა, მშობლებიც მოვიდნენ სკოლაში და ბავშვმა თქვა, რომ მას მასწავლებელმა სცემა.

ინციდენტი მუსიკის ოთახში ფარდის ჩამოგდებას მოჰყვა, სადაც ბავშვებს ღონისძიება ჰქონდათ. ბიჭი მეშვიდეკლასელია, მასწავლებელი კი დამრიგებელია, ისე მათემატიკას ასწავლის“, – გვეუბნება დირექტორი.

სკოლა მასწავლებელთან დაკავშირებით გადაწყვეტილებას სკოლის შინაგანაწესის მიხედვით მიიღებს. „შინაგანაწესით დაუშვებელია მოსწავლეზე ფიზიკური ძალადობა, მაგრამ ყველა მასწავლებელს ეს არ ესმის. მე, პირადად, რამდენჯერმე მაქვს ეს მუხლი წაკითხული, სიტყვიერადაც ვეუბნები მასწავლებლებს, რომ ბავშვებს ხელი არ დააკაროთ, დაამყარეთ შესაბამისი კომუნიკაცია, მაგრამ არ გამიგონა ქალბატონმა“, – ამბობს დირექტორი.

მასწავლებლის საკითხი სკოლის დისციპლინურ კომიტეტზეა განსახილველად გადაცემული.

დატოვებს სკოლას თუ მიიღებს საყვედურს მათემატიკის მასწავლებელი, ამის თაობაზე გადაწყვეტილება დისციპლინურმა კომიტეტმა რამდენიმე დღეში უნდა მიიღოს.

როგორც დირექტორი გვეუბნება, შინაგანაწესის მიხედვით, ფიზიკური ძალადობის შემთხვევაში მასწავლებელი სამსახურიდან უნდა გათავისუფლდეს. თუმცა, დირექტორი არ გამორიცხავს, რომ  საბჭო საყვედურით შემოიფარგლოს.

„ბათუმელების“ ინფორმაციით, მომხდარის შესახებ ინფორმირებულია საქართველოს განათლების სამინისტროც. უწყების პოზიციას მალე შემოგთავაზებთ.

მოქალაქე დავით დარასელია პეტიციით საქართველოს მთავრობას პიროტექნიკის კონტროლს სთხოვს.

„საქართველოში პიროტექნიკა არ კონტროლდება და ხელმისაწვდომია ნებისმიერი ასაკის ადამიანისთვის. ამის გამო ყოველწლიურად მატულობს უხარისხო და საშიში ჩინური პროდუქცია. ახალი წლის პერიოდში მუდმივად ფიქსირდება ათეულობით შემთხვევები, როდესაც ბავშვები (და არა მარტო) ღებულობენ სხვა და სხვა სახის მძიმე დაზიანებებს. უხარისხო პიროტექნიკის გამოყენება არ აისახება ბავშვის ფსიქიკაზე/ჯანმრთელობაზე კარგად და ასევე ხშირად ხდება მოსახლებას შორის კონფლიქტის გამომწვევი მიზეზი. დროა შემოვიტანოთ რეგულაციები ამ ბაზარზე“ – აღნიშნულია პეტიციაში, რომელსაც ამ დროისათვის ხელს 50 მოქალაქე აწერს.

იმ შემთხვევაში, თუ პეტიციას 26 თებერვლამდე 10 000 ხელმომწერი ეყოლება, პეტიციაში დაყენებულ საკითხს მთავრობა განიხილავს. პეტიციაზე ხელის მოწერა შეუძლია ყველა მსურველს, ვინც ეთანხმება პეტიციის შინაარს. ხელმოსაწერად საჭიროა დარეგისტირება ვებგვერდზე.

მიუხედავად იმისა, რომ წელს, საახალწლო პიროტექნიკით, საქართველოში 111 ადამიანი დაშავდა, მიღებული დაზიანებების გამო 45 ადამიანი გადაიყვანეს საავადმყოფოში და მათგან 21 ბავშვი იყო, საქართველოს მთავრობასა და პარლამენტში ამ დრომდე არ განიხილება საკანონმდებლო ინიციატივა, რომელიც პიროტექნიკაზე რაიმე ტიპის რეგულაციის დაწესებას ისახავს მიზნად.

დღემდე საქართველოში არც ერთი უწყება არ არის პასუხისმგებელი შემოტანილი პიროტექნიკის ხარისხზე, არ არსებობს რეგულაცია, რომელიც შეზღუდავდა პიროტექნიკის გაყიდვის ადგილს ან მყიდველთა ასაკს.  ე.წ. „მაშხალების“, „ხლაპუშკების“ და „ბომბაჩკების“ ყიდვა შეიძლება ყველგან, მათ შორის სკოლებთან და საბავშვო ბაღებთან. ფასი საკმაოდ ხელმისაწვდომია და შეძენა შეუძლიათ ბავშვებსაც.

პეტიცია ახალ პორტალზე, მოქალაქეთა ელექტრონული პეტიციების ოფიციალურ სამთავრობო პლატფორმაზე – ichange.gov.ge-ზე გამოქვეყნდა. ამ პორტალის შექმნის ვალდებულება საქართველოს მთავრობის ადმინისტრაციამ აიღო ღია მმართველობის პარტნიორობის (OGP) საქართველოს მეორე სამოქმედო გეგმის მიხედვით.

წაიკითხეთ სტატია ამ თემაზე: 111 დაშავებული და არც ერთი რეგულაცია – „რას ველოდებით?“ 

განათლების ხარისხის განვითარების ეროვნული ცენტრის ოფიციალური ინფორმაციით, 2018 წლის 6 თებერვლის მდგომარეობით, სტუდენტის სტატუსი შეჩერებული აქვს 3 700 უცხოელ სტუდენტს.

აქედან 1796 სტუდენტს სტატუსი ფინანსური დავალიანების გამო შეუჩერდა. სტატუსის შეჩერების სხვა მიზეზებში ასევე ნახსენებია „სტატუსის შეჩერება საზღვარგარეთ სასწავლებლად წასვლის გამო“ და „ავადმყოფობის გამო“.

„ბათუმელების“ კითხვაზე, სტატუსის შეჩერების მიზეზებს შორის არის თუ არა დასახელებული სტუდენტური ვიზის არქონა, ხარისხის განვითარების ეროვნული ცენტრიდან მოგვწერეს, რომ ცენტრის რეესტრში ინფორმაცია სტუდენტების ვიზებთან დაკავშირებით, არ ინახება.

ცენტრის ინფორმაციით, ამ დროისთვის საქართველოში არსებულ უმაღლეს სასწავლებლებში 1087 უცხოელი აგრძელებს სწავლას.

ბათუმის რუსთაველის უნივერსიტეტში ინგლისურენოვან პროგრამებზე 413 უცხოელი სტუდენტი სწავლობს, ქართულენოვანზე კი – 30 სტუდენტი. როგორც უნივერსიტეტში გვეუბნებიან, უცხოელი სტუდენტები სწავლის საფასურს სემესტრის დასაწყისში მთლიანად იხდიან და მათ დავალიანება არ აქვთ. ადმინისტრაციის ინფორმაციით, ამ დროისთვის ბსუ-ში არც ერთ უცხოელ სტუდენტს სტატუსი შეჩერებული არ აქვს.

საქართველოს ფინანსთა სამინისტროს საგამოძიებო სამსახურის ინფორმაციით, სამსახურის თანამშრომლებმა კუსტარულად მოწყობილ არარეგისტრირებულ საწარმოში, სხვისი სასაქონლო ნიშნით, უკანონოდ ნიშანდებული დიდი ოდენობით საქონლის დამზადება-რეალიზაციის ფაქტზე სამი პირი დააკავეს.

საგამოძიებო მოქმედებებით დადგინდა, რომ წინასწარი შეთანხმებით, ჯგუფი მოწყობილ საწარმოში, სასაქონლო ნიშნის მართლსაწინააღმდეგო გამოყენებით, უკანონოდ ამზადებდა სარეცხ საშუალებებს – „ფეირსა“ და „დომესტოსს“. პროდუქციის წარმოებისთვის დაბალი ხარისხის იაფფასიან ნედლეულს იყენებდნენ.

საგამოძიებო სამსახურის ინფორმაციით, ამოღებულია სარეცხი საშუალებების დასამზადებლად განკუთვნილი დიდი ოდენობით ქიმიური ნივთიერებები, ეტიკეტები, ბოთლები, ინვენტარი, ასევე სარეალიზაციოდ გამზადებული, სხვისი სასაქონლო ნიშნით უკანონოდ ნიშანდებული 2 000 ერთეულზე მეტი სხვადასხვა დასახელების სარეცხი საშუალება.

საქმეზე მიმდინარეობს გამოძიება საქართველოს სისხლის სამართლის კოდექსის 196-ე მუხლის მე-3 ნაწილით, რაც სასჯელის სახით ითვალისწინებს თავისუფლების აღკვეთას 3-დან 5 წლამდე ვადით.

„ბუნებრივი აირი ქალაქის ყველა უბანში ჩართულია,“ – აცხადებენ კომპანია „სოკარ გაზში“. კომპანიის პრესსამსახურის ინფორმაციით, ამ დროისთვის მოქალაქეებს კომპანიის წარმომადგენლები აფრთხილებენ.

„ჩვენი წარმომადგენლები დადიან ქალაქის ქუჩებში, ხვდებიან მოქალაქეებს, აფრთხილებენ ინდივიდუალურად და ასევე მეგაფონებით, რომ გაზი ჩართულია და ფრთხილად ჩართონ, ფრთხილად მოეკიდონ ღიად დატოვებულ გაზის ონკანებს. ნებისმიერი სირთულის შემთხვევაში შეუძლიათ დაგვირეკონ ცხელ ხაზზე: 16 114“, – გვითხრეს „სოკარ გაზის“ პრესცენტრში.

„სოკარ გაზის“ ინფორმაციით, ბუნებრივი აირის მიწოდება აღდგენილია ხელვაჩაურსა და ქობულეთშიც.

ბუნებრივი აირის მიწოდება გუშინ, 6 თებერვალს, დილის 9 საათიდან შეწყდა.

არასამთავრობო ორგანიზაცია „დემოკრატიის ინსტიტუტის“ აღმასრულებელ დირექტორს, არჩილ ხახუტაიშვილს „ბათუმელები“ საახალწლო პიროტექნიკასთან დაკავშირებული რეგულაციების საჭიროებაზე ესაუბრა. ამ არასამთავრობო ორგანიზაციამ გასულ წელს ბათუმის საკრებულოს პეტიციით მიმართა, შეეზღუდათ ქალაქის ტერიტორიაზე პიროტექნიკის გაყიდვის ადგილები, თუმცა ინიციატივამ ბათუმის საკრებულოს ყურადღება ვერ მიიქცია.  2018 წლის 2 იანვრის მონაცემებით, წელს საქართველოში 111 ადამიანი დაშავდა საახალწლო პიროტექნიკით, მათ შორის – ბავშვებიც.

ამავე თემაზე: „ათთეთრიანი „ხლაპუშკით“ დავღუპე შვილი“ – რატომ უნდა აიკრძალოს ასაფეთქებლები

არჩილ ხახუტაიშვილი, იურისტი, „დემოკრატიის ინსტიტუტის“ აღმასრულებელი დირექტორი: 

„დღეს მოქმედი კანონმდებლობით, საახალწლო შუშხუნები არ არის აკრძალული, როგორც სამოქალაქო ბრუნვის ობიექტი. არ არის დაწესებული შეზღუდვა, როგორც მის შემოტანაზე, ასევე გაყიდვის არეალზეც. არ არის შეზღუდვა ასაკთან მიმართებაშიც, ანუ არის თავისუფალი მიმოქცევის ობიექტი, როგორც პური, მარილი, ხორცი და ასე შემდეგ. მეტიც, ზემოთ ჩამოთვლილ პროდუქტს უფრო მეტი რეგულაცია ეხება, ვიდრე სადღესასწაულო პიროტექნიკას.

ჩვენ არ ვითხოვდით საახალწლო პიროტექნიკის გაყიდვის აკრძალვას, ამას მუნიციპალიტეტი ვერ აკრძალავს, არ არის მისი კომპეტენცია. საუბარი იყო გარევაჭრობის ადგილების შეზღუდვაზე, მუნიციპალიტეტის მზაობაზე, მის ნებაზე, რომ ხელი შეეწყო თუნდაც არასრულწლოვნების წვდომის შეზღუდვაზე, რომ არ შეიძლებოდეს პიროტექნიკის გაყიდვა ყველგან ისე, როგორც არ შეიძლება ყველგან გაყიდო ყველი, ხორცი და ბევრი სხვა პროდუქტი, თუ არ არის დაცული რაღაც წესები. ეს მხოლოდ ქალაქის ტერიტორიაზე გავრცელდებოდა, მაგრამ მაინც მნიშვნელოვანი იყო.

ერთი შეხედვით, აღნიშნული ასაფეთქებელი ნივთიერებები პრაქტიკაში ქმნის პრობლემას იმიტომ, რომ მოქალაქეების მიერ არ არის დაცული უსაფრთხოების ნორმები. მაშინ არც დანა უნდა იყიდებოდეს და არც რაიმე სხვა საგანი ან ნივთიერება, რომელმაც შეიძლება საფრთხე შეუქმნას ადამიანს – ესაა არგუმენტი… მაგრამ ფაქტია, რომ გვაქვს პრობლემა, ფაქტია, რომ ამას აქვს ცუდი შედეგები. კანონმდებლობა ხომ არ არის რაღაც უძრავი სისტემა?! კანონმდებლობა ადაპტირდება საზოგადობრივი პრიორიტეტების მიხედვით.

არ ვიცი, რას ველოდებით, იმას, რომ შემთხვევები გახშირდება და სიკვდილს გამოიწვევს?! საჭიროა პრევენციაზე მუშაობა მანამ, სანამ ეს მოხდება. მანამდე კი მოქალაქეს რჩება მხოლოდ ერთი რამ – საკუთარ თავზე ზრუნვა და სიფრთხილე.

ამავე თემაზე: 111 დაშავებული და არც ერთი რეგულაცია – „რას ველოდებით?“

მე მაინც იმ აზრზე ვრჩები, რომ გარევაჭრობის დონეზე მაინც უნდა შეიზღუდოს. თუ ვინმე იტყვის, რომ ასე ბიზნესი შეიზღუდება, დიახ, სჯობს შეიზღუდოს ბიზნესი, დაწესდეს რეგულაციები, ვიდრე ყოველ ახალ წელს ვისმენდეთ, რომ ვიღაცას თვალი დაუზიანდა ან ხელის ამპუტაცია დასჭირდა, მით უმეტეს, როცა საქმე ეხება ბავშვებს.“