Batumelebi

დღეს 6 აგვისტოს, მზია ამაღლობელს მოსამართლე ნინო სახელაშვილმა ორწლიანი პატიმრობა მიუსაჯა.

მოსამართლემ გადააკვალიფიცირა სისხლის სამართლის მუხლი – 353-ე პრიმა, რომლითაც მზია ამაღლობელს პროკურატურა პოლიციელზე თავდასხმაში სდებდა ბრალს და მზია ამაღლობელი სისხლის სამართლის კოდექსის 353-ე მუხლის პირველი ნაწილით გაასამართლა – პოლიციელისთვის წინააღმდეგობის გაწევა.

განაჩენის გამოცხადების შემდეგ მზია ამაღლობელის ადვოკატმა მაია მწარიაშვილმა ჟურნალისტებთან განაცხადა, რომ რეჟიმმა, მის მიერ კონტროლირებად სასამართლოშიც კი ვერ დაამტკიცა, რომ ეს იყო სისხლის სამართლის დანაშაული.

„მინდა საზოგადოებამ კარგად გაიგოს, რომ სამართლებრივად, ერთი და იმავენაირად უსამართლო და უკანონოა, 2 წელი თავისუფლების აღკვეთა იქნებოდა თუ 4 წელი თავისუფლების აღკვეთა. ამ წუთას სისტემამ იმუშავა საკუთარი თავის გადარჩენაზე.

ამ კვალიფიკაციით, მე თუ მკითხავთ, მათ საკუთარი თავი გადაარჩინეს საზოგადოებრივი ზეწოლისგან. ყველამ გაიგო ამ ქვეყანაში, ვინც სამართალი იცის – არ იცის, რაიმე გაეგება, რომ ის, რაც მზიას, ასე რომ ვთქვათ, ბრალად ჰქონდა შერაცხილი, არ არის თავდასხმა პოლიციელზე.

ამიტომ, თავისთავად ცხადია, მოუწიათ მათ ამის აღიარება, თუმცა 353-ე მუხლი სამართლებრივი აბსურდია. ნებისმიერ შემთხვევაში ეს არ არის განაჩენი, ეს არის დასჯის აქტი. განაცხადი, რომ ამ ადამიანს სჯიან სწორედ მათთან პოლიტიკური ღირებულებითი არათავსებადობის გამო, სწორედ იმისთვის, რომ მათი თამაშის წესებით არ ითამაშა.

ზუსტად ერთი საქმე მივუთითე წინა პროცესზე სასამართლოს და მინდა ყურადღება მიაქციოთ, იქ პოლიციელს პანღური ამოარტყა ერთ-ერთმა, ასე ვთქვათ ბრალდებულმა და იმ საქმეში დაზარალებული იყო რიგითი პატრულ-ინსპექტორი და არა პოლიციის უფროსი.

იმ საქმეში სასამართლომ თქვა, რომ ეს არ იყო თავდასხმა პოლიციელზე და პირობითი სასჯელი დააკისრა. ჩვენ შემთხვევაში კი დააყენა თავისუფლების აღკვეთა.

დღეს სასამართლოს შეეძლო გამოეყენებინა როგორც ჯარიმა, რომელსაც გადააკონვერტირებდა თავისუფლების აღკვეთის იმ ვადაში, რაც მზიამ მოიხადა და გაათავისუფლებდა. 7 თვე თავისუფლების აღკვეთა სილის გაწვნისთვის, რომელსაც დანაშაულთან საერთო არაფერი აქვს, საკმარისი არ არის?!

ერთი, რომ [მოსამართლეს] შეეძლო ჯარიმის გამოყენება და დარბაზიდან გათავისუფლება და შეეძლო პირობითი მსჯავრის დადგენა, რაც არ გააკეთა სასამართლომ.

სტრასბურგი სრულიად სხვა თვალსაზრისით იხილავს მზიას საქმეს. მან მიიღო და დაიწყო კომუნიცირება მზიას უკანონო პატიმრობასთან დაკავშირებით. ხელისუფლებისთვის უკვე გაგზავნილი აქვს კითხვები და ველოდებით ხელისუფლების პასუხებს მზიას უკანონო და განგრძნობად პატიმრობასთან დაკავშირებით. ასე, რომ პროცესები მიდის ყველა მიმართულებით და არაფერი არ დამთავრებულა დღეს. ეს არის ერთი ეტაპი, რომელიც ვიცოდით, რომ უნდა გაგვევლო.

ყველაფერი გრძელდება, დამიჯერეთ.

ხომ გახსოვთ, რაც უთხრა მზია ამაღლობელმა მოსამართლეს – „რა გადაწყვეტილებაც არ უნდა მიიღოთ, მე გამარჯვებულად ვთვლი თავს“. მისთვის მთავარი პრობლემა რა იყო იცით?!

დასაწყისში, როდესაც შესთავაზეს – „მოინანიე, მოინანიე“ და აი, ეს რიტორიკა, მან თქვა, მე მითხრა თვითონ, რომ მათ უნდათ ღირსება ამყარონო. მისი ღირსება ვერ დააკნინეს და ეს იყო მთავარი“ – განაცხადა მაია მწარიაშვილმა.

„ვგმობთ მზია ამაღლობელის მიმართ გამოტანილ არაპროპორციულ და პოლიტიზებულ განაჩენს“- ეს განცხადება დღეს, 6 აგვისტოს 24-მა დიპლომატიურმა წარმომადგენლობამ გააკეთა ჟურნალისტ მზია ამაღლობელის მიმართ გამოტანილ სასამართლო გადაწყვეტილებასთან დაკავშირებით.

„ჩვენ, ავსტრიის, ბელგიის, კანადის, ჩეხეთის, დანიის, ესტონეთის, ევროკავშირის, ფინეთის, საფრანგეთის, გერმანიის, ისლანდიის, ირლანდიის, იტალიის, ლატვიის, ლიეტუვის, ლუქსემბურგის, ნიდერლანდების, ნორვეგიის, პოლონეთის, რუმინეთის, ესპანეთის, შვედეთის, უკრაინისა და დიდი ბრიტანეთის დიპლომატიური წარმომადგენლობები, რომლებიც წარმოვადგენთ მედიის თავისუფლების კოალიციის წევრ ქვეყნებსა და მოკავშირე დიპლომატიურ წარმომადგენლობებს საქართველოში,  ვგმობთ მზია ამაღლობელის მიმართ გამოტანილ არაპროპორციულ და პოლიტიზირებულ განაჩენს, რომლითაც მას 2 წლით პატიმრობა მიესაჯა.

მზია ამაღლობელის საქმე დამატებით დაამძიმა მისმა გაჭიანურებულმა წინასწარმა პატიმრობამ, როდესაც მისი ჯანმრთელობის მდგომარეობა და განსაკუთრებით მისი მხედველობა მნიშვნელოვნად გაუარესდა.

მზია ამაღლობელის საქმე და „ბათუმელებსა“  და „ნეტგაზეთზე“ განხორციელებული ზეწოლა, საქართველოში ჟურნალისტების მზარდი დაშინების, დაუსჯელი ძალადობისა და სამართლებრივი დევნის მაგალითია, მედიის თავისუფლებისა და გამოხატვის თავისუფლების დაცვის კუთხით საქართველოს მიერ აღებული საერთაშორისო ვალდებულებების აშკარა დარღვევის გზით.

ჩვენ კიდევ ერთხელ ვიმეორებთ 2024 წლის 20 დეკემბერს მედიის თავისუფლების კოალიციის მიერ გავრცელებული განცხადების გზავნილს, ვგმობთ ჟურნალისტებსა და მედიის წარმომადგენლებზე  ყველანაირ ძალადობასა და მათ დაშინებას.

ჩვენ სოლიდარობას ვუცხადებთ მზია ამაღლობელს და მოვუწოდებთ მის დაუყოვნებლივ გათავისუფლებისკენ“ – ნათქვამია განცხადებაში.

დღეს, 6 აგვისტოს, ჟურნალისტსა და მედიამენეჯერს, მზია ამაღლობელს მოსამართლე ნინო სახელაშვილმა 2 წლით პატიმრობა მიუსაჯა ბათუმის პოლიციის უფროსისთვის, ირაკლი დგებუაძისთვის ბათუმის პოლიციასთან გამართულ აქციაზე სილის გაწვნის გამო.

ამავე თემაზე: 

„სასჯელის ზომა 2 წელი“ – მოსამართლემ მზია ამაღლობელის ბრალი გადააკვალიფიცირა

See more

დღეს, 6 აგვისტოს, ბათუმის საქალაქო სასამართლოს მოსამართლე, ნინო სახელაშვილმა გამოაცხადა განაჩენი ჟურნალისტისა და მედიამენეჯერის, „ბათუმელებისა“ და „ნეტგაზეთის“ დამფუძნებლის, მზია ამაღლობელის საქმეზე.

მოსამართლემ გადააკვალიფიცირა სისხლის სამართლის მუხლი – 353-ე პრიმა, რომლითაც მზია ამაღლობელს პროკურატურა პოლიციელზე თავდასხმაში სდებდა ბრალს.

„სასამართლომ დაადგინა, რომ მზია ამაღლობელის მიმართ საქართველოს სისხლის სამართლის კოდექსის 353-ე პრიმა მუხლის პირველი ნაწილით წარდგენილი ბრალდება გადაკვალიფიცირდეს საქართველოს სისხლის სამართლის კოდექსის 353-ე მუხლის პირველ ნაწილზე.

მზია ამაღლობელი ცნობილ იქნას დამნაშავედ საქართველოს სისხლის სამართლის კოდექსის 353-ე მუხლის პირველი ნაწილით გათვალისწინებული დანაშაულის ჩადენისათვის და სასჯელის სახედ და ზომად განესაზღვროს თავისუფლების აღკვეთა 2 წლის ვადით.

მზია ამაღლობელის მიმართ შეფარდებული აღკვეთის ღონისძიება პატიმრობა გაუქმდეს.

მზია ამაღლობელს სასჯელის მოხდის ვადის ათვლა დაეწყოს დაკავების დღიდან – 2025 წლის 12 იანვრიდან. განაჩენი რეაგირებისთვის გადაეგზავნოს სასჯელაღსრულების შესაბამის დაწესებულებას.

ნივთიერი მტკიცებულებად ამოღებული მობილური ტელეფონი, გასაღები და საბანკო ბარათი დაუბრუნდეს მფლობელს.

განაჩენი შეიძლება გასაჩივრდეს ქუთაისის სააპელაციო სასამართლოს სისხლის სამართლის საქმეთა პალატაში“ – თქვა ნინო სახელაშვილმა.

353 მუხლის პირველი ნაწილი – პოლიციის მუშაკის, სპეციალური პენიტენციური სამსახურის მოსამსახურის ან ხელისუფლების სხვა წარმომადგენლის მიმართ წინააღმდეგობა საზოგადოებრივი წესრიგის დაცვისთვის ხელის შეშლის, მისი საქმიანობის შეწყვეტის ან შეცვლის მიზნით, აგრეთვე აშკარად უკანონო ქმედებისთვის მისი იძულება, ჩადენილი ძალადობით ან ძალადობის მუქარით – ისჯება ჯარიმით ან შინაპატიმრობით ვადით ორ წლამდე ანდა თავისუფლების აღკვეთით ვადით ორიდან ექვს წლამდე. 

მზია ამაღლობელის საქმის განხილვა ბათუმის საქალაქო სასამართლოში დასრულდა. განაჩენის გამოცხადების შემდეგ მოქალაქეებმა მზია ამაღლობელი შეძახილებით – „თავისუფლება მზიას!“ – გააცილეს ბათუმის საქალაქო სასამართლოდან.

მზია ამაღლობელი 2025 წლის 12 იანვარს დააკავეს სისხლის სამართლის წესით. იგი 200 დღეზე მეტია წინასწარ პატიმრობაში იმყოფება. მიუხედავად იმისა, რომ მისი წინასწარ პატიმრობაში დატოვების საფუძველი არ არსებობდა, მოსამართლე ნინო სახელაშვილმა ეს არ გაითვალისწინა და მზია ამაღლობელი ყოველი შუამდგომლობის შემდეგ მაინც უკანონო პატიმრობაში დატოვა. მზია ამაღლობელს პატიმრობაში მხედველობა მკვეთრად დაუქვეითდა.

„სილა რეჟიმს“ – მზია ამაღლობელმა ეს წარწერა აჩვენა პენიტენციური მანქანის შუშიდან ბათუმის საქალაქო სასამართლოსთან შეკრებილ მოქალაქეებს.

ნახეთ ვიდეო:

დღეს, 6 აგვისტოს, 14:00 საათზე ბათუმის საქალაქო სასამართლოში მზია ამაღლობელის საქმეზე განაჩენს გამოაცხადებს მოსამართლე ნინო სახელაშვილი.

მზია ამაღლობელმა სასამართლოს დასკვნითი სიტყვით 4 აგვისტოს მიმართა. მან თქვა, რომ მისთვის მიუღებელი და შეურაცხმყოფელია პროკურატურის შეთავაზება საპროცესო გარიგების შესახებ.

მზია ამაღლობელი 2025 წლის 12 იანვარს დააკავეს სისხლის სამართლის წესით. იგი 200 დღეზე მეტია წინასწარ პატიმრობაში იმყოფება. მიუხედავად იმისა, რომ მისი წინასწარ პატიმრობაში დატოვების საფუძველი არ არსებობდა, მოსამართლე ნინო სახელაშვილმა ეს არ გაითვალისწინა და მზია ამაღლობელი ყოველი შუამდგომლობის შემდეგ მაინც უკანონო პატიმრობაში დატოვა.

მზია ამაღლობელს პატიმრობაში მხედველობა მკვეთრად დაუქვეითდა.

• რა ხდება?

პროკურატურა „ბათუმელების“ დამფუძნებელს, ჟურნალისტსა და მედიამენეჯერს, მზია ამაღლობელს 12 იანვარს, ბათუმში, პოლიციის შენობასთან მიმდინარე აქციაზე ბათუმის პოლიციის უფროსისთვის, ირაკლი დგებუაძისთვის სილის გაწვნისთვის პოლიციელზე თავდასხმაში ადანაშაულებს – სისხლის სამართლის კოდექსის 353¹-ე მუხლით, რაც 4-დან 7 წლამდე პატიმრობით ისჯება.

ავტორიტეტული უფლებადამცველების შეფასებით, სილის გაწვნა, რასაც არანაირი ზიანი არ მოჰყოლია, არათუ თავდასხმა, საერთოდ არ არის სისხლის სამართლის დანაშაული. სილის გაწვნა რომ თავდასხმა არ არის, ამას ადასტურებს უზენაესი სასამართლოს პრაქტიკაც.

მზია ამაღლობელის საქმეში არაერთი ცრუმოწმეა და ყველა მათგანი პოლიციელია.

მზია ამაღლობელის პატიმრობის განმავლობაში „ოცნების“ ლიდერები არღვევენ მზია ამაღლობელის მიმართ უდანაშაულობის პრეზუმფციას და მას აბრალებენ, თითქოს მზია ამაღლობელი „დავალებით მოქმედებდა“, მაშინ როცა მსგავს ბრალდებას მზია ამაღლობელს პროკურატურაც კი არ უყენებს.

მზია ამაღლობელის საქმის გარშემო გაერთიანდნენ პრესის თავისუფლების საკითხებზე მომუშავე წამყვანი გლობალური ორგანიზაციები.

ჟურნალისტთა დაცვის კომიტეტის [CPJ], პრესის საერთაშორისო ინსტიტუტის [IPI] და რეპორტიორები საზღვრებს გარეშეს [RSF] წარმომადგენლები 13 ივლისს რუსთავში, ქალთა კოლონიასთან მივიდნენ და ასე გამოხატეს სოლიდარობა უკანონოდ დაკავებული მზია ამაღლობელის მიმართ. ისინი ბათუმის სასამართლოში 14 ივლისს პროცესსაც დაესწრნენ.

მზია ამაღლობელის „დაუყოვნებლივი და უპირობო გათავისუფლებისა და მის წინააღმდეგ პოლიტიკურად მოტივირებული ყველა ბრალდების მოხსნის“ შესახებ, ჩანაწერი გაკეთდა ასევე ევროპარლამენტის რეზოლუციაში.

ამავე რეზოლუციით, ევროპარლამენტი „გამოხატავს ღრმა შეშფოთებას პატიმრობაში მისი [მზია ამაღლობელის] მხედველობის კრიტიკული გაუარესების გამო და მოუწოდებს სანდო სამედიცინო მომსახურების დაუყოვნებლივ ხელმისაწვდომობისკენ“.

მზია ამაღლობელის საქმის განხილვა დაიწყო ასევე სტრასბურგის ევროპულმა სასამართლომ.

ამავე თემაზე: 

„ახლა სასამართლოს დროა. ეს განაჩენი მარტო ჩემი სასჯელი არ იქნება“ – მზია ამაღლობელი

See more

მზია მეგრელიშვილი მარტოხელა დედაა.

მას 14 წლის შვილი ჰყავს და მასთან ერთად წლებია ნაქირავებ ბინაში ცხოვრობს.

ახლა მზიას რთული პერიოდი უდგას, რადგან აქვს ჯანმრთელობის მძიმე პრობლემები, ვერ მუშაობს, ვერ იხდის ქირის თანხას, ბინის მეპატრონე კი სახლის დაცლას სთხოვს.

მზია მეგრელიშვილი ცდილობს ხმა მიაწვდინოს ხან მერს, ხან აჭარის მთავრობას, თუმცა მისთვის ყველა კარი ჩაკეტილია.

„ვითხოვ სახელმწიფოსგან დახმარებას ბინის ქირის სახით. ან ისეთი საცხოვრისი მაინც მომცენ, რომ მქონდეს თავშესაფარი“, – ამბობს მზია მეგრელიშვილი „ბათუმელებთან“.

მზია თავისი მძიმე ცხოვრების დეტალებს გვიყვება.

„თითქმის 20 წელია არ მაქვს ჩემი საცხოვრებელი. რაც მეუღლეს დავშორდი, მას შემდეგ უსახლკაროდ ვარ. რაღაც პერიოდი მამაჩემის სახლში ვცხოვრობდი გურიაში. შემდეგ მცირეწლოვან შვილთან ერთად მომიწია თავშესაფარში ცხოვრება.

ახლა შვილთან ერთად ხელვაჩაურის მუნიციპალიტეტში, სოფელ სალიბაურში ვცხოვრობ, ნაქირავებ ბინაში. არც იმის შესაძლებლობა მაქვს, რომ სადმე რაიმე შევიძინო და ვერც ქირას ვეღარ ვიხდი.

ოთხი თვის დავალიანება მაქვს და ბინის მეპატრონე ბინის დაცვლას მთხოვს. ვთხოვე ცოტა დრო მოეცა. რაღაც უნდა ვიღონო, რომ გარეთ არ გამოგვყაროს“, – გვეუბნება მზია.

გარდა იმისა, რომ მზიას და მის არასრულწლოვან შვილს არ აქვთ საცხოვრებელი, ქალს აქვს ჯანმრთელობის მძიმე პრობლემები.

„მჭირდება გულზე სტენტირება. ცოტა ხნის წინ, თავში გაჟონვა მქონდა და ვიწექი საავადმყოფოში, ძალიან მძიმედ ვიყავი, მაგრამ მაინც ვერ გავჩერდი, რადგან შვილი მყავდა მარტოდ დატოვებული.

სტენტირებას ექიმი ვერ მიკეთებს, რადგან კუჭის წყლული მაქვს და ასეთ პირობებში ოპერაციას ვერ გავაკეთებთო, ექიმი მეუბნება.

ხელვაჩაურის მერიამ ქირის თანხაზე უარი მითხრა, გამოკვლევის თანხა მომცა მხოლოდ, მაგრამ ის თანხაც ავიღე და ქირაში მივეცი – მეპატრონე გარეთ გვაგდებდა. რა მექნა.

მაქვს დიაბეტიც, რის გამოც ხშირად მიწევს სასწრაფოს გამოძახება, ამიტომ ვერ ვახერხებ მუშაობას. რამდენჯერაც დავიწყე, იმდენჯერ მომიწია თავის დანებება, რადგან როცა სასწრაფოს გამოძახება მიწევს სამუშაოზე, დამსაქმებლები უკმაყოფილებას გამოხატავენ. ერთმა ისიც კი მითხრა, ჩემთან გინდა მაინც და მაინც მოკვდეო?

ამიტომ დავწერე ხელვაჩაურის მერიაში განცხადება და ვთხოვე მერს, ზაზა დიასამიძეს ქირის თანხის გადახდა, რომ არ შემიძლია ფიზიკურად მუშაობა“, – ამბობს მზია მეგრელიშვილი.

მზია ამბობს, რომ თავშესაფრიდან გამოსვლის შემდეგ, 320 ლარს, სოციალურ შემწეობას იღებდა სახელმწიფოსგან, თუმცა შემდეგ, გადამოწმებისას, ეს შემწეობა გაუუქმეს.

„დამიტოვეს მხოლოდ ბავშვის დახმარება 200 ლარი. ასეთი რა გავმდიდრდი არ ვიცი.

ერთი პერიოდი ყვავილებს ვყიდდი – მსხვილი ბიზნესები რომ შემოვიდა, ჩემი ყვავილები აღარ გაიყიდა და აღარც ფიზიკურად შემეძლო ქუჩაში დიდხანს ყოფნა. ამიტომ, ვეღარც ყვავილებს ვყიდი.

საკვებს მუნიციპალური სასადილოდან ვიღებთ. არ გვყოფნის, მაგრამ ზოგჯერ გოგოები ცოტა პურს მიმატებენ“, – გვეუბნება მზია.

მისი თქმით, შვილის მამას სასამართლომ ალიმენტის გადახდაც დააკისრა, თუმცა არ იხდის.

„100 ლარი გადაიხადა ამ ბოლოს და სულ ეს არის. აღსრულება არაფერს აკეთებს. სამუშაო აქვს, მზარეულია, მაგრამ შვილს არ ეხმარება“.

მზია ამბობს, რომ შარშან, არჩევნების წინ, ბათუმში ჩამოსულ ბიძინა ივანიშვილთან შეხვედრაც სცადა, თუმცა დაცვამ ახლოს არ გააკარა.

„მივედი და არ შემიშვეს დასალაპარაკებლად. გამოვედი და აჭარის მთავრობის შენობასთან ვიჯექი მთელი ღამე.

სოზარ სუბარმა იცის, რომ მე მარტოხელა დედა ვარ, სოციალურად დაუცველი. ჯერ კიდევ მაშინ გავეცანი, როცა სახალხო დამცველი იყო და მე თავშესაფარში ვცხოვრობდი.

მაშინ მპირდებოდა ყველაფერს. ახლა, 14 წელი გავიდა ბატონო სუბარ, თქვენმა მთავრობამ მითხრას, რა გააკეთეთ ჩემთვის. ნახეთ ჩემს ანგარიშზე რაიმე თუ დევს, ან სახლი, ან კარი ან რაიმე, ვალების მეტი არაფერი მაქვს და თქვენი ანგარიშებიც ნახეთ, რამდენი გიდევთ. რისთვის ვიდექით მაშინ ერთად, აბა მითხარით“, – ასე მიმართავს ის, „ქართული ოცნების“ სატელიტი პარტიის წევრს, ყოფილ სახალხო დამცველს, მზია მეგრელიშვილი.

მისი თქმით, თორნიკე რიჟვაძე ისე წავიდა თანამდებობიდან, ერთხელაც ვერ მოახერხა მასთან შეხვედრა. თუმცა ერთჯერადი წლიური დახმარება მიუცია მთავრობას ერთი-ორჯერ, რომელიც ქალმა ბინის ქირაში დახარჯა.

რაც შეეხება ახალ თავმჯდომარეს, სულხან თამაზაშვილს, მასაც არავინ მახვედრებს. მალავენ, ჩქმალავენ. რას მალავენ არ ვიცი. კი არ უნდა იმალებოდეს, უნდა გამოდიოდეს და ხალხს ეკითხებოდეს, ვის რა პრობლემა აქვს, მაგრამ თავიანთ ჯიბეებში უნდათ ყველაფრის ჩაწყობა და ამიტომ არ კითხულობენ.

გარეთ რომ გამოვიდეს, პრობლემას გაიგებს, რამდენი უსახლკარო ჰყავს, რამდენი ნაგავში იქექება.

გუშინწინ, რომ მოვედი და ვიკითხე, მითხრეს ბეშუმშიაო, ქეიფობდა ბიჭი. გუშინ ჭიუხში იყო და ასე… წარმოგიდგენიათ?

ხელვაჩაურის მერმა ოფიციალურად განმიცხადა, ვალდებული არ ვარ, თანხა გიხადოო.

ვეუბნებოდი, დროებით სარგებლობაში მაინც მომეცით-მეთქი, რომ მეც სული ამოვითქვა. ჩემს შვილს საჭმელი ენატრებოდეს და მე 500 ლარს ვიხდიდე ბინის ქირაში ისე, რომ სოციალურიც არ მრჩებოდეს, ასე შეიძლება?

ამ ადამიანებს არ ესმით, რამდენ ხანს გავძლებ ჩემი ჯანმრთელობით?“ – ამბობს მზია მეგრელიშვილი.

GE33TB7505845068100030 – მზია მეგრელიშვილის ანგარიშის ნომერი თი ბი სი ბანკში. დახმარების მსურველებს შეგიძლიათ თანხა ჩარიცხოთ აღნიშნულ ანგარიშზე. 

ვიდეო:

„მაქვს პატივი წარმოვადგენდე მზია ამაღლობელს ამ სასამართლო პროცესზე“ – განაცხადა 1 აგვისტოს, ბათუმის საქალაქო სასამართლოში მზია ამაღლობელის ადვოკატმა, მაია მწარიაშვილმა. დაცვის მხარის სამართლებრივი არგუმენტების გაზიარებამდე მან ჯერ სასამართლოს უამბო, ვინ არის მზია ამაღლობელი და რას უკავშირდება მისი საქმიანობა. 

„ბათუმელები“ გთავაზობთ ადვოკატ მაია მწარიაშვილის მიერ სასამართლოში წარმოთქმული სიტყვის ტრანსკრიპტს მცირე შემოკლებით. 

„მზია ამაღლობელის ცხოვრება და საქმიანობა პირდაპირ უკავშირდება მის მიერ დაარსებულ გამოცემებს: „ბათუმელებსა“ და „ნეტგაზეთს“.

ბოლო 24 წელია, იგი ყველა დღე შრომობდა იმისთვის, რომ განეხორციელებინა არაერთი პროექტი, რომელიც საქართველოში აძლიერებდა მედიას, განათლებას და მხარს უჭერდა სოციალურ თანასწორობას.

ყველაფერი დაიწყო 24 წლის წინ, როცა 2001 წელს ბათუმში ახალგაზრდა ენთუზიასტმა ჟურნალისტმა, მზია ამაღლობელმა, ამ პროცესზე მოწმედ დაკითხულ ეთერ თურაძესთან ერთად დააარსა ბეჭდური გამოცემა, გაზეთი „ბათუმელები“.

„ბათუმელები“ დამოუკიდებელ საქართველოზე ზუსტად 10 წლით უმცროსია, თუმცა ერთი დაბადების თარიღი აქვთ – 26 მაისი, რაც მე კანონზომიერი მგონია. 1991 წელს საქართველომ დამოუკიდებლობა გამოაცხადა 1918 წლის 26 მაისის დამოუკიდებლობის აქტის საფუძველზე, ათი წლის შემდეგ კი, 2001 წლის 26 მაისს გამოიცა გაზეთ „ბათუმელების“ პირველი ნომერი.

ამ გადმოსახედიდან გაზეთის პირველი ნომრის გამოცემის ეს თარიღი, მე ვფიქრობ, არ იყო შემთხვევითი დამთხვევა, ეს იყო მზიას თამამი განაცხადი, რომ „ბათუმელები“ იქნებოდა დამოუკიდებელი ქვეყნის დამოუკიდებელი გაზეთი, რომლის მთავარი მიზანი იყო თავისუფალი სიტყვის გავრცელება და დემოკრატიის ხელშეწყობა.

აჭარაში ასლან აბაშიძის მმართველობის დროს ყველა სახელმწიფო ინსტიტუტი სრულად კონტროლდებოდა მისი და მისი პარტიის, „აღორძინების კავშირის“ მიერ, ამავდროულად აჭარაში მასობრივად ირღვეოდა ადამიანის უფლებები, იდევნებოდნენ ოპოზიციური პარტიები, განსხვავებულად მოაზროვნეები და მაქსიმალურად წახალისებული იყო სეპარატიზმი.

მზიას „ბათუმელების“ რედაქციამ მუშაობა დაიწყო ერთ პატარა ოთახში, მხოლოდ ერთი კომპიუტერით და თავისუფლებისადმი მზიას მყარი რწმენით. წარმოიდგინეთ, ეს 2001 წელია, მზია ამაღლობელი მაშინ 26 წლის იყო, წელს მზია 50 წლის გახდა და სამწუხაროდ, ის 50 წლის გახდა ციხეში.

მზია წლების განმავლობაში „ბათუმელებში“ მუშაობდა როგორც ჟურნალისტი და მისთვის ყველაზე მნიშვნელოვანი საკითხი ადამიანის უფლებების გაშუქება იყო. დროთა განმავლობაში როცა „ბათუმელები“ განვითარდა და გაძლიერდა, მზიამ გადაინაცვლა მედიამენეჯერად და დირექტორად, ხოლო გაზეთში შემოიკრიბა ახალგაზრდა, პროფესიისადმი ერთგული ჟურნალისტები და მე მათ ვიცნობ უკვე.

„ბათუმელების“ შექმნის გარიჟრაჟზე, აბაშიძის რეჟიმის პირობებში, თავისუფალი მედიის არსებობა აჭარაში დიდ რისკთან, მათ შორის ფიზიკური ანგარიშსწორების რისკთანაც იყო დაკავშირებული და ცხადია, „ბათუმელები“ მალევე გახდა აჭარაში მოქმედი ხელისუფლების სამიზნე, როგორც მედია, რომელიც დაუღალავად ააშკარავებდა და აშუქებდა კორუფციის, ნეპოტიზმის და ადამიანის უფლებების დარღვევის ფაქტებს.

იყო არაერთი მუქარისა და ზეწოლის ფაქტი, ფიზიკური თავდასხმის ჩათვლით.

მაგალითად, „ბათუმელებმა“ გამოაქვეყნა სტატია, რომელიც ფარდას ხდიდა, თუ როგორ მფარველობდა და ხელს უწყობდა პროსტიტუციას ბათუმის მაშინდელი მილიცია. სწორედ ამ თემის გაშუქებას მოჰყვა ფიზიკური თავდასხმა მზიაზე. მზიამ აღნიშნა კიდეც, რომ მან იცის, რას ნიშნავს ფიზიკური თავდასხმა.

ასლან აბაშიძის ქვეყნიდან წასვლის შემდეგ გაზეთის განვითარება კიდევ უფრო სწრაფი ტემპით დაიწყო. გაიზარდა გაზეთის ტირაჟი, გვერდების რაოდენობა, უცვლელი დარჩა გამოცემის სარედაქციო პოლიტიკა – შემდეგ ხელისუფლებაშიც „ბათუმელები“ კვლავ დარჩა დამოუკიდებელ, კრიტიკულ მედია-გამოცემად.

2010 წელს მზია ამაღლობელმა თანამოაზრეებთან ერთად დააარსა ონლაინგამოცემა „ნეტგაზეთი“ თბილისში და ეს იყო ის იშვიათი შემთხვევა, როცა რეგიონულმა გამოცემამ ისე შეძლო განვითარება, რომ თბილისში დააფუძნა ახალი მედიაგამოცემა.

მე არ მინდა მზიას ჟურნალისტურ საქმიანობაზე ვისაუბრო, მინდა მის სხვა აქტივობებზე გავამახვილო სასამართლოს ყურადღება და პირველ რიგში მზია ამაღლობელის მიერ დაარსებული მედიაგამოცემების პროფესიულ შეფასებებზე.

„ბათუმელებსა“ და „ნეტგაზეთს“ და გამოცემების ჟურნალისტებს მიღებული აქვთ არაერთი ჯილდო პროფესიული საქმიანობისთვის. თავისთავად ცხადია, ყველა ამ ჯილდოში მზიას როლია ძალიან დიდია:

მხოლოდ რამდენიმეს ჩამოგითვლით:

2008 წელს „ბათუმელებმა“ მიიღო ნორვეგიის „გამოხატვის თავისუფლების ფონდისა“ და გერმანული ფონდის, „ცაიტის“ „პრესის პრიზი“;

2009 წელს „ბათუმელებს“ გადაეცა ორგანიზაციის – „რეპორტიორები საზღვრებს გარეშე“ პრიზი – „პრესის თავისუფლების ჯილდო – სიგნალი ევროპას“. აღსანიშნავია, რომ ეს პრიზი „ბათუმელებმა“ მიიღო 2008 წლის აგვისტოში, ოფიცერ როინ შავაძის სასტიკი მკვლელობის საქმის გაშუქებისთვის და „ბათუმელების“ ეს სტატიები დაერთო შავაძის საქმეს სტრასბურგის ადამიანის უფლებათა სასამართლოში.

მზია ამაღლობელი 2008 წელს ამ მძიმე ამბებზე მუშაობდა.

2015 წელს „ნეტგაზეთს“ გადაეცა ნორვეგიის „გამოხატვის თავისუფლების ფონდისა“ და გერმანული ფონდის, „ცაიტის“ პრიზი, როგორც გამოცემას, რომელიც „არ უშინდება ცენზურასა და რეპრესიებს“;

გარდა ამისა, გამოცემების ჟურნალისტებს სხვადასხვა წლებში მიღებული აქვთ საქართველოს ჟურნალისტური ეთიკის ქარტიის პრიზები სხვადასხვა ნომინაციაში, საქართველოს სახალხო დამცველის პრიზი, საქართველოს პრეზიდენტის პრიზი, საქართველოში ნიდერლანდების სამეფოს საელჩოს პრიზი – „ადამიანის უფლებათა ტიტა“ და სხვადასხვა ადგილობრივი და საერთაშორისო ორგანიზაციის მიერ დაწესებული პრიზები ჟურნალისტური მასალებისთვის.

მინდა ყურადღება მიაქციოთ – 2022 წელს რუსეთის კომუნიკაციების მარეგულირებელმა „როსკომნადზორმა“ დაბლოკა „ნეტგაზეთისა“ და „ბათუმელების“ რუსულენოვანი ვერსიები, მათ მიანიჭეს „ანტისაბჭოთა პროპაგანდის გამავრცელებელი ორგანიზაციის“ სტატუსი და აკრძალეს რუსეთში მათი გამოცემა.

ახლა მინდა გესაუბროთ მზიას საქმიანობაზე, რომელიც პირდაპირ კავშირში არ არის მედიაგამოცემებთან.

მზია ამაღლობელის მიერ განხორციელებული პროექტები წლების განმავლობაში ქმნიდა და ქმნის საზოგადოებრივ სიკეთეს, რომლის ადრესატებიც კონკრეტული ადამიანები არიან: ათეულობით, ასეულობით, ათასობით ადამიანი, რომელთა ცხოვრებაზეც პირდაპირ თუ ირიბად აისახა ის შრომა, რაც მზია ამაღლობელმა წლების განმავლობაში მოანდომა ამ პროექტების მოფიქრებას, შექმნას და განხორციელებას.

მზიას მიერ განხორციელებული პროექტები ეხმიანება სამოქალაქო საზოგადოების უმწვავეს საჭიროებებს.

მისი პროექტების ადრესატები იყვნენ და არიან ყველაზე დაუცველი და მოწყვლადი ჯგუფები ამ ქვეყანაში და აჭარის რეგიონში: მოსწავლეები, სტუდენტები, სოციალურად დაუცველები, მოხუცები, განათლების მიღების შესაძლებლობას მოკლებული პირები, ძალადობის მსხვერპლები, ეკომიგრანტები და ა.შ.

მხოლოდ რამდენიმე პროექტზე მოგიყვებით:

ჯერ კიდევ 2006 წელს მზია ამაღლობელმა დაიწყო ძალზე მნიშვნელოვანი პროექტის განხორციელება, რომელიც ეხებოდა აჭარაში და აჭარიდან საქართველოს სხვა რეგიონებში ჩასახლებული პირების ადვოკატირებას და მათი პრობლემების შესწავლას.

3 წლის განმავლობაში ამ პროექტის ფარგლებში, სპეციალური ჯგუფი იმყოფებოდა აჭარის თითქმის ყველა მეწყერსაშიშ სოფელში და, ასევე, საქართველოს ყველა იმ რეგიონში – კახეთში, სამცხე-ჯავახეთში, ქვემო ქართლში, იმერეთში – სადაც ცხოვრობდნენ აჭარიდან ჩასახლებული პირები.

პროექტის ფარგლებში შეისწავლეს ამ ადამიანების საცხოვრებელი გარემო, სიდუხჭირე, საჭიროებები, პრობლემები და ამ მასალას წლების განმავლობაში აშუქებდა „ბათუმელები“.

სწორედ ამ პროექტის ფარგლებში პირველად იქნა გამოყენებული და შემდგომში დამკვიდრდა სიტყვა ეკომიგრანტი, რომელიც დღეს ასე ფართოდ გამოიყენება.

მზია ამაღლობელის ამავე პროექტის ფარგლებში მომზადდა კანონპროექტი აჭარის უმაღლესი საბჭოსა და პარლამენტისთვის ეკომიგრანტთა პრობლემების მოსაგვარებლად. ეს პროექტი გახდა მთავარი ბიძგი იმისთვის, რომ აჭარის მთავრობამ მიიღო პროგრამა, რომელიც მიზნად ისახავდა ეკომიგრანტების დახმარებას და ამ პროგრამის მიღების შემდეგ არაერთი ოჯახის მდგომარეობა უკეთესისკენ შეიცვალა.

მზია ამაღლობელის ხელმძღვანელობით, „ბათუმელები“ და „ნეტგაზეთი“ წლების განმავლობაში უწყობდა ხელს ქვეყანაში დისკუსიებს, სხვადასხვა მოსაზრებების გაზიარებას.

ამ მიზნით, 2010-2014 წლებში მზიამ განახორციელა უნიკალური პროექტი – „პრესკაფე და სადისკუსიო სივრცე ბათუმში“, რომელიც ცნობილი გახდა არა მარტო ბათუმში, არამედ მთელს საქართველოში.

ეს იყო კაფე და ამავე დროს სადისკუსიო სივრცე, რომელიც უფასოდ სთავაზობდა სხვადასხვა ჯგუფს სივრცეს აზრთა გაზიარებისთვის. ეს იყო საზოგადოებრივი, სამოქალაქო და პოლიტიკური ჯგუფებისთვის ღია სივრცე დისკუსიებისთვის და ამ სივრცით რეგულარულად სარგებლობდნენ ის პირებიც, რომლებიც ახლა „ოცნებას“ წარმოადგენენ სხვადასხვა თანამდებობაზე აჭარაში.

მხოლოდ რიცხვებიც კი შთამბეჭდავია – ოთხი წლის განმავლობაში „პრესკაფემ“ 500-მდე დისკუსიას, ღონისძიებას, ბრიფინგსა და პრეზენტაციას უმასპინძლა, გაიმართა ათობით კინოჩვენება, გამოფენა და საქველმოქმედო აქცია.

ახლა მზიას პროექტები, რომელიც უშუალოდ განათლების ხელშეწყობას უკავშირდება.

2004 წლიდან 2022 წლამდე, მზია პარტნიორ ორგანიზაციებთან ერთად, პერიოდულად ახორციელებდა საგანმანათლებლო პროექტ „მედიასკოლას“, რომლის ფარგლებში ჟურნალისტიკა ისწავლა არაერთმა სტუდენტმა და სკოლის მოსწავლემ, ბევრი მათგანი დღეს ქართული მედიაში, სხვადასხვა ტელევიზიასა და ონლაინგამოცემაში მუშაობს და მათ ჟურნალისტიკაში პირველი ნაბიჯები სწორედ მზიას განხორციელებული პროექტით გადადგეს.

2021 წელს მზია ამაღლობელმა განახორციელა მორიგი საგანმანათლებლო პროექტი, „მოგზაური ბიბლიოთეკა“. ეს არის პროექტი აჭარის მაღალმთიანი სოფლების სასკოლო ბიბლიოთეკების დასახმარებლად, რომელიც მზიამ იაპონიის საელჩოსა და ქართული გამომცემლობების მხარდაჭერით განახორციელა.

პროექტის ფარგლებში „მოგზაურმა ბიბლიოთეკამ“ აჭარის 29 მაღალმთიან სოფელში 70 ათასი ლარის ღირებულების წიგნები მიუტანა სკოლის მოსწავლეებს, განახლდა 17 სასოფლო და 12 სასკოლო ბიბლიოთეკა, პროექტის ფარგლებში იმართებოდა თანამედროვე ქართველი მწერლების შეხვედრები და დისკუსიები ადგილობრივ ახალგაზრდებთან.

მზიას ხელშეწყობით სკოლის მოსწავლეები, რომლებიც აქამდე ცნობილ მწერლებს მხოლოდ ტელეეკრანზე ხედავდნენ, მათ საკუთარ სოფლებში ხვდებოდნენ და ლიტერატურასა და განათლებაზე ესაუბრებოდნენ.

„მოგზაური ბიბლიოთეკა“ ასევე ჩართული იყო კოვიდის წინააღმდეგ ვაქცინაციის საინფორმაციო კამპანიაში და ამ კამპანიის ფარგლებში მაღალმთიან აჭარასა და ბათუმში, ასევე, „ოცნების ქალაქის“ დასახლებაში, იმ ადგილებში, სადაც საინფორმაციო დეფიციტი და არაერთი მითი იყო კორონავირუსის შესახებ, უზრუნველყოფდა ცნობილი, ავტორიტეტული ექიმების მიყვანას და საუბრებს ვაქცინაციის მნიშვნელობის შესახებ.

2019 წლის 8 მარტს მზიამ ბათუმში გამართა კონფერენცია ქალებზე ძალადობის თემაზე, რომლის მიზანი იყო ინფორმაციის გაცვლა იმ ჯგუფებს შორის, რომლებიც, ერთი მხრივ, მუშაობენ ქალთა ძალადობის წინააღმდეგ, მეორე მხრივ კი, თავად არიან ბენეფიციარები. ამ კონფერენციის მომხსენებლებად მოწვეული იყვნენ აჭარის ავტონომიური რესპუბლიკის იმჟამინდელი პროკურორი – ნათია სონღულაშვილი და ბათუმის საქალაქო სასამართლოს თავმჯდომარე (დავით მამისეიშვილი).

მზიას კიდევ ერთი საგანმანათლებლო პროექტი – ბათუმის ისტორიულ-კულტურული მემკვიდრეობის და აჭარის ისტორიის შესწავლა, პოპულარიზაცია და ადვოკატირება.

ამ პროექტის ფარგლებში „ბათუმელები“ წლების განმავლობაში ამზადებდა სტატიებს ბათუმის და აჭარის სოფლების ისტორიის შესახებ, აგროვებდა ფოტო მასალებს და მზიას ინიციატივით „ბათუმელებმა“ პოპულარულ ენაზე დაწერილი 3 წიგნი გამოსცა აჭარის კულტურული მემკვიდრეობის თემაზე. აქედან ორი მათგანი ყველაზე პრესტიჟული ქართული ლიტერატურული პრემია „საბას“ ე.წ. მოკლე სიაში მოხვდა, ხოლო ერთმა – „უცნობი ძველი აჭარა“ – ლიტერატურული პრემია „საბა“ მიიღო, როგორც წლის საუკეთესო დოკუმენტურმა პროზამ.

უკანასკნელი 2 წლის განმავლობაში მზიამ დაიწყო პროექტი, რომელიც შეეხებოდა სტალინური რეპრესიებს საქართველოში. ამ პროექტის მიზანი, უახლესი, ტრავმული წარსულის შესწავლა და გააზრება იყო.

მზიას არაერთი პროექტი ეხება სოლიდარობის და მედიის მხარდაჭერის თემას. რუსეთის უკრაინაზე თავდასხმის შემდეგ მზია ამაღლობელი შეუერთდა კამპანიას დამოუკიდებელი უკრაინული მედიის მხარდასაჭერად და დაიწყო თანხის შეგროვება ომის პირობებში მყოფი უკრაინული მედიის დასახმარებლად.

მზია წლების განმავლობაში იყო და არის მრავალი საქველმოქმედო პროექტის ინიციატორი და მხარდამჭერი. „ბათუმელებსა“ და „ნეტგაზეთში“ გამოქვეყნებული სტატიები გახდა არაერთი საქველმოქმედო აქციის საფუძველი, რამაც არაერთი ადამიანის და ცალკეული ჯგუფის ცხოვრება შეცვალა უკეთესობისკენ.

მხოლოდ რამდენიმე მაგალითზე მოგიყვებით:

2024 წელს „ბათუმელებმა“ გამოაქვეყნა სტატია ხულოში მცხოვრები ქალის შესახებ, რომელიც სიღარიბეში, მარტო უვლიდა საქონელს და შესაბამის დახმარებას ვერ იღებდა მულიციპალიტეტისგან. სტატიის გამოქვეყნების შემდეგ „ბათუმელების“ მკითხველებმა დაიწყეს ახალგაზრდა ქალის დახმარების კამპანია და მას 97 ათასი ლარი შეუგროვეს;

2021 წელს, კორონავირუსის პანდემიის დროს „ბათუმელებმა“ გამოაქვეყნა სტატია „ოცნების ქალაქში“ მცხოვრებ ღარიბ ბავშვებზე, ძმებზე, რომელთაც დედა კოვიდით დაეღუპათ, მამა კი – ავარიით. „ბათუმელებმა“, მკითხველების დახმარებით, ბავშვებს 55 ათასზე მეტი ლარი გადაურიცხა მხარდასაჭერად;

2021 წელს „ბათუმელებმა“ გამოაქვეყნა სტატია და ვიდეო მარტვილში, ნათესავთან შეხიზნულ, უსახლკარო ახალგაზრდა კაცზე, რომელიც დედის ოპერაციის ფულის შესაგროვებლად ქუჩაში ცეკვავდა დილიდან საღამომდე. მასალას დიდი გამოხმაურება მოჰყვა და „ბათუმელების“ მკითხველებმა ახალგაზრდა კაცის დასახმარებლად 42 ათასი ლარი შეაგროვეს. ამ თანხით მან დედის ოპერაციის დაფინანსება და ბინის შეძენაც შეძლო.

ბათუმელების ოფისში მზიას ოთახი მე-4 სართულზეა, მე ეს უკვე ვიცი და როგორც მისმა კოლეგებმა, რომლებიც დღე და ღამე დაუღალავად მუშაობენ, მითხრეს, მის ოთახში შუქი გვიანობამდე არ ქრება, იმიტომ რომ მზია დაუღალავად შრომობდა ამ ქვეყნისა და მისი მოქალაქეების კეთიდღეობისთვის, სიტყვის თავისუფლებისთვის, სოციალური სამართლიანობისთის და დემოკრატიისთვის.

ვეცადე ძალიან მოკლედ მეთქვა იმ საქმიანობის შესახებ, რასაც მზია ეწევა წლების განმავლობაში.

ამ ჩუმი ადამიანის საქმეები ძალიან ხმამაღალია.

ქალბატონო მოსამართლე, ბატონო პროკურორო, შეგიძლიათ გაიცნოთ მზია ამაღლობელი და მე მაქვს პატივი, წარმოვადგენდე მზია ამაღლობელს ამ სასამართლოზე“.

მზია ამაღლობელის საერთაშორისო ადვოკატი კილან გალაჰერი აცხადებს, რომ მზია ამაღლობელი უნდა გაამართლონ და დაუყოვნებლივ და უპირობოდ გაათავისუფლონ.

მისი თქმით, მზია ამაღლობელის წინააღმდეგ მიმდინარეობს  უსამართლო სისხლის სამართლის საქმე, რომელიც წარმოიშვა ინციდენტიდან, რომელშიც ის მსხვერპლი იყო და არა დამნაშავე.

„ეს საშინელი საქმე მზიას გასაჩუმებლად და სხვების დასაშინებლად არის შექმნილი… მზიას საქმე სიმბოლურად გამოხატავს დამოუკიდებელი მედიისა და სამოქალაქო საზოგადოების შევიწროებას საქართველოში ავტორიტარული „ქართული ოცნების“ მთავრობის მიერ“, – აცხადებს კილან გალაჰერი.

როგორც კილან გალაჰერი აცხადებს, თუ მზია ამაღლობელი არ გათავისუფლდება, მიმართავენ საერთაშორისო ზომებს, რათა „ქართული ოცნების“ ხელისუფლებამ პასუხი აგოს.

„მზია უნდა გაამართლონ და დაუყოვნებლივ და უპირობოდ გაათავისუფლონ. თუ არა, ჩვენ უყოყმანოდ მივიღებთ საერთაშორისო ზომებს, რათა საქართველოს ხელისუფლებამ პასუხი აგოს მზიას უფლებების  და საქართველოში ფართო საზოგადოების უფლებების დარღვევისთვის“, – აცხადებს კილან გალაჰერი.

მზია ამაღლობელის საქმის განხილვა ბათუმის სასამართლოში უკვე დასრულდა. მოსამართლე ნინო სახელაშვილი განაჩენს 6 აგვისტოს, 14:00 საათზე გამოაცხადებს.

აშშ-ის საელჩო საქართველოში ფეისბუქის ოფიციალურ გვერდზე საქართველოს მოქალაქეებს აფრთხილებს, რომ აშშ-ის ვიზის გამოყენება შტატებში მშობიარობისთვის დაუშვებელია.

„დაუშვებელია თქვენი ვიზის გამოყენება მხოლოდ ამერიკაში მშობიარობისთვის, იმ მიზნით, რომ თქვენს შვილს აშშ-ის მოქალაქეობა მიენიჭოს.

საკონსულო ოფიცრები უარს განაცხადებენ ვიზის გაცემაზე, თუ მათ ექნებათ ეჭვის საფუძველი, რომ ეს არის თქვენი გამგზავრების მიზანი“ – წერს საელჩო.

აშშ-ის კანონმდებლობით, ამერიკაში დაბადებულ ადამიანს, ავტომატურად ენიჭება აშშ-ის მოქალაქის სტატუსი.

ბოლო წლებში „ოცნების“ არაერთი ჩინოვნიკი და თანამდებობის პირი, დასავლეთის და შტატების პოლიტიკის კრიტიკის პარალელურად, სწორედ ევროპასა და აშშ-ში აჩენდნენ შვილებს.

ამავე თემაზე: 

რატომ აჩენენ „ოცნების“ დეპუტატები და თანამდებობის პირები შვილებს ევროპასა და აშშ-ში

See more

ბათუმის აეროპორტში დღეს, 5 აგვისტოს, თურქეთის ავიახაზების თვითმფრინავი, რომელიც სტამბოლი-ბათუმის რეისს ასრულებს, აეროპორტში [დაახლოებით 09:27 სთ] პირველი მცდელობისას ვერ დაჯდა.

თვითმფრინავი [THY5ET ] ვერც მეორე მცდელობაზე [09:39 სთ] დაჯდა აეროპორტში და ზღვის თავზე მანევრირებს.

ბათუმის აეროპორტში ვერ დაჯდა ასევე თელავივი-ბათუმის თვითმფრინავიც.

ბათუმის აეროპორტის ინფორმაციით მიზეზი ნისლია. ორთავე თვითმფრინავი ამ წუთებშიც ცდილობენ დაჯდომას.

განახლება:

თელავივი-ბათუმის თვითმფრინავი მეორე მცდელობისას ბათუმის აეროპორტში დაჯდა [09:58 სთ]

სტამბოლი-ბათუმის თვითმფრინავი კი თურქეთში, სამსუნისკენ გაფრინდა და მოგვიანებით დაბრუნდება ბათუმის აეროპორტში.

სტამბოლი-ბათუმის თვითმფრინავი ბათუმის აეროპორტში მეორე მცდელობაზეც ვერ დაჯდა / 5.08.2025

 

მთავარი ფოტო: „ბათუმელების“ არქივიდან

უფლებადამცველ ამალ კლუნისა და მსახიობ ჯორჯ კლუნის ფონდი „ბათუმელებისა“ და „ნეტგაზეთის“ დამფუძნებლისა და დირექტორის, მზია ამაღლობელის სასამართლო პროცესს მონიტორინგს 2025 წლის მარტიდან უწევს.

„ბათუმელების“ ინფორმაციით, კლუნების ფონდის მონიტორინგის დოკუმენტში მზია ამაღლობელის საქმეში არსებული არაერთი გარემოება და დარღვევა მოხვდა.

მაგალითად, ჩვენი ინფორმაციით, კლუნების ფონდის მონიტორინგისთვის აღსანიშნავი ფაქტია, რომ მზია ამაღლობელის დაკავების ღამეს პოლიციელების სამხრე კამერა გამორთული იყო და დაკავების ფაქტი არ არის დაფიქსირებული.

ასევე, ყურადღებას იქცევს ის საკითხი, რომპატიმრობის შეფარდებისას, სასამართლომ მზია ამაღლობელის გირაოს საფუძველზე გათავისუფლების მოთხოვნა არაერთხელ უარყო მხოლოდ პროკურატურის მტკიცებების საფუძველზე – რაც მათ შორის ეყრდნობოდა სადაო ადმინისტრაციულ სამართალდარღვევებს, როგორც ერთადერთ არგუმენტს შესაძლო განმეორებითი დანაშაულის რისკის დასამტკიცებლად, ხოლო დაცვის მხარის მიერ წარმოდგენილი გირაოს საფუძვლები არ განხილულა.

„ბათუმელების“ ინფორმაციით, მონიტორინგისთვის მნიშვნელოვან გარემოებას წარმოადგენს ის საკითხიც, რომ ბათუმის პოლიციის უფროსმა, ირაკლი დგებუაძემ, აღიარა, რომ დაკავების შემდეგ მზია ამაღლობელი სიტყვიერად შეურაცხყო. თუმცა, სამართალდამცავებს დღემდე არ დაუწყიათ გამოძიება მისი მიმართ წამებისა და არასათანადო მოპყრობის შესახებ განცხადებაზე.

კლუნების ფონდის მონიტორინის ქსპერტების ყურადღების ეპიცენტრში ასევე მოხვდა ინფორმაცია იმის შესახებ, რომ დაცვის მხარემ დააყენა მოსამართლის აცილების მოთხოვნა, რადგან მოსამართლე ნინო სახელაშვილს არ აქვს სისხლის სამართლის საქმეების განხილვის კვალიფიკაცია, თუმცა ეს მოთხოვნა არ იქნა დაკმაყოფილებული.

ასევე, ჩვენი ინფორმაციით, კლუნების ფონდის მონიტორინგის ერთ-ერთ მნიშვნელოვან გარემოებას წარმოადგენს ის ფაქტი, რომ სასამართლომ უარი თქვა მოესმინა დაცვის თითქმის 20 მოწმისთვის, რომელთა გამოკითხვაც დაცვის მხარეს სურდა მზია ამაღლობელის დაკავების კონტექსტის განსამარტად.

ექსპერტების ყურადღებას ისიც იქცევს, რომ სასამართლო ექსპერტმა, რომელმაც ბათუმის პოლიციის უფროსს ექსპერტიზა ჩაუტარა სილის გაწვნის შემდეგ, განაცხადა, რომ ლოყაზე დატოვებული კვალი ვერ ჩაითვლება „დაზიანების ობიექტურ ნიშნად“.

კლუნების ფონდის ფოკუსში ასევე მოხვდა პროკურატურის მხრიდან მზია ამაღლობელზე ზეწოლასა და დისკრედიტაციის მცდელობაზე: კერძოდ იმაზე, რომ პროკურატურამ მზია ამაღლობელს მოუწოდა ეღიარებინა დანაშაული, რაზეც მან უარი თქვა და, ასევე, პროკურატურა ირწმუნებოდა, რომ მზია ამაღლობელის მიერ პოლიციელისთვის სილის გაწვნა იყო „შურისძიების“ აქტი, რადგან იმ საღამოს მისი ნათესავი დააკავეს, თუმცა ამის მტკიცებულება არ წარმოუდგენია.

„ბათუმელების“ ინფორმაციით, კლუნების ფონდისთვის კიდევ ერთ სერიოზულ გარემოებას წარმოადგენს ის, რომ ბოლო ექვსი თვის განმავლობაში მიმდინარე სასამართლო პროცესების განმავლობაში, მზია ამაღლობელს თითოეული სხდომისთვის თბილისიდან – სასჯელაღსრულების დაწესებულებიდან ბათუმის სასამართლოში მგზავრობა უწევდა, რაც თითო გზაზე 5-6 საათს ითვალისწინებდა და ამან სერიოზული ზიანი მიაყენა მის ემოციურ და ფიზიკურ მდგომარეობას, განსაკუთრებით იმის გათვალისწინებით, რომ დაკავების შემდეგ მზია ამაღლობელი 38 დღის განმავლობაში შიმშილობდა.

ასევე, განსაკუთრებულ ყურადღებას იქცევს ის, რომ მზიას ადვოკატის განცხადებით, მისი მხედველობა მნიშვნელოვნად გაუარესდა, როგორც ხანგრძლივი წინასწარი პატიმრობის, ასევე 2025 წლის 20 იანვარს დაწყებული 38-დღიანი შიმშილობის შედეგად.

კლუნების ფონდის-ის TrialWatch, რომელიც უზრუნველყოფს უფასო იურიდიულ დახმარებას სიტყვის თავისუფლების მხარდასაჭერად მთელ მსოფლიოში, მზია ამაღლობელის სასამართლო პროცესებს 2025 წლის მარტიდან აკვირდება.

მზია ამაღლობელის სასამართლო პროცესის დასრულების შემდეგ TrialWatch მოამზადებს ანგარიშს, რომელიც შეაფასებს საქმეს სამართლიანი სასამართლოს საერთაშორისო და რეგიონული სტანდარტების შესაბამისად.

TrialWatch არის კლუნის ფონდის ინიციატივა, რომელიც უფასო იურიდიულ დახმარებას უწევს უსამართლოდ დაპატიმრებულ ჟურნალისტებს.

რაც შეეხება ცოლ-ქმარის, ამალ და ჯორჯ კლუნების ფონდს, ის 40-ზე მეტ ქვეყანაში უფასო იურიდიულ დახმარებას უწევს სიტყვის თავისუფლებასა და ქალთა უფლებებს. ფონდის დახმარებით ათობით ჟურნალისტი გაათავისუფლეს და ათასობით ქალმა მიიღო უფასო იურიდიული მხარდაჭერა საკუთარი უფლებების დასაცავად.

4 აგვისტოს, ბათუმის საქალაქო სასამართლოში მზია ამაღლობელმა დასკვნითი სიტყვით მიმართა სასამართლოს. „ბათუმელები“ თითქმის სრულად გთავაზობთ მის მიმართვას. 

„მიხარია, რომ ისევ ვხედავ ჩვენს მეგობრებს, ოჯახს, გულშემატკივრებს, თუმცა უხერხულობის განცდაც მაქვს, რომ ისევ მოგიწიათ სასამართლო დარბაზში მოსვლა. ერთხელ მახსოვს, ვთქვი, რომ სხდომიდან სხდომამდე ისე ვითარდება პროცესები გარეთ, რომ ჩემს საქმეზე და პატიმრობაზე ვერ ვკონცენტრირდები-მეთქი. ასეა ამ შემთხვევაშიც.

4 აგვისტო მონიშნული მქონდა, როგორც თარიღი, როცა ნინო დათაშვილის – სინდისის პატიმრის, მარტოხელა დედის -აღკვეთის ღონისძიების შეცვლაზე უნდა ემსჯელა სასამართლოს.

ნინო იმ პენიტენციურ დაწესებულებაშია, სადაც მე ვარ. თუმცა ისეთ პირობებში ვართ, შემთხვევითაც კი ვერ გადავეყრებით ერთმანეთს. მას სოლიდარობის ნიშნად წიგნიც კი ვერ შევუგზავნე. თვეზე მეტია, ჩემს საკანშია მარიო ვარგას ლიოსას „ვაცის ნადიმი“, წარწერით – ნინო, გამაგრდი, მარტო არ ხარ!

მას შემდეგ, რაც გავიგე, რომ პროკურატურა ნინოს ფსიქიატრიულში გამოკეტვას უპირებს, სრულიად ჩამოვიშალე. მიჭირს გავიხსენო, მორალისგან ასეთი დაცლილი გარემო კიდევ როდის იყო. შემდეგ გამახსენდა ნინოს სიტყვები: „მე მსხვერპლი არ ვარ“ და დალაგდა ყველაფერი. აზრის სიცხადე დავიბრუნე. მჯერა, ნინო ამ გამოწვევას გაუმკლავდება და რეჟიმიც საკადრის პასუხს მიიღებს.

ისე, ბატონო პროკურორებო, ბრაზის და უსამართლობის გამო, ზოგჯერ მეც ამიწყლიანდება, მიცრემლდება თვალები, ხმაში ბზარიც მიჩნდება, ენაც მებმება ზოგჯერ და სიტყვებსაც ვერ ვპოულობ. რას ფიქრობთ, ჩემი ეს მდგომარეობა ფსიქიატრიულ ექსპერტიზას ხომ არ საჭიროებს?

ჩემს საბოლოო სიტყვაში სათქმელი ბევრი საკითხი, დათაშვილის ფაქტის გამო, უმნიშვნელო გახდა.

ძალიან მინდოდა, მესაუბრა „ნეტგაზეთის“ და „ბათუმელების“ მისიაზე, მიუკერძოებლობაზე. თან ბატონი პროკურორი მიუთითებდა პასუხისმგებლობიან ჟურნალისტიკაზე და თქვენთვის, ბატონო თორნიკე [მიმართავს პროკურორ თორნიკე გოგეშვილს], რამდენიმე მაგალითიც მქონდა, როცა აკრძალულ ადგილას გადაღებულ ფოტოს, დამალული ინფორმაციის და მავნე პრაქტიკის გასაჯაროებას საზოგადოებისთვის რა სიკეთე მოაქვს. ჩვენი ჟურნალისტური გამოძიებების მაგალითები მქონდა. ამ გამოძიებების საფუძველზე კანონში ცვლილებები შესულა და კონკრეტული მოქალაქეების სიცოცხლეც გადარჩენილა.

ძალიან მინდოდა, დღეს უფრო ვრცლად მესაუბრა სოლიდარობის მნიშვნელობაზე და რუსული კანონის მავნებლობაზე – იმ კანონის, რომელსაც რუსულს ვეძახით და მართლაც რუსულია. თუმცა დღეს ძალიან მოკლედ მხოლოდ იმ საკითხებს გაგიზიარებთ, რომელზეც აუცილებლად მხოლოდ მე უნდა ვთქვა.

საქმის სამართლებრივ ნაწილზე ადვოკატებმა ამომწურავად ისაუბრეს. ვფიქრობ, სასამართლოსაც და საზოგადოებასაც ამის დანაკლისი არ აქვს. არ უნდა ჰქონდეთ, ყოველ შემთხვევაში.

პირველი, რაზეც საბოლოო სიტყვის ფორმატში მინდა ვისაუბრო, პროკურატურის მხრიდან შემოთავაზებული საპროცესო გარიგებაა.

იქ, სადაც მეშვიდე თვეა უკანონოდ გამოკეტილი ვარ, ბევრისთვის საპროცესო გარიგება სახელმწიფოს მხრიდან გადადგმული ჰუმანური ნაბიჯია. ვერასდროს დავივიწყებ იმ პატარა გოგოს ტირილს, – „დედა მენატრება, დედასთან მინდა“, – რომლის ხმა ჩემს საკანშიც აღწევდა. როცა გავიგე, რომ ამ გოგოს მშობლები პროკურატურასთან საპროცესო გარიგებას აწარმოებდნენ, ძალიან გამიხარდა.

ჩემს შემთხვევაში ასე არ არის. პირიქითაა.

ყოველგვარი გადაჭარბების გარეშე, ცოცხლად დამარხვის ტოლფასია. შემოთავაზებაც კი ძალიან შეურაცხმყოფელი იყო ჩემთვის. ახალს ვერაფერს ვიტყვი, ადვოკატებმა ჩემი პოზიცია უკვე გაახმოვანეს, რომ არა და ვერ მოვაწერ ხელს ამ საპროცესო გარიგებას იმ მარტივი მიზეზის გამო, რომ რაც მოხდა, ის არ იყო თავდასხმა. სილის გაწვნის თავდასხმად წარმოჩენა და შეფუთვა ბოროტებაა. რა სამართალია, მე პირადად არ ვიცი.

7 თვეა, ამაზე ვფიქრობ და არ ვიცი.

ჩემი დაპატიმრების პირველი დღიდან ამ სასამართლო დარბაზში არაერთგზის მკაფიოდ დამიფიქსირებია და ახლაც გავმეორდები: პასუხისმგებლობას არ გავურბივარ, განსხვავებით, ე.წ. დაზარალებული დგებუაძისგან.

პასუხისმგებლობას არ გავურბივარ და მგონია, კანონში არსებობს ჩემი ქმედების, – სილის გაწვნის – პასუხისმგებლობისთვის ადეკვატური მუხლი.

მახსოვს, ერთხელ, სხდომაზე, ბატონმა პროკურორმა დაახლოებით ასეთი შინაარსის შეკითხვა დამისვა: ბრალდების კვალიფიკაციას თუ არ ეთანხმებით, რომელი მუხლი გერგებაო. ამას მეკითხება ბრალდება მაშინ, როცა ათამდე გამომძიებელმა ისე შეკრა და მოიტანა სასამართლოში საქმე, რომ ჩემთვის კითხვა არ დაუსვამთ, ჩემი აზრი არ აინტერესებდათ.

დარწმუნებული ვარ, თავის დროზე, გამომძიებლებს პროფესიული კითხვები რომ დაესვათ, მიუკერძოებელი გამოძიება რომ ჩაეტარებინათ, ე.წ. დაზარალებული დგებუაძის ინტერესები რომ არ გაეტარებინათ, ეს საქმე თავდასხმის კვალიფიკაციით არ შემოვიდოდა სასამართლოში. სისხლით დავიჭერო, შემპირდა და საჯაროდ მომცა ბრალდება დგებუაძემ 4-დან 7 წლამდე, პროკურატურაც მის სამსახურში ჩადგა, სამწუხაროდ.

თუმცა ამას დღეს მნიშვნელობა აღარ აქვს. ახლა სასამართლოს დრო დადგა. სასამართლომ უნდა იმსჯელოს ჩემს დანაშაულზე, თუ რა სასჯელი მერგება.

ოღონდ ერთი რამ გარდაუვალია. ეს განაჩენი მარტო ჩემი სასჯელი არ იქნება. ეს იქნება თქვენი სასჯელიც, ბატონო პროკურორებო. ეს იქნება ყველა იმ პირის პროფესიული სასჯელი, რომელიც სახელმწიფოს მხრიდან ჩართული იყო ამ საქმეში.

სამწუხაროა, რომ სასამართლომ არ დაგვიკმაყოფილა შუამდგომლობები და არ მოგვცა საშუალება, კითხვები დაგვესვა იმ პოლიტიკოსებისთვის, რომლებიც დღემდე ჩემს დისკრედიტაციას ეწევიან.

მაშინ როცა სასამართლოში საქმის წარმოება მიმდინარეობს, როგორც დამნაშავეს მომიხსენიებენ, ყალბ ინფორმაციას ავრცელებენ ჩემზე. საუბრობენ იმაზე, რომ აგენტი ვარ, გლობალური ომის პარტია მიმაგრებს ზურგს, ტრენინგებზე მასწავლეს სილის გარტყმა, დავალებით ვმოქმედებდი, ფულიც ავიღე თურმე, პოლიციელს ზურგზე ვაკრავდი სტიკერს, პოლიციის დაკნინებაზე და სისტემის ჩამოშლაზე ვმუშაობდი… ათასი სიგიჟე და ბოდვა…

ბოდიში, ამას რომ ვამბობ, მაგრამ სხვანაირ ახსნას ვერ ვუძებნი.

ქალბატონო მოსამართლევ,  არ გეგონოთ, ამას შემთხვევითი პირები ამბობენ. ისინი ძალაუფლებაში არიან და მმართველ პოლიტიკურ გუნდს წარმოადგენენ. წინა სასამართლო პროცესზე ვთქვი და ვიმეორებ, რომ განსაკუთრებით აქტიურობს „ქართული ოცნების“ პრემიერ- მინისტრი ირაკლი კობახიძე.

ამიტომაც მას მინდა მივმართო:

ბატონო ირაკლი, პოლიციის რეპუტაციის შელახვას „დიფ სთეითი“ არ სჭირდება. თავად იქცევიან ისე, რომ ანადგურებენ საზოგადოების ნდობას. პოლიციის ნდობის კრიზისი მაშინ შეიქმნა და მზარდი გახრდა, როცა მათ რიგებში არსებულ მოძალადეებს გადაეფარეთ და არ დასაჯეთ; არ გამოიძიეთ ისეთი საქმეები, როგორიცაა ჩემს კოლეგებზე, გურამ როგავაზე, მაკა ჩიხლაძეზე, შეწირულზე, ქეშელაშვილზე და ბოდიში, ყველას ვერ ვთვლი – თავდასხმის ფაქტები.

ყველას გექნებათ ეს ვიდეოები ნანახი.

რასაც უკეთებენ მაკა ჩიხლაძეს, გურამ როგავას, შეწირულს, – ეს არის თავდასხმა. მშვიდობიანი აქციის მონაწილეებს, იმ პირებს, რომელთაც თავზე გადაახიეთ კონსტიტუცია და უთხარით, თქვენი მომავალი ევროპაში არ არისო, თავ-პირი დაულეწეთ ახალგაზრდებს, დააკავეთ და სცემეთ „მარშრუტკებში“, არც ეს საქმეები გამოიძიეთ. ამიტომაც ძალიან მიჭირს და აღარაფერს ვამბობ იმ ღირსების შემლახველ მოპყრობის გამოძიებაზე, რაც ჩემ მიმართ ჩაიდინა პოლიციამ.

ქალბატონო მოსამართლევ, მე ამის კადრები არ მაქვს და ამიტომ უნდა გთხოვოთ, წარმოიდგინეთ, რასაც მოგიყვებით და აქამდეც მომიყოლია:

სრულიად მშვიდ გარემოში, მოულოდნელად ჩნდება პოლიცია, აწყობს ჭყლეტას და მაქცევს ნიღბიანების გარემოცვაში. ძლიერი ბიძგების და ზურგიდან დარტყმის შედეგად ასფალტზე ვეცემი. შემდეგ ფეხებით გადამივლიან, გადამთელავენ.

ახლა მეორე ეპიზოდი წარმოიდგინეთ – ეს სილის გარტყმის შემდგომი ეპიზოდია. ფეხშიშველი, რამდენიმე წუთის წინ დაწიხლული, თითქმის შოკურ მდგომარეობაში მყოფი, პოლიციის განყოფილებაში ვზივარ. ხმაურითა და გინებით ოთახში შემოვარდება პირი, მოიწევს ჩემკენ ფიზიკური ანგარიშსწორებისთვის. გაჰყავთ ოთახიდან. ძალიან ცუდია, რომ ვერ დავიმახსოვრე ის სახეები, ვინც ამარიდა მაშინ ამ პირისგან ფიზიკურ თავდასხმას. მადლობა ეკუთვნით მათ ჩემგან და იმიტომ.

ეს შემოვარდნები, თავზე დადგომები, გინებები ორ-სამჯერ მეორდება და ყოველი მომდევნო შემოვარდნა იმაზე უფრო შეურაცხმყოფელი და აუტანელია, ვიდრე იყო პირველი. ერთ-ერთი ასეთი ბოლო შემოვარდნის დროს, როცა ჩემთან ახლოს მოვიდა და თავი ავწიე, შემაფურთხა სახეში. შემდეგ თავის თანამშრომლებს უთხრა, რომ წყალი არ მოეწოდებინათ და არც საპირფარეშოში გავეყვანე. ვერ წარმოვიდგენდი, რომ საჯაროდ გავიმეორებდი, როგორ მეტყვიან: „ჩაიფსას, არ გაიყვანოთ“. ძალიან მინდა, ეს კადრად წარმოიდგინოთ. ეს პირი ეგრეთ წოდებული დაზარალებული ირაკლი დგებუაძე იყო.

ამის შემდეგ დამცირება, ოღონდ სხვა ფორმით, მისმა თანამშრომლებმა გააგრძელეს. ხელბორკილები დამადეს, ოღონდ ზურგს უკან შემიკრეს. მახსოვს, „ვივამედში“ როცა ვიყავი, ტელევიზიით აჩვენეს კადრი, ტერორიზმის ბრალდებით დააკავეს პირი. საჩვენებელი კადრი იყო და ხელები წინ შეუკრეს. ბრალდება უთხრეს. რომ ინატრებ, ასე დაგაკავონ… ამას იმიტომ ვამბობ, რომ წარმოიდგინოთ, ეს [ჩემი დაკავების ფორმა] ნორმა არ არის.

მათაც არ მიაჩნიათ ეს ნორმად, თორემ საჩვენებელ კადრებს რომ გამოიტანდნენ, როგორც მე მომექცნენ, ისე მოიქცეოდნენ იქაც.

მესამე კადრი. ამის წარმოდგენა არ გჭირდებათ. ეს ვიდეო გაქვთ. ის 44-წამიანი ვიდეოა და თქვენი გადასაწყვეტია, რას დაარქმევთ მას – თავდასხმას, თუ დამცირებული, შეურაცხყოფილი ადამიანის იმპულსურ რეაქციას, სილის გაწვნას.

ქალბატონო მოსამართლევ, ბრალდების შეფასებისას არ გთხოვთ გაითვალისწინოთ ის, რომ ქალი ვარ. პროკურორმა აღნიშნა ერთ-ერთი პრეცედენტის განხილვისას, ჩვენ რომ ახლა ეს მივიღოთ, სხვა დროს მამაკაცმა რომ გაარტყას ხელი და უფრო ძლიერი აღმოჩნდეს, მაშინ როგორ მოვიქცეთო.

ამიტომაც არ გთხოვთ, გაითვალისწინოთ ის, რომ ქალი ვარ შუახნის ასაკში. ნურც იმას გაითვალისწინებთ, სახარბიელო ჯანმრთელობის მდგომარეობა რომ არ მაქვს. ჩემი საქმის სამართლიანობის დასადგენად თქვენივე პიროვნების, თქვენივე პროფესიის პატივისცემა და ჩვენი მტკიცებულებების შესწავლაც კი საკმარისია თქვენი მხრიდან მხოლოდ.

და მაინც, რა გადაწყვეტილებაც არ უნდა მიიღოთ, მინდა იცოდეთ, რომ თავს გამარჯვებულად ვთვლი. ამ განწყობისთვის მადლობა მინდა ვუთხრა ჩემს ადვოკატებს და უფრო მეტს, უფლებადამცველებს.

მაშინ, როცა სახელმწიფო დამიპირისპირდა და მისი ყველა რგოლი ჩაერთო ჩემს გაშავებაში, ვისაც არ დაეზარა, ყველამ ქვა და ტალახი მესროლა, სახელისუფლებო ტროლ-ბოტები მყავს მხედველობაში – ჩემმა ადვოკატებმა შეძლეს და ფაქტებით დაუპირისპირდნენ პროპაგანდას. მათ შეძლეს, ჩემს სიმართლეზე ამ სასამართლო დარბაზში და მის მიღმაც ხმამაღლა, არგუმენტებით და მტკიცებულებებით ელაპარაკათ. მათ შეძლეს, ადამიანების მიმართ ნდობა შემენარჩუნებინა და მათთან ერთად სამართლიანობისთვის ბრძოლა გამეგრძელებინა.

დაიმახსოვრეთ მათი სახელები, დადგება დრო და ისინი ქართული მართლმსაჯულების და კანონის უზენაესობის საყრდენები გახდებიან. ჩემი განსაკუთრებული პატივისცემა მათ.

რადგან მადლიერებაზე დავიწყე საუბარი, რამდენიმე ადრესატი კიდევ მყავს.

რამდენიმე კი არა, უთვალავი ადამიანი იმსახურებს ჩემგან მადლობას. კიდევ ერთი სიცოცხლე რომ მომეცეს, ესეც არ იქნებოდა საკმარისი იმ სიკეთის დასაბრუნებლად, რომელსაც ვიღებ და ვგრძნობ 200 დღეზე მეტია.

ამ დარბაზში, ჩემგან მარცხენა მხარეს, ხშირად ვხედავ ჩვენი პარტნიორი ქვეყნების წარმომადგენლებს თუ ელჩებს, იმ საერთაშორისო ორგანიზაციების თანამშრომლებს, რომლებიც მედიის და ადამიანის უფლებებზე მუშაობენ. არ დაგიმალავთ და ძალიან მახარებს ეს ამბავი.

მათი აქ ყოფნა არასდროს აღმიქვამს ჩემს პერსონალურ მხარდაჭერად. ისინი აქ ჩვენი არჩევანის, საქართველოს ევროპული მომავლის, დემოკრატიის, თავისუფალი სიტყვის მხარდასაჭერად არიან. მათი აქ ყოფნა ნიშნავს, რომ ჩვენ მარტო არ ვართ დიქტატურისკენ მიმავალ რეჟიმთან ბრძოლაში. მადლობა საქართველოს მეგობრებს.

მადლობა ჩემს კოლეგებს, ჟურნალისტებს, კრიტიკულ მედიაში მომუშავე ყველა პირს, სამოქალაქო სექტორს და თავისუფლებისთვის მებრძოლ ყველა იმ მოქალაქეს, რომელიც წინააღმდეგობის ჯგუფს წარმოადგენს. სადაც არ უნდა იყოთ, გახსოვდეთ, რომ განუზომელი ენერგიის მატარებელია ის ხმა და ძალა, რომელიც თქვენგან მოდის. ზუსტად თქვენი სოლიდარობის შედეგია, შიმშილობის დროს ფიზიკურად რომ გადავრჩი. ამიტომაც ნუ დაკარგავთ თქვენი შესაძლებლობების რწმენას. დრო ჯერ კიდევ არის. ბრძოლა გამარჯვებამდე!

სულ მადლობების მოხდაც არაა, ბოდიშიც მაქვს მოსახდელი.

ჩემს ოჯახს, მეგობრებს, „ბათუმელების“ და „ნეტგაზეთის“ გუნდს მინდა ვუთხრა, რომ ვწუხვარ. ძალიან ვწუხვარ, რომ ყველაზე რთულ და ამავდროულად მნიშვნელოვან დროს თქვენთან არ ვარ. არ გატყდეთ! ჩემმა პატიმრობამ არ დაგასუსტოთ. მე თქვენი მჯერა. მჯერა იმის, რომ როგორი მტრული და საფრთხის შემცველი გარემოც არ უნდა გქონდეთ, თქვენი ყველა ნაბიჯი იქნება ღირსეული, აზრის, სიტყვის თავისუფლების დაცვისკენ მიმართული.

დაბოლოს, თავისუფლება ყველა პოლიტპატიმარს! ჩვენ დამნაშავეები არ ვართ“.

მზია ამაღლობელის საქმის განხილვა ბათუმის სასამართლოში ამით დასრულდა. მოსამართლე ნინო სახელაშვილი განაჩენს 6 აგვისტოს, 14:00 საათზე გამოაცხადებს.

დღეს, 4 აგვისტოს, ბათუმის საქალაქო სასამართლოში მზია ამაღლობელმა დასკვნითი სიტყვის წარმოთქმისას თქვა, რომ მისთვის პროკურატურის მიერ გაჟღერებული საპროცესო შეთანხმება მიუღებელია.

„იქ, სადაც მეშვიდე თვეა უკანონოდ გამოკეტილი ვარ, საპროცესო გარიგება, ბევრისთვის სახელმწიფოს მხრიდან გადადგმული ჰუმანური ნაბიჯია. ვერ დავივიწყებ პატარა გოგოს ტირილს, რომლის ხმა ჩემს საკანში აღწევდა… დედა მენატრებაო. როცა გავიგე, რომ მის მშობელთან საპროცესო გარიგებას აწარმოებდნენ, ძალიან გამიხარდა.

ჩემს შემთხვევაში ასე არ არის. პირიქითაა. ცოცხლად დამარხვის ტოლფასია. შემოთავაზებაც კი ძალიან შეურაცხმყოფელია. ადვოკატებმა ჩემი პოზიცია უკვე გაახმოვანეს. არა, ვერ მოვაწერ ხელს ამ საპროცესო გარიგებას. იმ მარტივი მიზეზის გამო, რომ რაც მოხდა, ის არ იყო თავდასხმა. რა სამართალია, ეს არ ვიცი.

ჩემი დაპატიმრების პირველი დღიდან ამ სასამართლო დარბაზში არაერთგზის მკაფიოდ დამიფიქსირებია, რომ პასუხისმგებლობას არ გავურბივარ, განსხვავებით, ე.წ. დაზარალებული დგებუაძისგან. კანონში არსებობს ჩემი ქმედების, სილის გაწვნისთვის ადეკვატური მუხლი“ – თქვა მზია ამაღლობელმა.

___________

ფოტო „ბათუმელების“ არქივიდან

დღეს, 4 აგვისტოს, ბათუმის საქალაქო სასამართლოში დასრულდა მზია ამაღლობელის საქმის არსებითი განხილვა.

მოსამართლე ნინო სახელაშვილი გადაწყვეტილებას 6 აგვისტოს, 14:00 საათზე გამოაცხადებს.

დღეს სასამართლოს მზია ამაღლობელმა მიმართა დასკვნითი სიტყვით.

მზია ამაღლობელი 2025 წლის 12 იანვარს დააკავეს სისხლის სამართლის წესით. იგი 200 დღეზე მეტია წინასწარ პატიმრობაში იმყოფება. მიუხედავად იმისა, რომ მისი წინასწარ პატიმრობაში დატოვების საფუძველი არ არსებობდა, მოსამართლე ნინო სახელაშვილმა ეს არ გაითვალისწინა და მზია ამაღლობელი პატიმრობაში დატოვა.

• რა ხდება?

პროკურატურა „ბათუმელების“ დამფუძნებელს, ჟურნალისტსა და მედიამენეჯერს, მზია ამაღლობელს 12 იანვარს, ბათუმში, პოლიციის შენობასთან მიმდინარე აქციაზე ბათუმის პოლიციის უფროსისთვის, ირაკლი დგებუაძისთვის სილის გაწვნისთვის პოლიციელზე თავდასხმაში ადანაშაულებს – სისხლის სამართლის კოდექსის 353¹-ე მუხლით, რაც 4-დან 7 წლამდე პატიმრობით ისჯება.

ავტორიტეტული უფლებადამცველების შეფასებით, სილის გაწვნა, რასაც არანაირი ზიანი არ მოჰყოლია, არათუ თავდასხმა, საერთოდ არ არის სისხლის სამართლის დანაშაული. სილის გაწვნა რომ თავდასხმა არ არის, ამას ადასტურებს უზენაესი სასამართლოს პრაქტიკაც.

მზია ამაღლობელის საქმეში არაერთი ცრუმოწმეა და ყველა მათგანი პოლიციელია.

მზია ამაღლობელის პატიმრობის განმავლობაში „ოცნების“ ლიდერები არღვევენ მზია ამაღლობელის მიმართ უდანაშაულობის პრეზუმფციას და მას აბრალებენ, თითქოს მზია ამაღლობელი „დავალებით მოქმედებდა“, მაშინ როცა მსგავს ბრალდებას მზია ამაღლობელს პროკურატურაც კი არ უყენებს.

მზია ამაღლობელის საქმის გარშემო გაერთიანდნენ პრესის თავისუფლების საკითხებზე მომუშავე წამყვანი გლობალური ორგანიზაციები.

ჟურნალისტთა დაცვის კომიტეტის [CPJ], პრესის საერთაშორისო ინსტიტუტის [IPI] და რეპორტიორები საზღვრებს გარეშეს [RSF] წარმომადგენლები 13 ივლისს რუსთავში, ქალთა კოლონიასთან მივიდნენ და ასე გამოხატეს სოლიდარობა უკანონოდ დაკავებული მზია ამაღლობელის მიმართ. ისინი ბათუმის სასამართლოში 14 ივლისს პროცესსაც დაესწრნენ.

მზია ამაღლობელის „დაუყოვნებლივი და უპირობო გათავისუფლებისა და მის წინააღმდეგ პოლიტიკურად მოტივირებული ყველა ბრალდების მოხსნის“ შესახებ, ჩანაწერი გაკეთდა ასევე ევროპარლამენტის რეზოლუციაში.

ამავე რეზოლუციით, ევროპარლამენტი „გამოხატავს ღრმა შეშფოთებას პატიმრობაში მისი [მზია ამაღლობელის] მხედველობის კრიტიკული გაუარესების გამო და მოუწოდებს სანდო სამედიცინო მომსახურების დაუყოვნებლივ ხელმისაწვდომობისკენ“.

მზია ამაღლობელის საქმის განხილვა დაიწყო ასევე სტრასბურგის ევროპულმა სასამართლომ.

დღეს, 4 აგვისტოს, ბათუმის საქალაქო სასამართლოში, მზია ამაღლობელის დასკვნითი სიტყვის წარმოთქმამდე მზია ამაღლობელის ადვოკატმა, მაია მწარიაშვილმა სასამართლოს მიაწოდა მზია ამაღლობელის მხედველობასთან დაკავშირებული ბოლო, უახლესი კვლევის შედეგები.

„ცნობის სახით მინდა მოგაწოდოთ.

ესაა ბოლო დღეების კვლევა მის თვალთან დაკავშირებით. აქ ნახავთ თქვენ, რომ მისი მხედველობა კიდევ უფრო გაუარესდა, ახლა მას ორივე თვალზე აქვს კერატოკონუსი. ერთ თვალში პრაქტიკულად არ არის მხედველობა და მეორე თვალში, სათვალის შემთხვევაში, მხოლოდ 30 პროცენტამდეა გაუმჯობესება შესაძლებელი“ – განაცხადა მაია მწარიაშვილმა.

მზია ამაღლობელს, რომელიც 205 დღეა უკანონო პატიმრობაშია, მხედველობა მკვეთრად დაუქვეითდა.

ჯერ კიდევ 23 ივნისს ბათუმის საქალაქო სასამართლოში გამართულ სასამართლო პროცესზე ცნობილი გახდა, რომ მზია ამაღლობელმა ერთ თვალში მხედველობა თითქმის სრულად დაკარგა, მეორე თვალში კი მას მხედველობა 10%-მდე დაუქვეითდა.

შესაბამისი კვლევები მზია ამაღლობელს საპატიმროში მოხვედრის შემდეგ, 4 და 6 თებერვალს აქვს ჩატარებული კლინიკა „ვივამედში“.

• რა ხდება?

პროკურატურა „ბათუმელების“ დამფუძნებელს, ჟურნალისტსა და მედიამენეჯერს, მზია ამაღლობელს 12 იანვარს, ბათუმში, პოლიციის შენობასთან მიმდინარე აქციაზე ბათუმის პოლიციის უფროსისთვის, ირაკლი დგებუაძისთვის სილის გაწვნისთვის პოლიციელზე თავდასხმაში ადანაშაულებს – სისხლის სამართლის კოდექსის 353¹-ე მუხლით, რაც 4-დან 7 წლამდე პატიმრობით ისჯება.

ავტორიტეტული უფლებადამცველების შეფასებით, სილის გაწვნა, რასაც არანაირი ზიანი არ მოჰყოლია, არათუ თავდასხმა, საერთოდ არ არის სისხლის სამართლის დანაშაული. სილის გაწვნა რომ თავდასხმა არ არის, ამას ადასტურებს უზენაესი სასამართლოს პრაქტიკაც.

მზია ამაღლობელის საქმეში არაერთი ცრუმოწმეა და ყველა მათგანი პოლიციელია.

მზია ამაღლობელის პატიმრობის განმავლობაში „ოცნების“ ლიდერები არღვევენ მზია ამაღლობელის მიმართ უდანაშაულობის პრეზუმფციას და მას აბრალებენ, თითქოს მზია ამაღლობელი „დავალებით მოქმედებდა“, მაშინ როცა მსგავს ბრალდებას მზია ამაღლობელს პროკურატურაც კი არ უყენებს.

მზია ამაღლობელის საქმის გარშემო გაერთიანდნენ პრესის თავისუფლების საკითხებზე მომუშავე წამყვანი გლობალური ორგანიზაციები.

ჟურნალისტთა დაცვის კომიტეტის [CPJ], პრესის საერთაშორისო ინსტიტუტის [IPI] და რეპორტიორები საზღვრებს გარეშეს [RSF] წარმომადგენლები 13 ივლისს რუსთავში, ქალთა კოლონიასთან მივიდნენ და ასე გამოხატეს სოლიდარობა უკანონოდ დაკავებული მზია ამაღლობელის მიმართ. ისინი ბათუმის სასამართლოში 14 ივლისს პროცესსაც დაესწრნენ.

მზია ამაღლობელის „დაუყოვნებლივი და უპირობო გათავისუფლებისა და მის წინააღმდეგ პოლიტიკურად მოტივირებული ყველა ბრალდების მოხსნის“ შესახებ, ჩანაწერი გაკეთდა ასევე ევროპარლამენტის რეზოლუციაში.

ამავე რეზოლუციით, ევროპარლამენტი „გამოხატავს ღრმა შეშფოთებას პატიმრობაში მისი [მზია ამაღლობელის] მხედველობის კრიტიკული გაუარესების გამო და მოუწოდებს სანდო სამედიცინო მომსახურების დაუყოვნებლივ ხელმისაწვდომობისკენ“.

მზია ამაღლობელის საქმის განხილვა დაიწყო ასევე სტრასბურგის ევროპულმა სასამართლომ.

დღეს, 4 აგვისტოს, 13 საათზე ბათუმის საქალაქო სასამართლოში დასრულდება მზია ამაღლობელის საქმის არსებითი განხილვა.

დღეს მზია ამაღლობელი სასამართლოს დასკვნითი სიტყვით მიმართავს.

ამით დასრულდება ბათუმის საქალაქო სასამართლოში მზია ამაღლობელის საქმის 7-თვიანი განხილვა და დიდი ალბათობით, დღესვე იქნება ცნობილი მოსამართლის, ნინო სახელაშვილის გადაწყვეტილებაც – განაჩენი მზია ამაღლობელის საქმეზე.

მზია ამაღლობელი 2025 წლის 12 იანვარს დააკავეს სისხლის სამართლის წესით. იგი 200 დღეზე მეტია წინასწარ პატიმრობაში იმყოფება. მიუხედავად იმისა, რომ მისი წინასწარ პატიმრობაში დატოვების საფუძველი არ არსებობდა, მოსამართლე ნინო სახელაშვილმა ეს არ გაითვალისწინა და მზია ამაღლობელი პატიმრობაში დატოვა.

• რა ხდება?

პროკურატურა „ბათუმელების“ დამფუძნებელს, ჟურნალისტსა და მედიამენეჯერს, მზია ამაღლობელს 12 იანვარს, ბათუმში, პოლიციის შენობასთან მიმდინარე აქციაზე ბათუმის პოლიციის უფროსისთვის, ირაკლი დგებუაძისთვის სილის გაწვნისთვის პოლიციელზე თავდასხმაში ადანაშაულებს – სისხლის სამართლის კოდექსის 353¹-ე მუხლით, რაც 4-დან 7 წლამდე პატიმრობით ისჯება.

ავტორიტეტული უფლებადამცველების შეფასებით, სილის გაწვნა, რასაც არანაირი ზიანი არ მოჰყოლია, არათუ თავდასხმა, საერთოდ არ არის სისხლის სამართლის დანაშაული. სილის გაწვნა რომ თავდასხმა არ არის, ამას ადასტურებს უზენაესი სასამართლოს პრაქტიკაც.

მზია ამაღლობელის საქმეში არაერთი ცრუმოწმეა და ყველა მათგანი პოლიციელია.

მზია ამაღლობელის პატიმრობის განმავლობაში „ოცნების“ ლიდერები არღვევენ მზია ამაღლობელის მიმართ უდანაშაულობის პრეზუმფციას და მას აბრალებენ, თითქოს მზია ამაღლობელი „დავალებით მოქმედებდა“, მაშინ როცა მსგავს ბრალდებას მზია ამაღლობელს პროკურატურაც კი არ უყენებს.

მზია ამაღლობელის საქმის გარშემო გაერთიანდნენ პრესის თავისუფლების საკითხებზე მომუშავე წამყვანი გლობალური ორგანიზაციები.

ჟურნალისტთა დაცვის კომიტეტის [CPJ], პრესის საერთაშორისო ინსტიტუტის [IPI] და რეპორტიორები საზღვრებს გარეშეს [RSF] წარმომადგენლები 13 ივლისს რუსთავში, ქალთა კოლონიასთან მივიდნენ და ასე გამოხატეს სოლიდარობა უკანონოდ დაკავებული მზია ამაღლობელის მიმართ. ისინი ბათუმის სასამართლოში 14 ივლისს პროცესსაც დაესწრნენ.

მზია ამაღლობელის „დაუყოვნებლივი და უპირობო გათავისუფლებისა და მის წინააღმდეგ პოლიტიკურად მოტივირებული ყველა ბრალდების მოხსნის“ შესახებ, ჩანაწერი გაკეთდა ასევე ევროპარლამენტის რეზოლუციაში.

ამავე რეზოლუციით, ევროპარლამენტი „გამოხატავს ღრმა შეშფოთებას პატიმრობაში მისი [მზია ამაღლობელის] მხედველობის კრიტიკული გაუარესების გამო და მოუწოდებს სანდო სამედიცინო მომსახურების დაუყოვნებლივ ხელმისაწვდომობისკენ“.

მზია ამაღლობელის საქმის განხილვა დაიწყო ასევე სტრასბურგის ევროპულმა სასამართლომ.