Batumelebi

რამდენიმე წუთის წინ „ნაციონალური მოძრაობის“ წევრმა ქობულეთის საკრებულოდან, ბონდო თედორაძემ, ფეისბუქის საკუთარ გვერდზე გაავრცელა  პარლამენტის წევრის, ანზორ ბოლქვაძის ავტომობილის ფოტო, რომელზეც გაკრულია ენმ-ის საარჩევნო ნომერი – 5 და „ქართული ოცნების“ ლიდერის, ბიძინა ივანიშვილის გადახაზული სტიკერები.

ბონდო თედორაძე ფოტოებს ასეთი წარწერით აქვეყნებს: „ანზორ ბოლქვაძე მიხვდა დანაშაულს და გადახაზა ბიძინა, გააკრა 5 ნომერი სტიკერი! ძალა ერთობაშია! #თორნიკერიჟვაძე #ირაკლიკობახიძე თქვენ როდის აკრავთ???“

ბონდო თედორაძე „ბათუმელებთან“ ამბობს, რომ მას ფოტო პარტიის აქტივისტებმა მიაწოდეს.

„მე არ გადამიღია ფოტო, ერთ-ერთმა ჩვენმა აქტივისტმა მომაწოდა. შეიძლება ოფიციალურ საუბრებში არ ამბობს, მაგრამ მაქვს ინფორმაცია, რომ პირად საუბრებში აცხადებს, რომ უკვე მზადაა დაბრუნებისთვის (ენმ-ში) და ბოდიშებსაც იხდის“, – გვითხრა თედორაძემ.

„ბათუმელები“ ანზორ ბოლქვაძეს დაუკავშირდა. ის ამბობს, რომ ამ ფაქტის შესახებ „ბათუმელებისგან“ შეიტყო და უკვე გამოიძახა პოლიცია. ანზორ ბოლქვაძე ამბობს, რომ აპირებს პოლიციის ჩარევით დაადგინოს, ვინ მიაწება სტიკერები ავტომობილზე: „მე გაჩერებული მყავდა ავტომობილი გამგეობის წინ [ქობულეთი] და ჩემს კოლეგასთან ვიყავი. ახლა გამოვიძახე პოლიცია და „ნაციონალების“ გამოძახებასაც ვაპირებ“, – გვეუბნება ის.

ანზორ ბოლქვაძე „ნაციონალური მოძრაობის“ დეპუტატი იყო პარლამენტში ენმ-ს მმართველობის პერიოდში. ახლა ის „ქართული ოცნების“ მაჟორიტარია. დეპუტატი ამბობს, რომ ის არ აპირებს „ქართული ოცნების“ დატოვებას:

„შეიძლება თვითონ მიაკრეს სპეციალურად. მაგათ სურვილი აქვთ, რომ წამოვიდე „ქართული ოცნებიდან“, მაგრამ ვერ დაეწევიან ეგენი მაგ სურვილს“.

გარემოს ეროვნული სააგენტოს აჭარის რეგიონალური ჰიდრომეტეოროლოგიური ობსერვატორიის ინფორმაციით, 12-13 სექტემბერს ბათუმში და აჭარის სანაპიროზე მოსალოდნელია ცვალებადი მოღრუბლულობა, დღისით – უმეტესად უნალექოდ, ღამით მოსალოდნელია ხანმოკლე წვიმა.

იქროლებს ცვალებადი მიმართულების ქარი 10-15 მეტრი წამში.

სინოპტიკოსების ცნობით, მომდევნო ორ დღეს ზოგან მოსალოდნელია ხანმოკლე წვიმა.

ჰაერის ტემპერატურა სანაპირო რაიონებში იქნება:

• დღისით: 24  – 29  გრადუსი  
• ღამით: 17 – 22 გრადუსი 

მთაში მოსალოდნელია:

• დღისით: 20 – 25  გრადუსი 
• ღამით: 9 – 14 გრადუსი 

ზღვის წყლის ტემპერატურა 26 გრადუსია, ტალღის სიმაღლე:  7-12 დმ (2-3 ბალი).

„პროკურატურა კონკრეტულ დანაშაულებზე გამოძიებას არ იწყებს. აჭარის მთავარი პროკურორი მაღალჩინოსნებს ხელს აფარებს,“ – აცხადებს რეზო ხარაზი, „ერთიანი ნაციონალური მოძრაობის“ წევრი. მან დღეს ბრიფინგი გამართა და პროკურატურას კონკრეტულ საქმეებზე გამოძიების დაწყების შესახებ ინფორმაციის მიწოდება მოსთხოვა.

რეზო ხარაზის თქმით, ბოლო პერიოდში „ნაციონალურმა მოძრაობამ“ პროკურატურას სხვადასხვა საქმის შესახებ დოკუმენტები მიაწოდა, რადგან იკვეთებოდა სისხლის სამართლის დანაშაულის ნიშნები.

„ეს ეხებოდა, მაგალითად, ქობულეთში სტადიონის მშენებლობას; მაგისტრალზე, გვირაბთან გზის მშენებლობის შეჩერებას; სასაფლაოების მოწყობის პროექტს, ანგისის სტადიონს, რომელიც გახსნიდან ერთ კვირაში დაიხურა… არც ერთ საქმეზე პროკურატურას ინფორმაცია არ მოუწოდებია, დაიწყო თუ არა გამოძიება.

პროკურატურის ერთ-ერთმა მაღალჩინოსანმა გუშინ პირად საუბარში გვითხრა, რომ არც ერთ საქმეზე, რაც ჩამოგითვალეთ, გამოძიება არ დაიწყება,“ – ამბობს რეზო ხარაზი.

პროკურატურას ამ თემაზე კომენტარი ამ დრომდე არ გაუკეთებია.

აჭარის ჯანდაცვის სამინისტროს ცნობით, 2019 წლიდან სამინისტრო ონკოჰემატოლოგიური დაავადების მქონე პაციენტებს, ძვლის ტვინის ტრანსპლანტაციის საჭიროების შემთხვევაში, ქვეპროგრამის ფარგლებში პირველად დაუფინანსებს ძვლის ტვინის აუტოლოგიურ ტრანსპლანტაციას – 80 000 ლარით და ძვლის ტვინის ალოგენურ ტრანსპლანტაციას -150 000 ლარით.

ასევე, სამინისტროს ცნობით, ღვიძლის ტრანსპლანტაციის საჭიროების შემთხვევაში გაიზრდება პაციენტების დაფინანსება და ნაცვლად 50 000 ლარისა, გახდება 65 000 ლარი.

სამინისტროს ცნობით, ეს გადაწყვეტილება მოსახლეობის მომართვიანობისა და მოთხოვნების გათვალისწინებით იქნა მიღებული. ქვეპროგრამის -„მოსახლეობისათვის ინდივიდუალური სამედიცინო დახმარება“ – ფარგლებში ღვიძლის ან ძვლის ტვინის ტრანსპლანტაცია ჯამში 10 პაციენტს დაუფინანსდება.

გეგმის თანახმად, 2019 წელს სამინისტროს ნაერთი ბიუჯეტი მიმდინარე წლის ბიუჯეტთან შედარებით გაიზრდება – 1 282 515 ლარით და იქნება 18 531 135 ლარი.

აჭარის ჯანდაცვის სამინისტრო 2019 წელს, საქვეუწყებო დაწესებულებებთან ერთად, ჯამში 32 პროგრამას განახორციელებს.

დღეს, 12 სექტემბერს, სამინისტროში 2019 წლის პროგრამების პროექტების საჯარო განხილვის მეორე ეტაპი გაიმართა.

ამავე თემაზე: 

დღეს, 12 სექტემბერს, სამინისტროში 2019 წლის პროგრამების პროექტების საჯარო განხილვის მეორე ეტაპი გაიმართა. სამინისტრო საქვეუწყებო დაწესებულებებთან ერთად 32 პროგრამას განახორციელებს.

აჭარის ჯანდაცვის სამინისტროს ცნობით, მოსახლეობის მომართვიანობისა და მოთხოვნების გათვალისწინებით,  2019 წლისათვის ჯანმრთელობისა და სოციალური დაცვის პროგრამებში ცვლილებები იგეგმება.

• სამინისტრო ონკოჰემატოლოგიური დაავადების მქონე პაციენტებს ძვლის ტვინის ტრანსპლანტაციის საჭიროების შემთხვევაში ქვეპროგრამის ფარგლებში პირველად დაუფინანსებს ძვლის ტვინის აუტოლოგიურ ტრანსპლანტაცის – 80 000 ლარით და ძვლის ტვინის ალოგენურ ტრანსპლანტაციას -150 000 ლარით.
• „მოსახლეობისათვის ინდივიდუალური სამედიცინო დახმარების“ პროგრამით განხორციელდება ძვლის ტვინისა და ღვიძლის ტრანსპლანტაციის ძვირადღირებული სამედიცინო მომსახურების ხარჯების დაფინანსება (სულ 10 პაციენტისთვის) ღვიძლის ტრანსპლანტაციის საჭიროების შემთხვევაში გაიზრდება პაციენტების დაფინანსება და ნაცვლად 50 000 ლარისა, გახდება 65 000 ლარი.
• გაფანტული სკლეროზით დაავადებულ პაციენტებს დადასტურებული დიაგნოზით დაუფინანსდებათ გაფანტული სკლეროზის მკურნალობისათვის საჭირო მაღალეფექტური მედიკამენტების მკურნალობის კურსის ღირებულება (წლის განმავლობაში არაუმეტეს 10 პაციენტი). თითოეულ პაციენტზე წლიური ლიმიტი შეადგენს 25 000 ლარს. შესაბამისად, გაიზრდება ქვეპროგრამის ბიუჯეტი 500 000 ლარით და გახდება 1 800 000 ლარი.
• ,,მოსახლეობის საზღვარგარეთ მკურნალობის თანადაფინანსების ქვეპროგრამით” გაიზრდება ბენეფიციარების დაფინანსების ზღვრული ტარიფი (დაფინანსების არსებული პროპორციების დაცვით) და ნაცვლად 15 000 ლარისა გახდება 25 000 ლარი. შესაბამისად გაიზრდება ქვეპროგრამის ბიუჯეტი 200 000 ლარით და გახდება 700 000 ლარი.
• „ზოგიერთი სოციალური კატეგორიის მოსახლეობის სამედიცინო მომსახურების თანადაფინანსების“ ქვეპროგრამით განხორციელდება ძვირადღირებული (რომელთა ღირებულება სახელმწიფო პროგრამით დამტკიცებული ტარიფით აღემატება წლიურ ლიმიტს -15 000 ლარს) ქირურგიული ოპერაციული მკურნალობის (როგორც გეგმიური ასევე ურგენტული) თანაგადახდა სრულად სახელმწიფო პროგრამით დამტკიცებული ტარიფის ფარგლებში. გაიზრდება ქვეპროგრამის ბიუჯეტი 150 000 ლარით და გახდება 400 000 ლარი.
• “ავთვისებიანი სიმსივნით დაავადებულ პაციენტთა სამედიცინო მომსახურების“ ქვეპროგრამაში მოიმატებს ტარგეტული, იმუნოთერაპიული და ბისფოსფონატების ჯგუფის მედიკამენტების დაფინანსების წლიური ლიმიტი (5000 ლარით) და გახდება 15 000 ლარი.
• ძუძუს კიბოთი დაავადებულ პაციენტებს საჭიროებიდან გამომდინარე ჰორმონდამოკიდებული HER-2 – მეტასტაზური ძუძუს კიბოს დიაგნოზის შემთხვევაში სრულად დაუფინანსდებათ მედიკამენტ ევეროლიმუსის (აფინიტორი) მკურნალობის კურსის ღირებულება (ერთ პაციენტზე 8 ციკლი). წლის განმავლობაში არაუმეტეს 10 პაციენტი. გაიზრდება ქვეპროგრამის ბიუჯეტი გახდება 2 000 000 ლარი.
• სოციალური დაცვის მიმართულებით დაგეგმილია 2 ახალი პროგრამის ამოქმედება, კერძოდ, „მენჯ-ბარძაყის სახსრის დისპლაზიისა და თანდაყოლილი ამოვარდნილობის მქონე ბავშვთა რეაბილიტაცია“ და „სმენაპროტეზირებულ ბავშვთა რეაბილიტაცია“.
• ფართოვდება მარტოხელა დედათა და ბავშვთა თავშესაფრით უზრუნველყოფის პროგრამა, მომავალი წლიდან პროგრამას ბენეფიციარებად დაემატებიან სხვადასხვა პრობლემის მქონე დედები.

სამინისტროს ცნობით, ასევე, გაიზრდება სოციალური დაცვის თითქმის ყველა პროგრამის ბიუჯეტი და ბენეფიციართა რაოდენობა.

გეგმის თანახმად, 2019 წელს სამინისტროს ნაერთი ბიუჯეტი მიმდინარე წლის ბიუჯეტთან შედარებით გაიზრდება 1 282 515 ლარით და იქნება 18 531 135 ლარი.

იშვიათად თუ შეხვდებით ყოფილ პატიმარს, ვინც ცხოვრების ნახევარზე მეტი საპატიმროში გაატარა და მოახერხა ეს მისთვის დაღად არ ქცეულიყო.

ასეთი იშვიათი რესპონდენტია ბორის მაისურაძე. 17 წლის იყო, როცა ციხეში მოხვდა, ახლა 37 წლისაა – 15 წელი გაატარა საპატიმროში. ამბობს, რომ მთელი ამ დროის განმავლობაში ციხის გარემო საკუთარი განვითარებისთვის გამოიყენა:

„კარგია, როცა ცხოვრება დალაგებულად მიდის და ბავშვი სასწავლებელში სწავლობს იმას, რაც სურს, მაგრამ ცოდნის მიღება ყველგან შეიძლება, ციხეშიც კი. იქ უამრავი მეზღვაური, პროფესორი, გამომგონებელი, დიდი ხნის სამხედრო პირი შემხვედრია, მათთან ურთიერთობით ბევრი ვისწავლე,“ – ამბობს ბორის მაისურაძე.

ბიბლიოთეკა, ადამიანებთან ურთიერთობა, ვარჯიში – ეს ყველაფერი განვითარების საშუალებები იყო ბორისისთვის საპატიმროში. საპატიმროს მძიმე წლები ამ ყველაფრის საშუალებით დაძლია.

ნანობს, რომ ინგლისური არ ისწავლა: „ორი სიტყვა ვიცი ინგლისურად მხოლოდ: დონალდ ტრამპი და მაკდონალდსი“, – ხუმრობს ბორისი, – „ბევრ უცხოელთან მიწევს ურთიერთობა და ხელ-ფეხით ვსაუბრობ მათთან“.

ბორისის ძალისხმევამ და ციხეში წაკითხულმა კინოლოგიურმა ლიტერატურამ უშედეგოდ არ ჩაიარა და ციხიდან გათავისუფლების შემდეგ ყოფილი პატიმარი რამდენიმე წელიწადში იქცა კინოლოგად. ცხოველები ბავშვობიდან უყვარდა. გათავისუფლების შემდეგ ბათუმის ცხოველთა თავშესაფრის ხშირი სტუმარი იყო, მოხალისედ მუშაობდა, მერე თანდათან ძაღლების გაწვრთნა და მოვლაც ისწავლა – ასეთი იყო მისი გზა საპატიმროდან ინსტრუქტორ – კინოლოგობამდე.

ჰყოლია პიტბული, პუდელი და გერმანული ნაგაზი, ახლა მხოლოდ კატა ჰყავს, მაგრამ სხვების ძაღლებს უვლის და წვრთნის.

„მათთან ერთად ვცურავ ზღვაში, ვყვინთავ და კლდიდან ვხტები, ყველაზე მშვიდად და კარგად თავს ცხოველებთან  ვგრძნობ. 35 წლისამ დავიწყე ამ საქმის სწავლა და უკვე მაქვს წარმატებები. მაქვს ფუფუნება ჩემი საქმით საკუთარი თავისთვის აიფონიც ვიყიდო, ძვირიანი ველოსიპედიც, ჩავიცვა, დავიხურო, ბოტასები ვიცვალო სეზონის მიხედვით. მივაღწიე ყველაფერს, იმიტომ, რომ მოვინდომე. რასაც მოინდომებ, მიაღწევ,“ – ამბობს ბორისი.

ბორისი „დემოკრატიის ინსტიტუტის“ ყოფილი პატიმრების გაძლიერების პროექტში ჩართვას აპირებს, რისი საშუალებითაც ის კინოლოგისთვის საჭირო ინვენტარს შეიძენს.

„ყოფილი პატიმრების, პატიმართა ოჯახებისა და პრობაციონერების მხარდაჭერის“ პროგრამას „დემოკრატიის ინსტიტუტი“ პარტნიორ ორგანიზაციებთან: „თანაზიართან“, „აფხაზინტერკონტთან“ და „გურიის ახალგაზრდულ რესურსცენტრთან“ ერთად ახორციელებს. პროგრამა მოქმედებს დასავლეთ საქართველოს ოთხ რეგიონში: აჭარაში, გურიაში, იმერეთსა და სამეგრელო – ზემო სვანეთში.

მასალა მომზადებულია პროექტის – „ყოფილი პატიმრების, პატიმართა ოჯახებისა და პრობაციონერების მხარდაჭერის პროგრამა“  ფარგლებში.
პროექტს ახორციელებს ა(ა)იპ „დემოკრატიის ინსტიტუტი“ და დაფინანსებულია ევროკავშირის მიერ.
მასალაში გამოთქმული მოსაზრებები ავტორისეულია და შესაძლოა არ გამოხატავდეს დონორი ორგანიზაციის თვალსაზრისს.

ესტონეთი ქართველ IT სპეციალისტებს დასაქმების შანსს აძლევს. პროფესიონალებს, რომლებიც დაინტერესებულნი არიან ევროკავშირის წევრ ქვეყანაში ცხოვრებით და კარიერის გაგრძელებით, საშუალება ექნებათ საინფორმაციო ვიზიტით  ესტონეთს ეწვიონ.

დასაქმების პროგრამა –  Career Hunt  საინფორმაციო ტექნოლოგიების სფეროში წამყვან კომპანიებთან ერთად ხორციელდება და მიზნად IT სპეციალისტების მოძიებას ისახავს, რომლებსაც შემდგომ  შანსი ექნებათ ისეთ საერთაშორისო ცნობილ კომპანიებში დასაქმდნენ, როგორებიცაა: Taxify, Twilio, Microsoft-ი, Veriff-ი და Swedbank-ი.

იმისთვის, რომ პროგრამაში მიიღოთ მონაწილეობა, შესაბამისი აპლიკაცია 23 სექტემბრამდე უნდა შეავსოთ. აპლიკაციის ნახვა შესაძლებელია ამ  ბმულზე: https://careerhunt.eu/.

პროგრამა მონაწილეებს სთავაზობს, შეხვდნენ პოტენციურ დამსაქმებლებს.  შერჩეული კანდიდატები 5-დღიანი ვიზიტით გაემგზავრებიან ესტონეთში, სადაც ისინი შეხვდებიან საინფორმაციო ტექნოლოგიების გიგანტებს, ეწვევიან NATO-ს კიბერთავდაცვის ცენტრს, დაესწრებიან ყველაზე მასშტაბურ რობოტიკსის ფესტივალს „რობოტექსი“ და მიეცემათ შანსი, მიიღონ მონაწილეობა დასაქმების პროგრამის ფარგლებში დაგეგმილ  გასაუბრებებში.

1.3 მილიონი მოსახლეობით ესტონეთს აქვს მზარდი სექტორი საინფორმაციო ტექნოლოგიებისა და კომუნიკაციების მიმართულებით. როგორც პროგნოზირებენ, 2020 წლისთვის ესტონეთის სამუშაო ბაზარზე 37, 000 ICT სპეციალისტით ნაკლები იქნება, ნაწილი მათგანის დაკომპლექტება კი საქართველოდან იგეგმება.

„ვეფხისტყაოსნის“ მრალფეროვანი ილუსტრაციების რიცხვს გერმანულად თარგმნილი პროზაული „ვეფხისტყაოსნის“ ილუსტრაციებიც შეემატა. ილუსტრაციებზე კიტ მენშიკმა იმუშავა. გარდა „ვეფხისტყაოსნისა“, კიტ მენშიკს დასურათებული აქვს ჰარუკი მურაკამის, „კალევალას“ რუნების, ედგარ პოს, შექსპირისა და სხვა ნაწარმოებების გერმანულენოვანი თარგმანები.

ტექსტის პროზაული ვერსიის ავტორი ჟურნალისტი ტილმან შპრეკელსენია, „ვეფხისტყაოსანი“ გერმანულ ენაზე ქართული წიგნის ეროვნული ცენტრის ხელშეწყობით, გამომცემლობა Galiani Berlin-მა გამოსცა.

გერმანიაში წიგნის პრეზენტაცია 6 სექტემბერს გაიმართა.

„ვეფხისტყაოსანი“ 2018 წლის ოქტომბერში ფრანკფურტის წიგნის ბაზრობაზე იქნება წარდგენილი, წიგნის ცენტრის მხარდაჭერით გამოცემულ სხვა უცხოენოვან გამოცემებთან ერთად.

შპს „ბათუმის წყლის“ დირექტორად მარინე გვიანიძე დაინიშნა. ის ახალ თანამდებობაზე დღეს, 11 სექტემბერს, წარადგინეს. მარინა გვიანიძე მანამდე ადლიის წყალარინების გამწმენდი ნაგებობისა და სატუმბო სადგურების სამსახურის უფროსად მუშაობდა.

„ბათუმის წყალს“ აქამდე თენგიზ ქოქოლაძე ხელმძღვანელობდა. როგორც  მერიაში „ბათუმელებს“ უთხრეს, ყოფილმა დირექტორმა სამსახურიდან წასვლის თაობაზე განცხადება თვითონ დაწერა.

„სკოლის მართვისა და ლიდერობის საერთაშორისო კონფერენციაზე“ მონაწილეობის მისაღებად საჯარო სკოლის დირექტორთა რეგისტრაცია გამოცხადდა.

„სკოლის მართვისა და ლიდერობის მეორე საერთაშორისო კონფერენცია“ ჩატარდება 2018 წლის 22-23 სექტემბერს, თბილისში, სასტუმრო „რადისონ ბლუ ივერიაში“.

კონფერენციაში მონაწილეობას მიიღებენ განათლებისა და მეცნიერების სამინისტროს, საერთაშორისო ორგანიზაციების, ასევე არასამთავრობო სექტორის წარმომადგენლები და განათლების სფეროს ექსპერტები.

კოლეგებისა და ფართო საგანმანათლებლო საზოგადოებისთვის საკუთარ გამოცდილებისა და მიღწევების გაზიარების შესაძლებლობა მიეცემათ საჯარო სკოლების დირექტორებს, რომელთა მოხსენებებიც კონკურსის გზით შეირჩევა. თითოეული სესიის ბოლოს გაიმართება დისკუსია.

კონფერენციაში მონაწილეობისათვის საჭიროა ელექტრონული რეგისტრაციის გავლა.  კონფერენციაში მონაწილეობის მსურველთა რეგისტრაცია დაიწყო დღეს,  12 სექტემბერს, 12:00 საათიდან, ვებგვერდზე: www.teec.ge და დასრულდება 14 სექტემბერს დღის 12:00 საათზე.

პროექტი დიდ მნიშვნელობას ანიჭებს იმას, რომ კონფერენციის ყველა მონაწილეს მიეცეს თანაბარი შესაძლებლობები. შესაბამისად, საქართველოს რეგიონების სკოლების წარმომადგენლებს, რომლებიც წარმატებით გაივლიან რეგისტრაციას, პროექტი შესთავაზებს სასტუმროში განთავსებას (ამის შესახებ მონაწილე რეგისტრაციის დროს მიიღებს დამატებით ინფორმაციას).
კონფერენციაში მონაწილეობას შეძლებს პირველი 230 მსურველი, რომელიც დააკმაყოფილებს შემდეგ მოთხოვნებს:

1. არის საჯარო სკოლის მოქმედი დირექტორი;
2. წარმატებით აქვს გავლილი ლიდერობის აკადემიის
   რომელიმე ტრენინგ-მოდული.

პროექტს ახორციელებს მასწავლებელთა პროფესიული განვითარების ეროვნული ცენტრი.

ბავშვებს, რომლებსაც ბათუმის ქუჩებში, ან ბულვარში უწევთ ღამის გათენება, სახელმწიფო ამ ეტაპზე ვერაფერს სთავაზობს – თავშესაფარი მათთვის არ არსებობს. სახელმწიფო ამბობს, რომ მიუსაფარ ბავშვთა დღის ცენტრისა და თავშესაფრის მოსაწყობად თანხას გამოყოფს, მაგრამ პროგრამა არასამთავრობო ორგანიზაციამ უნდა განახორციელოს. ჯანდაცვის სამინისტრომ „ინტერესის გამოხატვის“ მოთხოვნა უკვე მეორედ გამოაცხადა – მსურველი არ ჩანს.

სოციალური მუშაკები პირად საუბრებში ყვებიან, რომ ბავშვთა ზრუნვის კუთხით ერთ-ერთი პრობლემა თავშესაფრის არარსებობაა. ამის აუცილებლობა განსაკუთრებით მაშინ ჩნდება, როცა ბავშვი ძალადობის მსხვერპლია და სააგენტომ გადაწყვეტილება უნდა მიიღოს მისი ოჯახში დატოვების ან მინდობით აღზრდაში გაყვანის შესახებ. ამ პროცესს ხანდახან რამდენიმე თვე სჭირდება. ამ დროს ბავშვი ისევ ქუჩაში რჩება, ღია ცის ქვეშ.

საქართველოს ჯანდაცვის სამინისტროს „ინტერესის გამოხატვის მოთხოვნის“ მიხედვით, დღის ცენტრში ორჯერადი კვება უნდა იყოს, თავშესაფარში – სამჯერადი. ცენტრში უნდა მუშაობდეს სოციალური მუშაკი და ფსიქოლოგიც. სამინისტროს მოთხოვნაა არასამთავრობო ორგანიზაციას ბავშვებთან მუშაობის გამოცდილება ჰქონდეს. გარდა ამისა, „ორგანიზაცია უნდა ფლობდეს ან მოიპოვოს სააღმზრდელო საქმიანობის ლიცენზია.“

„ინტერესის გამოხატვაში“ არ წერია ფასი – რას გადაუხდის სახელმწიფო არასამთავრობო ორგანიზაციას თავშესაფრის, ან დღის ცენტრის მოწყობის შემთხვევაში. სოციალური მომსახურების სააგენტოში განმარტავენ, რომ კონკრეტული ფასი ტენდერის პირობებში გაიწერება, თუკი დაინტერესებული არასამთავრობო ორგანიზაცია გამოჩნდება. დღის ცენტრის და თავშესაფრის მომსახურების ფასები მთავრობის განკარგულებით არის განსაზღვრული.

მესამე სექტორში მიიჩნევენ, რომ სახელმწიფო ვაუჩერი ამ კუთხით ძალიან  მცირეა და „თავშესაფრის შენახვა გაჭირდება“. სახელმწიფო კი, ანუ ამ შემთხვევაში სოციალური მომსახურების სააგენტო თანხის სიმცირეს არ იმჩნევს და არგუმენტად ქუთაისი, რუსთავი და თბილისი მოჰყავს, სადაც ანალოგიური დაფინანსებით დღის ცენტრიც არსებობს და თავშესაფარიც.

„ღამის თავშესაფარი სრული დატვირთვით მუშაობს… აქ ადგილი მხოლოდ მაშინ თავისუფლდება, თუკი რომელიმე ბავშვი თავშესაფრიდან გაიპარება,“ – გვიყვება თამარ შარაშიძე, საქველმოქმედო ფონდ „საქართველოს კარიტასის“ ბავშვთა პროგრამის მენეჯერი. ამ ორგანიზაციას აქვს მოწყობილი დღის ცენტრი და თავშესაფარი თბილისსა და რუსთავში. თამარ შარაშიძის თქმით, თითო ბავშვის თავშესაფრით სარგებლობაზე ორგანიზაციას დღეში 19 ლარი ერიცხება, დღის ცენტრში კი – 9 ლარი.

„თანხა შესაძლოა მცირეა, მაგრამ მუშაობს ამ თანხით ცენტრი თბილისში, რუსთავში… რეალურად რთული თემაა და არავის უნდა შეეჭიდოს,“ – ამბობს რუსუდან სალუქვაძე, სოციალური მომსახურების სააგენტოს აჭარის ფილიალის უფროსის მოადგილე.

„ძალიან კარგად იცის სააგენტომ და სამინისტრომაც, რომ ეს ვაუჩერი ხარჯის დაახლოებით 50 პროცენტს ფარავს. ამიტომაც არ ინტერესდებიან არასამთავრობო ორგანიზაციები პროგრამით. ჩვენ ხარჯებს ვფარავთ ჩვენი ორგანიზაციის პარტნიორების მხარდაჭერით,“ – აღნიშნავს ფონდ „საქართველოს კარიტასის“ წარმომადგენელი, თამარ შარაშიძე.

ბავშვებისთვის თავშესაფრის მოწყობის საჭიროება ბათუმში განსაკუთრებით ზაფხულში ჩნდება, როცა სხვადასხვა ქვეყნიდან ჩამოსული ბავშვებიც რჩებიან ქუჩაში. გასული წლის ზაფხულის შემდეგაც ჯანდაცვის სამინისტრომ დღის ცენტრის და თავშესაფრის მოწყობაზე ტენდერი გამოაცხადა, თუმცა იგი ჩავარდა. სამინისტრომ ანალოგიური პირობები ჩადო წელსაც, როცა „ინტერესის გამოხატვის მოთხოვნა“  განათავსა Jobs.ge-ზე. სოციალური მომსახურების სააგენტოში განმარტავენ, რომ სიახლე შენობაა, რომელსაც ბათუმის მერია გამოყოფს პროგრამით დაინტერესებული ორგანიზაციისთვის.

„ჩვენ გვქონდა შეხვედრა ბათუმის მერიასთან. მივიღეთ დაპირება, რომ ისინი გამოყოფენ შენობას და გაარემონტებენ კიდეც. ეს შენობა გადაეცემა ორგანიზაციას იმ ვადით, რა ვადითაც ისინი დღის ცენტრს ან თავშესაფარს მოაწყობენ. ეს მნიშვნელოვანი ხელშეწყობაა,“ – ამბობს რუსუდან სალუქვაძე, სოციალური მომსახურების სააგენტოს აჭარის ფილიალის უფროსის მოადგილე.

„ჯერჯერობით ეს საკითხი არ განიხილება, კონკრეტული შენობა შერჩეული არ არის,“ – გვითხრეს ბათუმის მერიის პრესსამსახურში. აქ ვიკითხეთ, არის თუ არა შერჩეული სადმე შენობა, რომელსაც ბათუმის მერია არასამთავრობო ორგანიზაციას უსასყიდლოდ გადასცემს პროექტის განხორციელების ვადით.

სოციალური მომსახურების სააგენტო ბათუმის დემოკრატიული ჩართულობის ცენტრში იმ არასამთავრობო ორგანიზაციებს შეხვდა, რომლებიც ბავშვთა უფლებებზე მუშაობენ. „ინტერესის გამოხატვის“ ბოლო ვადა 15 სექტემბერია. სააგენტოს ინფორმაციით, დაინტერესება ამ დროისთვის ორ ორგანიზაციას უკვე აქვს გამოხატული: „განათლების განვითარების და დასაქმების ცენტრს“ და „იალქანს“.

„ჩვენ ჯერ ვფიქრობთ, არ მიგვიღია გადაწყვეტილება, განაცხადიც არ შეგვიტანია. შენობის პრობლემა გვაქვს. თუკი მერია ამ გადაწყვეტილებას არ მიიღებს, შენობის გარეშე თავშესაფრის მოწყობა შეუძლებელია. გადაწყვეტილება გუნდმა უნდა მიიღოს და ჯერ შეჯერებული არ ვართ,“ – აღნიშნა „ბათუმელებთან“ მაია ქათამაძემ. ის განათლების განვითარების და დასაქმების ცენტრის ხელმძღვანელია. ამ ორგანიზაციას წლებია შეზღუდული შესაძლებლობის მქონე ბავშვების დღის ცენტრი აქვს.

განაცხადით ჯანდაცვის სამინისტროს უკვე მიმართა საქველმოქმედო ფონდმა „იალქანი“. „იალქანს“ განაცხადი მხოლოდ დღის ცენტრის მოწყობაზე აქვს შეტანილი. აქაც ყურადღებას შენობაზე ამახვილებენ და ამბობენ, რომ თუკი მერია შესაბამის შენობას არ გამოყოფს, პროექტის განხორციელება შეუძლებელი იქნება.

„ღამის თავშესაფარი კიდევ უფრო რთული და ძვირადღირებული სერვისია, ჩვენ და არც სახელმწიფო ამისთვის მზად არ ვართ… დღის ცენტრისთვისაც ძალიან მცირეა თანხა, მაგრამ ჩავთვალეთ, რომ არ იქნებოდა სწორი, თუკი ამის გამო უარს ვიტყოდით. დონორების მხარდაჭერის გარეშე ამ პროგრამის განხორციელება შეუძლებელი იქნება,“ – ამბობს თიკო აბაშიძე, ფონდ „იალქანის“ ხელმძღვანელი.

თიკო აბაშიძე აცხადებს, რომ შენობასთან დაკავშირებით უკვე ჰქონდა მოლაპარაკება ბათუმის მერიასთან, თუმცა საბოლოო გადაწყვეტილების შესახებ მისთვის უცნობია.

„შემომთავაზეს იმ შენობის ნაწილი ურეხში, სადაც ამჟამად ალკოჰოლდამოკიდებული ადამიანები გადიან რეაბილიტაციას. ეს ადგილი რომც გადმოგვეცეს და გაემიჯნოს დღის ცენტრს, იქ მუდმივად ჩხუბია, პოლიციის გამოძახება და ასე შემდეგ… ბავშვების გვერდით ასეთი გარემო მისაღები არ იქნება.

შენობა, რომლის გადმოცემასაც აპირებდა მერია, სარემონტოა. დონორი ორგანიზაცია მეუბნება, რომ ის გაარემონტებს შენობას, თუკი მერია უზუფრუქტით გადმოგვცემს ფართობს, მერია კი გარანტიას მთხოვს დონორისგან, რომ რემონტს აუცილებლად ჩაატარებს. მოკლედ, საბოლოო პოზიცია უცნობია,“- გვითხრა თიკო აბაშიძემ.

შშმ ბავშვების დღის ცენტრი აქვს ორგანიზაციას – „თანა“. მისი დირექტორი, ნანა საყვარელიძე ამბობს, რომ მიუსაფარ ბავშვთა დღის ცენტრის მოწყობით არ დაინტერესებულა.

„ეს არის ძალიან რთული პროგრამა, მას სჭირდება შესაბამისი გამოცდილება… ამ დროს ანაზღაურება ძალიან ცოტაა. მსგავსი ცენტრი გასაკეთებელია აუცილებლად, მაგრამ ამას სჭირდება დაკვირვებული მიდგომა და ყველაფრის გათვლა. შშმ ბავშვების შემთხვევაში სახელმწიფო იხდის დღეში 11 ლარს, რეალურად საჭიროა 21 ლარი. ჩვენ სხვადასხვა პროგრამას ვახორციელებთ და ამით გავდივართ…

ვფიქრობ, სახელმწიფომ უნდა აიღოს ეს პასუხისმგებლობა საკუთარ თავზე და მოაწყოს დღის ცენტრი. ასევე თავშესაფარი მიუსაფარი ბავშვებისთვის“, – ამბობს ნანა საყვარელიძე.

„ბათუმელები“ სხვა არასამთავრობო ორგანიზაციასაც დაუკავშირდა. გვითხრეს, რომ მათ ამ მიმართულებით გამოცდილება არ აქვთ და არც სურვილი გასჩენიათ – სახელმწიფო ვაუჩერის სიმცირის გამო.

ამ მიმართულებით გამოცდილი ორგანიზაცია „კარიტასია“, რომელიც ბათუმში თავშესაფრის ან დღის ცენტრის მოწყობას არ აპირებს.

„ჩვენ საკმაოდ დიდი პასუხისმგებლობა გვაქვს აღებული, სხვისთვის დაგვითმია…“ – გვითხრა თამარ შარაშიძემ, საქველმოქმედო ფონდი „საქართველოს კარიტასის“ ბავშვთა პროგრამის მენეჯერმა.

სათათბირო ორგანოს – სამოქალაქო მრჩეველთა საბჭოს კახაბერ გუჩმანიძე უხელმძღვანელებს. ბათუმის მერიის ცნობით, კახაბერ გუჩმანიძე დღეს, 10 სექტემბერს, ღია კენჭისყრით აირჩიეს სამოქალაქო მრჩეველთა საბჭოს დამსწრე წევრებმა. საბჭოს ასევე ეყოლება თავმჯდომარის მოადგილე და მდივანი, რომლებსაც მორიგ სხდომაზე აირჩევენ.

კახაბერ გუჩმანიძე  ამჟამად საერთაშორისო ორგანიზაცია CENN- ის კოორდინატორია აჭარის რეგიონში, ასევე არის სხვადასხვა საერთაშორისო დონორი ორგანიზაციის მიერ დაფინანსებული პროექტების ექსპერტი, ნარჩენების მართვის კუთხით ეწევა საკონსულტაციო-საექსპერტო საქმიანობას.

ბათუმის მუნიციპალიტეტის მერის სათათბირო ორგანო – სამოქალაქო მრჩეველთა საბჭო, ახალი შემადგენლობით მიმდინარე წლის ივნისში შეიქმნა.

საბჭოს შემადგენლობაში შედიან მეწარმე იურიდიული პირები, არასამთავრობო ორგანიზაციების წარმომადგენლები, ამხანაგობები და  ბათუმის მოსახლეობის წარმომადგენლები. საბჭოს მიზანია ადგილობრივი თვითმმართველობის განხორციელებაში მოქალაქეთა მონაწილეობის, სამოქალაქო ინიციატივების, რეკომენდაციების, მოსაზრებებისა და რჩევების შემუშავება და წარდგენის პროცესის ხელშეწყობა.

შეხვედრას ბათუმის მერი ლაშა კომახიძე, ვიცე-მერი თენგიზ პეტრიძე, ასევე, ბათუმის მერიის სტრუქტურული ერთეულებისა და დაქვემდებარებული ორგანიზაციების ხელმძღვანელები ესწრებოდნენ.

ბათუმში, გორგილაძისა და ლუკა ასათიანის ქუჩების გადაკვეთაზე, მოპედს ავტომანქანა დაეჯახა. მოპედს მცირეწლოვანი მართავდა. ის დაშავდა.

„დაშავებული დაახლოებით 12 წლამდეა, მსუბუქი დაზიანებები ჰქონდა და ბავშვთა საავადმყოფოში გადავიყვანეთ“, – გვითხრეს სასწრაფო დახმარების სამსახურში.

შსს-ს ინფორმაციით, გამოძიება სსკ-ის 276-ე მუხლის პირველი ნაწილით მიმდინარეობს.

საქართველოს განათლების მინისტრმა, მიხეილ ბატიაშვილმა, თანამდებობიდან გაათავისუფლა მისი მოადგილეები, ლია გიგაური და თემურ მურღულია, ასევე, შეფასებისა და გამოცდების ეროვნული ცენტრის ხელმძღვანელი მაია მიმინოშვილი და მასწავლებლის პროფესიული განვითარების ცენტრის ხელმძღვანელი გიორგი მაჩაბელი.

თანამდებობიდან გაათავისუფლეს განათლების ხარისხის განვითარების ეროვნული ცენტრის დირექტორი თამარ სანიკიძე და რუსთაველის სამეცნიერო ფონდის ხელმძღვანელი მანანა მიქაბერიძეც.

როგორც მინისტრმა ბრიფინგზე განაცხადა, აღნიშნული პირების თანამდებობიდან გათავისუფლების მიზეზი განათლების სიღრმისეული რეფორმა და განათლების ხარისხის ამაღლებაა. მინისტრის თქმით, საკადრო ცვლილებები კიდევ გაგრძელდება.