ქედის მუნიციპალიტეტის თვითმმართველობა წლებია მატერიალურად ეხმარება მრავალშვილიან ოჯახებს. ქედის მერიის ჯანმრთელობისა და სოციალური დაცვის სამსახურმა მუნიციპალიტეტში დემოგრაფიული პრობლემების ფონზე, სოციალური პირობების გაუმჯობესებისა და შობადობის გაზრდის წახალისების მიზნით, მიზნობრივი პროგრამა შეიმუშავა. პროგრამისთვის – „ოთხ და მეტშვილიან ბავშვთა ოჯახებზე (18 წლამდე ასაკის) ერთჯერადი მატერიალური დახმარება“ ადგილობრივი ბიუჯეტიდან 51 000 ლარი გამოიყო.
პროგრამა 2018 წლის დეკემბრის ბოლომდე ხორციელდება. ამ დროისთვის ერთჯერადად 1 000 ლარით 47-მა ოჯახმა უკვე ისარგებლა.
პროგრამის პარალელურად მუნიციპალიტეტის მცხოვრებლები ,,მთის კანონით“ გათვალისწინებული შეღავათებით სარგებლობენ: პირველი და მეორე შვილის შეძენისას ოჯახი ერთი წლის განმავლობაში სუფსიდიის სახით 100 ლარს იღებს, ხოლო მესამე და მომდევნო შვილზე 2 წლის განმავლობაში – 200 ლარს. ამ შეღავათებით, ჯამში, დღეის მდგომარეობით, 277 ოჯახი სარგებლობს.
