ბათუმში ტელეკომპანია „იბერიას“ მხარდასაჭერად აქცია გაიმართა


დღეს, 10 სექტემბერს, ბათუმში, ევროპის მოედანზე, მოქალაქეები და ტელეკომპანია „იბერიას“ ჟურნალისტები შეიკრიბნენ.

„ჩემი აზრით, ახლა ძალიან მნიშვნელოვანი კოლეგების მხარდაჭერა, იმიტომ, რომ ეს არ არის პირველი ფაქტი მედიაზე ზეწოლის,“ – განაცხადა „იბერიას“ გურია-აჭარის რეგიონალურმა კორესპონდენტმა, მაია შავაძემ.

ჟურნალისტის თქმით, აქ არ არის საუბარი მხოლოდ ტელევიზიის ფინანსურ დავალიანებაზე, არამედ საუბარია ტელევიზიის დათმობაზე.

„მე იბერიას“ მაყურებელი ვარ და ჩვენ ვიცავთ მედიის თავისუფლებას, ამიტომ ვართ აქ“, – ამბობს ლალი ზაქარეიშვილი.

აქციის კიდევ ერთმა მონაწილემ, ლაურა ტაკიძემ აღნიშნა, ხელისუფლების მხრიდან ტელეკომპანიაზე ზეწოლა უნდა შეწყდეს  და ტელეკომპანიამ განაგრძოს მუშაობა:

„როგორც ვიცი „ომეგა ჯგუფში“ 1500 ადამიანია დასაქმებული და ამ ადამიანების უკან ამდენივე ოჯახი დგას. ამიტომ ამ ტელეკომპანიის მუშაობა არის მნიშვნელოვანი და წინააღმდეგი ვართ, რომ ტელევიზია დაიხუროს“.

აქცია ევროპის მოედანზე ტელეკომპანია „იბერიას“ მხარდასაჭერად.
ფოტო: „ბათუმელები“

დღეს აქცია ტელეკომპანიის წარმომადგენლებმა თბილისში, კანცელარიის წინაც გამართეს. აქციას წინ უძღოდა ტელეკომპანიის მხრიდან მაუწყებლობის დროებით შეწყვეტა.

ტელევიზიის საინფორმაციო სამსახურის უფროსი განმარტავს, რომ ხელისუფლება „იბერიას“ დამფუძნებლებზე ზეწოლას ახორციელებს და ამ ზეწოლის მთავარი მიზანია, ტელეარხმა მაუწყებლობა შეწყვიტოს.

ამავე თემაზე:

TV იბერია ზეწოლასა და ფინანსურ პრობლემებზე საუბრობს

ნეტგაზეთის მასალების სხვა გამოცემებში გადაბეჭდვის წესი
ავტორი
ლელა დუმბაძე, ჟურნალისტი. ტელ: [0042] 27 45 12. lelabatumelebi@gmail.com