Batumelebi | საინვესტიციო-ენერგეტიკული ფორუმი ბათუმში საინვესტიციო-ენერგეტიკული ფორუმი ბათუმში – Batumelebi

საინვესტიციო-ენერგეტიკული ფორუმი ბათუმში

დღეს, 11 სექტემბერს, ბათუმში ცენტრალური აზიის რეგიონული ეკონომიკური თანამშრომლობის მე-3 საინვესტიციო-ენერგეტიკული ფორუმი ტარდება.

,,თემატურად დღევანდელი ღონისძიება მნიშვნელოვანია, რამდენადაც ის ხაზს უსვამს იმ ახალ ინიციატივებს, რომლებიც ენერგეტიკაში ინვესტიციების კუთხით უნდა განხორციელდეს. ასევე, იმ მაღალტექნოლოგიური ტრანსფერის განხორციელებას, რომელიც მნიშვნელოვანია ჩვენი ქვეყნის ენერგეტიკისა და ეკონომიკის მდგრადი განვითარებისთვის. შესაბამისად, ის მიმდინარე პროექტები, იქნება ეს ჰიდროელექტროსადგურები თუ სხვა ტიპის ენერგოობიექტები, მნიშვნელოვანია ქვეყნის ეკონომიკის განვითარებისთვის,“ – განაცხადა ფორუმზე გამოსვლისას აჭარის მთავრობის თავმჯდომარემ, თორნიკე რიჟვაძემ.

საინვესტიციო-ენერგეტიკული ფორუმის მიზანია CAREC-ის ქვეყნებში საჯარო და კერძო სექტორის მიერ ენერგეტიკის სფეროში ინვესტიციების ხელშეწყობა, არსებული ენერგოშესაძლებლობების ჩვენება, სხვადასხვა დაინტერესებულ მხარეს შორის პარტნიორული ურთიერთობის დამყარება, ასევე მაღალი ტექნოლოგიების მიმართ ცნობადობის ამაღლება.

ორდღიან ფორუმში მონაწილეობას მიიღებენ CAREC-ის წევრი და სხვა ქვეყნების სამთავრობო ოფიციალური პირები, კერძო სექტორის ინვესტორები, აკადემიური წრის წარმომადგენლები, დეველოპერული პარტნიორები.

ფორუმზე წარმოდგენილი იქნება 5 ტექნოლოგიური სესია, სადაც ძირითადი აქცენტი იქნება პროექტებზე, მათ დაფინანსებასა და შედეგებზე. ფორუმი საქართველოს მთავრობის მხარდაჭერითა და აზიის განვითარების ბანკის (ADB) ორგანიზებით იმართება. CAREC-ის მესამე ენერგეტიკული საინვესტიციო ფორუმი ხვალ, 12 სექტემბერს, დასრულდება.

ნეტგაზეთის მასალების სხვა გამოცემებში გადაბეჭდვის წესი
ავტორი
ია ფრანგიშვილი არის გაზეთ "ბათუმელების" რეპორტიორი 2014 წლიდან