ხულოში, სოფელ ბეღლეთში მდებარე მეჩეთში შესაწირი ყუთი გატეხეს და თანხა წაიღეს. შემთხვევა გასულ კვირას მოხდა.
„დღეს მეათე დღეა, რაც ეს მოხდა. ღამის ლოცვა 10-ის 15 წუთზე იყო იმ საღამოს. ლოცვის მერე კარი არ იკეტება, იქნებ ვინმე იყოს გამვლელ-გამომვლელი. დილის ლოცვაზე რომ მივედი, კარი ღია იყო, შესასვლელში, სადაც ხალიჩაა, ნაკვალევი იყო, შესაწირ ყუთთან, ჯორკოზე მავთული იდო, კაუჭიანი, ცეცხლს რო ჩხრეკენ, ისეთი და ერთი 20-კაპიკიანი ეგდო იქვე, შესაწირი ყუთის კარი იყო გამოღუნული. არ შევხებივარ არაფერს.
დილის ლოცვის შემდეგ ბევრი ვიფიქრე რა მექნა და ბოლოს მეზობლებთან ერთად, ხუთი-ექვსი ბაბუა მოვიდა, მივიღეთ გადაწყვეტილება შეგვეტყობინებინა რაიონის პოლიციისთვის, 112-ზე არ დაგვირეკავს, ღმერთია მოწმე. ეს პირადი ქონება არ არის, ხალხის ქონებაა, შესაწირია, ვისაც რა გეემეტება, აგდებს ყუთში. მირჩიეს, წინამძღვარი ხარ და უნდა თქვაო“, – გვითხრა ჯემალ [ახმედ] შავაძემ, რომელიც ბეღლეთის მეჩეთში მსახურობს.
შს სამინისტროს ინფორმაციით, გამოძიება სისხლის სამართლის კოდექსის 177-ე მუხლით მიმდინარეობს – ქურდობა. ეს დანაშაული ისჯება ჯარიმით ან შინაპატიმრობით ვადით ექვსი თვიდან ერთ წლამდე ანდა თავისუფლების აღკვეთით ვადით ერთიდან სამ წლამდე.
შს სამინისტროს ინფორმაციით, მხილებულია დამნაშავე, რომელიც დანაშაულს აღიარებს.
ჯემალ შავაძე ამბობს, რომ ამ ადამიანს არ იცნობს: „მეზობელი სოფლელია, არ ვიცნობ მართალი გითხრათ, ვერც სახეზე ვიცნობ. არც ის ვიცი, რა თანხაა წაღებული“.
_________________________
მთავარ ფოტოზე: სოფელ ბეღლეთის მეჩეთი. ფოტო: რუსლან ბარამიძე. წყარო: georgianjame.wordpress.com
