ნეტგაზეთი • RU

ჯანდაცვის სამინისტრო შრომის ინსპექტორებს ეძებს

„პრობლემა არის კადრები, პროფესიონალი კადრები არ გვყავს,“ – აღნიშნა დღეს ბათუმის სახელმწიფო უნივერსიტეტში გამართულ შეხვედრაზე დამსაქმებელთა ასოციაციის ხელმძღვანელმა, ელგუჯა მელაძემ. ჯანდაცვის სამინისტროს წარმომადგენლები ბიზნესმენებს შეხვდნენ. კომპანიებს, სადაც უსაფრთხოების კუთხით მაღალი რისკი არსებობს, უსაფრთხოების მენეჯერი უნდა ჰყავდეთ. შეხვედრაზე გაირკვა, რომ შრომის უსაფრთხოების სპეციალისტებს კერძო კომპანიებთან ერთად სახელმწიფოც ეძებს.

„დეფიციტურია, კი. 30 ინსპექტორი უკვე გვყავს და მალე გამოვაცხადებთ კონკურსს კიდევ 10 ინსპექტორის შესარჩევად. როცა კანონი უფრო მეტ კომპანიაზე გავრცელდება, კიდევ დამატებით 40 ინსპექტორი დაგვჭირდება… ჩვენ მივაწოდეთ მოდულები კომპანიებს, კადრები თავად უნდა შეარჩიონ. ამ პროცესში სახელმწიფო არ ერევა,“ – გვითხრა ბექა ფერაძემ, შრომის პირობების ინსპექტირების დეპარტამენტის უფროსმა.

„დაცვის ინსპექცია ამოწმებს, კომპანიას ჰყავს თუ არა კადრი. ინსპექცია ამ კადრის კვალიფიკაციას და გამოცდილებას არ ამოწმებს. კომპანიის რისკია უსაფრთხოების მენეჯერის კვალიფიკაცია. შესაძლოა, მან ფორმალურად დაასაქმოს ვინმე, მაგრამ შემდეგ ინსპექციამ უსაფრთხოების პირობების დარღვევისთვის დააჯარიმოს,“ – განმარტავს დამსაქმებელთა ასოციაციის აჭარის ორგანიზაციის ხელმძღვანელი, დავით ჭყონია.

შრომის უსაფრთხოების მენეჯერების გადამზადების პროგრამას დამსაქმებელთა ასოციაცია ახორციელებს. დავით ჭყონია ამბობს, რომ კადრები დეფიციტია და ბევრი კომპანია ეძებს.

„ზოგი ისევ ეძებს კადრს, ზოგმაც აქამდე ვინც მუშაობდა ამ პოზიციაზე, ის გადაამზადა,“ – გვითხრა დავით ჭყონიამ.

ნეტგაზეთის მასალების სხვა გამოცემებში გადაბეჭდვის წესი
ავტორი