Batumelebi

საქართველოს მთავრობამ სპირტიანი სასმელების შესახებ ტექნიკური რეგლამენტი დაამტკიცა, რომელიც ადგენს მოთხოვნებს სპირტიანი სასმელების დასახელებების, აღწერის, წარდგენის და ეტიკეტირების მიმართ და რომელმაც უნდა მოაწესრიგოს ბიზნესოპერატორის მიერ სპირტიანი სასმელების წარმოების, ბაზარზე განთავსების და წარდგენის პირობები.

„ტექნიკური რეგლამენტი მიზნად ისახავს სპირტიანი სასმელების წარმოების, გადამუშავების, დისტრიბუციის ეტაპებზე რეგულირების ერთიანი პრინციპების განსაზღვრას და მომხმარებელთა უფლებების დაცვას“, – აღნიშნულია რეგლამენტში.

რეგლამენტი ძალაში 2019 წლის პირველი აპრილიდან შედის. თუმცა, მთავრობის გადაწყვეტილებით, ის სპირტიანი სასმელები, რომლებიც არ შეესაბამება ამ რეგლამენტით განსაზღვრულ მოთხოვნებს, ბაზარზე განთავსებული იქნება 2020 წლის პირველ იანვრამდე.

რეგლამენტის მიხედვით დაუშვებელია:

[crosslist]

• სპირტიანი სასმელის ოფიციალური დასახელების შეცვლა სასაქონლო ნიშნით, სავაჭრო ნიშნით, ან წარმოსახვითი სახელით [ფანტაზიის ნაყოფი];
• ამ ტექნიკური რეგლამენტით განსაზღვრული სპირტიანი სასმელების კატეგორიების დასახელებების ან საქართველოს კანონმდებლობით დაცული გეოგრაფიული აღნიშვნის გამოყენება სურსათის ინგრედიენტების ჩამონათვალში, საქართველოს კანონმდებლობით განსაზღვრული „მომხმარებლისათვის სურსათის შესახებ ინფორმაციის მიწოდების შესახებ“ მოთხოვნების შესაბამისად;
• სპირტიანი სასმელების ბაზარზე განთავსება ან რეალიზაცია ჭურჭელში, რომელიც დახურულია ფოლგის ან ტყვიის კაფსულების შემცველი თავსახურით/საცობით.

[/crosslist]

რეგლამენტს დანართის სახით ახლავს ასევე ევროკავშირში გეოგრაფიული აღნიშვნებით დაცული სპირტიანი სასმელების ჩამონათვალი, რომლებიც საქართველოშიცაა დაცული.

რეგლამენტით, ბიზნესოპერატორი ვალდებულია: „უზრუნველყოს სპირტიანი სასმელების შესაბამისობა ტექნიკური რეგლამენტით და საქართველოს კანონმდებლობით განსაზღვრულ მოთხოვნებთან; დაიცვას ჰიგიენის ზოგადი მოთხოვნები სპირტიანი სასმელების წარმოების, გადამუშავების ან/და დისტრიბუციის ეტაპებზე; შესაძლებელია ბიზნესოპერატორმა გამოიყენოს განსხვავებული მოთხოვნები იმ შემთხვევაში, თუ მის მიერ დასაბუთებული იქნება, რომ გამოყენებული განსხვავებული მოთხოვნებით უზრუნველყოფილია ჰიგიენის ზოგადი მოთხოვნების დაცვა“.

ტექნიკური რეგლამენტით განსაზღვრული სპირტიანი სასმელების რეგლამენტთან შესაბამისობის კონტროლი ხორციელდება:

სსიპ – სურსათის ეროვნული სააგენტოს მიერ – სახელმწიფო კონტროლის დროს;
სსიპ – შემოსავლების სამსახურის მიერ – იმპორტის სასაქონლო ოპერაციის განსაზღვრისას სავალდებულოდ წარსადგენი შესაბამისობის დამადასტურებელი დოკუმენტის – მწარმოებლის მიერ გაცემული შესაბამისობის დეკლარაციის ან სერტიფიკაციის ორგანოს მიერ გაცემული შესაბამისობის სერტიფიკატის გამოყენებით;
ბიზნესოპერატორის მიერ – შიდა საწარმოო კონტროლის დროს.

ტექნიკური რეგლამენტის მიზნებისათვის სპირტიან სასმელს არ მიეკუთვნება საქართველოს შესაბამისი კანონმდებლობით განსაზღვრული შემდეგი ჯგუფები:

[checklist]

• 2203 ჯგუფი – ალაოს ლუდი;
• 2204 ჯგუფი – ღვინოები ყურძნის ნატურალური, შემაგრებული ღვინოების ჩათვლით; ყურძნის ტკბილი, 2009 სასაქონლო პოზიციაში მითითებულის გარდა;
• 2205 ჯგუფი – ვერმუტები და ყურძნის სხვა ნატურალური ღვინოები, მცენარეული ან არომატული ექსტრაქტების დამატებით;
• 2206 ჯგუფი – სხვა დადუღებული სასმელები (მაგალითად, სიდრი, პერი (მსხლის სიდრი), თაფლის სასმელი), ნარევები დადუღებული სასმელებისაგან და დადუღებული სასმელებისა და უალკოჰოლო სასმელების ნარევები;
• 2207  ჯგუფი – ეთილის სპირტი არადენატურირებული, სპირტის კონცენტრაციით (მოცულობითი სპირტშემცველობა) 80% ან მეტი, ეთილის სპირტი და სხვა დენატურირებული სპირტები ნებისმიერი კონცენტრაცით.

[/checklist]

საქართველოს მთავრობის დადგენილებით, ეროვნული უშიშროების საბჭოს აპარატის სალიკვიდაციო კომისიას მთავრობის ადმინისტრაციის უფროსი უხელმძღვანელებს. კომისიის წევრები იქნებიან: პრეზიდენტის ადმინისტრაციის, ეროვნული უშიშროების საბჭოს, სახელმწიფო უსაფრთხოების სამსახურის, საგარეო საქმეთა, თავდაცვის, შინაგან საქმეთა, ფინანსთა და იუსტიციის სამინისტროების, ასევე სახელმწიფო ქონების ეროვნული სააგენტოს წარმომადგენლები.

სალიკვიდაციო კომისიაში სათათბირო ხმის უფლებით მონაწილეობის მიიღებენ ასევე საქართველოს პარლამენტის თავდაცვისა და უშიშროების და საგარეო ურთიერთობათა კომიტეტების წარმომადგენლები. ამ კომიტეტების თავმჯდომარეებმა წარმომადგენლები კომისიის თავმჯდომარეს მიმდინარე წლის პირველ დეკემბრამდე უნდა წარუდგინონ.

ეროვნული უშიშროების საბჭოს ფუნქციონირება, საქართველოს ახალარჩეული პრეზიდენტის მიერ ფიცის დადებისთანავე შეწყდება. ამ მომენტიდან საქართველოს მთავრობა, კომპეტენციის ფარგლებში, ითვლება ეროვნული უშიშროების საბჭოს უფლებამონაცვლედ. ეს განისაზღვრა საქართველოს ორგანული კანონით, რომელიც 2018 წლის 21 ნოემბერს ამოქმედდა.

მიმდინარე წლის პირველ ნოემბერს, ბათუმში მიმდინარე რიგით მე-12 „საქართველოს თავდაცვის და უსაფრთხოების კონფერენციაზე“ (GDSC)  საქართველოს პრეზიდენტმა გიორგი მარგველაშვილმა მთავრობას მოუწოდა, სასწრაფოდ შექმნას უშიშროების საბჭოს ჩამნაცვლებელი სტრუქტურა და აღნიშნა, რომ აუცილებელია ისეთი სტრუქტურის შექმნა, სადაც უმაღლესი თანამდებობის პირები მიიღებენ პოლიტიკურ გადაწყვეტილებებს ქვეყნის თავდაცვისუნარიანობასთან მიმართებაში.

ამ თემაზე:

ქალთა ძალადობის წინააღმდეგ ბრძოლის დღესთან [25 ნოემბერი] დაკავშირებით, ორგანიზაცია European Foundation for Progressive Studies (FEPS) – მა და Jean-Jaurès ფონდმა ქალებზე სექსუალური ძალადობის თემაზე კვლევა ჩაატარა. კვლევა აშშ-სა [1000 ქალი] და ევროპის ხუთ ქვეყანაში – საფრანგეთში [1004 ქალი], იტალიში [1009 ქალი], ესპანეთში [1007 ქალი], გერმანიასა [1004 ქალი] და ბრიტანეთში [1001 ქალი] ჩატარდა. ჯამში კვლევის ფარგლებში 18 წელს გადაცილებული, 6025 ქალი გამოიკითხა.

კვლევის თანახმად, ყოველი მეორე ქალი აშშ-ში ისმენს ქუჩაში მისი მისამართით გამოთქმულ სექსუალური შინაარსის კომენტარებსა და შეურაცხყოფას, ბრიტანეთში გამოკითხული ქალების – 43%, ესპანეთში – 40%, საფრანგეთში -39%, 36% – გერმანიაში და 25% – იტალიაში.

კვლევის მთავარი მიგნებები:

• ევროპელი ქალების 65%-ისთვის ცხოვრებაში ერთხელ მაინც დაუსტვენიათ ქუჩაში, ამერიკაში ეს მაჩვენებელი 70%-ია.
• ევროპელი ქალების 36% -ი გამხდარა ქუჩაში სექსუალური შინაარსის კომენტარების, შეურაცხყოფისა და დაცინვის მსხვერპლი. ამერიკაში ეს მაჩვენებელი 50%-ია.
• ევროპელი ქალების 36%-ის მისამართით გამოუყენებიათ ქუჩაში უხეში სექსუალური შინაარსის ჟესტები ცხოვრებაში ერთხელ მაინც (ესპანეთში ეს მაჩვენებელი 50%-ია), ამერიკაში ეს მაჩვენებელი 46%-ია.
• ფრანგი ქალების 43%-ს ადევნებიან ქუჩაში (ევროპის საშუალო მაჩვენებელი 37%-ია).
• ესპანელი ქალების 35%-ს ერთხელ მაინც შეხვედრია ეგზიბიციონისტი ქუჩაში.
• ბრიტანელი ქალების 40%-ს შეხებიან ხელით უხამსად ქუჩაში, მათივე ნებართვის გარეშე (ევროპის საშუალო მაჩვენებელია 34%), ამერიკის საშუალო მაჩვენებელია 41%.
• 56% ფრანგი ქალებისა გამხდარან სექსუალური შევიწროვებისა და თავდასხმის მსხვერპლი ცხოვრებაში ერთხელ მაინც.

ქალთა მიმართ ძალადობის ეროვნული კვლევა გაერომ საქართველოში გასულ წელს ჩაატარა, სადაც გამოჩნდა, რომ ძალადობა ხშირი პრაქტიკაა ბევრი ქალის ცხოვრებაში, შვიდიდან ერთი ქალი (15-64 წლის ასაკის) აღნიშნავს, რომ გამოუცდია ფიზიკური, სექსუალური და ემოციური ძალადობა მათი პარტნიორისგან.

ამავე კვლევამ უჩვენა, რომ ოთხიდან ერთი ქალს (27%) საქართველოში, გამოუცდია ფიზიკური ან/და სექსუალური ძალადობა მათი პარტნიორის მხრიდან ან სექსუალური ძალადობა (მათ შორის ბავშვბოიბის დროს) არა-პარტნიორი მამაკაცის მხრიდან. ასევე გამოუცდიათ სექსუალური შევიწროება ერთხელ მაინც ცხოვრების განმავლობაში.

გქონიათ თუ არა სექსუალური შევიწროების შემთხვევა მოზარდობის ასაკში? – ეს და კიდევ რამდენიმე შეკითხვა „ბათუმელებმა“ თავის მკითხველს დაუსვა გასულ წელს. გამოკითხვაში სულ 144-მა ადამიანმა მიიღო მონაწილეობა და მათგან 108 ადამიანმა, გამოკითხულთა 75 პროცენტმა თქვა, რომ სექსუალური შევიწროვების შემთხვევა ჰქონია.

საქართველოს კულტურული მემკვიდრეობის დაცვის ეროვნული სააგენტოს გენერალური დირექტორის 2018 წლის 15 ნოემბრის ბრძანებით, კულტურული მემკვიდრეობის უძრავი ძეგლის სტატუსი მოეხსნა „თავდაცვით ნაგებობას“ [მისამართი საჯარო რეესტრში რეგისტრაციის მიხედვით:  ქ. ბათუმი,  იაკობ გოგებაშვილის  ქ. N1; ფაქტობრივი მისამართი: ნინოშვილის ქ.]“.

ბრძანება ძალაში გუშინ, 22 ნოემბერს შევიდა. ბრძანებას სააგენტოს გენერალური დირექტორის მოვალეობის შემსრულებელი, პაატა გაფრინდაშვილი აწერს ხელს.

„თავდაცვითი ნაგებობის“, როგორც ძეგლის ფაქტობრივი ადგილმდებარეობა ბათუმში ე.წ. საოცრებათა პარკი იყო [„რივიერას“ და ბათუმის მუნიციპალიტეტის საკუთრებაში არსებული ტერიტორიები].

აღნიშნული ძეგლი [დასახელებული როგორც „კედელი“, მისამართზე: ე. ნინოშვილის ქუჩის დასაწყისი/საოცრებათა მოედანი] შპს „გეოგრაფიკის“ მიერ შედგენილ იმ ძეგლების სიაშია, რომლებზეც „გეოგრაფიკმა“ ძეგლის სტატუსის მოხსნის რეკომენდაცია გასცა. აღსანიშნავია, რომ ამ ტერიტორიაზე დღეს არანაირი ძველი ნაგებობა არ დგას.

„ტერიტორია არქეოლოგიური კვლევისთვის გავთხარეთ, სადაც გვეგონა, რომ ძველი [მეფის რუსეთის დროინდელი] ფორტის ნაწილები იყო დარჩენილი. აჭარის არქეოლოგიის ინსტიტუტი დავიქირავეთ მაგისთვის, მაგრამ ვერაფერი ვიპოვეთ“ – განაცხადა რამდენიმე დღის წინ „ბათუმელებთან“ „ბათუმი რივიერას“ დირექტორმა გიორგი კაპანაძემ.

აღნიშნულ ტერიტორიასთან დაკავშირებით საქართველოს ახალგაზრდა იურისტთა ასოციაცია [საია] ბათუმის მერიის წინააღმდეგ სასამართლოს სარჩელით მიმართავს. საია იმ განკარგულების გაუქმებას ითხოვს, რომლითაც საკრებულომ მერიის წარდგენით მოიწონა და შეითანხმა შპს „გეოგრაფიკის“ მიერ მომზადებული დოკუმენტი, რომელიც ბათუმში დამცავი ზონების დადგენას ითვალისწინებდა. საიას პრეტენზია დამცავი ზონების დადგენას არ უკავშირდება – საქმე იმაშია, რომ მერიამ დოკუმენტის დასამტკიცებლად წარდგენამდე კვლევით დადგენილი საზღვრები შეცვალა.

მთავარი ფოტო: ტერიტორია, რომელიც ძეგლის – „თავდაცვითი ნაგებობის“ მისამართად იყო მითითებული

დღეს, 23 ნოემბერს, ბათუმში, ევროპის მოედანზე პარტია „პატრიოტთა ალიანსი“ აქციას მართავს. აქციის გზავნილია „არა-ნაცებს! არა – წარსულში დაბრუნებას!“. მსგავსი აქციის გამართვას „პატრიოტთა ალიანსი“ თბილისშიც გეგმავს.

ამავე თემაზე: შუახევში „პატრიოტთა ალიანსის“ ათმა წევრმა პარტია დატოვა

„ბაბილონ თაუერის“ დაწყებული პროექტი ბათუმის ცენტრში, ზღვასთან ახლოს, შესაძლოა გაიყიდოს – ეს მოხდება იმ შემთხვევაში, თუ მშენებელი კომპანია ერთი თვის ვადაში აჭარის ფინანსთა და ეკონომიკის სამინისტროს ვერ წარუდგენს საბანკო გარანტიას, რომ აქვს ფული პროექტის დასასრულებლად.

კომპანიისგან, რომელსაც 30-მილიონიანი ინვესტიციის განხორციელების ვალდებულება აქვს, სამინისტრო 200 000  ლარის საბანკო გარანტიას ითხოვს.

თუ მშენებელი კომპანია „TAM GEO LLC“-ი ასეთ გარანტიას წარადგენს 2018 წლის ბოლომდე, მას მშენებლობის დასასრულებლად ახალ ვადას 2020 წლის ბოლომდე მისცემენ. ხოლო თუ ასეთ გარანტიას ის სამინისტროს ვერ წარუდგენს, მაშინ სამინისტრომ ხელშეკრულების მოშლის პროცედურა უნდა დაიწყოს. კანონში შესული ცვლილებით, სამინისტროს უკვე არა მხოლოდ ამის უფლებამოსილება, არამედ ვალდებულება აქვს.

„ბათუმელებისთვის“ უცნობია, რას აპირებს 47-სართულიანი „ბაბილონი თაუერის“ მშენებელი კომპანია „TAM GEO LLC“-ი. კომპანიის წარმომადგენლებთან დაკავშირება ვერ მოვახერხეთ. თუმცა ჩვენთვის ცნობილი გახდა, რომ სულ ცოტა სამ კომპანიას სურს პროექტის შესყიდვა. ამ კომპანიებს „ბათუმელები“ ჯერჯერობით არ ასახელებს, რადგან, მათი თქმით, მოლაპარაკების დეტალებს ჯერ ვერ გაასაჯაროებენ.

აჭარის მთავრობასთან გაფორმებული ხელშეკრულებით კი, „TAM GEO LLC“-ს შეუძლია გაყიდოს პროექტი იმავე ვალდებულებებით, რაზეც პასუხისმგებლობა აქვს თავის დროზე აღებული. ფინანსთა და ეკონომიკის სამინისტროში აცხადებენ, რომ მანამდე, ვიდრე ამას გადაწყვეტს, კომპანიის მფლობელმა მთავრობასთან პრობლემები უნდა მოაგვაროს.

აჭარის მთავრობასთან დადებული შეთანხმებით, ბათუმში, რუსთაველის ქ N30-ში, ინვესტორს 47-სართულიანი სასტუმროსა და სავაჭრო ცენტრის მშენებლობა 2015 წლის ბოლოს უნდა დაესრულებინა. ამის შემდეგ კომპანიამ ნაკისრი ვალდებულებების გადავადება რამდენჯერმე მოითხოვა და თანხმობაც მიიღო.

ვადების რამდენჯერმე გადავადების მიუხედავად, კომპანია ერთხელაც არ დაუჯარიმებიათ. აჭარის ფინანსთა და ეკონომიკის სამინისტროში აცხადებდნენ, რომ დარღვევა „შენობის კონსტრუქციული მდგრადობის ამაღლების მიზნით ჩატარებულმა სამუშაოებმა გამოიწვია“. თუმცა, როგორც მოგვიანებით გაირკვა, პრობლემა მხოლოდ შენობის მდგრადობას არ უკავშირდებოდა – მესაკუთრეებმა ქონების გაყოფის მიზნით ჯერ კერძო აუდიტს მიმართეს, შემდეგ კი დავა სასამართლოში გააგრძელეს.

„ბათუმელებისთვის“ ცნობილი გახდა, რომ ამ ეტაპზე დავა დასრულებულია, კომპანიის მფლობელებმა დავის შემდეგ წილები შეინარჩუნეს, კომპანიის ერთ-ერთმა მეწილემ მთავრობას ვადის გაგრძელება ისევ სთხოვა, მთავრობა კი მისგან საბანკო გარანტიას ელოდება.

„TAM GEO LLC“-ი მიწის ნაკვეთი ბათუმში, რუსთაველის ქუჩის #30-ში, აჭარის მთავრობის ყოფილმა თავმჯდომარემ, ლევან ვარშალომიძემ პირდაპირი მიყიდვის წესით, 2012 წელს გადასცა. ამ ნაკვეთთან ერთად ინვესტორს გადასცეს ნინოშვილის ქუჩის N23-ში მდებარე 513,3 კვ.მ სამეცნიერო კვლევითი ინსტიტუტის შენობა და მასზე დამაგრებული 982 კვ/მ არასასოფლო-სამეურნეო დანიშნულების მიწის ნაკვეთიც.

საქართველოს დაცული ტერიტორიების სააგენტო დისტანციურად მართვად სამ საფრენ აპარატს, დრონს შეიძენს.

სააგენტომ ელექტრონული ტენდერი უკვე გამოაცხადა. შესყიდვის სავარაუდო ღირებულება 15 500 ლარია.

ტენდერის ტექნიკური დავალების თანახმად საფრენი მოწყობილობის წონა 907 გრამი უნდა იყოს, პიქსელების რაოდენობა – არანაკლებ 20 მილიონისა, მაქსიმალური სიჩქარე არანაკლებ 70 კმ საათში, მაქსიმალური მომსახურების ზღვარი – ზღვის დონიდან არანაკლებ 6000 მეტრი, მაქსიმალური ფრენის მანძილი (უქარო ამინდში) – არანაკლებ 18 კმ.

მოწოდებულ საქონელს თან უნდა ახლდეს ქარხნული შეფუთვით გათვალისწინებული ყველა შესაბამისი აქსესუარი. საქონლის მიწოდება უნდა მოხდეს არაუგვიანეს 2018 წლის 26 დეკემბრისა.

მრავალსართულიანი მშენებლობები ბათუმის ბულვართან იმ ადგილებზეა დაგეგმილი, სადაც მიწის ქვეშ სანიაღვრე არხები გადის. ერთი ლერმონტოვის ქუჩის არხია, რომელიც წვიმის წყალს ლერმონტოვისა და მისი მიმდებარე ქუჩებიდან კრებს, ხოლო მეორეა ნურის ტბის არხი. „ბათუმელები“ დაინტერესდა, ხომ არ უქმნის პრობლემას დაგეგმილ თუ მიმდინარე პროექტებს აღნიშნული არხები და ამის გამო ხომ არ იგეგმება მათი რეკონსტრუქცია. ამ არხების, განსაკუთრებით ლერმონტოვის ქუჩის არხის, ფუნქციონირებას კი ქალაქისთვის არსებითი მნიშვნელობა აქვს, წვიმის დროს ქალაქის მნიშვნელოვანი ნაწილის დატბორვის თავიდან ასაცილებლად.

ბათუმში მთელი რიგი ადგილები, მათ შორის ლერმონტოვის ქუჩის სიახლოვეს, გუშინ, 22 ნოემბერსაც დაიტბორა.

„ნურის ტბის მიმდებარე ტერიტორიაზე არ იგეგმება მიწისქვეშა კომუნიკაციებზე რაიმე სახის ტექნიკური, სარეაბილიტაციო ან/და საპროექტო სამუშაოები“, – მოგვწერა ბათუმის მერიის შპს „ბათუმის წყალმა“.

ნურის ტბასა და ბულვარს შორის ტერიტორიაზე უკვე დაწყებულია სამუშაოები მრავალსართულიანი კომპლექსის მშენებლობისთვის. აქ ნაკვეთები კერძო კომპანიებს აჭარის მთავრობამ პირობებით მიჰყიდა. დელფინარიუმის მიმდებარედ, სადაც სანიაღვრე არხები გადის, ნაკვეთები ორი კომპანიის საკუთრებაშია: შპს „ვესტინვესტი“ [რომელიც დღეს „ორბი ჯგუფის“ შვილობილია] და შპს „ალიანს ფრივილიჯი“ [„ალიანსი“].

„ალიანს ფრივილიჯი“, რუსთაველის ქუჩაზე, 54-სართულიან და 172 მეტრი სიმაღლის მრავლფუნქციურ კომპლექსს აშენებს. მის გვერდით კი ნაკვეთი „ვესტინვესტის“ საკუთრებაშია, სადაც ეს კომპანია ასევე სასტუმრო კომპლექსს ააშენებს.

სანიაღვრე არხებთან დაკავშირებით „ბათუმელები“ აღნიშნულ კომპანიებსაც დაუკავშირდა, თუმცა პასუხები ვერ მივიღეთ, მათი პროექტების განხორციელებას რა პრობლემებს უქმნის [ან უქმნის თუ არა საერთოდ] მიწისქვეშა კომუნიკაციები.

ამ ნაკვეთებსა და ბულვარს შორის კიდევ ერთი სანიაღვრე – ნინოშვილის არხი გადის, რომელიც ზღვას არდაგანის ტბასთან უერთდება. ნინოშვილის არხი ბულვარის ველობილიკის პარალელურად გადის. ამ არხის გამართულად ფუნქციონირებისთვის კი მნიშვნელოვანია იმ სატუმბი სადგურის მშენებლობა, რომელიც ტბასთან უნდა აშენდეს. სადგურის მშენებლობა დაწყებულია და ის გეგმის მიხედვით 2020 წელში უნდა დასრულდეს.

ნურის ტბიდან გამავალი არხი ადრე ზღვას უერთდებოდა, თუმცა შემდეგ ამ არხს ზღვაზე გასასვლელი ჩაუკეტეს და დღეს, როგორს „ბათუმის წყალში“ გვეუბნებიან, ეს არხი ნინოშვილის სანიაღვრე არხს უერთდება. ნურის ტბის არხი რკინაბეტონის კონსტრუქციაა და მას დიდი მნიშვნელობა აქვს ტბისთვის.

ნურის ტბაში ადრე წყალი სანიაღვრე არხებიდანაც ჩადიოდა, თუმცა ქალაქის მერიის მიერ ჩატარებული სამუშაოების შემდეგ ეს წყლები არა ტბაში, არამედ უკვე ლერმონტოვის ქუჩის არხში იყრის თავს. ლერმონტოვის არხიდან კი წყალი ზღვაში ღიად ჩაედინება, თუმცა, მანამდე ეს არხი ნინოშვილის არხსაც კვეთს.

„ლერმონტოვის არხი და ნინოშვილის არხი ერთმანეთს უკავშირდება ყოველგვარი სპეციალური ფარების გარეშე. სიმაღლეების მიხედვით კი ისეა კონსტრუქცია, რომ ლერმონტოვის არხიდან შესაძლოა წყალი გადავიდეს ნინოშვილის არხში, თუმცა, პირიქით, რაღაც მნიშვნელოვანი თუ არ მოხდა, წყალი ლერმონტოვის არხში ვერ გადმოვა“, – გვითხრეს „ბათუმის წყალში“.

„ნურის ტბის არხი კერძო საკუთრების ქვშ ექცევა, თუმცა, ეს არ ნიშნავს, რომ არხის ოპერირების დროს რაიმე სახის პრობლემები იქმნება“, – აცხადებს „ბათუმის წყალი“. რომელი ნაკვეთის ქვეშ გადის ზუსტად ლერმონტოვის არხი დელფინარიუმიდან ზღვამდე, „ბათუმის წყალში“ ვერ დაგვიკონკრეტეს. მათგან მოწოდებული სიტუაციური ნახაზისა და საკადასტრო რუკის შედარებით კი ირკვევა, რომ ლერმონტოვის არხის ნაწილიც კერძო საკუთრებაში არსებული მიწის ნაკვეთზე გადის.

„აღნიშნულ ტერიტორიაზე სანიაღვრე არხის რაღაც ნაწილი შესაძლოა გადიოდეს კერძო საკუთრებაში. ეს არ არის ერთადერთი და უნიკალური შემთხვევა, როცა სანიაღვრე არხი გადის კერძო საკუთრებაში. ქალაქში ბევრ ადგილზე გადის სხვის საკუთრებაში სანიაღვრე არხი მიწის ქვეშ, მაგრამ ეს ამ სისტემების ოპერირებას ხელს არ უშლის. ზოგადად, თუ რაიმე დაგეგმილი ან მიმდინარე სამუშაოები ეხება მიწისქვეშა სისტემას, მშენებელი მიმართავს ქალაქის მერიას და ხდება საკითხის ერთობლივად განხილვა. დელფინარიუმთან კი, რომელიმე არხის ჩაკეტვა-გაუქმება გამორიცხულია“, – გვითხრეს „ბათუმის წყალში“.

აღნიშნულ ნაკვეთებიდან ერთ-ერთი ნაკვეთის ქვეშ ასევე გადის მილი, რომლითაც ბათუმის დელფინარიუმი ზღვის წყლით მარაგდება. დელფინარიუმში „ბათუმელებს“ უთხრეს, რომ დაგეგმილი მშენებლობების გამო მათთვის ამ დრომდე არავის მიუმართავს.

მთავარი ფოტო: ლერმონტოვის არხი ბულვარში ამ ადგილიდან ღიად უერთდება ზღვას / „ბათუმელების“ ფოტო / 23.11.2018

ბათუმის ბულვარი სხვადასხვა სახის მრავალწლიანი ხე-მცენარეებისა და ბუჩქების შესასყიდად ტენდერს აცხადებს.

ბულვარი ამჯერად უთხოვარის ორი ჯიშის, მტირალა კედარის, კვიპაროსის, წითელი ნეკერჩხლის, სოფორას, დეკორატიული ტყემლისა და ჯუჯა ვარდების ნერგებს შეიძენს.

ახალი ნარგავების შესაძენად გამოცხადებული ტენდერის სავარაუდო ღირებულება 164 150 ლარია.

დოკუმენტაციაში აღნიშნულია, რომ მოწოდებული ხე-მცენარეები და ბუჩქები მოთავსებული უნდა იყოს კონტეინერებში, ხე-მცენარეების და ბუჩქების ფესვთა სისტემა კონტეინერში განვითარებული უნდა იყოს დამოუკიდებლად, რათა მოხდეს მისი გადარგვა წელიწადის ნებისმიერ დროს;  დამუშავებული უნდა იყოს შხამქიმიკატებით და ა.შ. ასევე,  მიმწოდებელი ვალდებულია მცენარეების მოწოდებამდე შემსყიდველს წარუდგინოს მოსაწოდებელი მცენარეების ფოტოები.

ტენდერში წინადადებების მიღება 4 დეკემბერს დასრულდება.

____________

მთავარ ფოტოზე: მტირალა კედარი

საღამოს ხუთი საათისთვის საოჯახო მედიცინის ცენტრს ბათუმში, ბარათაშვილის ქუჩაზე, გრიპის საწინააღმდეგო უფასო ვაქცინაციისთვის ასამდე პირმა მიაკითხა. მათ შორის იყვნენ როგორც ხანდაზმულები, ასევ, მიიყვანეს ჩვილებიც. აქ მომუშავე ექთანმა გვითხრა, რომ სკეპტიკური დამოკიდებულება აცრების მიმართ შეიცვალა და ახლა ადამიანები მოტივირებულები არიან მსგავსი საშუალებები, მით უმეტეს თუ მისი მიღება აქციის ფარგლებში უფასოდ შეუძლიათ, აუცილებლად გამოიყენონ:

„ხუთი წლის წინ რომ შემოვიდა გრიპის საწინააღმდეგო ვაქცინა, ამასაც შიშით უყურებდნენ. თანდათან შეეჩვიენ. ახლაც არის ახალი წამლის მიმართ შიში, მერე ეჩვევიან.“

აჭარის საზოგადოებრივი ჯანდაცვის ცენტრის ინფორმაციით, უფასო ვაქცინაციისთვის გათვალისწინებული 1200 ვაქცინა უკვე ამოიწურა. გრიპის ვირუსის საწინააღმდეგო აცრა, საერთო ჯამში, ბათუმში 437-მა, ხელვაჩაურში – 243-მა, ქობულეთში 230-მა, ქედაში- 100-მა, ხულოში – 80-მა და შუახევში 110-მა პირმა გაიკეთა.

აქცია ერთდღიანი იყო და დღესვე დასრულდა.

გარდა ამისა, დამატებით უფასო ვაქცინა გათვალისწინებულია რისკ- ჯგუფებისთვისაც, როგორებიც არიან: ბავშვები, ორსულები, დიაბეტით დაავადებულები, მოხუცები, დიალიზზე მყოფი პირები, C ჰეპატიტის პროგრამაში ჩართული პირები და ა.შ.

გრიპის უფასო ვაქცინაცია ტარდება ოკუპირებულ ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროს დაავადებათა კონტროლისა და საზოგადოებრივი ჯანმრთელობის ეროვნული ცენტრის ინიციატივით.

რიკოთის უღელტეხილზე ახალი გზის მშენებლობისთვის საავტომობილო გზების დეპარტამენტმა მორიგი ხელშეკრულება გააფორმა. ამჯერად, უბისა-შორაპნის მონაკვეთის მშენებლობისთვის ხელშეკრულება ჩინურ კომპანია China Road and Bridge Corporation-თან 901 973 206 ლარზე გაფორმდა.

უბისა-შორაპნის მონაკვეთზე ცემენტ-ბეტონის 4-ზოლიანი 13 კმ-იანი გზა,  27  ხიდი და 18 გვირაბი აშენდება. სამშენებლო სამუშაოები  ევროპის საინვესტიციო ბანკისგან მიღებული სესხით დაფინანსდება. პროექტის განხორციელების ვადა, ხელშეკრულების მიხედვით,  2018 წლის დეკემბრიდან 2021 წლის დეკემბრამდეა განსაზღვრული. თუმცა სხვა პროექტებს რომ გადავხედოთ, უმეტეს შემთხვევაში სამუშაოების დასრულების ვადები გახანგრძლივებულია.

რიკოთზე დაგეგმილი ავტობანი ოთხი მონაკვეთისგან შედგება:

I სექცია – ჩუმათელეთი-ხევის მონაკვეთი – 11,7 კმ.
II სექცია – ხევი-უბისას მონაკვეთი – 12,2 კმ.
III სექცია – უბისა-შორაპნის მონაკვეთი – 13 კმ.
IV სექცია – შორაპანი-არგვეთას მონაკვეთი – 14,7კმ.

დეპარტამენტს ხელშეკრულება უკვე გაფორმებული აქვს ხევი-უბისას მონაკვეთის მშენებლობისთვისაც, 732 296 478 ლარზე, ხოლო ჩუმათელეთი-ხევის მონაკვეთზე ტენდერია გამოცხადებული, სადაც სატენდერო თანხა 376 962 285 ლარია.

რაც შეეხება შორაპანი-არგვეთას მონაკვეთს, დეპარტამენტის ინფორმაციით, მიმდინარეობს სატენდერო პროცედურები და მშენებლობის ღირებულება ხელშეკრულების გაფორმების შემდეგ გასაჯაროვდება.

რიკოთის უღელტეხილზე დაგეგმილია სულ 51.6 კმ-მდე სიგრძის გზის მშენებლობა, რომელიც 96 ხიდსა და 53 გვირაბს მოიცავს.

ამ თემაზე:

მთავარი ფოტო: ავტობანი რიკოთზე / ფოტომონტაჟი / გზების დეპარტამენტის ვიდეორგოლიდან

შუახევის მუნიციპალიტეტიდან „ბათუმელებს“ მოქალაქეები დაუკავშირდნენ და განაცხადეს, რომ მათ გრიპის უფასო აცრაზე უარი უთხრეს. მათ უთხრეს, რომ ვაქცინაცია მხოლოდ გარკვეული ჯგუფისთვის არის განკუთვნილი. აჭარის საზოგადოებრივი ჯანდაცვის ცენტრის ხელმძღვანელი რუსუდან შავიშვილი „ბათუმელებთან“ აცხადებს, რომ გრიპზე უფასო აცრა ყველა მსურველს შეუძლია.

„შუახევის მუნიციპალიტეტში, ისევე როგორც სხვა მუნიციპალიტეტებში, მოქალაქეებს შეუძლიათ მიმართონ როგორც უბნის ექიმს, ასევე დაბაში საზოგადოებრივი ჯანდაცვის ცენტრებს და ჩაიტარონ აცრა.

შესაძლოა ზოგიერთ უბნის ექიმს არ ჰქონდეს მიღებული ვაქცინა და ამის გამო შევიდა მოსახლეობა შეცდომაში. ასეთ შემთხვევაში, მოქალაქეებს შეუძლიათ დაუკავშირდნენ საზოგადოებრივი ჯანდაცვის ცენტრის წარმომადგენლებს რეგიონებში და ისინი მიაწვდიან ინფორმაციას, თუ როგორ უნდა მოიქცნენ“, – ამბობს შავიშვილი.

როგორც რუსუდან შავიშვილი ამბობს, ყველა რისკ-ჯგუფი ამ დროისთვის უკვე აცრილია და დღეს, 22 ნოემბერს დაგეგმილი ვაქცინაცია სხვა მსურველებისთვის არის გათვალისწინებული.

„4 400-მდე ვაქცინა უკვე გაკეთებულია და ისეთი რისკჯგუფები, როგორიცაა, მაგალითად, ბავშვები, ორსულები, დიაბეტიკები, მოხუცები, დიალიზზე მყოფი პირები, C ჰეპატიტის პროგრამაში ჩართული პირები და ა.შ. ყველა აცრილია. ეს არის დამატებითი ვაქცინაცია იმ მოქალაქეებისთვის, ვინც გადაწყვიტა, რომ თავი დაიცვას გრიპის ვირუსისგან“.

რუსუდან შავიშვილის თქმით, ამ დროისთვის აჭარაში გრიპის  1 200 ვაქცინაა შემოტანილი. იმის გათვალისწინებით, რომ აჭარაში ბევრად მეტი ადამიანი ცხოვრობს, „ბათუმელებმა“ რუსუდან შავიშვილს ჰკითხა, მოთხოვნის შემთხვევაში არის თუ არა ვაქცინის დამატება შესაძლებელი? მისი თქმით, ეს აჭარის საზოგადოებრივ ჯანდაცვაზე არ არის დამოკიდებული.

შენიშვნა: აჭარის საზოგადოებრივი ჯანდაცვის ცენტრმა და ჯანდაცვის სამინისტრომ მოგვიანებით განმარტა, რომ გრიპზე უფასო აცრა შეუძლიათ არა მხოლოდ ზრდასრულებს, არამედ ბავშვებსაც.