Batumelebi | ბათუმში 600 კვ.მეტრ მიწის ნაკვეთზე K2 აღარ გაიცემა – ცვლილებების პროექტი ბათუმში 600 კვ.მეტრ მიწის ნაკვეთზე K2 აღარ გაიცემა – ცვლილებების პროექტი – Batumelebi
RU | GE  

ბათუმში 600 კვ.მეტრ მიწის ნაკვეთზე K2 აღარ გაიცემა – ცვლილებების პროექტი

ბათუმის მერიის ქალაქმშენებლობისა და ურბანული დაგეგმარების სამსახურში მოამზადეს ინიციატივა, რომელიც k2 კოეფიციენტის [განაშენიანების ინტენსივობის კოეფიციენტი] გაცემის წესის შეცვლას გულისხმობს. დაგეგმილი ცვლილების მიხედვით [კონკრეტულ ფუნქციურ ზონებში], k2 კოეფიციენტის გაზრდაზე თანხმობას აღარ მისცემენ მშენებელს, რომელსაც მშენებლობა დაგეგმილი აქვს 600 კვადრატულ მეტრზე ან უფრო მცირე ზომის ნაკვეთზე.

ცვლილების მიხედვით:

  • იმ მიწის ნაკვეთებზე, რომელთა საერთო ფართი 600-1200 კვ.მ.-ია, მიწის ნაკვეთის განაშენიანების ინტენსივობის k2 კოეფიციენტი შესაძლებელია გაიზარდოს კონკრეტული ზონისათვის დადგენილი ოდენობის 50 %-ით.
  • მიწის ნაკვეთებისათვის, რომელთა საერთო ფართი შეადგენს 1200-1800 კვ.მ-ს – შესაძლებელია გაიზარდოს იმ ზონისათვის დადგენილი ოდენობის 75 %-ით.
  • 1800-2500 კვ.მ. – ზონისთვის დადგენილი 100%-ით კანონმდებლობით განსაზ­ღვრული შესაბამისი პირო­ბების დაკმაყოფილების შემთხვევაში.

გარდა ამისა, ცვლილების მიხედვით, მერია ერთსა და იმავე ნაკვეთზე k2 კოეფიციენტის გაზრდის საკითხს ხელმეორედ აღარ განიხილავს.

„განაშენიანების ინტენსი­ვობის კოეფიციენტის k2-ის გაზრდის თაობაზე, დაუშვებელია ხელმეორედ იქნეს განხილული, იმავე მიწის ნაკვეთზე, რომელზედაც უკვე განხორციელდა მიწის ნაკვეთის განაშენიანების ინტენსივობის კოეფიციენტის k2-ის გაზრდა, გარდა იმ შემთხვევებისა, როდესაც ხდება სამშენებლო მიწის ნაკვეთის საერთო ფართის 40 %-ით ან/და მეტი ოდენობით გაზრდა’’, – ნათქვამია განკარგულების პროექტში.

ცვლილება შეეხება ავტომანქანებისთვის ადგილის რაოდენობის დადგენის საკითხსაც. მისი დამტკიცების შემთხვევაში, მშენებელს ექნება ვალდებულება საზოგადოებრივ საქმიან ზონაში 150 კვ.მ-ზე, განაშენიანების ინტენსივობის კოეფიციენტის k2-ის საანგარიშო ფართობზე [სასარგებლო – სამყოფი ფართი] არანაკლებ ერთი ავტომანქანის ადგილი მოაწყოს.

საცხოვრებელ ზონაში 180 კვ.მ-ზე განაშენიანების ინტენსივობის კოეფიციენტის k2-ის საანგარიშო ფართზე მშენებელ კომპანიას, ასევე არანაკლებ ერთი ავტომანქანის ადგილის მოწყობის ვალდებულება ექნება.

სასტუმროს დანიშნულების ობიექტებისათვის კი [მათ შორის მცირე დროით დამკავებელთათვის]  ნებისმიერ ფუნქციურ ზონაში 200 კვ.მ-ზე განაშე­ნიანე­ბის ინტენსივობის კოეფიციენტის k2-ის საანგარიშო ფართზე – არანაკლებ  ერთი ავტომანქანის ადგილი უნდა გაითვალისწინონ.“

მოსალოდნელი ცვლილების შესახებ ინფორმაცია, დღეს, 13 თებერვალს, ბათუმის მერიის ქალაქმშენებლობისა და ურბანული დაგეგმარების სამსახურის ხელმძღვანელმა არქიტექტორებს მიაწოდა. მირიან მეტრეველი ამბობს, რომ მათ შენიშვნებს მოისმენენ.

პროექტი საკრებულოს განსახილველად უკვე გადაუგზავნეს. საკრებულო ამ საკითხის დამტკიცებაზე, სავარაუდოდ, მომავალ სხდომაზე იმსჯელებს.

ნეტგაზეთის მასალების სხვა გამოცემებში გადაბეჭდვის წესი
ავტორი