Batumelebi | არქიტექტორები ითხოვენ, მერიამ K2 პარკინგის ფართობის გამოკლებით გამოთვალოს არქიტექტორები ითხოვენ, მერიამ K2 პარკინგის ფართობის გამოკლებით გამოთვალოს – Batumelebi
RU | GE  

არქიტექტორები ითხოვენ, მერიამ K2 პარკინგის ფართობის გამოკლებით გამოთვალოს

ბათუმში განაშენიანების ინტენსივობის კოეფიციენტის [ K2] გაცემის წესში შესაძლო ცვლილების შესახებ მომზადებული დოკუმენტის გაცნობის შემდეგ, არქიტექტორებმა კიდევ ერთი ცვლილება მოითხოვეს. მათი მოსაზრებით, მერიამ სამშენებლო პროექტის შეთანხმებისას, K2 კოეფიციენტის საანგარიშო ფართობი პარკინგისთვის გათვალისწინებული ადგილის გამოკლებით უნდა დაითვალოს.

სამშენებლო პროექტის მომზადებისას არქიტექტორები პარკინგისთვის, ძირითადად, პირველ ორ სართულს ითვალისწინებენ. „ბათუმი ჭაობიანი ტერიტორიაა და სამშენებლო სამუშაოებისას მიწის სიღრმეში ჩასვლას ვერ ვახერხებთ,“ – განაცხადა ერთ-ერთმა მათგანმა ცვლილების პროექტის განხილვისას.

მიწის სიღრმეში არსებულ სართულს კი, სადაც, ძირითადად, პარკინგს აწყობენ,  K2 კოეფიციენტის გამოთვლისას ისედაც არ ითვალისწინებენ.

მას შემდეგ, რაც მერიამ 50-ე დადგენილებაში ცვლილება მოითხოვა, რომლის მიხედვითაც საზოგადოებრივ საქმიან ზონაში მენაშენეს 120 კვ/მეტრზე ერთი ავტომანქანის ადგილის გათვალისწინება [K2-ის საანგარიშო ფართობზე], ხოლო საცხოვრებელ ზონაში 150 კვ/მ -ზე ერთი ავტომანქანის ადგილის გათვალისწინება დაავალდებულეს, მშენებელს უწევს პირველი ან პირველი ორი სართულის პარკინგის მოსაწყობად გამოიყენოს. ეს ცვლილება 2017 წლის ივლისში  დაამტკიცეს, მანამდე კი მრავალბინიანი სახლები ბათუმში ეზოსა და პარკინგის ადგილის გარეშე შენდებოდა.

განაშენიანების ასეთი სტანდარტები  მომავალში რომ პრობლემას შექმნიდა, ამაზე მოქალაქეები გასულ წლებშიც საუბრობდნენ, თუმცა ეს საკითხი მაშინ არც მერიას გაუთვალისწინებია და არც საკრებულოს.

სწორედ ქალაქში შექმნილი მდგომარეობით აუხსნა ბათუმის მერიის ქალაქმშენებლობისა და  ურბანული პოლიტიკის სამსახურის ხელმძღვანელმა, მირიან მეტრეველმა არქიტექტორებს K2 კოეფიციენტის გაცემის წესში ცვლილების საჭიროება. ცვლილების დამტკიცების შემთხვევაში, K2 კოეფიციენტის გაზრდის შესაძლებლობა სამშენებლო ტერიტორიის ფართობის მიხედვით დიფერენცირებული იქნება.

იმ მოტივით, რომ მშენებლები არ დაიჩაგრონ, არქიტექტორებმა შეხვედრაზე მოითხოვეს K2-ის საანგარიშო ფართობიდან პარკინგისთვის საჭირო ორი სართულის გამოკლება, მიუხედავად იმისა, რომ მშენებელი, ხშირ შემთხვევაში, პარკინგის ადგილებსაც ისევე სარფიანად ყიდის, როგორც საცხოვრებელ ფართობს.

ერთ-ერთი მშენებლის აზრით, პარკინგი არა K2-ის საანგარიშო ფართობით, არამედ ბინების რაოდენობით უნდა დაითვალონ. „გეთანხმებით მხოლოდ სასტუმროებთან მიმართებაში, სადაც რესტორნები და სხვა საზოგადოებრივი ობიექტები შედის“, – განაცხადა ამ მშენებელმა. მას მერიის წარმომადგენლებმა უპასუხეს, რომ პროექტის შეთანხმების დროს მშენებლები სადარბაზოებში ხშირად ბინების ნაკლებ რაოდენობაზე ჩივიან, შემდეგ ამ ფართობს ყოფენ ორ ან სამ ბინად და მერიისთვის ამის შესახებ ცნობილია.

 

მთავარ ფოტოზე: არქიტექტორები მერიაში შეხვედრაზე.

ბათუმში 600 კვ.მეტრ მიწის ნაკვეთზე K2 აღარ გაიცემა – ცვლილებების პროექტი

ნეტგაზეთის მასალების სხვა გამოცემებში გადაბეჭდვის წესი
ავტორი