Batumelebi

საქართველოს პროკურატურის ცნობით, საქართველოდან ამერიკის შეერთებულ შტატებში განხორციელდა აშშ-ს გამოძიების ფედერალური ბიუროს მიერ ძებნილი რუსეთის მოქალაქის ექსტრადიცია.

აშშ-ში ჩატარებული გამოძიების ვერსიის თანახმად, რუსეთის მოქალაქე 2016-2019 წლებში მისივე შექმნილი კომპიუტერული ვირუსის გამოყენებით დაზარალებულების, მათ შორის, ფლორიდაში მცხოვრები პირების კომპიუტერულ სისტემაში შესაღწევად საჭირო მონაცემებს დაეუფლა.

„ამასთან, ძებნილი პირი ინტერნეტპლატფორმის გამოყენებით მოპოვებულ მონაცემებს და თავად კომპიუტერულ ვირუსს სხვა პირებზე ასაღებდა. აღნიშნული ქმედებების შედეგად, ბრალდებულმა დაახლოებით 1 000 000 ლარის ოდენობის შემოსავალი მიიღო“ – წერს პროკურატურა.

ძებნილი პირი საქართველოში 2022 წლის 22 ოქტომბერს, ქობულეთში დააკავეს.

ბრალდებულის აშშ-ში ექსტრადიცია თბილისის საქალაქო სასამართლომ დასაშვებად ცნო, რის შემდგომაც რუსეთის ფედერაციის მოქალაქე აშშ-ს კომპეტენტური ორგანოების წარმომადგენლებს გადაეცა.

დღეს, 14 მარტს, ბათუმის საკრებულოს წევრმა, რეზო ხარაზმა განცხადება გააკეთა ბათუმის ბულვარში, ბატუტზე 9 წლის ბავშვის დაღუპვასთან დაკავშირებით.

ხარაზის თქმით, უნდა დადგეს ქალაქის მერის, არჩილ ჩიქოვანის პასუხისმგებლობის საკითხი. „ჩვენ მალე მივმართავთ საკრებულოს უმრავლესობას, რომ დავიწყოთ უნდობლობის გამოცხადების პროცედურა და პარალელურად, შევაგროვებთ ხელმოწერებსაც მოსახლეობაში“, – ამბობს რეზო ხარაზი.

„ძალიან დიდი ტრაგედიაა, როცა ბავშვი დაიღუპა ატრაქციონზე. გუშინ ჩვენ ვნახეთ უპასუხისმგებლო ხელისუფლების წარმომადგენელი, ქალაქის მერი არჩილ ჩიქოვანი, რომელიც არც კი პასუხობს კითხვებს, არის თუ არა დაცული უსაფრთხოების წესები ატრაქციონებზე.

დავინახეთ, როგორ შეაქცია ზურგი ჟურნალისტებს და არ უპასუხა კითხვებს, რომელიც არა მხოლოდ ჟურნალისტების, არამედ მოსახლეობის კითხვებიცაა.

მერს არ აუღია პასუხისმგებლობა, როცა ქალაქში ჩამოიქცა საცხოვრებელი კორპუსი, არ იღებს პასუხისმგებლობას ჩამოვარდნილ ლიფტებზე, დამწვარ მრავალსართულიან სახლზე, იმაზე, რომ სახანძრო კიბე არ არსებობს ამ ქალაქში, არც 9 წლის ბავშვის დაღუპვაზე.

პასუხისმგებლობას იღებს მხოლოდ თავის ხელფასზე, თავის ფუფუნებაზე, „ატკატებზე“, ქალაქის ჩაბეტონებაზე, ახლობლებისა და ნათესავების დასაქმებაზე“, – ამბობს ხარაზი.

მისი თქმით, როცა ტრაგედია ხდება ამ ქალაქში, სამგლოვიარო ცერემონიალზე ყვავილით ჩამოვლა შეუძლია მხოლოდ მერს, „სხვა არაფერზე არ იღებს პასუხისმგებლობას“.

„ამიტომ უნდა დავიწყოთ მერისთვის უნდობლობის გამოცხადების პროცედურა. პარალელურ რეჟიმში დავიწყებთ ხელმოწერების შეგროვებას, რომ უნდობლობა გამოვუცხადოთ მერს“, – ამბობს რეზო ხარაზი.

მისი თქმით, მერის გარდა ყველა იმ სამსახურების ხელმძღვანელების საკითხიც უნდა დადგეს, რომლებიც პასუხისმგებელნი არიან ქალაქში არსებული ინფრასტრუქტურის უსაფრთხოებაზე.

„ეს ქალაქი იქცა ტრაგედიების ქალაქად, უპასუხისმგებლოდ ეკიდებიან როგორც ადგილობრივების, ასევე სტუმრების უსაფრთხოებას, ამიტომ ასეთი მერი ამ ქალაქს არ უნდა ხელმძღვანელობდეს“, – ამბობს ხარაზი.

მისი თქმით, ყველა ტრაგედიის შემდეგ პასუხისმგებლობას აკისრებენ მუშას ან რომელიმე დაბალი რგოლის წარმომადგენლებს. „არადა, მერს უნდა დაეკისროს პასუხისმგებლობა, რადგან მის მოვალეობაშიც შედის მსგავსი ობიექტების კონტროლი“, – ამბობს ხარაზი.

„Перезвоню позже“ – მთელი დღეა ამ ავტომატურ SMS შეტყობინებას იღებს „ბათუმელები“ ბათუმის ბულვარის დირექტორის მოვალეობის შემსრულებლის, ლაშა მიქელაძისგან.

ბათუმის ბულვარში 12 მარტს, გვიან ღამით, ბატუტზე 9 წლის ბავშვი დაიღუპა. კიდევ ერთი მცირეწლოვანი, გარდაცვლილის ძმა, 3 წლის ბავშვი კი, ამ დრომდე საავადმყოფოში რჩება. დილის მონაცემებით მისი მდგომარეობა მძიმეა.

ბავშვის დაღუპვიდან 20 საათი გავიდა. ამ დრომდე არც ბათუმის მერია და არც ბათუმის ბულვარი არ პასუხობს კითხვებს, ბოლოს როდის შეამოწმეს ბულვარში ატრაქციონების უსაფრთხოება?

კითხვები, რომლებზე პასუხსაც სახელმწიფო უწყებები არ სცემენ

• ვის ეკუთვნოდა ატრაქციონი, რა ფორმით და რა პირობით იყო ბულვარში ტერიტორია მესაკუთრეზე გაცემული?
• როდის დამონტაჟდა ეს ატრაქციონი?
• უტარდებოდა თუ არა ტექნიკური დათვალიერება ატრაქციონს?
• ბოლოს როდის ჩატარდა გასართობი ატრაქციონის ტექნიკური შემოწმება, ვინ ჩაატარა და რა დასკვნა დაიდო?

მიუხედავად იმისა, რომ მთელი დღის განმავლობაში ვცდილობდით „ბათუმის ბულვარის“ ადმინისტრაციასთან დაკავშირებას, აღნიშნულ კითხვებზე პასუხი ვერ მივიღეთ.

„Перезвоню позже“ [მოგვიანებით დაგირეკავთ] – ამ ავტომატურ შეტყობინებას ვიღებდით მთელი დღის განმავლობაში ლაშა მიქელაძის ტელეფონიდან. მასთან დაკავშირება დღის განმავლობაში არაერთგზის ვცადეთ, მაგრამ უშედეგოდ. დღის ბოლოს ბულვარის დირექტორმა ტელეფონში მუდმივი დაკავების ფუნქციაც გააქტიურა.

„ბათუმელებმა“ კითხვებზე პასუხის მიღება ბათუმის მერისგანაც სცადა.

ვის ეკისრება მომხდარ ფაქტზე პასუხისმგებლობა და იყო თუ არა უსაფრთხოების ნორმები დაცული? – ჟურნალისტებმა ეს კითხვა არჩილ ჩიქოვანს დაუსვეს.

„ძალიან სამწუხარო ფაქტი მოხდა გუშინ. ვიზიარებ გარდაცვლილი, ახალგაზრდა ბავშვის გარდაცვალებას და ვუსამძიმრებ მის ოჯახს. მეორე მცირეწლოვანს, რომელიც ტრავმებით მოხვდა საავადმყოფოში, ვუსურვებ გამოჯანმრთელებას.

ამ ეტაპისათვის მიმდინარეობს გამოძიება. გამოძიების ფარგლებში დაკავებულია ერთი პირი. გამოძიების ინტერესებიდან გამომდინარე შემდგომ საგამოძიებო მოქმედებებს რომ ხელი არ შეეშალოს, ამ ეტაპისათვის სხვა ინფორმაციის გაჟღერება არ შემიძლია. თუმცაღა დარწმუნებული ვარ, რომ გამოძიება დაადგენს ობიექტურ მიზეზებს, თუ რის გამო მოხდა აღნიშნული ტრაგედია. შესაბამისად იქნება რეაგირება,“ – ამ ზოგადი, შინაგან საქმეთა სამინისტროს მიერ გავრცელებული ინფორმაციის მსგავსი კომენტარით შემოიფარგლა ბათუმის მერი.

არჩილ ჩიქოვანმა არ უპასუხა კითხვებს, გასართობი ატრაქციონის ტექნიკურ შემოწმებასა და უსაფრთხოების ნორმების დაცვაზე. მერმა კითხვებზე პასუხის ნაცვლად ჟურნალისტებს ზურგი შეაქცია და ისე მოიქცა, თითქოს არ ესმოდა მისი მისამართით დასმული კითხვები.

რა ვიცით მომხდარ ფაქტზე ამ დროისთვის

შსს-ს ინფორმაციით,  12 მარტს, ძლიერი ქარის გამო, ბათუმის ბულვარში მდებარე ე.წ. ბატუტი გადაბრუნდა, რა დროსაც კონსტრუქციაზე მყოფი ორი მცირეწლოვანი დაშავდა, რომელთაგან ერთ-ერთი – 2014 წელს დაბადებული დ.პ. მიღებული დაზიანებების შედეგად გარდაიცვალა. მომხდარის გამო დაშავდა კიდევ ერთი მოქალაქე.

ბათუმის ბულვარში მომხდარი ფაქტის გამოძიების ფარგლებში ერთი პირი – 1958 წელს დაბადებული ე.ა. დააკავეს.

„საგამოძიებო მოქმედებების შედეგად დადგინდა, რომ ბრალდებული პასუხისმგებელი იყო ბულვარში განთავსებული აღნიშნული ე.წ. ბატუტის უსაფრთხოებასა და ექსპლუატაციის წესების დაცვაზე, თუმცა მან დაკისრებული ვალდებულებების შესრულება ვერ უზრუნველყო,“ – ნათქვამია შსს-ს განცხადებაში.

გამოძიება საქართველოს სისხლის სამართლის კოდექსის 240-ე მუხლის მეორე ნაწილით მიმდინარეობს, რაც გულისხმობს უსაფრთხოების წესის დარღვევას, რამაც ადამიანის სიცოცხლის მოსპობა გამოიწვია.

27 წლის ბათუმელი თამთა ჩხეიძე ნიუ იორკში, აინშტაინის სამედიცინო ცენტრში მუშაობს. ეს ცენტრი მოიცავს უნივერსიტეტს, ჰოსპიტალს და კვლევით ცენტრებს. „საოცნებო გარემოში“ მოხვედრის შემდეგ თამთა მეცნიერებითაც დაინტერესდა. აღფრთოვანებულია იმით, რომ ჩართულია კვლევაში, რომელიც მედიცინაში ხელოვნური ინტელექტის დანერგვაზე მუშაობს.

ერთი წელია, რაც თამთა ნიუ იორკში გადავიდა საცხოვრებლად. მან ექიმის სალიცენზიო გამოცდები ჩააბარა, აშშ-ში სამუშაოდ დიპლომის აღიარება მიიღო, შემდეგ კი მუშაობის დასაწყებად აპლიკაცია შეავსო.

როგორც გვიყვება დატვირთული გრაფიკის მიუხედავად, თამთამ ყოველთვის იცის, რა ხდება საქართველოში და ცდილობს, თავისი პოზიცია ღიად დააფიქსიროს, როცა ამას საჭიროდ მიიჩნევს.

თამთას ბოლო აქტივობა, რომელიც მისი, როგორც მოქალაქის პოზიციას გამოხატავდა, „რუსული კანონის“ წინააღმდეგ გამოსვლა იყო. თბილისში დაწყებული საპროტესტო აქციების პარალელურად ემიგრანტებმა აქცია – „არა რუსულ კანონს“ ნიუ იორკშიც გამართეს, რომელშიც თამთაც მონაწილეობდა.

„სტუდენტობის პერიოდში რამდენჯერმე ვიმოგზაურე ევროპაში. მეც მქონდა საშუალება, მიმეღო დაფინანსება არასამთავრობო ორგანიზაციისგან, რომელიც ფინანსდებოდა ევროპიდან. ისინი ახალგაზრდებს აძლევდნენ საშუალებას, ნებისმიერ ევროპულ ქვეყანაში წასულიყვნენ და მიეღოთ გამოცდილება, ხარჯების 80 პროცენტს ფარავდნენ. ჩამონათვალში იყო აზიის ქვეყნებიც, მაგრამ მე ევროპა ავირჩიე და იქ 2 თვის განმავლობაში, სხვადასხვა ოჯახთან ერთად ვცხოვრობდი.

„ძალიან ბევრ საგანმანათლებლო დაწესებულებასთან გვქონდა შეხება, გარდა იმისა, რომ უნივერსიტეტში ლექციები და ტრენინგები გვიტარდებოდა. დაფინანსების გარეშე ალბათ ვერც წავიდოდი. შანსი მომეცა, ბევრი ადამიანი გამეცნო სხვადასხვა ქვეყნიდან. მათთან დღემდე მაქვს არამხოლოდ მეგობრული, არამედ საქმიანი ურთიერთობაც კი. იმდენი რაღაც მომცა ამ რამდენიმე თვემ…

და ამ ადამიანებს, რომლებიც ასეთ კარგ საქმეს აკეთებენ, აგენტები უნდა დავუძახოთ? – მათ უკან ხომ უბრალო ადამიანები დგანან. ამ კარგ სარგებელს იღებენ სტუდენტები, ფერმერები, სოციალურად დაუცველები, მარტოხელა დედები, ძალიან ბევრი“ – ამბობს თამთა. 

თამთამ საქართველოში სახელმწიფო სამედიცინო უნივერსიტეტი დაამთავრა, აშშ-ში სამედიცინო სალიცენზიო გამოცდებისთვის კი სტუდენტობაშივე დაიწყო მზადება:

„თავიდანვე გავაკეთე არჩევანი – რა მინდოდა, სად მინდოდა წასვლა და ამისთვის დავისახე გეგმა. როცა გავარკვიე, რომ ჩემს უნივერსიტეტს ჰქონდა აკრედიტაცია, რომელიც მაძლევდა შესაძლებლობას ჩემი დიპლომი ეღიარებინათ და ამის შემდგომ მომცემდნენ უფლებას, რომ გამოცდაზე გავსულიყავი, დავიწყე მზადება.

ეს საკმაოდ რთული, მრავალეტაპიანი გამოცდაა და რამდენიმე წელი დავუთმე ამ გამოცდებისთვის მზადებას დამოუკიდებლად. იმდენად დიდი დრო და ენერგია წაიღო, რომ ძალიან ბევრ რამეზე მომიწია უარის თქმა. ვგულისხმობ, მაგალითად, გაცვლით პროგრამებს. რამდენიმეზე ვიყავი, მაგრამ ბევრზე უარის თქმა მომიწია“.

უნივერსიტეტის დასრულებას პანდემიის პერიოდი დაემთხვა. თამთას გეგმებიც დროში გაიწელა: გამოცდები, გასამგზავრებლად საჭირო დოკუმენტები… თუმცა თამთას უკან არ დაუხევია.

გამოცდების ჩასაბარებლად ჯერ თურქეთის დედაქალაქ ანკარაში ჩავიდა, ეს ქალაქი ერთ-ერთია იმ ქალაქებს შორის, სადაც საგამოცდო ცენტრი ფუნქციონირებს, შემდეგ კი ნიუ იორკში, აინშტაინის სამედიცინო ცენტრიდან მიიღო თანხმობა.

თამთა გვიყვება, რომ აქ ის საოცნებო გარემოში მოხვდა. ამ გარემომ მას ახალი ინტერესები გაუჩინა, ახლა თამთას კლინიცისტობის პარალელურად უნდა მეცნიერებაში მოსინჯოს ძალები.

„აღმოვაჩინე, რომ გარდა იმისა, რისთვისაც ვემზადებოდი, ძალიან ბევრი შესაძლებლობა იყო. მაგალითად, კლინიკური კვლევები, რაც ყოველთვის მაინტერესებდა. ჩემი მიზნები კიდევ უფრო გაიზარდა, აღმოვაჩინე, რომ მინდოდა ვყოფილიყავი ექიმი-მეცნიერი და არამხოლოდ კლინიცისტი, რომელსაც მხოლოდ პაციენტებთან ურთიერთობა ექნებოდა.

ამჯერად ვმუშაობთ კვლევებზე, რომლებიც ორიენტირებულია ხელოვნური ინტელექტის დანერგვაზე ულტრათანამედროვე მედიცინაში. არც ვიფიქრებდი, რომ ვიქნებოდი ადამიანი, რომელიც ჩართულია ამ ყველაფერში.

ამ პროექტის გარდა ვმუშაობთ კოვიდის შემდგომ ისეთ გართულებებზე, როგორიცაა: გულის მწვავე დაზიანება, თირკმლის მწვავე დაზიანება და ა.შ.“ – გვიყვება თამთა.

კითხვაზე, რატომ წავიდა ამერიკის შეერთებულ შტატებში, თამთამ გვიპასუხა, რომ ამის უმთავრესი მიზეზი კარგი განათლების მიღების შესაძლებლობაა:

„სამწუხაროდ, მიუხედავად იმისა, რომ ძალიან დიდ პატივს ვცემ სახელმწიფო სამედიცინო უნივერსიტეტს, საგანმანათლებლო სისტემა, ისევე, როგორც სხვა საგანმანათლებლო დაწესებულებაში, უფრო საბჭოთა სტილის იყო. მაღალი ხარისხის, დასავლურ განათლებას, სამწუხაროდ, ვერ მთავაზობდა ჩემი უნივერსიტეტი.

საქართველოში, როდესაც ამთავრებ უნივერსიტეტს, რეზიდენტურაზე უნდა ჩააბარო იმისთვის, რომ აიღო დამოუკიდებლად მუშაობის ლიცენზია და გახდე დამოუკიდებელი ექიმი. რეზიდენტურა არის სამწლიანი, ოთხწლიანი – გააჩნია, რა სპეციალობას ირჩევ, ყველა ქვეყანაში გაქვს ანაზღაურება, გარდა რუსეთის ან ბელარუსისა. ამერიკაში და ევროპის ბევრ ქვეყანაში ეს ანაზღაურება საკმაოდ კარგია, საქართველოში კი რეზიდენტურა არის ფასიანი. წარმოიდგინეთ, ახალგაზრდა ექიმები მუშაობენ, მორიგეობენ – რაც არ გიტოვებს შანსს, რომ პარალელურად სხვაგან იმუშაო და დაფარო ეს ხარჯები.

ბევრმა დატოვა ამის გამო საქართველო, თუმცა ძალიან ბევრი დარჩა. ძალიან დიდ პატივს ვცემ მათ, იმიტომ, რომ ეს არის, ფაქტობრივად, ახალგაზრდობის წლების შეწირვა“.

თამთა გვიყვება, რომ თავს შესვენების უფლება არ მისცა და ნიუ იორკში დაბინავებისთანავე დაიწყო სამსახურის ძებნა, მალევე აინშტაინის სამედიცინო ცენტრის აპლიკაცია შეავსო, საიდანაც მეორე დღესვე დაუკავშირდნენ:

„როგორც კი ჩამოვედი, ზუსტად ვიცოდი, რომ რამდენიმე დღეში დავიწყებდი სამსახურს. ყველას ეცინებოდა, მეუბნებოდნენ, რამდენიმე კვირა მაინც მიეცი საკუთარ თავსო, მაგრამ არა, მე აქ ჩამოვედი განათლების მისაღებად.

რამდენიმე დღეში დავიწყე სამსახური. სპეციალობა ჯერ არ მაქვს, იმიტომ, რომ რეზიდენტურა უნდა გავიარო, შინაგანი მედიცინა არის ჩემი სპეციალობა, ქართულად – თერაპია, მაგრამ საბოლოოდ კარდიოლოგობას ვაპირებ.

აქ ცოტა სხვა სისტემაა, ჯერ გადიხარ თერაპიის რეზიდენტურას, იღებ დამოუკიდებელი ექიმის ლიცენზიას და შემდგომ უკვე ირჩევ სპეციალობას. თუმცა, როგორც აღმოჩნდა, მეცნიერება ისევე მაინტერესებს, როგორც კლინიცისტობა. შეიძლება PHD -ხარისხიც ავიღო მომავალში, ჯერ კიდევ სიახლეების აღმოჩენის პროცესში ვარ“ – ამბობს თამთა.

ბათუმში, ვაჟა-ფშაველას და გიორგი ბრწყინვალის ქუჩების კვეთაში, ხანძარია. პირველადი ინფორმაციით, ცეცხლი დაბალსართულიან სახლებს უკიდია.

ამ დროისთვის ადგილზე მობილიზებულია სახანძრო  და სასწრაფო დახმარების ჯგუფები.

წინასწარი ინფორმაციით, დაზიანდა 11 ოჯახის საცხოვრებელი სახლი.

ინფორმაცია განახლდება. 

____________

ფოტოზე: სქრინი პირდაპირი ჩართვიდან

წელს ბსუ-ში ჰუმანიტარულ მეცნიერებათა ფაკულტეტის მიმართულებით საგანმანათლებლო პროგრამების კლასტერული აკრედიტაცია მიმდინარეობს.

რომელი სპეციალობებია წარდგენილი სააკრედიტაციოდ, რომელმა სპეციალობებმა გაიარა უკვე აკრედიტაცია, რომელი სპეციალობების აკრედიტაციის განხილვა მიმდინარეობს ჯერ კიდევ, რა შეიცვალა ამა თუ იმ საფეხურზე, სპეციალობაზე სწავლებაში? – ამის შესახებ ბსუ-ში ჰუმანიტარულ მეცნიერებათა ფაკულტეტის დეკანს, თეონა ბერიძეს ვკითხეთ. ის ამ თანამდებობაზე ახლახან აირჩიეს.

თეონა ბერიძის ინფორმაციით, სულ სამი – ენების, ფილოლოგიის და ისტორია-არქეოლოგიის კლასტერი ჰქონდათ აკრედიტაციისთვის წარდგენილი.

„ენების კლასტერში  გაერთიანებული იყო 8 პროგრამა – გერმანული, რომანული, სლავური, ინგლისური ფილოლოგიისა და თურქოლოგიის საბაკალავრო პროგრამები. ასევე, ევროპული ფილოლოგიის სამაგისტრო პროგრამა, რომელიც თავისთავად ინგლისურ, გერმანულ და ფრანგულ მოდულებად არის ჩაშლილი. თარგმანთმცოდნეობისა და კულტურათაშორისი კომუნიკაციის სამაგისტრო პროგრამა და თურქოლოგიის სამაგისტრო პროგრამა“, – გვითხრა თეონა ბერიძემ.

მისი თქმით, ენების კლასტერმა სრულად გაიარა აკრედიტაცია და თითოეულ პროგრამას, 15 თებერვლის გადაწყვეტილებით, 7-წლიანი აკრედიტაცია მიენიჭა, თუმცა პროგრამებში შევიდა ცვლილებებიც.

„რუსული ფილოლოგიის მონაცვლედ წარვადგინეთ სლავური ფილოლოგიის საგანმანათლებლო პროგრამა. პროგრამა უფრო გაფართოვდა თანამედროვე ბაზრის მოთხოვნების შესაბამისად და მხოლოდ რუსულ ენაზე კი არ კეთდება აქცენტი, არამედ, ზოგადად, სლავურ ფილოლოგიაზე. შესაბამისად, თითოეულ კურსდამთავრებულს ექნება რუსულ ენასთან ერთად, ასევე მისი არჩევანის შესაბამისად, ან უკრაინული, ან პოლონური ენის ფლობის კომპეტენცია.

ფრანგული ფილოლოგიის ნაცვლად წარმატებით გაიარა აკრედიტაცია რომანული ფილოლოგიის პროგრამამ, სადაც ასევე უფრო გაფართოვდა საგანმანათლებლო პროგრამის არეალი და ფრანგული ძირითადი ენის პარალელურად სტუდენტებს შესაძლებლობას ვაძლევთ აირჩიონ ან ესპანური, ან იტალიური ენა, რომლის ენობრივ კომპეტენციასაც მიიღებს.

გარდა ამისა, თითოეულ საგანმანათლებლო პროგრამაში კიდევ ერთხელ გადაიხედა, როგორც სასწავლო გეგმა, სასწავლო კურსები, ასევე სასწავლო კურსების მოცულობა და მათი წილი სასწავლო გეგმაში. რიგ შემთხვევაში შეიცვალა კრედიტები, რიგ შემთხვევაში საათების რაოდენობა და ჩვენი ბოლო წლების გამოცდილების, აგრეთვე სტუდენტების ყოველსემესტრული გამოხმაურების, შრომის ბაზრის კვლევის, კურსდამთავრებულთა გამოკითხვის შესაბამისად მოხდა მოდიფიცირება.

რიგ შემთხვევაში, სასწავლო კურსის შესაძლოა გაიყოს 2 ნაწილად, რიგ შემთხვევაში გაერთიანდეს. მაგალითად, მე რადგან გერმანული საგანმანათლებლო პროგრამის ხელმძღვანელიც ვარ, შემიძლია გითხრათ, რომ ამ პროგრამაში გერმანული ლიტერატურის ისტორია 4 სემესტრში ისწავლებოდა და ახლა, მასალების მოცულობიდან გამომდინარე, 5 სემესტრადაა გაყოფილი“, – ამბობს თეონა ბერიძე.

მისი თქმით, ყველა პროგრამაში გამრავალფეროვნდა არჩევითი კურსებიც. ენების კლასტერის შემთხვევაში დარგობრივ ენებს უფრო მეტი ყურადღება მიექცა და თუ კი ადრე ძირითადად ბიზნესის ენა ისწავლებოდა, ახლა ისწავლება მედიის ენა, სამართლის ენა, ტურიზმის ენა და ბიზნესის ენა.

„ბათუმელებმა“ თეონა ბერიძეს ჰკითხა პრობლემაზე, რაც სტუდენტებისგან ხშირად ისმის –  სტუდენტებს უნივერსიტეტის ადმინისტრაციაში აფრთხილებენ, რომ არჩევით საგანზე სწავლის დასაწყებად საჭიროა სტუდენტების კონკრეტული რაოდენობა, ხშირ შემთხვევაში კი, ეს „საჭირო“ რაოდენობა ვერ გროვდება. აქედან გამომდინარე, ხომ არ არის მოჩვენებითი არჩევითი საგნების რაოდენობის გაზრდა და რა გეგმა აქვს უნივერსიტეტს იმ სტუდენტების ინტერესების დასაკმაყოფილებლად, რომლებიც ირჩევენ ნაკლებად მოთხოვნად საგნებს.

„ვითვალისწინებთ შიდა რესურს, როგორც აკადემიურს, ასევე მატერიალურს და მაქსიმალურად ვცდილობთ, ისეთი მოქნილი იყოს სასწავლო გეგმა, შემოთავაზებული არჩევითი კურსების ფორმატი და შესაძლებლობა, რომ სტუდენტს დავუტოვოთ თავისუფალი არჩევანი.

რიგ შემთხვევებში არათანაბრად ხდება სტუდენტების გადანაწილება, თუმცა უნივერსიტეტი მაქსიმალურად ცდილობს, შესაძლებლობების ფარგლებში არ შეუზღუდოს არჩევანის თავისუფლება და მაქსიმალურად გაითვალისწინოს სტუდენტების მოთხოვნები“, – ამბობს თეონა ბერიძე.

თეონა ბერიძის თქმით, ფილოლოგიის კლასტერი აერთიანებს ქართული ფილოლოგიის საბაკალავრო პროგრამას, ლიტერატურათმცოდნეობას და ლინგვისტიკის მიმართულებით სამაგისტრო და სადოქტორო პროგრამებს. ისტორია-არქეოლოგიის კლასტერი კი სამივე საფეხურის პროგრამებს ისტორიისა და არქეოლოგიის მიმართულებით.

ეს ორი კლასტერი ახლაც აკრედიტაციის პროცესშია – „პირველადი დადებითი დასკვნები მიღებული გვაქვს. გვწამს, რომ როდესაც საბჭო ჩაინიშნება, ესენიც სრულად გაივლიან აკრედიტაციას მომდევნო 7 წლით“.

თეონა ბერიძის თქმით, ყველა სხვა პროცედურა ამ 2 სააკრედიტაციო კლასტერებზე გავლილია და საბჭოს ჩანიშვნას მარტის შუა რიცხვებში ელიან.

დეკანის თქმით, ასევე გადახალისდა საგანმანათლებლო პროგრამები: რიგ შემთხვევაში დაზუსტდა და შეიცვალა კვალიფიკაციები, რიგ შემთხვევაში დარჩა როგორც საგანმანათლებლო პროგრამა, ასევე მისანიჭებელი კვალიფიკაცია, თუმცა შევიდა შინაარსობრივი და თემატური ცვლილებები. ცვლილება შეეხო სასწავლო კურსების სახელწოდებებს, კრედიტების მოცულობას და საათების რაოდენობას.

დეკანის განმარტებით, ძირითადი ცვლილება, რაც ყველა პროგრამას შეეხო, ისაა, რომ საბაკალავრო ნაშრომის დაწერა თითოეული სტუდენტისთვის სავალდებულო გახდა. აქამდე სტუდენტს შეეძლო ნაშრომის დაწერის ნაცვლად 10 კრედიტის მოცულობის არჩევითი საგნები გაევლო.

თეონა ბერიძის თქმით, თურქეთის მცოდნეობასა და თურქულის საგანმანათლებლო პროგრამას აკრედიტაციის ვადა პირველი მაისს ეწურება და ამ პროგრამის ფარგლებში ათვისებული კრედიტები და მიღებული დიპლომი ვალიდური აღარ იქნება.

დეკანის თქმით, პროგრამის რეაკრედიტაციისთვის შეიმუშავეს თურქოლოგიის საგანმანათლებლო პროგრამა, რომელიც გააერთიანებს თურქეთის მცოდნეობასა და თურქულ ფილოლოგიას.

„სახელი შეეცვალა – თურქეთის მცოდნეობა და თურქული ფილოლოგია გაერთიანდა. აკრედიტაცია გავიარეთ თურქოლოგიის სახელწოდებით. რუსული ფილოლოგიის ნაცვლად, აკრედიტაცია გაიარა სლავურმა ფილოლოგიამ, ფრანგულის ნაცვლად რომანულმა ფილოლოგიამ და ევროპეისტიკის სამაგისტრო პროგრამის ნაცვლად აკრედიტაცია გაიარა ევროპული ფილოლოგიის სამაგისტრო პროგრამამ“, – ამბობს თეონა ბერიძე.

აკრედიტაციას აღარ ექვემდებარება თარგმანთმცოდნეობის საგანმანათლებლო პროგრამა. თეონა ბერიძის თქმით, ამ პროგრამის საკვალიფიკაციო ჩარჩოში ცვლილებები საქართველოს მასშტაბით 2022 წლის აგვისტოში შევიდა, რომლის მიხედვითაც თარგმანთმცოდნეობის კვალიფიკაციას ვეღარ მიიღებენ ბაკალავრის სტუდენტები – პროგრამამ სამაგისტრო საფეხურზე გადაინაცვლა.

„[თარგმანთმცოდნეობის] სტუდენტებთან იყო უშუალო კომუნიკაცია. პროგრამაზე ჩარიცხული სტუდენტების ნაწილი მობილობით გადავიდა სხვა პროგრამაზე. რაც შეეხება მეოთხეკურსელებს, მათთვის ინდივიდუალური სასწავლო გეგმა შემუშავდა და პირველ მაისამდე, ნაცვლად ივლისის თვისა, ისინი ასრულებენ საბაკალავრო პროგრამას. შესაბამისად, ძველი აკრედიტაციის პირობებში მიიღებენ კვალიფიკაციას და ბაკალავრის დიპლომს“, – განმარტა დეკანმა.

„სალიცენზიო და სანებართვო მოსაკრებლების შესახებ“ კანონში შესული ახალი ცვლილებით ონლაინ თამაშობების მოწყობა ფასიანი იქნება. კერძოდ:

• სისტემურ-ელექტრონული ფორმით სამორინის თამაშობების ორგანიზებისთვის ბიუჯეტში გადასახადი წელიწადში 5 მილიონი ლარი იქნება;
• სისტემურ-ელექტრონული ფორმით სათამაშო აპარატების თამაშობების ორგანიზებისთვის – წელიწადში 1 მილიონი ლარი;
• სისტემურ-ელექტრონული ფორმით ტოტალიზატორის თამაშობების ორგანიზებისთვის კი – წელიწადში 100 ათასი ლარი.

ახალი ცვლილება უშვებს გამონაკლისსაც:

• სისტემურ-ელექტრონული ფორმით სამორინის თამაშობების ორგანიზებისთვის, რომლის ნებართვა გაიცემა სამორინის მოწყობის ნებართვის საფუძველზე – გადასახადი წელიწადში 100 ათასი ლარი იქნება;
• წელიწადში 100 ათასი ლარი იქნება გადასახადი ასევე ისეთი სისტემურ-ელექტრონული ფორმით სათამაშო აპარატების თამაშობების ორგანიზებისთვის, რომლის ნებართვაც გაიცემა სათამაშო აპარატების სალონის მოწყობის ნებართვის საფუძველზე [დღეს მოქმედი კანონმდებლობით, ეს გადასახადები დაწესებული არ არის].

ახალი ცვლილებები, რომელიც აღნიშნულ გადასახადებს აწესებს, 2024 წლის 1-ლი ივნისიდან ამოქმედდება.

დღეს მოქმედი კანონმდებლობით კი:

„აზარტული თამაშობის სისტემურ-ელექტრონული ფორმით მოწყობის უფლება აქვს მხოლოდ აზარტული თამაშობის ორგანიზატორს სამორინის მოწყობის ნებართვით ან/და სათამაშო აპარატების სალონის მოწყობის ნებართვით [ანუ, ონლაინ თამაშობების მოწყობის ნებართვისთვის ცალკე თანხას არ იხდის].

აზარტული თამაშობის სისტემურ-ელექტრონული ფორმით მოწყობისთვის დღეს ცალკე ნებართვა არ გაიცემა.

ამასთანავე, სამორინის მოწყობის ერთი ნებართვით ან/და სათამაშო აპარატების სალონის მოწყობის ერთი ნებართვით დასაშვებია მხოლოდ ერთი ინტერნეტდომენის სახელით არსებული ვებგვერდის ორგანიზება.

შემოსავლების სამსახურის განმარტებით: „ვინაიდან აზარტული თამაშობის სისტემურ-ელექტრონული ფორმით მოწყობისთვის ცალკე ნებართვა არ გაიცემა, აზარტული თამაშობების, მათ შორის სამორინეს თამაშობების სისტემურ-ელექტრონული ფორმით ორგანიზება შესაძლებელია რეალურად მოწყობილი სამორინეს ან სათამაშო აპარატების სალონის მოწყობის ნებართვის არსებობის შემთხვევაში.“

2024 წლის ივნისიდან კი, გადასახადს გადაიხდის ის, ვისაც ონლაინ კაზინო სამორინეს ნებართვის საფუძველზე ექნება მოწყობილი და ამასთან, ონლაინ კაზინოს მოწყობა შესაძლებელი იქნება ცალკე, რეალურად მოწყობილი სამორინეს ნებართვის გარეშეც, თუმცა, სანებართვო მოსაკრებელი, როგორც ზემოთ აღვნიშნეთ, გაცილებით მეტი იქნება.

მოქმედი კანონმდებლობით, ცალკე გადასახადებია დადგენილი [არაელექტრონული] აზარტული და მომგებიანი თამაშობების [მათ შორის სამორინეს] მოწყობის ნებართვისთვის.

[toggle title=”ამ გადასახადების სანახავად დააწკაპუნეთ აქ:“]

აზარტული და მომგებიანი თამაშობების მოწყობის ნებართვა:

• წამახალისებელი გათამაშების მოწყობა − 15 000 ლარი;
• სათამაშო აპარატების სალონის მოწყობა – წელიწადში 50 000 ლარიდან 1 000 000 ლარის ჩათვლით;
• ლოტოსა და ბინგოს მოწყობა (თითოეული სახეობა) – წელიწადში 15 000 ლარი;
• ტოტალიზატორის მოწყობა − წელიწადში 30 000 ლარიდან 300 000 ლარის ჩათვლით;

სამორინეს მოწყობა:

საქართველოს მთელ ტერიტორიაზე (გარდა ქალაქ ბათუმისა, დუშეთის მუნიციპალიტეტის ბაზალეთის ტბის მიმდებარე ტერიტორიისა, გუდაურის განსაკუთრებული რეგულირების ტერიტორიისა, დაბა ბაკურიანის ტერიტორიისა, აგრეთვე ქობულეთის, ბორჯომის, წყალტუბოსა და სიღნაღის მუნიციპალიტეტების ტერიტორიებისა) – წელიწადში არაუმეტეს 5 000 000 ლარისა;

ქალაქ ბათუმში, დუშეთის მუნიციპალიტეტის ბაზალეთის ტბის მიმდებარე ტერიტორიაზე, ასევე ქობულეთისა და ბორჯომის მუნიციპალიტეტებში – წელიწადში 250 000 ლარი;

• აზარტული კლუბის მოწყობა − წელიწადში 10 000 ლარიდან 50 000 ლარის ჩათვლით.

სანებართვო მოსაკრებლის გადახდისაგან თავისუფლდება სამორინეს მოწყობა გუდაურის განსაკუთრებული რეგულირების ტერიტორიაზე, დაბა ბაკურიანის ტერიტორიაზე, აგრეთვე წყალტუბოსა და სიღნაღის მუნიციპალიტეტების ტერიტორიებზე.

სანებართვო მოსაკრებლის გადახდისაგან თავისუფლდება ქალაქ ბათუმში, აგრეთვე ქობულეთისა და ხელვაჩაურის მუნიციპალიტეტებში ახლად აშენებული არანაკლებ ასნომრიანი სასტუმროს ტერიტორიაზე სამორინეს მოწყობა, ასევე ზუგდიდის მუნიციპალიტეტის სოფელ ანაკლიასა და სოფელ განმუხურში ახლად აშენებული არანაკლებ ოთხმოცნომრიანი სასტუმროს ტერიტორიაზე სამორინეს მოწყობა ახლად აშენებული სასტუმროს ტერიტორიაზე სამორინეს მოწყობის ნებართვის გაცემიდან 10 წლის განმავლობაში.

[/toggle]

ამავე თემაზე:

ბსუ-ს სტუდენტი, ლინდა ცინცაძე ფარმაციის მესამე კურსის სტუდენტია. ის ამბობს, რომ მისთვის კანონპროექტი „უცხოური გავლენის აგენტობის შესახებ“ შემაშფოთებელი იყო.

ლინდას ვკითხეთ, როგორ ფიქრობს, რა შეიძლება იყოს იმის მიზეზი, რომ ბსუ-ს არაერთ ლექტორ-მასწავლებელსა თუ სტუდენტს გაუჭირდა აზრის გამოთქმა რუსულ კანონზე.

მიიჩნევს, რომ 8 მარტს სტუდენტების მიერ გამართულ აქციას მოჰყვა ბსუ-ს რექტორის, მერაბ ხალვაშის ისედაც დაგვიანებული ფეისბუქპოსტიც, რომელშიც არ ჩანს პოზიცია „უცხოური გავლენის აგენტობის“ კანონპროექტზე.

ბსუ-ს რექტორის, მერაბ ხალვაშის ფეისბუქპოსტი. 8 მარტი, საღამო: „ევროპა ჩვენი ქვეყნის ისტორიული არჩევანი და წარმატებული მომავალია! უკვე 1000-მდე სტუდენტი გვყავს, რომლებმაც Erasmus+ და ევროკავშირის სხვა პროექტების ფარგლებში აკადემიური სემესტრი და სასწავლო პრაქტიკა ევროპის უნივერსიტეტებში და სხვა ინსტიტუციებში გაიარეს!”

„ვერ ვიტყვი, რომ რექტორის პოზიცია კონკრეტულია, რადგან ის არ ახსენებს უშუალოდ რასთან დაკავშირებით აკეთებს განცხადებას. კი, ვისწრაფვით ევროპისკენ, მაგრამ რასთან დაკავშირებით გააკეთა განცხადება საკმაოდ ორაზროვანი საკითხია. კარგი იქნებოდა უფრო მეტი კონკრეტიკა გამოეჩინა რექტორს“, – ამბობს ლინდა.

ლინდას არც ის გამორჩენია, თუ როგორ იქცეოდა რუსულ კანონთან დაკავშირებით ბსუ-ს თვითმმართველობა. ამბობს, რომ მისი საუნივერსიტეტო ცხოვრების განმავლობაში, უნივერსიტეტის თვითმმართველობა, არც ერთხელ არ წარმოადგენდა სტუდენტების ხმას.

„ამ მოვლენების მიმართაც, როგორც ყოველთვის, თვითმმართველობამ დუმილი არჩია. ეს, რა თქმა უნდა, მიუღებელია ჩემთვის.

თვითმმართველობა უნივერსიტეტის სახეა, რომელიც, პირველ რიგში, აპოლიტიკური უნდა იყოს და არ ატარებდეს მმართველი პარტიის ინტერესებს. თვითმმართველობის ინტერესები, სტუდენტების ინტერესებთან თანხვედრაში არ არის“, – ამბობს ლინდა.

სტუდენტის თქმით, თუ ბსუ-ს თვითმმართველობის თავმჯდომარე და წევრები, რაღაც მიზეზებით საჯარო განცხადებებისგან თავს იკავებდნენ, შეეძლოთ სხვა ფორმით ჰქონოდათ სტუდენტებთან ურთიერთობა. სტუდენტის თქმით, „ეს არ მომხდარა, რაც საკმაოდ შემაძრწუნებელი და სამწუხაროა ჩვენთვის“.

„ყველას არ ვიცნობ [თვითმმართველობაში] და ვერ ვიტყვი, რომ არავინ იყო მათგან აქციებზე, თუმცა არც ერთხელ არ გაჟღერებულა, რომ თვითმმართველობის რომელიმე წარმომადგენელი შემოგვიერთდა და თავისი ხედვა დააფიქსირა რუსულ კანონპროექტთან დაკავშირებით. მიუხედავად ამის, ფეისბუქპოსტების საშუალებით, ჩვენ კარგად ვხედავთ რა პოზიციაც აქვთ. მე მოვუწოდებ თვითმმართველობას – თუ ჩვენი, სტუდენტების მხარეს არ არიან, იქნებ ასეთი საჯარო განცხადებებისგან საერთოდ შეიკავონ თავი“, – გვეუბნება ლინდა ცინცაძე.

ამავე თემაზე:

„ამ კანონის მიღება ძალიან დაგვაზარალებს“ – ილიაუნის რექტორი

საზოგადოების მხრიდან ზეწოლის შედეგად, რუსული კანონის ჩავარდნის შემდეგ, „ქართული ოცნების“ ხელმძღვანელი ირაკლი კობახიძე იმ ჯგუფების ლექსიკით ალაპარაკდა, რომლებიც წლებია, „ეკლესიის“ და „ეროვნული ღირებულებების“ დაცვის სახელით, ღიად თუ შეფარულად ძალადობენ და ეწევიან რუსულ პროპაგანდას საქართველოში.

კობახიძემ, საზოგადოების დიდი ნაწილი, რომელმაც მათ რუსული კანონის გაწვევა მოსთხოვა, „ეკლესიის მტრებად“ და ლგბტქ საზოგადოების პროპაგანდისტებად მოიხსენია. რის მიღწევის  ცდილობს კობახიძე ამით და რას მიაღწევს თავად „ოცნება“? – ამ თემაზე „ბათუმელები“ ნიუ-იორკის უნივერსიტეტის ასისტენტ-მკვლევარს, დავით ჯინჭარაძეს ესაუბრა, რომელიც ამჟამად ლონდონში მუშაობს.

• ბატონო დავით, რუსული კანონის ჩავარდნის შემდეგ, სხდომიდან გამოსულმა ირაკლი კობახიძემ ახსენა ორი ტერმინი, – „ეკლესიის გინება“ და „ლგბტ პროპაგანდა“.  ვიცით, რომ ამ ლექსიკით პრორუსული დაჯგუფებები საუბრობენ საქართველოში. თქვენი აზრით, კობახიძის და „ქართული ოცნების“ როგორ მდგომარეობაზე მეტყველებს ეს?

ყველამ დავინახეთ, რომ ამ ქვეყანაში მოსახლეობის უმრავლესობა ევროპული იდეის მომხრეა. ბუნებრივია, საზოგადოების ამ ნაწილში ის ადამიანებიც მოიაზრებიან, ვისაც უნდა ევროკავშირი, მაგრამ ბოლომდე მაინც არ აქვს რაციონალურად გააზრებული, რას ნიშნავს ევროპულ სახელმწიფოდ ყოფნა.

ევროპულმა იდეამ ყველა ეს ჯგუფები გააერთიანა რუსული კანონის წინააღმდეგ, მაგრამ „ქართულმა ოცნებამ“ სავარაუდოდ გადაწყვიტა გამოიყენოს საზოგადოების დაყოფის პოლიტიკა და იმუშაოს იმ ჯგუფებზე, ვისაც შესაძლოა უნდა ევროკავშირში ყოფნა, მაგრამ არ აქვს უმცირესობების მიმღებლობა ბოლომდე.

ასევე, თუ ადამიანი საპატრიარქოსთან, მართლმადიდებელ ეკლესიასთან აიგივებს თავის იდენტობას, მაგრამ მაინც მომხრეა ევროკავშირის, „ოცნება“ შეეცდება ამ ხალხთან იმუშაოს და დაარწმუნოს, რომ ევროკავშირი „ეკლესიის მაგინებლებს“ უნდათ და ეს წაშლის მათ იდენტობას.

ირაკლი კობახიძის რიტორიკა მეტყველებს იმაზე, რომ უნდათ ევროკავშირის მომხრე 80 პროცენტი დაშალონ მარტივ მამრავლებად. ჯერ კიდევ არსებობს თემები, რომლის გამოყენებასაც ცდილობს „ოცნება“ მოწინააღმდეგე ჯგუფების გასაშავებლად – ეს თემებია ლგბტ თემი და ე.წ „ეკლესიის მტრები“.

ამიტომ, კობახიძე ფიქრობს, რომ ისვრის ასეთ ფრაზებს და ეს მეთოდი დაიწყებს მუშაობას.

ასეთივე თემაა სააკაშვილის საკითხიც ხომ, რადგან ყველას არ აქვს ერთგვაროვანი დამოკიდებულება მესამე პრეზიდენტის მიმართ. ეს ნიშნავს, რომ რაც უფრო მეტ ასეთი თემას შემოაგდებენ, რომელზეც ვთქვათ ორი ადამიანი ვერ თანხმდება, მეტი შანსი აქვთ, რომ ეს ორი ადამიანი საერთო მიზანს ჩამოაშორონ.

• დღემდე ეს ფუნქცია ჰქონდა სხვა პრორუსულ დაჯგუფებას, პარტიებს. რადგან ახლა კობახიძემ დაიწყო ამ ლექსიკით საუბარი, ეს არის კობახიძის შავი დღე, როგორც პოლიტიკოსის, თუ რაიმე შედეგს მიაღწევს?

ეს არის კობახიძის დაღმასვლა, კი. დიუსელდორფის უნივერსიტეტიდან ლგბტქ თემის ანტიპროპაგანდამდე დაშვება, ეს არის კრიზისი. როგორც ჩანს, არც ხარისხიანი განათლება არ არის ადამიანური ფაქტორების განმსაზღვრელი ბოლომდე.

რაც არ უნდა განათლება გქონდეს ადამიანს, თუ ღირებულებითი ნაწილი აცდენილია, ვერაფერს ვეღარ უშველი. ნორმალურ ქვეყანაში ამ პოლიტიკოსების დასასრული წლების წინ დადგებოდა.

როცა ადამიანი საყდრისს ააფეთქებს, წესით ეს უნდა ყოფილიყო უკვე რაღაცის დასასრულის დასაწყისი.

დღეს ვხედავთ, რომ კობახიძე ირჩევს ტაქტიკას, რომელსაც კომუნისტები და ფაშისტები მისდევდნენ. გამოიყენოს უმცირესობების თემა და ასე დაყოს საზოგადოება. რამდენიმე წელი გასტანეს ასეთმა რეჟიმებმა, მაგრამ დემოკრატიულმა სამყარომ მაინც გაიმარჯვა ბოლოს ხომ. მართალია „ოცნება“ ისევ მთავრობაშია, მაგრამ რეალურად, კობახიძე მკვდარი პარტიის მკვდარი პოლიტიკოსია.

ისიც კარგად ვიცით, რომ „ხალხის ძალა“ და „ოცნება“ ერთი დრაკონის ორი თავია. ახლა „ოცნება“ ცდილობს ეს მარცხი მათ მიაწეროს და თავად დაიწყოს მოქმედება.

• ვხედავთ, რომ „ეკლესიის მაგინებლები“ და „ლგბტ პროპაგანდისტების“ თემა მაინცა და მაინც ვეღარ მუშაობს, არ ამართლებს ბოლომდე ეს რიტორიკა. რისი იმედი აქვს ამჯერად კობახიძეს?

რისი იმედი ჰქონდათ, როცა ზურაბიშვილის არჩევნებზე კობახიძის და ივანიშვილის ფოტოები მიაწებეს საარჩევნო პლაკატებს? ცალკე საკითხია რეალურად რამდენი ავტორიტეტი აქვთ, მაგრამ ხომ ჰგონიათ, რომ მათი ავტორიტეტი იმუშავებდა. დაახლოებით ასეთი ტაქტიკაა.

არა მგონია, რომ პოლიტიკოსი, სამართლის დოქტორი, ვერ ხვდებოდეს, რომ საერთოდ არაფერ შუაშია ლგბტქ პროპაგანდა ევროკავშირის თემასთან და ყველამ, ვისაც კი რაიმე შეხება აქვს დასავლურ უნივერსიტეტებთან იციან, რომ ლგბტ ვერ გახდები ვერანაირი პროპაგანდით თუ არ ხარ დაბადებით ასეთი, მაგრამ კობახიძე მაინც ცდილობს ამ ფაქტორის გამოყენებას.

ცდილობს ის მცირე ნაწილი მაინც შეკრას მათ სასარგებლოდ, ვისაც ჯერ კიდევ არ აქვს ეს საკითხი ბოლომდე გააზრებული.

აქამდე ცდილობდნენ, რომ ამ ნაწილს „ხალხის ძალას“ მეშვეობით წაიღებდნენ და მეორე ნაწილი, ვისაც ჯერ კიდევ ეგონა, რომ „ოცნება“ პროევროპული იყო, მათ მისცემდა ხმას, საბოლოოდ კი კოალიციას შეკრავდნენ პარლამენტში, მაგრამ ახლა ცდილობენ არ დაკარგონ ის ნაწილიც, რომელიც ჯერ კიდევ თავის იდენტობას აიგივებს საპატრიარქოსთან და არ აქვს ლგბტქ თემის მიმღებლობა.

რა თქმა უნდა, ეს არის ყველა წარმავალი პოლიტიკური პარტიის და ყველა წარმავალი პოლიტიკოსის ნიშანი, რადგან არაერთი მაგალითი შეგვიძლია ვნახოთ ამის მსოფლიოში.

ვიქტორ ორბანიც ასეთი რიტორიკით საუბრობდა უნგრეთში და ვხედავთ, რომ ყველაზე ჩამორჩენილ ქვეყნად მიიჩნევა ბოლო პერიოდში ეს ქვეყანა. როცა ჩნდება ეკონომიკური პრობლემები ან სხვა კრიზისები, მაშინ ცდილობენ პოლიტიკოსები სენსიტიური თემებით ამ პრობლემების გადაფარვას. იგივეს ცდილობს კობახიძეც.

მართალია, რუსული კანონი ვერ მიიღეს, მაგრამ შეეცდებიან პატარ-პატარა რუსული კანონების შემოპარებას, ისევე როგორც მოხდა რუსეთში, როცა ლგბტ პროპაგანდა აკრძალეს კანონით, აქაც ჰქონდათ ხომ საუბარი რელიგიური გრძნობების შეურაცხყოფაზე, ცილისწამებაზე. ასეთი მეთოდებით შეეცდებიან რუსული საქმის გაკეთებას. ამისთვის სჭირდებათ ეს რიტორიკა.

განვითარებულ ქვეყნებში ეს არ ამართლებს, იქ პირიქით ხდება, უმცირესობების ლანძღვით ვერავის მოემატება რეიტინგი, პირიქითაა.

ალბათ კობახიძეც ფიქრობს, რომ თუ ლგბტქ პროპაგანდის წინააღმდეგ შემოიღებენ კანონს, ამის წინააღმდეგ ნაკლები ადამიანი გამოვა, თუ საპატრიარქოს სასარგებლოდ რაიმე კანონს შემოიღებენ, არც ამის წინააღმდეგ გამოვა ბევრი და ასე შემდეგ. უნდათ, რომ მცირე ჯგუფებს დაარტყან.

• ერთი კვირაა გაბრაზებული მოქალაქეები ამბობენ, რომ „ოცნება“ მოღალატეა და მუშაობს ქვეყნის ეროვნული ინტერესების წინააღმდეგ. რამდენად რეალურია, რომ მოღალატის იმიჯით კობახიძემ ამ ერთიანობის დარღვევა მაინც მოახერხოს?

სამწუხაროდ, ადამიანის ფსიქოლოგია ასე მუშაობს განვითარებულ ქვეყნებშიც, რომ შესაძლოა არ ეთანხმებოდე რაღაც გადაწყვეტილებას, მაგრამ თუ ფიქრობ, რომ რაღაც არის შენი იდენტობის ნაწილი, მაინც უჭერ მხარს.

კობახიძეც ასე ფიქრობს ალბათ, რომ შეუძლია „ეკლესიის მტრების“ და ლგბტ თემის დისკრედიტაციით გადაფაროს ღალატის ამბავი. იმუშავებს თუ არა, ეს ისევ ჩვენზეა დამოკიდებული.

ეს ადამიანები მართლა მივლენ ხალხთან და დაუწყებენ ამ ტყუილების გავრცელებას, ამიტომ უნდა ვუთხრათ მათ სიმართლე.

ქვეყნის მტერი ის კი არ არის, ვინც საპატრიარქოს აკრიტიკებს, არამედ ის არის ქვეყნის მტერი, ვინც რუსულ კანონს მოაწერა ხელი. ქვეყნის მტრობის საკუთარი ვერსიის შემოთავაზებას ცდილობს „ოცნება“, სადაც მათი განმარტებით, ქვეყნის მტერი არის ის, ვინც „ქართული ტრადიციების“ მტერია და ქართული ტრადიციების მტრად უნდა წარმოაჩინოს ლგბტქ თემი და „ანტიეკლესიური“ ადამიანები.

რეალურად, მტერია ის, ვინც ამდენი დახვრეტილი, ომში დაღუპული, რეპრესირებული ადამიანების ხსოვნას არ მიაგებს პატივს და პირდაპირ გვექაჩება რუსეთისკენ.

ეს კითხვები უნდა დავუსვათ ამ ადამიანებს, რომ მაშინ რისთვის კვდებოდნენ ქართველები, იმისთვის, რომ რუსეთის დაქვემდებარებაში ვიყოთ ისევ და იმისთვის, რომ ვიღაც მოვიდეს და რუსების გამო ანტიეკლესიურობაში დაგვდოს ბრალი?

წელიწად-ნახევარია არჩევნებამდე დარჩენილი და ალბათ კობახიძე, „ოცნება“ შეეცდება როგორმე ჩამოიშოროს მოღალატის იარლიყი, რადგან ეს იარლიყი ნიშნავს, რომ ნაკლები ადამიანი მისცემს მათ ხმას. ახლა უნდათ საზოგადოება დააჯერონ, რომ ეს ასე არ იყო, რომ თურმე ისინიც მიდიან ევროპისკენ, რომ ისინი არიან ტრადიციულებიც ამასთან ერთად და ასე შემდეგ.

მაგრამ საზოგადოებამ დაინახა, რომ „ოცნება“ მხოლოდ რუსეთის მიმართულებით არის პროაქტიული და, შესაბამისად, მორიგი სტრატეგიაც ტყუილი იქნება.

„მეწყერი მოდის, იშლება მიწა და ბზარები უჩნდება სახლს. ექსპერტიზის დასკვნა ორი წელია გვაქვს, რომ საფრთხე გვემუქრება, მაგრამ მერიაში გვითხრეს, რომ სამუშაოები ძვირია და ვერ გააკეთებენ,“ – გვიყვება თამარ ხოზრევანიძე. ის ქედაში, სოფელ მეძიბნაში ცხოვრობს 3 შვილთან ერთად.

მოქალაქის თქმით, მეწყრის პრობლემა მას შემდეგ გააქტიურდა, როცა სახლის მიმდებარედ გზა შეაკეთეს.

„გზაზე როცა მუშაობდნენ, მაშინ ჩამოვიდა მეწყერი სახლთან და ხელით გავწმინდეთ, ის მიწაც არ გაიტანეს. მას შემდეგ იშლება მიწა და მოდის ხშირად… 70 წლის წინ აშენებული სახლია, სად წავიდეთ?

ექსპერტიზის დასკვნის შემდეგ მოვიდნენ საპროექტოდან და შეისწავლეს აქაურობა, მაგრამ მას შემდეგ ორი წელი გავიდა, არაფერი შეცვლილა. ქედის მერიაში მითხრეს, რომ სამუშაო ძვირი ჯდება და ვერ გააკეთებენ იმას, რაც საჭიროა.

ღამე შიშით გვძინავს, არ ვიცით, როდის რა იქნება. კედლები დაბზარულია და ახალი ბზარები ჩნდება,“ – უთხრა თამარ ხოზრევანიძემ „ბათუმელებს“.

თამარ ხოზრევანიძემ ექსპერტიზის დასკვნაც გვაჩვენა, რომელიც 2021 წელს არის მომზადებული და წერია, რომ შესაბამისი სამუშაოები თუ არ ჩატარდება, „საფრთხე შეექმნება საცხოვრებელი სახლის მდგრადობას“.

დასკვნის მიხედვით, „აუცილებელია ზედაპირული და სახლის სახურავიდან ჩამონადენი წყლების რეგულირება და შესაბამისი არხების ან მილების საშუალებით უსაფრთხო მიმართულებით გადაყვანა“.

„ბათუმელები“ დაუკავშირდა ქედის მერიას, სადაც კომენტარს დაგვპირდნენ, თუმცა ამ დრომდე ინფორმაცია არ მიგვიღია.