ნეტგაზეთი • RU

ფრიდონ ხალვაშის გამზირზე ხიდებს აფართოებენ – ტრანსპორტის მოძრაობა შეფერხებულია

ბათუმში ფრიდონ ხალვაშის გამზირის რეაბილიტაცია მიმდინარეობს. სამუშაოების გამო ავტოტრანსპორტის მოძრაობა რამდენიმე მონაკვეთში შეფერხებულია.

საქართველოს საავტომობილო გზების დეპარტამენტის ინფორმაციით, შიდასახელმწიფოებრივი მნიშვნელობის ბათუმი [ანგისა]-ახალციხის საავტომობილო გზის დაახლოებით 4-კილომეტრიანი მონაკვეთის სარეაბილიტაციო სამუშაოებს შპს „ერ ტე დე“ ასრულებს.

კომპანიასთან გაფორმებული ხელშეკრულების მიხედვით გზის რეაბილიტაცია ავტოტრანსპორტის მოძრაობის პარალელურად უნდა განხორციელდეს. ფრიდონ ხალვაშის გამზირი კი, ბათუმი-ახალციხის ავტომაგისტრალის ის მონაკვეთია, რომლის რეაბილიტაციაც მიმდინარეობს.

ფრიდონ ხალვაშის გამზირი / 6.08.2022

დეპარტამენტის ინფორმაციით, ტენდერის ფარგლებში, მდინარე ბატალიისწყალსა და მდინარე მეჯინისწყალზე არსებული სახიდე გადასასვლელებიც გაფართოვდება.

ტენდერში გამარჯვებულ შპს „ერ ტე დე“-სთან გზების დეპარტამენტმა ხელშეკრულება 2022 წლის 13 ივნისს გააფორმა 19 399 999 ლარზე.

ფრიდონ ხალვაშის გზის რეაბილიტაცია 7 თვეში, ანუ 2023 წლის თებერვლამდე უნდა დასრულდეს.

ფრიდონ ხალვაშის გამზირი / 6.08.2022

საპროექტო დოკუმენტაციის მიხედვით:

  • გზის სავალი ნაწილის სიგანე მუდმივია და შეადგენს 13.5 მეტრს;
  • ტროტუარები დაპროექტებულია არსებული სიტუაციის ოპტიმალურად გამოყენების პრინციპით;
  • ტროტუარებზე ასასვლელებში შშმ პირთათვის მოეწყობა პანდუსები;
  • დამონტაჟდება 6 შუქნიშანი [მესხეთის, ხახულის, ბეთლემის, პკ.18+20 საქვეითო, მაჭახელას და მუხრან მაჭავარიანის ქუჩების მიერთებასთან];
  • მოეწყობა უსაფრთხოების კუნძულები;
  • ნაგვის ურნების დასადგმელად გათვალისწინებულია სათანადო ჯიბეების მოწყობა სავალი ნაწილის გარეთ;
  • სანიაღვრე ქსელს სჭირდება ხელახლა მოწყობა, გასაზრდელია სანიაღვრე ჭების საერთო რაოდენობა, მოსაწყობია ახალი სანიაღვრე მილები სათანადო დიამეტრებით;
  • სავალი ნაწილი დაიფარება ასფალტბეტონის რამდენიმე ფენით.

ფრიდონ ხალვაშის გამზირი / 6.08.2022

ამავე თემაზე:

19,4 მილიონი ლარი ფრიდონ ხალვაშის გამზირის სარეაბილიტაციოდ – გამარჯვებული გამოვლენილია

ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com