მოღობილი ტროტუარი ბათუმში – რა გააკეთა მერიამ პრობლემის გადასაწყვეტად

ბათუმში, ვაჟა-ფშაველასა და სევასტოპოლის ქუჩების კვეთასთან, ტროტუარზე გავლა შეუძლებელია – კონკრეტული სახლის წინ ტროტუარი ქვის ღობითაა შემოსაზღვრული. იმისთვის, რომ სიარული განაგრძო, ქუჩაში უნდა გადახვიდე, ავტომანქანების სავალ ნაწილზე.

„ეს ჩვენი საკუთრებაა, დანარჩენი მერიაში იკითხეთ, რატომაა ასე,“ – გვითხრა აქ მცხოვრებმა ციალა ჩხარტიშვილმა. იგი სხვა დეტალებზე არ გვესაუბრა.

ტროტუარი ბათუმში, ვაჟა-ფშაველას ქუჩაზე

ეზოს ჭიშკარი ტროტუარზე

მესაკუთრეს სახლში შესასვლელი ჭიშკარიც ქვის ღობით აქვს მოწყობილი. იმისთვის, რომ ამ სახლის ეზოში მოხვდე, ავტომანქანების სავალი ნაწილიდან უნდა შეაღო ჭიშკარი.

ციალა ჩხარტიშვილის თქმით, ტერიტორია მათი საკუთრება იყო ყოველთვის და შემდეგ ქვის ღობეც ამოაშენეს.

ბათუმის მერიის მუნიციპალური ინსპექციის თქმით, ტერიტორია, სადაც ტროტუარი უნდა იყოს, სახლის მესაკუთრეს საკუთრებად აქვს რეგისტრირებული და სამართალდარღვევა არ გამოვლენილა. შემოღობილი ადგილი, საჯარო რეესტრის ჩანაწერებითაც, ნინო ჩხარტიშვილის საკუთრებაშია.

რა გააკეთა ბათუმის მერიამ იმისთვის, რომ ტროტუარი არ წყდებოდეს და ამ ნაწილში ფეხით მოსიარულეს ავტომანქანების სავალ ნაწილზე არ უხდებოდეს გადასვლა? სცადა თუ არა მერიამ გამოესყიდა ქონება, როცა არსებობს შესაბამისი საზოგადოებრივი საჭიროება? – შეკითხვა ბათუმის მერიაში უპასუხოდ დატოვეს.

ტროტუარი ბათუმში, ვაჟა-ფშაველას ქუჩაზე