აჭარის საავტომობილო გზების დეპარტამენტი ხულოში, ბაკო-ხიხანის გზის 4-კილომეტრიან მონაკვეთზე ცემენტობეტონის საფარის მოწყობას გეგმავს, რისთვისაც აჭარის ბიუჯეტიდან 3 მილიონზე მეტი ლარი დაიხარჯება.
3 377 230 ლარით გამოცხადებულ ტენდერში, დეპარტამენტს შპს „ჯავახავტოგზა“ შესაბამის მომსახურებას 3 297 000 ლარად სთავაზობს. ტენდერი შერჩევა-შეფასების ეტაპზეა.
ტენდერის პირობის მიხედვით, სამუშაოები 180 დღეში უნდა დასრულდეს, თუმცა ის 6 ეტაპად განხორციელდება. აქედან ოთხი ეტაპი 2023 წელს, ხოლო დარჩენილი ორი ეტაპი – 2024 წელს. რატომ?
როგორც დოკუმენტებიდან ირკვევა, მიმდინარე წელს შესაბამისი ფინანსების არარსებობის გამო, დეპარტამენტმა, აჭარის ფინანსთა და ეკონომიკის სამინისტროს თანხმობით ტენდერი მრავალწლიანი შესყიდვით გამოაცხადა, სამუშაოები კი, ფინანსებიდან გამომდინარე ეტაპებად დაყო.
„საპროექტო-სახარჯთაღრიცხვო დოკუმენტაციის შესაბამისად, სამუშაოების ღირებულება განსაზღვრულია 3 377 230 ლარის ოდენობით. მიმდინარე წელს ფინანსური რესურსების მიხედვით დამტკიცებულია 2 502 550,16 ლარის ღირებულების სამუშაოები. შესაბამისად, გზის აღნიშნული მონაკვეთის რეაბილიტაციის დასრულებისათვის, აუცილებელია 2024 წელს დარჩენილი 874 679,84 ლარის ოდენობის სამუშაოების განხორციელება“, – აღნიშნულია გზების დეპარტამენტის უფროსის მიერ სამინისტროში გაგზავნილ წერილში.
ტენდერის პირობის მიხედვით კი, „თითოეული ეტაპი მოიცავს 30 კალენდარულ დღეს, 2023 წელს უნდა შესრულდეს 4 ეტაპი და შესრულებული სამუშაოს ღირებულებამ უნდა შეადგინოს არანაკლებ 2 502 550 ლარი; ხოლო 2024 წელს – დანარჩენი 2 ეტაპი და შესრულდეს ტენდერში ვაჭრობის შედეგად დაფიქსირებული საბოლოო ღირებულების დარჩენილი თანხის სამუშაოები.“
ამასთან, დეპარტამენტმა განსაზღვრა შემდეგი პირობაც: „მიმწოდებელი ვალდებულია სამუშაოები როგორც 2023 წელს, ასევე 2024 წელს დაიწყოს არაუგვიანეს 1-ლი ივნისისა“, თუმცა, იქვე მიუთითა, რომ იმავე წლებში „მიმწოდებელს შეუძლია, ხელსაყრელი პირობების არსებობის შემთხვევაში, სამუშაოები დაიწყოს 1-ელ ივნისამდე პერიოდშიც“.
ჩასატარებელი ძირითადი სამუშაოებია:
- მიწის ვაკისი – მოსამზადებელი სამუშაოები, რკ/ბეტონის კიუვეტების ცხაურებით ჭების მოწყობა
- ხელოვნური ნაგებობები – წყალგამტარი მილების მოწყობა, რკ/ბეტონის მილისა და სწორკუთხა მილის მოწყობა, გაბიონის კედლების მოწყობა
- საგზაო სამოსი – საფუძვლის პროფილირება ქვიშა-ხრეშოვანი მასალის დამატებით, ქვესაგები ფენის მოწყობა ქვიშა-ხრეშოვანი ნარევით, საფუძვლის მოწყობა ფრაქციული ღორღით, საფარის მოწყობა არმირებული ც/ბეტონით
- საგზაო სამოსის მოწყობა შესასვლელებზე
- მისაყრელი გვერდულების მოწყობა, დამცავი ზღუდარის მოწყობა და გზის მონიშვნა
წითელი ხაზით აღნიშნულია ბაკო-ხიხანის გზის მონაკვეთი, სადაც ცემენტობეტონი უნდა დააგონ [ფოტო ტენდერიდან]
- „საკვლევ ტერიტორიაზე თანამედროვე საშიში გეოდინამიკური პროცესები არ აღინიშნება;
- სეისმურობის მიხედვით რაიონი განეკუთვნება 9-ბალიან ზონას, ხოლო გრუნტების სეისმურობის მიხედვით IV ჯგუფს;
- გზა ხასიათდება ხშირი მოხვევის კუთხეებით, რომელთა რადიუსები მიღებულია ადგილზე არსებული პირობების შესაბამისად და არ იცვლება;
- საპროექტო მონაკვეთზე გზის გეგმიური მიმართულება უცვლელია;
- სავალი ნაწილი ძირითადად ხრეშოვანი საფარია, გადარეცხილია და დაფარული ფერდობებიდან ჩამოცვენილი გრუნტებით, განივი და გრძივი პროფილები მთლიანად დარღვეულია;
- მოძრაობის უსაფრთხოების უზრუნველსაყოფად გზის მარცხენა მხარეს გათვალიწინებულია ლითონის თვალამრიდის მოწყობა 712 გრძ/მეტრი…“
გზა, სადაც ცემენტობეტონის საფარი უნდა დააგონ, იწყება მდინარე ხიხანისწყალთან [სოფელ ბაკოში მისასვლელი გზიდან], მიდის სასაზღვრო პოსტთან, სადაც გზა უხვევს ხიხანის ციხისკენ და მთავრდება მდინარე ხიხანისწყალთან [გზა მონიშნულია წითელი მრუდით]
ხულოში, ხიხანის ციხესთან, ტურისტული ინფრასტრუქტურის მოწყობა იგეგმება
