აშშ-ის სურსათისა და წამლების ადმინისტრაციამ დაამტკიცა Pfizer Inc-ის ცხვირის სპრეი შაკიკის სამკურნალოდ.
კომპანია „პფაიზერის“ მიერ შექმნილ სპრეის – zavegepant-ს, რომელიც გაიყიდება „ზავზპრეტის“ (Zavzpret) სახელით, შეუძლია მოხსნას ან/და შეამსუბუქოს ტკივილი და შაკიკის სხვა შემაწუხებელი სიმპტომები გამოყენებიდან უკვე 15 წუთის შემდეგ, განაცხადა წამლის მწარმოებელმა კომპანიამ პრესრელიზში.
შეფასებულია, რომ შაკიკი გავლენას ახდენს გლობალური მოსახლეობის 10%-ზე მეტზე. შაკიკი დაახლოებით სამჯერ უფრო ხშირია ქალებში. მისი ძირითადი სიმპტომია თავის ტკივილი, რომელიც შეიძლება გაგრძელდეს საათობით ან დღეების განმავლობაში. ასევე, შაკიკს შეიძლება ახლდეს მომატებული მგრძნობელობა სინათლის ან ხმის მიმართ, გულისრევა, ღებინება ან მხედველობის დარღვევა.
უკვე არსებობს სხვადასხვა ტიპის მედიკამენტები შაკიკის სამკურნალოდ, მათ შორის, რამდენიმე სახის ცხვირის სპრეი. „ზავზპრეტი“ პირველია ამ მედიკამენტებს შორის, რომელიც ბლოკავს თავის ტვინში გამოყოფილ იმ ცილას [კალციტონინის გენთან დაკავშირებული პეპტიდი – CGRP], რომელიც ხელს უწყობს ანთებით პროცესს. ამავე ცილას ბლოკავს შაკიკის საწინააღმდეგო რამდენიმე აბი, მაგრამ შაკიკის მქონე ბევრ ადამიანს შეტევის დროს აქვს გულისრევის შეგრძნება, რის გამოც მედიკამენტების ორალურ მიღებას ისინი თავს არიდებენ.
„პფაიზერი“: The Lancet Neurology-ში გამოქვეყნებულმა კვლევის მესამე ფაზამ აჩვენა, რომ „ზავზპრეტმა“ აჩვენა ფართო ეფექტურობა, მაგალითად, ისეთ შედეგებში, როგორიცაა 15 და 30-წუთიანი ტკივილის შემსუბუქება, ასევე, ადამიანი უბრუნდება ნორმალურად ფუნქციონირებას 30 წუთში. მედიკამენტმა ასევე აჩვენა ეფექტურობის ხანგრძლივობა (მაგალითად – 2-24 და 2-48 საათის განმავლობაში ტკივილის მდგრადი შემსუბუქება და გაქრობა).
“ზავზპრეტი” ასევე არის ალტერნატივა იმ ადამიანებისთვის, რომლებსაც აქვთ გულის დაავადება ან სხვა ისეთი მდგომარეობა, რაც ხელს უშლის მათ, უსაფრთხოდ გამოიყენონ შაკიკის სამკურნალო სხვა სახის საშუალებები.
სპრეი „ზავზპრეტს“, რომელიც ივლისში გამოვა, „ორი მთავარი უპირატესობა აქვს ძველ ანტაგონისტებთან შედარებით: ის უსაფრთხოა გულ-სისხლძარღვთა რისკფაქტორების მქონე ადამიანებისთვის და მეორე, არ იწვევს წამლების გადაჭარბებული მოხმარებით გამოწვეულ თავის ტკივილს“, – განმარტა კლივლენდის კლინიკის ფსიქიატრმა დოქტორ ემად ესტემალიკმა „როიტერსთან“ საუბრისას.
