საქართველოს საავტომობილო გზების დეპარტამენტის ინფორმაციით, ფრიდონ ხალვაშის გამზირზე დღეს, საღამოს 10 საათიდან დილის 6 სააათამდე პერიოდში, გზის სავალი ნაწილი დროებით შევიწროვდება.
გზა, ჯერ ერთ, შემდეგ კი მეორე სამოძრაო ზოლზე, დაახლოებით 1 კილომეტრ მანძილზე შევიწროვდება – მეჯინისწყლის ხიდიდან მახვილაურის გადასახვევამდე მონაკვეთში.
„დეპარტამენტის კონტრაქტორი ორგანიზაცია გაერთიანებული საწარმო POLATYOL & MAPA JV ახორციელებს ბათუმის შემოვლითი გზის პროექტს.
აღნიშნული პროექტის ფარგლებში, შიდასახელმწიფოებრივი მნიშვნელობის ბათუმი(ანგისა)-ახალციხის საავტომობილო გზის კმ3-კმ4 მონაკვეთზე, ოპტიკურ-ბოჭკოვანი ქსელების და გარე-განათების ქსელის კვების ალტერნატიული მილსადენის მშენებლობის მიზნით:
- 2023 წლის 12 მარტის 22:00 სთ-დან, 13 მარტის 06:00 სთ-მდე, აღნიშნულ მონაკვეთზე, სავალი ნაწილი დროებით შევიწროვდება ჯერ ერთ, შემდეგ მეორე სამოძრაო ზოლზე და გატარდება საგზაო მოძრაობის უსაფრთხოების ზომები.“ – აღნიშნულია საავტომობილო გზების დეპარტამენტის მიერ გავრცელებულ ინფორმაციაში.
__________
ბათუმში, ფრიდონ ხალვაშის გამზირზე სარეაბილიტაციო სამუშაოები მიმდინარეობს, რის გამოც ავტოტრანსპორტის მოძრაობა ხშირად ისედაც შეფერხებულია.
ტენდერში გამარჯვებულ შპს „ერ ტე დე“-სთან გზების დეპარტამენტმა ხელშეკრულება 2022 წლის 13 ივნისს გააფორმა 19 399 999 ლარზე. ფრიდონ ხალვაშის გამზირის რეაბილიტაცია კი, 2023 წლის თებერვლამდე უნდა დასრულებულიყო, თუმცა ხელშეკრულებაში ცვლილება 7-ჯერ შევიდა.
ამ დროისთვის არსებული ბოლო მონაცემებით, ხალვაშის გამზირზე მიმდინარე სამუშაოები 2023 წლის მაისში უნდა დასრულდეს.
ფრიდონ ხალვაშის გამზირი დღეს / 12.03.2023
წინასწარ განსაზღვრული გეგმა-გრაფიკის მიხედვით, ვერც ბათუმის შემოვლითი გზის მშენებლობა დასრულდა დროულად. ახალი გზა ხელისუფლების თავდაპირველი გათვლებით 2020 წელს უნდა დასრულებულიყო, შემდეგ კი, მშენებლობის დასრულების თარიღი რამდენჯერმე გადავადდა.
ბოლო ინფორმაციით, გზების დეპარტამენტში ვარაუდობენ, რომ ბათუმის ავტობანის მშენებლობა 2023 წელს დასრულდება.
