Batumelebi

დღეს, პირველ აპრილს, უნდა ამოქმედდეს ელექტრონული პორტალი, სადაც სამედიცინო დაწესებულებებმა ექიმებისა და ექთნების ნამუშევარი საათები და გაცემული ანაზღაურება ელექტრონულ სისტემაში უნდა ასახონ.

მონაცემები კი შრომის ინსპექციამ უნდა დაამუშაოს.

„2023 წლის პირველი იანვრიდან ექიმების მინიმალური ანაზღაურება საათში 7 ლარით (თვეში მინიმუმ 1260 ლარი), ექთნების კი საათში 4.4 ლარით (თვეში მინიმუმ 792ლარი) განისაზღვრა.

საყოველთაო ჯანდაცვის პროგრამაში სტაციონარული კომპონენტით ჩართული ყველა კლინიკა ვალდებულია ექიმებისა და ექთნების სახელფასო ანაზღაურება ჯანდაცვის სამინისტროს მიერ წარმოდგენილი მინიმალური ზღვრის გათვალისწინებით დაადგინოს.

ახალი რეგულაციით, ხელფასის ზრდა შეეხო 9000-მდე ექიმსა და 8000-ზე მეტ ექთანს“-ამბობს შრომის ინსპექცია.

მათივე ინფორმაციით, ელექტრონული პორტალი ჯანდაცვის სამინისტროს რეფორმის – „ექიმებისა და ექთნებისთვის მინიმალური საათობრივი ანაზღაურების“ ფარგლებში შეიქმნა.

დღეს არსებული მდგომარეობით, ექთნების ხელფასი საარსებო მინიმამსაც კი ვერ აკმაყოფილებს.

საქართველოში, სხვადასხვა კლინიკაში, დაახლოებით 18 ათასი ექთანი მუშაობს. ექთნების სახელფასო ანაზღაურება საათში 2 ლარიდან იწყება.

ერთ კლინიკაში მომუშავე ექთნის საშუალო ხელფასი 320 ლარიდან 380 ლარამდე მერყეობს და იმის გამო, რომ ექთნებს არასდროს ჰყოფნით ხელფასი, რამდენიმე კლინიკაში უწევთ მუშაობა.

„ეს ნიშნავს გადაბმულ მორიგეობას, მუდმივ სტრესს და გადაღლას“.

დაბალი ანაზღაურების გამო კლინიკებში ექთნების მწვავე დეფიციტიც შეიქმნა. დაბალი ანაზღაურებისა და დაუფასებელი შრომის გამო ქვეყანაში ექთნების ახალი კადრები აღარ მზადდება, ძველები კი ევროპის ქვეყნებში ემიგრაციაში ზრუნვის სფეროში გაედინებიან.

„ქურდული სამყაროს“ საქმიანობის მხარდაჭერისთვის პოლიციამ 4 პირი დააკავა. ერთს კი ბრალი დაუსწრებლად წარუდგინეს.

შსს-ს ინფორმაციით, სამ პირს – ი.ხ.-ს, ზ.გ.-ს და ლ.ა.-ს,  ფინანსური დავის ნიადაგზე დაუპირისპირდა მოუხდათ მ.ჩ-სთან და აღნიშნული დავის მოგვარება ე.წ ქურდული გარჩევის გზით სცადეს და მას ფიზიკურად გაუსწორდნენ.

„თავის მხრივ, მ.ჩ.-მ მომხდარ კონფლიქტთან დაკავშირებით საქმის კურსში ჩააყენა საზღვარგარეთ მყოფი ქართველი „კანონიერი ქურდი“ ჯ.კ. (მეტსახელად „ჯეირანა“), რომელმაც მოდავე მხარეებს ე.წ. ქურდული გარჩევის მოწყობა მოსთხოვა“, – ამბობს შსს.

მათივე ინფორმაციით, ქურდული სამყაროს საქმიანობის მხარდაჭერისთვის თბილისში დააკავეს სამი პირი, მეტსახელად „ლეკვი“, „მოლა“ და „ხავთასა“ ხოლო „კანონიერი ქურდისთვის“ მიმართვის ბრალდებით მ.ჩ, მეტსახელად „ხონსკი“.

„კანონიერი ქურდობის“ ფაქტზე კი ჯ.კ-ს დაუსწრებლად წარუდგინეს ბრალი, რადგან ის საზღვარგარეთ მყოფება.

„პოლიციამ, ჩატარებული ჩხრეკის შედეგად, ნივთმტკიცებად ამოიღო კომპიუტერული ტექნიკა და ბრალდებულების მობილური ტელეფონები, რომელთა საშუალებითაც ისინი ერთმანეთს და საზღვარგარეთ მყოფ ქართველ „კანონიერი ქურდს“ უკავშირდებოდნენ“.

დანაშაული 6-დან 15 წლამდე ვადით თავისუფლების აღკვეთას ითვალისწინებს.

ისევ დასაქმებას ელის 23 კურსდამთავრებული, ვისაც საკრუიზო გემზე მიმტანად უნდა ემუშავა.

ახალგაზრდებმა პროფესიული მომზადების პროგრამის სრული კურსი ბათუმის ნავიგაციის სასწავლო უნივერსიტეტში გაიარეს და უკვე მესამე თვეა დასაქმებას ელიან.

პროფესიული მომზადების პროგრამის – „სამგზავრო გემის მიმტანი“ კურსდამთავრებულების დასაქმების ვალდებულება შესაბამისი მემორანდუმით საკრუინგო კომპანია Columbia Shipmanagement Georgia-ს ჰქონდა აღებული. 23 სტუდენტი მას საკრუიზო ლაინერზე უნდა დაესაქმებინა.

„ბათუმელებს“ არაოფიციალურად უთხრეს, რომ საკრუინგო კომპანიამ უნივერსიტეტიც და დასაქმების სააგენტოც „გადააგდო“ და ახლა ორივე უწყება საკუთარი ძალებით ცდილობს შექმნილი პრობლემის გამოსწორებას.

პროფესიული მომზადების პროგრამა ბათუმის ნავიგაციის სასწავლო უნივერსიტეტმა დასაქმების სააგენტოსთან ერთად გასული წლის სექტემბერში აამოქმედა. პროგრამას საქართველოში ევროკავშირის წარმომადგენლობა აფინანსებს. პროგრამა ორი თანაბარმნიშვნელოვანი კომპონენტისგან შედგება, რომლის პირველი ეტაპი სწავლებაა, მეორე ეტაპი კი – საკრუიზო ლაინერზე დასაქმება.

იმის გამო, რომ პროგრამის პირველი ნაკადის კურსდამთავრებულთა დასაქმება ამ დრომდე ვერ მოხერხდა, ბათუმის ნავიგაციის სასწავლო უნივერსიტეტმა სასწავლო კურსზე მიღება დროებით შეაჩერა.

პრობლემებს პროგრამაში ჩართული ყველა მხარე აღიარებს და შეძლებისდაგვარად მალე მისი მოგვარების პირობას დებს.

ნათია მიქელთაძე, ბათუმის ნავიგაციის სასწავლო უნივერსიტეტის ხარისხის უზრუნველყოფის სამსახურის უფროსი, „ბათუმელებთან“ ამბობს, რომ პროგრამის ყველა კურსდამთავრებული აუცილებლად დასაქმდება. მიქელთაძის თქმით, პრობლემა საკრუინგო კომპანიამ შეიქმნა, რის გამოც „ყველანი არასასიამოვნოდ განცვიფრებულები“ დარჩნენ.

„ნაწილმა გაიარა გასაუბრება სხვა კომპანიაში და გარკვეულ ნაწილს უკვე მოსდის დასაქმების შეთავაზებები. ამ პროგრამის კურსდამთავრებულებს დამსაქმებელი ეყოლება. სამი თვეა  ჩვენ გვაქვს ყოველდღიური კომუნიკაცია კომპანიასთან, ყოველდღე ვითხოვთ  ახსნა-განმარტებას ჩვენი ბავშვების დასაქმებასთან დაკავშირებით. ჩვენ გვყავდა შემდეგ ნაკადზე ჩარიცხვის მსურველები, მაგრამ საკუთარი ზარალის ფასად შევაჩერეთ მიღება პროგრამაზე მანამ, სანამ ეს პირველი 23 კაცი რეალურად არ დასაქმდება. სწავლის ძალიან ბევრი მსურველი გვყავს, მაგრამ სანამ არ მივიღებთ გარანტიას, ნავიგაციის უნივერსიტეტს არ მიაჩნია შესაძლებლად ახალი ნაკადის მიღება. მთავარი იდეა ამ პროგრამის არის სრული ციკლი, არამხოლოდ პროფესიული მომზადება, არამედ დასაქმების კომპონენტიც აუცილებლად.

ჩვენ ვუშვებთ წლების განმავლობაში კურსდამთავრებულებს, რომლებიც საქმდებიან. ბოლო 10 წლის განმავლობაში უნივერსიტეტს ნავიგაციის კურსდამთავრებულების 82 % გვყავს დასაქმებული, მექანიკის – 78 %. ეს არის ძალიან მაღალი მაჩვენებელი, თუკი მას შეადარებთ სხვა უნივერსიტეტების მაჩვენებელს. თამასაა, რომელსაც ვერ დავაგდებთ და არ დავაგდებთ.

ამიტომ ჩვენთვის თავმოყვარეობის და პროფესიონალიზმის საკითხია, არ გაგრძელდეს ამ პროგრამაზე მონაწილეთა მიღება მანამ, პირველი ნაკადი სრულყოფილად არ დასაქმდება,“ – უთხრა „ბათუმელებს“ ნათია მიქელთაძემ.

„სამგზავრო გემის მიმტანი“ – ამ კურსდამთავრებულების დასაქმების პირობას დებს აჭარის დასაქმების სააგენტოს ხელმძღვანელი, თემურ კახიძეც.

თემურ კახიძემ „ბათუმელებს“ უთხრა, რომ ის ბოლო სამი კვირაა აქტიურად ჩაერთო შექმნილი პრობლემის მოგვარებაში.

„კოლუმბია შიფმენეჯმენტს“ მემორანდუმი ჰქონდა უნივერსიტეტთან. ამიტომ სხვა კომპანიებთან არ დაგვიწყია ურთიერთობა, არ იქნებოდა არც პარტნიორული, არც კოლეგიალური, როცა მოლაპარაკებული ხარ ერთ კომპანიასთან სხვასთან არ უნდა დაიჭირო საქმე.

ახლა უკვე ვაწარმოებთ რამდენიმე კომპანიასთან მოლაპარაკებებს. ერთ-ერთ ამერიკულ კომპანიაში კურსდამთავრებულებს უკვე გავლილი აქვთ გასაუბრება და დადებითი პასუხი მოუვიდათ,“ – უთხრა „ბათუმელებს“ თემურ კახიძემ.

„ბათუმელების“ კითხვაზე, ახალი კომპანია რამდენად შეძლებს ყველა კურსდამთავრებულის დასაქმებას, თემურ კახიძე ამბობს, რომ კომპანიას, რომელთანაც მოლაპარაკებას აწარმოებენ, „დაახლოებით 50-ჯერ მეტი სამუშაო ადგილი აქვს, ვიდრე ქართულ მხარეს შეუძლია მიწოდება“.

„ბათუმელები“ კომენტარისთვის დაუკავშირდა „კოლუმბია შიფმენეჯმენტს“. საკრუინგო კომპანიის ხელმძღვანელი ვლადიმერ შელია „ბათუმელებთან“ ამბობს, რომ „თანდათან ყველა დასაქმდება“.

„ჯერ ერთი, ჩვენ არ გვქონდა განსაზღვრული, რამდენ ხანში უნდა დავასაქმოთ. მეორე, ჩვენ მანამდე ასეთი სპეციალობის ხალხი, სადღაც 50-60 კაცი დავასაქმეთ. მესამე – რატომ გვქონდა ჩვენ იმედი: იღებდნენ ორ ახალ გემს, სადაც უნდა დაგვესაქმებინა ეს ხალხი, რისი მიღებაც შეჩერდა და იგვიანებს. ახლა მგონი ორი კაცი მაგ ჯგუფიდან ჩვენ გავუშვით და თანდათან ისინი, ყველა დასაქმდება,“ – ამბობს ვლადიმერ შელია „ბათუმელებთან“.

„ბათუმელებმა“ ვლადიმერ შელიას დაზუსტება სთხოვა, დასაქმდებოდა თუ არა სასწავლო პროგრამის ყველა კურსდამთავრებული.

„კურსდამთავრებული არ ნიშნავს… მაგენი მერე ხელმეორედ გადიან მენეჯერთან ინტერვიუს.

მიუხედავად იმისა, რომ გადამზადება გაიარეს, ჩვენ ისინი მანამდე არ შეგვიმოწმებია. ამიტომ ისინი გადიან ინტერვიუს. მე მგონი ათ კაცს გავლილი აქვს ინტერვიუ ამ 23-დან, მაგრამ 23-ივე იქნება თუ არა დასაქმებული, მაგის გარანტიას ვერ მოგცემთ, რადგან ისინი გადიან ინტერვიუს თავად გემთმფლობელთან,“ – თქვა ვლადიმერ შელიამ.

დღეს, პირველ აპრილს, ბათუმში, მთავრობის შენობის წინ „ნაციონალური მოძრაობის“ და მათი მხარდამჭერების აქცია გაიმართა. აქციის მოთხოვნები იყო მიხეილ სააკაშვილის გათავისუფლება, ევროკომისიის 12-პუნქტიანი გეგმის შესრულება მთავრობის მიერ და პროტესტი, ხელისუფლების რუსული კურსის წინააღმდეგ.

„ბიძინა ივანიშვილი ქართულ საზოგადოებას ყოფს და აპირისპირებს. მას უნდა, რომ გაათითოკაცოს და დაქსაქსოს საზოგადოება, მაგრამ ჩვენ უნდა ვუპასუხოთ ერთობით და მოქმედებით.

ივანიშვილი ანგრევს გელათს, ჯვრის მონასტერს, რუსული კანონი შემოიტანა და, ფაქტობრივად, ღალატზე მოაწერინა ქართველ კაცებს ხელი, ფაქტობრივად სამშობლო გააყიდვინა.

ჩვენ არ გვინდა რუსული ოცნება, ჩვენ არ გვინდა რუსული მთავრობა, ქართველმა ხალხმა უთხრა „არა რუსულ კანონს“ და ახლა, უნდა ვუთხრათ „არა“, რუსულ მთავრობას. ჩვენ არ შევეგუებით რუსულ ხელისუფლებას საქართველოში“, – ამბობს ნაციონალური მოძრაობის თავმჯდომარე ლევან ხაბეიშვილი, რომელიც ბათუმში, აქციაზე იმყოფება.

მისი თქმით, პუტინთან მებრძოლი სააკაშვილი ივანიშვილს ციხეში ჰყავს გამოკეტილი.

„ასევე, პუტინთან მებრძოლი ზელენსკი ითხოვს სააკაშვილის გათავისუფლებას, მაკრონი ითხოვს მის გათავისუფლებას, ევროკავშირის 27 ქვეყანა ამბობს, რომ ჰუმანიტარული მისიით სააკაშვილი უნდა გაიყვანონ და მხოლოდ პუტინი, „რუსული ოცნება“, ლავროვი, მარგარიტა სიმონიანი, კობახიძე, ღარიბაშვილი კი ამბობს, რომ პუტინის ტყვე უნდა მოვკლათ ციხეშიო.

ამიტომ მათ ყველამ უნდა ვუთხრათ – „არა ბიძინა ივანიშვილს, არა რუსულ მთავრობას“, ჩვენ არ ვაპირებთ შევეგუოთ ამ ქვეყნის გარუსებას“, – ამბობს ხაბეიშვილი.

მისი თქმით, 9 აპრილს, 17:00 საათზე, თბილისში ფართომასშტაბიანი აქცია გაიმართება, სადაც ხელისუფლებას მოსთხოვენ შეასრულოს 12-პუნქტიანი გეგმა და გაათავისუფლოს მიხეილ სააკაშვილი.

„ჩვენი ქვეყნის მოსახლეობას უნდა ევროპაში, ამიტომ ჩვენი მთავარი მოთხოვნაა მიშას თავისუფლება, ევროკავშირში გაწევრიანება და პრორუსული კურსის დაგმობა. დიდი იმედი მაქვს, რომ ხალხის პროტესტს ექნება შედეგი და თუ არა, უფრო მასშტაბურ აქციებს შევუერთდებით“, – ამბობს აქციის მონაწილე ეკატერინე კალანდარიშვილი.

აქციის კიდევ ერთი მონაწილე ედუარდ თედორაძე მიიჩნევს, რომ ხელისუფლებამ უნდა მოუსმინოს საზოგადოების ხმას და შეასრულოს ევროკომისიის მოთხოვნები. ასევე გადაიყვანოს სააკაშვილი სამკურნალოდ უცხოეთში.

„ფაქტია, რომ ეს ხელისუფლება ნებით წასვლას არ აპირებს, საკუთარი ხალხის წინააღმდეგ აპირებენ ბრძოლას, ამიტომ მე, პირადად, როგორც მოქალაქე, ვადამდელ არჩევნებში ვხედავ გამოსავალს.

უკვე აღარ ღირს ამ ქვეყანაში ცხოვრება, რადგან ეს ხელისუფლება ებრძვის ხალხს. ესენი ომზეც კი წავლენ, ოღონდ ხალხის წინააღმდეგ. ამათ 40 წელი უნდათ ხელისუფლებაში ყოფნა და ასეთ შემთხვევაში ხომ დემოკრატიული ცხოვრება გამორიცხულია. ამიტომ, ესენი უნდა წავიდნენ“, – ამბობს ედუარდ თედორაძე.

23 წლის მარიკა ხოზრევანიძეს საზოგადოების დახმარება სჭირდება. ის ცხრა თვის წინ, ავარიაში მოჰყვა, რის შედეგადაც დაუზიანდა კიდურები, ფილტვი და მენჯის ძვლები.

მარიკას რამდენიმე ოპერაცია სჭირდება, რომელიც თურქეთის კლინიკაში აქვს დაგეგმილი, თუმცა ოჯახს ოპერაციისთვის საჭირო რესურსები არ გააჩნია.

„11 ათასი დოლარია ამ ეტაპზე საჭირო. ოჯახში მხოლოდ მამაჩემი და მე ვმუშაობდით, მაგრამ, ახლა მე ვეღარ ვმუშაობ, ეტლში ვარ, რადგან მოძრაობა მიჭირს, ძლიერი ტკივილები მაქვს“, – გვეუბნება მარიკა ხოზრევანიძე.

„2022 წლის 19 ივნისს მოვყევი ავარიაში. ჩემს სამოძრაო ზოლში გადმოვიდა უცხო პირის ავტომანქანა და დამეჯახა, თუმცა საავადმყოფოში მკურნალობის დროს ხარჯების დაფარვაში არ დამეხმარა. მანქანა სხვისი იყო, ერთი დღით მქონდა ნაქირავები და არც დამტვრეული მანქანის ხარჯები დაფარა.

მივმართე სასამართლოს, მაგრამ ცხრა თვე გავიდა და ჯერ არც კი გამართულა პროცესი, რომ ან დაისაჯოს ის პირი, ან ხარჯები მაინც დაფაროს“, – ამბობს მარიკა.

განახლება: მოგვიანებით მარიკა ხოზრევანიძემ „ბათუმელებთან“ დააზუსტა, რომ მას მხარე მინიმალურად დაეხმარა, რაც არ იყო საკმარისი მისი გამოჯანმრთელებისთვის.

მარიკა ხოზრევანიძე ავარიამდე ჩინურ რესტორანში მუშაობდა მიმტანად, მაგრამ ავარიის შემდეგ, მუშაობა აღარ შეუძლია.

„ავარიის შემდეგ, ბათუმში „მედალფაში“ შემიყვანეს, იქ ვიყავი რეანიმაციაშიც. ოპერაციას აქ გამიკეთეს. ორივე კიდური მოტეხილი მქონდა, ფილტვიც გახეთქილი იყო, დაზიანებული მქონდა მენჯიც. რეანიმაციაში ვიწექი. ახლა რკინები მაქვს ყველგან ჩასმული.

ოქტომბრის ბოლოს, კუნთები რომ არ მოდუნებულიყო, სარეაბილიტაციო ვარჯიშები დავიწყე. რეაბილიტაციისთვის ფინანსური დახმარება ოზურგეთის მერიას ვთხოვე, თუმცა უარი მითხრეს. ამიტომ, მეგობრების და ახლობლების დახმარებით 80 დღე, ყოველ დღე, ბათუმში ხან ტაქსით დავდიოდი, ხან ახლობლის მანქანით.

თუმცა, ტკივილები უფრო გამიძლიერდა და ვარჯიში შევწყვიტე. თურქეთში წავედი გამოკვლევებზე და აღმოჩნდა, რომ საერთოდ არ შეიძლებოდა ჩემი ფეხზე დგომა. აქ კი მეუბნებოდნენ, რომ ყველაფერი კარგადაა და რომ ძვლები მიხორცდება“, – ამბობს მარიკა ხოზრევანიძე.

მისი თქმით, რადგან ბათუმში არ არის რეგისტრირებული, ოპერაციის თანხებისთვის აჭარის ჯანდაცვისთვის არ მიუმართავს.

„ახლა ვცდილობ ბათუმში ჩავეწერო, განცხადებით მივმართე იუსტიციას, მაგრამ ჯანმრთელობის მდგომარეობის გამო მისვლას ვერ ვახერხებ, რომ გავიგო, ჩამწერეს თუ არა. ცხელ ხაზზე კი ვერავის ვუკავშირდები.

თურქეთში მითხრეს, რომ ძვლები ძალიან დაშორებულია ერთმანეთს და ამიტომ კარგავს ფუნქციას. ოპერაციაა საჭირო, ერთ ადგილას კი ძვალია გადასანერგი, რადგან ეს დაშორება უნდა აღდგეს, რომ ძვლებმაც აღიდგინოს ფუნქცია. რამდენიმე ადგილზე ჩარჩენილია ჩამტვრეული ძვლები და ესეც უნდა ამოიღონ.

ოჯახში ექვსი ადამიანი ვცხოვრობთ და მხოლოდ მამა მუშაობს. ყველა რესურსი ამოგვეწურა, ამიტომ ძალიან გვჭირდება საზოგადოების დახმარება, რომ ამ ოპერაციის ჩატარება შევძლო თურქეთში“, – გვეუბნება მარიკა.

იმ შემთხვევაში, თუკი მარიკა ხოზრევანიძის დახმარების სურვილი გექნებათ, თანხა შეგიძლიათ ჩარიცხოთ:

საქართველოს ბანკის ანგარიშზე:

GE29BG0000000533972581

ასევე ჩარიცხვა შეგიძლიათ მარიკას დედის, ნარი ხოზრევანიძის პირადი ნომრით: 61004037805

„სახელმწიფო ინსტიტუტების, როგორც ქვეყნის დემოკრატიის ქვაკუთხედის, გაძლიერების ნაცვლად ძლიერდება ერთპარტიული სისტემა და მისი გავლენები,“ – აღნიშნა დღეს, 31 მარტს, საქართველოს პრეზიდენტმა სალომე ზურაბიშვილმა პარლამენტში გამოსვლის დროს.

„დაჩქარებულ რეჟიმში მიღებული კანონები [მოსმენების კანონი, სახელმწიფო ინსპექტორის სამსახურის გაუქმება, მოსამართლეების გამწესების წესში ცვლილებები და უცხოელი აგენტების კანონი] ემსახურება არა ქვეყნის დემოკრატიის გაძლიერებას, ან მოქალაქეების კეთილდღეობას, არამედ ძალაუფლების გამყარებას და გახანგრძლივებას.

ქვეყნის მომავლისთვის აუცილებელი სასამართლო რეფორმა კი, ჩიხშია შესული. თქვენმა ხელისუფლებამ არ გაარღვია ის მოჯადოებული წრე, რომელზეც წლებია ერთი და იგივე ადამიანები ტრიალებენ, რაც ასევე, შეიძლება ემსახურებოდეს ძალაუფლების გამყარებას.

„ქართული ოცნებიდან“ ნელ-ნელა გადინება დაიწყეს განსხვავებული აზრისა და პოლიტიკური გემოვნების ადამიანებმა, თქვენს რიგებში უკვე აღარ ისმის არც ერთი ოდნავ განსხვავებული აზრი, რადგან ეს ავტომატურად მანდატის დატოვებას ნიშნავს. დაიწყო პარტიის გავლენის გაძლიერება მთავრობასა და პარლამენტზე, პარტია გადაიქცა გადაწყვეტილებების მიღების სივრცედ, პარტიის თავმჯდომარე საკუთარ პოზიციას წინასწარ აცხადებს ყველა პოლიტიკურ საკითხზე, და რაც მთავარია, ბუნდოვანი გახდა გადაწყვეტილებების მიღების პროცესი, რომ არაფერი ვთქვა ღია დისკუსიაზე.

თქვენ ხართ ხელისუფლება, რომელიც ბოლო წლებში გადადგმული გაუგებარი ნაბიჯებით უპირისპირდება ქვეყნის საგარეო მიზანს და ხალხის მანდატს,“ – განაცხადა სალომე ზურაბიშვილმა.

გასულ წელს საქართველოში რძის ცხიმის სისუფთავეზე 100 ნიმუში შემოწმდა, რის შედეგად, რძის ნაწარმში მცენარეული ცხიმების აღმოჩენის ფაქტზე გამოძიება სისხლის სამართლის მუხლით 6 საქმეზე დაიწყო.

როგორც momxmarebeli.ge, არასამთავრობო ორგანიზაციის – „საქართველოს სტრატეგიული კვლევებისა და განვითარების ცენტრის“ ვებგვერდი წერს, ერთ შემთხვევაში დადასტურდა დანაშაული, ხოლო კიდევ ერთი საქმე სასამართლოში გადაიგზავნა.

2023 წლის მდგომარეობით გამოძიება კიდევ 5 საქმეზე გრძელდება.

დარღვევა აღმოჩნდა შემდეგი საწარმოების საქონელში:

• შპს ათინათი – მაწონი, არაჟანი, ხაჭო
• შპს ზეკარი – ყველი
• შპს ფიდან ნატურა – ბებოს ყველი იმერული
• შპს ამალთეა – მაწონი

„სასამართლოში გადაგზავნილ საქმესთან დაკავშირებით, ზუსტი ინფორმაციის მიღება ვერ მოხერხდა. თუმცა უზენაესი სასამართლოს ცნობით, 2022 წელს საქართველოს რაიონულ (საქალაქო) სასამართლოებში ფალსიფიკაციის ბრალდებით (სისხლის სამართლის კოდექსის 197 და 1971 მუხლები) შესულ ყველა საქმეზე გამამტყუნებელი განაჩენი იქნა გამოტანილი.

ასე, რომ, სავარაუდოდ, ფინანსთა სამინისტროს საგამოძიებო სამსახურის მიერ სასამართლოში წარდგენილ ზემოაღნიშნულ საქმეზეც გამამტყუნებელი განაჩენი უნდა გამოტანილიყო“ – წერს momxmarebeli.ge.

მათივე ინფორმაციით, ამავე ორგანიზაციამ რძის ცხიმის სისუფთავეზე 2020 წელს 76 პროდუქტი შეამოწმა და დარღვევა 11 ნიმუშში გამოავლინა, რამაც 14.5% შეადგინა.

„ნებისმიერ შემთხვევაში, რძის ნაწარმის ფალსიფიკაციის წინააღმდეგ ბრძოლაში ფინანსთა სამინისტროს საგამოძიებო სამსახურის ჩართვა დადებითი ნაბიჯია. თუმცა, სავარაუდოდ, ეს არ იქნება საკმარისი აღნიშნული დანაშაულის წინააღმდეგ საბრძოლველად.

გადამწყვეტი სიტყვა აქ სეს-ს ეკუთვნის, რომელიც სურსათის სისტემატურ კონტროლს ახორციელებს. აუცილებელია, რომ ეს კონტროლი ეფექტიანი იყოს, ინფორმაცია სისტემატურად ქვეყნდებოდეს და საზოგადოების მხრიდანაც გარკვეული მონიტორინგი მიმდინარეობდეს“ – წერს momxmarebeli.ge.

მაღალმთიან აჭარაში შესწავლილი მეწყრული ზონების შესახებ უკვე გაეგზავნა გეოლოგიური დასკვნების დიდი ნაწილი ხულოს, შუახევისა და ქედის მუნიციპალიტეტებს.

ამის შესახებ „ბათუმელები“ მამუკა ფუტკარაძეს ესაუბრა, აჭარის გარემოსდაცვის და ბუნებრივი რესურსების სამმართველოს გეოლოგიური სამსახურის უფროსს.

მისი თქმით, ხულოს მუნიციპალიტეტში დასკვნები უკვე მომზადდა სოფელ ჭერისა და გურძაულის შესახებ, ხოლო რიყეთის თემისა და მიმდებარე სოფლების შესახებ გეოლოგიური დასკვნები, სავარაუდოდ, მომავალი კვირის დასაწყისში გაიგზავნება.

დასკვნების ნაწილი გაგზავნილია შუახევის სოფელ ბუთურაულში, ნაწილი კი, მამუკა ფუტკარაძის თქმით, შუახევში დღეს, 30 მარტს გაიგზავნა.

ქედაში დასკვნები მეწყრული, კრიტიკული ზონების შესახებ უკვე სრულად მიეწოდა მუნიციპალიტეტის მერიას.

„ჩვენ მიერ გაგზავნილ ახალ დასკვნებში არის, როგორც პრაქტიკული მონაცემები, ასევე მითითებულია მეწყერსაწინააღმდეგო პროფილაქტიკური ღონისძიებები.

არიან ოჯახები, რომელთა განრიდებაც საჭიროა საცხოვრებელი სახლებიდან. მაგალითად, ქედაში 30-32 ოჯახია, შუახევში – 70 ოჯახამდე. ეს მიმდინარე პროცესების მიხედვით გეუბნებით, თორემ ისე შესაძლოა უფრო მეტიც იყვნენ“, – ამბობს მამუკა ფუტკარაძე.

იგი აღნიშნავს, რომ მართალია, ამ ეტაპზე ყველა კრიტიკული მეწყრული ზონა მოინახულა გეოლოგთა ჯგუფმა მაღალმთიან აჭარაში, თუმცა თოვლის დნობის გამო სიტუაცია ყოველდღიურად იცვლება.

„ჩვენ ვსწავლობთ მუნიციპალიტეტებიდან შემოსული მომართვის საფუძველზე მოქალაქეთა საცხოვრებელი სახლების მდგომარეობას.

იმ შემთხვევაში კი, როდესაც ფორსმაჟორული სიტუაციაა და გვატყობინებენ, ყოველ მიზეზგარეშე ავდივართ ადგილზე, არ ველოდებით მუნიციპალიტეტის მომართვას“ – გვითხრა მამუკა ფუტკარაძემ.

გეოლოგი განმარტავს იმასაც, რომ მოქალაქეებს შეუძლიათ დარეკონ საქართველოს გარემოს დაცვისა და სოფლის მეურნეობის ცხელ ხაზზე – 1501-ზე ან 112-ში მეწყრული პროცესებისგან შექმნილი პრობლემის შესახებ.

„ცხელი ხაზის ოპერატორი პირდაპირ მე მატყობინებს, რომ ამ მოქალაქეს ეს პრობლემა აქვს და სანამ მუნიციპალიტეტიდან გვეტყვიან, ჩვენ ვახდენთ შესაბამის რეაგირებას“ – გვითხრა მან. 

„ბათუმელებმა“ მაღალმთიანი აჭარის მუნიციპალიტეტების მერიებს ჰკითხა, თუ გაეგზავნათ მოქალაქეებს გეოლოგიური დასკვნა და მუნიციპალიტეტებში მოქმედი პროგრამით, რომელიც საჭიროების შემთხვევაში ბინის ქირით უზრუნველყოფას ითვალისწინებს, ამჟამად რამდენი ოჯახი სარგებლობს.

ქედის მუნიციპალიტეტის პრესსამსახურში გვითხრეს, რომ გეოლოგიური დასკვნა თითოეულ მოქალაქეს გაეგზავნა და ამ ეტაპზე ოჯახები, რომლებიც მეწყერსაშიშ ზონაში ცხოვრობენ, გაყვანილი არიან ქირით.

„დეტალური კვლევების და დასკვნების დასრულების შემდეგ მერია უზრუნველყოფს დაზარალებული ოჯახების საცხოვრებლით უზრუნველყოფის პროგრამაში ჩართვას“, – მოგვწერეს პრესსამსახურიდან.

მერიის ცნობით, ქედაში ჯამში 72 ოჯახია ქირით გაყვანილი და მათგან 66 ოჯახი – მეწყერსაშიშ ზონებში ცხოვრების გამო. დარჩენილი 6 ოჯახი კი, სახლის სიძველის გამო ჩართულია „ძველი სახლის ახლით ჩანაცვლების პროგრამაში“.

„სოფელ გულებში გეოლოგიური დასკვნის საფუძველზე ტერიტორია საჭიროებს დეტალურ კვლევას, რის საფუძველზეც დადგინდება შემდგომი ნაბიჯები“, – მოგვწერეს ქედის მერიის პრესსამსახურიდან.

გეოლოგიური დასკვნების მოქალაქეებისთვის გადაგზავნას ადასტურებენ შუახევის მერიაშიც. „ყველა დასკვნა მიღებულია და დაგზავნილია“, – განგვიმარტეს პრესსამსახურში.

შუახევში ქირით საცხოვრებლად 84 ოჯახია გაყვანილი. აქედან 78 ოჯახი – მეწყერსაშიშ ზონაში ცხოვრების გამო.

„ეს რიცხვი შეიცვლება გეოლოგიური დასკვნების მიღების მიხედვით, რადგან გეოლოგიური დასკვნები კიდევ შემოდის“, – აზუსტებენ მერიაში. პროგრამით მოსარგებლე 84 ოჯახიდან 3 – სიძველით ამორტიზებულ საცხოვრებელ სახლში, 3 ოჯახი კი ზვავსაშიშ ზონაში ცხოვრების გამოა გადაყვანილი საცხოვრებლად ქირით.

ხულოში ბინის ქირით უზრუნველყოფის პროგრამით 61 ოჯახი სარგებლობს, მათგან 13 თავშესაფრის არმქონეა, ხოლო 48 – სტიქიის შედეგად დაზარალებული.

„გეოლოგიური დასკვნა ამ დროისთვის შემოსულია 5 ოჯახზე, რომლებსაც მუნიციპალიტეტი უხდის ქირას“, – მოგვწერეს ხულოს პრესსამსახურიდან.

ქედაში, შუახევსა და ხულოში, ბოლო პერიოდში განვითარებული მეწყრული პროცესების გამო, მოქალაქეები ხშირად მიმართავენ მერიას გეოლოგების მოწვევის, დეტალური კვლევების და ქირით გაყვანის საკითხებთან დაკავშირებით.

მთავარ ფოტოზე: მეწყრული პროცესი ხულოს სოფელ ბეღლეთში

არასამთავრობო ორგანიზაცია „პარტნიორობა ადამიანის უფლებებისთვის PHR-ის“ წარმომადგენლები აცხადებენ, რომ  მათ ორგანიზაციას ფინანსური კრიზისი შეეხო და დახმარება სჭირდებათ.

„პარტნიორობა ადამიანის უფლებებისთვის“ 10 წლის წინ დაარსდა და ის ყველაზე მოწყვლად ჯგუფებს უწევს იურიდიულ კონსულტაციასა და დახმარებას.

იმისათვის, რომ PHR-მა ოფისის პირობებში ისევ შეძლოს ბავშვების, ქალებისა და შშმ პირებისთვის დახმარების გაგრძელება, ფინანსები სჭირდება, რომელიც ამ ეტაპზე არ აქვთ.

ცნობისათვის, სამოქალაქო საზოგადოების ორგანიზაციები სრულიად არიან დამოკიდებული დონორი ორგანიზაციების მხარდაჭერაზე და როგორც წესი, სხვა დამატებითი შემოსავალი მათ არ გააჩნიათ.

„წარმოდგენა იმის შესახებ, რომ აქ არსებობენ მდიდარი NGO-ები, რა თქმა უნდა, სინამდვილეს არ შეესაბამება. როგორც წესი, ჩვენ არასდროს არ გვაქვს საკმარისი კი არა, იმ საქმისთვის, რასაც ვაკეთებთ, ადეკვატური ფინანსური მხარდაჭერა,“ – უთხრა „ბათუმელებს“ ანა აბაშიძემ, PHR-ის იურისტმა.

მისივე თქმით, დონორების მხრიდან არსებობს მზაობა მათი ორგანიზაციის დახმარების, მაგრამ ამ ეტაპზე მცირე ტექნიკური შეფერხებაა, რის გამოც ორგანიზაცია ფინანსური კრიზისის წინაშე დადგა. ამ ეტაპზე PHR-ს საოფისე ხარჯების, მათ შორის კომუნალური გადასახადების გადახდაც არ შეუძლია. ასევე ორგანიზაციამ ვერ გასცა გასული თვის ხელფასების 50%.

„ჩვენ ისეთი ხალხისთვის ვმუშაობთ, რომლებსაც არ აქვთ ბევრი არჩევანი, მათ შორის სექტორში. ესენი არიან ფსიქიატრიულ დაწესებულებაში მყოფი ადამიანები, შშმ პირები, რომლებიც დახურულ პანსიონატებში ცხოვრობენ. რომელთანაც პრაქტიკულად მხოლოდ ჩვენ ვმუშაობთ და სხვა არავინ. არიან ძალადობაგამოვლილი ბავშვები, ასევე შშმ ბავშვები, რომელთათვისაც სხვა არანაირი სერვისი არ არის ჩვენს ქვეყანაში.

ჩვენ ვმუშაობთ ძალადობაგამოვლილ ბავშვებთან და ქალებთან, რომლებსაც ისედაც სერიოზული ბარიერები აქვთ, რომ მოითხოვონ მხარდაჭერა. როდესაც ითხოვენ, აქაც, რა თქმა უნდა, რესურსები ლიმიტირებულია და სულ ვცდილობთ, გავუწიოთ ის მხარდაჭერა, რაც მათ სჭირდებათ.

ჩვენი მუშაობის სტილია – ვეხმარებით არა მხოლოდ ინდივიდებს, არამედ ვმუშაობთ იმ თემებზე, რომლებიც იწვევს სისტემურ ცვლილებას.

როცა ვეხმარებით ერთ კონკრეტულ ადამიანს, ამ დახმარებით ასევე ვეხმარებით მის მდგომარეობაში მყოფ ათასობით მოქალაქეს. მაგალითად, იქმნება რაღაც ახალი პროგრამა, ან/და უქმდება რაღაც დისკრიმინაციული პროგრამა.

ერთი მხრივ, რასაც ჩვენ ვაკეთებთ, ემოციურად და ფიზიკურადაც ძნელი საკეთებელია, მაგრამ ამაში ჩვენ ჩვენი ნებით ვართ შესული. გვსიამოვნებს და ეს არის ის სფერო, რაშიც ვხედავთ ჩვენს თავს.

მაგრამ მეორე მხრივ, ამ საქმეს სჭირდება რესურსები, რის გარეშეც ჩვენ ფიზიკურად ვერ შევძლებთ რაღაცების გაკეთებას. თუ ჩვენ გავქრით, სამწუხაროდ, ჩვენი გაქრობა იმდენად დაეტყობა ველს, რომ ძალიან ბევრი ადამიანი დარჩება ელემენტარული მომსახურების გარეშე.

თორემ სხვა შემთხვევაში, აქ რომ არჩევანის საშუალება იყოს, ჩვენი არსებობა – არარსებობა არ იქნებოდა ასეთი საკრალური.

მე და ჩემმა თანამშრომლებმა რომ მოვინდომოთ, სამსახურს ვიპოვით და გავაგრძელებთ საქმიანობას, მაგრამ ეს ნიშნავს, რომ ორგანიზაცია „პარტნიორობა ადამიანის უფლებებისთვის“, როგორც აქტორი, ქრება.

მის ადგილას, პრაქტიკულად, სიცარიელე რჩება, რომლითაც დაზარალდება ათასობით ჩვენი ქვეყნის მოქალაქე,“ – უთხრა ანა აბაშიძემ „ბათუმელებს“.

„პარტნიორობა ადამიანის უფლებებისთვის PHR“ არ იღებს საბიუჯეტო დაფინანსებას. ის სრულად დონორების მიერ საგრანტო დახმარებაზეა.

ახლა ორგანიზაცია დახმარებისკენ მოუწოდებს ყველა პირს, ვისაც გააზრებული აქვს „პარტნიორობა ადამიანის უფლებებისთვის“ არსებობის აუცილებლობა და ვინც ხედავს ამ ორგანიზაციის მიერ გაწეულ შრომის შედეგს.

გიზიარებთ „პარტნიორობა ადამიანის უფლებებისთვის“ ანგარიშის ნომერს.

სს „თიბისი ბანკი“

ანგარიშის ნომერი: GE88TB7589036080100003

მიმღები: პარტნიორობა ადამიანის უფლებებისთვის

დანიშნულება: შემოწირულობა

მოსამართლეებთან  ტელეფონით ან სხვა ტექნიკური საშუალებით კომუნიკაციისთვის საქართველოში სულ 12 ადამიანია დაჯარიმებული, მათ შორის, საჯარო მოხელეები.

ორგანული კანონი „საერთო სასამართლოების შესახებ“ კრძალავს მოსამართლესთან კომუნიკაციას, რომელიც დაკავშირებულია კონკრეტული საქმის ან საკითხის განხილვასთან ან/და საქმის სავარაუდო შედეგთან და არღვევს მოსამართლის დამოუკიდებლობის, მიუკერძოებლობისა და სასამართლო პროცესის შეჯიბრებითობის პრინციპებს.

მოსამართლეებთან კომუნიკაციის წესის დარღვევის კუთხით სტატისტიკურ მონაცემებს [2007-2022 წწ] იუსტიციის უმაღლესი საბჭოსგან მიღებული ინფორმაციის საფუძველზე ორგანიზაცია „სასამართლოს გუშაგი“ ავრცელებს.

ამ მონაცემების მიხედვით, ბათუმის საქალაქო სასამართლოს მოსამართლეებთან კომუნიკაციის წესების დარღვევისთვის არავინ დაუჯარიმებიათ. ეს არ გამორიცხავს ასეთი შემთხვევის შესაძლო არსებობას, თუმცა მოსამართლესთან კომუნიკაციის დარღვევის შემთხვევა ბოლო 15 წელი ბათუმში ოფიციალურად დაფიქსირებული არ არის.

სხვა სასამართლოების შემთხვევაში დაჯარიმებულებს შორის 4 საჯარო მოხელეა, 4 – დაინტერესებული პირი [პირი, რომელიც დაინტერესებულია განსახილველი საქმის შედეგით და ამ მიზნით ცდილობს მოსამართლესთან კომუნიკაციას], 3 – პროცესის მონაწილე, ხოლო 1 – ადვოკატი.

მოსამართლეებთან კომუნიკაციის წესის დარღვევისთვის ყველაზე მცირე ოდენობის ჯარიმა – 50 ლარი თბილისის საქალაქო სასამართლომ გამოიყენა [2016 წელი], ყველაზე მაღალი – 2500 ლარი კი, მცხეთის რაიონულმა სასამართლომ [2013 წელი].

2022 წელს 300 ლარით დაუჯარიმებიათ პროცესის მონაწილე უზენაეს სასამართლოშიც, ასევე, მოსამართლესთან კომუნიკაციის წესის დარღვევისთვის.

კანონის მიხედვით, პროცესის მონაწილე, დაინტერესებული პირი ან საჯარო მოსამსახურე მოსამართლესთან კომუნიკაციის წესის დარღვევისთვის შეიძლება მაქსიმუმ 5 ათასი ლარით დაჯარიმდეს, სახელმწიფო მოსამსახურის, სახელმწიფო-პოლიტიკური თანამდებობის პირის, პოლიტიკური თანამდებობის პირის შემთხვევაში კი – არაუმეტეს 10 000 ლარით.

მოსამართლეს საქმის განხილვის დასრულებამდე თუ ტელეფონზე დაურეკავთ, ეს სისხლისსამართლებრივ პასუხისმგებლობასაც ითვალისწინებს.

მოსამართლესთან კომუნიკაცია დაუშვებელია საქმის სასამართლოში შესვლის მომენტიდან ამ საქმეზე გამოტანილი სასამართლო გადაწყვეტილების კანონიერ ძალაში შესვლამდე, ხოლო სისხლის სამართლის საქმეზე – აგრეთვე გამოძიების მიმდინარეობისას.

კანონი განსაზღვრავს იმ პირთა წრესაც, ვისაც ეკრძალება საქმის განმხილველ მოსამართლესთან კომუნიკაცია: პროცესის მონაწილე, ნებისმიერი დაინტერესებული პირი, საჯარო მოსამსახურე, სახელმწიფო მოსამსახურე, სახელმწიფო-პოლიტიკური თანამდებობის პირი, პოლიტიკური თანამდებობის პირი.