აჭარა,მთავარი,მუნიციპალიტეტი,სიახლეები

პარკირების საფასურის გადახდას ბათუმში 1-ელი ივლისიდან შეძლებთ – ავტოტრანსპორტი

26.06.2023 • 4477
პარკირების საფასურის გადახდას ბათუმში 1-ელი ივლისიდან შეძლებთ – ავტოტრანსპორტი

პირველი ივლისიდან მოქალაქეები პარკირების საფასურის გადახდას ონლაინ, ახალ ვებგვერდზე შეძლებენ – გვითხრეს დღეს „ბათუმის ავტოტრანსპორტში“.

„ავტოტრანსპორტის“ ინფორმაციით, „ახალი ვებგვერდის საშუალებით შესაძლებელი იქნება ქალაქში პარკირების სხვადასხვა ვადიანი საშვის შეძენა. რაც შეეხება ტარიფს, ავტომობილის პარკირებისთვის საფასური არ იცვლება“.

„ბათუმის ავტოტრანსპორტის“ ახალი ვებგვერდი, 2023 წლის 1-ელი ივლისიდან ამოქმედდება, სადაც პარკირების საფასურის გადახდა იქნება შესაძლებელი / სქრინი ვებგვერდიდან

ბათუმში პარკირების საფასურის გადახდას მძღოლები 2023 წლის თებერვლიდან ვერ ახერხებენ. „ბათუმის ავტოტრანსპორტის“ ინფორმაციით, დაზიანდა სერვერი, რის გამოც შესაბამისი საიტი გაითიშა.

უკვე 5 თვეა ვერც ბათუმის მუნიციპალური ინსპექცია აჯარიმებს მძღოლებს პარკირების საფასურის გადაუხდელობისთვის.

ინსპექციაში „ბათუმელებს“ უთხრეს, რომ, როგორც კი ოფიციალურად გავრცელდება ინფორმაცია, რომ პარკირების საფასურის გადახდა შესაძლებელია და ეს ეცოდინებათ მოქალაქეებს, მხოლოდ ამის შემდეგ განაახლებენ დაჯარიმებას – პარკირების საფასურის გადაუხდელობისთვის.

1-ელი ივლისიდან სრულად ამოქმედდება ასევე მუნიციპალური ინსპექციის ახალი ვებგვერდი და დაჯარიმების ახალი სისტემაც.

„პარკირებისა და ტრანსპორტის სამსახურის თანამშრომლები სპეციალური აპარატებით აღიჭურვნენ, რომლებშიც ჩატვირთულია ახალი ელექტრონული პროგრამა. აღნიშნულის მეშვეობით ადგილზე მოხდება სამართალდამრღვევის იდენტიფიცირება და მისივე სახელზე რეგისტრირებულ ნომერზე საჯარიმო ელექტრონული ქვითრით სრული ინფორმაციის გაგზავნა.

სამართალდამრღვევი თუ 10 დღის ვადაში დაფარავს დავალიანებას, მას 20%-ით ნაკლების გადახდა მოუწევს. ერთი თვის გადაუხდელობის შემდეგ ქვითარი 2-ჯერ ფოსტის მეშვეობით გაეგზავნება რეგისტრირებულ მისამართზე; ჩაუბარებლობის შემთხვევაში კი, ბათუმის მუნიციპალური ინსპექცია ქვითრის საჯაროდ გამოქვეყნებას უზრუნველყოფს ოფიციალურ ვებგვერდზე, რაც 30 დღის შემდეგ ავტომატურად გულისხმობს ჩაბარებას.“ – აცხადებს მუნიციპალური ინსპექცია.

ამ თემაზე ვრცლად: 

რა იცვლება ბათუმში დაჯარიმებისა და პარკირების საფასურის გადახდის წესში

 

 

გადაბეჭდვის წესი


ასევე: