2023 წლის პირველ 3 თვეში საქართველოში რუსეთის ფედერაციიდან 298 285 საზღვრის კვეთა დაფიქსირდა – ასეთია საქართველოს შინაგან საქმეთა სამინისტროს ოფიციალური მონაცემები.
2023 წლის პირველ კვარტალში საქართველოში საზღვრის კვეთის სტატისტიკაში პირველ ადგილზე რუსეთის ფედერაციაა.
ამავე დროს, შს სამინისტრო წერს, რომ 2023 წლის პირველ კვარტალში საქართველოდან რუსეთში 320 236 საზღვრის კვეთა დაფიქსირდა.
დღემდე უცნობია, რუსეთის რამდენი მოქალაქე იმყოფება ამჟამად საქართველოში.
2023 წლის პირველ თებერვალს საქართველოს შს მინისტრმა, ვახტანგ გომელაურმა პარლამენტში განაცხადა, რომ 2022 წელს რუსეთიდან საქართველოში 869 874 ადამიანი შემოვიდა, 809 873 კი უკან გავიდა, შესაბამისად, გამოდის, რომ საქართველოში 60 ათასამდე რუსეთის მოქალაქე იმყოფებოდა იმ დროისთვის.
ამავე დროს, შს სამინისტროს ოფიციალური სტატისტიკის თანახმად, რუსეთის უკრაინაში შეჭრიდან 2023 წლის იანვრამდე პერიოდში, ანუ 10 თვეში, საქართველოში ჯამში რუსეთის 1,4 მილიონი მოქალაქე შემოვიდა, რაც საქართველოს მთლიანი მოსახლეობის 38,1 პროცენტია, ანუ მესამედზე მეტი.
შს მინისტრმა პარლამენტში საზღვრის კვეთების სიხშირე ასე ახსნა:
„საზღვარზე ძალიან ბევრია, რომელიც ტაქსაობს, ტვირთს ეზიდება და შეიძლება დღეში დღეში 3-ჯერ და 5- ჯერ გადმოვიდეს რუსეთის მოქალაქე საზღვარზე. …ის, რომ კატასტროფულად გაიზარდა რუსეთის მოქალაქეების რაოდენობა საქართველოში და უბედურება ხდება, ნამდვილად არ ხდება. მე არ ვლაპარაკობ საზღვრის კვეთაზე“.
2023 წლის პირველ კვარტალში, რეკორდულად არის გაზრდილი საზღვრის კვეთის რაოდენობა სომხეთის რესპუბლიკიდანაც.
2023 წლის იანვარში, თებერვალსა და მარტში სომხეთიდან საქართველოში საზღვრის 224 342 კვეთა განხორციელდა, მაშინ, როცა, მაგალითად, 2022 წლის პირველ კვარტალში ეს რიცხვი იყო 78 869, ხოლო 2021 წლის პირველ კვარტალში – 17 970. აღნიშნული რიცხვები მოცემულია შს სამინისტროს სტატისტიკურ მონაცემებზე დაყრდნობით.
ამავე თემაზე:
რუსეთის მოქალაქეებმა 2 963 ბინა და 37.9 ჰა მიწა შეიძინეს საქართველოში – ომი უკრაინაში
