„ჩვენთვის „ლადა“ უნდათ, მათთვის კი „მერსედესი“ – ასე შეგვიჯამა სალომე გორგილაძემ თავისი შეფასება ბიძინა ივანიშვილისა და „ოცნების“ წინასაარჩევნო ნარატივზე. სალომე პედაგოგია, ზაფხულობით გიდად მუშაობს და ინგლისურში ამეცადინებს სტუდენტებს.
ყოველდღიურად ბევრ ადამიანთან აქვს შეხება და ამიტომაც მოსაზრებებს ყოველთვის არგუმენტებით ასაბუთებს, განსაკუთრებით კი განათლების სფეროზე საუბრისას სალომე ამბობს, რომ საქმე ძალიან ცუდად არის.
„ოცნების“ 12-წლიანი მმართველობისა და 2024 წლის საპარლამენტო არჩევნების ნარატივზე საუბრისას სალომეს „ლადა“ შემთხვევით არ უხსენებია, ის რუსული წარმოების ავტომანქანაა. ამომრჩევლები, რომლებსაც საკუთარი ნება მკაფიოდ აქვთ გამოხატული, რომ ევროპასთან ინტეგრაცია სურთ, აცხადებენ, რომ „ოცნებას“ რუსეთისკენ მივყავართ, მაგრამ „თავად თავით არ ეშვება“ და „საკუთარი თავისთვის მერსედესი“ სურს.
ამიტომაც ირჩევენ ევროპულ სკოლებს თავიანთი შვილებისთვის, ყიდულობენ სახლებს, ბინებს ევროპაში, მიდიან სამკურნალოდ, სამოგზაუროდ, ევროპულ ბანკებში ინახავენ დანაზოგებს. თუნდაც ქონებრივ დეკლარაციებზე თვალის გადავლებით ცხადი ხდება, რომ „ოცნება“ ფულს ევროპაში ხარჯავს, ევროპაში მიდის დასასვენებლად, ევროპაში მკურნალობს, ევროპულად იცვამს, ევროპულ განათლებას ირჩევს შვილებისთვის.
სალომე „ოცნების“ 12-წლიან მმართველობას უკუსვლის პერიოდს უწოდებს „დემოკრატიასა და განათლებაში“. ასევე ამბობს, რომ მიუხედავად დაპირებისა, არც უსაფრთხოების განცდა აქვს: „გვეუბნება მე აქ ვიქნები და იქნება მშვიდობაო, რომლის გარანტიც ვერაფრით ვერ არის თავად, არც თავდაცვა გვივარგა, არაფერი არ გვივარგა“.
„ოცნების“ დამფუძნებელი, მმართველი პარტიის საპატიო თავმჯდომარე, მილიარდერი ექს-პრემიერი ბიძია ივანიშვილი „ოცნების“ ხელისუფლების მეთორმეტე წლისთავზე ამომრჩეველს მშვიდობას ჰპირდება და ისევ 41-ის არჩევას სთხოვს. თან გვეუბნება, რომ ომი გვექნება, მას თუ არ ავირჩევთ. გარდა ამისა, ივანიშვილი აცხადებს, რომ მნიშვნელოვანი ცვლილებებისთვის საკონსტიტუციო უმრავლესობა სჭირდება. ეს მნიშვნელოვანი ცვლილებები კი მართლმადიდებლობის, როგორც „ქართული სახელმწიფოს თვითმყოფადობის საყრდენის მისიის მკაფიოდ ასახვაა კონსტიტუციაში“, ოპოზიციის გაუქმება და ლგბტ თემის შეზღუდვაა.
2024 წლის საპარლამენტო არჩევნებისთვის ბიძინა ივანიშვილი თავად ეხმარება „ოცნებას“ წინასაარჩევნო კამპანიის წარმოებაში – ესწრება ამომრჩეველთან შეხვედრებს რეგიონებში, მართალია შუშის მიღმა, თუმცა სიტყვითაც გამოდის ამ შეხვედრებზე და პარტიული სიის პირველ ნომრადაც ჩაეწერა.
მმართველი პარტიის ლიდერები ამჯერად, წინასაარჩევნო კამპანიის ფარგლებში დაგეგმილ შეხვედრებზე არაფერს ამბობენ დასაქმებაზე, ხელფასების ზრდაზე, ეკონომიკის გაძლიერებაზე, ასაგუგუნებელ ქარხნებზე.
ამავე დროს საპარლამენტო უმრავლესობამ დაამტკიცა რუსული კანონი, რაც მომავალში „ოცნების“ ხელისუფლების „ოცნების“ ახდენას შეუწყობს ხელს და გააჩუმებს ყველას, ვინც ხელისუფლებას აკრიტიკებს.
ამ ყველაფრის გათვალისწინებით ამომრჩეველი, რომელიც ჩვენ ქუჩაში გამოვკითხეთ, უკან გვიბრუნებს რიტორიკულ კითხვებს:
„როგორ გამდიდრდა ჩვენი ხელისუფლება ამომრჩევლის გაღარიბების ფონზე, როგორ აიშენეს „ოცნების“ მაღალჩინოსნებმა მილიონიანი სახლები, როგორ დაირეგისტრირეს სახელმწიფო მიწის ნაკვეთები და ტყეები საკუთრებაში. არ უნდა შევიმჩნიოთ მოგზაურობები, ძვირადღირებული უნივერსიტეტები ევროპაში მათი შვილებისთვის, ჩარტერული რეისები, აქსესუარები, სამკაულები. ბოლოს და ბოლოს ბევრი მათგანი ერთი რიგითი ამომრჩევლის მთელი წლის ხელფასზე გაცილებით მეტს ერთ აქსესუარში იხდის“.
არადა პოლიტიკაში შემოსვლის პირველივე წელს, როცა ბიძინა ივანიშვილი უხვად გასცემდა დაპირებებს, მკაფიოდ ამბობდა: „ვერცერთი ჩინოვნიკი ვერ მიიღებს განცხრომას ხელისუფლებაში ყოფნით. ეს იქნება ძალიან დიდი პასუხისმგებლობა, ვერცერთი ჩინოვნიკი ვერ იცხოვრებს უფრო კარგად, ვიდრე იცხოვრებს საშუალო მოსახლე საქართველოსი… მათ ექნებათ დიდი განცდა, რომ საქართველოს მოსახლეობა უხდის ფულს და ვალდებული არიან თქვენს წინაშე.“
არჩევნებიდან 12 წლის თავზე კი ყველაფერი პირიქით მოხდა – დაიწყო „ოცნების“ ჩინოვნიკების გამდიდრების, მილიონიანი სახლების, ძვირადღირებული ავტომანქანების, ნახევარ მილიონად ღირებული საათების შეძენის, ჩარტერული რეისების, ტყეების და სხვა სივრცეების საკუთრებაში დარეგისტრირების ისტორიები.
ასევე „ხეირი ნახა“ „ოცნებასთან“ დაახლოებულმა ბიზნესმა. რომელიც ხან „ოცნების“ დამფინანსებელია და ხან „ოცნების“ კანდიდატი, თანამშრომლობა და სარგებელი ორმხრივია. ხშირად, იმითაც აღარავინ ინტერესდება, რა პირობებში უწევთ ამ ბიზნესთან მუშაობა რიგით დასაქმებულებს.
თუმცა ამომრჩევლის გამოკითხვისას მეტწილად, სოციალური ფონი უკანა პლანზე ინაცვლებს, როცა საუბარი რუსეთთან დაახლოებას ეხება.
„სამწუხაროდ, უკვე მრავალი წელია ივანიშვილი და მისი მთავრობა გვთავაზობს მხოლოდ ერთს და ეს ერთი არის რუსკი მირი“, – ამბობს რომა დოლაბერიძე. ის არასამთავრობო ორგანიზაცია „საზოგადოებრივი განვითარების აკადემიის“ პროგრამების ხელმძღვანელია და უკვე წლებია მთავრობის სტრუქტურების მუშაობას აკვირდება, ესწრება სხდომებს, სწავლობს ბიუჯეტის ხარჯვას, იკვლევს რამდენად ასრულებენ თვითმმართველობის ორგანოები საზოგადოებასთან ანგარიშვალდებულების კანონით გათვალისწინებულ მოთხოვნას.
„როგორც ივანიშვილი, ასევე ოცნება ამ მიმართულებით ხედავენ საკუთარ თავს – არა ევროპა, დემოკრატიული სამყარო, ადამიანის უფლებები, თავისუფლება, არამედ ოლიგარქები, საქმეების ჩაწყობის სამყარო. ასეთია რუსკი მირი… „ოცნება“ ივანიშვილის დიქტატით ირჩევს რუსკი მირს და ჩვენ ისეთივე სიცრუეში აღმოვჩნდებით და ქართული საზოგადოებაც იქნება იმ სიცრუის, სიღარიბის, კორუფციის, ჩაწყობების, მაფიის და ასე შემდეგ საზოგადოება.
რუსკი მირი მცირე ჯგუფისთვის არის კარგი, „ოცნების“ ჩვეულებრივი ბაბლისთვისაც კი რუსკი მირი ძალიან ცუდია. ისევ რუსკი მირის შემქმნელები მათი შვილებისთვის არჩევენ დასავლურ სივრცეში ყოფნას, უნივერსიტეტები, სკოლები, სახლები და ასე შემდეგ. ჩვენმა პრორუსულმა პოლიტიკოსებმა კარგად იციან, რომ რუსეთი არის სიბნელე. ამ ნაწილში უნდათ ბიზნესის კეთება, შავი ფულის მოძრაობა, რაც უფრო ადვილია.“
14 აგვისტოს, გორში, ამომრჩეველთან შეხვედრისას ივანიშვილმა თქვა ისიც, რომ მას შემდეგ, რაც აგვისტოს ომის “გაჩაღებისთვის” ნაციონალურ მოძრაობას გაასამართლებს, “ბოდიში უნდა მოვიხადოთ” იმის გამო, რომ ამ პარტიამ 2008 წელს ცეცხლის ალში გახვია ჩვენი ოსი დები და ძმები.
ოპოზიციამ მის ამ განცხადებას სახელმწიფოს ღალატი უწოდა.
