„კმარას“ დევნა-შევიწროება აჭარის ძალოვანებისთვის პრიორიტეტული რომ აღარაა, ეს თვალნათლივ ჩანს. მათ აღარ სდევნიან. ბათუმში 3 თებერვალს ორგანიზაცია „კმარა“-ს აქტივისტებმა საჯაროდ გახსნეს ოფისი, რომლის წინაც ხუთჯვრიან დროშასთან ერთად, „კმარას“ დროშაც გამოფინეს.
გუშინ ახალგაზრდების ერთმა ჯგუფმა დროშის ჩამოგლეჯა სცადა, მაგრამ არაფერი გამოუვიდათ და მხოლოდ მუქარას დასჯერდნენ: „ასი კაცით დავბრუნდებით და დაგარბევთო“. მიუხედავად ამისა, „კმარას შტაბბინა“ გუშინ დარბევას გადაურჩა.
პრეზენტაციის დღეს „კმარელებმა“ ჟურნალისტებისთვის პირველი პრესკონფერენცია გამართეს, რომელზეც ხმამაღალი განცხადებები გააკეთეს ბოლო ორი დღის განმავლობაში ორგანიზაცია „ჩვენი აჭარა“-ს ოფისსა და კერძო სახლებზე გაჩენილ „კმარა“-ს წარწერებთან დაკავშირებით. „ეს წარწერები, რომლებიც გუშინ გაჩნდა „ჩვენი აჭარის“ ოფისსა და სახლზე, სადაც ასლან აბაშიძე ცხოვრობს, ჩვენი გაკეთებული არაა. ჩვენ საზოგადოების წინაშე ვაცხადებთ ხმამაღლა, რომ კერძო საკუთრებაზე წარწერებს არ ვაკეთებთ. ჩვენი სამიზნე მხოლოდ სახელმწიფო ორგანიზაციებია, რომლებიც, როგორც თავად ამბობენ, ემსახურება ხალხის აზრს. თუ ეს ასეა, ეს შენობებიც ჩადგეს საზოგადოების ინტერესებში. ჩვენ აჭარაში ნარკომანებად, ტერორისტებად გვთვლიან. ჩვენ არც ერთი ვართ და არც მეორე, უბრალოდ, ვართ სტუდენტი-ახალგაზრდობა, რომლებიც აზრის თავისუფლად გამოხატვას ვითხოვთ“ – აცხადებენ აქტივისტები.
„კმარელებს“ აინტერესებთ, თუ „აღორძინების“ მხარდამჭერებს შეუძლიათ მიტინგის გამართვა და ვერტმფრენიდან პროკლამაციების გადმოყრა, მათ რატომ ეკრძალებათ იგივე. „დღემდე იატაკქვეშ ვმუშაობდით, დღეიდან კი საჯაროდ ვიმოქმედებთ“.
ისინი მადლობას უხდიან „კმარას ურნების“ ავტორებს უფასო რეკლამისათვის.
„კმარელებისა“ და მათი ოჯახის წევრების მისამართით გრძელდება მუქარები. აქტივისტები არ გამორიცხავენ ოფისის დარბევასაც, თუმცა, ასეთ ინფორმაციას თვითონ ფლობენ და ყოველ შემთხვევაში პასუხისმგებლობას აჭარის ხელისუფლებას აკისრებენ.
როგორც ჩანს „კმარა“ აჭარის ხელისუფლებისთვის მაინცა და მაინც საშიში აღარ არის. იმასაც ამბობენ, რომ ორგანიზაციას თანხები დონორმა შეუწყვიტა, ან უახლოეს მომავალში შეუწყვეტს. სავარაუდოდ, „კმარამ“ თავისი მისია ამოწურა…
გუშინვე, „კმარას“ განცხადებებთან დაკავშირებით ასლან აბაშიძის პრესცენტრის ხელმძღვანელმა თამარ გუდავამ, მიუხედავად იმისა, რომ აღნიშნა, „კმარასთან“ დაკავშირებით საერთოდ ზედმეტად მიაჩნია კომენტარიო, ჟურნალისტებს შემდეგი განუცხადა: „კმარას აქტივისტებმა გააკეთეს განცხადება, რომ ხელისუფლების ნამოქმედარია ის წარწერები, რომლებიც გამოჩნდა „ჩვენი აჭარის“ ოფისზე. მე კიდევ ერთხელ ვიმეორებ და ვაძლიერებ იმ აზრს, რომ კმარა ქართული სიტყვაა და რატომ არ შეუძლია ორგანიზაცია „კმარას“ წევრებისაგან განსხვავებული აზრის მქონე ადამიანმა დაწეროს „კმარა“ და იგი ჩაითვალოს ხელისუფლების მხარდამჭერად. ასე ხელაღებით ხელისუფლების დადანაშაულება გაუგებარია და ვფიქრობ, რომ არასასურველ შედეგს მოგვიტანს. თვითონ ძალიან თამამები არიან საჩივარისა და სარჩელების შეტანისას, ანალოგიური რამ შეიძლება გავაკეთოთ ჩვენაც“.
