ბერძნულ-რომაულ ჭიდაობაში მრავალგზის მსოფლიოს ჩემპიონმა, ასევე ოლიმპიური თამაშების მონაწილე როსტომ აბაშიძემ „სამართლიანობის აღდგენის“ მიზნით პროკურატურას მიმართა. ყოფილი სპორტსმენის თქმით, მას 2006 წელს სოფელ გონიოში 1200 კვადრატული მეტრი მიწის ნაკვეთი წაართვეს.
როსტომ აბაშიძის ინფორმაციით, მას მეზობელმა თამაზ ფევაძემ უჩივლა, თუმცა ის დარწმუნებულია, რომ მისი მიწის ნაკვეთს ფლობს გიორგი კარბელაშვილი, ეკონომიკისა და მდგრადი განვითარების მინისტრის ყოფილი მოადგილე.
„კარბელაშვილმა იქ უდიდესი სახლი ააშენა, რომელიც ვიღაც ქალზე აქვს გაფორმებული. ფევაძე მან გამოიყენა, თორემ სად იყო ფევაძე მთელი ცხრა წელი. ფევაძის განმარტება, რომ ასლან აბაშიძის დროს შიშის გამო იყო ჩუმად, ტყუილია, რადგან აბაშიძე 2004 წელს წავიდა, ფევაძემ კი ჩივილი 2006 წელს დაიწყო. მხოლოდ ორი წლის შემდეგ გაახსენდა, მე რომ ვსარგებლობდი მისი მიწით“.
როსტომ აბაშიძეს მიწის ნაკვეთი ხელისუფლებამ გადასცა, მაშინ ხელვაჩაურის გამგებელი მისი ძმა – ჯემალ აბაშიძე იყო. ყოფილი სპორტსმენი ამბობს, რომ მისი ძმა არაფერ შუაშია და მიწა გონიოში შევარდნაძის ბრძანების საფუძველზე მისცეს.
„ვარდების რევოლუციის“ შემდეგ, როსტომ აბაშიძეს ხელისუფლებამ თბილისში ის ბინაც ჩამოართვა, რომელიც მას სახელმწიფომ სპორტული მიღწევების გამო აჩუქა. მაშინ სპორტსმენი ასლან აბაშიძის ოჯახის ახლობლად მიიჩნიეს. თუმცა, ეს შეცდომა მალევე გამოასწორეს და როსტომ აბაშიძეს თავისი ბინა დაუბრუნეს.
როსტომ აბაშიძის თქმით, ახლა მის საჩივარს ხელვაჩაურის პოლიცია სწავლობს.
