Batumelebi

შავი ზღვის საკრუიზო პლატფორმის სამუშაო შეხვედრა ტრაბზონში

შავი ზღვის აუზის ქვეყნებს აქვს საკრუიზო ტურიზმის მაღალი პოტენციალი. ახლო მომავალში რეგიონში მოსალოდნელია საერთაშორისო მასშტაბით საკრუიზო ტურიზმის მიმართ ინტერესის ზრდა. საკრუიზო პლატფორმის სამუშაო შეხვედრაზე შესაძლებელი იქნება ერთობლივი სამუშაოების გატარება შავი ზღვის აუზის ქვეყნების მსოფლიო ბაზარზე ადგილის დასამკვიდრებლად. აღნიშნული პლატფორმა ხელს შეუწყობს საკრუიზო ტურიზმისათვის საერთო პოლიტიკის ჩამოყალიბებას, ისევე როგორც რეგიონის ქვეყნების ნავსადგურებისა და სავაჭრო-სამრეწველო პალატების ურთიერთ-თანამშრომლობას.

აჭარის სოფლის მეურნეობის მინისტრის გადადგომას ითხოვენ

ასოციაციის ხელმძღვანელი ლაშა ადამია სოფლის მეურნეობის მინისტრის პასუხისმგებლობის საკითხის დასმას ითხოვს და აცხადებს რომ ზაურ ფუტკარაძე უნდა გადადგეს. მისი განცხადებით სამინისტროსგან საჯარო ინფორმაცია გამოითხოვეს, რომელიც არ მიეწოდათ.

„ვითხოვდით საგაზაფხულო ვაუჩერების შესახებ ინფორმაციას. თუ რამდენი ბენეფიციარი ჰყავს უშუალოდ სოფლის მეურნეობის სამინისტროს. რამდენმა მოქალაქემ აიღო ვაუჩერი. რამდენი ვაუჩერი განახლდა. სამწუხაროდ ორი თვე დაჭირდა აჭარის სოფლის მეურნეობის სამინისტროს იმის მოსაწერად რომ ისინი არ არიან კომპეტენტურები და სრული პასუხი ექნებოდა საქართველოს სოფლის მეურნეობის სამინისტროს.

მაშინ როცა აჭარის სოფლის მეურნეობის სამინისტრო ვერ ართმევს თავს ვერც ციტრუსის სეზონს და ვერც ვერაფერს, მინისტრის პასუხისმგებლობის საკითხი უნდა დადგეს. აზრს ვერ ვხედავ ამ მინისტრის თანამდებობაზე ყოფნის, მანდარინის და კივის ხეს ჩვენც ვარჩევთ და ამისთვის სოფლის მეურნეობის მინისტრი არ გვჭირდება,“ – განაცხადა ლაშა ადამიამ.

ადამიას განცხადებას დღესვე აჭარის სოფლის მეურნეობის მინისტრი გამოეხმაურა. ზაურ ფუტკარაძის განცხადებით საჯარო ინფორმაცია ორგანიზაციამ 27 ნოემბერს მოითხოვა, და ხუთ სამუშაო დღეში მიიღო კიდეც.

„წერილში ითხოვდა მიგვეწოდებინა ინფორმაცია რეგიონში ვინ მიიღო საგაზაფხულო აგრო ბარათი. ბუნებრივია ჩვენ გვაქვს ჩვენი ინფორმაცია, მაგრამ ამ პროგრამის გამხორციელებელი, როგორც გასულ, ისე მიმდინარე წელს არის საქართველოს სოფლის მეურნეობის სამინისტრო. პასუხში მივწერეთ სწორედ ეს და განვუმარტეთ რომ მათგან მიიღებდნენ ამომწურავ პასუხს,“ – აცხადებს აჭარის სოფლის მეურნეობის მინისტრი ზაურ ფუტკარაძე.

რაც შეეხება ჩავარდნილ მანდარინის სეზონს, მინისტრის განმარტებით 65 ათასი ტონა მანდარინია ამ ეტაპზე ექსპორტზე გატანილი. ზაურ ფუტკარაძე აცხადებს რომ მის წინააღმდეგ მიმართული განცხადებები „ნაციონალური მოძრაობის“ მიერ მართული პროცესია.

„მე ვთქვი სატელევიზიო ინფორმაციის კომენტარის დროს. შეშფოთებულია, აღშფოთებულია და არ სძინავთ ღამე ნაციონალური მოძრაობის წარმომადგენლებს. იმის გამო რომ ციტრუსის სეზონი არის ჩვენთან წარმატებული. ამდენი ობიექტი გაკეთდა, ასე კარგად არის ექსპორტი ორგანიზებული. ამიტომ იყენებენ ისევ მათ მიერ შექმნილ ორგანიზაციებს, რომ ისინი გამოვიდნენ და გააკეთონ მოწოდებები ჩემს წინააღმდეგ,“ – აცხადებს ზაურ ფუტკარაძე.

ასოციაცია „ახალგაზრდული ინიციატივა მომავალი საქართველოსათვის“ ორშაბათს საპასუხო ბრიფინგის გამართვას გეგმავს.

ქობულეთელი ხანდაზმულების სოლიდარობა უკრაინელ ხალხს

„გვინდა აღვნიშნოთ და ჩვენი დიდი პატივისცემა დავუდასტუროთ უკრაინელი ხანდაზმულების საოცარ ენთუზიაზმს, რომლებიც საკუთარი თავგანწირვის ფასად თავიანთ წილ აგურს დებენ ევროპული არჩევანის მოსაპოვებლად. ხანდაზმულები ალაგებენ ევრომაიდანის ტერიტორიას, მომიტინგეებს საკუთარ ლუკმას უნაწილებენ, მოხუცები ტეხავენ ყინულებს ძალაყინით, ყრიან ტომრებში და მიაქვთ ბარიკადებზე, 89 წლის ქალბატონმა კი სანატრელ გამარჯვებას თავისი უკანასკნელი პენსია – 300 გრივნი შესწირა. ამ ბრძოლას სოლიდარობას უცხადებს საქართველო და მათ შორის ასოციაცია „ღირსეული სიბერე“, საქართველოს და უკრაინის არჩევანი ხომ ევროპულ ოჯახთან თანაცხოვრებაა,“ – ნათქვამია განცხადებაში.

ასოციაციის წარმომადგენლები წარმომადგენლები უკრაინელი ხალხის მხარდასაჭერ აქციებში თბილისსა და ბათუმშიც მონაწილეობდნენ.

ხელვაჩაურში მეწყერმა ერთი მოსახლე დააზარალა

შემთხვევის ადგილზე გეოლოგები და ხელვაჩაურის მუნიციპალიტეტის გამგებელი ნადიმ ვარშანიძე იმყოფებოდა.

„ოჯახის წევრები გავაფრთხილეთ რომ არ შევიდნენ სახლში რადგან იქ ცხოვრება არ შეიძლება. ერთი-ორი დღე ალბათ ნათესავებში იქნებიან. მერე სადაც ეს ოჯახი მონახავს საცხოვრებელ ადგილს ერთი-ორი თვით გადავუხდით ქირას,“ – განაცხდა ხელვაჩაურის გამგებელმა ნადიმ ვარშანიძემ.

გამგებლის თქმით ადგილზე მუშაობენ გეოლოგები, მუნიციპალიტეტისა და სამთავრობო კომისია. ისინი შეისწავლიან მომხდარ ფაქტს, დაიდება დასკვნა, რომლის მიხედვით მთავრობა შემდგომში შეძლებს დახმარებას. მისივე ინფორმაციით სახლის გარეშე დარჩენილი ჩოხარაძეების 6 სულიანი ოჯახი ამჟამად ნათესავებთან აფარებს თავს.

მემორანდუმი ბათუმის საზღვაო აკადემიასა და კორეის საზღვაო ინსტიტუტს შორის

ურთიერთგაგების მემორანდუმს ხელი ბათუმის სახელმწიფო საზღვაო აკადემიის რექტორმა ირაკლი შარაბიძემ და სუნგ გუი კიმმა მოაწერეს.

ასევე საზღვაო ტრანსპორტის სფეროში თანამშრომლობის საკითხებზე ორმხრივი შეხვედრები გაიმართა და მხარეებმა დარგში არსებულ ვითარებაზე ინფორმაცია გაცვალეს.

სამინისტროს ტრანსპორტის პოლიტიკის დეპარტამენტისა და სსიპ საზღვაო ტრანსპორტის სააგენტოს წარმომადგენლებმა კორეის მხარეს ევროკავშირის მიერ ქართველ მეზღვაურთა დიპლომების აღიარების შესახებ აცნობეს. ეს ფაქტი ქართველ მეზღვაურებს ევროპულ გემებზე დასაქმების შესაძლებლობას აძლევს.

შუახევის ბიბლიოთეკას ახალი წიგნები გადაეცა

მისი თქმით, გამომდინარე იქიდან რომ რაიონული ბიბლიოთეკების ბიუჯეტი ძალიან დაბალია ხშირ შემთხვევაში ისინი წიგნების შეძენას ვერ ახერხებენ.

„აქედან გამომდინარე ნებისმიერი წიგნი თუნდაც ეს რამდენიმე ათეული იყოს, მით უფრო თუ იქნება ახალი გამოცემები, რაიონებში საბიბლიოთეკო პროცესს წაადგება. თუმცა ეს არ არის ბუნებრივია ამ ბიბლიოთეკების ერთადერთი საშველი. უფრო მეტი აქტიურობები და ვთქვათ საკუთარი განვითარების კონცეფციები ამ ბიბლიოთეკებმა თვითონ უნდა წარმოადგინოს. ჩვენ ყოველთვის დავეხმარებით წიგნებით და სხვა შესაბამისი საშუალებებით, მაგრამ თუ ისინი ვერ შეძლებენ იყვნენ მიმზიდველები იქაური მკითხველებისთვის სხვადასხვა აქტივობებით, ბუნებრივია მათი არსებობის საკითხი დადგება კითხვის ნიშნის ქვეშ,“ – განუცხადა „ბათუმელებს“ გიორგი კეკელიძემ.

რაიონულ ბიბლიოთეკებს ლიტერატურა პროექტ „ელექტრონული განვითარების სინდიკატის“ ფარგლებში გადაეცემათ.

ვისია ქუჩა

დისკუსიის ერთ-ერთმა მომხსენებელმა ფილოსოფოსმა მირანდა ჩარკვიანმა მის მიერ ჩატარებული ექსპერიმენტი წარმოადგინა. ვიდეო კოლაჟში ნაჩვენები იყო ის ინერტულობა, რაც მირანდა ჩარკვიანს სამოქალაქო საზოგადოების თვითშეგნების ყველაზე დიდ პრობლემად მიაჩნია. ვიდეოში ნაჩვენები იყო, როგორ იდგა ღია კაფეს წინ თავად ექსპერმენტის ავტორი და ჩანთიდან დაკუჭულ ქაღალდებს გამვლელების თვალწინ ძირს ყრიდა. არც ერთ გამვლელს მისთვის ყურადღება არ მიუქცევია, არც შენიშვნა მიუცია.

„სამოქალაქო თვითშეგნების ჩამოყალიბება მნიშვნელოვანი პასუხისმგებლობაა, რომელიც გვეკისრება ყველას – მშობლებს, მასწავლებლებს… ხშირად შევხვედრივარ სიტუაციას, პარკში ვიღაც აბინძურებს გარემოს და გამვლელები ასეთ ფაქტებს უყურადღებოდ ტოვებენ. დღეისათვის ყველაზე დიდი პრობლემა ინერტულობაა, რაც აუცილებლად დასაძლევია“- განაცხადა მირანდა ჩარკვიანმა.

„გულგრილობის მიზეზია ის, რომ ქვეყანაში ყველას ეშინია პასუხისმგებლობის საკუთარ თავზე აღება“ – განაცხადა დისკუსიის მეორე მომხსენებელმა, ფოტოგრაფმა ლაშა ფალავანდიშვილმა. მისი აზრით საზოგადოებრივი თვითშეგნების ამაღლებას სახელმწიფოს მიერ გატარებულ სადამსჯელო ღონისძიებები შეუწყობს ხელს.

ადმინისტრაციულ ზომების გამკაცრება მიაჩნია გამოსავლად დისკუსიის კიდევ ერთ მონაწილეს, მაღაზია „წიგნები ბათუმში“ მფლობელს ირაკლი ბაკურიძეს.

„როცა ამოყრილი ქვაფენილების ქვებს ვაწყობ უკან, ამ საქციელზე სხვები იცინიან. ვცდილობ ყველას ავუხსნა, ვინც არ ერიდება ქუჩების დანაგვიანებას, რომ ეს ინდივიდუალური პასუხისმგებლობაა, თუმცა არაფერი გამოდის. ამ პრობლემის საუკეთესო საშუალებად ადმინისტრაციული ზომების გამკაცრება – ჯარიმების გაზრდა მიმაჩნია“ – განაცხადა რაკლი ბაკურძემ.

თუ რა უნდა მოიმოქმედოს კონკრეტულმა მოქალაქემ? მირანდა ჩარკვიანი თვლის, რომ საჭიროა სიტყვა „სამოქალაქოს“ სწორი დეფინიცია, რათა თითოეულ მოქალაქემდე მივიდეს პასუხისმგებლობის გრძნობა:

„როცა დავფიქრდი, აღმოვაჩინე, რომ სიტყვა „მოქალაქის“ და „სამოქალაქოს“ ცნებაზე საზოგადოება არ არის შეთანხმებული, რადგან ეს სიტყვა ჩაიკეტა და ასოცირდება მხოლოდ არასამთავრობო ორგანიზაციასთან. საჭიროა დაირღვეს სტერეოტიპი, რომ სამოქალაქო საზოგადოება არის აუცილებლად არასამთავრობო ორგანიზაცია. სამოქალაქო საზოგადოებას ქმნის ის მოქალაქე, რომელიც დატვირთულია გარკვეული პასუხისმგებლობებითა და ვალდებულებებით. იქიდან გამომდინარე, რომ ჩვენ ყველანი პოსტსაბჭოთა ადამიანები ვართ, საკმაოდ აბსტაგირებული ვიყავით ასეთ საკითხებისგან. ვფიქრობდით, რომ ეს ვიღაცას უნდა ეკეთებინა. დღეს ყველა ინდივიდის პასუხისმგებლობის საკითხი დგება, ამიტომ მგონია ახალ თაობაში ამ პასუხისმგებლობის ჩადება ეს არის ყველაზე დიდი პასუხისმგებლობა. ამ მიმართულებით უნდა იმუშაოს სკოლამ“.

გარემოს დაბინძურებაზე პასუხისმგებლობის არაღებას ლაშა ფალავანდიშვილი საბჭოთა ინერციას უწოდებს. იგი ფიქრობს, რომ სწორი დამოკიდებულება ბავშვობიდან ყალიბდება:

„ჩემი თაობა მაინც საბჭოთა ინერციის ხალხი ვართ და იქამდე მივედით, რომ ვამბობთ – ქუჩა არავისია, მაგრამ საზოგადოებრივი ადგილია და არ შეიძლება დანაგვიანება. არასდროს მქონია შემთხვევა, სკოლაში ეთქვას ვინმეს, რომ საჭიროა კარგი მოქალაქეები ვიყოთ სკოლის გარეთ. ეს სკოლაში არ ისწავლება, სამწუხაროდ. უნდა იყოს მოქალაქეობის შეგრძნების გაკვეთილები, რომ მოსწავლეებმა თავიდანვე გაიგონ, რომ მათ გარდა და მათ გარშემო არსებობს სამყარო“.

დისკუსიას „დემოკრატიული ჩართულობის ცენტრის“ კოორდინატორის მოადგილე თეონა დიასამიძე უძღვებოდა. სწორედ მისი ინიციატივით გაიმართა მსჯელობა ამ საკითხზე.

სოლიდარობა უკრაინელ ხალხს – აქცია ბათუმში

უკრაინელი ხალხისადმი მხარდასაჭერის გამოსაცხადებლად აქციაზე ასამდე ადამიანი მივიდა. მათ შორის სტუდენტები, არასამთავრობო სექტორის წარმომადგენლები და პოლიტიკოსები.

“უკრაინელი ხალხი საჭიროებს ჩვენს თანადგომას. დღეს ბათუმში საზოგადოების ერთი ნაწილი შევიკრიბეთ იმისათვის, რომ გამოვუცხადოთ თანადგომა მათ,” – განაცხადა აქციის ერთ-ერთმა მონაწილემ თამარ ბაუჩაძემ.

სოფლის რწმუნებულებს თაღლითობაში დებენ ბრალს

სილაბაურის რწმუნებულის, ლევან ცეცხლაძისა და კაპრეშუმის რწმუნებულის, დავით თურმანიძის ადვოკატის დათო ჯაფარიძის განმარტებით, მათ ბრალი წინასწარ განზრახულ თაღლითობაში წარედგინათ, კერძოდ, სისხლის სამართლის კოდექსის 180-ე მუხლის მე-2 და მე-3 ნაწილის, 341-ე მუხლის, 362-ე მუხლის მე-2 ნაწილის მიხედვით, რაც ნიშნავს თაღლითობას (7 დან 10 წლამდე პატიმრობა), სამსახურებრივ სიყალბესა (2-დან 4 წლამდე პატიმრობა) და ყალბი დოკუმენტების დამზადებას (3-დან 6-წლამდე პატიმრობა).

„დღეს ვამზადებ გირავნობის დოკუმენტაციას, ერთი პირის ქონება არის მოძიებული. იმედია, საღამოს გათავისუფლდებიან“, – განაცხადა „ბათუმელებთან“ დავით ჯაფარიძემ.

საქართველოს ფინანსთა სამინისტროს ფინანსური პოლიცია, რომელსაც სასამართლოზე პროკურორი ანზორ უსტიაშილი წარმოადგენდა, სოფლის რწმუნებულებს მიწების უკანონოდ მითვისებაში ედავება.

დაკავებულები ბრალს არ აღიარებენ. ისინი ამჟამად წინასწარ პატიმრობაში იმყოფებიან.

სასამართლომ მომდევნო სხდომა 2014 წლის 4 მარტს 14 საათზე ჩანიშნა, რომლის დროსაც წარმოდგენილი იქნება მტკიცებულებები.

ბათუმის დინამო ჯერ-ჯერჯერობით ეკიპირებისა და ანტალიის გარეშე რჩება

ამ შეთავაზებით ჯერჯერობით არავინ დაინტერესებულა. წინადადებების მიღების ვადა კი დღეს იწურება. კლუბის მიერ გამოცხადებული ტენდერის შესყიდვის ობიექტს წარმოადგენს 45-კაციანი შემადგენლობის ანტალიაში შეკრება 8-22 თებერვალს, ხუთვარსკვლავიან სასტუმროში დაბინავება სამჯერადი კვებით, ფეხბურთელების უზრუნველყოფა უმაღლესი ხარისხის სავარჯიშო მინდვრით, ორჯერადი წვრთნის და ოთხი მოსამზადებელი თამაშის (სპარინგი) ორგანიზება და ამხანაგური თამაშები აღმოსავლეთ ევროპის კვალიფიციურ გუნდებთან. სატენდერო პირობების თანახმად, აუცილებელია გუნდი განთავსდეს ერთ სართულზე; სასტუმრომ ულიმიტოდ უნდა უზრუნველყოს სასმელები (ყავა, ჩაი, წვენი, კოლა, წყალი სასტუმროს ბარში) გარდა სპირტიანი სასმელებისა; 90 წუთიანი ვარჯიში; ტრანსფერი სავარჯიშო მოედნებზე; საუნა და თურქული აბანო; დაფარული საცურაო აუზი, ფიტნეს ცენტრი; მოწყობილობები და მასაჟის ოთახები; უნიფორმის გარეცხვა დღეში ორჯერ; შეხვედრის ოთახი; ულიმიტო წყალი ვარჯიშისთვის; მინერალური წყლები და წყალი მინი ბარში (დღეში ერთხელ); გამოყოფილი ადგილი რესტორანში; ოთხი ამხანაგური მატჩი (მსაჯები, ტრანსფერი, მოედანი); ჯგუფური ტრანსფერი გუნდისთვის (სასტუმრო-აეროპორტი-სასტუმრო); ერთი ოთახი (ერთ კაცზე) უფასოდ.

იმ შემთხვევაში, თუ ტენდერში გამარჯვებული ვერ გამოვლინდება, საფეხბურთო კლუბი მერიის თანხმობით, სავარუდოდ შეკრებაზე გამგზავრების საკითხს ერთ პირთან მოლაპრაკების გზით გადაწყვეტს.

აღსანიშნავია, რომ „დინამო ბათუმი“ ჯერ-ჯერობით ახალი ეკიპირების გარეშეა დარჩენილი. სპეციალური ტანსაცმელის, აქსესუარების, ფეხსაცმელისა და გასართობი მომსახურებების (სულ 954 ერთეული 47 დასახელების საქონელი) შეძენაზე გამოცხადებული ტენდერი შეწყდა. როგორც სატენდერო კომისიაში აცხადებენ დაზუსტება და სრულყოფა მოითხოვა სატენდერო დავალებამ. კერძოდ: შესასყიდი ეკიპირების რაოდენობამ და მომსახურების გაწევის ვადამ. ჩვენი ინფორმაციით, შესაძლოა გუნდის წევრთა რაოდენობა გაიზარდოს. ბათუმის დინამოს ეკიპირებისთვის ბათუმის ბიუჯეტიდან 60 ათასამდე ლარი უნდა დაიხარჯოს. შეწყვეტილ ტენდერში სამი კომპანია მონაწილეობდა („Umbro-Georgia“, „პინაკი“, „მორვილი“). მათგან შეთავაზებული ყველაზე დაბალი ფასი კი, 54 990 ლარი იყო.

სასწავლო ტრენინგ-პროგრამები საჯარო და კერძო სკოლების პედაგოგებისთვის

აჭარის განათლების, კულტურისა და სპორტის სამინისტროს ინფორმაციით, დაინტერებულმა პირებმა რეგისტრაციის ფორმის შესაბამისად, განაცხადი უნდა წარადგინონ ბათუმის მასწავლებელთა სახლში, შემდეგ მისამართზე – ბათუმი, ბაგრატიონის ქუჩა №121, პირველი სართული ან მიაწოდონ ინფორმაცია სკოლის ადმინისტრაციას ან შესაბამისს რესურსცენტრს.

მსმენელებმა განაცხადში უნდა მიუთითონ ეროვნული სასწავლო გეგმით გათვალისწინებული, მისთვის სასურველი საგნის კონკრეტული მოდული.

2014 წლის იანვარ-თებერვლისთვის ტრენინგების გრაფიკი და რეგისტრაციის ფორმა

402 განცხადება 10 ვაკანსიაზე უმაღლეს საბჭოში

როგორც აჭარის უმაღლესი საბჭოს პრესსამსახურში აცხადებენ, კონკურსის პირველი ტურის შედეგები დღეს გახდება ცნობილი. „დღის მეორე ნახევარში საკონკურსო კომისიის სხდომა იქნება, გაფორმდება ოქმი, რომელშიც მეორე ტურში გადასული კონკურსანტების ვინაობა ჩაიწერება, დღის ბოლოს კი კონკურსანტების ვინაობის შესახებ ინფორმაცია ვებ-გვერდზე აიტვირთება“.

ქობულეთში კულტურის სახლი აშენდება

„ახალი ტექნოლოგია-2009“-ის მონაცემებით (პროექტის საბოლოო ვარიანტი ამ კომპანიამ მოამზადა) ობიექტი შედგება ორი – სამაყურებლო და ადმინისტრაციული ნაწილისაგან. ესპანელი სპეციალისტების მიერ კი დაპროექტებული იყო ორი განხვავებული და განცალკევებული ფორმის შენობა დამოუკიდებელი შესასვლელებით. „გამომდინარე იქიდან, რომ ესპანელი სპეციალისტების მიერ დამუშავებული ესკიზური პროექტი არ შეესაბამებოდა ტექნიკური დავალებით გათვალისწინებულ პირობებს (როგორც გეგმარებით, ასევე ფართით) ჩვენს მიერ, დამკვეთთან შეთანხმებით მოხდა პროექტის გადამუშავება, რაც ძირითადად გამოიხატა ობიექტის გაბარიტების გაზრდაში, კერძოდ მოხდა სამაყურებლო ნაწილის სიგანის მნიშვნელოვანი გაზრდა, ხოლო ერთსართულიანი ადმინისტრაციული ნაწილი გახდა ორსართულიანი“, – აცხადებენ კომპანიაში.

პროექტის მიხედვით, შენობის ფასადები თეთრი ფერის მასალით იქნება მოპირკეთებული. მუნიციპალიტეტის სატენდერო კომისიაში მშენებლობის მსურველთა წინადადებების მიღება 5 თებერვალს დაიწყება და 10 თებერვალს შეწყდება.

დისკუსია პრესკაფეში: „საშობაო ეპისტოლე – აქცენტები და მინიშნებები“

7 იანვარს საზოგადეობამ მოისმინა საქართველოს კათალიკოს პატრიარქის ილია მეორეს საშობაო ესპისტოლე, რომელსაც საზოგადოებაში აზრთა სხვადასხვაობა მოჰყვა.

დისკუსია მზადდება „თავისუფალ ჟურნალისტთა სახლის“ პროექტის ფარგლებში – „ახალგაზრდებში დემოკრატიული იდეების პიპულარიზაცია“. პროექტი ხორციელდება „დემოკრატიის მხარდამჭერი ნაციონალური ფონდის“ (NED) მხარდაჭერით.

მომხსენებლები იქნებიან სტუდენტები: თამარ ბაუჯაძე და მირიან ცეცხლაძე.

ბათუმში უკრაინის მხარდასაჭერი აქცია გაიმართება

საღამოს ექვსის ნახევარზე მოქალაქეები ვარდების ბაღში შეიკრიბებიან და უკრაინელ ხალხს სოლიდარობას გამოუცხადებენ.

აქციაში მონაწილეობა ნებისმიერ მსურველს შეუძლია.

ბათუმელი “ანჯელინა ჯოლი”

როგორია მარი იორდანაშვილი?

ჩვეულებრივი გოგო ვარ, სხვებს ჰგონიათ, რომ ამაყი ვარ, ამ დროს ძალიან უბრალო, მეგობრული და მშვიდი ვარ, არ მიყვარს კლუბური ცხოვრება. სიმშვიდე მიყვარს, ბუნებაში ყოფნა, ვერ ვიტან ხმაურს და გადაღლას, ჯანსაღი ცხოვრება მომწონს. სახლში წიგნის კითხვა მირჩევნია, ახლა “სუნამოს” ვკითხულობ.

როგორ იწყება შენი დილა?

ყოველი ჩემი დილა იწყება ვარჯიშით, საათნახევარი ვვარჯიშობ, ველოსიპედით ვსეირნობ, სანაპიროზე ჩემს ძაღლთან ერთად დავრბივარ.

გარდა ამისა, ჯანსაღად ვიკვებები, დილით ვსვამ მწვანე ჩაის და ვჭამ მწვანე ვაშლს, დღის განმავლობაშიც მსუბუქად ვიკვებები, არ მიყვარს მძიმე საჭმელი, წლებია ასე ვარ, ამას მარტო წონის შესანარჩუნებლად არ ვაკეთებ, ყველაფრისთვის კარგია ეს. გარდა ამისა, რვა საათის შემდეგ აღარაფერს ვჭამ, ამის გამოა, რომ დიეტა არასოდეს დამჭირვებია, მიმაჩნია, რომ დიეტა არ არის კარგი ჯანმრთელობისთვის.

რა დროს უთმობ თავის მოვლას და რა პროცედურებს მიმართავ?

ყველაზე მეტ დროს სწორედ თავის მოვლას ვუთმობ, თითქმის მთელი დღე სარკის წინ ვტრიალებ, მომწონს კარგად, რომ გამოვიყურები, დილით მოწესრიგებისთვის მინიმუმ ერთი საათი მჭირდება, მაკიაჟისთვის მაინცადამაინც არ ვკარგავ დიდ დროს, გადაჭარბებული არაფერი მომწონს, ტონალურს არ ვიყენებ, მსუბუქ მაკიაჟს ვიკეთებ, ტანსაცმელს კი ხასიათის მიხედვით ვარჩევ.

ტანსაცმელს სად ყიდულობ?

ბათუმის მაღაზიებში. რაც მიხდება და რაც მომწონს, იმას ვყიდულობ. უფრო ხშირად კი ვიკერავ, ასე ყველასგან განსხვავებულად მაცვია, ჩვეულებრივ მაღაზიებში ნაყიდ ტანსაცმელსაც გადავაკეთებ ხოლმე, ჩემი ინდივიდუალური შტრიხები შემაქვს ტანსაცმელში.

მარი, სად სწავლობ და რა პროფესია გაქვს?

რამდენიმე თვეა რაც კოლეჯი დავამთავრე, პროფესიით ოფისის მენეჯერი ვარ, ჯერჯერობით არ ვმუშაობ, სხვა გეგმები მაქვს. რამდენჯერმე შემომთავაზეს ქართულ ფილმში გადაღება, აქამდე არ ვთანხმდებოდი, რატომღაც არ მინდოდა, არც მოდელობა მინდა, სამოდელო სააგენტოებს უარი ვუთხარი, არ წარმოადგენს ჩემი ინტერესის სფეროს, ფილმებზე კი დავფიქრდი, შეიძლება მივიღო მონაწილეობა. ამ ეტაპზე გადაწყვეტილი მაქვს, ცეკვას დავუბრუნდე.

რა სტილის ცეკვებს ცეკვავ?

ხუთი წლის შემიყვანეს ქართულ ცეკაზე, სოლისტი ვიყავი, სანამ ქუთაისში ვცხოვრობდი, ქუთაისის ანსამბლში ვცეკვავდი, ბათუმში რომ გადმოვედით, თავი დავანებე. 16 წლის რომ ვიყავი, მომინდა ლათინური ცეკვები მეცეკვა, დავიწყე კიდეც ცეკვა, განსაკუთრებულად მომწონს რუმბა, ჩა-ჩა-ჩა, ჯაივი და ტანგო. ყოველი ჩემი დღე ცეკვითაც იწყება, დღეში მინიმუმ ორი საათი ვცეკვავ, მეზობლებს ვაღვიძებ ხოლმე. ვაპირებ, ცეკვას ისევ დავუბრუნდე, არ შემიძლია ცეკვის გარეშე, მოყვარულის დონეზე მხიბლავდა ყოველთვის, მომავალშიც ასე იქნება.

ბათუმელი ხარ?

მამა მყავს ქუთაისელი, დედა – ბათუმელი, 9 წლის ვიყავი, ბათუმში რომ გადმოვედით, ჩემს მშობლებს უნდოდათ ბათუმში ცხოვრება. მიყვარს ბათუმი, ვერც კი წარმომიდგენია სხვა ქალაქში ცხოვრება.

მშობლებთან ერთად ცხოვრობ?

დიახ, სამწუხაროდ დედისერთა ვარ, ადრე ძალიან მომწონდა ეს, ყველა მანებივრებდა, ახლა აღარ მომწონს. ოჯახში მეოთხე წევრიც გვყავს, ჩემი ძაღლი მილა, რომელიც მამამ მაჩუქა, ერთი წელია მე და მილა დროს მშვენივრად ვატარებთ ერთად.

ალბათ ძალიან ბევრი თაყვანისმცემელი გყავს…

კი, სიმცირეს ნამდვილად არ ვუჩივი, ხანდახან მაწუხებენ კიდეც, სახლთანაც მოდიან, მაგრამ უფრო მეტად სასიამოვნოა. საჩუქრებს მჩუქნიან, ყვავილებს, თოჯინებს, სუნამოებს… ყველა გოგოს სიამოვნებს მსგავსი ყურადღება, თუმცა არ ვთვლი, რომ რაიმეთი განსაკუთრებული ვარ, სამწუხაროდ ტყუილად წუხდებიან, ჩემი გული დაკავებულია. 21 წლის ასაკში შემიყვარდა პირველად, ბედნიერი ვარ, რომ ეს ადამიანი გამოჩნდა ჩემს ცხოვრებაში.

როგორ გაიცანით ერთმანეთი?

საერთო მეგობარი გვყავს ფეისბუქზე, ჩემი ფოტოები ნახა და მოვეწონე, კარგა ხანს მწერდა, მაგრამ არ ვპასუხობდი, საზღვარგარეთ ცხოვრობს, ჩემს გასაცნობად ჩამოვიდა ბათუმში, მე არ ვხვდებოდი, საერთო მეგობარმა მოგვიწყო შეხვედრა. მსგავს ყურადღებას არ ველოდი, ძალიან თბილი და მოსიყვარულეა. ერთადერთი, რაზეც მწყდება გული, ის არის, რომ საზღვარგარეთ მომიწევს ცხოვრება, ბათუმის დატოვება არ მინდა, თუმცა სადაც არ უნდა ვიყო, მასთან ერთად ყველგან ბედნიერად ვგრძნობ თავს. 21 წელი ვეძებდი მას (იცინის), უახლოეს მომავალში ერთად ყოფნას ვგეგმავთ.

ხელვაჩაურის მუნიციპალიტეტის ორი რწმუნებული დააკავეს

„ძველ ამბავთან დაკავშირებით შეექმნათ პრობლემები, ადრე მათ ბეჭედი ჰქონდათ. ვნახოთ რას დაადგენს გამოძიება. მეტი არაფერი ვიცი.“ – უთხრა „ბათუმელებს“ ხელვაჩაურის გამგებელმა ნადიმ ვარშანიძემ.

ფინანსური პოლიციის მიერ გავრცელებული ინფორმაციით „გამოძიებით დადგინდა, რომ დაკავებულებმა 10500 კვადრატული მეტრი მიწა ფიზიკურ პირებზე უკანონოდ დაარეგისტრირეს, ამისთვის კი ყალბი ოფიციალური დოკუმენტები გამოსცეს. ფიზიკურმა პირებმა სახელმწიფოს კუთვნილი 169541 ლარის ღირებულების მიწის ნაკვეთები უკანონოდ მიითვისეს“.

მთავრობა ახლადშეძენილი სახლების ეკომირანტებისთვის გადასაცემად განაცხადების მიღებას იწყებს

საქართველოს ოკუპირებული ტერიტორიებიდან იძულებით გადაადგილებულ პირთა, ლტოლვილთა და განსახლების სამინისტროს განსახლების დეპარტამენტის თანამშრომლის, დავით კაიკაციშვილის ინფორმაციით, რომელიც ბათუმში იმყოფება „განაცხადებს სპეციალური კომისია შეისწავლის და პირველ ეტაპზე იმ ოჯახებს დააკმაყოფილებს, რომლებსაც ყველაზე მეტად სჭირდებათ სახელწიფოს დახმარება“.

გასულ წელს საქართველოს ოკუპირებული ტერიტორიებიდან იძულებით გადაადგილებულ პირთა, ლტოლვილთა და განსახლების სამინისტრომ კახეთში, იმერეთსა და სამეგრელოში ეკომიგრანტების განსახლების მიზნით 33 სახლი შეიძინა.

სახელმწიფო სწორედ ამ 33 სახლში აპირებს ეკომიგრანტი ოჯახების შესახლებას.

„სოკარის“ განმარტება

დავით ლეკიშვილმა ისევ გაიმეორა, რომ აქცია, გაზგაყვანილობაზე მომუშავე სხვა კომპანიების მიერ იყო სპეციალურად ორგანიზებული და მიზანმიმართულად ემსახურება „სოკარ-ჯორჯია აჭარის დისკრედიტაციას.

მან გაზიფიცირების პროცესის წარმოების შესახებ ხუთ პუნქტზე ისაუბრა და კიდევ ერთხელ აღნიშნა, რომ კომპანიას მოპოვებული აქვს ლიცენზიის უფლება და მოქმედებს საქართველოს მოქმედ კანონმდებლობის ფარგლებში. „მოსახლეობას და ყველა დაინტერესებულ პირს გვსურს განვუმარტოთ გაზიფიცირების პროცესი, რომელიც კანონმდებლობით რეგულირდება. რა ვალდებუებები გააჩნია მომხმარებლებს და ლიცენზიატ კომპანიას:

„1.სოკარ-ჯორჯია გაზი აჭარასთან“, როგორც ლიცენზიანტ კომპანიასთან შეთანხმებული უნდა იყოს გაზიფიცირების ყველა პროექტი, თუ ეს პროექტი არ არის თავად „სოკარის“ მიერ შესრულებული და შესრულებულია სხვა, კერძო სამშენებლო-სამონტაჟო კომპანიის მიერ.

2. მხოლოდ „სოკარ-ჯორჯია გაზი აჭარასთან“, როგორც ლიცენზიანტ კომპანიას აქვს უფლება გასცეს ტექნიკური პირობა, რომ მის კუთვნილებაში არსებულ გაზგამანაწილებელ ქსელზე ახალი აბონენტისთვის დაერთოს უფლება.

3. მიუხედავად იმისა თუ ვის მიერ ხორციელდება ახალი მომხმარებლის კუთვნილი ობიექტების გაზიფიცირება, ან არსებული ბუნებრივი გაზის გამანაწილებელ ქსელთან მიერთების მშენებლობა, აღრიცხვის კვანძის მოწყობისა და გამანაწილებელ ქსელზე შეჭრის სამუშაოები უნდა შესრულდეს განაწილების ლიცენზიანტის მიერ.

4. ყველა დასრულებული სამონტაჟო სამუშაოების ექსპლუატაციაში მიღებას ახორციელებს მხოლოდ „სოკარ-ჯორჯია აჭარა“, როგორც განაწილების ლიცენზიანტი.

5. „სოკარ-ჯორჯია აჭარა“, როგორც ლიცენზიანტი ვალდებულია, პოტენციური აბონენტის მხრიდან მოთხოვნის შემთხვევაში მოსახლესთან და არა კომერციულ მომხმარებელთან ერთ წერტილზე გაზიფიცირების სამუშაოები განახორციელოს არაუმეტეს 600 ლარისა 24 თვეზე განაწილების პირობით.“

როგორც დავით ლეკიშვილმა აღიშნა, სხვა კომპანიები თავის დროზე ვალდებული იყვნენ მოსახლეობისთვის აეხსათ, რომ სამონტაჟო სამუშაოების უფლება მათ არ ჰქონდათ. მისი თქმით, ამ კომპანიებს მხოლოდ არსებული გაზგამანაწილებელ სისტემიდან მილის საცხოვრევრებელ სახლში გაყვანის უფლება აქვთ, სხვა დანარჩენ სამუშაოებს კი მხოლოდ ლიცენზიანტი კომპანია ასრულებს.

ონკოლოგიურ დაავადებათა მქონე პაციენტების გამოკვლევებს დააფინანსებენ

პროგრამა საშვილოსნოს, საკვერცხეების, მკერდისა და ფარისებრი ჯირკვლის სხვადასხვა პათოლოგიის ონკომარკერებით გამოკვლევას, საშვილოსნოს ყელის კოლპოსკოპიასა და ექოსკოპიას ითვალისწინებს. დაავადების აღმოჩენის შემთხვევაში, დაფინასდება საშვილოსნოს ყელის დაზიანების ამოკვეთა ან დაშლა მორფოლოგიით – ექსციზიური მკურნალობა, ასევე რადიოტალღური ან ლაზერული მკურნალობა.

ონკოლოგიურ დაავადებათა ადრეული ფორმების დიანოსტიკის, პრევენციისა და მკურნალობის პროგრამა 1400 პაციენტზეა გათვლილი და 91 ათას 900 ლარით ფინანსდება.

დასრულებული ინფრასტრუქტურული სამუშაოები ადლიის ბაზაზე

“ადლიას ბაზაზე 2013 წლის გეგმით გათვალისწინებული ყველა სამშენებლო სამუშაო დასრულებულია. რეაბილიტაცია ჩაუტარდა სამხედრო ნაწილის ტერიტორიაზე მდებარე შენობა-ნაგებობებს. ყაზარმაში მთლიანად შეიცვალა ელექტროგაყვანილობის სისტემა, დამონტაჟდა ვენტილაცია და ახლით შეიცვალა გათბობის სისტემა, მოწესრიგდა სველი წერტილები, გაკეთდა კაფელ-მეტლახი, შეიცვალა მილგაყვანილობა, ჩატარდა სამღებრო და შესაბამისი თანმხლები სარემონტო სამუშაოები; სასწავლო კლასები ახალი ინვენტარით აღიჭურვა; მოწესრიგდა ბაზის ტერიტორიის გარე განათება და შემოიღობა სამხედრო ნაწილის მთლიანი პერიმეტრი. მიმდინარეობს სამხედრო ნაწილის გაზიფიცირების სამუშაოებიც” – ნათქვამია თავდაცვის სამინისტროს განცხადებაში.

ახლიდან გარემონტდა და გაკეთდა ყაზარმა, ასევე დასრულების სტატდიაშია საქვაბე, რომელიც მთლიანად მოემსახურება ამ ბაზას. “განახლდა ასევე ის შენობა, რომელიც დღეს ინგლისური ენის კლასებს მასპინძლობს. ძალიან მიხარია, რომ ჩვენმა ოფიცრებმა და სამხედროებმა დაიწყეს ინგლისურის სწავლა. ეს აუცილებელი ენაა ნატოსთან თავსებადობის კუთხითაც. მთავარია თავსებადობა არის იმ კუთხით, რომ ჩვენი ჯარისკაცები იმყოფებიან უკეთეს პირობებში. ეს არის ძირითადი, რაც ჩვენ დავიწყეთ გასულ წელს და გავაგრძელებთ წელს. ყველა ბაზაზე შევქმნით მაქსიმალურად ისეთ პირობებს, რომელიც შეძლებს ჩვენს ჯარისკაცებს მისცეს თავისი ფუნქციის – ქვეყნის დაცვის განხორციელების შესაძლებლობა. დარწმუნებული ვარ, რომ ასეთ ღირსეულ პირობებში ბევრად უფრო ეფექტური იქნება ქართველი ჯარისკაცი” – აღნიშნა თავდაცვის მინისტრმა.

შეგახსენებთ, რომ 2013 წელს თავდაცვის სამინისტრომ 100-ზე მეტი მცირე და მასშტაბური სამშენებლო პროექტი განახორციელა. სამუშაოების ძირითად ტიპოლოგიას ყაზარმების, შტაბის, სასადილოების, ლაზარეთის, საცხოვრებელი და სამსახურეობრივი კორპუსების და საკონტროლო-გამშვები პუნქტების სარემონტო თუ სამშენებლო სამუშაოები წარმოადგენდა. სარეაბილიტაციო სამუშაოები 2014 წლის განმავლობაშიც გაგრძელდება

ამბულატორიული დიაგნოსტიკური კვლევა უფასოდ

პროგრამით სარგებლობა შეუძლიათ სოციალურად დაუცველი ოჯახების მონაცემთა ერთიან ბაზაში რეგისტრირებულ 200 000 ჩათვლით სარეიტინგო ქულის მქონე საქართველოს იმ მოქალაქეებს, რომლებიც რეგისტრირებულნი არიან აჭარის ავტონომიურ რესპუბლიკაში 2014 წლის 1 იანვრის მდგომარეობით.

ქვეპროგრამით განხორციელებული მომსახურება დაფინანსდება მიმწოდებლის მიერ წარმოდგენილი ანგარიშ–ფაქტურის მიხედვით:
1) 70 000-ის ჩათვლით სარეიტინგო ქულის მქონე პაციენტები, 200 000 -ის ჩათვლით სარეიტინგო ქულის მქონე 18 წლის ასაკის ჩათვლით ბავშვი – 100 %-ით.
2) 70 001-დან 100 000-ის ჩათვლით სარეიტინგო ქულის მქონე პაციენტები – 90 % -ით, თანაგდახდა პაციენტის მხრიდან –10%.
3) 100 001–დან 200 000–ის ჩათვლით სარეიტინგო ქულის მქონე პაციენტები – 80 % -ით, თანაგდახდა პაციენტის მხრიდან –20%.

ქვეპროგრამა არ ითვალისწინებს საზღვარგარეთ ჩატარებული დიაგნოსტიკური კვლევების, უკვე ჩატარებული სამედიცინო მომსახურების და მოქმედი სამედიცინო პროგრამებით გათვალისწინებული თანაგადახდის დაფინასებას მოსარგებლის მხრიდან.

პროგრაში ჩართვისთვის მოქალაქემ აჭარის ჯანმრთელობისა და სოციალური დაცვის სამინისტროში უნდა წარმოადგინოს:
* განცხადება
* ცნობა ჯანმრთელობის მდგომარეობის შესახებ-ფორმა №IV-100/ა
* ანგარიშფაქტურა გაცემული სამედიცინო დაწესებულების მიერ
* პირადობის დამადასტურებელი მოწმობა ან სხვა დოკუმენტი, რომლითაც შეიძლება პირის იდენტიფიცირება
* ქვეპროგრამის მოსარგებლის დამადასტურებული დოკუმენტი

მომსახურების მიწოდება განხორციელდება ინდივიდუალური სამედიცინო ვაუჩერის მეშვეობით საქართველოს ნებისმიერ სამედიცინო დაწესებულებაში პაციენტთა არჩევით.

საქველმოქმედო საღამო „იმედის“ გმირის დასახმარებლად

ქედის კულტურის ცენტრის დირექტორის შორენა კარანაძის თქმით, ბილეთი 5 ლარი ღირს და ყველა ბილეთი გაყიდულია.

„საქვლმოქმედო კონცერტი ძალიან მნიშვნელოვანია, არაერთი კონცერტი ჩაგვიტარებია ქველმოქმედებისთვის, სოციალურად დაუცველი ოჯახების ერთჯერადად დახმარების მიზნით გასულ წელს ორჯერ ჩავატარეთ საქველმოქმედო კონცერტი და შემოსული თანხა გადავეცით. გვინდა წელსაც ანალოგიურად ჩავატაროთ და ტრადიციული სახე მივცეთ ქველმოქმედებას“, – აცხადებს შორენა კარანაძე.

ზედამხედველობამ მანდარინის გადამყრელები ვერ გამოავლინა

სამსახურის ხელმძღვანელის, ვახტანგ ღოღობერიძის ინფორმაციით, „სამსახურის თანამშრომლებმა სოფელ ხალაში, სადაც კანონდარღვევას ჰქონდა ადგილი, სოფლის მცხოვრებლები გამოკითხეს, თუმცა, უშედეგოდ“.

საყოფაცხოვრებო ნარჩენებით მდინარის დაბინძურება ადმინისტრაციული კანონით ისჯება და 300 ლარამდე ჯარიმას ითვალისწინებს.

ბათუმში მიწის ფასი ხელახლა დადგინდება

დაგეგმილია ქ. ბათუმის ზონირების („ფასების“) რუკის შექმნა – ზონების მიხედვით მიწის ღირებულებებითა და განმარტებითი ბარათით, სადაც აღწერილი იქნება ზონების (ქვეზონების) საზღვრები ქუჩების მიხედვით. მერიამ 25 ათასლარიანი ტენდერი უკვე გამოაცხადა. წინადადებების მიღება ელექტრონულად გუშინ დაიწყო და ხვალ დასრულდება.

ზემოაღნიშნული სამუშოს გარდა, ტენდერში გამარჯვებულმა უნდა წარმოადგინოს ფასების დეტალური გაანგარიშებაც. სამუშაოები, ხელშეკრულების გაფორმებიდან ერთ თვეში დასრულდება. პარალელურად, აუდიტორების და შემფასებლების ჯგუფის მიერ უნდა ჩატარდეს ბათუმში 2012 წლის 1 ივნისიდან 2013 წლის 31 დეკემბერამდე პერიოდში მიწის ბაზრის (ანალიზი) კვლევა. ყველა ამ მონაცემს მერია წარუდგენს საკრებულოს, რომელიც, სავარაუდოდ 1 მარტამდე, დაადგენს ზონების საბოლოო საზღვრებსა და მიწის ნორმატიულ ფასს.

ბათუმის საკრებულოს შარშანდელი დადგენილებით ქალაქი დღეს დაყოფილია სამ – ცენტრალურ, შუალედურ და პერიფერიულ ზონად. თავის მხრივ, ზონები დაყოფილია სულ ცხრა ქვეზონად. კვ/მ მიწის მოქმედი ნორმატიული ფასი კი, 20 ლარიდან (პერიფერიული ზონა) 405 ლარმდე (ცენტრალური ზონა) მერყეობს.

გამოძიება ანბანის კოშკის საქმეზე

„ საგამოძიებო დეპარტამენტის განსაკუთრებით მნიშვნელოვან საქმეთა სამმართველოში მიმდინარეობს გამოძიება ესპანური კომპანია „CMD DOMINGO Y LAZARO INGENIEROS-ს წარმომადგენლობა საქართველოში“ ხელმძღვანელ პირთა მიმართ, გადასახადებისაგან თავის არიდებისა და უკანონო შემოსავლების ლეგალიზაციის ფაქტზე“_წერია დოკუმენტში რომელიც საგამოძიებო უწყებისგან „ბათუმელებმა მიიღო.

ამ კომპანიას საქართველოში შესრულებული აქვს სხვადასხვა სამშენებლო და საპროექტო სამუშაოები, მათ შორის ბათუმში „ალფაბეტური კოშკის“ მშენებლობისა და პროექტირების სამუშაოები. დოკუმენტები წაღებულია ბათუმის მერიიდანაც.

ქედის ანსამბლები ფესტივალზე ლატვიაში

ჯგუფები საგასტროლოდ აქტიურად ემზადებიან. ანსამბლი და ბენდი რეპეტიციებს ყოველ დღე გადის, რეპერტუარის საბოლოო ვარიანტზე ჯერ არ შეჯერებულან, თუმცა ფესტივალის მოთხოვნებიდან გამომდინარე იციან, რომ საკუთარ ფოლკლორის წარმოჩენა ევალებათ.

„გვინდა ფესტივალში საუკეთესო პროგრამით წარვსდგეთ. „ელესა“ ცნობილია ადგილობრივი ფოლკლორული სიმღერების შესრულებით, მაგრამ ჩვენი რეპერტუარი მხოლოდ აჭარული ფოლკლორით არ შემოიფარგლება, საკმაოდ ვრცელი რეპერტუარი გვაქვს – საქართველოს სხვადასხვა კუთხის ფოლკლორს მოიცავს. რადგან ფესტივალზე საქართველოდან მხოლოდ ჩვენ წარვსდგებით, გვინდა ყველა კუთხის სიმღერა შევასრულოთ“, – აცხადებს ანსამბლის ხელმძღვანელი და ქედის კულტურის სახლის დირექტორის მოადგილე ირაკლი სირაბიძე.

„ფოლკლორულ-ინსტრუმენტალური ბენდი“ ფესტივალზე მხოლოდ ფოლკლორული საკრავებით წარსდგება და ფოლკლორულ სიმღერებს ფესტივალზე თანამედროვე არანჟირებით ააჟღერებს.

„ბენდი ფოლკლორულ ნიმუშებზე გაკეთებული ინსტრუმენტალურ ვარიანტს
წარადგენს, ინსტრუმენტალური მუსიკის გარდა, ფოლკლორული სიმღერისა და ინსტრუმენტალურ მუსიკის სინთეზს თანამედროვე არანჟირებით ვახდენთ. საგულისხმოა ის, რომ ფოლკლორულ საკრავებთან ერთად ბევრ თანამედროვე ინსტრუმენტსაც ვიყენებთ, მაგრამ, რადგან ფესტივალის მოთხოვნაში წერია, რომ კონცერტზე ფოლკლორული საკრავი უნდა იყოს წარმოდგენილი, რეპერტუარიდან ამოვიღეთ ელექტრო ინსტრუმენტები – მხოლოდ ქართული გარმონით, დოლით, ფანდურით, სალამურით, ჩონგურითა და სხვა ხალხური საკრავებით წარვსდგებით“, – აცხადებს ბენდის ხელმძღვანელი ირაკლი შარაძე.

ფესტივალი ლატვიაში 31 იანვარს დაიწყება და 2 თებერვალს დასრულდება. პროგრამის მიხედვით, მონაწილეები ორი დღის განმავლობაში მაყურებლის წინაშე 10-15 წუთიანი პროგრამით წარსდგებიან, მესამე დღეს კი სოლო კონცერტს გამართავენ.

„ჩვენი ფოლკლორული ანსამბლი და ბენდი ინტერნეტ სივრცესა და, ზოგადად, საზოგადოებაში დიდი მოწონებით სარგებლოს, არაერთ ფოლკლორულ ფესტივალზე გავსულვართ, შესაძლებელია ამან განაპირობა ჩვენი მიწვევა დაოგაოპილსში. მიწვევა ერთი თვის წინ მივიღეთ, რაც შეეხება გადაადგილების ხარჯებს, ადგილობრივი თვითმართველობა გვიფინანსებს“, – აცხადებს ირაკლი სირაბიძე და დასძენს – „გასტროლების მხრივ განებივრებული არ ვართ, ოთხი წლის განმავლობაში ანსამბლი საზღვარგარეთ მხოლოდ უკრაინაში გავიდა. რაიონული ანსამბლისთვის, რომელიც ბევრს შრომობს, გასტროლი თუნდაც 2-3 წელში ერთხელ მაინც, ძალიან მნიშვნელოვანია“.

მოსწავლეებს პროფესიის შერჩევაში დაეხმარებიან

როგორც სამინისტროში აცხადებენ, პროგრამის მიზანია სკოლის მოსწავლეებს პროფკონსულტანტები მომავალი პროფესიის არჩევაში, საკუთარი შესაძლებლობების ადეკვატურად შეფასებასა და განვითარებაში დაეხმარონ.

პედაგოგების საქმიანობის კოორდინირებასა და მონიტორინგს, სამინისტროს ფსიქოლოგიური ცენტრი ახორციელებს. ცენტრში უკვე დასრულდა პროფკონსულტანტების გადამზადების პირველი ეტაპი.

კონკურსის წესით შერჩეულმა 103-მა პროფკონსულტანტმა და ხუთმა კოორდინატორმა ეტაპობრივად გაიარა გადამზადება შემდეგ მოდულებში: მოზარდის ასაკობრივი თავისებურებები, ეფექტური კომუნიკაცია, მართვის უნარჩვევები, პროფორიენტაცია.

გადამზადებული პროფკონსულტანტები კლასის დამრიგებლებთან ერთად მონაწილეობას მიიღებენ პროფესიული ორიენტაციისა და კარიერის დაგეგმვის გაკვეთილების ჩატარებაში, უზრუნველყოფენ სხვადასხვა აქტივობების ორგანიზებას, სკოლებისთვის შრომით ბაზარზე არსებულ მოთხოვნებზე ინფორმაციის მიწოდებას, სკოლებისა და დამსაქმებლების ერთმანეთთან დაკავშირებას და თანამშრომლობას.

დისკუსია: ქართული საზოგადოება და მისი მოქალაქეობრივი თვითშეგნება

“დღეს ბევრს ლაპარაკობენ სამოქალაქო საზოგადოების როლისა და ფუნქციის შესახებ ქვეყნის ტრანსფორმაციის საქმეში. ჩვეულებრივი ყოფითი ქცევებიდან ყალიბდება სამოქალაქო კულტურა. ეს იქნება ნაგვის გადაყრის წესი, ქუჩაში ტრანსპორტით მოძრაობის წესი, კანონმორჩილება, ზოგადად გაცნობიერება იმის, რომ ხარ მოქალაქე და რას უნდა აკეთებდე იმისთვს, რომ იყო ჩართული როგორც შენი უფლებების დაცვაში ასევე სხვების უფლებების პატივისცემაში.

არის თუ არა ყოფითი კულტურის დეფიციტი საზოგადოებაში? რას ნიშნავს იყო მოქალაქე? რამდენად განსაზღვრავს ყოფითი კულტურა სამოქალაქო კულტურას რომელიც ან გვაქვს ან გვინდა, რომ გვქონდეს? ეს ის საკითხები იქნება რომლებზეც დისკუსიის მონაწილეები იმსჯელებენ”_აღნიშნა თეონა დიასამიძემ, ბათუმის დემოკრატიული ჩართულობის ცენტრის კოორდინატორის მოადგილემ.

მომხსენებლები ფსიქოლოგი მირანდა ჩარკვიანი და ფოტოგრაფი ლაშა ფალავანდიშვილი იქნებიან.

ჩახუტების საერთაშორისო დღე ბათუმში

„ხალხის რეაქცია არაერთგვაროვანია – ხდება, როცა ძალიან დიდი პოზიტივი მოდის ადამიანებისგან, ზოგჯერ კი პირიქით, ძალიან ცუდი პასუხით გვიშებენ. ჩვენ გვსურს, რომ ყველას ღიმილით ჩავეხუტოთ და ყველა გავათბოთ“, – ამბობს აქციის ერთ-ერთი ორგანიზატორი, ანა სურმანიძე.

ჩახუტების საერთაშორისო დღეს ბათუმში უკვე მეორე წელია, ძალიან პატარა ჯგუფები აღნიშავენ. აქციის ერთ-ერთი მონაწილის, მარი ლაკიას თქმით, შარშანდელთან შედარებით, წელს უფრო მორიდებულია ხალხი – “შარშან ამ დღეს უფრო ციოდა და ჩახუტების მსურველიც მეტი იყო”.

ხალხის სიმცირეს აქციის მონაწილეთა მოტივაციაზე არ უმოქმედია, ისინი მომავალშიც აპირებენ ამ დღის აღნიშნვას, დღეს კი საღამომდე ივლიან ბათუმის ქუჩებში და ყველა მსურველს ჩაეხუტებიან.

თოჯინების თეატრი ისევ რემონტშია

თოჯინების თეატრის რეაბილიტაცია 2012 წელს ტენდერში გამარჯვებულმა სამშენებლო კომპანიამ „თექ-ევ ინშაათ დექორასიონ თააჰჰუთ იჩ ვე დიშ თიჯარეთ ლიმითედ შირქეთმა“ დაიწყო. სარეაბილიტაციო პროექტი, რომლის ღირებულება ერთ მილიონ ლარზე მეტს შეადგენდა, მემედ აბაშიძის #49-ში მდებარე თოჯინების კუთვნილ ერთსართულიანი შენობოაზე სსხვადასხვა სახის სამუშაოებს ითვალისწინებდა.

შენობას რეაბილიტაციის პროცესში დაემატა მანსარდა. თუმცა თურქულ კომპანიას, როგორც თოჯინების თეატრის ხელმძღვანელი მედეა ჩარკვიანი ამბობს, „ხელშეკრულების ვადა ამოეწურა, სამუშაოები კი ვერ დაასრულა. ხელშეკრულების მიხედვით, მას ეს სამუშაოები 2013 წლის ნოემბერში უნდა დაესრულებინა. მივმართეთ სამართალწარმოებას სასამართლოში, პროკურატურასა და ფინანსურ პოლიციაში“.

დეკემბრის თვეში სასამართლომ დაუსწრებელი გადაწყვეტილება გამოიტანა და თურქულ კომპანიას („თექ-ევ ინშაათ დექორასიონ თააჰჰუთ იჩ ვე დიშ თიჯარეთ ლიმითედ შირქეთი“) თოჯინების თეატრის სასარგებლოდ 283 ათასი ლარის გადახდა დააკისრა. ამ თანხიდან 104 ათას ლარზე მეტი შეუსრულებელი სამუშაოების ღირებულებაა, 10 ათასი – დაჯარიმებით გამოწვეული ზიანი, ხოლო 17 ათას ლარამდე პირგასამტეხლო შეადგენს.

„დასამონტაჟებელია შეძენილი კონდიციონერები, შესაცვლელია პროექტით გათვალისწინებული გახმოვანებისა და განათების აპარატურა, სცენის რბილი ჩაცმულობა, მთავარი ფარდა, არლეკინი, კულისები. სარეაბილიტაციო სამუშაოების დასასრულებლად კულტურის სამინისტროს გადაწყვეტილებით, ხელშეკრულებაში შევა ცვლილებები, მოხდება ბიუჯეტის კორექტირება. რეაბილიტაციის დასრულებისთვის პროექტს დაემატება ის თანხა, რა თანხაც სჭირდება, რომელსაც აჭარის განათელბისა და კულტურის სამინისტრო დააფინანსებს“, – აღნიშნა მედეა ჩარკვიანმა.

თოჯინების თეატრის ხელმძღვანელი უახლოეს მომავალში დარჩენილი სამუშაოების შესასრულებლად აპირებს ტენდერის გამოცხადებას. მისი ვარაუდით, თეატრი თავისი დასით მაისში დაბრუნდება საკუთარ შენობაში, მანამდე კი თოჯინების თეატრის ადმინისტრაცია და 20 მსახიობი რეპეტიციებს მემედ აბაშიძის 18/20 ში მდებარე შენობობაში – ყოფილ „თითების თეატრში“ ატარებს. წარმოდგენებს კი სხვადასხვა კულტურულ ცენტრებსა და საგანმანათლებლო დაწესებულებებში მართავს.

პარლამენტი ავტოპარკის გამართვაში ნახევარ მილიონამდე ლარს დახარჯავს

პარლამენტის მიერ გამოცხადებულ ტენდერში მხოლოდ ერთი კომპანია: შპს „იბერია ავტოჰაუსი“ მონაწილეობდა, რომელიც გამარჯვებულად გამოცხადდა.

„იბერია ავტოჰაუსი“ 2004 წელში მცხეთაშია რეგისტრირებული. ის სხვადასხვა საჯარო სამსახურების მიერ ავტოპარკის ტექნიკურ გამართულობაზე გამოცხადებულ ტენდერებში ხშირად იმარჯვებს.

ბოლო სამი წლის განმავლობაში შესაბამისი ხელშეკრულებები კომპანიას გაფორმებული ჰქონდა საქართველოს პარლამენტთან, სახალხო დამცველის აპარატთან, შსს დაცვის პოლიციის დეპარტამენტთან, ამავე სამინისტროს მომსახურების სააგენტოსთან, თბილისის მთავარ სამმართველოსთან, სახელმწიფო დაცვის სპეციალურ სამსახურთან, ფინანსთა სამინისტროსთან და სხვა უწყებებთან.

აჭარის მთავრობა კვლევებს იწყებს

„ინვესტიციების მოზიდვისა და მიმდინარე პროვატიზების პროცესის პირობებში აჭარის რეგიონის უძრავი ქონების ბაზრის კონიუნქტურის შესწავლა და შეფასება. რეგიონის დარგობრივი ანალიზი დარგების საინვესტიციო მიმზიდველობის შეფასების მიზნით“, – ნათქვამია განმარტებით ბარათში, რომლითაც კვლევების ჩატარების საჭიროებას ხსნის მთავრობა.

აჭარის ფინანსთა და ეკონომიკის მინისტრის მოადგილის, რამაზ ბოლქვაძის ინფორმაციით, სამინისტრო კვლევების ჩატარების მიზნით კომპანიის შესარჩევად ელექტრონულ ტენდერს გამოაცხადებს.

მაღალმთიანი აჭარის სოფლებში მისასვლელ გზებს თოვლისგან წმენდენ

გამგებლის, ბესო ბაუჩაძის ინფორმაციით, ხულოს მუნციპალიტეტში სულ 83 სოფელია და თოვლის საფარისგან სოფელში მისასვლელი გზების გაწმენდა ეტაპობრივად მიმდინარეობს. სოფლებში მაღალი გამავლობის მანქანებს გადაადგილება არ უჭირთ, „შეზღუდულია დაბალი გამავლობის მანქანების მოძრაობა“. ღორჯომის საჯარო სკოლის დირექტორის, რეზო გორგაძის ინფორმაციით, სკოლებში სასწავლო პროცესი მიმდინარეობს. მაღალმთიან აჭარაში დღეს არ თოვს.

დიდთოვლობა აჭარაში ფოტო: მანანა ქველიაშვილი

ბათუმში დღეს

ხარიტონ ახვლედიანის მუზეუმში ეთნოგრაფიული გამოფენა „ზამთრის სურათები“, გამოფენის ნახვა 2 ლარადაა შესაძლებელი. ხოლო კინოთეატრ „აპოლოს“ 21-22 იანვრის სეანსებში იხილავთ: 12:00 საათზე – „გაყინული“ (3D) – ბილეთის ფასი 7 ლარი 14:00 საათზე – „მისტერ ძიძა“ – ბილეთის ფასი 7 ლარი 16:00 საათზე – „პარანორმალური მოვლენები: ეშმაკის ნიშანი“ – ბილეთის ფასი 8 ლარი 18:00 საათზე – „ჩემი ცოლის დაქალი კინოში“ – ბილეთის ფასი 8 ლარი 20:00 საათზე – „ჩემი ცოლის დაქალი კინოში“ – ბილეთის ფასი 8 ლარი 22:00 საათზე – „პარანორმალური მოვლენები: ეშმაკის ნიშანი“ – ბილეთის ფასი 8 ლარი

კონკურსი სტუდენტებისთვის

კონკურსის მიზანია ხელი შეუწყოს ახალგაზრდების ინტერესის გაზრდასა და ინფორმირებულობას არასრულწლოვანთა მართლმსაჯულების საკითხებზე, დაეხმაროს სტუდენტებს მართლმსაჯულების სფეროში მიმდინარე პროცესებისა და ამ პროცესებში მათი როლის გააზრებაში. კონკურსში მონაწილეობის მიღება შეუძლიათ საქართველოში მოქმედი ნებისმიერი უმაღლესი სასწავლებლის სტუდენტებს. კონკურსის მთავარი მოთხოვნაა სტუდენტების მხრიდან ესეების წარმოადგენა. კომისია განიხილავს ესსეს, რომელიც შეიცავს მინიმუმ 2000 სიტყვას; მომზადებულია ბოლო ერთი წლის მანძილზე; გამოქვეყნებულია სტუდენტურ გაზეთში;

განთავსებულია ინტერნეტ მედია საშუალებებში ან სოციალურ ქსელებში.

დედლაინი 2014 წლის 1 მარტი.

პრიზები:

I ადგილი – პლანშეტური კომპიუტერი

II ადგილი – სმარტფონი

III ადგილი – ციფრული ფოტოაპარატი

სიდა არასამთავრობო ორგანიზაციაა, რომელიც მხარს უჭერს საქართველოს მოსახლეობის სოციალურ-ეკონომიკური უფლებების პოპულარიზაციას, დაცვასა და განხორციელებას.