Batumelebi

ბათუმში ინტერპოლის მიერ წითელი ცირკულარით ძებნილი თურქეთის სამი მოქალაქე დააკავეს

ბათუმში, თურქეთის ინტერპოლის მიერ წითელი ცირკულარით ძებნილი, თურქეთის რესპუბლიკის სამი მოქალაქე: 1961 წელს დაბადებულ ვაჰდი აბდულ ს., 1973 წელს დაბადებული ათილლა ა. და 1974 წელს დაბადებული მეჰმეთ ალი ი., შსს-ს აჭარის პოლიციის დეპარტამენტის, ინტერპოლის ეროვნული ცენტრალური ბიუროს, სახელმწიფო უსაფრთხოების სამსახურის აჭარის და გურიის რეგიონალური კონტრდაზვერვის მთავარი სამმართველოს თანამშრომლებმა დააკავეს.

შსს-ს ინფორმაციით ვაჰდი აბდულ ს.-ს ბრალი ედება თურქეთის სისხლის სამართლის კოდექსის 86-ე მუხლით გათვალისწინებული დანაშაულისთვის, რაც ჯანმრთელობის მძიმე დაზიანებას გულისხმობს, ათილლა ა. ბრალდებულია ცეცხლსასროლი იარაღის გამოყენებით მუქარაში, თურქეთის სისხლის სამართლის კოდექსის 106/2 ა.62 მუხლით, მეჰმეთ ალი ი.-ს კი ბრალი ედება თაღლითობაში, თურქეთის სისხლის სამართლის კოდექსის 157/1 და158/1 მუხლებით.

შსს-ს ცნობით, ამ დროისთვის სამივე დაკავებულის მიმართ კანონით გათვალისწინებული წინასაექსტრადიციო პროცედურები მიმდინარეობს.

კაზინო „კამპიონე“ აღარ მუშაობს – თანამშრომლები კუთვნილ ხელფასებს ითხოვენ

ბათუმში მდებარე კაზინო „კამპიონეს“ თანამშრომლების თქმით, კაზინო ერთ კვირაზე მეტია არ მუშაობს, თავად კი გაურკვევლობაში არიან და კონკრეტულ პასუხს ვერ იღებენ.

„იანვრის შემდეგ ხელფასებს ნორმალურად არ გვიხდიდნენ. ბოლო ორი თვეა საერთოდ არ აგვიღია. ყველას განსხვავებული ხელფასი გვაქვს, ამასთან, ზოგს 1200 დოლარი, ზოგს 4 ათასი და 6 ათასი დოლარიც კი აქვს ასაღები. არიან ყოფილი თანამშრომლებიც, რომლებიც წავიდნენ კაზინოდან და თანხა მათაც ასაღები აქვთ. როცა დაკეტეს კაზინო, გვითხრეს,რომ ოთხ დღეში გაიხსნებოდა, თუმცა დღემდე არ გახსნილა. გავიდა ერთ კვირაზე მეტი, ვურეკავთ დირექტორს – გიორგი ჯაფარიძეს და არ გვპასუხობს. დღეს დამელაპარაკა და 27 ივლისამდე მოითმინეთ, შემდეგ დავიწყებთ მუშაობას, დაამშვიდეთ თანამშრომლებიო“ – ამბობს „ბათუმელებთან“ თეა გაფრინდაშვილი, რომელიც „კამპიონეში“ სლოტის სუპერვაიზერად მუშაობს.

გაურკვევლობაში მყოფი თანამშრომლები [მათივე თქმით, ისინი 50-ზე მეტნი არიან] ამბობენ, რომ სამორინეს ლიცენზია 28 ივლისამდე აქვს: „27 ივლისამდე იმიტომ უნდათ ჩვენი გაჩერება, შემდეგ გამოაცხადებენ ბანკროტს და არათუ სამუშაო ადგილები, რაც ასაღები გვაქვს კუთვნილი ხელფასის სახით, იმასაც დავკარგავთ. ალბათ, ეს უნდათ… ამიტომ, თუ კონკრეტულ პასუხს ადმინისტრაციისგან ვერ მივიღებთ, უახლოეს დღეებში მივმართავთ სასამართლოს“.

თანამშრომლები ეჭვობენ, რომ კაზინო აღარ გაიხსნება: „როგორც ყველგან, „კამპიონეშიც“ დგას სხვადასხვა ფირმის აპარატები. ამ ფირმების წარმომადგენლებიდან ვიცით, რომ ეს აპარატები უნდა გაიტანონ და გადასცენ იჯარით სხვებს, შესაბამისად, თუ კაზინოში არ დგას აპარატები და მაგიდები, ბუნებრივია კაზინო ვერ იმუშავებს“.

„კონტრაქტებსაც არ გვაძლევენ თანამშრომლებს. ზოგს აქვს, ზოგს არა. ხელფასს ვიღებდით ხელზე, ისიც, თვეში ხან 200, ხან 300 ლარს მოგვცემდნენ და ეგ იყო, ვითმინეთ ვიღაცის ხათრით, რაღაცით და ბოლოს გამოგვყარეს და დაკეტეს კაზინო. ისიც კი გვითხრეს, სადაც გინდათ გვიჩივლეთო“ – ამბობენ „კამპიონეს“ თანამშრომლები.

შენობაში, რომელიც ახალ ბულვარში მდებარეობს, ამჟამად ბარი ფუნქციონირებს. „ბათუმელები“ შეეცადა სამორინეს ხელმძღვანელებთან დაკავშირებას, თუმცა ჩვენს სატელეფონო ზარებს არავინ უპასუხა.

„კამპიონეს“ თანამშრომლების თქმით, სამორინეს შპს „სსგ კომპანია“ ამუშავებს. 2016 წლის აპრილიდან ამ კომპანიის დირექტორია გიორგი ჯაფარიძე. კომპანია 2015 წლის 16 იანვარსაა დაფუძნებული და მისი 100% წილის მფლობელია ივანე ჩიღვინაძე. კომპანიის მთლიანი წილი დაგირავებულია და რეესტრის ამონაწერის მიხედვით კრედიტორები „საქართველოს ბანკი“ და გოჩა მეგრელიძე არიან.

„სსგ კომპანიის“ მესაკუთრე ივანე ჩიღვინაძე, რომელიც დაკავებული იყო 2011 წელს [სსსკ-ის 187-ე, 353-ე და 118-ე მუხლების გათვალისწინებით], სასამართლომ „ბურჯანაძის მძღოლების საქმეზე“ გაასამართლა. იგი ბურჯანაძის პარტიის წევრი და მისი თანაშემწე იყო. ივანე ჩიღვინაძე პოლიტპატიმრის სტატუსით იმ სიაშიც იყო შეყვანილი, რომელიც 2012 წელს პარლამენტს წარუდგინეს, შემდეგ კი გაათავისუფლეს. გათავისუფლების შემდეგ, ივანე ჩიღვინაძე ფიგურირებდა ასევე კაზინო „აჭარასთან“ დაკავშირებულ დავაში. გავრცელებული ინფორმაციით მან კაზინო „აჭარას“ 2009 წელს გაცემული სესხის დაუბრუნებლობის გამო უჩივლა, სასამართლომ კი, 2013 წელს, კაზინო „აჭარას“ ჩიღვინაძის სასარგებლოდ 2,5 მილიონი დოლარის გადახდა დააკისრა.

„კამპიონეს“ თანამშრომლები ამბობენ, რომ „ივანე ჩიღვინაძე წელს არჩევნებში აპირებს მონაწილეობის მიღებას და ახლა ჩვენი საქმის გახმაურება არ აწყობს“.

რაც შეეხება ტერიტორიას, სადაც „კამპიონეს“ შენობა დგას, ის ბათუმის მერიის საკუთრებაა. ტერიტორია 2011 წელს გადაეცა როლანდ პაიჭაძეს სასყიდლიანი აღნაგობის უფლებით. შემდეგ, 2012 წელს კი ხელშეკრულების მხარედ პაიჭაძის ნაცვლად განისაზღვრა შპს „აზარდო“, რომელსაც დაევალა შენობის დასრულება. ინვესტიციის გაზრდის სანაცვლოდ კი, ბათუმის მერიამ გაათავისუფლა კომპანია პირგასამტეხლოს გადახდისგან, თუმცა დამატებით გადასცა იქვე მდებარე ნაკვეთები.

საბოლოოდ, 2012 წელს, შპს „აზარდო“-ს 2040 წლის 17 ივნისის ჩათვლით ვადით, პირდაპირი განკარგვის წესით და სასყიდლიანი აღნაგობის უფლებით გადაეცა ბათუმის საკუთრებაში არსებული: 618კვ/მ და 78 კვ/მ მიწის ნაკვეთები და წლიური აღნაგობის საზღაურად განისაზღვრა 17 500 ლარი.

„აზარდოს“ პარტნიორები საჯარო რეესტრის 2016 წლის 6 ივნისის ამონაწერის მიხედვით, არიან უკრაინის მოქალაქე სერგიი მესჩერიაკი [წილის 50%] და თორნიკე ტუღუში [50%].

რეესტრის ამონაწერის მიხედვით, ტერიტორია შპს „აზარდოს“ იჯარით აქვს გადაცემული შპს „სსგ კომპანიისთვის“ 2020 წლამდე. სამორინე „კამპიონე“ ბათუმში დაახლოებით ერთი წლის წინ გაიხსნა.

„ბათუმელების“ ინფორმაციით სათამაშო ბიზნესის მოსაკრებელი ქალაქის ბიუჯეტში „სსგ კომპანიას“ მიმდინარე წლის პირველი კვარტლის შემდეგ არ გადაუხდია.

„კამპიონეს“ ჩათვლით, ბათუმში 11 კაზინო ფუნქციონირებდა.

„იაფი სახლის“ პროგრამა ახალი სახელით და კრიტერიუმების სამუშაო ვერსიით

7 ივლისს ბათუმის მერიაში პროგრამის – „ხელმისაწვდომი საცხოვრისით“ სარგებლობის კრიტერიუმებისა და ბენეფიციართა შერჩევის ინსტრუმენტის წარდგენა-განხილვა მოეწყო.

პროგრამა „ხელმისაწვდომი საცხოვრისი“ „იაფი სახლის“ პროგრამის ახალი სახელწოდებაა. კრიტერიუმებისა და შერჩევის ინსტრუმენტის შემუშავებაზე სოციალური კვლევისა და ანალიზის ინსტიტუტი მუშაობდა მერიის დაკვეთით. განახლებული სახელწოდებით წარმოდგენილი პროგრამისათვის კრიტერიუმები პროგრამის სპეციალური კომისიის წევრებს იაგო კაჭკაჭიშვილმა და მამუკა ნადარეიშვილმა წარმოუდგინეს.

„პროგრამის სამიზნე ჯგუფი არის ის ნაწილი, ის ფენა, რომელმაც სიღარიბეს თავი დააღწია, მაგრამ ვერ ჩამოყალიბდა სტაბილურ, საშუალო ფენად, რათა საკუთარი ძალისხმევის საფუძველზე სახელმწიფოს ჩარევის გარეშე შეძლოს ისეთი ფუნდამენტური მოთხოვნილების დაკმაყოფილება, როგორიც არის ადეკვატური საცხოვრებლით დაკმაყოფილება“, – აღნიშნა იაგო კაჭკაჭიშვილმა.

პროგრამაში მონაწილეობის მინიმალური მოთხოვნები ასე გამოიყურება:

კრიტერიუმების თანახმად ოჯახში, რომელსაც სურს „ხელმისაწვდომი საცხოვრებლის“ პროგრამაში მონაწილეობა, ყველა წევრი საქართველოს მოქალაქე უნდა იყოს.
ცვლილებაა შესული კრიტერიუმში, რომლის თანახმადაც ოჯახის ყველა წევრი რეგისტრირებული უნდა ყოფილიყო ბათუმში – ახალი ვერსიის მიხედვით, პროგრამით სარგებლობის მინიმალური მოთხოვნაა, რომ ოჯახის ერთი სრულწლოვანი წევრი მაინც იყოს რეგისტრირებული ბათუმში, მინიმუმ ერთი წლის განმავლობაში.
ოჯახს არ უნდა გააჩნდეს საცხოვრებლად ვარგისი უძრავი ქონება, არასასოფლო-სამეურნეო დანიშნულების მიწა ან/და კომერციული ფართობი 10 კვადრატულ მეტრზე დიდი ზომის.
ოჯახის ამჟამინდელი საცხოვრებელი არ უნდა ეკუთვნოდეს ოჯახის უფროსის ბებიას/ბაბუა/მშობელს/შვილს/შვილიშვილს.
ოჯახის ერთ წევრს მაინც უნდა ჰქონდეს სტაბილური შემოსავალი.
ოჯახის შემოსავალი უნდა იყოს „ხელმისაწვდომი საცხოვრისის“ მინიმალურ ყოველთვიურ გადასახადზე მინიმუმ ორჯერ მეტი.
ერთსულიანი ოჯახის შემოსავალი არ უნდა აღემატებოდეს 1200 ლარს;
ორსულიანი ოჯახის – 1800 ლარს;
სამსულიანი ოჯახის – 2400 ლარს;
ოთხ და მეტსულიანი ოჯახის – 3000 ლარს.
თუ ოჯახი ამჟამად ქირით ცხოვრობს, ეს ქირა არ უნდა იყოს პროგრამით გათვალისწინებული მინიმალური ყოველთვიური შენატანის სამმაგ ოდენობაზე მეტი.
თუ ოჯახი გირაობს საცხოვრებელს, მაშინ გირაობის თანხა არ უნდა იყოს „ხელმისაწვდომი საცხოვრებლის“ პროგრამით გათვალისწინებული ბინის საერთო ღირებულების ნახევარზე მეტი.
ოჯახი უნდა ეთანხმებოდეს პროგრამის პირობებს.

წარმოდგენილი სამუშაო ვერსიის თანახმად ერთ და ორსულიან ოჯახს 37 კვ.მ. ფართობის ბინის შეძენა შეეძლება, 3-4 სულიან ოჯახს – 56-58 კვ.მ-ის, ხოლო ხუთ და მეტსულიან ოჯახს – 73 კვ.მ. ფართობის ბინის შეძენა შეეძლება, თუ კი ის ყველა მოთხოვნას დააკმაყოფილებს და სარეიტინგო ქულების კონკურსში გაიმარჯვებს. სარეიტინგო ქულები 0-85 000 ითვლება და რაც უფრო მაღალი ქულა ექნება აპლიკანტს, მით მეტი შანსია რომ იგი შეძლებს პროგრამაში ბინის შეძენას.

სარეიტინგო ქულები სამი ინდექსით დაითვლება: გადახდისუნარიანობა, ბინის საჭიროების ინდექსი და გამფილტრავი კომპონენტი. გამფილტრავი კომპონენტი წარმოადგენს ზემოთ ჩამოთვლილი მინიმალური მოთხოვნების არსებობა-არარსებობას. თუ კი რომელიმე მოთხოვნას ვერ აკმაყოფილებს აპლიკანტი, მაშინ ეს ინდექსი ნულს გაუტოლდება და ფორმულაში ნულზე გამრავლებით შესაბამისად აპლიკანტი 0 ქულას მიიღებს. ხოლო თუ აპლიკანტი ყველა მინიმალურ მოთხოვნას აკმაყოფილებს, ეს ინდექსი 1-ის ტოლი იქნება.

თითოეული ინდექსი სხვადასხვა კოეფიციენტით ითვლება:

გადახდისუნარიანობა – ოჯახის ჯამური შემოსავალი; ოჯახში დასაქმებულ წევრთა რაოდენობა; სტაბილურად დასაქმებულ პირთა რაოდენობა; კომუნალური გადასახადების გადახდისუნარიანობა; ქირით ცხოვრების შემთხვევაში გადახდის სტაბილურობა. [საბანკო დავალიანების შემთხვევაში მისი გადახდის სტაბილურობა, პერიოდი და მოცულობა].

ბინის საჭიროების ინდექსი – საჭიროების შეფასება; უბინაობის დამატებითი წლები [რამდენი წელია უბინაოდაა აპლიკანტი – უპირატესობა მიენიჭება იმ აპლიკანტს, რომელიც უფრო მეტი წელია უბინაოდ ცხოვრობს]; პირობების ცალსახად მისაღებებობა; ბათუმში რეგისტრაციის დამატებითი წლები; ოჯახში მკვეთრად და ზომიერად გამოხატული შშმ წევრის ყოლა; ახალდაქორწინეული ოჯახი; სხვადასხვა სპეციალური კატეგორიის მქონე [მაგ: ვეტერანი წევრი ოჯახში, მარჩენალდაკარგული და ა.შ.]; ამჟამინდელი საცხოვრისის მდგომარეობა; ქირით ცხოვრების შუალედი.

კომისიამ 25 ივლისისთვის დაგეგმა კიდევ ერთი შეხვედრა და განხილვა. იაგო კაჭკაჭიშვილის თქმით, ეს ვერსია დამტკიცების შემთხვევაში ოპტიმალურია ამ პროგრამისათვის: „პილოტირებაც მოვახდინეთ და ამან აჩვენა, რომ ჩვენ მიერ შემუშავებული კრიტერიუმები და შერჩევის ინსტრუმენტი რეალურად მუშაობს, ჩვენ იდეალური ოჯახი გვყავს, ხუთსულიანი, რომელმაც ამ კრიტერიუმებით 82 000 სარეიტინგო ქულა დაიმსახურა, რაც იმას ნიშნავს, რომ არსებობენ ოჯახები, რომლებიც შეძლებენ ამ პროგრამით სარგებლობას და მათ გამოსავლენად ეს კრიტერიუმები მუშაობს“, – ამბობს იაგო კაჭკაჭიშვილი.

ამავე სამუშაო ვერსიით ბინის ქირის გადახდა ბენეფიციარებს მინიმალური ყოველთვიური შენატანით 15 წლის განმავლობაში მოუწევთ. ერთ და ორსულიანი ოჯახისათვის ეს თანხა 189 ლარია.

ბათუმის მერია ე.წ. „იაფი სახლის“ შესახებ 2014 წლიდან საუბრობს, თუმცა პროექტის განხორციელება ამ დრომდე ვერ მოხერხდა. მერიის ინფორმაციით, ე.წ. „იაფი სახლის“ სამშენებლო სამუშაოები ჯავახიშვილის ქუჩაზე მიმდინარეობს. 3 174 კვმ ტერიტორიაზე ხუთსართულიანი სახლი აშენდება. ხელშეკრულებით გათვალისწინებულია საცხოვრებელი სახლის მშენებლობა და მიმდებარე ტერიტორიის კეთლმოწყობა, რისთვისაც მუნიციპალიტეტის ბიუჯეტიდან 4 მილიონ 279 ათას 990 ლარია გამოყოფილი. ბათუმის მერიის მიერ 2015 წლის 9 ოქტომბერს გამოცხადებულ ტენდერში მხოლოდ ერთი კომპანია „კონვენტ ჯორჯია“ მონაწილეობდა. კომპანიასთან ხელშეკრულება 2015 წლის 16 დეკემბერს გაფორმდა. სახლის მშენებლობა და მიმდებარე ტერიტორიის კეთილმოწყობა მიმდინარე წლის დეკემბრისთვის უნდა დასრულდეს.

ამავე თემაზე:

“იაფი სახლი” – ბათუმის მერიის თავსატეხი

ხულო, სოფელი თხილვანა წვიმის შემდეგ [ფოტო]

ბოლოდროინდელმა წვიმამ ხულოს მუნიციპალიტეტის სოფლების ზედა და ქვედა თხილვანას, ბაკი-ბაკოსა და მთისუბნის დამაკავშირებელი სამანქანო გზა დააზიანა. ამ დროისთვის სოფლებთან მისასვლელი გზა გახსნილია.

სოფელი თხილვანა. ადიდებულმა წყალმა სამ სოფელთან მისასვლელ გზაზე, ამ ადგილას არსებული სახიდე ნაგებობა დაანგრია

თხილვანა. ზედა და ქვედა თხილვანას დამაკავშირებელი ეს ლითონის ხიდი 2006 წლის შემდეგ ამ მდგომარეობაშია

თხილვანა. მთის მდინარემ კალაპოტი შეიცვალა და გზაზე მიედინება

ხიდი, რომელიც 2006 წელს ჩაინგრა / თხილვანა / 7.07.2016 / როინ გუნდაძის ფოტოები

ბათუმში ენმ-ს აქტივისტები საპატრულო პოლიციამ დაკითხა

ენმ-ს ადვოკატის, უშანგი მიქელაძის ინფორმაციით, ენმ-ს აქტივისტები ბათუმის საპატრულო პოლიციაში დაკითხვაზე იმყოფებიან. როგორვ უშანგი მიქელაძემ თქვა, ქენან კახიძეს, ბაქარ ბარამიძესა და ზაზა ტარიელაძეს უწყება გუშინ, 6 ივლისს მიუვიდათ. მათ, ადმინისტრაციულ სამართალდარღვევათა ოქმის მიხედვით, ადმინისტრაციულ სამართალდარღვევათა კოდექსის 166-ე და 173- მუხლების დარღვევას ედავებიან, 3 ივლისს სარფში მომხდარ ინციდენტთან დაკავშირებით [როცა სარფის საბაჟო გადმოკვეთა აჭარის მთავრობის ყოფილმა თავმჯდომარემ, ლევან ვარშალომიძემ და მას ერთ-ერთმა პირმა ფეხსაცმელი ესროლა. ეს პიროვნება იმ დღესვე დააკავეს].

„სამართალდამცველი ორგანოების მხრიდან არის ასეთი პრაქტიკა, რომ როდესაც პიროვნება ჩადის წვრილმან ხულიგნობას ან პოლიციას უწევს წინააღმდეგობას, თუ ეს გაქცევით არ მთავრდება, დაკავება ყოველთვის ხდება ადგილზე, იმ მომენტში, მაგრამ ეს როგორც ჩანს, ახალი პრაქტიკაა. ახლა ვითხოვთ მტკიცებულებებს, თუ რის საფუძველზე ედავებიან. დაკავებულები არ არიან და არც მოხდება ეს, რადგან ადგილზე უნდა დაეკავებინათ. ახლა უკვე სასამართლოს პრეროგატივაა გადაწყვიტოს, ჩათვლის თუ არა მათ ადმინისტრაციულ სამართალდამრღვევებად“, – ამბობს უშანგი მიქელაძე.

ადმინისტრაციულ სამართალდარღვევათა კოდექსის 166-ე მუხლი წვრილმან ხულიგნობას ითვალისწინებს: „საზოგადოებრივ ადგილებში ლანძღვა-გინება, მოქალაქეებზე შეურაცხმყოფელი გადაკიდება და სხვა ამგვარი მოქმედება, რომელიც არღვევს საზოგადოებრივ წესრიგსა და მოქალაქეთა სიმშვიდეს, – გამოიწვევს დაჯარიმებას 100 ლარის ოდენობით ან, თუ საქმის გარემოებათა და დამრღვევის პიროვნების გათვალისწინებით ამ ზომის გამოყენება არასაკმარისად იქნება მიჩნეული, – ადმინისტრაციულ პატიმრობას 90 დღემდე ვადით“.

როდის დაიწყება დაზიანებული გზის რეაბილიტაცია შუახევში

ბათუმი-ახალციხის ცენტრალური მაგისტრალის ხიჭაური-ზამლეთის მონაკვეთი, სადაც ხშირად მოძრაობს ჰესის მშენებელი კომპანიის მძიმე ტექნიკა, დაზიანებულია.

შუახევის მუნიციპალიტეტის ინფრასტრუქტურის სამსახურის უფროსის, ედნარ შარაშიძის თქმით, ხიჭაური-შუახევის მონაკვეთი დაზიანებულია თითქმის მთლიანად, ხოლო გზის შუახევი-ნენიის მონაკვეთი ნაწილობრივ.

„აღნიშნულთან დაკავშირებით ჩამოსულები იყვნენ საქართველოს საავტომობილო გზების დეპარტამენტის წარმომადგენლები, რომლებმაც ჩაატარეს აზომვითი სამუშაოები. ჩემი ინფორმაციით, შუახევის დაბის 800-მეტრიანი მონაკვეთის რეაბილიტაცია იგეგმება ამ თვის ბოლოსთვის, ხოლო ხიჭაური-შუახევის მონაკვეთის ნაწილობრივ რეაბილიტაცია ჩატარდება,“ – განაცხადა „ბათუმელებთან“ ედნარ შარაშიძემ.

მისივე თქმით, „ჰესების კომპანიების მონაწილეობის მიღებასთან დაკავშირებით, როგორც ჩვენთვის ცნობილია, საგზაო დეპარტამენტსა და კომპანიებს შორის არის ხელშეკრულება და ისინი ამ დროისთვის მხოლოდ ნაწილობრივ შეაკეთებენ გზებს. გზები ნაწილობრივ კი კეთდება, მაგრამ მაინც ზიანდება“.

ამავე თემაზე:

ხულო-გოდერძის გზის რეაბილიტაცია ქუვეითის ფონდის სესხით

ტურიზმი აჭარის სოფლებში

ქედის მუნიციპალიტეტში, სოფელ გობრონეთში, ზებურ ბოლქვაძის საოჯახო სასტუმრო უკვე მერვე წელია ტურისტებს მასპინძლობს. ზებურის სასტუმრო მაღალმთიან აჭარაში ერთადერთი არ არის, სადაც უცხოელი თუ ქართველი ტურისტები ჩადიან. აჭარის სოფლის საოჯახო სასტუმროებში დღე-ღამე 15-150 ლარი ღირს, სერვისის მიხედვით.

ზებურ ბოლქვაძემ აგროტურიზმის შესახებ პირველად 2005 წელს მონტენეგროში ერთ-ერთი არასამთავრობოს მიერ ორგანიზებულ კონფერენციაზე გაიგო: „იქ როგორც მოყვარული მეფუტკრე ვიყავი წასული, თუმცა როცა ამ დარგის შესახებ ვიდეო ვნახე, გეგმები შემეცვალა და გადავწყვიტე ჩემს სოფელში მეცადა ამ მიმართულებით ბიზნესი“, – ამბობს ზებურ ბოლქვაძე. მან საკუთარ სახლში მოაწყო რამდენიმე ოთახი, დაგეგმა ტურები და 2008 წელს პირველ სტუმრებს უმასპინძლა.

ბიზნესი USAID-ის გრანტით – 4 800 დოლარით დაიწყო, თუმცა ეს თანხა მხოლოდ პროექტის 30%-ს ფარავდა, დანარჩენი თანხა თანადაფინანსება კი თავად მას ეკუთვნოდა. მან ბიზნესი გასულ წელს კიდევ უფრო გააფართოვა პროგრამის – „აწარმოე საქართველოში“ დახმარებით და დამსვენებლებს „გურმანტური“ შესთავაზა: „5000 ლარით დამაფინანსეს, დიდი სამზარეულო მოვაწყვე, 70-მდე ადამიანი დაეტევა. ტურისტებს ძალიან მოსწონთ კერძების მზადების პროცესში მონაწილეობა. მე კარგად არ ვარ ჩახედული ამ მიმართულების მენეჯმენტის საკითხებში, თუმცა მგონია, რომ სამზარეულოს ღვინოზე არანაკლები პოტენციალი აქვს“, – აღნიშნა საოჯახო სასტუმრო „ზებოს“ მფლობელმა და დასძინა, რომ გასულ წელს 300-მდე სტუმარი ჰყავდა, მათი უმეტესობა გერმანიიდან იყო, თუმცა მანამდე უკრაინელები და პოლონელები ჭარბობდნენ. ბიზნესი საოჯახოა და გურმანტურის მთავარი მზარეულიც ზებურ ბოლქვაძის მეუღლეა. ბიზნესში ჩართულები არიან თანასოფლელებიც – ახალგაზრდები როცა საჭირო ხდება, თარჯიმნობას უწევენ, თუმცა ტურისტულ ჯგუფებს ძირითადად თარჯიმანიც ახლავთ.

„გურმანტურის“ გარდა ზებურ ბოლქვაძე ტურისტებს სხვადასხვა სერვისს სთავაზობს. მაგალითად, თუთუნის საჭრელ დაზგასთან თამბაქოს დაჭრისა და გამზადების პროცესში მონაწილეობას, ასევე არყის გამოხდასა და დაგემოვნებას, სეზონზე მარწყვის პლანტაციაში მოსავლის აღებაში მონაწილეობას და სხვა აქტივობებში ჩართვას. როგორც ზებური ამბობს, ტურისტებს მაინც ყველაზე მეტად მაინც კერძების მომზადების პროცესში მონაწილეობა მოსწონთ: „განსაკუთრებით ყველის მზადების პროცესში იღებენ ხოლმე მონაწილეობას“.

ფასები „ზებოს“ დამსვენებლებისთვის ბოლო სამი წელია უცვლელია – სამჯერადი კვება და ღამისთევა ერთ ადამიანზე – 50 ლარი. დამატებითი სერვისები ცალკე ხარჯია, თუმცა როდესაც კორპორაციული ჯგუფები სტუმრობენ, გურმანტურის თანხას ცალკე არ ახდევინებენ. გეგმაში ზებურ ბოლქვაძეს ტურისტებისთვის საკვირაო სკოლის მოწყობა აქვს, სადაც აჭარული კერძების მომზადებას ისწავლიან. „თუმცა ამ ეტაპზე ფიზიკურად არ არსებობს უცხო ენაზე გამოცემული აჭარული კერძების რეცეპტები, რაც ცალკე ცოდნას მოითხოვს. ვნახოთ, იქნებ ტურიზმის დეპარტამენტის დახმარებით მოვახერხოთ ამის ორგანიზება“, – ამბობს ზებურ ბოლქვაძე. მას წელსაც აქვს განაცხადი შეტანილი დამატებითი გრანტის მოსაპოვებლად ბიზნესის გაფართოებისთვის.

ზებურის წამოწყებამ თანასოფლელებსაც მისცა ბიძგი. როგორც თავად იხსენებს, როდესაც შეჰქონდა განაცხადი „აწარმოე საქართველოს“ პროგრამაში მონაწილეობის მისაღებად, თანასოფლელებს არ სჯეროდათ, რომ დააფინანსებდნენ და ამიტომ თავად არ სცადეს. წელს კი რამდენიმე მათგანმაც შეიტანა განაცხადი და გობრონეთიდან უკვე ხუთ პროექტზე ელოდებიან პასუხს: ზოგიერთს სამზარეულოს გახსნა უნდა, ზოგიერთს – „გესთჰაუსის“ მოწყობა.

საოჯახო სასტუმროს ბიზნესით მეორე წელია დაკავებულია ხულოს მუნიციპალიტეტის, სოფელ ხიხაძირის მკვიდრი დარიკო გაბაიძეც. როგორც თავად იხსენებს, პირველად ორი წლის წინ მოიყვანეს ბიზნესმენებმა ტურისტები და სოფლის მოსახლეობას მათი ღამისთევისთვის თანხა შესთავაზეს: „ამის შემდეგ გადავწყვიტეთ ოთახები მოგვეწყო. ჩვენი ხარჯებით მოვაწყვეთ. თავიდან ორი საწოლი გვქონდა, შემდეგ – ოთხი, გასულ წელს – ექვსი და წელს უკვე რვა სტუმრის მიღება შეგვიძლია ერთდროულად“, – ამბობს დარიკო გაბაიძე. მისი თქმით, გასულ წელს თუ სულ 60-მდე დამსვენებელს უმასპინძლა, წელს უკვე ოცამდე სტუმარი ჰყავდა, რაც იმას ნიშნავს, რომ ტურისტების რაოდენობა ორჯერაა გაზრდილი. ამის მიზეზად საოჯახო სასტუმროს მფლობელი კმაყოფილ სტუმრებს ასახელებს, რომლებიც მათთან დასვენების შემდეგ ავრცელებენ ინფორმაციას და ასევე ფეისბუქჯგუფს, რომელიც სეზონის დასაწყისში შექმნა: „აი, დღეს მყავდა კანადელი სტუმრები, რომლებიც ფეისბუქის საშუალებით დაგვიკავშირდნენ, ჯერჯერობით ტურისტული ცენტრების მიერ გამოგზავნილი სტუმარი არ გვყოლია“.

დარიკო გაბაიძესაც აქვს შეტანილი განაცხადი დაფინანსების მოსაპოვებლად. ამბობს, რომ თანხა გასაფართოვებლად და კეთილმოწყობისთვის სჭირდება.

მათ საოჯახო სასტუმროში ღამისთევა 15-20 ლარიდან იწყება, ამას ემატება კვებისა და სხვადასხვა მომსახურების ფასები, რაც შეიძლება 150 ლარამდე ავიდეს: „აქ შედის ყველაფერი – კვება, კერძების მომზადების პროცესში მონაწილეობა, ტური სოფელში, სხვადასხვა აქტივობაში მონაწილეობა, მაგალითად, შეიძლება შეშის დაჩეხვის სწავლაც ითხოვონ, ყველაფერი აინტერესებთ სოფელში, ხალხის ცხოვრება, მეურნეობის დარგები… ჩვენ მაქსიმალურად ვცდილობთ ყველაფერში დავეხმაროთ“.

როგორც დარიკო ამბობს, ყველაზე მეტად ტურისტებს რძის ჰალვის მომზადების პროცესში მონაწილეობა და დაგემოვნება მოსწონთ, რაც, მისივე თქმით, საკმაოდ შრომატევადი საქმეა.

ნოე ნაგერვაძე მაჭახელას ხეობაში ცხოვრობს, ის ტურისტულ სააგენტოებთან თანამშრომლობს, რომლებიც ტურისტების ჯგუფებს გზავნიან. როგორც იგი ამბობს, მის სასტუმროში ღამისთევით ტურისტები იშვიათად რჩებიან, მხოლოდ სამზარეულოსა და გიდის მომსახურებით სარგებლობენ. ღამისთევა აქ 10-15 ლარი ღირს: „მესამე წელია ვცდილობთ საქმის აწყობას, ამას ბიზნესს ვერ დავარქმევთ, შემოსავლით ოჯახის რჩენა შეუძლებელია, მაგრამ იმედი გვაქვს, რომ განვითარდება და საქმე წინ წაიწევს. გასულ წელთან შედარებით, მაგალითად, წელს უფრო მეტი დამსვენებელია, ძირითადად უკრაინელები, ლატვიელები და პოლონელები“, – ამბობს ნოე ნაგერვაძე. ის საკუთარი ხელით ამზადებს სუვენირებს – მაჭახელას თოფს, ზოგიერთს ჩუქნის, ზოგიერთი ტურისტი კი – ყიდულობს.

აჭარის ტურისტული პროდუქტების განვითარების სააგენტოში ამბობენ, რომ მაღალმთიან აჭარაში ტურისტების რაოდენობის შესახებ სტატისტიკურ მონაცემებს არ ფლობენ, თუმცა ტურისტული ცენტრების ინფორმაციას თუ დავეყრდნობით, მათი რაოდენობა მიმდინარე წელს გაორმაგებულია. მათივე ინფორმაციით, უფრო და უფრო მეტი ტურისტები ითხოვს სოფლებში საოჯახო სასტუმროებში დასვენებას, სადაც უშუალოდ ეცნობიან სოფლის მოსახლეობის ცხოვრებას, კულტურას და მონაწილეობას იღებენ სამეურნეო თუ სხვა ტიპის აქტივობებში.

ტურიზმის დეპარტამენტში ამბობენ, რომ ამ ეტაპზე ყველაზე დიდ პრობლემას ტურისტულ მარშრუტებზე აქტივობების სიმცირე წარმოადგენს: „ტურისტი რომ მიდის ამ გზაზე, მას გარდა ხედებისა და კერძების დაგემოვნებისა, უნდა შევთავაზოთ სხვადასხვა აქტივობა, მაგალითად, ეს შეიძლება იყოს ზიპლაინი [თოკით გადაადგილება სიმაღლეზე – ექსტრემალური გართობისს სახეობა], ნავებით გასეირნება და ა.შ. რაც უფრო საინტერესოს გახდის ტურს. ამ ეტაპზე ამაზეც ვმუშაობთ“, – ამბობს ტურისტული პროდუქტების განვითარების სააგენტოს ხელმძღვანელი ნათია ზოიძე.

აჭარის ტურიზმისა და კურორტების დეპარტამენტის მონაცემებით, რომელიც ტურისტების გზამკვლევშია შეყვანილი, აჭარის სოფლებში 35-მდე საოჯახო სასტუმროა. ყველაზე მეტი – 12 საოჯახო სასტუმრო ხულოს მუნიციპალიტეტში მდებარეობს.

დისკუსია ნარკოპოლიტიკის საკითხებზე

ხვალ, 8 ივლისს, 12:00 საათზე, ბათუმის დემოკრატიული ჩართულობის ცენტრში გაიმართება შეხვედრა ნარკოპოლიტიკასთან დაკავშირებულ საკითხებზე.

„ბოლო პერიოდში საქართველოში ნარკოპოლიტიკა მწვავე კრიტიკის საგანია. მას უწოდებენ რეპრესიულს და მოითხოვენ მის შეცვლას ჰუმანური ნარკოპოლიტიკით, რომელიც იქნება არა დასჯაზე, არამედ რეაბილიტაციაზე და მკურნალობაზე ორიენტირებული“- ნათქვამია შეხვედრის ორგანიზატორის, „დემოკრატიული ჩართულობის ცენტრის“ ინფორმაციაში.

ნარკოპოლიტიკის საკითხებზე, საჯარო შეხვედრაზე ისაუბრებენ შს მინისტრის მოადგილე არჩილ თალაკვაძე და ამავე სამინისტროს ადმინისტრაციის უფროსის მოადგილე, გიორგი სახოკია.

ლოდებით დატვირთული მანქანები ეზოსთან – „ბავშვებს სახლში ხომ ვერ დავამწყვდევ?!“

ქედაში, სოფელ ჭინკაძეებში, მიქელაძეების ოჯახის ეზოსთან, მძიმე ტექნიკას ყოველ დღე ლოდები გადააქვს. მანქანიდან ჩამოვარდნილმა ლოდმა მიქელაძეების ავტომობილი ორჯერ დააზიანა. ოჯახი შიშობს, რომ შესაძლოა ადამიანის სიცოცხლესაც შეექმნას საფრთხე.

სოფელ ჭინკაძეებში მთას რესულ მიქელაძის საცხოვრებელი სახლიდან რამდენიმე მეტრში აფეთქებენ. კლდიდან აფეთქების შედეგად ჩამოშლილი ინერტული მასალა მომპოვებელ კომპანიას სოფლიდან შიდა საუბნო გზის მეშვეობით გააქვს, საუბნო გზა კი რესულ მიქელაძის სახლის გვერდით, დაახლოებით ნახევარ მეტრში გადის. სახლსა და შიდა საუბნო გზას შორის არც დამცავი კედელია და არც მიქელაძეების ეზოა შემოსაზღვრული.

რესულ მიქელაძე ამბობს, რომ ლოდებით დატვირთული ავტომობილიდან ქვა ორჯერ ჩამოვარდა, ეზოში მდგარ ავტომობილს დაეცა და დააზიანა.

„ორჯერ ჩამოვარდა ქვა და ორჯერ დააზიანა მანქანა. მართალია, ავტომობილი შეაკეთეს, მაგრამ ადამიანი რომ ყოფილიყო იქ, არ ვიცით რა მოხდებოდა. არაერთხელ ვთხოვეთ კომპანიას გზის ამ ნაწილზე ან დამცავი კედელი მოეწყო, ან გადატანისას კონტროლი გაემკაცრებინა, მაგრამ ჩვენი თხოვნა არავინ გაითვალისწინა. ლოდებით დატვირთული ავტომობილი დღეში რამდენჯერმე გადაადგილდება, არავინ აკონტროლებს ტვირთი დასაშვებ ნორმაზე მეტი ხომ არ არის, ეს გზაც არ არის გამართული და იმისაც გვეშინია, გზა რომ ჩამოიშალოს, ლოდებით დატვირთული ავტომობილი სახლს არ დაეცეს. ქედის გამგეობას არაერთხელ ვთხოვეთ ყურადღება მოექცია ჩვენთვის, თუმცა არავინ გამოგვეხმაურა,“ – გვიყვება რესულ მიქელაძე.

რესულის მეუღლე, მზიური მიქელაძე დარდობს, რომ მალე საბავშვო ბაღი მოიხსნება და ბავშვების გაკონტროლება გაუჭირდება, სახლიდან ეზოში რომ არ გავიდნენ.

„ბავშვები საბავშვო ბაღში დადიან, საღამოს როცა გამოგვყავს, რამდენიმე საათს არ ვუშვებთ სახლიდან, მაგრამ როცა ბაღი მოიხსნება, მერე რა გვეშველება, არ ვიცით. სოფელში ბავშვებს სახლში ხომ ვერ დავამწყვდევ. საშიშროება დიდია, იყო ქვების ჩამოვარდნის ფაქტი და ჩვენი თხოვნა, მოგვაქციონ ყურადღება, უსაფუძვლო არ არის,“ – ამბობს მზიური.

ქედის მუნიციპალიტეტის გამგეობის ზედამხედველობის სამსახურში განმარტავენ, რომ ინერტული მასალის მოპოვება და მძიმე ტექნიკის გადაადგილების გაკონტროლება გარემოს დაცვის სამსახურის პრეროგატივაა, მსგავს კონკრეტულ შემთხვევებში კი გამგეობის ზედამხედველობის სამსახურს უფლებამოსილება არ აქვს კერძო ქონების დაზიანების შემთხვევაში კომპანია დააჯარიმოს, ან კიდევ შეამოწმოს, მძიმე ტექნიკის გადაადგილებისას აჭარბებს თუ არა ტვირთის ოდენობა დასაშვებ ნორმას.

ზედამხედველობის სამსახურის უფროსი სულიკო სურმანიძე ოჯახებს ურჩევს, რომ მსგავს შემთხვევებში სამართალდამცავ ორგანოს მიმართონ. ის აქვე დასძენს, რომ მისი სამსახური საქართველოს ადმინისტრაციული კოდექსის 119-ე მუხლით გაწერილ კონტროლს ახორციელებს.

„სამშენებლო ან სხვა მასალების, ნარჩენების გადაზიდვა ისეთი სატრანსპორტო საშუალებებით, რომელსაც გაუმართავი საბარგული ან მისაბმელი მოწყობილობა აქვს, რაც გზის საფარის დანაგვიანებას ან დაზიანებას იწვევს, ჯარიმდება 300 ლარით, იგივე დანაშაულის განმეორებით ჩადენისას კი ჩამდენს 900 ლარით ვაჯარიმებთ. ჩვენს კომპეტენციაში ამის კონტროლი შედის, რაც შეეხება კერძო საკუთრების დაზიანებას, ასეთ შემთხვევაში დაზარალებულმა სამართალდამცავ ორგანოს უნდა მიმართოს,“ – ამბობს სულიკო სურმანიძე.

ინერტული მასალის მოპოვება სოფელ ჭინკაძეების მოსახლეობამ არაერთხელ გააპროტესტა და მასალის მომპოვებელ კომპანია შპს „ბათუმმშენ ჯგუფს~ გზაც არაერთხელ გადაუკეტა მოთხოვნით – შეწყვეტილიყო სოფელში აფეთქებითი სამუშაოები და ინერტული მასალის გატანა სოფლის გზით. კომპანიამ ინერტული მასალის მოპოვებაზე ლიცენზია 2011 წელს შვიდი წლის ვადით მიიღო, მას 122 000 კუბური მეტრი ინერტული მასალის მოპოვების უფლება აქვს.

სტატიის მომზადებისას „ბათუმელებმა“ კომპანიასთან დაკავშირება კომენტარისთვის არაერთგზის სცადა, თუმცა ამაოდ.

ოჯახური ძალადობა დედასა და ბებიაზე

„არაფერში არ ვცნობ თავს დამნაშავედ,“ – უპასუხა 29 წლის მინდია ქ.-მ მოსამართლე ინდირა მაშანეიშვილს. მინდიას პროკურატურა საკუთარი ბებიისა და დედის ცემაში ადანაშაულებს. მას ბრალად ედება საბრძოლო მასალის მართლსაწინააღმდეგო შენახვა და სასამართლოს გადაწყვეტილების შეუსრულებლობაც.

მინდიას ბებიას პოლიციაში 16 აპრილს საღამოს დაურეკავს. პოლიციელებისთვის მიცემულ ჩვენებაში ბებიამ აღნიშნა, რომ შვილიშვილმა მას ჯერ სიტყვიერი შეურაცხყოფა მიაყენა, შემდეგ კი, სცემა. 21 აპრილს მინდია ქ.-ს მიმართ სასამართლომ შემაკავებელი ორდერი გამოსცა. გამოძიების მასალების მიხედვით, მიუხედავად იმისა, რომ ბრალდებულს აკრძალული ჰქონდა იმ მისამართზე მისვლა, სადაც ბებია ცხოვრობდა, ბებიას მან კიდევ ერთხელ მიაყენა შეურაცხყოფა 8 მაისს. ამავე საღამოს მან დედასაც სცემა.

პროკურატურამ სასამართლოს მინდია ქ.-ს ბინის ჩხრეკის ოქმიც წარუდგინა. პოლიციელებს ბრალდებულის საძინებელში სამი ვაზნა უპოვიათ. კანონმდებლობის მიხედვით, საბრძოლო მასალის უკანონო შეძენა და შენახვა ორიდან ოთხ წლამდე თავისუფლების აღკვეთას ითვალისწინებს. ამას ემატება შემაკავებელი ორდერი, რომლით გათვალისწინებული ვალდებულებები მინდია ქ-მ დაარღვია.

„ჩვენ თანახმა ვართ საპროცესო შეთანხმებაზე. შევთავაზეთ ერთი წლით თავისუფლების აღკვეთა და ჯარიმის გადახდა, მაგრამ, როგორც ჩანს, ბრალდებული ბრალს არ აღიარებს,“ – ამბობს პროკურორი ლევან მურვანიძე. საპროცესო გარიგებისთვის კი, ბრალის აღიარება მთავარი პირობაა. პროკურორს ბრალდებულმა უთხრა, რომ ის ადვოკატს უკვე ესაუბრა და ამ საკითხზე უახლოეს მომავალში ჩამოყალიბდება. მინდია ქ.-ს ინტერესებს სასამართლოში სახელმწიფო იურიდიული დახმარების ბიურო იცავს.

ბრალდებულმა მოსამართლეს ასევე უთხრა, რომ პროფესიით მეზღვაურია და ამჟამად უმუშევარი. სასამართლოს წინა სხდომაზე მინდია ქ.-ს აღმკვეთი ღონისძიების სახით, გირაო შეუფარდეს, თუმცა ბრალდებულმა მისი გადახდა ვერ შეძლო და ის წინასწარ პატიმრობაში რჩება. სასამართლოს მომდევნო სხდომაზე მოწმის სახით ჩვენებებს მისცემენ ბრალდებულის დედა და ბებია. საქმეში უკვე დევს ექსპერტიზის დასკვნა, რაც მათ სხეულებზე მიყენებულ მსუბუქ დაზიანებებს ადასტურებს.

სასამართლოს სხდომას ესწრებოდა ბრა¬ლდებულის მეუღლე. მან „ბათუმელებთან“ გასაუბრებაზე უარი თქვა.

უმაღლესი საბჭოს წევრობის კანდიდატები ნარკოლოგიურ შემოწმებას „სამხარაულში“ გაივლიან

აჭარის უმაღლესი საბჭოს 2016 წლის 8 ოქტომბრის არჩევნებში, საბჭოს წევრობის კანდიდატებისთვის ნარკოლოგიური შემოწმების ჩატარების უფლება უსკომ სამხარაულის ბიუროს აჭარის რეგიონული ექსპერტიზის დეპარტამენტს მიანიჭა.

უმაღლესი საარჩევნო კომისიის [უსკო] შესაბამის განკარგულებაში აღნიშნულია:

„მაჟორიტარულ საარჩევნო ოლქში უმაღლესი საბჭოს წევრობის კანდიდატის რეგისტრაციაში გასატარებლად ამომრჩეველთა 5-კაციანი საინიციატივო ჯგუფის წარმომადგენელმა, შესაბამის საოლქო საარჩევნო კომისიის თავმჯდომარეს, კანდიდატის მხარდამჭერ ამომრჩეველთა სიასთან ერთად უნდა წარუდგინოს ცნობა კანდიდატის ნარკოლოგიური შემოწმების შესახებ, რომელშიც აღნიშნული იქნება, რომ კანდიდატი ჯანმრთელია, ან ნარკოტიკების მომხმარებელია;

პარტიების/საარჩევნო ბლოკების მიერ უმაღლესი საბჭოს წევრობის კანდიდატის მაჟორიტარულ საარჩევნო ოლქში წარდგენის შემთხვევაში, კანდიდატის სააღრიცხვო ბარათთან და ფოტოსურათთან ერთად უმაღლეს საარჩევნო კომისიაში წარდგენილი უნდა იქნას ცნობა კანდიდატის ნარკოლოგიური შემოწმების შესახებ, რომელშიც აღნიშნული იქნება, რომ კანდიდატი ჯანმრთელია, ან ნარკოტიკების მომხმარებელია;

კენჭისყრის დღიდან არა უგვიანეს მე-7 დღისა, წინასწარი მონაცემებით საარჩევნო ზღურბლგადალახული პარტიების/საარჩევნო ბლოკების, პარტიული სიიდან სავარაუდოდ არჩეულმა, აჭარის ავტონომიური რესპუბლიკის უმაღლესი საბჭოს წევრობის ყველა კანდიდატმა უნდა გაიაროს ნარკოლოგიური შემოწმება;

აჭარის ავტონომიური რესპუბლიკის უმაღლესი საბჭოს წევრობის კანდიდატებს ნარკოლოგიური შემოწმების გავლის უფლება აქვთ, სამხარაულის ბიუროს აჭარის რეგიონული ექსპერტიზის დეპარტამენტში;

აღნიშნული დეპარტამენტი კენჭისყრიდან არაუგვიანეს მე-14 დღისა, ვალდებულია უმაღლეს საარჩევნო კომისიაში წარადგინოს წინასწარი მონაცემებით საარჩევნო ზღურბლგადალახული პარტიების/საარჩევნო ბლოკების, პარტიული სიიდან სავარაუდოდ არჩეული უმაღლესი საბჭოს წევრობის ყველა კანდიდატის შესახებ ნარკოლოგიური შემოწმების დამადასტურებელი ცნობა, რომელშიც აღნიშნული იქნება, რომ კანდიდატი ჯანმრთელია, ან ნარკოტიკების მომხმარებელია და უმაღლესი საბჭოს არჩეულ წევრთა სია, რომლებმაც გაიარეს ნარკოლოგიური შემოწმება“.

პოლიციელებზე შეიარაღებული თავდასხმისთვის ძებნილი სარფში დააკავეს

შინაგან საქმეთა სამინისტროს ინფორმაციით, კახეთისა და აჭარის პოლიციის დეპარტამენტების თანამშრომლებმა, ერთობლივად ჩატარებული ოპერატიულ-სამძებრო და საგამოძიებო ღონისძიებების შედეგად, გურჯაანის რაიონული სამმართველოს მიერ მიმდინარე წლის 15 მაისიდან პოლიციელზე თავდასხმის, ცეცხლსასროლი იარაღის მართლსაწინააღმდეგო შეძენა-შენახვა-ტარებისა და ძარცვის ბრალდებით ძებნილი, 1989 წელს დაბადებული, წარსულში ნასამართლევი ომარ ც. ხელვაჩაურის რაიონის სოფელ სარფში დააკავეს.

„გამოძიებამ დაადგინა, რომ ომარ ც.-მ 2016 წლის 11 მაისს, ღამით, საპატრულო პოლიციის დეპარტამენტის კახეთის მთავარი სამმართველოს სახაზო საპატრულო სამმართველოს მეორე განყოფილების პატრულ-ინსპექტორების მისამართით რამდენჯერმე გაისროლა, შემდეგ მართლსაწინააღმდეგოდ დაეუფლა მოქალაქის კუთვნილ ავტომანქანას და შემთხვევის ადგილიდან მიიმალა. სროლისას დაზიანდა საპატრულო ეკიპაჟის ორი ავტომანქანა. პოლიციის არც ერთი თანამშრომელი არ დაშავებულა. სამართალდამცველებმა, შემთხვევის ადგილის დათვალიერებისას 17 მასრა ამოიღეს. პოლიციამ ნაძარცვი ავტომანქანა გურჯაანის სასაფლაოს მიმდებარე ტერიტორიაზე მიტოვებული იპოვა. გურჯაანის რაიონულმა სასამართლომ ომარ ც.-ს პატიმრობა დაუსწრებლად შეუფარდა. დაკავებული ჩადენილ დანაშაულს აღიარებს,“- აღნიშნულია შსს-ს განცხადებაში.

გამოძიება სსკ-ს 353-ე პრიმა მუხლის 1-ლი ნაწილით, სსკ-ს 236-ე მუხლის მე-2 და მე-3 ნაწილებით, სსკ-ს 178-ე მუხლის მე-3 ნაწილის „ე“ ქვეპუნქტით და მე-4 ნაწილის „ბ“ ქვეპუნქტით მიმდინარეობს.

მდინარის ადიდების გამო ხულოს სამ სოფელთან მისასვლელი გზები ჩაიკეტა

დღეს, 6 ივლისს, დილიდან, სეტყვისა და ძლიერი წვიმის გამო ხულოს მუნიციპალიტეტში [სხალთისა და ღორჯომის მიმართულებით] მდინარეები კალაპოტიდან გადმოვიდა, რის გამოც ზოგიერთ სოფელთან მისასვლელი გზა ჩაიხერგა. ჩვენი ინფორმაციით, ეს სოფლებია: ბაკი-ბაკო, მთისუბანი, ასევე ზედა და ქვედა თხილვანა.

„ბათუმელები“ ხულოს მუნიციპალიტეტის გამგებელს, ბესიკ ბაუჩაძეს დაუკავშირდა, რომელმაც სატელეფონო საუბარში აღნიშნა, რომ ამ დროისთვის საგანგაშო მდგომარეობა არ არის, ქვემო თხილვანასთან გზა არის, თუმცა „ადიდებულმა წყალმა ხიდის მაგვარი ნაგებობა დაანგრია და მისასვლელი გზა ამ დროისთვის სამ სოფელთანაა ჩაკეტილი. სოფლებს ელექტროენერგია მიეწოდება, მობილიზებულია ტექნიკაც, თუმცა მდინარეში წყლის დონის მატების გამო სამუშაოების გაგრძელება ვერ ხერხდება. მეწყერი არსად განვითარებულა.“

გამგებლის თქმით, აღნიშნულ სოფლებში ამ წუთებშიც წვიმს.

28 ივნისს, ძლიერი წვიმის შედეგად, სტიქიამ მნიშვნელოვანი ზარალი მიაყენა ქედისა და შუახევის რამდენიმე სოფელს.

სახანძრო სამსახურის ცრუ გამოძახება – რეაგირებას პოლიცია მოახდენს

სახანანძრო სამსახური ბათუმის იუსტიციის სახლთან დღეს გამოიძახეს. ადგილზე მისულ სახანძრო სამსახურის ბრიგადას არც ხანძარი დახვდა და ვერც ის პირი იპოვეს, ვინც სახანძრო-სამაშველოს დახმარება სთხოვა. სახანძრო სამსახურში გვითხრეს, რომ ცრუ შეტყობინებაზე რეაგირებას პოლიცია მოახდენს.

„ცრუ შეტყობინება, როცა ადგილზე გადის სამაშველო სამსახური, ისჯება 500 ლარით, განმეორების შემთხვევაში – 1000 ლარით, ხოლო სისტემატური ხასიათის შეძენის დროს 15 დღიანი ადმინისტრაციული პატიმრობით” – ამბობს პაატა დიასამიძე, “ახალგაზრდა იურისტთა ასოაციაციის” იურისტი.

ადმინისტრაციულ-სამართალდარღვევათა კოდექსი ითვალისწინებს სანქციას მაშინაც, როცა სამაშველო სამსახურს 112-ზე იძახებს არასრულწლოვანი. ამ შემთხვევაში 100-დან 300 ლარამდე დაჯარიმდება არასრულწლოვნის მშობელი ან მისი კანონიერი წარმომადგენელი.

ბათუმის საკრებულოს დავალებები მერიას

ბათუმის საკრებულომ დღეს, 6 ივლისს გამართულ სხდომაზე, მერიას რამდენიმე დავალება მისცა. ერთ-ერთი – ქალაქში საცურაო აუზის მოწყობაა. ინიციატივა „თავისუფალ დემოკრატებს“ ეკუთვნოდათ და მას მხარი საკრებულოს წევრებმა დაუჭირეს.

„უმჯობესი იქნება თუკი აუზი მოეწყობა ქალაქის ცენტრალური ნაწილის და “ჭაობის” გსაგასაყარზე, ყველასთვის ხელმისაწვდომი რომ იყოს“ – ამბობს კობა ჩხეიძე ფრაქცია “თავისუფალი დემოკრატების” ხელმძღვანელი. საკრებულოს გადაწყვეტილებით, მერიამ გონივრულ ვადაში უნდა წარმოადგინოს საცურაო აუზის პროექტი და ხარჯთაღრიცხვა.

მერიამ ასევე უნდა მოამზადოს რეგულაცია, რომელიც გახმაურებელი K2 კოეფიციენტის გამოყენებაზე შეზღუდვას დააწესებს [ამ კოეფიციენტის მიხედვით, ქალაქის ზონებში განსაზღვრული მშენებლობის სიმაღლე შესაძლოა გაზარდოს ზონალურმა საბჭომ კონკრეტული ფორმულით, ხოლო უსაზღვროდ შესაძლოა გაიზარდოს აჭარის მთავრობის თავმჯდომარის, ეკონომიკის სამინისტროსა და პრემიერ-მინისტრის გადაწყვეტილებით].

„რესპუბლიკელების“ ინიციატივით, K2 კოეფიციენტის გამოყენების უფლება ბათუმში მხოლოდ მერიის ზონალურ საბჭოს და საკრებულოს ბიუროს უნდა შეეძლოს და საერთოდ აღარ უნდა არსებობდეს უფლება, რომელიც ქალაქის ზონის მიუხედავად, ნებისმიერი სიმაღლის შენობის აგების საშუალებას იძლევა.

„აქამდე ბათუმში ამ უფლებით მხოლოდ აჭარის მთავრობის თავმჯდომარე სარგებლობდა და საერთოდ რეგულაციის გარეშეა დარჩენილი სიმაღლის კონტროლი. ჩვენ მოვითხოვეთ მერიამ მოამზადოს შესაბამისი პროექტი და საკრებულო იმსჯელებს“ – ამბობს “ბათუმელებთან” თემურ ყურაშვილი, ფრაქცია “რესპუბლიკელების” თავმჯდომარე.

მშენებლობების კონტროლის კუთხით საკრებულომ დღევანდელ სხდომაზე კიდევ ერთი დავალება მისცა მერიას. „არსებობს არაერთი შეუსაბამობა ადგილობრივ და ცენტრალურ კანონმდებლობას შორის, რაც მშენებლობას უკავშირდება. გაცემული ნებართვების ნაწილი უკანონო გამოდის. ჩვენ ვთხოვთ მერიას, შემუშავდეს ცვლილებათა პროექტი, რომელიც ამ ხარვეზს გამოასწორებს” – უთხრა „ბათუმელებს“ კობა ჩხეიძემ, ფრაქცია „თავისუფალი დემოკრატების“ ხელმძღვანელმა. მის ამ ინიციატივას საკრებულომ მხარი დაუჭირა.

საქართველოს რომელ ზღვისპირა კურორტზე აპირებთ დასვენებას? [გამოკითხვა]

მიიღეთ მონაწილეობა „ბათუმელების“ გამოკითხვაში – საქართველოს რომელ ზღვისპირა კურორტზე აპირებთ დასვენებას? თითოეულ მონაწილეს შეუძლია ხმა მისცეს მხოლოდ ერთჯერ.

საქართველოს რომელ ზღვისპირა კურორტზე აპირებთ დასვენებას?

გამოკითხვა 2016 წლის 16 ივლისამდე გაგრძელდება.

“საერთაშორისო გამჭვირვალობა საქართველო” გონიოს მიწებზე – გადაწყვეტილება ბუნდოვანია

ბათუმის მუნიციპალიტეტის საკუთრების უფლების აღიარების კომისიის გადაწყვეტილება გონიოს მიწებზე დღეს “საერთაშორისო გამჭვირვალობა საქართველომ” შეაფასა. “კომისიამ მოქალაქეებს შეუქმნა ცრუ მოლოდინი იმისა, რომ შეამოწმებდა მათი საკუთრების უფლების გაუქმების კანონიერებას, სასამართლო გადაწყვეტილების არსებობის მიუხედავად. მართალია, კომისიას მოცემული ვალდებულება პირდაპირ კანონმდებლობით განსაზღვრული არ ჰქონდა, მაგრამ იმის გათვალისწინებით, რომ აღნიშული ადმინისტრაციული წარმოების მიზნად სწორედ 271 მოქალაქის განცხადების განხილვა წარმოადგენდა, კომისიას უნდა ემსჯელა თითოეულ განცხადებაზე ცალ-ცალკე.”

“საერთაშორისო გამჭვირვალობა საქართველო” კომისიის მიერ მიღებულ გადაწყვეტილებას ბუნდოვანს უწოდებს. ორგანიზაციაში გამოთქვამენ ეჭვს, რომ გამოცემული ოქმი პრობლემის მოგვარების ნაცვლად, ახალ სასამართლო დავებს გააქტიურებს.

საკუთრების უფლების აღიარების კომისია მერიას დაქვემდებარება. გადაწყვეტილება ბათუმის საკრებულომ დღეს, 6 ივლისს მიიღო. საკრებულოს იურისტის, სულიკო შვენთიძის განმარტებით, დაქვემდებარების შეცვლით კომისიის მუშაობაში არაფერი იცვლება და ეს მთავრობის განკარგულებასთან შესაბამისობაში მოყვანისთვის იყო აუცილებელი. საკრებულოს წევრებს ამ თემაზე კითხვა არ დაუსვამთ.

27 ივნისს, ბათუმის საკრებულოს მიწის საკუთრების აღიარების მუდმივმოქმედმა კომისიამ ბათილად გამოაცხადა ხელვაჩაურის საკუთრების კომისიის ის ოქმი, რომლის მიხედვითაც, გონიოში 271 ოჯახს მიწის საკუთრების უფლება 2010 წელს ჩამოართვეს.

რას გეგმავს მერია ნურიგელის ტბის გადასარჩენად

„კვლევით დადასტურდა, რომ ტბას პრობლემას უქმნის დელფინარიუმიდან ჩამდინარე ზღვის წყალი. ამან გამოიწვია შედეგი, რაც გვაქვს,” – აღნიშნა ეკოლოგმა არჩილ გუჩმანიძემ შეხვედრაზე, რომელიც დღეს მერიაში მოეწყო. ბათუმის მერი რამდენიმე ექსპერტს და ამ სექტორში მომუშავე არასამთავრობო ორგანიზაციებს შეხვდა. გიორგი ერმაკოვის თქმით, ნურიგელის ტბის გადასარჩენად ყველაფერი უნდა გაკეთდეს, მაგრამ მერიას უნდა ჰქონდეს კონკრეტული დასაბუთება, რის გაკეთებაა საჭირო.

სპეციალისტების თქმით, თუკი სწრაფად არ მოხდება რეაგირება, ტბას რამდენიმე დღეში ლაყე კვერცხის სუნი ექნება. „ფსკერზე არც ერთი ცოცხალი ორგანიზმი აღაა დარჩენილი, ყველაფერი დანახშირებულია“- თქვა არჩილ გუჩმანიძემ.

სპეციალისტების განმარტებით, ტბას თავდაპირველად სანიაღვრე არხი უერთდებოდა, რომლის გადაკეტვის შემდეგაც, მტკნარი წყლის ეკოსისტემა წარმოიქმნა, რაც დელფინარიუმიდან შემოსულმა მლაშე წყალმა გაანადგურა. არჩილ გუჩმანიძემ თავის გამოსვლაში ხაზი გაუსვა იმასაც, რომ დელფინარიუმიდან ზღვის წყლის ჩადინება ტბაში იყო დანაშაული. უპირველესი რეკომენდაცია, რაც სპეციალისტებმა გაააქტიურეს, დელფინარიუმის არხის ჩაკეტვაა, თუმცა მოახერხებს თუ არა ამას ტექნიკურად მერია, ჯერ უცნობია.

“ეს არის მოსაზრება, რაც მოვისმინეთ. თუკი მერია მიიღებს გადაწყვეტილებას, ტექნიკურად შესაძლებელია დელფინარიუმის წყალი ტბის ნაცვლად მიუერთდეს სანიაღვრე სისტემას და ზღვაში ჩავიდეს. ამ სისტემის მოწყობას ბუნებრივია დრო დასჭირდება” – ამბობს ბათუმელებთან” დავით ლეკვეიშვილი, ბათუმის დელფინარიუმის დირექტორი.

მერიამ მზადყოფნა გამოთქვა შეასრულოს სხვა რეკომენდაციები, როგორიაცაა ხელოვნური აერაცია, ანუ ტბის წყლის ჟანგბადით გამდიდრება და ტბაში თევზების გაშვება. სპეციალისტების მოთხოვნით, ასევე მკაცრად უნდა აკრძალოს თევზჭერა.

ბათუმის მერიამ დღვანდელ შეხვედრაზე პირობა დადო, რომ საზაფხულო სეზონის დასრულების შემდეგ ტბას ამოტუმბავენ და ზღვაში ჩაუშვებენ. ასეთ შემთხვევაში, ტბა გრუნტის ახალი, ბუნებრივი წყლით შეივსება და არსებული ეკოსისტემა სრულად გაჯანსაღდება.

ამავე თემაზე: დელფინარიუმი: ტბას, რომელიც ჩვენ გვეკუთვნის, პრობლემა არ აქვს

რას ედავებიან გიორგი პაპუაშვილს – აქცია საკონსტიტუციო სასამართლოსთან

როლანდ ბლადაძის ოჯახის წევრებმა და ნათესავებმა საკონსტიტუციო სასამართლოსთან მორიგი საპროტესტო აქცია გამართეს. ისინი გიორგი პაპუაშვილის სამოსამართლეო უფლებამოსილების შეჩერებას მოითხოვენ. როლანდ ბლადაძეს საცხოვრებელი ბინა გორგილაძის ქუჩაზე 2005 წელს ჩამოართვეს და იგი პრეზიდენტმა მიხეილ სააკაშვილმა 2007 წელს გადასცა სიმბოლურ ფასად – 1000 ლარად გიორგი პაპუაშვილს, საკონსტიტუციო სასამართლოს თავმჯდომარეს.

აქციის წევრების შეფასებით, გიორგი პაპუაშვილმა ჩაიდინა მოსამართლისთვის შეუფერებელი საქციელი, როცა ის უკანონიდ ჩამორთმეულ ბინაში გადავიდა საცხოვრებლად.

„მოვითხოვთ, რომ პაპუაშვილმა არ მოახდინოს გავლენა საქმის განმხილველ მოსამართლეზე [თბილისის საქალაქო სასამართლოში]. გიორგი პაპუაშვილი არ რეაგირებს ეკონომიკის და მდგრადი განვითარების სამინისტროსთან მასთან სადავო ქონების ირგვლივ წინადადების განხილვაზე. სასამართლომ სახელმწიფოს გიორგი პაპუაშვილთან მორიგებაზე დრო 8 ივლისამდე განუსაზღვრა. ის ცდილობს განუსაზღვრელი ვადით გაჭიანურდეს ეს პროცესი“ – უთხრა არჩილ კაიკაციშვილმა „ბათუმელებს“. ის როლანდ ბლადაძის ადვოკატია.

ამბობს თუ არა უარს მორიგებაზე გიორგი პაპუაშვილი, – საკონსტიტუციო სასამართლოს თავმჯდომარემ დღეს ამ თემაზე მედიასთან კომენტარი არ გააკეთა. 24 მარტს გიორგი პაპუაშვილმა “ბათუმელებს” უთხრა, რომ ბინა მან მიიღო, როგორც მოსამართლემ და თუ საკუთრების უფლება დაირღვა, ამაზე ბლადაძემ უშუალოდ სახელმწიფოს უნდა ედავოს და არა მას.

შავი ზღვის ჯაზფესტივალის 7 დღე ბათუმში – რას მოვუსმენთ

მის ლორინ ჰილი, მეისი გრეი, The Prodigy და სხვები წელს შავი ზღვის მეათე ჯაზფესტივალის ფარგლებში ქართველი მაყურებლის წინაშე წარსდგებიან. ფესტივალი 15-24 ივლისს ბათუმში გაიმართება. ბილეთების გაყიდვა უკვე დაიწყო.

შავი ზღვის ჯაზფესტივალის ფარგლებში კონცერტები 7 დღის განმავლობაში, ყოველ საღამოს, 20 საათზე, ბათუმის ჩოგბურთის კლუბში (ძირითადი სცენა) ჩატარდება. ასევე, კლუბ TAKE Five-ში ფესტივალის ფარგლებში გაიმართება მეისი გრეის დიჯეი სეტის, ნიქ ვესტის, DJ LOGIC & Friends-ისა და ქართველი მუსიკოსის – SALIO-ს (სალომე კორკოტაშვილი) კონცერტები.

გარდა ამისა, ბულვარის კოლონადებთან და ქალაქის სხვადასხვა ადგილზე, ბათუმელებსა და ბათუმის სტუმრებს საშუალება ექნებათ უფასოდ დაესწრონ BRASS BAND-ის კონცერტებს.

15 ივლისს ფესტივალს ქუინსი ჯონსი გახსნის პროექტით – QUINCY JONES & THE GLOBAL GUMBO ALL STARS. ამ პროექტის ფარგლებში მუსიკოსი ქართველ მსმენელს სამ არტისტს: რიჩარდ ბონას, ალფრედო როდრიგესსა და ჯეიკობ ქოლეირს წარუდგენს. ქუინსი ჯონსი მე-20 საუკუნის ერთ-ერთ ყველაზე მნიშვნელოვან და გავლენიან ჯაზის მუსიკოსად მიიჩნევა. 27 გრემის მფლობელი, ამერიკელი კომპოზიტორი, მესაყვირე და მუსიკალური პროდიუსერი, თავისი სამოცწლიანი კარიერის განმავლობაში თანამშრომლობდა ფრენკ სინატრასთან. იყო მაიკლ ჯექსონის არაერთი ალბომის პროდიუსერი.

16 ივლისს ბათუმში მსმენელის წინაშე 11 მუსიკოსისგან დაკომპლექტებული MILES ELECTRIC BAND-ი წარსდგება მუსიკოს ვინს უილბერნის ხელმძღვანელობით. ისინი მაილს დევისის ე.წ. „ელექტრონული პერიოდის” მუსიკას დაუკრავენ.

17 ივლისს ბათუმის ჩოგბურთის კლუბში ფესტივალის ერთ-ერთი ყველაზე ცნობილი მონაწილე, ამერიკელი მომღერალი, მსახიობი და პროდიუსერი მის ლორინ ჰილი იმღერებს, რომელიც 90-იანებში გახდა ცნობილი, რამდენიმე გრემის მფლობელი ჯგუფის Fugees-ის ვოკალისტის სახელით. ლორინ ჰილის მუსიკა რეპს, R&B-ს, სოულს და ნაწილობრივ რეგისაც აერთიანებს.
მუსიკოსი შავი ზღვის ჯაზფესტივალზე 17-კაციანი ბენდით წარსდგება.

წლევანდელ ფესტივალზე ჟანრობრივად ერთ-ერთი ყველაზე მოულოდნელი მონაწილე ბრიტანული ელექტრონული ჯგუფი The Prodigy 21 ივლისს ბათუმის ჩოგბურთის კორტებზე დაუკრავს.
ჯგუფი 90-იანებში გამოჩნდა მუსიკალურ ინდუსტრიაში და მალევე მოიპოვა Hardcore Dance Music-ის მეფეებისა და Big Beat-ის პიონერების სტატუსი. ჯგუფის მუსიკალური ჟანრი უდავოდ რთული შესაფასებელია, მარტივად რომ ვთქვათ, The Prodigy რეივის, ელექტროინდასთირიალის ბიგ-ბითისა და ელექტრონული როკმუსიკის ნაზავია. მათი ყველაზე ცნობილი სინგლებია: Smack my bitch up, Firestarter, Voodoo People, Breathe, Poison და სხვა. თუ The Prodigy-ის 2016 წელს ჩატარებული კონცერტების სეთლისტებით ვიმსჯელებთ, ისინი ბათუმშიც მათ ყველაზე ცნობილ ჰიტებს შეასრულებენ.

22 ივლისს ჯაზფესტივალზე ჯაზ-პოპმომღერალი და სიმღერების ავტორი – ჯეიმი კალუმი გამოვა, 23 ივლისს კი ამერიკელი მომღერალი, R&B-ისა და ჰიპ-ჰოპის შემსრულებელი ქრის ბრაუნი იმღერებს. ამავე დღეს ფესტივალის სტუმრების წინაშე ამერიკელი ბასისტი, კომპოზიტორი და მომღერალი ნიკ ვესტი წარსდგება. 24 წლის ნიკს უკვე აქვს ისეთ ცნობილ შემსრულებლებთან დაკვრის გამოცდილება, როგორებიც “პრინცი”, ჯონ მაიერი და მარკუს მილერი არიან.

ფესტივალს 24 ივლისს სოულის ამერიკელი შემსრულებელი და კომპოზიტორი მეისი გრეი დახურავს, რომელიც ამავე ფესტივალის ფარგლებში ბათუმში 2011 წელსაც იყო ჩამოსული.

ჯაზფესტივალის თითოეულ დღეზე დასასწრები ბილეთი 50 ლარი ღირს. 21-დან 24 ივლისის ჩათვლით კონცერტებზე დასწრების აბონიმენტის ფასი კი 180 ლარია. ბათუმში ბილეთების შეძენა ჩოგბურთის კორტებზე ან ვებგვერდზე – TKT.GE-ზეა შესაძლებელი.

ფესტივალის ორგანიზატორების ცნობით, ბათუმის ჩოგბურთის კლუბში 7000 ადამიანი ეტევა და ამ დროისთვის გასაყიდი ბილეთების მარაგი ჯერ არც ერთ შემსრულებელზე არ არის ამოწურული. ყველაზე მეტი ბილეთი კი The Prodigy-ის კონცერტზეა გაყიდული.

უსკოს ახალი თავმჯდომარე მუშაობას შეუდგა

6 ივლისიდან აჭარის უმაღლეს საარჩევნო კომისიას [უსკო] ახალი თავმჯდომარე, პარმენ ჯალაღონია უხელმძღვანელებს. პარმენ ჯალაღონია აჭარის უმაღლესმა საბჭომ უსკოს თავმჯდომარის თანამდებობაზე 5 ივლისს 11 ხმით აირჩია.

პარმენ ჯალაღონია უსკოს დღეს უმაღლესი საბჭოს თავმჯდომარემ, ავთანდილ ბერიძემ წარუდგინა. დღესვე შეუდგა მუშაობას უსკოს ახალი წევრი სოფიო კახაძე, რომელიც ასევე 5 ივლისს აირჩია უმაღლესმა საბჭომ.

ამავე თემაზე:

„არც ერთ პარტიას არ მივეკუთვნები“ – ინტერვიუ უსკოს თავმჯდომარეობის კანდიდატთან

ბოტანიკურ ბაღში მცხოვრებ ოჯახებს ბინებით მერია დააკმაყოფილებს

ბათუმის ბოტანიკურ ბაღში მცხოვრებ ოჯახებს ბინებს მერია გადასცემს. ამის შესახებ დღეს, 6 ივლისს, ეგარსლან ლომიძემ, მერიის ეკონომიკური განვითარების სამსახურის უფროსმა თქვა. მას საკრებულის სხდომაზე საკრებულოს წევრმა „თავისუფალი დემოკრატებიდან“ ჯაბა ბერიძემ ჰკითხა, რას უპირებენ იმ 11 ოჯახს, რომლებიც დღემდე ბოტანიკური ბაღის ტერიტორიაზე ცხოვრობენ. ლომიძის განმარტებით, მერიამ 2010 წელს აღწერა ოჯახები, რაც არაზუსტი იყო და მიმდინარეობს მუშაობა, რომ ის ოჯახები, ვინც ფონდი „ქართუს“ მიერ აშენებულ კორპუსში, ლერმონტოვის ქუჩაზე, ვერ მიიღეს ბინა, ახლა დაკმაყოფილდნენ საცხოვრებელი ფართობებით.

„ფონდი „ქართუ“ დაჰპირდა მაშინ 40-მდე ოჯახს, რომ ისინი საცხოვრებელ ბინებს მიიღებდნენ ქალაქის ტერიტორიაზე ბაღის დატოვების სანაცვლოდ. ეს ოჯახები იქ ათეული წლებია ცხოვრობს. აღწერის შემდეგ გაფართოვდა ზოგიერთი ოჯახი, ასევე ზუსტად არ იყო აღწერილი ფართობები. ამიტომ, ეს 11 ოჯახი, ვინც დღემდე ბაღის ტერიტორიაზე ცხოვრობს, უნდა დაკმაყოფილდეს საბინაო ფონდიდან,“ – უთხრა ეგარსლან ლომაძემ „ბათუმელებს“.

უშუალოდ ფონდი „ქართუ“ ბათუმის ბოტანიკურ ბაღში მთელი რიგი პროექტების განხორციელებას გეგმავს.

33 ახალი ქუჩა ბათუმში და მოსალოდნელი ექსპროპრიაცია

ბათუმის საკრებულომ ქალაქში ახალი ქუჩების მოწყობის შესახებ მიიღო გადაწყვეტილება. საუბარია ადლიის დასახლებაში 33 ქუჩის გაყვანაზე, ასევე არსებული ქუჩების გაფართოებასა და კეთილმოწყობაზე.

„პროექტის შესადგენად დაიხარჯა 80 ათასი ლარი. ქუჩების სიგანე დაახლოებით 11 მეტრი იქნება. ჩვენ გთავაზობთ საბოლოო ვარიანტს,“ – მიმართა საკრებულოს ბათუმის მერიის არქიტექტურის სამსახურის უფროსმა, ირაკლი ახალაძემ.

ქუჩების გაყვანამდე შემდეგი ეტაპი კომისიის შექმნა იქნება, რომელმაც მოსახლეობასთან უნდა აწარმოოს მოლაპარაკებები და საჭიროების შემთხვევაში ექსპროპრიაციის ანუ ქონების ჩამორთმევის წესს მიმართოს.

კენჭისყრამდე ირაკლი ახალაძეს ფრაქცია „თავისუფალი დემოკრატების“ ხელმძღვანელმა, კობა ჩხეიძემ ჰკითხა, რატომ არ განიხილა ეს საკითხი ზონალურმა საბჭომ. მთავარი არქიტექტორის თქმით, ქუჩების გაყვანის პროექტირება ამას არ საჭიროებდა.

არჩილ ხაბაძემ თანამდებობა დატოვა

აჭარის მთავრობის თავმჯდომარემ, არჩილ ხაბაძემ თანამდებობა დატოვა.

„ჩვენ პოლიტიკურ გუნდთან კონსულტაციებისა და მსჯელობის საფუძველზე მივიღეთ გადაწყვეტილება, ოთხწლიანი მოღვაწეობის შემდეგ, დავტოვო აჭარის ავტონომიური რესპუბლიკის მთავრობის თავმჯდომარის პოსტი და ახალ ამპლუაში განვაგრძო ქვეყნისა და რეგიონის სამსახურში ყოფნა. პოსტის დატოვების შემდეგ აქტიურად ჩავერთვები „ქართული ოცნების“ წინასაარჩევნო პროცესებში… მინდა მადლობა გადავუხადო აჭარის მოსახლეობას და ქვეყნის ცენტრალურ ხელისუფლებას გამოცხადებული ნდობისათვის. წარმატებას ვუსურვებ აჭარის ავტონომიური რესპუბლიკის მომავალ თავმჯდომარეს,“ – განაცხადა არჩილ ხაბაძემ დღეს გამართულ ბრიფინგზე.

მან თანამდებობიდან წასვლის შესახებ განცხადების შემდეგ სწრაფად დატოვა დარბაზი და არ უპასუხა ჟურნალისტების შეკითხვებს.

აჭარის მთავრობის თავმჯდომარის გადადგომის შედეგად აჭარის ოთხივე მინისტრი ავტომატურად უნდა გადადგეს. მინისტრების მოადგილეებს კი უფლებამოსილება უწყდებათ ახალი მინისტრის დანიშვნისთანავე.

წინასწარ გავრცელებული ინფორმაციით, არჩილ ხაბაძეს დიპლომატი, საქართველოს ელჩი ყაზახეთში, ზურაბ პატარაძე ჩაანაცვლებს. მასთან შეხვედრა უკვე ჰქონდათ აჭარის უმაღლესი საბჭოს ფრაქცია „ქართული ოცნების“ წევრებს.

არჩილ ხაბაძემ აჭარის მთავრობის თავმჯდომარის პოსტზე სამი წელი და 8 თვე იმუშავა. მანამდე იგი “ქართუ ბანკის” აჭარის ფილიალის ხელმძღვანელი იყო.

ამავე თემაზე:
არჩილ ხაბაძის პოლიტიკური ფასი
წინასაარჩევნო „კოსმეტიკური ცვლილებები“ აჭარის მთავრობაში

არჩილ ხაბაძე გადადგომის შესახებ განცხადებას გააკეთებს

აჭარის მთავრობის პრესსამსახურის ინფორმაციით, დღეს, 6 ივლისს, 11 საათზე, აჭარის მთავრობის თავმჯდომარე, არჩილ ხაბაძე გამართავს ბრიფინგს და გააკეთებს განცხადებას მისი თანამდებობიდან გადადგომის შესახებ.

5 ივლისს, აჭარის მთავრობის სხდომის შემდეგ, მთავრობის თავმჯდომარემ თანამდებობიდან შესაძლო გაგადგომის შესახებ ჟურნალისტების კითხვებს უპასუხა.

აჭარის მთავრობის თავმჯდომარის არჩილ ხაბაძის გადადგომის შემთხვევაში, კანონით, აჭარის ოთხივე მინისტრი ავტომატურად უნდა გადადგეს. მინისტრების მოადგილეებს კი უფლებამოსილება უწყდებათ ახალი მინისტრის დანიშვნისთანავე.

აჭარაში, რამდენიმე დღეა დადასტურებულად საუბრობდნენ იმაზე, რომ უახლოეს დღეებში აჭარის მთავრობის თავმჯდომარე არჩილ ხაბაძე გადადგებოდა. გავრცელებული ინფორმაციით, არჩილ ხაბაძეს დიპლომატი, საქართველოს ელჩი ყაზახეთში, ზურაბ პატარაძე ჩაანაცვლებს.

გუშინ, 5 ივლისს, აჭარის მთავრობის თავმჯდომარის არჩილ ხაბაძის იმპიჩმენტის პროცედურის დაწყებას უმაღლესმა საბჭომ მხარი არ დაუჭირა. შვიდი მომხრე და რვა წინააღმდეგი – ასეთი იყო კენჭისყრის შედეგი.

მოწამვლის შვიდი შემთხვევა ბათუმში “შემოიხედე გენაცვალე”-ში სტუმრობის შემდეგ

ბათუმში დღეს, 5 ივლისს, 7 ადამიანი მოიწამლა რესტორან “შემოიხედე გენაცვალეში” სტუმრობის შემდეგ – ინფორმაცია “ბათუმელებს” აჭარის საზოგადოებრივი ჯანდაცვის ცენტრში დაუდასტურეს.

“ჩვენი ინფორმაციით, შუადღეზე ორმა ადამიანმა მიმართა ინფექციურ საავადმყოფოს მოწამვლის ნიშნებით, საღამოს კი ხუთი ადამიანი გადაიყვანა “შემოიხედე გენაცვალედან” სასწრაფო დახმარების მანქანამ. პაციენტების მდგომარეობა საშუალო სიმძიმისაა,” – განუცხადა “ბათუმელებს” კობა ნაკაიძემ, აჭარის საზოგადოებრივი ჯანდაცვის ცენტრის ხელმძღვანელმა.

კობა ნაკაიძე ამბობს, რომ პაციენტების ნაწილმა “შემოიხედე გენაცვალეში” ხინკალი მიირთვა, თუმცა აბსოლუტურად ყველა მათგანმა მიირთვა სალათი “ცეზარი”. “თვითონაც აღნიშნეს, გემო არ მოგვეწონა, მაგრამ მაინც ჭამეს, რატომღაც,” – აღნიშნა კობა ნაკაიძემ.

მისივე თქმით, ამჟამად იღებენ ანალიზებს და საზოგადოებრივი ჯანდაცვის ცენტრის გარდა საკითხზე მუშაობს აჭარის სურსათის უვნებლობის სამსახური, რომელიც რესტორანში ამოწმებს საკვებ პროდუქტებს.

ყოფილი ჩინოვნიკი და „ოცნების“ შემწირველი ბათუმის ბულვართან მიწის ნაკვეთს ითხოვს

დაახლოებით ერთი თვის წინ დაფუძნებული კომპანია „ეიბიეს ფრივილიჯ ქლაბ რიზორთს“ ბათუმში, რუსთაველის ქუჩაზე სასტუმრო „ჰილტონის“ მიმდებარედ 100-ნომრიანი სასტუმროს მშენებლობასა და 50-მილიონიანი ინვესტიციის განხორციებას გეგმავს. კომპანიის მეპატრონე, საქართველოს ფინანსთა სამინისტროს შემოსავლების სამსახურის ფოთის რეგიონული ცენტრის ყოფილი უფროსი და „ქართული ოცნების“ შემწირველია. მან „ქართულ ოცნებას“ 2014 წელს 20 000 ლარი შეწირა. ქონების აჭარის მთავრობისთვის უსასყიდლოდ გადაცემის საკითხს ხვალ, 6 ივნისს, ბათუმის საკრებულოს სხდომაზე განიხილავენ. მიწის ნაკვეთს კი მთავრობა შემდგომში ინვესტორს გადასცემს.

დაინტერესდებიან თუ არა საკრებულოს წევრები რა სახსრებითა და გამოცდილებით გეგმავს ერთი თვის წინ დაფუძნებული კომპანია მაღალი კლასის სასტუმროს მშენებლობას ბათუმში, ეს 6 ივნისს, საკრებულოს სხდომაზე გამოჩნდება.

IMG_20160705_210241 — მიწის ნაკვეთი, რომელსაც აკაკი სონგულია აჭარის მთავრობისგან და ბათუმის მერიისგან ითხოვს

ბათუმის დელფინარიუმთან, „ჰილტონის“ მიმდებარედ, სასტუმროს აშენების იდეაზე წინა მთავრობის ყოფილმა მაღალჩინოსანმა აკაკი სონგულიამ, აჭარის მთავრობის თავმჯდომარეს არჩილ ხაბაძეს და ბათუმის მერს გიორგი ერმაკოვს წერილობით აცნობა და წინადადების განხილვა სთხოვა.

ამ წერილის მიხედვით, ინვესტორს აღნიშნული მიწის ნაკვეთის შეძენა პირდაპირი წესით, 1 კვ/მ-ის 300 აშშ დოლარად სურს [ჯამში 3263 კვ/მ] და ძირითად პირობასთან ერთად ინვესტორი მთავრობას სხვა ვალდებულებების აღებასაც ჰპირდება.
მიწის ნაკვეთის ათვისებასთან დაკავშირებით ინვესტორის წინადადების განხილვაზე მოსაზრების დაფიქსირების თხოვნით ბათუმის მერიას, როგორც ქონების მესაკუთრეს, თავის მხვრივ აჭარის ფინანსთა და ეკონომიკის სამინიტრომაც მიმართა. საპასუხო წერილში ჩანს, რომ ბათუმის მერი თანახმაა იმ პირობით, რომ მიწის ნაკვეთის საპრივატიზებო თანხის მთლიანი ოდენობა – 978 900 ამერიკული დოლარი კომპანიის მიერ ჩაირიცხება ბათუმის მუნიციპალიტეტის ბიუჯეტში.

საკრებულომ აღნიშნულ საკითხთან დაკავშირებით განკარგულების პროექტი უკვე მოამზადა, რომელსაც სხდომაზე უყრიან კენჭს.
რეესტრის მონაცემების მიხედვით კომპანია „ეიბიეს ფრივილიჯ ქლაბ რიზორთს“ 2016 წლის 8 ივნისს ქუთაისშია დაფუძნებული. კომპანიის იურიდიულ მისამართად კი მეპატრონის სახლის მიმსარათი – ქუთაისი, მ. კოსტავას ქ., № 63 – ია მითითებული. კომპანიის 100% წილის მფლობელი და დირექტორი ყოფილი მაღალჩინოსანი და „ქართული ოცნების“ ერთ-ერთი მსხვილი შემწირველი, აკაკი სონგულიაა.

რეესტრის მონაცემებით აკაკი სონგულია კიდევ ერთი კომპანიის „სოლუშენს ვესტ“ – ის მეწილედ ფიქსირდება, ის ამ კომპანიის 40%-ს ფლობს, კომპანია 2011 წელსაა დაფუძნებული. ამ წელს ჩააბარა სონგულიამ ბოლოს ქონებრივი დეკლარაცია, როგორც თანამდებობის პირმა. მის მიერ შევსებული ქონებრივი დეკლარაციის მიხედვით, იმ დროისთვის, ის და მისი ოჯახის წევრები მნიშვნელოვან ფულად დანაზოგს არ ფლობდნენ.

IMG_20160705_210124 — ტერიტორია, რომლის გასხვისების ბედი ბათუმის საკრებულომ უნდა გადაწყვიტოს

ინვესტორის წერილის მიხედვით, ნებართვის მიღების შემთხვევაში, ის ააშენებს ასნომრიან სასტუმროს, სადაც განთავსდება მაღალი კლასის ნომრები, რეზიდენსები, საცურაო აუზი, საკონფერენციო დარბაზი, რესტორანი, კაფე-ბარი, სატრენაჟორო და სხვა… ხოლო სასტუმროს მართვას განახორციელებს საერთაშორისო ბრენდის მქონე ოპერატორი, რომელიც არის მსოფლიოს მასშტაბის სასტუმროების ფრენჩაიზორი.

ამ წერილებში და არც განკარგულების პროექტში, არ არის საუბარი იმაზე თუ კონკრეტულად რომელ ოპერატორთან აქვს შეთანხმება ინვესტორ სონგულიას.

სონგულია პირობას დებს, რომ სასტუმროს მშენებლობის დასრულება და ექპლუატაციაში გაშვება განხორციელდება ხელშეკრულების დადებიდან 5 წლის ვადაში.

ბათუმის საკრებულოს თანხმობის შემთხვევაში კომპანია ასევე გამოთქვამს მზადყოფნას გასწიოს ხარჯები აჭარის მაღლმთიანეთის სათხილამურო კურორტ „გოდერძის“ განვითარებისთვის. განმარტებით ბარათში ასევე ნათქვამია, რომ აჭარის მთავრობის მიერ გამოყოფილ ადგილას კომპანია მოაწყობს საზოგადოებრივი დანიშნულების კვების ობიექტს, ბავშვთა გასართობ სივრცეს და ღია სპორტულ მოედანს რომელზეც ზამთრის სეზონზე შესაძლებელი იქნება საციგურაო მოედნის მოწყობა, ხოლო დანარჩენი დროის პერიოდში საფეხბურთო, საკალათბურთო და სხვა თამაშების ორგანიზება.

ქობულეთის გამგებელი: სისულელეა, თითქოს პანსიონში არ უშვებდნენ ვინმეს

„ვიცოდი, რომ ოჯახებს უნდა ეცხოვრათ ლერმონტოვის 13-ში. შემდეგ აღმოჩნდა, რომ პანსიონი იხსნებოდა. როცა მივედი, მოსახლეობა იქ იდგა. მითხრეს, ხომ ხედავთ, თქვენც მოგატყუეს, ბატონო გამგებელოო,“ – უთხრა მოსამართლეს ქობულეთის გამგებელმა სულხან ევგენიძემ. მან დღეს ქობულეთის პანსიონის საქმეზე მოწმის სახით ჩვენება მისცა.

საუბარია 2014 წლის სექტემბერში მომხდარ ინცინდენტზე, როდესაც მუსლიმურ პანსიონთან ადგილობრივმა მოსახლეობამ ბარიკადები მოაწყო და პანსიონის კარზე ღორის თავი მიაჭედა. სასამართლოში „ქართველ მუსლიმთა ერთობის“ ინტერესებს „ადამიანის უფლებების სწავლებისა და მონიტორინგის ცენტრი“ იცავს.

ორგანიზაციის ხელმძღვანელმა, თამთა მიქელაძემ, გამგებელს ჰკითხა: „როცა იქ შეხვდით ქრისტიანებს და მოისმინეთ მათი შეხედულებები, შეხვდით თუ არა მუსლიმანებს?“

„ვიცი, საითკენაც მიგყავთ საუბარი… ღორის მიჭედების დროს მე ქალაქში არ ვიმყოფებოდი, – უპასუხა გამგებელმა თამთა მიქელაძეს, – როცა მივედი, ვნახე, რომ ხალხი აპროტესტებდა პანსიონის გახსნას. სისულელეა, თითქოს პანსიონში ვინმეს არ უშვებდნენ, პირიქით, ადგილობრივი მოსახლეობა საჭმელსაც უზიდავდა იმ პირებს, ვინც პანსიონში იყო. რისთვის დავდიოდი აქეთ-იქით ამდენს? ჩემი მიზანი იყო, ორივე მხარე ყოფილიყო კმაყოფილი“.

„პანსიონის გახსნა არღვევდა რომელიმე კანონს?“ – იკითხა ისევ თამთა მიქელაძემ.

„არ ვიცი, გეთქვათ წინასწარ და მოვემზადებოდი, თუ ეს შეკითხვა გქონდათ“, – აღნიშნა გამგებელმა. მან ასევე ვერ დააკონკრეტა, რის გამო ეშლება ხელი დღემდე მუსლიმ მრევლს პანსიონის გახსნაზე. გამგებელმა თქვა, რომ მხარეები და თვითონაც სასამართლოს გადაწყვეტილებას ელოდება [საქართველოს კანონმდებლობით, რელიგიური პანსიონის გახსნას რომელიმე უწყების ნებართვა არ სჭირდება].

ბათუმის საქალაქო სასამართლომ „ქობულეთის პანსიონის საქმეზე“ სავარაუდო დისკრიმინაციაზე უნდა მიიღოს გადაწყვეტილება. ფაქტის დადასტურების შემთხვევაში, ადგილობრივ მოსახლეობას, ვინც პანსიონში შესვლას უკრძალავდა ადამიანებს, მორალური კომპენსაცია დაეკისრებათ. კომპენსაციის გადახდა დაეკისრება შინაგან საქმეთა სამინისტროსაც, რომელსაც სარჩელში ავტორები უმოქმედობასა და დისკრიმინაციულ მოპყრობაში ადანაშაულებენ.

„გაუგებარია, რა კავშირი აქვს სასამართლოს გადაწყვეტილებას პანსიონის გახსნასთან. მუსლიმ მრევლს ისევ არ აძლევენ ლერმონტოვის 13-ში შესვლის საშუალებას. იქ ამჟამად არაა ბარიკადები, მაგრამ მოსახლეობამ ადგილზე გასულ მოსამართლესაც უთხრა, რომ იქ პანსიონის გახსნის საშუალებას არავის მისცემენ,“ – ამბობს „ბათუმელებთან“ თამთა მიქელაძე.

ქობულეთის გამგებელს შეკითხვა შინაგან საქმეთა სამინისტროს იურისტმაც დაუსვა: „იყო თუ არა იქ ისეთი შეხლა-შემოხლა, დაპირისპირება, რაც საჭიროებდა პოლიციის ჩართვას?“.

„არა, პირიქით, ჩვენ პოლიციას ვთხოვეთ, რომ რაიმე პროვოკაციას რომ არ ჰქონოდა ადგილი, ემორიგევათ შენობასთან“, – განაცხადა სულხან ევგენიძემ.

ამ საქმეში შსს-ს „ადამიანის უფლებების სწავლების და მონიტორინგის ცენტრი“ უმოქმედებას და პოზიტიური ვალდებულების შეუსრულებობას ედავება. „ეს არის უმოქმედობის პოლიტიკა განსაკუთრებით მუსლიმი თემის მიმართ. მაინცადამაინც შეხლა-შემოხლას არ უნდა ჰქონდეს ადგილი, რომ პოლიცია რეაგირებდეს და დაიცვას ადამიანის უფლებები. მიუხედავად იმისა, რომ ადამიანებს ავიწროვებდნენ, ამცირებდნენ თავისი რელიგიური მრწამსის გამო, პოლიციელებს სიტყვიერი გაფრთხილებაც არ გამოუყენებიათ“ – თქვა თავის დასკნით სიტყვაში თამთა მიქელაძემ. მან ხაზი გაუსვა იმასაც, რომ 2013 წელს, როცა ეს ინციდენტი მოხდა, კიდევ შვიდი კონფლიქტი დაფიქსირდა, რაც რელიგიურ ნიადაგზე მოხდა და არცერთი შემთხვევა დღემდე შსს-ს არ გამოუძიებია: „დღემდე მიმდინარეობს იგივე ქობულეთის პანსიონის საქმის გამოძიება, მაგრამ საქმე დაუსრულებელია. აღსანიშნავია, რომ დაზარალებულები დაკითხეს მას შემდეგ, როცა სასამართლო პროცესი დაიწყო. შინაგან საქმეთა სამინისტროს ეს მიდგომა არის დისკრიმინაციული“.

დაცვის მხარემ დასკვნით სიტყვაში მთავარი აქცენტი არაადამიანურ მოპყრობაზე გააკეთა, რომელიც ევროპული სტანდარტების მიხედვით მოიაზრებს ადამიანის დამცირებას, საქმიანობის ხელშეშლას, მისთვის ფსიქოლოგიური ტრავმის მიყენებას. „ადამიანის უფლებათა სწავლების და მონიტორინგის ცენტის“ შეფასებით, ღორის თავის მიჭედება მუსლიმური პანსიონის კარზე, ყველაზე შეურაცხმყოფელი და დამამცირებელი მოპყრობა იყო.

დაცვის მხარემ მაგალითად მოიყვანა ევროპის ადამიანის უფლებათა დაცვის სასამართლოს გადაწყვეტილებაც იეჰოვას მოწმეების 2004 წელს თბილისში შევიწროვების შესახებ, სადაც აღინიშნულია რომ „პოლიციამ თავისი უმოქმედობით, საქმის გამოუძიებლობით შექმნა და წაახალისა დაუსჯელობის სინდრომი“.

სასამართლო მორიგ სხდომაზე მოპასუხე მხარის დასკვნით სიტყვებს მოისმენს. მოსამართლე ხათუნა ბოლქვაძე ამ საქმეზე გადაწყვეტილებას, სავარაუდოდ, აგვისტოში გამოიტანს.

არჩილ ხაბაძე თანამდებობიდან წასვლის შესახებ

დღეს, 5 ივლისს, აჭარის მთავრობის სხდომის შემდეგ მთავრობის თავმჯდომარემ თანამდებობიდან შესაძლო გაგადგომის შესახებ ჟურნალისტების კითხვებს უპასუხა. ხაბაძის თქმით, განიხილება მისი წასვლის და მთავრობის თავმჯდომარედ საქართველოს ელჩის ყაზახეთში ზურაბ პატარაძის კანდიდატურა, თუმცა გადაწყვეტილი არაფერია. მთავრობის თავმჯდომარის თქმით, შესაძლოა ის უმაღლესი საბჭოს არჩევნებში სიის სათავეში ვიხილოთ.

„ჯერ მე არ მითხვამს, რომ მივდივარ. მიდის მსჯელობები და თუ კონსულტაციების შედეგად გადაწყვეტილება იქნა მიღებული ახლო პერიოდში გეცნობებათ ამის შესახებ. ჩემი სხვაგან გადასვლის შემთხვევაშიც ერთმნიშვნელოვნად ფიქსირდება, რომ ვრჩები გუნდში. ჯერ არ ვიცი სად ვიქნები, მაგრამ არის ვერსია, რომ გუნდის ყველა წევრი, რომელიც გააძლიერებს ჩვენს გუნდს, ჩვენს პარტიას, რომელიმე პოზიციას, იქ უნდა გაუკეთოს რეალიზაცია თავის თავს.

მიდის კონსულტაციები მე დავტოვებ პოზიციას და გადავალ სხვაგან, თუ სხვაგან სხვა იმუშავებს. ჩვენ აქტიურად მოვემზადებით საარჩევნო პროცესისთვის, იმ გამოწვევებისთვის რაც მოცემულ შემთხვევაში გვაქვს. ჩვენ ძალიან ბევრი გავაკეთეთ ამ ოთხი წლის განმავლობაში და ამას აუცილებლად წარმოვაჩენთ, არავის მივცემთ უფლებას, რომ დისკრედიტაცია გაუკეთოს დღევანდელ მთავრობას. მათ ვისაც ამაზე პრეტენზია აქვთ, ამდენი არ გაუკეთებიათ ჩვენი რეგიონისთვის. შესაბამისად, ჩვენ გადავერთვებით საარჩევნო პროცესებზე. ეს იქნება არჩილ ხაბაძე, ჭეიშვილი, სურმანიძე თუ სხვა, ეს იქნება გუნდის გაძლიერება.
ამ გუნდში ვინ სად იქნება, ეს გადაწყდება რამდენიმე დღეში. შესაძლებელია დავრჩე ამ პოზიციაზე, შესაძლებელია სათავეში ჩავუდგე უმაღლესი საბჭოს სიას, შესაძლებელია პარლამენტში მოვხვდე გამსვლელ სიაში, ან სხვა პოზიციებზე. უახლოეს პერიოდში გეცოდინებათ.

რაც შეეხება პატარაძეს. ის არის ჩვენი კუთხის შვილი, გამოცდილი დიპლომატი და პროფესიონალი თავისი საქმის და მისი ცოდნა და კომპეტენცია არის გამოსაყენებელი. როგორ იქნება მისი რესურსი გამოყენებული ამასაც დამატებით გაცნობებთ. მთავარია რომ ჩვენ ერთი გუნდი ვართ.“ – განაცხადა არჩილ ხაბაძემ სხდომის შემდეგ.

თემურ კახიძე პოლიტიკიდან მიდის: კმაყოფილი ვარ ჩემი მოღვაწეობით

„მე კმაყოფილი ვარ ჩემი მოღვაწეობით უმაღლეს საბჭოში. მინდა, რომ ჩემი ცხოვრების მომდევნო ეტაპი ბიზნესი იყოს“ – აცხადებს უმაღლესი საბჭოს წევრი ფრაქცია „თავისუფალი დემოკრატებიდან“ თემურ კახიძე.

დეპუტატი მომავალ არჩევნებამდე დეპუტატის სტატუსს შეინარჩუნებს, არჩევნებში მონაწილეობას კი აღარ აპირებს. ის გამორიცხავს დაპირისპირებას ან უთანხმოებას პარტიის შიგნით.

„ბათუმელების“ კითხვაზე, თუ რა ბიზნესს აპირებს დეპუტატი, თემურ კახიძემ გვიპასუხა: „მემკვიდრეობით მიღებული ტერიტორიები მაქვს და კონკრეტული გეგმები უნდა განვახორციელო“.

თემურ კახიძე 2012 წელს გახდა აჭარის უმაღლესი საბჭოს წევრი – ხელვაჩაურის მაჟორიტარი, კოალიცია „ბიძინა ივანიშვილი – ქართული ოცნებადან“. 2013 წლიდან იგი აჭარის უმაღლეს საბჭოშო საკონსტიტუციო, იურიდიულ და საპროცედურო საკითხთა კომისიის თავმჯდომარეა.

ბათუმში, გორგილაძის ქუჩაზე, ბავშვს მანქანა დაეჯახა

ბათუმში, გორგილაძის ქუჩაზე, რამდენიმე წუთის წინ, ავტოსაგზაო შემთხვევა მოხდა. თვითმხილველის თქმით, ქუჩაში მიმავალ დაახლოებით 9 წლის ბავშვს ავტომანქანა დაეჯახა.

ბათუმის სასწრაფო სამედიცინო სამსახურის ინფორმაციით, დაზარალებული, „რომლის მდგომარეობა მძიმე არ უნდა იყოს“, ანგისაზე მდებარე დედათა და ბავშვთა ჯანმრთელობის დაცვის რესპუბლიკურ ცენტრში გადაიყვანეს.

შინაგან საქმეთა სამინისტროს პრესსამსახურის ინფორმაციით, აღნიშნულ ფაქტთან დაკავშირებით დაწყებულია გამოძიება სისხლის სამართლის კოდექსის 276-ე მუხლის პირველი ნაწილით, რაც ტრანსპორტის მოძრაობის უსაფრთხოების ან ექსპლუატაციის წესის დარღვევას გულისხმობს.

276-ე მუხლის პირველი ნაწილი: „ავტომობილის, ტრამვაის, ტროლეიბუსის, ტრაქტორის ან სხვა მექანიკური ტრანსპორტის მოძრაობის უსაფრთხოების ან ექსპლუატაციის წესის დარღვევა იმის მიერ, ვინც ამ სატრანსპორტო საშუალებას მართავს, რამაც გამოიწვია ჯანმრთელობის ნაკლებად მძიმე დაზიანება, -ისჯება ჯარიმით ან თავისუფლების შეზღუდვით ვადით სამ წლამდე ანდა თავისუფლების აღკვეთით იმავე ვადით, თანამდებობის დაკავების ან საქმიანობის უფლების ჩამორთმევით ვადით სამ წლამდე ან უამისოდ“.

შენიშვნა: როგორც მოგვიანებით „ბათუმელებს“ დედათა და ბავშვთა ჯანმრთელობის დაცვის რესპუბლიკური ცენტრიდან აცნობეს, დაზარალებულის მდგომარეობა მძიმეა და ის რეანიმაციულ განყოფილებაშია მოთავსებული. საავადმყოფოში „ბათუმელებს“ ასევე განუცხადეს, რომ ბავშვი 13 წლისაა.

„ჭკვიანი“ შპრიცები ინფექციური დაავადებების პრევენციისთვის

შპრიცებისა და ნემსების ინექციისთვის ხელმეორედ გამოყენება მსოფლიოს მასშტაბით უამრავ ადამიანს აავადებს სიცოცხლისთვის საშიში ინფექციებით. გამონაკლისი არც საქართველოა. გამოყენებული შპრიცების გაზიარების პრაქტიკა, ძირითადად, ინექციური ნარკოტიკის მომხმარებელშია გავრცელებული, თუმცა ცნობილია, რომ ნემსის შემთხვევით ჩხვლეტის გამო სხვადასხვა ინფექციით მედპერსონალიც ინფიცირდება. სწორედ ამიტომ ჯანმრთელობის მსოფლიო ორგანიზაცია [ჯანმო], სპეციალური – „ჭკვიანი“ შპრიცების გამოყენების რეკომენდაციას იძლევა, რომელთა ხელმეორედ გამოყენება, სპეციალური მექანიზმის გამო – ფიზიკურად შეუძლებელია.

ნარკოტიკის მოხმარებასთან დაკავშირებული სარისკო ქცევის კვლევის თანახმად, რომელიც გასულ წელს საერთაშორისო ფონდმა „კურაციომ“ ჩაატარა, გამოკითხულ 2037 ინექციური ნარკოტიკის მომხმარებელთა 50%-ზე მეტს – ცხოვრებაში ერთხელ მაინც აქვს გამოყენებული სხვის მიერ ადრე ნახმარი ნემსი/შპრიცი. შვიდი ქალაქიდან [თბილისი, გორი, თელავი, ზუგდიდი, ბათუმი, ქუთაისი, რუსთავი] ეს პროპორცია ყველაზე მაღალი ზუგდიდში (63.4%) აღმოჩნდა.

მართალია, ბოლო წლებთან შედარებით, საინექციო მოწყობილობის გაზიარების პრაქტიკა საქართველოში საგრძნობლად შემცირებულია, მაგრამ როგორც `კურაციოს~ კვლევით ჩანს – ინექციური ნარკოტიკის მომხმარებელთა მცირე რაოდენობა (გამოკითხულთა 2%-დან 5%-მდე) მაინც აგრძელებს ამ სარისკო პრაქტიკას.

უსაფრთხო შპრიცების ზოგიერთი მოდელის დგუშს სუსტი წერტილი აქვს, რომელიც ინექციის შემდეგ, ხელმეორედ ამოქმედების მცდელობისას ტყდება. ზოგიერთს მეტალის დამჭერი აქვს, რომელიც ბლოკავს დგუშს და მის მოძრობას შეუძლებელს ხდის. სხვა მოდელებში, ინექციის შემდეგ, ნემსი შპრიცი ცილინდრში ვარდება. ასევე, ჯანდაცვის მუშაკების ნემსის შემთხვევით ჩხვლეტისგან დასაცავად, ზოგიერთი შპრიცის ბუდე ან გარსი გამოყენების შემდეგ ისე ეხვევა ნემსს, რომ გამორიცხავს ჩხვლეტის ალბათობას.

„ჯანმრთელობის კვლევის კავშირის“ მიერ 4 წლის წინ საქართველოში გამოკითხული 1386 მედმუშაკთაგან, ნემსი შემთხვევით უჩხვლეტია 45%-ს, რაც ყველაზე ხშირად (22% ექიმებში და 39% მედდებში) გამოყენებულ ნემსზე ხუფის დახურვის დროს ხდებოდა. ამავე კვლევის ფარგლებში აღმოჩნდა, რომ გამოკითხული მედპერსონალის 5% ინფიცირებული იყო C ჰეპატიტით.

ასეთი შპრიცები საქართველოში დღეს მხოლოდ აცრების დროს გამოიყენება, რადგან „ჭკვიანი“ შპრიცები, ჩვეულებრივ შპრიცებთან შედარებით, მინიმუმ ორჯერ ძვირია [გაეროს ორგანიზაციების მიერ, განვითარებადი ქვეყნებისთვის შეძენილი, დამცავი მექანიზმების არმქონე შპრიცები 0,03-0.04 აშშ დოლარი ღირს]. როგორც დაავადებათა კონტროლისა და საზოგადოებრივი ჯანმრთელობის ეროვნულ ცენტრში გვითხრეს, კონკრეტული გათვლა, თუნდაც გრძელვადიანი გეგმის სახით ამ შპრიცების დანერგვასთან დაკავშირებით, საქართველოში ჯერ არ არსებობს. ამიტომ ჯანმო მოუწოდებს დონორ ორგანიზაციებს, რომ მხარი დაუჭირონ „ჭკვიან“ შპრიცებზე გადასვლას იმ მოლოდინით, რომ დროთა განმავლობაში, მოთხოვნის გაზრდასთან ერთად, მისი ფასიც შემცირდება.

დაავადებათა კონტროლისა და საზოგადოებრივი ჯანმრთელობის ეროვნული ცენტრის ინფორმაციით, ინფექციის გადაცემის გზებს შორის ნარკოტიკის ინექციური გზით მოხმარება ერთ-ერთი წამყვანი მიზეზია (48.6%). სწორედ ამიტომ, საქართველოში 2001 წლიდან მოქმედებს ნარკოტიკების ინექციურ მომხმარებლებში აივ/შიდსის პრევენციის, იგივე – შპრიცების გაცვლის პროგრამა. შპრიცების გაცვლა გულისხმობს მომხმარებლებისთვის ახალი შპრიცების მიცემას ნახმარი შპრიცების სანაცვლოდ. საბოლოოდ კი, ნახმარი შპრიცები სანიტარული დაცვის წესებით ნადგურდება.

დღეს საქართველოში შპრიცების გაცვლის თორმეტამდე ცენტრია, რომელთა საქმიანობასაც საერთაშორისო ორგანიზაციები აფინანსებენ. მაგალითად, ბათუმში, ამ საქმიანობას „გლობალური ფონდის“ დაფინანსებით კავშირი „იმედი“ ახორციელებს, რომლის ხელმძღვანელი ზორია წურწუმია ამბობს, რომ ყოველთვიურად ისინი 800-1200 ბენეფიციარს ემსახურებიან, რომელთა უმრავლესობასაც ქვეყანაში არსებული მკაცრი ნარკოპოლიტიკის გამო, ძირითადად ქუჩაში ხვდებიან – „ამას აუთრიჩი ჰქვია, უმეტესად ქუჩაში ვაწვდით სერვისს, თუმცა ჩვენთანაც მოდიან. 2001 წლიდან ვმუშაობთ და უკვე ნდობა გვაქვს ბენეფიციარებში, ერთმანეთში ავრცელებენ ჩვენ შესახებ ინფორმაციას“.

ზორია წურწუმია ამბობს, რომ თავიდან, პროექტი უფრო კლასიკურად მიმდინარეობდა, ანუ ძირითადად ბენეფიციარები მიდიოდნენ მათ ოფისში -„გვიტოვებდნენ ნახმარ შპრიცებს და ჩვენ ვაძლევდით ახალს. მაგრამ 2007 წლის შემდეგ, რაც კანონი გამკაცრდა და იყო შემთხვევები, როცა ნახმარი შპრიცით აკავებდნენ მომხმარებელს, აღარ მოაქვთ და ჩვენი სოცმუშაკები ხვდებიან მათ დათქმულ ადგილებში“, – ამბობს ის. ზორია წურწუმიას თქმით, „ჭკვიანი“ შპრიცების დანერგვა იდეალური ვარიანტი იქნება აივ/შიდსის პრევენციისთვის, მაგრამ „შპრიცების გაცვლის“ პროგრამის ფარგლებში მათი შეძენა ჯერ თუნდაც იმიტომ ვერ მოხერხდება, რომ სახელმწიფო ტენდერის სახით ირჩევს, თუ ვინ განახორციელებს „გლობალური ფონდის“ მიერ დაფინანსებულ პროგრამებს, ტენდერში კი მთავარ კრიტერიუმად – არა ხარისხი, არამედ დაბალი ფასი მიიჩნევა.

მიზეზი, რის გამოც ინექციური ნარკოტიკის მომხმარებლები, ნახმარ ნემსს ხელმეორედ იყენებენ სხვადასხვაა – აფთიაქში არ შესვლის სურვილი სტიგმის გამო, ან შემდგომში სამართალდამცავ ორგანოებთან სირთულეების თავიდან აცილების მიზნით. „ჯერ კიდევ არიან ისეთები, რომლებსაც ნარკოტიკული შიმშილისას ავიწყდებათ ყველანაირი ღონისძიება, იყო შემთხვევა, როცა ქუჩაში გადაგდებული შპრიცი აიღო ერთ-ერთმა ბენეფიციარმა, თქვა, რომ იცოდა რისკის შესახებ, მაგრამ მაინც გააკეთა ეს – ამიტომაც არის ეს დაავადება, რომ ამას გაკეთებინებს,“ – ამბობს ზორია წურწუმია.

კიდევ ერთი ფაქტორი, რაც გამოყენებული შპრიცების გაზიარებისას მოქმედებს, ამ საკითხებზე განათლების დაბალი დონეა. „კურაციოს“ 2015 წლის კვლევის შედეგებით, იმ 2037 რესპონდენტს შორის, ვინც დაადასტურა სხვის მიერ ნახმარი ნემსის/შპრიცის ოდესმე გამოყენების ფაქტი, ყოველმა მეხუთემ აღნიშნა, რომ წინასწარ წყლით გაასუფთავა იგი.

ჯანმოს რეკომენდაციით, 2020 წლისთვის ყველა ქვეყნის ჯანდაცვის პროგრამა მხოლოდ „ჭკვიანი“ შპრიცების გამოყენებაზე უნდა გადავიდეს [გარდა იმ გამონაკლისი შემთხვევებისა, როდესაც „ჭკვიანი“ შპრიცების ერთჯერადი გამოყენება ხელს შეუშლის მკურნალობის პროცესს. მაგალითად, როდესაც ადამიანი შეერთებულია ინტრავენურ აპარატზე, რომელიც იყენებს შპრიცს].

მოსალოდნელზე მეტად დაბინძურებული შავი ზღვა

შავი ზღვის ყველაზე მასშტაბური და უნიკალური კვლევა, რომელშიც ხუთი ქვეყნის 40 მეცნიერი მონაწილეობდა, დასრულდა. კვლევის ერთ-ერთი მიზანი შავი ზღვის დანაგვიანების შეფასება იყო. კვლევის მონაწილეები ამბობენ, რომ შავი ზღვა, კვლევის ფარგლებში შემოწმებული ლოკაციების მიხედვით – ყველაზე მეტად დაბინძურებული საქართველოშია.

მარინოლიტერი – ასე უწოდებენ ზღვაში სხვადასხვა წარმოშობის ნაგავს. ეს შეიძლება იყოს: პოლიომერიული მასალა, პენოპლასტი, ქაღალდი, ტოტები, ფიჩხები და სხვა ნივთები, რაც მდინარეების ან სხვა გზებით ხვდება ზღვაში და მის ზედაპირზე დაცურავს. კვლევა, რომელიც აქამდე არასდროს ჩატარებულა შავ ზღვაში, 4 ივნისს დასრულდა და როგორც კვლევის ერთ-ერთი მონაწილე, გარემოს ეროვნული სააგენტოს თევზაობისა და შავი ზღვის მონიტორინგის სამსახურის უფროსი არჩილ გუჩმანიძე ამბობს, შავი ზღვის დანაგვიანების მაჩვენებელი იმაზე გაცილებით უფრო ცუდია, ვიდრე მეცნიერები ელოდნენ.

„სამწუხაროა, მაგრამ მთლიანად შავ ზღვაში, სადაც ჩვენ ვაწარმოეთ დაკვირვება, ყველაზე დიდი რაოდენობის მარინოლიტერი საქართველოს წყლებში აღინიშნა. ასევე საგულისხმოა ის, რომ ყველაზე დიდი რაოდენობით ნაგავი კოლხეთის ეროვნული პარკის საზღვაო სექტორის მიმდებარე წყლებშია,“ – ამბობს არჩილ გუჩმანიძე.

მარინოლიტერი ხილვადი ნაგავია. რაც შეეხება შავი ზღვის „უხილავ“ დაბინძურებას, კვლევის ფარგლებში პოლუტანტებისა [დამაბინძურებელები] და ნუტრიენტების [ორგანული ნივთიერებების] რამდენიმე ასეული კომპონენტის ანალიზიც ჩატარდა, თუმცა კვლევის ეს ნაწილი უფრო დეტალურ შესწავლას საჭიროებს და მათი შედეგები, სხვა მსგავსი სინჯების მსგავსად, ოქტომბრის ბოლოს იქნება ცნობილი.

შავი ზღვის ერთობლივი კვლევა უკრაინისა და საქართველოს ტერიტორიულ წყლებში „შავი ზღვის გარემოსდაცვითი მონიტორინგის გაუმჯობესების“ (EMBLAS) პროექტის ფარგლებში ჩატარდა, რომელსაც ევროკავშირის კომისია და გაეროს განვითარების პროგრამა აფინანსებდნენ. კვლევის მონაწილე უნდა ყოფილიყო რუსეთის ფედერაციაც, თუმცა, როგორც არჩილ გუჩმანიძე ამბობს, რუსეთმა უარი განაცხადა მის ეკონომიკურ ზონასა და ტერიტორიულ წყლებში საერთაშორისო ექსპედიციის შესვლაზე. „ჩვენ არ მოგვეცა საშუალება, რომ ჩავსულიყავით და მათთან ერთად გვემუშავა, ამიტომ რუსეთი თავის მონაცემებს თავად დაამატებს და უკვე საკმაოდ ვრცელი სურათი გვექნება,“ – ამბობს ის.

როგორც ექსპედიციის ერთ-ერთმა წევრმა, სლოვაკმა ქიმიკოსმა პიტერ ოსვალდმა „ბათუმელებთან“ აღნიშნა, ექსპედიციის ფარგლებში აღებულ 2000-მდე ორგანულ ნივთიერებას [წამლები, ინდუსტრიული დამაბიძურებელი ნივთიერებები მრეწველობიდან და სხვა] საბერძნეთში გაუკეთდება ანალიზი. მეცნიერთა განმარტებით, ის თანამედროვე ტექნოლოგია, რაც ასეთი დაბალი კონცენტრაციის კვლევებისთვის არის საჭირო, მხოლოდ ევროკავშირშია. მასალის ნაწილი კი საქართველოს გარემოს ეროვნულ სააგენტოში მოწმდება.

ლაბორატორია რუმინეთის კვლევით გემზე – Mare Nigrum

შავი ზღვის მონიტორინგის პროექტის ფარგლებში ზღვის ძუძუმწოვრების კვლევაც ჩატარდა. წინასწარი შედეგების თანახმად, მათი რიცხვი მნიშვნელოვნად გაზრდილია, როგორც საქართველოს, ისე უკრაინის წყლებსა და მთლიანად შავი ზღვის აკვატორიაში.

კვლევის ფარგლებში შავი ზღვის დელფინების ფოტოკატალოგი უნდა შეიქმნას. არჩილ გუჩმანიძე ამბობს, რომ დელფინის ზურგის ფარფლზე არსებული ღარები და ნაჭდევები, მათი ფორმა და მოყვანილობა, ისეთივე უნიკალურია, როგორც ადამიანის თითის ანაბეჭდი, ამიტომ მათი ერთხელ დაფიქსირებით შესაძლებელია მომავალშიც ამოიცნოთ დელფინი.

დელფინებზე დაკვირვება და მათი აღრიცხვა კი ასე ხდება:

„გემის ორივე ბორტზე დგება ორი ადამიანი, რომლებიც სპეციალური ბინოკლებით აკვირდებიან ზღვას და როცა ცალკეულ დელფინს ან გუნდს აღმოაჩენენ, ხდება მათი აღრიცხვა და სახეობრივი ინდეტიფიცირება – თეთრგვერდა დელფინია, ზღვის ღორია თუ აფალინა. მოგეხსენებათ, შავ ზღვაში დელფინის ეს სამი სახეობაა გავრცელებული. ასევე ხდება მათი მიმართულების, სიჩქარისა და ადგილმონაცვლეობის გაანალიზება. ეს ინფორმაცია შედის კომპიუტერში, ხდება ამის განზოგადება მთელს აკვატორიაზე და ვიღებთ რიცხვს, თუ რამდენი ძუძუმწოვარია ამ მომენტისთვის იმ კონკრეტულ აკვატორიაში, ან მთლიანად შავ ზღვაში“, – განმარტავს არჩილ გუჩმანიძე.

გარემოს ეროვნული სააგენტოს მონაცემებით, წელს საქართველოს სანაპირო ზოლზე დელფინების გამორიყვის 50-ზე მეტი შემთხვევა დაფიქსირდა. მათ უმეტესობას ისეთივე კლინიკა და პათანატომიური სურათი აქვს, როგორიც 2012 წელს გამორიყლ დელფინებს აღენიშნებოდათ. მაშინ გამორიყული დელფინებისგან აღებული ქსოვილების მასალის ვირუსოლოგიურმა კვლევამ დაადასტურა საქართველოს წყლებში და მთლიანად შავი ზღვის აკვატორიაში მორბილ ვირუსული წარმოშობის დაავადების არსებობა. აქედან გამომდინარე, გარემოს ეროვნულ სააგენტოში ვარაუდობენ, რომ შესაძლოა საქართველოს წყლებში კვლავ ადგილი ჰქონდეს ვირუსოლოგიური ბუნების დაავადებას.

ერთ-ერთი მნიშვნელოვანი კვლევა, რაც ამ პროექტის ფარგლებში ჩატარდა, შავი ზღვის ჰიპოქსიაა – ანუ ჟანგბადსმოკლებული ზონების კვლევა. როგორც ცნობილია, შავ ზღვაში კონცენტრირებულია გოგირდწყალბადი, რის გამოც შავი ზღვის 80%-ზე მეტი სიცოცხლეს არის მოკლებული, ანუ მასში არ გვხვდება ცოცხალი ორგანიზმები, სწორედ ამიტომ აუცილებელია დაკვირვება – იზრდება თუ არა გოგირდწყალბადის ფენა შავ ზღვაში და ხდება თუ არა მისი ამოწევა ზედაპირზე.

ამ მიმართულებით ექსპედიციის ფარგლებში ერთი საინტერესო აღმოჩენაც გაკეთდა. მეცნიერებმა 1960 მეტრ სიღრმეზე სპეციალური, სტერილური შპრიცით აიღეს გრუნტის ზედაპირი და დათესეს, საიდანაც ხუთი ფორმის მიკროორგანიზმი ამოითესა. „ეს პატარა სენსაციაცაა, რადგან ჩვენ ვამბობთ, რომ შავი ზღვა არის მოკლებული სიცოცხლეს, რომ მასში არ გვხვდება ცოცხალი ორგანიზმები, მაგრამ ამოვიღეთ ხუთი ფორმა. ეს სინჯები უფრო სიღრმისეული კვლევებისთვის გადავეცით ბაქტერიოფაგის ინსტიტუტს. მალე საზოგადოებას ამ კუთხით ძალიან საინტერესო ფაქტებს მივაწვდით,“ – ამბობს არჩილ გუჩმანიძე.

მეცნიერების თქმით, ყველაზე მნიშვნელოვანი შედეგი, რასაც კვლევის პასუხები საზოგადოებას მისცემს – შავი ზღვის დიაგნოზია.

„შავი ზღვის ეკოსისტემა არ არის ისეთი ჯანსაღი, როგორიც გასული საუკუნის 20-30-იან წლებში იყო, აქედან გამომდინარე ჩვენ მუდმივად მის პულსზე უნდა გვეჭიროს ხელი. როცა ხმელეთზე რაღაც ხდება, ის ვიზუალურად შესამჩნევია – მთა მოწყდება, ტყე გაიჩეხება… მაგრამ ზღვაში ეს ყველაფერი არ ჩანს, ხოლო როცა ზღვა გამოავლენს და დაგვანახებს მის პრობლემებს – უკვე ძალიან გვიანი იქნება. სანამ მდგომარეობა ჩიხში შევა, ჩვენ საზოგადოებას უნდა ვუთხრათ რა პრობლემები გვაქვს, განვიხილოთ და შევთანხმდეთ, თუ რა ზომების მიღება შეგვიძლია სიტუაციის შესამსუბუქებლად და მერე უკვე უნდა გადაწყდეს კონკრეტული მკურნალობა,“ – ამბობს არჩილ გუჩმანიძე.

შავი ზღვის მონიტორინგის ფარგლებში საქართველოს წყალქვეშ რამდენიმე სადგურზე სპეციალური წყალქვეშა რობოტის საშუალებით ზღვის ფსკერიც გადაიღეს. კადრები ოქტომბრამდე გამოქვეყნდება.

ამავე თემაზე: შავი ზღვის სანაპიროს საქართველოში უცხოელი მეცნიერები იკვლევენ

არჩილ ხაბაძის გადადგომის შემთხვევაში აჭარის მინისტრებიც უნდა გადადგნენ

აჭარის მთავრობის თავმჯდომარის არჩილ ხაბაძის გადადგომის შემთხვევაში აჭარის ოთხივე მინისტრი ავტომატურად უნდა გადადგეს. მინისტრების მოადგილეებს კი უფლებამოსილება უწყდებათ ახალი მინისტრის დანიშვნისთანავე.

კანონმდებლობით აჭარის მთავრობის თავმჯდომარეს არ აქვს ვალდებულება გადადგომასთან დაკავშირებით რომელიმე თანამდებობის პირს ან აჭარის უმაღლეს საბჭოს წერილობით მიმართოს.

„მისი მხრიდან გადადგომის თაობაზე საჯარო სივრცეში გაკეთებული განცხადება იქნება საკმარისი. შემდეგ კი მას აქვს ვალდებულება დარჩეს მოვალეობის შემსრულებლად, ვიდრე საქართველოს პრეზიდენტი მთავრობასთან შეთანხმებით უმაღლეს საბჭოს ახალ კანდიდატურას არ წარუდგენს და უმაღლესი საბჭო მას არ დაამტკიცებს.“ – განმარტავს აჭარის მთავრობის იურიდიული დეპარტამენტის ხელმძღვანელი, დავით გაბაიძე.

ახალი თამჯდომარე კი დამტკიცების შემდეგ უმაღლეს საბჭოს ახალ მინისტრთა კაბინეტს წარუდგენს.

აჭარის მთავრობის თავმჯდომარემ არჩილ ხაბაძემ მოსალოდნელი გადადგომის შესახებ ინფორმაცია რამდენჯერმე გაკეთებულ კომენტარში არ უარყო და ირიბად დაადასტურა კიდეც.

რამდენიმე წუთის წინ აჭარის უმაღლეს საბჭოში არ შედგა მთავრობის თავმჯდომარის არჩილ ხაბაძის იმპიჩმენტის პროცედურა. საკითხის ინიციატორი ფრაქცია „ნაციონალური მოძრაობა“ იყო.

დღეს, 5 ივლისს, ოთხ საათზე, აჭარის მთავრობის სხდომაა ჩანიშნული.

ამავე თემაზე:

ზურაბ პატარაძე არჩილ ხაბაძის ნაცვლად?

შსს: იანვარ-ივნისში ქვეყანაში 2 636 313 ვიზიტი განხორციელდა

შინაგან საქმეთა სამინისტროს ინფორმაციით, საქართველოს სახელმწიფო საზღვარზე გადაადგილებულ ვიზიტორთა რაოდენობამ 2016 წლის ივნისის თვეში 517 038-ით განისაზღვრა, რაც 2015 წლის იმავე პერიოდის მაჩვენებელზე 4,1 %-ით მეტია.

რაც შეეხება იანვარ-ივნისის ინტერვალს, ქვეყანაში უკვე 2 636 313 ვიზიტი განხორციელდა, რაც 12,9%-ით მეტია 2015 წლის ანალოგიურ საანგარიშო პერიოდის მაჩვენებელზე.

ამასთან, შემოღებული პირობითი დაყოფის მიხედვით, 2016 წლის იანვარ-ივნისში ხვედრითი წილის ურთიერთმიმართება შემდეგია:

ა) ტურისტი – 1 011 458 ვიზიტი (საერთო რაოდენობის 38,4%, მატება წინა წლის ანალოგიურ მაჩვენებელთან 18,1%);

ბ) ტრანზიტი – 521 746 ვიზიტი (საერთო რაოდენობის 19,8%, კლება წინა წლის ანალოგიურ მაჩვენებელთან -2,8%);

გ) სხვა – 1 102 887 ვიზიტი (საერთო რაოდენობის 41,8%, მატება წინა წლის ანალოგიურ მაჩვენებელთან 17%).

სამინისტროს ინფორმაციით, 2016 წლის ივნისშიც ყველაზე მეტი ვიზიტი კვლავ აზერბაიჯანიდან (+1,9%), სომხეთიდან (-3,9%), თურქეთიდან (-7,2%), რუსეთიდან (+4,4%) და უკრაინიდან (+35,3%) განხორციელდა.

„ასევე, პოზიტიური ტენდენცია ნარჩუნდება ევროკავშირის ქვეყნების მიმართულებიდან, საიდანაც საქართველოში ჩამოსვლების რაოდენობის ზრდის კუთხით, იანვარ-ივნისშიც გამოირჩეოდნენ ლატვია, იტალია, და საფრანგეთი (შესაბამისად 29%, 20%, და 12%), შუა აზიის ქვეყნებიდან – ყაზახეთი (27%) და უზბეკეთი (31%). აღმოსავლეთ ევროპის ქვეყნებიდან – ბელორუსია (39%) და მოლდოვა (22%), ახლო აღმოსავლეთიდან – ისრაელი (95%), ხოლო აზიის ქვეყნებიდან – არაბთა გაერთიანებული საემიროები 23%-იანი მატებით. აქვე აღსანიშნავია ამერიკის შეერთებული შტატების მოქალაქეების 9%-იანი ზრდა“ – აღნიშნულია შსს-ს განცხადებაში.

სამინისტროს საინფორმაციო-ანალიტიკური დეპარტამენტი საქართველოს საზღვარზე 2007 წლიდან მიმდინარე წლის ივლისამდე პერიოდში გადაადგილებულ ვიზიტორთა სტატისტიკურ მონაცემებსაც აქვეყნებს.

ბსუ-ს აკადემიური საბჭოს არჩევნები თითო კანდიდატით

4 ივლისს ბათუმის შოთა რუსთაველის სახელმწიფო უნივერსიტეტის დამოუკიდებელი სამეცნიერო-კვლევითი ერთეულებიდან უნივერსიტეტის აკადემიური საბჭოს წევრები [ნიკო ბერძენიშვილის ინსტიტუტი – თამილა ლომთათიძე; აგრარული და მემბრანული ტექნოლოგიების ინსტიტუტი – ზურაბ მიქელაძე; ფიტოპათოლოგიისა და ბიომრავალფეროვნების ინსტიტუტი – ზოია სიხარულიძე] აირჩიეს.

არჩევნების თარიღი და კანდიდატთა რეგისტრაციის ვადები 16 ივნისს გამოცხადდა და კანდიდატებს 17-27 ივნისს შეეძლოთ რეგისტრაცია. როგორც ბსუ-ს ოფიციალურ ვებგვერდზე განთავსებული ოქმებიდან ირკვევა, თითოეულ ინსტიტუტში კანდიდატად თითო სუბიექტი დარეგისტრირდა.

„არჩევნებს თითო კანდიდატით“ სოციალურ ქსელში გამოეხმაურა ბსუ-ს აკადემიური საბჭოს წევრი მალხაზ ნაკაშიძე: „კომუნისტები ატარებდნენ ასეთ არჩევნებს, სადაც ერთ კანდიდატს ნიშნავდნენ არჩევნების გზით. ასეთივე წესით არის დანიშნული დანარჩენი წევრების უმრავლესობა აკადემიურ საბჭოში“.

„ბათუმელებმა“ ვერ მოახერხა ბსუ-ს აკადემიური საბჭოს საარჩევნო კომისიის თავმჯდომარესთან, გიორგი დიასამიძესთან დაკავშირება – მან ჩვენს სატელეფონო ზარებს არ უპასუხა.

უმაღლეს საგანმანათლებლო დაწესებულებათა აკადემიურ საბჭოებში სამეცნიერო-კვლევითი ინსტიტუტების წარმომადგენლებს წელს პირველად ირჩევენ, რაც საქართველოს კანონში უმაღლესი განათლების შესახებ ცვლილებების შედეგად გახდა შესაძლებელი. ცვლილებების თანახმად, უმაღლესი საგანმანათლებლო დაწესებულების აკადემიური, ადმინისტრაციული და დამხმარე თანამდებობების ჩამონათვალს დაემატა სამეცნიერო თანამდებობები.

ამავე ცვლილებებით, 2016 წლის შემდეგ, უმაღლეს საგანმანათლებლო დაწესებულებებში სრული პროფესორები და მთავარი მეცნიერ-თანამშრომლები აირჩევიან უვადოდ და ყოველ ხუთ წელიწადში ერთხელ დაექვემდებარებიან ატესტაციას.