Batumelebi

საპარტნიორო ფონდის აღმასრულებელი დირექტორის, დავით საგანელიძის მიერ 2017 წელს შევსებული ქონებრივი დეკლარაციის მიხედვით, 2016 წელს შესრულებული სამუშაოსთვის მას არც ერთი ლარი არ აქვს მიღებული. 2017 წლის ქონებრივი დეკლარაციის გრაფაში – „საქართველოში ან სხვა ქვეყანაში, თქვენი, თქვენი ოჯახის წევრის მიერ შესრულებული ნებისმიერი ანაზღაურებადი სამუშაო, სამეწარმეო საქმიანობაში მონაწილეობის გარდა“ – დავით საგანელიძეს არაფერი უწერია.

ასევე დავით საგანელიძის ქონებრივი დეკლარაციის მიხედვით, საპარტნიორო ფონდის აღმასრულებელ დირექტორს საშემოსავლო გადასახადის სახით შარშან 80 850 ლარი გადაუხდია.

საგადასახადო კოდექსის თანახმად, საშემოსავლო გადასახადი საერთო შემოსავლის 20%-ია. შესაბამისად, ეს იმას ნიშნავს, რომ დავით საგანელიძეს გასულ წელს 323 400 ლარი უნდა ჰქონდეს მიღებული, რაც თვეში 33 687.5 ლარია.

დავით საგანელიძე ამ თანამდებობაზე 2015 წლის 23 სექტემბერს დანიშნეს.

ბათუმის მე-15 საბავშვო ბაღში 5 წლის ბავშვის მშობლის მიერ ცემის ფაქტს არასამთავრობო ორგანიზაცია „პარტნიორობა ადამიანის უფლებებისთვის“ გამოეხმაურა. ორგანიზაციის  იურისტის ანა არგანაშვილის თქმით, 2016 წელს ძალაში შევიდა კანონი, რომელიც საბავშვო ბაღს უზუსტებს და ავალდებულებს, რომ ყველა ძალადობის შემთხვევა, იქნება ეს ფიზიკური, ემოციური, ფსიქოლოგიური თუ უგულებელყოფა მშობლის მხრიდან, ბაღმა უნდა შეატყობინოს სოციალურ სამსახურს, როგორც მეურვეობისა და მზრუნველობის ორგანოს ან პოლიციას.

„თუ ამას ბაღი არ გააკეთებს, თავად ბაღის პასუხისმგებლობა დგება, საქართველოს ადმინისტრაციის სამართალდაღვევათა კოდექსის მიხედვით და ბაღზე გამოიწერება ჯარიმა.

ვინაიდან, როგორც ნიუსიდან ჩანს, ბაღმა თვითონ შეაფასა  რისკი – ეს მშობელი სახლში იძალადებს თუ არა ისევ შვილზე. ამ რისკს  ბაღი მარტო ვერ შეაფასებს, რადგან ჩვენ ვიცით, რომ ბავშვზე ძალადობის საკითხი არის საკმაოდ რთული და ეს უნდა შეაფასოს სოციალურმა მუშაკმა. მთელი პროცედურები უნდა ჩართონ და არანაირი არგუმენტი არ არის ის, რომ ეს მშობელი მუშაობს რაღაც ორგანოებში და ამის გამო არ იძალადებს. ეს დამაჯერებელი არ არის,“ – ამბობს ანა არგანაშვილი.

მისი თქმით, საბავშო ბაღს კანონმდებლობით გაწერილი აქვს პროცედურა, რის მიხედვითაც ბავშვზე ძალადობის ნებისმიერი ფორმის შემთხვევაში აუცილებლად უნდა შეატყობინოს სოციალურ სამსახურს, რომელიც პრობლემის შესასწავლად გამოყოფს კომპეტენტურ  პირებს.

წინააღმდეგ შემთხვევაში საბავშვო ბაღი ექვემდებარება საჯარიმო სანქციას, რომელიც 100-იდან 200 ლარამდეა.

დღეს, 16 თებერვალს, ბათუმის მე-15 საბავშვო ბაღში ერთ-ერთმა მშობელმა 5 წლის ბავშვს აღსაზრდელებისა და მასწავლებლების თვალწინ სცემა. ბავშვის ცემის მიზეზი, როგორც საბავშვო ბაღში აგვიხსნეს, ერთ-ერთ მშობელთან დაპირისპირება იყო.

„ბათუმელებთან“ ბაღში მომხდარ ინციდენტს საბავშვო ბაღის მეთოდისტი დოდო ლაღაძეც ადასტურებს.

„არც ისეთი უსაშველო კონფლიქტი იყო, რომ თქვენც გაგეგოთ, დედამ საკუთარ შვილს თმები მოქაჩა, პატარა წაარტყა და ისე ინერვიულა, მერე ორ-სამჯერ დარეკა ჩვენთან, რომ ბავშვი როგორ არისო“, – გვეუბნება მეთოდისტი. მისი თქმით, ბავშვის ცემის მოტივი ერთ-ერთი მშობლის პრეტენზია იყო მანდატურის შვილის მიმართ.

„ბავშვებს შორის მოხდა რაღაც გაუგებრობა და დედამ უთხრა, რატომ დამიმალე ეს ამბავიო“.

„ბათუმელების“ კითხვაზე, მოახდინა თუ არა საბავშვო ბაღის ადმინისტრაციამ ბავშვზე ძალადობის ფაქტზე რეაგირება? ბაღის მეთოდისტი გვეუბნება: „მე, როგორც მეთოდისტმა, უფროსმა აღმზრდელმა, გამოვიყვანე ორივე მშობელი, შევიყვანე ჩემთან კაბინეტში, ისაუბრეს, გაარკვიეს ყველაფერი და ლამაზად და წყნარად წავიდნენ სახლში“.

„ბათუმელების“ კითხვაზე, თუ არსებობს იმის ალბათობა, რომ სახლშიც იძალადოს მშობელმა ამ ბავშვზე? – მეთოდისტი გვპასუხობს: „არა მგონია, რადგან ორგანოში მუშაობს თვითონ. თმები მოქაჩა და წაარტყა თავზე… ეს უსაშველო ცემად არ ვიცი ახლა თუ ითვლება. გაბრაზებული იყო ქალი ძალიან, ნაწყენი იყო საკუთარ შვილზე. ყოველ შემთხვევაში, მოგვარებადი იყო ეს ამბავი და ჩვენ მოვაგვარეთ“.

ბაღის ადმინისტრაციაში გვეუბნებიან, რომ ნაცემ ბავშვთან ფსიქოლოგი მუშაობს. „აგრესიული ბავშვი არ არის, მაგრამ  ცოტა ჩაკეტილია, მარტო უყვარს ყოფნა და  თავისთვის თამაშობს“.

„ბათუმელები“ ბავშვის მშობელსაც დაუკავშირდა. მან უარყო ბავშვის ცემის ფაქტი, თუმცა გვითხრა, რომ მისი შვილის ცემის უფლება აქვს.

„ჩემს შვილს შემიძლია დავარტყა და ეს მე მგონი, არავის პრობლემა არ უნდა იყოს. თუმცა, მე არ ვიცი რა ინციდენტზე მესაუბრებით“.

„ბათუმელების“ კითხვაზე, არ ფიქრობთ, რომ ბავშვის ცემა ძალადობაა? მშობელი გვპასუხობს: „კანონებში ძალიან კარგად ვერკვევი და თუ რამე პრობლემები გაქვთ, შეგიძლიათ პირადად მნახოთ, არ ვარ ვალდებული ამაზე ვინმესთან ვილაპარაკო“.

15 თებერვალს ბათუმის მერიაში ქალაქის მერთან დახურული შეხვედრა შედგა, რომელსაც საზოგადოება „ბათომის“, „ახალგაზრდა იურისტთა ასოციაციის“, „თავისუფალ ჟურნალისტთა სახლის“ და „საერთაშორისო გამჭვირვალობა – საქართველოს“ წარმომადგენლები ესწრებოდნენ. რაზე ისაუბრეს დახურულ შეხვედრაზე? „ბათუმელები“ საზოგადოება „ბათომის“ დამფუძნებელს, შოთა გუჯაბიძეს ესაუბრა.

შოთა, როგორც ჩვენთვის გახდა ცნობილი, გუშინ შედგა შეხვედრა მერიაში, ბათუმის მერთან, გიორგი ერმაკოვთან. რა იყო საუბროს თემა?

საუბრის თემა ძირითადად იყო ბარათაშვილის 24  [ისტორიული სახლი ბათუმში, რომელიც კომპანიამ დემონტაჟის ნებართვის გარეშე დაანგრია] და ის პრობლემები, რომლებიც კულტურული მემკვიდრეობის თვალსაზრისით შეიძლება შეფასდეს, როგორც კატასტროფულად მძიმე – ჩვენ ასე ვაფასებთ და პრინციპში, არც ქალაქის მერი უარყოფს, რომ ძალიან მძიმე მდგომარეობაა, მაგრამ მას აქვს არგუმენტები, რომ, მაგალითად, სამართლებრივად, რაღაცას რომ ხელს მოაწერს, სხვა გზა არა აქვს.

თუ გრძნობს მერი პასუხისმგებლობას ბარათაშვილის #24-თან დაკავშირებით? ეს თქვენს საუბარში გამოჩნდა?

მე ვფიქრობ, ფაქტი, რომ მან ჩვენთან შეხვედრა ითხოვა, ნიშნავს იმას, რომ რაღაც დონის პასუხისმგებლობას გრძნობს.

ბარათაშვილის 24-თან დაკავშირებით ძირითადად ჩვენგან იყო საყვედურები, თვითონ ამბობდა, რომ არ გვინდა ჩხუბი და მოვილაპარაკოთ, რა შეიძლება გაკეთდეს და პრინციპში ჩვენ ამის მომხრე ვართ, მაგრამ ხანდახან ემოციები გვძლევდა ხოლმე. ითქვა, რომ უახლოეს დღეებში ისევ უნდა შევხვდეთ ერთმანეთს, რადგან რამდენიმე პუნქტია აუცილებლად შესასრულებელი, ძირითადად მაინც მორატორიუმზე ვლაპარაკობდით.

როგორც ვიცი, ეს არ არის პირველი შემთხვევა, როცა „ბათომი“ მორატორიუმის აუცილებლობაზე საუბრობს.  აპირებთ თუ არა ამ საკითხის გააქტიურებას და მერი რას ფიქრობს ამ თემაზე?

მორატორიუმზე საუბარი პირველად დავიწყეთ 2012 წელს, როცა ხელისუფლება შეიცვალა. დღითი დღე ეს საკითხი სულ უფრო აქტუალური ხდება, ძველი ბათუმი კრიტიკულ მდგომარეობაშია,  გადარჩენაც კი არ იქნება, თუ მორატორიუმი გამოცხადდება, ეს იქნება ხავსი წყალწაღებულისთვის, მაგრამ სხვა გამოსავალი არ არის.

არა მგონია, მერი მოხიბლული იყოს ამ იდეით, ეჭვი მაქვს, რომ მას ცალკე პასუხისმგებლობები აქვს კომპანიებთან, მაგრამ ჩვენ  გავააქტიურებთ მუშაობას ამ მიმართულებით, ეს იქნება აქციები, სოციალური აქტივობა, საჯარო გამოსვლები და ა.შ. ამას იქეთ გზა არ გვაქვს, ეს არის ერთადერთი გამოსავალი ახლა.

მორატორიუმი გულისხმობს ძველ ბათუმში ნგრევისა და მშენებლობის შეჩერებას და ვცდილობთ, რომ ძველი ბათუმი, რომელიც ამ წუთას არის ზღვიდან კონსტანტინე გამსახურდიას კენტ მხარეს, გადმოვიტანოთ მელიქიშვილის ქუჩამდე, ანუ გაფართოვდეს ძველი ბათუმის საზღვრები.

აუცილებლად ვაპირებთ აქციებს. ნელ-ნელა იზრდება საზოგადოებაში პროტესტი იმის გამო, რაც ხდება ბათუმში და განსაკუთრებით ძველ ბათუმში.

საზოგადოების პროტესტის შედეგიანი მაგალითი იყო ბათუმის ბულვარი.  ფიქრობთ, რომ საზოგადოების აქტიურობამ შეიძლება შეაჩეროს ეს პროცესი? იგივე – მივიდეთ მორატორიუმამდე?

მე ვფიქრობ, რომ ეს არის ერთადერთი საშუალება, სხვა საშუალება არ გაგვაჩნია. გვაქვს არაერთი სამართლებრივი დავა,  მაგრამ იმდენად, რამდენადაც ქვეყანა ჩალით არის დახურული, მე ამის დიდი იმედი არ მაქვს. უბრალოდ, ჩვენ არ შეგვიძლია სხვანაირად, თვალი დავხუჭოთ და გავატაროთ, იმიტომ, რომ არაფერი არ გამოვა. ყველაზე დიდი ძალაა ხალხი, რომელიც, ვფიქრობ, რომ ამ საკითხს ჯანსაღად უდგება.

ბოლო ხანებში არის საუბარი იმაზე, რომ მიდის აჭარის მთავრობაში მუშაობა ქალაქმშენებლობის საკითხებზე, ამ ჯგუფში ერთ-ერთი წევრია მანუჩარ მახათაძე, რომელიც პარალელურად „USAID“-ის დაფინანსებით ბათუმის გენგეგმაზე მუშაობს. ამ ჯგუფიდან ხომ არ ყოფილა „ბათომთან“ შეხვედრის სურვილი?

ბატონ მახათაძესთან გვქონდა შეხვედრა ადრე, ბათუმის მერიაში, როცა პირველად გავიგეთ, რომ მიწათსარგებლობის გეგმა მზადდებოდა, რასაც აფინანსებს USAID-ი. ესეც ძალიან მნიშვნელოვანი გარემოებაა, რომ USAID-მა დაასკვნა, რომ კატასტროფულადაა საქმე ბათუმში და აუცილებელია ამ გეგმის მომზადება. მაშინ ვისაუბრეთ მორატორიუმზე, მაგრამ ბატონ მახათაძეს ჰქონდა რადიკალურად უარყოფითი დამოკიდებულება მორატორიუმის მიმართ. იგი ამბობდა, რომ ეს გააჩერებს ქალაქის განვითარებას. მაშინ ვუთხარით, რომ ის, რასაც „განვითარებას“ უწოდებენ, სინამდვილეში არის განადგურება და ეს უნდა შეჩერდეს.

მორატორიუმზე ვისაუბრეთ ბატონ პატარაძესთან შეხვედრის დროსაც და ვერ  ვიტყვი, რომ დიდი აღტაცებით მიიღო მან ეს იდეა. ასე, რომ მორატორიუმს ყველა უფრთხის გასაგები მიზეზების გამო. არადა, სხვა გამოსავალი არ არის.

მოკლედ რომ შევაჯამოთ, თქვენი აზრით, რა იყო ბათუმის მერთან შეხვედრის მიზანი და შედეგი?

მე ვფიქრობ, რომ ბატონ მერს უნდოდა შთაბეჭდილება დაეტოვებინა, რომ მას მაინცადამაინც არ მიუძღვის ბრალი ბარათაშვილის 24-ის დანგრევაში და უნდოდა ეთქვა, რომ თვითონაც შეწუხებულია იმით, რაც ხდება ძველ ბათუმში. მან აღნიშნა, ერთად დავსახოთ გეგმებიო, მაგრამ გეგმები დასახული იყო, მანამ, სანამ მერი გახდებოდა, იმიტომ, რომ მემორანდუმზე აქვს ხელი მოწერილი და იმ ხუთი პუნქტიდან, რაც მემორანდუმში იყო, არც ერთი არ არის შესრულებული, თუ არ ჩავთვლით USAID-ის ინიციატივას, რომელიც მიწათსარგებლობის გეგმის ტექნიკური პირობების შედგენას ეხება.

შედეგს, მართალი გითხრათ, ნაკლებად ველი. ისევ საზოგადოების გააქტიურების იმედი მაქვს, აქციებით და კონკრეტული მოთხოვნებით, იმიტომ, რომ ძალა არის მხოლოდ ეს. შეხვედრების შედეგის იმედი აღარ მაქვს, მაგ ილუზიებიდან კარგა ხანია გამოვედი.

თუმცა ის ფაქტიც საინტერესო იყო, რომ ქალაქის პირველი პირი პასუხისმგებლობას გრძნობს. რამდენად გულწრფელი იყო, ეს არ ვიცი, მაგრამ ამით შეიძლება შევაფასოთ, რომ ეს არის რეალურად ცუდი მდგომარეობის აღიარება.

შრომისუნარიანი ასაკის მამაკაცის საარსებო მინიმუმი მიმდინარე წლის იანვრისთვის 166 ლარი და 30 თეთრს შეადგინა, რაც 4 ლარითა და 70 თეთრით მეტია გასული წლის დეკემბრის თვის ანალოგიურ მაჩვენებელზე [161,6 ლარი].

მიმდინარე წლის იანვრის თვის მიხედვით, საშუალო მომხმარებლის საარსებო მინიმუმი 147,3 ლარით, საშუალო ოჯახის საარსებო მინიმუმი კი – 278,9 ლარით განისაზღვრა.

• ერთსულიანი – 147,3 ლარი,
• ორსულიანი – 235,6 ლარი,
• სამსულიანი – 265,1 ლარი,
• ოთხსულიანი – 294,5 ლარი,
• ხუთსულიანი – 331,4 ლარი,
• ექვსსულიანი და მეტი ოჯახისთვის – 391,7 ლარი.

შრომისუნარიანი ასაკის მამაკაცის საარსებო მინიმუმი 2010-17 წლებში [აღებულია იანვრის თვის მონაცემები]

საქსტატი საარსებო მინიმუმის მაჩვენებლებს ანგარიშობს იმ მინიმალური სასურსათო კალათის მიხედვით, რომელიც განსაზღვრულია საქართველოს შრომის, ჯანმრთელობისა და სოციალური დაცვის მინისტრის 2003 წლის 8 მაისის ბრძანების შესაბამისად.

საარსებო მინიმუმი – ეს არის ფულადი სახსრების მინიმუმი, რომელიც აუცილებელია ადამიანის ქმედუნარიანობის შენარჩუნებისთვის. იგი გამოხატავს საზოგადოებრივად აუცილებელი ცხოვრების დონის ქვედა ზღვარს. მისი გაანგარიშების მეთოდიკა ეფუძნება მინიმალური სამომხმარებლო ბიუჯეტის შექმნას, რომელიც საშუალო სიდიდის ოჯახის ან ერთი მომუშავის შემოსავლებისა და გასავლების ბალანსს წარმოადგენს

თუ ბაზარში ან მაღაზიაში ხორცის ყიდვისას გამოსაჩენ ადგილას არ არის წარმოდგენილი ეტიკეტი, რომელზეც აღნიშნულია ცხოველის საცნობარო ნომერი, სასაკლაოს ნომერი, სადაც დაიკლა ცხოველი, ცხოველის წარმოშობა – ადგილობრივია თუ იმპორტირებული – ხორცის გამყიდველი/ბიზნესოპერატორი კანონს არღვევს და დაჯარიმდება – რეგლამენტი, რომელიც საქონლის ხორცისა და საქონლის ხორცის პროდუქტების ეტიკეტირების წესს განსაზღვრავს, პირველი იანვრიდან ამოქმედდა.

რა უნდა გაითვალისწინოთ ხორცის შეძენამდე – სურსათის უვნებლობის სააგენტოს რეკომენდაცია

• ხორცს არ უნდა ჰქონდეს მუქი წითელ შეფერილობა
• ხორცს არ უნდა ჰქონდეს მუქი ლაქები, გარქოვანებული ნაწილები და ლორწო
• ხორცის ზედაპირზე უნდა იყოს წარმოქმნილი სიმშრალის ქერქი, თითის დაჭერისას წარმოქმნილი ფოსო მალე უნდა გასწორდეს.
• ძროხის ცხიმი უნდა მოყვითალო და მაგარი, ღორის ცხიმი – თეთრი და ერთგვაროვანი, ცხვრის ცხიმი – მკრთალი ფერის, მაგარი.
• ძროხისა და ცხვრის ხორცი უნდა იყოს ჟოლოსფერ-წითელი, ხბოს – ვარდისფერი, ღორის ხორცი – ღია წითელიდან მოვარდისფრო შეფერილობამდე.

ეტიკეტირების ახალი რეგლამენტი ჯერ მხოლოდ საქონლის ხორცზე ვრცელდება და არა ცხვრისა და ღორის ხორცზე. ამის მიზეზი, როგორც საქართველოს სურსათის უვნებლობის სააგენტოში განმარტავენ, წვრილფეხა პირუტყვის რეგისტრაციის პროცესია, რომელიც არ განხორციელებულა, განსხვავებით მსხვილფეხა პირუტყვის რეგისტრაციისგან.

„ეტიკეტირების ახალი რეგლამენტი მხოლოდ საქონლის ხორცს ეხება, თუმცა ეს არ ნიშნავს, რომ რადგან არ ეხება წვრილფეხა პირუტყვს, მათი ხორცი შეუმოწმებელია და ვეტერინარის ზედამხედველობის გარეშე შეიძლება მოხვდეს ბაზარზე.  უბრალოდ, მასზე არ ვრცელდება რეგლამენტის მოთხოვნა ეტიკეტირებასთან დაკავშირებით, რადგან წვრილფეხა პირუტყვის რეგისტრაცია წარმოებული არ არის,“ – ამბობს ბიძინა ჯიბლაძე, სურსათის ეროვნული სააგენტოს აჭარის რეგიონალური სამმართველოს ინსპექტორი.

რას უნდა მიაქციოს მომხმარებელმა ყურადღება ხორცის შეძენისას? ბიძინა ჯიბლაძე ამბობს, რომ ხორცთან ახლოს, გამოსაჩენ ადგილას აუცილებლად უნდა იყოს ეტიკეტიც, შეფუთული, გატარებული ან დაჭრილი ხორცის შემთხვევაში კი ეტიკეტი შეფუთვაზე უნდა იყოს დატანილი:

„ინფორმაცია უნდა იყოს განთავსებული ხორცის სარეალიზაციო ადგილთან და უნდა იყოს შესაძლებელი დადგენა, რომელი ხორცის არის კონკრეტული ეტიკეტი.  გარდა ამისა, მომხმარებელს აქვს საშუალება, მოსთხოვოს ბიზნესოპერატორს [ხორცის გამყიდველს], წარუდგინოს ჩანაწერი შესაბამის ჟურნალში, როდის მიიღო ეს ხორცი და რომელი სასაკლაოდან. ამას აქამდე სახელმწფო ორგანო სთხოვდა ბიზნესოპერატორს, ეს უკვე ხელმისაწვდომი ხდება მომხარებლისთვისაც, ამის ვალდებულება აქვს ბიზნესოპერატორს.“

ეტიკეტირების წესის დარღვევისთვის ბიზნესოპერატორი 400 ლარით, იმავე წელს დარღვევის მეორედ აღმოჩენის შემთხვევაში კი 1200 ლარით დაჯარიმდება.

ბაზრებსა და ხორცის მაღაზიებში მონიტორინგს სურსათის უვნებლობის სამსახურის ინსპექტირების ჯგუფები ახორციელებენ. აჭარაში ასეთი ექვსი ჯგუფია.

„ჩვენ ვმოქმედებთ გეგმის მიხედვით, რომელიც მტკიცდება სოფლის მეურნეობის მინისტრის ბრძანებით. მაგალითად, გასულ წელს განვახორციელეთ 700-მდე ობიექტის დოკუმენტური შემოწმება აჭარაში, დაახლოებით 350-მდე ნიმუშის აღება და 600-ზე მეტი ინსპექტირება. ექვსი ჯგუფი მუშაობს აჭარაში და ყოველდღიურად წარმოებს მონიტორინგი შესაბამის ობიექტებში. ზოგადად რისკის ანალიზის საფუძველზე ხდება შემოწმება და როცა არის რისკი, ხორციელდება გეგმიური შემოწმებაც და არაგეგმიურიც,“ – ამბობს ბიძინა ჯიბლაძე.

მსხვილფეხა  საქონლის იდენტიფიკაცია და სადგომის რეგისტრაცია სურსათის ეროვნულმა სააგენტომ 2015 წელს დაიწყო და 2018 წლის პირველ იანვრამდე უნდა განახორციელოს. არაიდენტიფიცირებული მსხვილფეხა საქონლის დაკვლა სასაკლაოზე აკრძალულია.

„ამ წუთას ნათესავთან ვარ და შემდეგ ნაქირავებ ბინაში ვიცხოვრებ. ნამდვილად ვიცი, რომ არაფერი გადმომეცემა და, შესაბამისად, საუბარი ამაზე არ არის“, – ასე უპასუხა მანანა კობახიძემ „ბათუმელების“ კითხვას ბათუმში საცხოვრებელი ბინით უზრუნველყოფის შესახებ. დღეს, 15 თებერვალს, მანანა კობახიძემ, როგორც საკონსტიტუციო სასამართლოს ახალმა მოსამართლემ, ფიცი დადო და უფლებამოსილების შესრულებას შეუდგა.

მანანა კობახიძე ამბობს, რომ ბინის ქირისთვის გათვალისწინებული ოფიციალური ხარჯით ისარგებლებს. მიიჩნევს, რომ სახელმწიფო მოსამართლეს ბინას არ უნდა ჩუქნიდეს. მანანა კობახიძის აზრით, „თავის დროზე ეს წესი მთლად დახვეწილი არ იყო, როცა მოსამართლეებს გადასცეს ბინები. ყოველ შემთხვევაში, ეს წესი აღარ გავრცელებულა ახალდანიშნულ მოსამართლეებზე. მოსამართლეს უნდა ჰქონდეს მუშაობის შესაბამისი პირობები, თუ ბათუმში არ აქვს საცხოვრებელი ადგილი, მაგრამ ეს არ ნიშნავს არც ჩუქებას, არც ყიდვას სახელმწიფოს ხარჯზე. ასეთი მიდგომა უკვე აღარ არის. მე არ განვსჯი იმ მოსამართლეებს, ვინც ისარგებლა ამ წესით, ეს სწორი იყო თუ არ იყო“.

მანანა კობახიძე საკონსტიტუციო სასამართლოს მოსამართლე იქნება 10 წლის განმავლობაში. დღეს ფიცის დადების ცერემონიალს პრეზიდენტი გიორგი მარგველაშვილი, პარლამენტის თავმჯდომარე, ირაკლი კობახიძე, უზენაესი სასამართლოს თავმჯდომარე, ნინო გვენეტაძე და აჭარის მთავრობის თავმჯდომარე, ზურაბ პატარაძე დაესწრნენ.

შუახევის, სოფელ უჩამბის ფიზიკა-მათემატიკის მასწავლებელი ფატი თურმანიძე „ბათუმელებთან“ ამბობს, რომ მაღალმთიანი რეგიონის მასწავლებლებს, ოქტომბრის და ნოემბრის თვეში ხელფასები ჩამოაჭრეს. სკოლის დირექციაში აცხადებენ, რომ ხელფასების ჩამოჭრის მიზეზი განათლების სამინისტროს მიერ დაშვებული შეცდომა იყო.

„სექტემბრის თვეში ხელფასზე ავიღეთ 35-პროცენტიანი დანამატი, როგორც მაღალმთიან რეგიონში მომუშავე პედაგოგებმა, ოქტომბერში კი მხოლოდ განაკვეთზე დაგვირიცხეს 140 ლარი. ეს, ბუნებრივია, წინასთან შედარებით ბევრად ნაკლები იყო.  სხვაობა ჩემს ხელფასზე მომცა 80 ლარით ნაკლები. როცა დირექტორს ვკითხეთ მიზეზი, გვითხრა შეცდომით მოხდა დარიცხვა, 35-პროცენტიანი დანამატი არ უნდა ყოფილიყოო“, – გვეუბნება პედაგოგი.

ფატი თურმანიძის თქმით, მსგავსი ფაქტი მოხდა თითქმის ყველა მაღალმთიან სკოლაში.

„მთის კანონის მიხედვით არსებულ სახელფასო დანამატს არ ვიღებ. ვფიქრობ, არჩევნების წინაპერიოდი იყო და ამიტომ დაგვირიცხეს სექტემბერში მაღალი დანამატები“, – გვეუბნება ის.

უჩამბის საჯარო სკოლის დირექტორი ჯემალ გამრეკელიძე გვეუბნება, რომ თავის დროზე დარიცხვები არასწორად მოხდა და შემდეგ თვეში შეცდომა გაასწორეს:

„სამინისტროდან მოვიდა ბრძანება, რომ შეცდომით მოხდა სექტემბერში დანამატების დარიცხვა, ამიტომ შემდეგ თვეებში  ნაკლები დავურიცხეთ პედაგოგებს“.

განათლების სამინისტროსგან მსგავსი შინაარსის ბრძანება მაწყვალთის საჯარო სკოლაშიც მიიღეს. სკოლის დირექტორი ჯემალ ზოიძეც შეცდომაზე საუბრობს.

„თათბირზე გვითხრეს, რომ ყველა მასწავლებელს დაემატა ხელფასი. პირველი მატება გაზაფხულზე იყო, მეორე კი სექტემბერში. ჯერ უნდა ყოფილიყო 17-პროცენტიანი მატება და შემდეგ 51-პროცენტიანი მატება. მაგრამ განაკვეთზე 142 ლარი უნდა დამატებოდა. რატომღაც ეს ინფორმაცია ბრძანებაში არ განთავსდა, როგორც საჭირო იყო ისე.  შეცდომა დაგვაშვებინეს. ამიტომ, სექტემბერში დარიცხული ხელფასი ოქტომბერ-ნოემბერში გავასწორეთ და განაკვეთზე 142 ლარი დავურიცხეთ“, – ამბობს დირექტორი.

შუახევის რესურსცენტრის ხელმძღვანელის, ედუარდ  გოგრაჭაძის განმარტებით, „მაღალმთიანი რეგიონების განვითარების შესახებ კანონის“ მიხედვით, მაღალმთიან რეგიონებში მასწავლებლებს საბაზო ხელფასზე 35 პროცენტი დანამატი ერიცხებათ. თუმცა, რესურსცენტრის ხელმძღვანელი გვეუბნება, რომ ამის შესახებ კარგად არ იყვნენ ინფორმირებული.

„კანონში არ იყო დაკონკრეტებული 35 პროცენტი საბაზო ხელფასზე უნდა დარიცხულიყო, თუ იმ ხელფასზე, რომელსაც ფაქტობრივად იღებდა პედაგოგი. ამიტომ, სექტემბრის თვეში ყველა პედაგოგს დაერიცხა ხელფასის 35 პროცენტი დანამატი, რაც შეცდომა იყო. 4 ოქტომბერს გამოვიდა მინისტრის ბრძანება, სადაც საუბარი იყო იმაზე, რომ  დანამატი დაერიცხებოდა ყველა პედაგოგს განურჩევლად სტატუსისა, ოღონდ საბაზო ხელფასზე 142 ლარი (საბაზო ხელფასი 405 ლარია). ანუ, ვისაც 18 საათი აქვს, იმათ გამოსდით დანამატი 142 ლარი, ვისაც ნაკლები აქვს, შესაბამისად, ნაკლები. თუ 18 საათზე მეტი აქვს პედაგოგს, მაინც 142 ლარს მიიღებს. ბუნებრივია, ამან გამოიწვია გაუგებრობა“.

რესურსცენტრის ხელმძღვანელის თქმით, „მაღალმთიანი რეგიონების განვითარების შესახებ კანონის“ მიხედვით, სექტემბრიდან ყველა პედაგოგი იღებს დანამატს.

საკონსტიტუციო სასამართლომ არსებითად განსახილველად მიიღო მოქალაქე ს.გ.-ს სარჩელი პარლამენტის წინააღმდეგ. მოქალაქე ასაჩივრებს წესს, რომელიც პოლიციელს ანიჭებს შესაძლებლობას, ოჯახში ძალადობის დროს, საკუთარი შეხედულების მიხედვით გამოსცეს შემაკავებელი ორდერი, ან უარი თქვას მის გამოცემაზე.

ს.გ.  ოჯახში ძალადობის მსხვერპლია. თუკი მისი სარჩელი დაკმაყოფილდება, შემაკავებელი ორდერის გამოცემის საკითხი მკაფიოდ განისაზღვრება და იგი აღარ იქნება დამოკიდებული პოლიციის ცალკეული თანამშრომლის კეთილსინდისიერებაზე. მოსარჩელე მიიჩნევს, რომ სადავოდ გამხდარი წესი მასში იწვევს დაუცველობისა და უმწეობის განცდას, ლახავს მის პატივსა და ღირსებას.

სარჩელის მიხედვით, არსებული რეგულაცია ეწინააღმდეგება „საქართველოს კონსტიტუციის“ მე-17 მუხლს, სადაც წერია: „ადამიანის პატივი და ღირსება ხელშეუვალია“, ასევე: „დაუშვებელია ადამიანის წამება, არაჰუმანური, სასტიკი, ან ღირსების შემლახავი მოპყრობა“.

რადგან მოსარჩელე ოჯახში ძალადობის მსხვერპლია, სარჩელი საკონსტიტუციო სასამართლოს არ გამოუქვეყნებია.

საქმეს არსებითად განიხილავს საკონსტიტუციო სასამართლოს პირველი კოლეგია.

ქობულეთის საკრებულოს წევრი „ნაციონალური მოძრაობიდან“ ბონდო თედორაძე აცხადებს, რომ ფიჭვნარში არსებული საბავშვო ბაღის შენობა, რომლის რეაბილიტაციაზეც ბიუჯეტიდან 800 ათასი ლარი დაიხარჯა, ისევ გასარემონტებელია. მისი თქმით,  შენობა ქობულეთის გამგეობამ ცოტა ხნის წინ ჩაიბარა, თუმცა კედლებზე ბათქაში დაზიანებულია, ეზო კი მოწესრიგებული არ არის.

„ფიჭვნარში არსებული საბავშვო ბაღი ჯერ გახსნილი არ არის და უკვე ხარვეზები გამოიკვეთა. გაწეული რემონტი არის ფუჭი, რადგან უხარისხოდ არის შესრულებული.

ამაში დაიხარჯა რვაასი ათასი ლარი, შემსრულებელი კომპანია არის „MTM“-ი. კომპანიის წარმომადგენელი გვეუბნება, რომ ქობულეთში უხვი ნალექი იცის და სამუშაოების დაგეგმვის დროს ეს ფაქტორი გათვალისწინებული უნდა ყოფილიყოო, სატენდერო პირობაში რაც მქონდა, მე ის გავაკეთეო. ჩვენ საკრებულოს სხდომაზე აღვნიშნეთ, რომ საბავშვო ბაღი რადგან ზღვასთან ახლოს მდებარეობს, წყალ და მარილგამძლე მასალები უნდა გამოეყენებინათ, თუმცა არ გაითვალისწინეს“.

ბონდო თედორაძის განცხადებით, საბავშვო ბაღის შენობა გასულ წელს უნდა ჩაბარებულიყო. „ეზოს მოპირკეთებისთვის კი 108 ათასი ლარი წელს დაუმატეს და კორუფციული გარიგების ნიშნებიც ჩნდება“.

ქობულეთის გამგებელი სულხან ევგენიძე „ბათუმელებთან“ საუბარში ადასტურებს, რომ ჩაბარებული საბავშვო ბაღის შენობის კედლები უკვე დაზიანებულია.

„ორი-სამი წელი აქვს საგარანტიო და კომპანიას მივწერეთ, რომ ეს ხარვეზები უნდა გამოასწოროს. ძირითადად გარე ფასადია დაზიანებული, არ იყო ალბათ კარგად შელესილი და წყალი შევიდა. ახლახან დასრულდა ეზოს კეთილმოწყობის ტენდერი და როცა ესეც დასრულდება, ამის შემდეგ, საბავშვო ბაღის გახსნამდე ინტერიერსაც და გარე ფასადზაც ხელმეორედ გადავაღებინებთ,“-ამბობს გამგებელი.

საბავშვო ბაღი 175 აღსაზრდელზეა გათვლილი. საბავშვო ბაღის გახსნის თარიღს გამგებელი ვერ აკონკრეტებს.

აჭარის საავტომობილო გზებისა და სამელიორაციო სისტემების მართვის დეპარტამენტი სპეციალიზებულ, მაღალი გამავლობის ხუთ ავტომანქანას [პიკაპს] შეისყიდის. ავტომანქანების შესაძენად დეპარტამენტს მაქსიმუმ 320 ათასი ლარი აქვს გათვალისწინებული.

ავტომანქანები უნდა იყოს ახალი, არანაკლებ 2016 წლის გამოშვების, ექსპლუატაციაში არმყოფი; ვერცხლისფერი, მუქი ვერცხლისფერი ან/და შავი.

დეპარტამენტის მიერ გამოცხადებულ ელექტრონულ ტენდერში წინადადებების მიღება მიმდინარე წლის 2 მარტს დაიწყება და 7 მარტს დასრულდება. ავტომანქანები დეპარტამენტს ხელშეკრულების გაფორმებიდან ერთ თვეში უნდა ჩაბარდეს.

დეპარტამენტი აჭარის მთავრობის საქვეუწყებო დაწესებულებაა.

საავტომობილო გზებისა და სამელიორაციო სისტემების მართვის დეპარტამენტისთვის აჭარის 2017 წლის ბიუჯეტში მთლიანობაში 46 მილიონი ლარია გამოყოფილი.

დეპარტამენტს, მიმდინარე წლის 11 იანვრიდან, აჭარის მთავრობის აპარატის მონიტორინგის დეპარტამენტის ყოფილი უფროსი, არჩილ ჩიქოვანი ხელმძღვანელობს.

სააქციო საზოგადოება „საქართველოს სახელმწიფო ელექტროსისტემის“ მმართველთა საბჭო თავმჯდომარეს, სულხან ზუმბურიძეს,  ქონებრივი დეკლარაციის მიხედვით, 2016 წლის განმავლობაში შემოსავლების სახით 335 656 ლარი აქვს მიღებული, რაც ყოველთვიურად 27 971 ლარია.

ბოლო სამი წლის განმავლობაში სულხან ზუმბურიძეს, შემოსავლების სახით, მთლიანობაში, 817 359 ლარი აქვს მიღებული [სხვა წლების ქონებრივი დეკლარაციები არ იძებნება]. ზუმბურიძე მმართველთა საბჭოს თავმჯდომარის პოსტზე 2007 წლიდან მუშაობს.

სწორედ სულხან ზუმბურიძის მმართველობის ქვეშ მყოფი სახელმწიფო კომპანიის წინააღმდეგ მართავს აქციებს ბათუმში მცხოვრები რამდენიმე ათეული ოჯახი. საქართველოს სახელმწიფო ელექტროსისტემა მაღალი ძაბვის გადამცემ ქსელს აშენებს, რომლითაც, წინასწარი ინფორმაციით, ახალი ჰესების მიერ გამომუშავებული ელექტროენერგია უნდა გატარდეს თურქეთის მიმართულებით.

მშენებლობის პროცესში კომპანიას არაერთი კერძო მესაკუთრის ქონების შესყიდვა დასჭირდა, მათ შორის ბათუმშიც. სახელმწიფო კომპანიაში, რომლის ხელმძღვანელიც სულხან ზუმბურიძეა, მიაჩნიათ, რომ მოქალაქებისთვის კომპენსაციის გაცემა სამი წლის წინ არსებული ლარის კურსით, სამართლიანია.

საქართველოს სახელმწიფო ელექტროსისტემა ბათუმის ორ ქუჩაზე [ტაო, ხიხანი] მცხოვრებ ოჯახებს, ექსპროპრიაციის წესით საცხოვრებელ სახლებსა და მიწის ნაკვეთებს ართმევს. როგორც ტაოს, ისე ხიხანის ქუჩაზე მცხოვრები კერძო მესაკუთრეები აცხადებენ, სახელმწიფო კომპანია მათი ქონების ხელში ჩაგდებას მიზერულ ფასად ცდილობს – ერთ კვადრატულ მეტრ მიწაში, როგორც ეს მოქალაქეები ამბობენ, სახელმწიფო მათ 20-23 ლარს სთავაზობს. კომპანიაში აცხადებენ, რომ მოქალაქეებს კომპენსაციას სთავაზობენ დოლარის იმ კურსით, რომელიც იყო სამი წლის წინ, ანუ 1,65 თეთრის ფარგლებში. კომპანიაში მიაჩნიათ, რომ ეს სამართლებრივად სწორი მიდგომაა.

კერძო მესაკუთრე ნაირა იაკობაძე ამბობს, რომ მას და მის მეზობლებს „გროშები შესთავაზეს“. „3400 მეტრი მიწა მაქვს, 180 კვადრატული სახლი და 500 ძირზე მეტი ხეხილი. შემომთავაზეს 150 ათასი ლარი. მე მყავს სამი ობოლი, ჩემმა ქმარმა ეს ქონება დაუტოვა თავის სამ შვილს. მე ისინი ამ ქონებით უნდა დავაყენო გზაზე. მათი შვილები სკოლებშიც კი საზღვარგარეთ სწავლობენ, ჩემს შვილებს იმის უფლება არ უნდა ჰქონდეთ, რომ საქართველოში ისწავლონ უნივერსიტეტში? რა ვქნა 150 ათასი ლარით, ვიყიდი ერთ ბინას და ეგაა. ჩემს მიწაზე ხეხილი მაქვს, ბოსტნეული მომყავს, დარწმუნებული ვარ, რომ შვილები მშიერი არ დამრჩება, დავთესავ ბაღჩაში ყველაფერს და გამოვკვებავ, მაგრამ ერთი ბინით რა გავაკეთო?“ – ამბობს ტაოს ქუჩაზე მცხოვრები ქონების მესაკუთრე.

ნაირა იაკობაძე ხაზგასმით აცხადებს, რომ ქვეყნის განვითარებას არ ეწინააღმდეგება, მაგრამ ასევე სახელმწიფოსგან  ღირსეულ მოპყრობას ითხოვს: „მე სახლში არ მაქვს რემონტი და ევრორემონტის ფასს არც ვითხოვ, მე ვითხოვ მშენებარე ბინის ფასს. 350 დოლარი ღირს ჩვენთან მშენებარე ბინის კვადრატი და მე მაძლევენ 200 ლარს, რა ვიყიდო. 60-დან 100 დოლარამდე ღირს მიწის კვადრატი, მე მაძლევენ 20 ლარს. მაინც ჩამოგართმევთო. გამოიჩინოს სახელმწიფომ ჰუმანურობა და იზრუნოს თავის მოქალაქეებზე. არ შეიძლება ჩვენი გაღარიბების ხარჯზე გამდიდრდნენ სხვები. მე ვთხოვ სახელმწიფოს, ნუ მოგვექცევიან ძაღლებივით. ჩვენ ვითხოვთ ჩვენი ქონება წესიერად შეაფასონ. მეტს არაფერს“.

იმავე ვითარებაშია ტაოს ქუჩაზე მცხოვრები უმიან წითელაძის ოჯახი. ამ ოჯახს საკუთრებაში აქვს 1160 კვ/მ მიწის ნაკვეთი ნარგავებით და  85 კვადრატული მეტრი სახლი. „მიწაში – ერთ კვადრატულ მეტრში 20 ლარს მთავაზობენ. მთლიანობაში ჩემი კარმიდამო შეაფასეს 102 ათას ლარად, ეს გამოდის 35 ათასი დოლარი. რა უნდა ვიყიდო ამ ფასად, ალბათ, ვიყიდი ერთ პატარა ბინას, მაგრამ მე არ მინდა ბინაში ცხვორება. ეგეც რომ არ იყოს, იმ ბინაში რითი უნდა ვიარსებო, ახლა ოჯახი მეურნეობით ვირჩენთ თავს. ეზოში მაქვს პროფილაქტიკა და მაგით ბანკის ვალებს ვიხდი. ამ წუთში სამხარაულის ექსპერტიზაზე არიან წასული მეუღლე და მეზობლის მამაკაცები… 9 მოსახლე ვართ, ვისაც ეს გვემუქრება. ასევე ეს ეხება 20-მდე მოსახლეს, რომლებსაც მიწები აქვთ დარეგისტრირებული, მაგრამ სახლის აშენების უფლება არ მისცეს“, – ამბობს უმიანი.

საქართველოს სახელმწიფო ელექტროსისტემამ 100 345 ლარი შესთავაზა იმავე ქუჩაზე მცხოვრებ ქოქოლაძეების ოჯახს. სოფიო ქოქოლაძე ამბობს, რომ ამ ფასად არ დათმობენ ორსართულიან სახლს: „250 კვადრატი ახალგარემონტებული სახლი მაქვს და სახლის ჩათვლით მიწა – 500 კვადრატია. სახლის ერთი კვადრატი 513 ლარად შემიფასეს, ხოლო მიწა – 20 ლარად. არ მინდა გადასვლა, ძლივს მოვიწყე ცხოვრება. ბინა არ გვინდა, მიწა გვინდა ვიყიდოთ და სახლი ავაშენოთ. ასე უფრო კარგად ვიგრძნობთ თავს“.

ოჯახები ამბობენ, რომ არ იციან როგორ შეინარჩუნონ გარემო და ქონება, რომელსაც მთელი ცხოვრება ქმნიდნენ; მაგრამ „საქართველოს სახელმწიფო ელექტროსისტემის“ მმართველთა საბჭოს წევრმა, გიორგი შარკოვმა იცის, რომ ეს ოჯახები ვერც ერთ შემთხვევაში ვერ შეინარჩუნებენ ამ ქონებას, რადგან ტერიტორია უკვე ელექტროსისტემის საკუთრებაა და არა მოქალაქეების:

„მათი მოთხოვნა ეხება კომპენსაციების ოდენობას. საკომპენსაციო თანხის ოდენობა დადგენილია დამოუკიდებელი აუდიტორის მიერ, შეთანხმებულია მსოფლიო ბანკთან და საქართველოს ხელისუფლებასთან. დამტკიცებულია განსახლების გეგმა და სწორედ ამ განსახლების გეგმის მიხედვით, რაც ეკუთვნით კომპენსაცია იმ თანხას გავცემთ. მათ საკომპენსაციო პაკეტს ვთავაზობთ. მათი უკმაყოფილება არის ის, რომ არასაკმარისად მიიჩნევენ თანხის ოდენობას. ჩვენ არაერთხელ ავუხსენით, რომ თუ ისინი არ ეთანხმებიან კომპენსაციის ოდენობას, მაშინ მივდივართ ექსპროპრიაციის გზით. ეს ნაკვეთები ტაოს ქუჩაზე უკვე ჩვენს საკუთრებაშია. რაც შეეხება კომპენსაციის ნაწილს, მათ შეუძლიათ სასამართლოში გაასაჩივრონ და თუ დაადასტურებენ, რომ საკომპენსაციო თანხა უფრო მეტი უნდა იყოს, რა თქმა უნდა, დავემორჩილებით სასამართლო გადაწყვეტილებას“.

სახელმწიფოს პოზიტიური ვალდებულებაა ექსპროპრიაციის შემთხვევაში მოქალაქეების მდგომარეობა არ გააურესოს. გიორგი შარკოვი მიიჩნევს, რომ ეს ასეც არის: „ნამდვილად არ არის ამ ხალხის უფლებები იგნორირებული, ჩვენ სახელმწიფოს სახით დავიქირავეთ დამოუკიდებელი აუდიტორი, რომელმაც შეაფასა მათი ქონება აგურ-აგურ. მე ვერ გეტყვით ბათუმში ეს ქონება რა ღირს, ეს დაადგინა აუდიტორმა, მე მის რევიზიას ვერ გავაკეთებ, ეჭვის ქვეშ ვერ დავაყენებ აუდიტის დასკვნას. შეუძლიათ მოიწვიონ ალტერნატიული აუდიტი, ყოველგვარი აჟიოტაჟის გარეშე მიიტანონ ეს სასამართლოში და პრობლემის გარეშე ვალდებული ვიქნებით შევასრულოთ ეს გადაწყვეტილება“.

გიორგი შარკოვი ვარაუდობს, რომ სასამართლო დავები წლობით არ გაიწელება, რადგან ეს მათ ინტერესებში არ შედის. მაგრამ იქვე დასძენს, რომ თუ კომპანია ჩათვლის საჭიროდ, სასამართლოს პირველი ინსტანციის გადაწყვეტილებას აუცილებლად გაასაჩივრებს სხვა ინსტანციებში, რაც თავისთავად გულისხმობს დავის წლობით გაგრძელებას.

გარდა ამისა, გიორგი შარკოვი სამართლიანობაზე საუბრის დროს დაბეჯითებით აცხადებს, რომ მათი შეთავაზება მოქალაქეებისადმი სამართლიანია და ეს სხვაგვარად წარმოუდგენელია, რადგან „ამ პროცესს აკვირდება მსოფლიო ბანკი. შესაბამისად, მსოფლიო ბანკის პოლიტიკიდან გამომდინარე, მოსახლეობა არ უნდა იყოს დაჩაგრული, მსოფლიო ბანკი არ დაუშვებს მოქალაქეების პირობების გაუარესებას“.

გიორგი შარკოვი პირდაპირ არ პასუხობს კითხვას, რამდენად სამართლიანად მიაჩნიათ მსოფლიო ბანკში კომპენსაციის გაცემა სამი წლის წინ არსებული ლარის კურსით.

„მსოფლიო ბანკის პოზიციის გასაგებად შეგიძლიათ მიმართოთ მსოფლიო ბანკს. მე ვერ გეტყვით. მე გითხარით, რომ ეს შეთანხმებულია, ჩემთვის შეთანხმება ნიშნავს, რომ ის ეთანხმება ამას.“, – განუცხადა მან „ბათუმელებს“.

საქართველოს სახელმწიფო ელექტროსისტემის სამი წლის წინ გაწერილ სამოქმედო დოკუმენტში ლარის კურსი დოლართან მიმართებაში იყო 1,65. გიორგი შარკოვი ადასტურებს, რომ სახელმწიფო მოქალაქეებს დღესაც იმავე კურსით სთავაზობს კომპენსაციას: „მიდგომა არ შეცვლილა იმიტომ, რომ განსახლების სამოქმედო გეგმაში არსებული თანხები დამტკიცებული და შეთანხმებული იქნა მაშინ. გეთანხმებით, მითითებული იყო კურსი“.

შეკითხვაზე – სახლების დასანგრევად ძალას თუ გამოიყენებენ, გიორგი შარკოვი პასუხობს: „ჩვენ მივმართავთ კანონით დადგენილ ყველა საშუალებას, ვინაიდან ეს პროექტი არის რეგიონისთვის და ქვეყნისთვის ძალიან მნიშვნელოვანი“.

ეს არ არის პირველი შემთხვევა, როცა ბათუმში ექსპროპრიაციის გზით მოქალაქეებს სახლები დაუნგრიეს. ერთ-ერთი ასეთი ფაქტი მოხდა 2012 წელს, როდესაც სახელმწიფომ ძალის გამოყენებით დაუნგრია მოქალაქეებს კარმიდამო, მათგან ერთ-ერთი მესაკუთრე, მარტოხელა ქალი მოგვიანებით სახლის ნანგრევებზე გარდაცვლილი იპოვეს”.

ფოტო: საპროტესტო აქცია სამართლიანი კომპენსაციის მოთხოვნით