Batumelebi | საპროტესტო აქცია სამართლიანი კომპენსაციის მოთხოვნით საპროტესტო აქცია სამართლიანი კომპენსაციის მოთხოვნით – Batumelebi
RU | GE  

საპროტესტო აქცია სამართლიანი კომპენსაციის მოთხოვნით

ბათუმს შემოერთებულ ტერიტორიაზე, ხიხანის ქუჩაზე მცხოვრებმა ადამიანებმა საპროტესტო აქცია დღეს, 13 თებერვალს, აჭარის მთავრობასთან გამართეს. ისინი მთავრობის თავმჯდომარისგან, ზურაბ პატარაძისგან მოითხოვენ რეაგირებას „უსამართლო კომპენსაციის გამო“.

ხიხანის ქუჩაზე მცხოვრებ დაახლოებით 80 ოჯახს საკუთრების დათმობა უწევს ელექტროგადამცემი მაღალი ძაბვის ხაზის გაყვანის გამო. „7 ლარს გვიხდიან კვადრატულ მეტრში. მაგალითად, მე 807 კვადრატულ მეტრში 5600 ლარს მთავაზობენ. სახლს არ ეხებიან, მაგრამ მიწა თუ არ მექნა, რით უნდა ვიარსებო? ეს აბუჩად აგდებაა ხალხის. დამოუკიდებელ ექსპერტიზას იგივე მიწა კვადრატული 35 დოლარად აქვს შეფასებული“, – უთხრა „ბათუმელებს“ ხიხანის ქუჩაზე მცხოვრებმა, ზექიე გაბიტაძემ.

აქციის მონაწილეებს აჭარის მთავრობის აპარატის რამდენიმე წარმომადგენელი შეხვდა. ისინი მოსახლეობას საკითხის შესწავლას დაჰპირდნენ.

ხიხანის ქუჩაზე მცხოვრები მოსახლეობა საპროტესტო აქციას ბოლო რამდენიმე დღეა მართავს. 

 

 

 

ნეტგაზეთის მასალების სხვა გამოცემებში გადაბეჭდვის წესი
ავტორი