განათლების სამინისტრომ სკოლებს საგაზაფხულო დასვენების დღეები განუსაზღვრა

საქართველოს განათლების სამინისტრომ ზოგადსაგანმანათლებლო სკოლებს დასვენების დღეები განუსაზღვრა. ზამთრის არდადეგები 30 დეკემბერიდან 15 იანვრამდე იქნება,  საგაზაფხულო არდადეგები – 8 მარტიდან 15 მარტამდე, ხოლო ზაფხულის არდადეგები  – 15 ივნისიდან 15 სექტემბრამდე.

განათლების სამინისტროს ინფორმაციით, სიახლეა ის, რომ სკოლებს საგაზაფხულო არდადეგები დაემატა, რაც წინა წლებში არ იყო.

ზოგადსაგანმანათლებლო დაწესებულებაში სასწავლო წლის დაწყების თარიღად განსაზღვრულია 15 სექტემბერი, ხოლო დასრულების თარიღად – 15 ივნისი.

„იმ შემთხვევაში, თუ 15 სექტემბერი ემთხვევა უქმე ან დასვენების დღეს, სასწავლო წელი დაიწყება 15 სექტემბრის შემდგომ პირველ სამუშაო დღეს, ხოლო თუ 15 ივნისი ემთხვევა დასვენების დღეს, სასწავლო წლის დასრულების თარიღად განისაზღვრება 15 ივნისის წინა პარასკევი,“ – ნათქვამია ბრძანებაში.

პირველი კლასის მოსწავლეებისათვის სასწავლო წელი დასრულდება 27 მაისს, ხოლო დამამთავრებელი კლასის მოსწავლეებისთვის 20 მაისს.

ბრძანების მიხედვით, „თუ აღნიშნული თარიღები ემთხვევა უქმე ან დასვენების დღეს, სასწავლო წელი პირველი კლასის მოსწავლეებისათვის დასრულდება 27 მაისამდე ბოლო სამუშაო დღეს, ხოლო დამამთავრებელი კლასის მოსწავლეებისთვის – 20 მაისამდე ბოლო სამუშაო დღეს.“