განათლების საერთაშორისო ცენტრმა ორი სასტიპენდიო პროგრამა – „სამაგისტრო პროგრამები საფრანგეთში 2017-2018“ და „სასტიპენდიო პროგრამები უნგრეთში (Stipendium Hungaricum) 2017-2018“ გამოაცხადა.
„სამაგისტრო პროგრამები საფრანგეთში 2017-2018“ განხორციელების შედეგად საქართველოს 15-მდე მოქალაქე შეძლებს საფრანგეთში, როგორც ფრანგულენოვან, ასევე ინგლისურენოვან პროგრამებზე პრიორიტეტულად განსაზღვრული მიმართულებით მაგისტრის ხარისხის მოპოვებას და მიღებული ცოდნის საქართველოში რეალიზებას.
სასტიპენდიო პროგრამა უნგრეთში, როგორც ცენტრის განცხადებაში წერია, მიზნად ისახავს 50 ქართველი სტუდენტის დაფინანსებას ბაკალავრიატის, მაგისტრატურის, ინტეგრირებული ხუთწლიანი მაგისტრატურისა და დოქტორანტურის საგანმანათლებლო პროგრამებზე სწავლის გასაგრძელებლად შემდეგ მიმართულებებზე:
STEM [მეცნიერება, ტექნოლოგია, ინჟინერია და მათემატიკა], სიცოცხლის შემსწავლელი მეცნიერებები, სამედიცინო, სპორტისა და ხელოვნების დარგები.
მსურველებმა საკონკურსო განაცხადები და შესაბამისი დოკუმენტაცია [მათ შორის უცხო ენაზე შედგენილი] უნდა წარადგინონ ელექტრონულ მისამართზე: www.ice.gov.ge
ოფიციალური ინფორმაციით, განათლების საერთაშორისო ცენტრმა 2014-2016 წლებში 270 სასწავლო სტიპენდია გასცა საზღვარგარეთ სწავლის მსურველ საქართველოს მოქალაქეებზე სამაგისტრო და სადოქტორო ხარისხის მოსაპოვებლად.
