Batumelebi | რეგულაციები და ბათუმის ახალი არქიტექტურა ისევ მაღლივი შენობებით რეგულაციები და ბათუმის ახალი არქიტექტურა ისევ მაღლივი შენობებით – Batumelebi
RU | GE  

რეგულაციები და ბათუმის ახალი არქიტექტურა ისევ მაღლივი შენობებით

 

ბათუმის მერმა გიორგი ერმაკოვმა ერთი კვირის განმავლობაში 14 ზონალურ შეთანხმებას მოაწერა ხელი. მათგან უმეტესობა განაშენიანების ინტენსივობის კოეფიციენტის, ე.წ. K2-ის გაზრდას ითვალისწინებდა, რაც შენობის სიმაღლეში გაზრდასაც გულისხმობს. შენობები სიმაღლეში გაიზრდება ბათუმის ცენტრალურ ნაწილშიც, სადაც ორი წლის წინ „მშენებლობებისგან განტვირთვის მიზნით“ სპეციალური რეგულაციაც დაწესდა. რეგულაცია „ფასიან ზონაში“ ერთ დამატებულ კვადრატულ მეტრზე 150 ლარის გადახდას ითვალისწინებს, ამავე ზონაში გასაყიდი კვადრატული მეტრი ბინის ფასი 700-1000 დოლარია. რეგულაცია გარკვეულ შეზღუდვებს მოსაკრებლის გადახდის შემთხვევაშიც ითვალისწინებს, თუმცა ხშირ შემთხვევაში ქალაქში სიმაღლეს ამ შეზღუდვების გვერდის ავლით ყიდიან.


გიორგი ერმაკოვმა დაახლოებით ორი კვირის წინ ხელი მოაწერა ბრძანებას ზონალურ შეთანხმებაზე თანხმობის შესახებ, რომლითაც კომპანია „BIC“-ი ბათუმში, ფარნავაზ მეფის #107-109-111-ში ე.წ K2 კოეფიციენტის გაზრდას 9,0-მდე ითხოვდა. ამ ადგილზე კომპანია მრავალბინიანი სახლის მშენებლობას გეგმავს. 

ამავე ქუჩის # 92-94-ში მდებარე 1296 კვ/მ არასასოფლო სამეურნეო მიწის ნაკვეთზე მრავალბინიანი სახლის აშენებაზე ნებართვა შპს „ბათუმი 2012“-მაც მიიღო. მშენებლობა 2016 წლის 30 მარტამდე უნდა დასრულდეს.

მრავალფუნქციური საცხოვრებელი კომპლექსის აშენებას გეგმავს ბათუმში, შავშეთის ქუჩის #24-ში მდებარე 3317 კვ/მ მიწის ნაკვეთზე შპს „ოთხი ძმა“. ამ კოპანიამ განაშენიანების კოეფიციენტის გაზრდა 4,8-მდე მოითხოვა და თანხმობა მიიღო.

ზონალურ შეთანხმებაზე დადებითი პასუხი მიიღო შპს „მომავლის სახლმაც“, რომელიც მელიქიშვილისა და ფარნავაზ მეფის ქუჩების კვეთაში მრავალბინიანი საცხოვრებელი სახლის მშენებლობას გეგმავს. კომპანიამ ინტენსივობის კოეფიციენტის გაზრდა 6,3-მდე მოითხოვა.
შპს „რეალ-მშენმა“ სპეციალური ზონალური შეთანხმების თაობაზე მერიისგან თანხმობა ორი კვირის წინ მიიღო. კომპანია ბათუმში, ტბელ აბუსერიძის ქუჩაზე #53-55ბ-ში მდებარე 1091 კვადრატულ მეტრ ფართობზე მრავალფუნციური დანიშნულების ობიექტს აშენებს. კომპანიამ განაშენიანების ინტენსივობის კოეფიციენტის 4,8-მდე გაზრდა მოითხოვა და თანხმობაც მიიღო. კომპანიის დირექტორის ზაურ გოგიტიძის თქმით, ეს იმას ნიშნავს, რომ 11-სართულიან შენობას კიდევ 3-4 სართული დაემატება.

თანხმობა მიიღო შპს „სანდრომაც“ – კომპანია ბათუმში, გუდიაშვილის ქუჩის #16-ში მრავალბინიან საცხოვრებელ სახლს ააშენებს.
ინტენსივობის კოეფიციენტის გაზრდა ითხოვა შპს „ლიონმაც“, კომპანია მახინჯაურში, 600 კვ.მეტრზე მრავალბინიან საცხოვრებელ სახლს აშენებს, კომპანიამ ე.წ. K2 კოეფიციენტის 3,3-მდე გაზრდა მოითხოვა.

ამ პროექტებიდან რამდენიმეს განხორციელება იმ ზონაშია დაგეგმილი, სადაც განაშენიანების ინტენსივობას ბათუმის საკრებულოს დადგენილება არეგულირებს.

ბათუმის ცენტრალურ ნაწილში მშენებლობის რეგულაციები ბათუმის საკრებულომ 2013 წელს გაამკაცრა და ე.წ. ზონალური მოსაკრებელი შემოიღო. ამ იდეის ავტორი მაშინ ქალაქის მთავარი არქიტექტორი გიორგი რამიშვილი იყო. იგი მიიჩნევდა, რომ ქალაქის ცენტრში მშენებლობის ინტენსივობის კოეფიციენტის გაზრდისთვის მოსაკრებლის დაწესება დეველოპერების გარეუბნებით დაინტერესებას წაახალისებდა. რეგულაციას თავიდანვე გამოუჩნდნენ მოწინააღმდეგეები, რომლებიც მიიჩნევდნენ, რომ ეს არათუ წაახალისებდა მშენებლობებს გარეუბნებში, არამედ რეგიონი დაკარგავდა ინვესტორებს, რომლებიც ქალაქის ცენტრში მშენებლობებით იყვნენ დაინტერესებულნი. საკრებულომ მაშინ მოწინააღმდეგეების მოსაზრებები არ გაითვალისწინა.

საკრებულოს დადგენილების მიხედვით, განაშენიანების ინტენსივობის გადასახადი დაწესდა ბათუმში, გოგებაშვილისა და ჭავჭავაძის ქუჩის კვეთასთან არსებული წრიულიდან გრიბოედოვის ქუჩის კვეთამდე, ჭავჭავაძისა და გრიბოედოვის ქუჩების კვეთიდან ნინოშვილის ქუჩის კვეთამდე, გრიბოედოვისა და ეგნატე ნინოშვილის ქუჩების კვეთიდან სულიკო ჟღენტის ქუჩის კვეთამდე, სულიკო ჟღენტის ქუჩის ორივე მხარეს, გოგებაშვილის ქუჩების კვეთიდან ჭავჭავაძის ქუჩების კვეთაში არსებულ წრიულამდე, გოგებაშვილის ქუჩის ორივე მხარეს, სანაპირომდე.

დადგენილების მიხედვით, ქალაქის ცენტრში განაშენიანების ინტენსივობის კოეფიციენტის გაზრდა ზონალური მოსაკრებლის გადახდას ითვალისწინებს. საზოგადოებრივ საქმიან ზონაში განაშენიანების კოეფიციენტი 3,0-ა, რაც მაქსიმუმ 7 სართულის მშენებლობას ითვალისწინებს, ხოლო საცხოვრებელ ზონაში – 2.2, რაც 5 სართულის მშენებლობას გულისხმობს, რეკრეაციულ ზონაში მშენებლობა დაუშვებელია.

უკვე გაცემული მშენებლობის ახალი ნებართვების მიხედვით კი, ბათუმის ცენტრალურ ნაწილში, რომლის მშენებლობებისგან განსატვირთადაც საკრებულომ ორი წლის წინ რეგულაცია შემოიღო, მაღლივი შენობების აგების ტენდენცია გაგრძელდება. ყველა მშენებელი კომპანია კი, ზონალურ მოსაკრებელს არ გადაიხდის. მოსაკრებელზე შეღავათებს მიიღებენ ის კომპანიები, რომლებიც ახალი კორპუსების აშენებას გეგმავენ მთავრობის პროგრამის ფარგლებში, რომელიც ქალაქში არასტანდარტული საცხოვრისის ჩანაცვლების მიზნით ახალი კორპუსის მშენებლობას ითვალისწინებს. გარდა ამისა, ბათუმის საკრებულოს გადაწყვეტილებით, მოსაკრებლისგან თავისუფლდება დეველოპერი, რომელიც 30-მილიონიან ინვესტიციას განახორციელებს: მაგალითად, კომპანია „BIC“-ი, რომელიც ბათუმში, ფარნავაზ მეფის #107-109-111-ში მრავალბინიანი სახლის მშენებლობას გეგმავს, მონაწილეობს `ბათუმში არასათანადო-არასტანდარტული საცხოვრისის ლიკვიდაციის სახელმწიფო პროგრამაში~. ამ პროგრამაში მონაწილე კომპანიები კი შეღავათებით ისარგებლებენ – ზონალური მოსაკრებლისგან თავისუფლდებიან. ამ კომპანიამ კოეფიციენტის გაზრდა 9,0-მდე მოითხოვა და თანხმობაც მიიღო.

„K2-ის გაზრდისას გათვალისწინებული უნდა იყოს სხვისი – მშენებლობის ზონაში მცხოვრებლების ან მოპირდაპირე ნაკვეთების მფლობელების ინტერესებიც. თუ განაშენიანების გეგმა დამუშავდება, შესაძლოა ერთ კონკრეტულ მიწის ნაკვეთზე მივიღოთ ობიექტები, რომლებსაც ექნებათ გადაჭარბებული კოეფიციენტები. ეს უნდა დაბალანსდეს სხვა მიწის ნაკვეთების ხარჯზე. იმას არ ითვალისწინებენ, რაც არის ყველაზე მნიშვნელოვანი. მე არქიტექტორი ვარ და მშენებლობას ვემხრობი, მაგრამ ეს უნდა იყოს გონივრულ ფარგლებში“, – ამბობს ბათუმის ყოფილი მთავარი არქიტექტორი გიორგი რამიშვილი.

არქიტექტორის მოსაზრებით, რეგულაციების დაწესება ერთ კონკრეტულ ზონაში კი არა, მთელ ქალაქშია საჭირო: „2013 წელს მოსაკრებლის დაწესებით, ქალაქის ცენტრალურ ნაწილში ე.წ. ავანტიურისტული პროექტები შევაჩერეთ. მენაშენეს აღარ უღირდა ცენტრში აშენება, რადგან დიდ მოგებას ვეღარ ნახავდა. თანაც რეგულაცია მოსაკრებლის გადახდის შემთხვევაშიც ითვალისწინებს პარამეტრების დაცვას: გადასახადი არ ნიშნავს იმას, რომ აუცილებლად უნდა მიიღოს დეველოპერმა თანხმობა. თბილისში მთელ ქალაქზეა რეგულაცია დაწესებული. ვფიქრობ, ამაზე ჩვენც უნდა ვიმსჯელოთ“.

რას ფიქრობენ ქალაქის ცენტრალურ ნაწილში რაგულაციებს მიღმა წამოწყებულ ახალ მშენებლობებზე საკრებულოში? საკრებულოს წევრი ზაურ ახვლედიანი: „ბოლოს ორი შეხვედრა ჩავატარეთ ფრაქცია რესპუბლიკელებმა ამ თემაზე არქიტექტორებთან ერთად. დეველოპერებსაც ველოდით, თუმცა ისინი ნაკლებად ესწრებიან მსგავს შეხვედრებს. ვისაუბრეთ რეგულაციებზე, რომლებსაც ქართული კანონმდებლობა არ ითვალისწინებს, თუმცა ითვალისწინებენ საერთაშორისო კონვენციები, რომლებზეც მიერთებულია საქართველო. ჩვენს მოსაზრებებს, რომ რეგულაციები მოვიყვანოთ საკანონმდებლო დონეზე, ჰყავს მომხრეებიც და მოწინააღმდეგეებიც, როგორც დეველოპერებში, ასევე არქიტექტორებშიც. რეგულაციებთან დაკავშირებით ივლისამდე ჩამოვყალიბდებით, მაგრამ პირველ ეტაპზე არა მგონია ეს შეეხოს კოეფიციენტებს. ჯერ საკანონმდებლო ჩარჩო უნდა მომზადდეს.“

 

ბათუმში გასული წლის ბიუჯეტის შემოსულობებში ზონალური მოსაკრებლის გადასახადმა მილიონამდე ლარი შეადგინა (ერთ კვადრატულ მეტრზე _ 150 ლარი). ეს იმას ნიშნავს, რომ დეველოპერს რეგულაციის მოქმედების შემთხვევაშიც კი, მშენებლობის წამოწყება მაინც ცენტრალურ ნაწილში ურჩევნია. ქალაქის ამ ნაწილში კვადრატული მეტრი ბინის ფასი 700-1000 დოლარია.

ნეტგაზეთის მასალების სხვა გამოცემებში გადაბეჭდვის წესი
ცაგო კახაბერიძე, ფოტო: მანანა ქველიაშვილი