ამინდის გაუარესების გამო ხულოს მუნიციპალიტეტის ცხრა სოფელს ამ დროისთვის ელექტროენერგია არ მიეწოდება.
ხულოს მუნიციპალიტეტის გამგებლის თანაშემწის, მალხაზ ქათამაძის ინფორმაციით, ხულოში, მაღალი ზონის სოფლებში, თოვლის ახალი საფარი 50, დაბაში კი 25 სმ-ს აღწევს. მისივე ინფორმაციით, სოფლებში – გელაურაი, პანტნარი, გობაძეები, დიდაჭარა, დიოკნისი, რიყეთი, დანისპარაული, ბეღლეთი, კორტოხი – ელექტროენერგია დღეს, 16 თებერვალს, დილით, ავარიულად გამოირთო და ამ დროისთვის აღდგენითი სამუშაოები მიმდინარეობს.
შუახევის მუნიციპალიტეტის გამგეობის საზოგადოებასთან ურთიერთობის სამსახურის უფროსის, იამზე ფუტკარაძის ინფორმაციით, ელექტროენერგია შუახევში სოფელ ჭვანას, წყალსაყარსა და ბარათაულს არ მიეწოდება.
რაც შეეხება ქედის მუნიციპალიტეტს, აქ ელექტროენერგია სოფელ კოლოტაურის ნაწილს, 90-მდე აბონენტსა და ოქტომბრის თემის ოთხ სოფელს არ მიეწოდება.
ქედის მაღალი ზონის სოფლებში: ზუნდაგაში, ხარაულასა და ნამონასტრევში, თოვლის ახალი საფარი ნახევარ მეტრს აღემატება.
ამ დროისთვის აჭარის მაღალმთიანეთში ინტენსიურად თოვს, ადგილობრივ გამგეობებში აცხადებენ, რომ თოვლს ამ დრომდე გადაადგილებაში პრობლემები არ შეუქმნია.
ქედის მუნიციპალიტეტი / 16.02.2017 / ეკა ბარამიძის ფოტო
