მთავარი,სიახლეები

როგორ გაავრცელა შსს-მ ვიდეო, რომელიც „არავის გადაუღია“ – კასრში იარაღის აღმოჩენის საქმე

13.04.2018 • 1663
როგორ გაავრცელა შსს-მ ვიდეო, რომელიც „არავის გადაუღია“ – კასრში იარაღის აღმოჩენის საქმე

„იქ სულ 5 ადამიანი ვიყავით… დასრულებამდე ვესწრებოდი ჩხრეკას. იქ ვიდეო არავის გადაუღია,” – თქვა სასამართლოში მოწმის სახით დაბარებულმა საექსპერტო კრიმინალისტიკური სამსახურის ექსპერტმა, კახა დანელიამ.

ეს მეორე მოწმეა “კასრიდან იარაღის ამოღების საქმეში” სამართალდამცავი ორგანოდან, ვინც თქვა, რომ ვიდეოკადრები იარაღის ამოღების დროს არავის გადაუღია. იარაღის ამოღების ვიდეოკადრები შსს-მ ფემბე ოლუნის დაკავებიდან მეორე დღეს გაავრცელა.

მოსამართლე ლევან გელოვანი ფემბე ოზლემ ოლუნის საქმის განხილვას განაგრძობს. საუბარია ქობულეთში, გასული წლის 25 ნოემბერს, სამალავში აღმოჩენილი საბრძოლო მასალის საქმეზე – ბრალდებული ქალი, ფემბე ოზლემ ოლუნია. იგი თურქეთის მოქალაქეა და ბრალს არ აღიარებს. პროკურატურის ვერსიით, ფემბე ოზლემ ოლუნი ხელყუმბარას, კალაშნიკოვის ავტომატს და 115 ვაზნას სხვადასხვა ადგილზე ინახავდა.

ერთ-ერთ სასამართლო სხდომაზე, რომელიც 6 თებერვალს გაიმართა, საგამოძიებო ჯგუფის ხელმძღვანელმა, გიორგი გამყრელიძემ მოსამართლეს უთხრა: “არ ვიცი, ვინ გადაიღო ვიდეო. მე მასობრივი ინფორმაციის საშუალებები არ მომიწვევია. მხოლოდ ფოტოგადაღება მოვახდინეთ”, – თქვა მან.

გიორგი გამყრელიძე ქობულეთში, მდინარე კინტრიშთან კასრიდან იარაღის ამოღების პროცესს ესწრებოდა. კახა დანელია კი, რომელმაც დღეს მისცა ჩვენება სასამართლოს, ბათუმში, საცხოვრებელი ბინის ჩხრეკას დაესწრო. ბრალდებული ფემბე ოლუნი დაკავებამდე ბათუმში, გორგილაძის ქუჩაზე, ნაქირავებ ბინაში ცხოვრობდა.

“თუ თქვენ არ გადაიღეთ ვიდეო, ვინც ჩხრეკაში მონაწილეობდით, საიდან გაჩნდა ეს ვიდეოკადრები ტელევიზიებში?”- იკითხა ადვოკატმა ლევან მამულაძემ.

შეკითხვა პროკურორმა პაატა ცეცხლაძემ გააპროტესტა: “ვიდეომტკიცებულება საერთოდ არ არის წარმოდგენილი მტკიცებულებად სასამართლოში. გაუგებარია, რაზე საუბრობს დაცვის მხარე”.

ექსპერტს ამ თემაზე შეკითხვა ბრალდებულმაც დაუსვა.

“თქვენ გარდა ვინმეს, მაგალითად, სამოქალაქო ფორმაში მყოფ პირს, ჩხრეკის და ამოღების დროს ჰქონდა ვიდეოს გადაღების უფლება?”- იკითხა ფემბე ოლუნმა.

“ასეთი იქ არავინ ყოფილა,”- დასძინა ექსპერტმა კახა დანელიამ.

სასამართლომ დღევანდელ პროცესზე კიდევ რამდენიმე სამართალდამცველის პოზიცია მოისმინა, ვინც იარაღის ამოღების პროცესში მონაწილეობდა. დასაკითხი დარჩა კიდევ ერთი პირი – მესაკუთრე, ვის სახლთან ახლოს, მდინარის პირას კასრში ჩამარხული საბრძოლო იარაღი იპოვეს.

 

კასრში აღმოჩენილი ასაფეთქებლების საქმე ექსპერტიზის გარეშე – დაკავებული ბრალს არ აღიარებს

გადაბეჭდვის წესი


ასევე: