Batumelebi

„ბათუმის წყლის“ ინფორმაციით, დღეს 27 ივლისს, წყალმომარაგების სისტემის სარეაბილიტაციო სამუშაოების გამო, 10:00-დან 14:00 საათამდე წყლის მიწოდება შეუწყდებათ თამარის დასახლებაში მცხოვრებ აბონენტებს.

„წყალმომარაგების შეზღუდვის არეალში მცხოვრებ აბონენტებს ინფორმაცია SMS შეტყობინების სახით მიეწოდათ“-აცხადებენ „ბათუმის წყალში“.

სამუშაოებთან დაკავშირებით დამატებითი ინფორმაციის მიღება შესაძლებელია შპს ,,ბათუმის წყლის” ცხელი ხაზის მეშვეობით, შემდეგ ნომერზე: (0422) 242222, ან 1152.

ბათუმში, ბარათაშვილის ქუჩაზე მდებარე საოჯადო მედიცინის ცენტრში დღეს, 27 ივლისს, დილით, სახანძრო სამსახური გამოიძახეს.

როგორც „ბათუმელებს“ მეხანძრეებმა უთხრეს, შენობაში არაფერი არ დამწვარა და შენობაში მოკლე ჩართვა მოხდა.

ბათუმში, ანბანის კოშკთან ახლოს, მწვანე მინდორში ფერადი კარვებია გაშლილი. ახალგაზრდები, რომლებიც  სასტუმროების ნაცვლად ღია ცის ქვეშ არჩევენ დასვენებას, ამ კარვებში ცხოვრობენ. ეს სესეა. ერთ-ერთ ფერად კარავში ცხოვრობს. სხვა დროს ბულვარში უკრავს გიტარაზე, ახლა ისვენებს.

ელენეს და ვანოს კარავი ერთი ადგილიდან მეორეგან გადააქვთ. მოიღრუბლა და შეიძლება გაწვიმდეს, ამიტომ ხეებს უნდა შეეფარონ, კარავს დამატებითი ტენტი უნდა გადააფარონ, წვიმამ რომ ვერ ჩამოაღწიოს.

ელენე და ვანო ბათუმში ერთად ჩამოვიდნენ, ელენე ილიაუნის თეატრის მსახიობია, ვანო – პირველი კურსის სტუდენტი, ოღონდ სწავლა დროებით შეწყვიტა.

ვანო: „მივხვდი, რომ უბრალოდ ადამიანების გაცნობა მჭირდება ჯერ, ურთიერთობები და თავისუფლება. 100%-იანი გრანტი ავიღე და ძალიან კარგადაც ვსწავლობდი, მაგრამ გული სხვა რამისკენ მიმიწევს. სტერეოტიპია საქართველოში, რომ 19 წლის ახალგაზრდა უკვე უნდა სწავლობდეს უნივერსიტეტში. მე ჯერ ადამიანების გაცნობა და ყველაფრისგან გათავისუფლება მჭირდება, ამიტომ ვმოგზაურობ კარვით“.

ელენე: „კარავი თავისუფლებაა, გაპრიალებულ სასტუმროს ნომერს ვერსად წაიღებ და წამოიღებ, ამ კარავს კიდევ დაავლებ ხელს და სადაც გინდა იქ დადგამ. ბედნიერი ვარ ფარატინა კარავში, ბედნიერება ჩემთვის სიყვარული და ურთიერთობებია და არა გაზიმზიმებულ სასტუმროში დასვენება“.

ელენე და ვანო ფიქრობენ, რომ ბათუმი კარვით დამსვენებელი მოგზაურებისთვის მეგობრული ქალაქი არ არის. ვანო ყვება, რომ ამ მინდორში თავიდან ერთადერთი კარავი იყო, პოლიცია მოვიდა და დამსვენებლებს კარვის დაშლისკენ მოუწოდებდა, თუმცა ერთი კარვის გვერდით სხვებმა ათი სხვაც გაშალეს და ახლა აქ მთელი ბანაკია. ვანო ამბობს, რომ პოლიციელებმა იციან სად არის აკრძალული კარვების გაშლა, თუმცა როცა კითხულობ დასაშვები სად არის, ამაზე პასუხი არ აქვთ.

ვანო გიტარაზე უკრავს, ელენეც. ასე აგროვებენ ყოველდღიურ ფულს. ვანო ამბობს, რომ ყველასთვის დაკვრა უდიდესი სიამოვნებაა, რასაც სითბო, ენერგია და მხიარულება მოაქვს. ერთად ამღერებული ხალხი, უცნობები, რომლებიც ფოტოებს იღებენ შენთან ერთად… წყვილი ამბობს, რომ თითქოს საკვებისთვის გამოიმუშავებენ ფულს დაკვრით, მაგრამ რეალურად იმდენ ენერგიას იღებენ დაკვრისგან, რომ დღის ბოლოს ამ ფულით საჭმლის ყიდვა ხანდახან ავიწყდებათ კიდეც. თუმცა, როგორც ვანო ამბობს, ბათუმი „გაცივდა“ – ორი წლის წინ, როცა აქ უკრავდა, საათში ორმოც ლარამდეც გამოიმუშავებდა. ახლა ასე არ არის. არც ხალხის დამოკიდებულებაა კარვით დამსვენებლების მიმართ ყოველთვის ერთნაირი.

ელენე: „ხანდახან ამრეზით გვიყურებენ, რახან ქუჩაში ვუკრავთ და კარავში ვცხოვრობთ. არადა ძალიან მარტივი რამეები მინდა: კარვით მოგზაურობა, სიყვარული, ურთიერთობები. ახლა ვაკეთებ იმას, რაც მინდა და საკუთარი თავით სხვას ხელს არაფერში ვუშლი. ყველამ ის უნდა გააკეთოს რაც უნდა, ვაშავებ ამით რამეს?!“

19 წლის ვანო ფიქრობს, რომ თუ გინდა საკუთარ თავს კარგად გაუგო და მიხვდე, რა გინდა ცხოვრებისგან, აუცილებლად უნდა მოშორდე ცოტა ხნით მაინც გონებით ადამიანებს, რომლებიც შენთვის ბევრს ნიშნავს, მშობლებს, ახლობლებს…

ვანო: „დედ-მამა, ნათესავები – ის ხალხია ვინც შენთვის ბევრს აკეთებს და მერე იძულებული ხარ შენთან დაკავშირებულ მათ სურვილებს ანგარიში გაუწიო. ამ დროს სასიცოცხლოდ აუცილებელია რაღაც ეტაპზე იცხოვრო ისე, როგორც შენ გჭირდება და გინდა, უცნაურია, როცა ადამიანები საკუთარ თავს გაურბიან, უარს ამბობენ საკუთარ სურვილებზე. უნდა გაშორდე გონებით შენს ავტორიტეტებს, რომ მერე სხვანაირად დაბრუნდე მათთან, ადვილი არ არის, მაგრამ ვინ თქვა რომ ცხოვრებაში რამე ადვილია?“.

ანბანის კოშკთან, ფერად კარვებში დაბანაკებულებს ყველაზე ძალიან უცნობების გამოჩენა უხარიათ, რომლებიც მათ კარვებთან მიდიან, ეცნობიან და მღერიან. ყვებიან, რომ ბუტაფორიული, ცათამბჯენებიანი, რკინა-ბეტონის ქალაქი არ მოსწონთ და დაბალსართულიანი ბათუმის ძველ უბნებში გადიან ხშირად. როცა წვიმს, კარავში დაბანაკებულებისთვის ცოტათი რთული პერიოდი დგება: ამ დროს ბულვარში ვერ უკრავენ და ხანდახან თავის გატანაც ჭირს.

პირველი აგვისტოდან საქართველოში ჰაერის ხარისხის ევროპული სტანდარტები ინერგება, რომლის მიხედვითაც ქვეყნის მასშტაბით ატმოსფერული ჰაერის ხარისხი თანამედროვე ევროპული სტანდარტების გამოყენებით შეფასდება. ამის შესახებ ინფორმაციას გარემოს დაცვისა და სოფლის მეურნეობის სამინისტრო ავრცელებს.

„ჩვენ მივიღეთ ევროპული დონის სტანდარტი ჰაერში ზღვრული ნორმების შესახებ, განსაზღვრულია სხვადასხვა ტიპის დამაბინძურებლების ზღვრები, მათ შორის მძიმე მეტალების და დიოქსიდების. დღეიდან შესაძლებლობა გვექნება, რომ ატმოსფერული ჰაერი შევაფასოთ ევროპული პრინციპების მიხედვით. აღნიშნული სტანდარტი ძალიან მნიშვნელოვანი, დიდი, ეკოლოგიური პოლიტიკის ნაწილია… უახლოეს ხანებში წარმოგიდგენთ ძალიან კომპლექსურ პრეზენტაციას, საქართველოში ზოგადად, მწვანე პოლიტიკის, მწვანე ეკონომიკური პოლიტიკის და მწვანე ეკონომიკის განვითარების შესახებ,“- განაცხადა გარემოს დაცვისა და სოფლის მეურნეობის მინისტრმა ლევან დავითაშვილმა მთავრობის სხდომის დასრულების შემდეგ.

ატმოსფერული ჰაერის ხარისხს გარემოს დაცვისა და სოფლის მეურნეობის სამინისტრო  ამონიტორინგებს, როგორც ლოკალური ასევე მობილური სადგურების მეშვეობით და ასევე მუშაობს ჰაერის ხარისხის მონიტორინგის ქსელის განახლება-გაფართოებაზე. 

ჰაერის ხარისხის ევროპული სტანდარტების დანერგვა პასუხობს ევროკავშირსა და საქართველოს შორის ასოცირების შესახებ შეთანხმების მოთხოვნებს.

სამინისტროს ინფორმაციით, ჰაერის ხარისხზე მონიტორინგის ევროპული სტანდარტების დანერგვის პარალელურად იმუშავებს ვებ პორტალი სადაც მოქალაქეებს მუდმივ ონლაინ რეჟიმში შეეძლებათ ინფორმაციის მიღება, კონკრეტულ ლოკაციებზე ჰაერის ხარისხთან დაკავშირებით.

სახელმწიფო აუდიტის სამსახურის ანგარიშის მიხედვით, რომელიც 2015 წლის 1 იანვრიდან 2017 წლის 1 ოქტომბრამდე პერიოდს მოიცავს, საქართველოში ატმოსფერული ჰაერის ხარისხობრივი მაჩვენებლების მოქმედი ნორმები ეფუძნება საბჭოთა ხელისუფლების მიერ დაწესებულ სახელმწიფო სტანდარტებს, ე.წ. გოსტებს, რაც ხელს უშლის საერთაშორისო სტანდარტებთან შესადარისობას.

მიიჩნევა, რომ საქართველოში ატმოსფერული ჰაერის დაბინძურების ძირითადი წყარო სატრანსპორტო საშუალებების გამონაბოლქვი და მტვერია.

საქართველოში ატმოსფერული ჰაერის დაბინძურების მონიტორინგი ექვს ქალაქში: თბილისში, რუსთავში, ზესტაფონში, ქუთაისში, ბათუმსა და ჭიათურაში, ძირითადად სადამკვირვებლო ჯიხურების მეშვეობით ხდება. სადამკვირვებლო ჯიხურის საშუალებით, ისაზღვრება შემდეგი მავნე ინგრედიენტები: მტვერი, გოგირდის დიოქსიდი, ნახშირჟანგი, აზოტის დიოქსიდი და ტყვია.

სადამკვირვებლო ჯიხურების მონაცემები ეროვნული სტანდარტებით იზომება, რომლებიც UNECE-ს ანგარიშის თანახმად, კვლავ კონცენტრაციის მაქსიმალურ დასაშვებ ნორმებზეა დაფუძნებული და არ შეიძლება პირდაპირ იყოს შედარებული ჯანმოსა თუ გაეროს მიერ გამოყენებულ სტანდარტებზე.

ამავე თემაზე:

აჭარის ფინანსთა და ეკონომიკის სამინისტროს შესყიდვების განყოფილებამ, 2017 წელს, შესყიდვების გეგმით გათვალისწინებული 94 შესყიდვიდან ბაზრის კვლევა არ ჩაატარა 54 შემთხვევაში. შესაბამისად, სამინისტრომ არ შეასრულა „სახელმწიფო შესყიდვების შესახებ“ საქართველოს კანონის მოთხოვნები, რაც მისაღები ხელშეკრულების ოპტიმალური პირობების განსაზღვრისთვის ბაზრის მოკვლევაში გამოიხატება.

სახელმწიფო აუდიტის ანგარიშის მიხედვით, „სახელმწიფო შესყიდვების განხორციელებისას, შესყიდვების დაგეგმვისას, ფულადი სახსრების რაციონალური ხარჯვის უზრუნველყოფის მიზნით, განსაკუთრებული მნიშვნელობა აქვს ბაზრის კვლევას და შესყიდვის ობიექტის სავარაუდო ღირებულების სწორად განსაზღვრას“.

აჭარის ფინანსთა და ეკონომიკის სამინისტროს, გასულ წელს, ტენდერებითა და გამარტივებული შესყიდვის ფორმით გაფორმებული აქვს 42 545 715 ლარის ღირებულების 273 ხელშეკრულება.

2017 წლის დაფინანსების ფარგლებში შესყიდვების განხორციელების მიზნით, სამინისტროს მიერ გაფორმებული ხელშეკრულებები და ჩატარებული ტენდერები:

აუდიტის ანგარიშის მიხედვით, 2017 წელს გამარტივებული შესყიდვის ფორმით, აჭარის ფინანსთა და ეკონომიკის სამინისტროს 231 ხელშეკრულება გაუფორმებია, რაც 2016 წლის მაჩვენებელზე 20 ერთეულით მეტია. თუმცა გამარტივებული შესყიდვების წილი, შესყიდვების მთლიან მოცულობაში 9,5 პროცენტული პუნქტითაა შემცირებული.

აჭარის ავტონომიური რესპუბლიკის ფინანსთა და ეკონომიკის სამინისტრო მიმდინარე, 2018 წელს, ჯამში 48 მილიონ 287 ათას 800 ლარითაა დაფინანსებული აჭარის ბიუჯეტიდან.

სამინისტრო, 2018 წლის შესყიდვების გეგმის მიხედვით გაწერილი 57 შესყიდვიდან ელექტრონული ტენდერით მომსახურებას 16 შემთხვევაში შეისყიდის, დანარჩენ მომსახურებებს კი – კონსოლიდირებული ტენდერითა და გამარტივებული შესყიდვით.

მიმდინარე წლის მრავალმილიონიანი შესყიდვების გეგმაში, ორჯერ არის მომსახურების – „ბაზრის შესწავლა და ეკონომიკური კვლევა; გამოკითხვები და სტატისტიკა“ ჩადებული, რისთვისაც ჯამში 37 450 ლარია გათვალისწინებული. ორთავე შემთხვევაში „ბაზრის კვლევას“ სამინისტრო ტენდერის გარეშე, გამარტივებული შესყიდვის ფორმით შეისყიდის.

ამ თემაზე:

პატიმარი ქალი ნანა ფ. სასჯელაღსრულების მინისტრის იმ ბრძანების ანტიკონსტიტუციურად ცნობას ითხოვდა, რომლის მიხედვითაც, ციხის ადმინისტრაციას უფლება ჰქონდა პატიმრისთვის, შემოწმების მიზნით, იმდენჯერ მოეთხოვა გაშიშვლება და ბუქნების გაკეთება, რამდენჯერაც თავად ჩათვლიდა საჭიროდ. მოსარჩელე მოითხოვდა გაშიშვლების უფლების ჩანაცვლებას სკანერით. დღეს, 26 ივლისს, საკონსტიტუციო სასამართლომ მინისტრის #200 ბრძანება არაკონსტიტუციურად სცნო, მაგრამ არ გააუქმა გაშიშვლების უფლების გამოყენება.

დირექტორის/მის მიერ უფლებამოსილი პირის გადაწყვეტილებით პირის გაშიშვლების შესაძლებლობა, სასამართლომ არ მიიჩნია მიზნის მიღწევის პროპორციულ საშუალებად. სასჯელაღსრულების მინისტრის ბრძანება #200 არ ითვალისწინებდა ამგვარი გადაწყვეტილების მიღების სახელმძღვანელო კრიტერიუმებს, რაც ქმნიდა „უფლებაში მაღალი ინტენსივობით ჩარევის რისკებს… ხსენებული ნორმა არაკონსტიტუციურად იქნა ცნობილი საქართველოს კონსტიტუციის მე-20 მუხლის პირველი პუნქტით გარანტირებულ პირადი ცხოვრების ხელშეუხებლობის უფლებასთან“, – წერია საკონსტიტუციო სასამართლოს მიერ გამოქვეყნებულ ინფორმაციაში.

სხვა სიტყვებით, რომ ვთქვათ, უფლებამოსილი პირი საკონსტიტუციო სასამართლომ დაავალდებულა ზუსტად გაწეროს, როდის და რა შემთხვევაში ექნება საპატიმრო დაწესებულების უფროსს პატიმრის გაშიშვლების უფლება.

საკონსტიტუციო სასამართლომ არ გაიზიარა მოსარჩელის პოზიცია, რომ – სასჯელაღსრულების დაწესებულებებში ძირითადად სკანერით შემოწმების მეთოდს იყენებდნენ, რადგან  „პირის გაშიშვლება უცხო ადამიანის თანდასწრებით, იწვევს ადამიანის დამცირებას და შეურაცხყოფას იმ ინტენსივობით, რომ იგი უტოლდება საქართველოს კონსტიტუციით აკრძალულ არაჰუმანურ, სასტიკ და პატივისა და ღირსების შემლახველ მოპყრობას“.

სასარჩელო განცხადებაში წერია, რომ ამ მეთოდს იყენებენ დაბალი რისკის პატიმრების მიმართაც.

მოსარჩელე და სასამართლოში მისი ინტერესების დამცველი [საია] ევროპულ პრაქტიკაზე აკეთებდა აქცენტს, სადაც, ძირითადად, სკანირების აპარატს იყენებენ და გამონაკლის შემთხვევაში თხოვენ პატიმარს გაშიშვლებას.

სარჩელის ამ ნაწილთან დაკავშირებით საკონსტიტუციო სასამართლომ მიუთითა, რომ „შეუძლებელია, სკანერის მეშვეობით ყველა აკრძალული ნივთის, ნივთიერების, წარწერისა თუ სხვა ობიექტის აღმოჩენა, რომელთა შეტანა, დამზადება, ბრუნვა საფრთხეს უქმნის პენიტენციურ დაწესებულებაში წესრიგს, იქ მოთავსებული და დასაქმებული პირების ჯანმრთელობასა და სიცოცხლეს“.

სასამართლომ დაადგინა, რომ ამ მეთოდის გამოყენება დასაშვებია „მხოლოდ უკიდურესი აუცილებლობის შემთხვევაში“ და იქვე დასძინა, რომ „გარესამყაროსთან კონტაქტის შემთხვევებში და დაწესებულებაში გადაადგილებისას (სამარტოო საკანში მოთავსება) პირის გაშიშვლების დაშვება პასუხობდა კონსტიტუციის მოთხოვნებს“.

ეს იმას ნიშნავს, რომ სასამართლოში საკუთარ პროცესებზე დასწრების მოსურნე პატიმრებს ისევ მოუწევთ დაემორჩილონ ციხის ადმინისტრაციის მოთხოვნას გაშიშვლებით შემოწმებაზე. წინააღმდეგ შემთხვევაში მათ საპატიმრო დაწესებულების დატოვების უფლებას არ ექნებათ.

გასულ წელს “ბათუმელები” წერდა პატიმარზე, რომელიც საკუთარ სასამართლო პროცესს ვერ ესწრება. ის უარს აცხადებდა ციხიდან გამოყვანის დროს გაშიშვლებულიყო და ბუქნები გაეკეთებინა. ამის გარეშე ციხის ადმინისტრაცია მას დაწესებულებიდან გასვლის საშუალებას არ აძლევდა.

აჭარის ფინანსთა და ეკონომიკის მინისტრის მოადგილედ, თინათინ ზოიძის კანდიდატურა განიხილება, ამის შესახებ მან „ბათუმელებს“ თავად დაუდასტურა. „მიმდინარეობს კონსულტაციები ამის თაობაზე, თუმცა ჯერ გადაწყვეტილება მიღებული არ არის“, – უთხრა თინათინ ზოიძემ „ბათუმელებს“.

მინისტრის მოადგილეობის კანდიდატი თინათინ ზოიძე ბოლო პერიოდში სამშენებლო კომპანია „ალიანსში“ მუშაობდა.

თინათინ ზოიძეს საჯარო სამსახურში მუშაობის გამოცდილებაც აქვს – ის აჭარის ფინანსთა და ეკონომიკის მინისტრის მრჩეველი იყო, დავით ბალაძის მინისტრობის პერიოდში.

32 წლის თინათინ ზოიძე განათლებით იურისტია.

მოქალაქე ლევან აღნიაშვილი საქართველოს მთავრობას პეტიციით მიმართავს, დახლზე დარჩენილი, საკვებად ვარგისი, არა მალფუჭებადი სასურსათო პროდუქტის საქველმოქმედო მიზნით იქნას გამოყენებული.

„შემოსავლების სამსახურის მიერ მოწოდებული ინფორმაციის მიხედვით, გასული წლის აპრილში 4523 ლარის ხაჭაპური, ლობიანი, ღვეზელი და ფუნთუშა გადაყარეს სანაგვე ურნებში. მაისში – 11 484, ივნისში – 7312, ივლისში – 9455, აგვისტოში – 7778, სექტემბერში – 5424, ოქტომბერში – 8701, ნოემბერში – 7727, დეკემბერში – 8192. 2018 წლის იანვარში 9385 ლარის მზა საკვები არის გადაყრილი, თებერვალში – 7439, მარტში – 6817 ლარის. სტატისტიკის ეროვნული სამსახურის ბოლო მონაცემებით, საქართველოში 459 619 ადამიანი სოციალურად დაუცველია და საარსებო შემწეობას იღებს. გთხოვთ მიიღოთ კანონი რომელიც აკრძალავს სუპერმარკეტებს დახლზე დარჩენილი საკვებად ვარგისი სასურსათო პროდუქტის გადაყრას . სუპერმარკეტები ვალდებული იქნებიან გაუყიდავი პროდუქტი საქველმოქმედო ორგანიზაციებს გადასცენ“ – აღნიშნულია პეტიციაში.  

ამ თემაზე „ბათუმელებმა“ სტატიები წელს, აპრილში მოამზადა.

მზა საკვები პროდუქტების ვარგისიანობის ვადა კანონმდებლობით არის განსაზღვრული. ძირითად შემთხვევაში ეს ვადა 6-დან 12 საათამდე მერყეობს სხვადასხვა პროდუქტზე. ჰიპერმარკეტებში აცხადებენ, რომ ვადის გასვლის შემდეგ მზა პროდუქტებს ანადგურებენ.

ევროპის ქვეყნებში ცნობილი ჰიპერმარკეტების დიდი ნაწილი მზა საკვები პროდუქტების ვარგისობის ვადის გასვლამდე სპეციალურ ფასდაკლებებს აცხადებენ, ან საკვებს სოციალურად დაუცველ ჯგუფებს ორგანიზებულად აწვდიან. ამ გზით მორჩენილ და ჯერ კიდევ ჯანსაღ პროდუქტს სოციალურად შეჭირვებული კლიენტი ყიდულობს, მაღაზიებს კი საკვების სანაგვე ურნებში ჩაყრა აღარ უწევთ.

ჰიპერმარკეტები ნაგავში გადაყრილი საკვები პროდუქტების შესახებ ინფორმაციას შემოსავლების სამსახურს აწვდიან. ამ გზით ისინი სავალდებულო გადასახადს აღარ იხდიან.

გარემოს ეროვნული სააგენტოს აჭარის რეგიონალური ჰიდრომეტეოროლოგიური ობსერვატორიის ინფორმაციით, ბათუმში და აჭარის სანაპირო რაიონებში დღეს და ხვალ [26-27 ივლისს] მოსალოდნელია ცვალებადი მოღრუბლულობა, უმეტესად – უნალექოდ.

იქროლებს ცვალებადი მიმართულების ქარი 10-15 მეტრი წამში.

ჰაერის ტემპერატურა სანაპირო რაიონებში:

• დღისით: 27-32 გრადუსი
• ღამით: 20-25 გრადუსი

მთაში:

• დღისით: 25-30 გრადუსი
• ღამით: 13-18 გრადუსი

ტალღის სიმაღლე 5-10 დმ [2-3 ბალი], ზღვის წყლის ტემპერატურა 28 გრადუსია.

მომდევნო ორ დღეს მოსალოდნელია  საღამოს და ღამის საათებში ზოგან ელჭექის ხასიათის ხანმოკლე წვიმა, დღისით – უმეტესად  უნალექო ამინდი.

არასწორი ფინანსური აღრიცხვა აჭარის ფინანსთა და ეკონომიკის სამინისტროში; სახელმწიფო ქონების უკანონო გამოყენების ან გასხვისების, ასევე სახელმწიფოს, ორგანიზაციის კუთვნილი, თუ გრანტის სახით მიღებული სახსრების შესაძლო არამიზნობრივი გამოყენებისა და მითვისების რისკები ამავე სამინისტროს დაქვემდებარებაში მყოფ უწყებებში და საბიუჯეტო სახსრების არაეფექტიანად ხარჯვა – ეს ის საკითხებია, რომლებზეც სახელმწიფო აუდიტმა თავის ანგარიშში მიუთითა.

აჭარის ფინანსთა და ეკონომიკის სამინისტროს აქციებისა და სხვა კაპიტალის ნაშთი 2017 წელს 136 389 045 ლარს შეადგენდა, რაც 4 872 309 ლარით, არაზუსტად [გაზრდილად] არის წარმოდგენილი. „ეს გამოწვეულია ფინანსურ აღრიცხვასთან დაკავშირებული სუსტი შიდა კონტროლის სისტემით, რომელიც ვერ უზრუნველყოფს ფინანსური აღრიცხვის დოკუმენტების დანიშნულებისამებრ დროულ მიწოდებას“, – აღნიშნულია სახელმწიფო აუდიტის ანგარიშში.

ანგარიშში აღნიშნულია ასევე, რომ აჭარის ჯანმრთელობისა და სოციალური დაცვის სამინისტროს უსასყიდლოდ, არსებობის ვადით, მართვის უფლებით გადაეცა, აჭარის საკუთრებაში არსებული რამდენიმე შპს [100%-იანი წილები]: „ქ. ბათუმის რესპუბლიკური კლინიკური საავადმყოფო“ – 3 449 997 ლარის საწესდებო კაპიტალით; „ქ. ბათუმის ინფექციური პათოლოგიის, შიდსის და ტუბერკულოზის რეგიონალური ცენტრი“ – 1 210 048 ლარის საწესდებო კაპიტალით; „N1 პოლიკლინიკა“ – 188,364 ლარის საწესდებო კაპიტალით და „სამედიცინო განათლება“ – 23 900 ლარის საწესდებო კაპიტალით. თუმცა, ფინანსთა და ეკონომიკის სამინისტროს საფინანსო სამსახურის მიერ, ფინანსურ აღრიცხვაში ცვლილებები არ არის განხორციელებული.

ამავე სამინისტროს ფინანსურ ანგარიშგებაში არ არის შეტანილი გრანტის სახით მიღებული 1 425 კვ.მ შენობა-ნაგებობები, რაც, აუდიტის შეფასებით, არასწორი ფინანსური აღრიცხვის შედეგია.

კერძოდ: სსიპ – ბათუმის ბულვარს, 2017 წლის ფინანსური ანგარიშგების შესაბამისად, გრანტების სახით მიღებული აქვს ძირითადი აქტივები. მათ შორის, ქალაქ ბათუმის მერიასთან გაფორმებული ხელშეკრულებების საფუძველზე, უსასყიდლო უზუფრუქტის ფორმით გადაცემულია 229 116 კვ.მ ფართობის, 81 086 580 ლარის ნორმატიული ღირებულების არასასოფლო-სამეურნეო დანიშნულების მიწა, თუმცა, ამავე ხელშეკრულებებით გადაცემული 1 425 კვ.მ შენობა-ნაგებობა არ არის შეფასებული და აღრიცხული ბულვარის ბალანსზე.

აუდიტის დასკვნით, „მნიშვნელოვანია, სრულად აღირიცხოს საჯარო სამართლის იურიდიული პირების საკუთრებაში თუ სარგებლობაში არსებული აქტივები… აღრიცხვაში მათი გამოტოვება და აქედან გამომდინარე, კონტროლის არარსებობა, წარმოშობს სახელმწიფო საკუთრებაში არსებული ქონების უკანონო გამოყენების ან გასხვისების შესაძლებლობას“.

აჭარის სავაჭრო – სამრეწველო პალატის, 2017 წლის ბალანსის დანართ ფორმაში, არასაბიუჯეტო საქმიანობით მიღებული ფაქტობრივი შემოსავლი 45 165 ლარს შეადგენს, რაც 1 716 ლარით მეტია საბუღალტრო აღრიცხვის მონაცემებზე. ამასთან, გაწეული მომსახურების ღირებულების ანაზღაურება წარმოებს ნაღდი ანგარიშსწორების წესით და სალაროში ნაღდი ფულის მოძრაობის აღრიცხვისთვის არ გამოიყენება სალაროს წიგნი, არ არის განსაზღვრული ნაღდი ფულის ნაშთის მოცულობა და არ არის გაფორმებული ხელშეკრულება მატერიალური პასუხისმგებლობის შესახებ.

„შესაბამისად, მოქმედი ნორმატიული აქტებით განსაზღვრული მოთხოვნების დაუცველად, ნაღდი ფულის მიღება-ხარჯვა წარმოშობს საჯარო სამართლის იურიდიული პირის სახსრების არამიზნობრივად გამოყენების ან/და მითვისების შესაძლებლობას“, – აცხადებს აუდიტი.

აჭარის სავაჭრო-სამრეწველო პალატის საბუღალტრო აღრიცხვის მონაცემების შესაბამისად, ამავე დაწესებულების თავმჯდომარის მოადგილის სახელზე დებიტორული დავალიანების სახით ირიცხება 14 424 ლარი, რაც განაპირობა  2010 წელს სარემონტო სამუშაოებისათვის სალაროდან გაცემული თანხის დანიშნულებით გამოყენების სრულყოფილი დოკუმენტების წარმოუდგენლობამ. აუდიტის ინფორმაციით: „2010 წელს ანგარიშქვეშ გაცემული თანხა, 2017 წლისთვის ისევ დავალიანების სახით ირიცხება, თუმცა მისი დაფარვისათვის სავაჭრო-სამრეწველო პალატას რაიმე სახის ღონისძიებები არ გაუტარებია, რაც წარმოშობს სავაჭრო-სამრეწველო პალატის კუთვნილი თანხების მითვისების მიზნით, დავალიანების ხანდაზმულობის მოტივით ჩამოწერის რისკებს“.

გაეროს განვითარების პროგრამის საქართველოს წარმომადგენლობასთან [UNDP] პროექტის – „მდგრადი სოფლის მეურნეობა აჭარის ავტონომიურ რესპუბლიკაში“ განხორციელებასთან დაკავშირებით გაფორმებული ხელშეკრულების შესაბამისად, ა(ა)იპ ბათუმის ბიზნეს ინკუბატორს ფულადი გრანტის სახით მიღებული აქვს 56 700 ლარი.

აუდიტი აღნიშნავს, რომ გრანტის დანიშნულებით გამოყენებასთან დაკავშირებით ბიზნეს ინკუბატორის მიერ წარმოდგენილი ანგარიშებით, 55 500 ლარი გამოყენებულია პროექტის ფარგლებში, ფერმერებისა და ფერმერთა კოოპერატივების კონსულტირების მიზნით, დაქირავებული სპეციალისტების მიერ მიწოდებული მომსახურების ღირებულების ანაზღაურებისთვის, თუმცა, აუდიტის პერიოდისთვის ვერ იქნა წარმოდგენილი ინფორმაცია ხელშეკრულების ფარგლებში გაწეული საკონსულტაციო მომსახურების, შინაარსის, რაოდენობისა და პერიოდულობის შესახებ.

შესაბამისად, სახელმწიფო აუდიტი თვლის, რომ „ვერ მიიღეს რწმუნება გრანტის სახით მიღებული 55 500 ლარის დანიშნულებით გამოყენებასთან დაკავშირებით, რაც შესაძლოა გრანტის სახით მიღებული სახსრების არამიზნობრივ გამოყენებასთან იყოს დაკავშირებული“.

სახელმწიფო აუდიტი თავის ერთ-ერთ ბოლო ანგარიშში კვლავ უბრუნდება აჭარის მყარი ნარჩენების მართვის პროექტს, რომლის საკრედიტო ხელშეკრულებას ხელი 2010 წელს მოეწერა, თუმცა 2017 წელს არც პროექტის განხორციელება დაწყებულა და არც სესხის თანხა იყო ათვისებული.

„შედეგად, ყოველწლიურად სესხის აუთვისებელ ნაწილზე [2,7 მლნ. ევრო] ხორციელდება ვალდებულების გადასახადის გადახდა, აუთვისებელი თანხის 0,5% ოდენობით. 2017 წლის 31 დეკემბრის მდგომარეობით, აღნიშნული სესხის ფარგლებში, ჯამურად გაწეულია 163 522 ევროს ხარჯი, მაშინ როდესაც, პროექტის განსახორციელებლად საკრედიტო რესურსიდან თანხები არ მიუმართავთ. ამასთან,  სესხის დასაბრუნებლად 2017 წლის ბიუჯეტით გათვალისწინებული 592 809 ლარის ნაცვლად, გაიხარჯა 7 038 ლარი, რაც გეგმის 1,2% -ს შეადგენს.

აღნიშნული განპირობებულია პროექტის განხორციელებისათვის გამოყოფილი სახსრების ხარჯვასთან დაკავშირებული კონტროლის მექანიზმების არარსებობით და სხვადასხვა ეტაპზე ხელისშემშლელი გარემოებებით, რომელთა გადასაჭრელად ქმედითი და დროული ღონისძიებები არ არის გატარებული. შედეგად, ვალდებულების გადასახადის სახით საბიუჯეტო სახსრები არაეფექტიანად დაიხარჯა“, – აცხადებს აუდიტი.

ანგარიშში ხაზგასმულია, რომ 2018 წელს, წინა წლებისაგან განსხვავებით, დაწყებულია და მიმდინარეობს პროექტის განხორციელების სხვადასხვა აქტივობა, კერძოდ: გამოსყიდულ იქნა ნაგავსაყრელი პოლიგონის მშენებლობისათვის საჭირო მიწის ნაკვეთები, შეირჩა მშენებლობის ზედამხედველი კომპანია, განხორციელდა ნაგავსაყრელი პოლიგონის მშენებლობის ტენდერის შეფასების პირველი ეტაპი და შეფასების ანგარიში გადაეგზავნა ევროპის რეკონსტრუქციისა და განვითარების ბანკს. სათანადო პროცედურების შემდეგ გამოვლინდება გამარჯვებული კომპანია და, სავარაუდოდ, მშენებლობა დასრულდება ხელშეკრულების გაფორმებიდან 18 თვის ვადაში.

„ბათუმელების“ ინფორმაციით, გამარჯვებული კომპანიის გამოვლენაზე ევროპის რეკონსტრუქციისა და განვითარების ბანკი მუშაობას 2018 წლის სექტემბრიდან გააგრძელებს.

ამ თემაზე:

ბათუმში დავით აღმაშენებლის ძეგლი ტბელ აბუსერიძისა და დავით აღმაშენებლის ქუჩების კვეთაში არსებულ წრიულში დაიდგმება. ამის შესახებ გადაწყვეტილება ბათუმის საკრებულომ მიიღო.

საკრებულომ აღნიშნული გადაწყვეტილება ოფიციალური წერილით აცნობა ქართული მარშის წევრს სანდრო ბრეგაძეს.

„აქვე მოგახსენებთ, რომ ძეგლის აღმართვამდე, ქალაქ ბათუმის მუნიციპალიტეტის მერია უზრუნველყოფს შერჩეულ ტერიტორიაზე მისი მოწყობის თაობაზე შესაბამისი საინფორმაციო დაფის განთავსებას,“ – ნათქვამია წერილში რომელსაც ხელს საკრებულოს განათლების, კულტურისა და სპორტის საკითხთა კომისიის თავმჯდომარე ირაკლი პატარიძე აწერს.

ძეგლის საკითხი მას შემდეგ გახდა აქტუალური, რაც „ქართულმა მარშმა“ ფეისბუქზე დეზინფორმაციული კამპანია დაიწყო. მარში წერდა, რომ „ადგილობრივი მთავრობა ბათუმში ძეგლის დადგმას მეზობელი სახელმწიფოების მოთხოვნით ვერ ბედავდა“.

მთავარი ფოტო: დავით აღმაშენებლის ძეგლი ქუთაისში

დაიცავი საქართველო საინფორმაციო ომში – ეს სლოგანი ეკუთვნის „საინფორმაციო თავდაცვით ლეგიონს“, რომელიც აერთიანებს საქართველოს ყველა მოქალაქეს, რომლებიც საკუთარ ქვეყანას ნებაყოფლობით ეხმარებიან საინფორმაციო ომში. დღეს, 25 ივლისს, „ლეგიონი“ ბათუმელებს შეხვდა. ლეგიონის საინფორმაციო კამპანიის მიზანია ანტიდასავლური პროპაგანდის წინააღმდეგ ბრძოლაში ფართო საზოგადოება ჩაერთოს. შეიძლება ითქვას, ეს არის საინფორმაციო კამპანია რუსული პროპაგანდის წინააღმდეგ.

„ჩვენ უარს ვამბობთ ვიყოთ რუსული პროპაგანდის მდევარი. ჩვენ ვცდილობთ თავად გავავრცელოთ სიმართლე და მოწინააღმდეგე ჩავაყენოთ თავის მართლების რეჟიმში, თუ მას ამის შესაძლებლობა მიეცემა,“ – ამბობს გიორგი მოლოდინი, სტრატეგიული კომუნიკაციების ცენტრის საქართველოს წარმომადგენელი.

მისი თქმით, უკვე არსებობს  ანალიტიკური ჯგუფი, რომელიც ამზადებს კონკრეტულ თემებს წყაროებზე დაყრდნობით, ობიექტურ ინფორმაციას, რომელიც „ლეგიონერებს“ ეგზავნება.

„რუსეთი ცდილობს თავისი  საქმიანობა შეფუთოს კეთილშობილური მიზნებით. ჩვენი უმთავრესი ამოცანაა საზოგადოებას გავაცნოთ მოწინააღმდეგის, ანუ რუსეთის ფედერაციის პროპაგანდისტული მანქანის რეალური მოტივი და მიზანი საქართველოსთან მიმართებაში. ეს არის ქართული სახელმწიფოებრიობის მოსპობა. ეს არის ქართული საზოგადოების დაშლა და დაქუცმაცება, რაც შეიძლება ფრაგმენტულად, რადგან მას არ სურს საქართველო, როგორც დემოკრატიული სახელმწიფო, იყოს წარმატებული მაგალითი სხვა მეზობელი სახელმწიფოებისთვის,“ – ამბობს გიორგი მოლოდინი.

გიორგი მოლოდინი დეტალურად ხსნის, თუ როგორ შეიძლება მოქალაქე თავდაცვის ლეგიონის წევრი გახდეს. მისი თქმით, ვებგვერდზე https://infoarmy.ge/ge – ნებისმიერ მსურველს შეუძლია დარეგისტრირდეს და ასე შეუერთდეს კამპანიას.

შეხვედრები საქართველოს რეგიონებში EWMI ACCESS-ის ორგანიზებით იმართება.

ბათუმის ბულვარში 29-31 ივლისს, 13 ქვეყნის 40-მდე სტუდენტი აჭარულ ცეკვას შეასრულებს. სტუდენტები ჩამოვლენ გერმანიიდან, ესპანეთიდან, იტალიიდან, პოლონეთიდან, ჩეხეთიდან, ჰოლანდიიდან, ბალტიისპირეთის ქვეყნებიდან და რუსეთიდან.

აჭარის ტურიზმის დეპარტამენტის ცნობით, ახალგაზრდები რეგიონს ევროპის სტუდენტთა ფორუმის (AEGEE-Tbilisi)  საზაფხულო უნივერსიტეტის პროექტის – „Drop of Wine from Mountain to Sea“ ფარგლებში ესტუმრებიან.

„ბათუმში ჩამოსვლამდე სტუდენტები ორი კვირის განმავლობაში  საქართველოს სხვადასხვა რეგიონს ესტუმრებიან და აჭარული ცეკვის მასტერკლასებს დაესწრებიან.

29 ივლისს, აჭარული ცეკვის შესრულების შემდეგ დაგეგმილია „City Game“ ბათუმში, რაც ქალაქში წინასწარ შერჩეული თემის ირგვლივ სხვადასხვა სიმბოლოს ნახვას ითვალისწინებს.

31 ივლისს კი, ბათუმის შოთა რუსთაველის სახელმწიფო უნივერსიტეტში გაიმართება სამუშაო შეხვედრა, რომელსაც პროექტის მონაწილეებთან ერთად ბათუმის შოთა რუსთაველის სახელმწიფო უნივერსიტეტის სტუდენტები დაესწრებიან“, – აცხადებენ ტურიზმის დეპარტამენტში.

მათივე განმარტებით, პროექტი გათვალისწინებულია ევროპელ სტუდენტებში რეგიონის მიმართ ცნობადობის ამაღლებაზე.

AEGEE-Tbilisi პროექტს 2008 წლიდან ახორციელებს.

სურსათის ეროვნული სააგენტოს მიერ, ბათუმის მარკეტებში – „აისბერგსა“ და „ბილიონში“ აღებულ ნესვის ნიმუშში, ლაბორატორიული კვლევის შედეგად, ნიტრატების რაოდენობა დაშვებულ ნორმაზე 5-ჯერ მეტი აღმოჩნდა. ნიმუში ბათუმში 16 ივლისს აიღეს.

სააგენტოს მონაცემებით ნესვის ნიმუშში ნიტრატის შემცველობა იყო 480 მგ/კგ, მაშინ როდესაც ნორმა არის 90 მგ/კგ. სურსათის მწარმოებელი ინდმეწარმე ჯონი ხოზრევანიძეა.

სააგენტოს ინფორმაციით, ლაბორატორიული კვლევის შედეგის შესახებ ეცნობათ ბიზნესოპერატორებს და მათვე დაევალათ  სურსათის ბაზრიდან გამოთხოვა.

აღსანიშნავია, რომ იგივე მარკეტებში სააგენტომ საზამთროს, ბადრიჯნისა და ატმის სინჯებიც აიღო, თუმცა მათში დარღვევები არ აღმოჩნდა. სააგენტოს მიერ ამ პროდუქტების მწარმოებლადაც ინდმეწარმე ჯონი ხოზრევანიძეა მითითებული.

„ამ ეტაპზე  ცნობილია 40 ნიმუშის შედეგი. ლაბორატორიული კვლევის თანახმად, ნიტრატების გადაჭარბებული რაოდენობა გამოვლინდა მხოლოდ ნესვის ორ ნიმუშში, რომლებიც ბათუმსა და ქუთაისშია აღებული. ნიტრატების შემცველობაზე ხილ-ბოსტნეულის კვლევა გრძელდება.“ – აცხადებს სააგენტო.

სურსათის ეროვნულმა სააგენტომ გასულ თვეში აჭარის სამ მუნიციპალიტეტში – ქობულეთში, ხელვაჩაურსა და ქედაში სასმელი წყლის ლაბორატორიული კვლვა ჩაატარა. წყლის გამანაწილებელი სხვადასხვა ქსელიდან აღებულ წყლის 17 სინჯიდან, დარღვევა  15-ში აღმოჩნდა. სინჯები კი, ძირითადად, სხვადასხვა საბავშვო ბაღის სამზარეულოში იყო აღებული.

თუ სახლს ერთგან კარგად დაალაგებს, რეკომენდაციით მერე სხვაგანაც დაუძახებენ, რომ იქაც დაალაგოს. მცირე თანხას უხდიან, მაგრამ მაინც. როცა შინ ბრუნდება საკერავ მანქანას მიუჯდება და შეკვეთილ სამოსს კერავს ან გადააკეთებს ხოლმე. ყველაფერი უნდა აკეთოს რაც შეუძლია, სხვა გამოსავალი არ აქვს: შინ ხუთნი არიან და ერთიც პატიმარი, რომელსაც უნდა ეპატრონოს, სანამ ციხეშია. ასეთია პატიმრის ახალგაზრდა მეუღლის ცხოვრება. მარიამს (სახელი შეცვლილია) ორი მცირეწლოვანი გოგონა ჰყავს. ყველაფერს აკეთებს, რომ ბავშვებმა მამის დროებითი არყოფნა არ იგრძნონ.

მეუღლე საპატიმროდან ეხმარებათ როგორც შეუძლია: ხატებსა და ჯვრებს აკეთებს ციხის სახელოსნოში და ოჯახში გზავნის. გიორგი (სახელი შეცვლილია) უბედური შემთხვევის შედეგად აღმოჩნდა ციხეში. შინ დაბრუნებისას მანქანით მოხუცს დაეჯახა, რომელიც თავად მიიყვანა საავადმყოფომდე, თუმცა მუხუცის გადარჩენა ვერ მოხერხდა. გიორგი უკვე სამი წელია სასჯელს იხდის. გათავისუფლებამდე წინ კიდევ სამი წელია.

„ყოფილი პატიმრების გაძლიერების პროექტის“ ფარგლებში გიორგის შეწყალების მოთხოვნისთვის ოფიციალური დოკუმენტაცია მოუმზადეს და ოჯახი შესაბამისი უწყებისგან პასუხს ელოდება.

გიორგის მეუღლე იმედოვნებს, რომ პასუხი დადებითი იქნება და ბავშვებს მამა მალე დაუბრუნდება.

მარიამთან და მცირეწლოვან ბავშვებთან ერთად ბებია-ბაბუა ცხოვრობს. ბაბუამ ცოტა ხნის წინ გულის მძიმე ოპერაცია გაიკეთა და შესაბამის მოვლა-პატრონობას, მედიკამენტებს საჭიროებს. ხანდაზმულის პენსია ხანდახან წამლების პრობლემასაც კი ვერ აგვარებს სრულად.

პატიმრის ხუთსულიან ოჯახს სოციალურად დაუცველთა დახმარება ცოტა ხნის წინ მოუხსნეს. იყო პერიოდი, როცა მეუღლის დაპატიმრების შემდეგ მარიამი და მისი ოჯახი ნათესავ-მეგობრების დახამრების იმედად იყვნენ, მაგრამ ახლა მარიამი გააქტიურდა. ფონდ აფხაზინტერკონტის დახმარებით გრანტი მიიღო საკერავი მანქანის შესაძენად და ოჯახს შემოსავალა შემატა.

„ჩემი მეუღლე ძალიან განიცდიდა რაც დაემართა. ჩვენთვის ეს საშინელი ტრაგედია იყო, მაგრამ ალბათ ყველაფერი ხდება ქვეყანაზე და რაც მოხდა უნდა გადავიტანოთ“, –  ამბობს მარიამი.

„ყოფილი პატიმრების გაძლიერების პროექტს“ დემოკრატიის ინსტიტუტი ახორციელებს ოთხ რეგიონში: აჭარაში, გურიაში, სამეგრელო – ზემო სვანეთსა და იმერეთში. პროექტი მიზნად ისახავს ყოფილი პატიმრების, პატიმართა ოჯახებისა და პრობაციონერების სამედიცინო დახმარებას, დასაქმებისა და რესოციალიზაციის ხელშეწყობას, მცირე ბიზნესის განვითარებას და ა.შ.

პროექტი ევროკავშირის ფინანსური მხარდჭერით ხორციელდება.

მასალა მომზადებულია პროექტის – „ყოფილი პატიმრების, პატიმართა ოჯახებისა და პრობაციონერების მხარდაჭერის პროგრამა“  ფარგლებში.
პროექტს ახორციელებს ა(ა)იპ „დემოკრატიის ინსტიტუტი“ და დაფინანსებულია ევროკავშირის მიერ.
მასალაში გამოთქმული მოსაზრებები ავტორისეულია და შესაძლოა არ გამოხატავდეს დონორი ორგანიზაციის თვალსაზრისს.

აჭარის განათლების, კულტურისა და სპორტის სამინისტროში შემავალი იურიდიული პირების მიერ 2017 წელს თანამშრომლებზე მივლინებისთვის გადახდილი 11 061 ლარი, ბიუჯეტში დაბრუნების ნაცვლად, ჩამოწერილია „ხარჯებში“ – აცხადებს სახელმწიფო აუდიტი და თავის ანგარიშში საბიუჯეტო რესურსის არამიზნობრივად ხარჯვის რისკებზე მიუთითებს.

აუდიტის ანგარიშის მიხედვით, ბიუჯეტში დაბრუნებას ექვემდებარება ანსამბლ „ბათუმის“ მიერ მივლინებისთვის გაცემული 6 071 ლარი და მუსიკალური ცენტრის მიერ გაცემული 4 990 ლარი.

აუდიტის მასალების მიხედვით ირკვევა, რომ ანსამბლ „ბათუმის“ წევრები 2017 წლის 30 მარტიდან 2 აპრილამდე მივლინებულნი იყვნენ ქალაქ თბილისში, რასთან დაკავშირებითაც 15 თანამშრომელზე ჯამში ანაზღაურებულია 4 950 ლარი, ასევე გამოყოფილი იყო სამსახურებრივი სარგებლობის ავტომანქანა და საწვავი. ანსამბლის წევრების მიერ ღამისთევის დამადასტურებელ დოკუმენტად აუდიტისთვის წარდგენილია ქალაქ თბილისში, სასტუმროს [სასტუმრო სახლი „საქართველო“] მიერ გაცემული ფისკალური ჩეკი და ინვოისი. თუმცა, მივლინებისთვის გამოყოფილ ავტომანქანაზე, მივლინების პერიოდში საწვავის ჩასხმა ფიქსირდება ქალაქ ბათუმში, რაც ადასტურებს, რომ მივლინებისას სამსახურებრივი ავტომანქანით არ უსარგებლიათ.

გარდა აღნიშნულისა, „სატელეფონო კომპანიის მიერ მოწოდებული ინფორმაციით, 9 თანამშრომლის ქალაქ თბილისში ფაქტობრივად ყოფნა მივლინების პერიოდში არ ფიქსირდება. აღნიშნულ პირობებში მივლინებისთვის მათზე გადახდილია ჯამში 3 211 ლარი. [მზეჭაბუკ სურმანიძე – 571,2 ლარი, დავით ჭყონია – 330 ლარი, რომან შაინიძე – 330 ლარი, არჩილ სოსელია – 330 ლარი, ზვიად სურმანიძე – 330 ლარი, ომარ ვაშალომიძე – 330 ლარი, ლევან ცხოიძე – 330 ლარი, მამუკა სურმანიძე – 330 ლარი, ნუგზარ დოლიძე -330 ლარი]“, – აღნიშნულია ანგარიშში.

ანსამბლ „ბათუმის“ დირექტორის ბრძანებით, ანსამბლის 5 თანამშრომელი სხვადასხვა პერიოდში მივლინებული იყო ქალაქ თბილისში და ჯამში გადახდილია 2 860 ლარი [ჯემალ ქობულაძე – 225 ლარი; ომარ ვაშალომიძე – 330 ლარი, 245 ლარი, 645 ლარი; მზეჭაბუკ სურმანიძე – 255 ლარი, 105 ლარი, 195 ლარი, 105 ლარი, 20 ლარი, 210 ლარი, 195 ლარი; ზვიად სურმანიძე – 105 ლარი; ლაშა გედენიძე – 225 ლარი].

ღამისთევის დამადასტურებელ დოკუმენტად კი აქაც წარმოდგენილია ქალაქ თბილისში, იმავე სასტუმროს [სასტუმრო სახლი „საქართველო“] მიერ გაცემული ფისკალური ჩეკი და ინვოისი. ამავე დროს, სატელეფონო კომპანიის მიერ მოწოდებული ინფორმაციით, აღნიშნული პირების მივლინების პერიოდში ქ. თბილისში ფაქტობრივად ყოფნა არ დასტურდება.

რაც შეეხება ბათუმის სახელმწიფო მუსიკალურ ცენტრს, ამ ცენტრის დირექტორის ბრძანებით [დირექტორი – გიორგი მიქელაძე, მძღოლი – რამაზ შველიძე], სომხეთის რესპუბლიკის ქალაქ ერევანში მივლინებული იყო ცენტრის ორი თანამშრომელი. აუდიტის პერიოდში მოპოვებული მტკიცებულებით ირკვევა, რომ მუსიკალური ცენტრის ერთი თანამშრომელი [რამაზ შველიძის განმარტებითი ბარათი] ფიზიკურად არ იმყოფებოდა მივლინების ბრძანების შესაბამისად დანიშნულების ადგილზე, ხოლო მივლინებისათვის გამოყოფილი ავტომანქანით არ განხორციელებულა მივლინებაში გამგზავრება. აღნიშნულ პირობებში მივლინებისთვის გაცემულია 1 730 ლარი.

ანგარიშში აღნიშნულია, რომ აუდიტის მიმდინარეობისას 1730 ლარი დაბრუნებულია ბიუჯეტში.

მუსიკალური ცენტრის დირექტორის სხვა ბრძანებით [კვარტეტ „ნოტას“ და საოპერო დასის ქ. სამსუნში გასტროლთან დაკავშირებით], 2017 წლის 20 დეკემბრიდან 25 დეკემბრის ჩათვლით თურქეთის რესპუბლიკაში მივლინებული იყო ცენტრის დირექტორი და მძღოლი.

“აუდიტის პერიოდში მოპოვებული მტკიცებულებებით ირკვევა, რომ მივლინების შესახებ ბრძანებით განსაზღვრული სრული პერიოდის განმავლობაში, დირექტორი არ იმყოფებოდა თურქეთის რესპუბლიკაში. კერძოდ, მან 2017 წლის 20 დეკემბერს გადაკვეთა საზღვარი და საქართველოში იმავე დღეს დაბრუნდა. მიუხედავად აღნიშნულისა, მძღოლი, რომელსაც ევალებოდა მივლინების დროს ავტოსატრანსპორტო საშუალებით მომსახურებოდა დირექტორს, არ დაბრუნებულა საქართველოში და მასზე ანაზღაურებულია სრული სამივლინებო პერიოდის ხარჯი“, – აცხადებს აუდიტი.

შედეგად, სამსახურებრივი დანიშნულებით ხარჯის გაწევისა და მისი დამადასტურებელი დოკუმენტური მტკიცებულების არარსებობის პირობებში, ჯამში გადახდილია 3 260 ლარი [დირექტორი გიორგი მიქელაძე – 1 369 ლარი და მძღოლი რამაზ შველიძე 1 891ლარი].

ხარჯვის დამადასტურებელი მტკიცებულების არარსებობის პირობებში, მივლინებისთვის გაცემული თანხების ბიუჯეტში დაბრუნების ნაცვლად, ხარჯებში ჩამოწერა წარმოშობს საბიუჯეტო რესურსის არამიზნობრივად ხარჯვის რისკს – თვლის სახელმწიფო აუდიტი.

სახელმწიფო აუდიტის ანგარიშის მიხედვით: „აუდიტის პერიოდში, მუსიკალურ ცენტრში საშტატო განრიგით დასაქმებული იყო 2 იურისტი, მათ შორის, ერთი იურისტი [ეკატერინე მაკარაძე, ხელშეკრულებას ნომერი არა აქვს], იმავდროულად აყვანილი იყო შტატგარეშე თანამშრომლად, თანაშემწე იურისტის თანამდებობაზე და მასზე 2017 წელს გაცემული შრომის ანაზღაურება ჯამში 21 300 ლარს შეადგენს [ძირითადი საშტატო ერთეულით – 15 300 ლარი და შტატგარეშე მომუშავეთა ანაზღაურებით – 6 000 ლარი], თუმცა შტატით დასაქმებული პირის, იმავდროულად შტატგარეშედ დასაქმების აუცილებლობა, წარმოდგენილი დოკუმენტებით ვერ დგინდება და აღნიშნული შესაძლოა თანამდებობრივი სარგოს ზრდაზე იყოს მიმართული“.

ერთადერთი მინუსი, რაც აქვს ხეების გადაზიდვის პროცესს, ეს ისაა, რომ ძვირია – განაცხადა პარტია „ქართული ოცნების“ თავმჯდომარემ, ბიძინა ივანიშვილმა პირველ არხთან ინტერვიუში. ინტერვიუ საზოგადოებრივი მაუწყებლის ეთერში გუშინ, 24 ივლისს გავიდა და იგი ივანიშვილის სახლში, შეკვეთილში ჩაიწერა.

„ყველაზე ხმაურიანი და ხანგრძლივი ალბათ ოპოზიციის მხრიდან სხვადასხვა ტიპის ბრალდებები იყო, რომ რკინიგზა გადავკეტეთ, დენი გამოვურთეთ, საცობები კეთდება, გადაითხარა და დაინგრა, რომ გავანადგურე მწვანე ბუნება, ეკოლოგია და ასე შემდეგ. პლუსის მეტი, რასაც ვაკეთებ, არაფერი არაა. ერთადერთი მინუსი, რაც აქვს ამას, ისაა, რომ რაც კეთდება, დიდი ფული იხარჯება. სიტყვა „ახირებასაც“ ვიხმარ, შეიძლება ლეგიტიმური იყოს, მაგრამ ამ ახირებაში რა იმალება – ეს ფული, რომელიც არ ღირს, რა თქმა უნდა, იმ პარკად, რასაც მე ვაკეთებ, ძალიან ძვირი ჯდება და მხოლოდ ბევრი პირადი ფული იხარჯება იმიტომ, რომ საქართველოში რჩება“, – განაცხადა ბიძინა ივანიშვილმა.

მან ხაზი გაუსვა, რომ ხეების გადატანის პროცესში საქართველოს მოსახლეობამ 10-12 მილიონი ლარი მიიღო, ხეების საკუთარ ნაკვეთზე გატარების სანაცვლოდ:

„ისე მიეჩვია ხალხი, რომ ივანიშვილი მაინც გადაიხდის, ნაკვეთის ღირებულება თუ არის ვთქვათ, კვადრატული მეტრი 10 დოლარი, მე გატარებაში ვიხდი ამ თანხას. ერთი საათით გადავივლი და ის ნაკვეთი ისევ დარჩა. ზოგჯერ მეტსაც ვიხდი. ისეთი მოთხოვნადია. ეს ფული მთლიანად მოსახლეობაში რჩება.

რკინიგზასაც ძალიან დიდი ფული აქვს იმაში მიღებული, რომ ჩახსნას და გადაკეტოს, რათა ამ მანქანამ გადაიაროს, მაგრამ არასდროს ყოფილა შემთხვევა მატარებლის მოძრაობის შეფერხება. გარდა ამისა, ამ პროცესში ძალიან დიდი სამი ბორანი შემოვიდა საქართველოში, რომელიც დარჩება და შეიძლება ქვეყნის ეკონომიკაში გარკვეული როლი ითამაშოს, სპეციალური მანქანა, რომელიც მილიონ 200 ათასი ღირს, დარჩება საქართველოში, რომელმაც შეიძლება მძიმე ტვირთები გადაიტანოს. ამ პროცესიდან მთლიანად ბიუჯეტში მგონი 14 მილიონი ლარი შევიდა. ვერ დამისახელებთ ვერც ერთ მინუსს, ერთადერთი პატარ მინუსი რაც შეიძლება დავასახელოთ, რომ რამდენჯერმე პატარა საცობები წარმოიქნა, 5-10 წუთიანი, მაქსიმუმ 15-წუთიანი. დღესაც მძღოლებს ბოდიშს მოვუხდი ამ უხერხულობისთვის. ამაზე მეტი არაფერი გაფუჭებულა, არ გაჩეხილა, არაფერი გადაშენებულა, მით უმეტეს, ეკოლოგიას არაფერი შეხებია.

მე რომ ეკოლოგიაზე მსაყვედურობს ხალხი, რომელსაც ერთი ხე არ დაურგავს, მარტო ჩოლოქზე გავიდნენ. ყველაზე ცუდი ადგილი აჭარა-გურიის საზღვარზე რაც იყო, დაჭაობებული და ძველი ტიპის კანალიზაციის ბუნკერები იდგა, ბეტონის, ციცინათელას ადგილზე და იმის საპირისპირო მხარეს ათასობით ევკალიპტი იყო, ყველაზე ცუდ ადგილზე ყველაზე საინტერესო პარკი გაკეთდა, რომელზეც არავინ საუბრობს. ხეების გადარგვის თემას პოზიტივის მეტი არაფერი არ ახლდა. პარკიც იქნება ძალიან საინტერესო და  ვთქვი თავის დროზე, რომ ეს პარკი საზოგადოებრივი იქნება. ოპოზიცია ამაზე საერთოდ არ აკეთებს მინიშნებას, საკუთარ სახლში და საკუთარ ეზოში მიაქვს. საკუთარი იყო ჩემი მიწები, როდესაც „ციცინათელას“ ვაშენებდი, ის მიწები მე შევისყიდე ზოგი მოსახლეობისგან, ზოგი სახელმწიფოსგან, ავაშენე ციცინათელა და სახელმწიფოს თავის მიწებიანად ვაჩუქე“, – განაცხადა ივანიშვილმა.

მან ასევე აღნიშნა, რომ 5 მილიონზე მეტი ლარი უშუალოდ ხეების გადატანის პროცესში გზებში დახარჯა.  „გზები, რომელიც დარჩება და არა ის, რასაც მაბრალებდნენ – სახელმწიფო ბიუჯეტი ჩემს პირადზე დავხარჯო, მაგას როგორ ვიკადრებ… პირიქით პროცესინგი ხდებოდა, რომ ჩემი კერძო ფულით, მინიმუმ 5 მილიონი ლარით გაკეთებული გზები დარჩება და მოიხმარს მოსახლეობა.

თვითონ პროცესი იყო საინტერესო. ის, რომ ჩვენ დემოკრატიას ვეტრფით და დემოკრატიული ინსტიტუტების გამყარებაში გვინდა, რომ გარდატეხა შევიტანოთ, ამ ფონზე და წინა ხელისუფლების ფონზე, როგორ ექცეოდნენ საკუთარ მოსახლეობას. აბა ნახეთ, როგორ მიმდინარეობდა პროცესი ორი წლის განმავლობაში. როგორი ვაჭრობა მიდიოდა თითოეულთან ჩემი იურისტების, ვერც ერთ პროცესს ვერ ნახავთ, რომ ვინმეს სურვილის საწინააღმდეგოდ მე რამე სხვა ბერკეტით შევეცადე…. თუმცა ძალიან ხშირად, უკაცრავად და სისულელეებს ითხოვდნენ. ღირდა 10 დოლარი, ითხოვდნენ 1000-ს. 2-ჯერ, 3-ჯერ, 4-ჯერ, 10-ჯერ მეტს ვიხდიდი, მაგრამ იქ ვამუხრუჭებდი. არსად არ მიკადრებია, რომ ვინმეს უფლება შემელახა, ყველგან ვემორჩილებოდი კანონს და უაღესად პატივს ვცემდი საკუთრების უფლებას და ადამიანის უფლებებს.

…ვიღაცებს არ მოუნდათ, ბოდიში მოგვიხდია და წამოვსულვართ. ეს პროცესი იყო ძალიან საინტერესო. დაასახელონ ერთი მომენტი მაინც, რომ ვინმე განაწყენებულია, რომ დაჩაგრეს, ვერც ერთ მომენტს ვერ ნახავენ ასეთს“, – განაცხადა ბიძინა ივანიშვილმა.

_________________

მთავარი ფოტო: კადრი „პირველი არხის“ ინტერვიუდან.