აშშ-ის მთავრობა, ათასწლეულის გამოწვევის კორპორაციასა და საქართველოს მთავრობას შორის გაფორმებული ხელშეკრულების ფარგლებში, აჭარაში სამ საჯარო სკოლას სრულ რეაბილიტაციას ჩაუტარებს. რეაბილიტაციის შემდეგ ტექნიკითა და ლაბორატორიებით სრულად აღიჭურვება ბათუმში მე-18, ქობულეთის და ლეღვას საჯარო სკოლები. რეაბილიტაციაზე 1.5 მილიონი დოლარი დაიხარჯება.
„სარეაბილიტაციაო ფართობი მთლიანობაში 8 500 კვადრატულ მეტრს მოიცავს. სასწავლო გარემო 3000-ზე მეტი მოსწავლისთვის გაუმჯობესდება“ – მიიჩნევენ აჭარის განათლების სამინისტროში.
ოფიციალური ინფორმაციით, აღნიშნული ფონდის დაფინანსებით 2018 წელს დასავლეთ საქართველოში სრული რეაბილიტაცია ჩაუტარდება 30 საჯარო სკოლას, „რის შედეგადაც სასწავლო გარემო გაუმჯობესდება 15 200 მოსწავლეს“.
სკოლების რეაბილიტაციისთვის 15 მილიონ აშშ დოლარია გათვალისწინებული.
ათასწლეულის გამოწვევის ფონდის პროექტის ფარგლებში, საქართველოში სრული რეაბილიტაცია ჩაუტარდა და საბუნებისმეტყველო ლაბორატორიებით აღიჭურვა 44 საჯარო სკოლა. კერძოდ: მცხეთა-თიანეთის, შიდა ქართლის, სამცხე-ჯავახეთის, რაჭა-ლეჩხუმის, ქვემო ქართლის, კახეთის რეგიონებში.
ათასწლეულის გამოწვევის ფონდი საქართველოს რეგიონებში მთლიანობაში, 91 საჯარო სკოლის სრულ რეაბილიტაციას და ლაბორატორიებით აღჭურვას ახორციელებს.
საჯარო სკოლების რეაბილიტაციას აშშ-ის მთავრობა 2013 წლიდან აფინანსებს.
