კობახიძის სიძე, მინისტრი დავით ფაცაცია 6 წელია საქორწინო საჩუქრად ფულს იღებს

ირაკლი კობახიძის დის ქმარი, დავით ფაცაცია აფხაზეთის ავტონომიური რესპუბლიკის მთავრობაში მინისტრის პოსტს იკავებს.

დავით ფაცაცია 2017 წლამდე არასამთავრობო ორგანიზაციებსა და კერძო კომპანიებში მუშაობდა. მისი ოფიციალური ბიოგრაფიის მიხედვით, ის საჯარო სექტორში 2019 წელს დასაქმდა. სწორედ ამ წელს, 2019 წლის 22 ივნისს დაქორწინდა ის ირაკლი კობახიძის დაზე, ქეთევან კობახიძეზე.

აფხაზეთის მთავრობის ვებგვერდზე გამოქვეყნებული ოფიციალური სივის მიხედვით, დავით ფაცაცია 2001-2004 წლებში იყო აშშ-ის საერთაშორისო განვითარების სააგენტოს (USAID) და აშშ-ის განათლებისა და განვითარების აკადემიის (AED) პროგრამა – „ახალგაზრდა ლიდერები მშვიდობისა და განვითარებისათვის სამხრეთ კავკასიაში“, ტრენერ-კოორდინატორი.

2005 წელს ფონდი „ღია საზოგადოება – საქართველო“, პროგრამა – ევროპის სამეზობლო პოლიტიკა (ENP Georgia), კონფლიქტების ჯგუფის ხელმძღვანელი.

2006 წელს დააფუძნა საერთაშორისო ახალგაზრდული ორგანიზაცია „AIESEC Georgia“ და მისი ვიცე – პრეზიდენტი გახდა.

2005-2009 წლებში იყო ფონდი „აფხაზეთის მომავალი“, პროექტების მენეჯერი, ხოლო 2011-2017 წლებში იყო შპს – „ავიატორის“ კომერციული დირექტორი.

დავით ფაცაცია პროფესიით ეკონომისტია. ის აფხაზეთიდან დევნილია, 1983 წელს  სოხუმში დაიბადა.

აფხაზეთის ავტონომიურ რესპუბლიკის მთავრობაში კი 2019 წელს მივიდა. სხვადასხვა წლებში სხვადასხვა სამინისტროს ხელმძღვანელობდა, ხოლო პარალელურად 2022 წლიდან არის თსუ-ს მოწვეული ლექტორი ეკონომიკისა და ბიზნესის ფაკულტეტზე.

  • რა წერია დეკლარაციაში

დავით ფაცაციას ოფიციალური დეკლარაციის მიხედვით, მას არ აქვს სახლი ან რაიმე ქონება. ერთადერთი, რაც ბოლო 7 წლის მანძილზე შევსებული დეკლარაციებიდან ჩანს, მას 2019 წელს საქორწინო საჩუქარი მიუღია, რომელიც 7 წლის განმავლობაში ყოველწლიურად იზრდება.

დავით ფაცაცია დეკლარაციას 2019 წლიდან ავსებს, როგორც აფხაზეთის ა/რ ნდობის აღდგენისა და შერიგების საკითხებში მინისტრს.

2019 წლის დეკლარაციაში წერია, რომ დავით ფაცაციამ საქორწინო საჩუქრის სახით მიიღო 54 ათასი ლარი და 14 500 დოლარი.

ამავე დეკლარაციის მიხედვით, მას დეკლარაციის შევსების მომენტში სხვა ქონება არ აქვს. დეკლარაციაში მითითებულია მხოლოდ ის ქონება, რომელიც მისმა მეუღლემ, ქეთევან კობახიძემ საჩუქრის სახით მიიღო. კერძოდ, 2013 წელს, ქეთევან კობახიძეს მშობლებისგან, თამარ ზაალიშვილისგან და გიორგი კობახიძისგან საჩუქრად მიუღია წყნეთში მდებარე 567 კვ.მ მიწის ნაკვეთი, ხოლო 2016 წელს საჩუქრად მიღებული აქვს ავტოფარეხი და ბინა.

სხვა ქონება დავით ფაცაციას დეკლარაციაში ასახული არაა.

2019 წელს დავით ფაცაციამ, როგორც მინისტრმა, ხელფასის სახით, 14 750 ლარი მიიღო, ხოლო მისმა მეუღლემ, ქეთევან კობახიძემ 2 685 ლარი.

2020 წელს შევსებული დეკლარაციის მიხედვით, დავით ფაცაცია უკვე აფხაზეთის ავტონომიური რესპუბლიკის იუსტიციისა და სამოქალაქო ინტეგრაციის საკითხებში მინისტრი ხდება.

დეკლარაციაში ისევ ჩანს, ქეთევან კობახიძის საჩუქრები – მიწის ნაკვეთი, ბინა და ავტოფარეხი.

ხოლო ნაღდი ფულის გრაფაში წერია, რომ დავით ფაცაცია ფლობდა 54 000 ლარს და 14 000 დოლარს, რომელიც მიღებული ჰქონდა საქორწინო საჩუქრის სახით.

2020 წელს დავით ფაცაციამ, როგორც მინისტრმა, ხელფასის სახით, 28 461 ლარი მიიღო, ხოლო მისმა მეუღლემ, ქეთევან კობახიძემ, რომელიც თბილისის სამხატვრო აკადემიაში პედაგოგად მუშაობდა, 2 716 ლარი.

2021 წელს დავით ფაცაციამ დეკლარაცია შეავსო, როგორც აფხაზეთის ავტონომიური რესპუბლიკის იძულებით გადაადგილებულ პირთა-დევნილთა მინისტრმა. ის ამ თანამდებობას დღემდე იკავებს.

დეკლარაციაში მინისტრს ისევ თავისი მეუღლის სახელზე რეგისტრირებული ქონება აქვს მითითებული. თუმცა დეკლარაციიდან ქრება 2013 წელს ნაჩუქარი 567 კვადრატული მეტრი მიწის ნაკვეთი წყნეთში და ჩნდება 2019 წელს ნაჩუქარი 2 270 კვ. მ. მიწის ნაკვეთი წყნეთში, იგივე მისამართზე.

ქეთი კობახიძეს ეს მიწის ნაკვეთი მშობლებმა აჩუქეს – გიორგი კობახიძემ და თამარ ზაალიშვილმა.

დეკლარაციაში არ არის განმარტება, ვინაიდან მიწის ნაკვეთი 2019 წელს აჩუქეს ქეთევან კობახიძეს, რატომ არ აისახა ის 2020 წლის დეკლარაციაში, ან რა ბედი ეწია 2013 წელს ნაჩუქარ მიწის ნაკვეთს.

2021 წლის დეკლარაციაში დავით ფაცაციამ მიუთითა, რომ საქორწინო საჩუქრის სახით მიიღო 69 ათასი ლარი და 17 000 დოლარი.

დეკლარაციაში ამ თანხის ირგვლის რაიმე სხვა განმარტება მოცემული არაა.

2021 წლის დეკლარაციაში ხელფასის გარდა მოცემულია ქეთევან კობახიძის მიერ მიღებული შემოსავალი 2500 დოლარის ოდენობით, რომელიც მან ნახატის რეალიზაციიდან მიიღო.

2021 წელს დავით ფაცაციამ, ხელფასის სახით, 40 882 ლარი მიიღო, ხოლო მისმა მეუღლემ 1 863 ლარი.

2022 წელს შევსებულ დეკლარაციაში აფხაზეთის ავტონომიური რესპუბლიკის იძულებით გადაადგილებულ პირთა-დევნილთა მინისტრმა, დავით ფაცაციამ ისევ მიუთითა, რომ მიიღო საქორწინო საჩუქარი 69 ათასი ლარი და 21 000 დოლარი.

სხვა ქონება ან შემოსავალი, მითითებული არაა.

დეკლარაციის მიხედვით დავით ფაცაცია ყოველ წელს იღებს საქორწინო საჩუქარს თანხის სახით

2022 წელს დავით ფაცაციამ, როგორც მინისტრმა, ხელფასის სახით, 55 186 ლარი მიიღო, ხოლო მისმა მეუღლემ, ქეთევან კობახიძემ 2 195 ლარი. გარდა ამისა, ამ წელს დავით ფაცაცია თსუ-ს მიწვეული ლექტორი გახდა და ხელფასის სახით 361 ლარი აიღო.

2023 წლის დეკლარაციაში დავით ფაცაციას ქონებრივი მდგომარეობა უცვლელია – ერთადერთ ქონებად ისევ მისი მეუღლის, ქეთევან კობახიძის მიერ საჩუქრად მიღებული ბინა და მიწის ნაკვეთი აქვს მითითებული.

2023 წლის დეკლარაციაში დავით ფაცაცია უთითებს, რომ მისმა მეუღლემ ბინის გაქირავებიდან შემოსავლის სახით 5 400 დოლარი მიიღო.

ხოლო ნაღდი ფულის გრაფაში ისევ მითითებული აქვს რომ 2023 წელს საქორწინო საჩუქარი მიიღო – 79 000 ლარი და 26 000 დოლარი.

2023 წელს დავით ფაცაციამ, როგორც მინისტრმა, ხელფასის სახით, 60 705 ლარი მიიღო, ხოლო მისმა მეუღლემ, ქეთევან კობახიძემ 4 186 ლარი.

დავით ფაცაციას თსუ-ში ჩატარებული ლექციების გამო, ხელფასის სახით, 1 809 ლარი დაერიცხა.

2024 წლის დეკლარაციაში დავით ფაცაციას აღარ უჩანს მშობლების მიერ მეუღლისთვის ნაჩუქარი მიწის ნაკვეთი. უცნობია რა ბედი ეწია ამ მიწის ნაკვეთს, რადგან დეკლარაციაში არსადაა აღნიშნული, გაყიდვის ან გაჩუქების შესახებ რაიმე ინფორმაცია.

2024 წელსაც, წინა წლების მსგავსად, დავით ფაცაციამ საქორწინო საჩუქარი მიიღო – 91 000 ლარი და 29 000 დოლარი.

დავით ფაცაციას მეუღლემ, ქეთევან კობახიძემ ბინის გაქირავების შედეგად, შემოსავლის სახით, 10 200 დოლარი მიიღო. ხოლო ნახატების გაყიდვის შედეგად 8 400 ლარი.

2024 წელს დავით ფაცაციამ, როგორც მინისტრმა, ხელფასის სახით, 66 725 ლარი მიიღო, ხოლო მისმა მეუღლემ, ქეთევან კობახიძემ 4 186 ლარი.

დავით ფაცაციას თსუ-ში ჩატარებული ლექციებისთვის ხელფასის სახით 1 085 ლარი დაერიცხა.

2025 წლის დეკლარაციაშიც, წინა წლების მსგავსად, დავით ფაცაცია მხოლოდ მისი მეუღლის სახელზე რეგისტრირებულ ქონებას უთითებს – ბინას და ავტოფარეხს. ასევე, წინა წლების მსგავსად, დავით ფაცაციამ 2025 წელსაც მიიღო საქორწინო საჩუქარი. ამჯერად 105 ათასი ლარი და 34 000 დოლარი.

მისმა მეუღლემ ბინის გაქირავებიდან 10 800 დოლარი მიიღო შემოსავლის სახით, ხოლო თავად დავით ფაცაციამ ორი სამომხმარებლო სესხი აიღო თიბისი ბანკში. ერთი სესხი 50 000 ლარის ოდენობით, ხოლო მეორე 30 500 ლარის ოდენობით.

ორივე სესხის გადასახადმა 2025 წელს 11 108 ლარი შეადგინა. 2025 წელს დავით ფაცაციამ ასევე გადაიხადა შვილის, გიორგი ფაცაციას საბავშვო ბაღის გადასახადი – 7 700 ლარი.

„ბათუმელებმა“ სცადა კომენტარის მიღება აფხაზეთის ავტონომიური რესპუბლიკის იძულებით გადაადგილებულ პირთა-დევნილთა მინისტრისგან, რას ნიშნავს მის დეკლარაციაში ასახული საქორწინო საჩუქარი და რის საფუძველზე იზრდება ეს თანხა? დავით ფაცაციამ „ბათუმელების“ კითხვებს არ უპასუხა.

თუ დავით ფაცაცია განმარტების გაკეთებას მოისურვებს – როგორ იღებდა ბოლო 6 წლის განმავლობაში საქორწინო საჩუქარს, ამ განმარტებას აქვე შემოგთავაზებთ.

„ამბასადორი აილენდ ბათუმმა“ 50 საერთაშორისო პილოტს უმასპინძლა

„ამბასადორი აილენდ ბათუმმა“ კერძო ავიაციის პილოტთა საერთაშორისო ექსპედიციის ფარგლებში ბათუმში ჩამოსულ 50 პილოტს უმასპინძლა. ექსპედიციის მონაწილეები ევროპის სხვადასხვა ქვეყნიდან და აშშ-დან საქართველოში კაჭრეთში, „ამბასადორის საავიაციო სოფლის“ ოფიციალური გახსნის ღონისძიებაში მონაწილეობის მისაღებად ჩამოვიდნენ.

ბათუმში ვიზიტის ფარგლებში პილოტები „ამბასადორი აილენდ ბათუმს“ ესტუმრნენ და ადგილზე გაეცნენ პროექტის მასშტაბს, უკვე განხორციელებულ სამუშაოებს, მიმდინარე სამშენებლო პროგრესს, განვითარების ხედვასა და სამომავლო გეგმებს. განსაკუთრებული ყურადღება დაეთმო პროექტში გათვალისწინებულ საავიაციო ინფრასტრუქტურას, მათ შორის ასაფრენ-დასაფრენ ზოლს, რომლის განვითარებაც მომავალში კუნძულზე კერძო ავიაციის ფრენების მიღების შესაძლებლობას შექმნის. პროექტის განვითარების ერთ-ერთი მნიშვნელოვანი მიმართულებაა საჰაერო კავშირების გაძლიერება – როგორც საქართველოს სხვადასხვა რეგიონსა და ადგილობრივ კურორტებს შორის, ისე საერთაშორისო მიმართულებებთან.

კუნძულზე პილოტებს „ამბასადორი ჯგუფის“ დამფუძნებელი თორნიკე ქებურია მიესალმა, რომელმაც „ამბასადორი აილენდ ბათუმზე“ საჰაერო ხომალდით დაშვებაც განახორციელა.

ბათუმის საერთაშორისო აეროპორტში ექსპედიციის მონაწილეებს მიესალმნენ აჭარის ავტონომიური რესპუბლიკის მთავრობის თავმჯდომარე ზურაბ პატარაძე და ბელგიის სამეფოსა და ლუქსემბურგის დიდ საჰერცოგოში საქართველოს საგანგებო და სრულუფლებიანი ელჩი, ევროკავშირთან საქართველოს წარმომადგენლობის ხელმძღვანელი ვახტანგ მახარობლიშვილი.

„კერძო ავიაციის პილოტთა ექსპედიცია საქართველოში 2026“, 29 აგვისტოდან 12 სექტემბრამდე, მარშრუტით ლუქსემბურგი – საქართველო – ლუქსემბურგი, ხორციელდება. ექსპედიცია 4 000-ზე მეტ საზღვაო მილს მოიცავს და მასში 26 საჰაერო ხომალდი მონაწილეობს. პილოტები ევროპის სხვადასხვა ქვეყნიდან და აშშ-დან არიან, მათ შორის ლუქსემბურგიდან, საფრანგეთიდან, ჩეხეთიდან, ბულგარეთიდან, პორტუგალიიდან, ნიდერლანდებიდან, გერმანიიდან, იტალიიდან, პოლონეთიდან, თურქეთიდან და დიდი ბრიტანეთიდან.

ინიციატივას კოორდინაციას უწევს ლუქსემბურგში საქართველოს საპატიო კონსული პიტერ სოდერმანსი, ხოლო მხარდამჭერები არიან ლუქსემბურგის თვითმფრინავების მფლობელთა და პილოტთა ასოციაცია (AOPA Luxembourg), თურქეთის თვითმფრინავების მფლობელთა და პილოტთა ასოციაცია (AOPA Türkiye) და ლუქსემბურგში საქართველოს საპატიო საკონსულო.

„ბათუმის ექსპედიციის მარშრუტში ჩართვა ჩვენთვის მნიშვნელოვანი იყო, რადგან ის საქართველოს ერთ-ერთი მთავარი კარიბჭეა მსოფლიოსთან. „ამბასადორი აილენდ ბათუმი“ ასახავს იმ ამბიციას, რომელსაც დღეს საქართველოში ვხედავთ- შეიქმნას ახალი მიმართულებები და ინფრასტრუქტურა, რომელიც საერთაშორისო ვიზიტორებს მოიზიდავს და ქვეყანას ევროპასთან კიდევ უფრო მჭიდროდ დააკავშირებს. საქართველოს კერძო ავიაციისა და საავიაციო ტურიზმის განვითარებას უზარმაზარი პოტენციალი აქვს და ჩვენი ექსპედიციის ერთ-ერთი მიზანიც სწორედ ამ შესაძლებლობის წარმოჩენაა“, – აღნიშნა პიტერ სოდერმანსმა, ლუქსემბურგში საქართველოს საპატიო კონსულმა და ექსპედიციის კოორდინატორმა.

აღნიშნული საერთაშორისო საავიაციო ქსელი მსოფლიოს სხვადასხვა ქვეყნიდან დაახლოებით 17 000 წევრს აერთიანებს, რაც ბათუმისა და აჭარის საერთაშორისო ცნობადობის გაზრდისა და რეგიონის კერძო ავიაციის ფართო აუდიტორიისთვის გაცნობის მნიშვნელოვან შესაძლებლობას ქმნის.

„ამბასადორი აილენდ ბათუმი“ თავისი საერთაშორისო ხედვითა და მასშტაბით საქართველოს მსოფლიოსთან კიდევ უფრო მჭიდროდ აკავშირებს. ისეთი ინიციატივები, როგორიც კერძო ავიაციის პილოტთა საერთაშორისო ექსპედიციაა, კიდევ ერთხელ ადასტურებს ბათუმისა და მთლიანად საქართველოს მიმართ საერთაშორისო აუდიტორიის მზარდ ინტერესს. ჩვენთვის განსაკუთრებით მნიშვნელოვანია, რომ „ამბასადორი აილენდ ბათუმი“ იყოს პლატფორმა, რომელიც ქვეყანაში ახალ ადამიანებს, ახალ შესაძლებლობებსა და საერთაშორისო კავშირებს მოიზიდავს“, – აღნიშნა „ამბასადორი აილენდ ბათუმის“ გენერალურმა დირექტორმა გოჩა კამკიამ.

ბათუმში ვიზიტის შემდეგ ექსპედიციის მონაწილეები კახეთში გაემგზავრებიან, სადაც „ამბასადორის საავიაციო სოფლის“ ოფიციალური გახსნის ღონისძიება გაიმართება. ახალი საავიაციო ინფრასტრუქტურის განვითარება და საერთაშორისო საავიაციო ინიციატივების განხორციელება ხელს შეუწყობს საქართველოში კერძო ავიაციისა და საავიაციო ტურიზმის განვითარებას და ქვეყნის საერთაშორისო ზოგადი ავიაციის რუკაზე პოზიციების გაძლიერებას.

6 მილიონი ლარია გამოყოფილი ბათუმში სანაპირო დაცვის ახალი ოფისის ასაშენებლად

ბათუმში, თამარის [ბენზეს] დასახლებაში, ზღვასთან ახლოს, სანაპირო დაცვის მე-2 სამმართველოს ახალი ადმინისტრაციული შენობის მშენებლობაა დაგეგმილი. სამუშაოების შესყიდვაზე ტენდერი შინაგან საქმეთა სამინისტროს სასაზღvრო პოლიციამ 5 997 196 ლარით გამოაცხადა.

საპროექტო ტერიტორიის ფართობი 2 855 კვადრატული მეტრია და ის ბათუმში, ზღვიდან 50 მეტრში, თამარ მეფის გამზირი 43-ის მიმდებარედაა. აქ სანაპირო დაცვის სამსახური რამდენიმე წელია რაც განთავსებულია. ზღვაში კი მოწყობილია ხელოვნური ყურე და ნავმისადგომი [აშენებულია ტალღამრეკლი კედელი ნაპირის დასაცავად].

ბათუმი, ბენზე-ბარცხანის სანაპირო ზოლი, სადაც სანაპირო დაცვის ნავსაყუდელი აშენდა, შემდეგ კი ხელოვნური ნახევარკუნძულები [რომელთა მიმდებარედ ახლა ხელოვნური კუნძული შენდება] 2009-2026 [აპრილი] წლების ფოტოები სატელიტიდან. წითელი წერტილით აღნიშნულია სანაპირო დაცვის ოფისის ტერიტორია.
ტენდერის მიხედვით, სანაპირო დაცვის ბათუმის განყოფილების ადმინისტრაციული შენობა სამსართულიანი იქნება.

ტენდერს თან ახლავს პროექტი, რომლის მიხედვითაც შენობა უნდა ააშენონ. პროექტი შენობის მიმდებარე ტერიტორიის კეთილმოწყობასაც ითვალისწინებს.

„განსაკუთრებული მნიშვნელობის ობიექტების მშენებლობის ნებართვა“ ტექნიკური და სამშენებლო ზედამხედველობის სააგენტომ 2026 წლის 28 აპრილს გასცა.

სანაპირო დაცვის ბათუმის განყოფილების ადმინისტრაციული შენობა / ესკიზები პროექტიდან

ტენდერში წინადადებების მიღება 2026 წლის 21 სექტემბერს დაიწყება და 24 სექტემბერს დასრულდება.

ტენდერში გამარჯვებულმა მშენებლობა ხელშეკრულების გაფორმების შემდგომ, შესაბამისი წერილობითი დავალების მიცემიდან 550 დღის განმავლობაში უნდა დაასრულოს.

ბათუმი, სანაპირო დაცვის ადმინისტრაციული შენობის საპროექტო ტერიტორია [აღნიშნულია წითელი წერტილით]
თავის დროზე ამ ადგილზე „ტალღამრეკლის მოწყობის და სანაპიროზე კენჭნაროვანი მასალის შემოტანა-დატერასების ღონისძიებებმა, სანაპიროს გამორეცხვა მკვეთრად შეაჩერეს“, – წერია გეოლოგიურ დასკვნაში. შესაბამისად, ამავე დასკვნის მიხედვით, „საინჟინრო-გეოლოგიური თვალსაზრისით, მშენებლობისათვის გამოყოფილი ტერიტორია იმყოფება დამაკმაყოფილებელ მდგომარეობაში“.

სანაპირო დაცვის ნავსაყუდელი ბათუმში / ფოტო გეოლოგიური დასკვნიდან

 

 

ბათუმის საბავშვო ბაღები მუშაობას 14 სექტემბერს განაახლებენ

ბათუმის საბავშვო ბაღებში სააღმზრდელო-სასწავლო პროცესი 14 სექტემბერს განახლდება.

„ბათუმელები“ დაუკავშირდა ბაღების გაერთიანებას და ჰკითხა, რამდენი ბავშვი დარეგისტრირდა წელს საბავშვო ბაღებში და რამდენი ბავშვის მიღება ვერ შეძლო გაერთიანებამ ადგილების დეფიციტის გამო.

როგორც გაერთიანებაში გვიპასუხეს, ჯერ მონაცემები არ აქვთ დამუშავებული და 10 სექტემბრისთვის ეცოდინებათ, რამდენი ახალი აღსაზრდელი ჩაირიცხება საჯარო ბაღებში. უწყებაში არც ის გვითხრეს, მთლიანობაში რამდენი ბავშვი ირიცხება ბათუმის მუნიციპალურ საბავშვო ბაღებში.

 

მოსკოვის აეროპორტები ზედიზედ მეორე ღამეა დახურულია ზელენსკის მუქარის შემდეგ – მედია

რუსეთში, მოსკოვის ვნუკოვოსა და შერემეტიევოს აეროპორტებმა ზედიზედ მეორე ღამეა შეაჩერეს ოპერირება უკრაინის პრეზიდენტის, ვოლოდიმირ ზელენსკის, მიერ სამოქალაქო ავიაციისთვის რუსეთის საჰაერო სივრცის სახიფათოობის შესახებ გაფრთხილების შემდეგ – წერს გამოცემა moscow times.

მედიის ცნობით, ზელენსკის განცხადების პირველსავე ღამეს მოსკოვის სამმა აეროპორტმა შეაჩერა ოპერირება, შერემეტიევოში 21 რეისი გაუქმდა და 235 გადაიდო, ხოლო ვნუკოვოში 22 რეისი გაუქმდა და 94 გადაიდო.

„როსავიაციამ“ განაცხადა, რომ მოსკოვის რეგიონის აეროპორტებში თვითმფრინავების ჩამოსვლასა და გამგზავრებაზე დროებითი შეზღუდვები დაწესდა.

1 სექტემბერს უკრაინის პრეზიდენტმა ვოლოდიმირ ზელენსკიმ განაცხადა, რომ რუსეთის ცა სახიფათო ხდება სამოქალაქო ავიაციისთვის და ამის შესახებ გააფრთხილა ყველა ავიაკომპანია, რომელიც რუსეთის საჰაერო სივრცეს იყენებს.

უკრაინის საგარეო საქმეთა მინისტრმა ანდრეი სიბიჰამ დღეს, 2 სექტემბერს განაცხადა, რომ უკრაინამ ოფიციალურად აცნობა სამოქალაქო ავიაციის საერთაშორისო ორგანიზაციას (ICAO), გაეროს საავიაციო სააგენტოს, რომ რუსეთის საჰაერო სივრცე საფრთხეს უქმნის სამოქალაქო ავიაციას გაზრდილი სამხედრო აქტივობის გამო.

რუსეთის პრეზიდენტმა ვლადიმერ პუტინმა კიევის ამ განცხადებას „სახელმწიფო ტერორიზმისკენ გადადგმული ნაბიჯი“ უწოდა, ხოლო „როსავიაციამ“ პირობა დადო, რომ მიიღებს დამატებით ზომებს რუსეთის საჰაერო სივრცის უსაფრთხო გამოყენების უზრუნველსაყოფად.

_______________________

ფოტო: moscow times

ოზურგეთში მანქანების გაქურდვაში ბრალდებული დააკავეს

შინაგან საქმეთა სამინისტროს ცნობით,  გურიაში ქურდობის ბრალდებით, წარსულში ნასამართლევი პირი მოსამართლის განჩინების საფუძველზე დააკავეს.

შსს-ს ინფორმაციით, გამოძიებით დადგინდა, რომ ბრალდებულმა ოზურგეთის მუნიციპალიტეტის დაბა შეკვეთილში, სხვადასხვა დროს, სპეციალური ტექნიკური მოწყობილობის გამოყენებით ორი ავტომობილის კარი გააღო, თანხა მოიპარა და შემთხვევის ადგილიდან მიიმალა.

შსს აცხადებს, რომ ნივთმტკიცებად ამოღებულია ტექნიკური მოწყობილობა, რომლის საშუალებითაც ბრალდებულმა დანაშაული ჩაიდინა.

გამოძიება სისხლის სამართლის კოდექსის 177-ე მუხლის მე-2 და მე-4 ნაწილებით მიმდინარეობს, რაც 10 წლამდე ვადით თავისუფლების აღკვეთას ითვალისწინებს.

აჭარაში ინტერპოლის მიერ ძებნილი პირი დააკავეს

შინაგან საქმეთა სამინისტროს ინფორმაციით ხელვაჩაურის რაიონული სამმართველოს თანამშრომლებმა, ინტერპოლის წითელი ცირკულარით ძებნილი, თურქეთის რესპუბლიკის მოქალაქე დააკავეს.

„დაკავებული, თურქეთის სამართალდამცავი ორგანოების მოთხოვნის საფუძველზე, სხვადასხვა კატეგორიის დანაშაულისთვის, მათ შორის თაღლითობის, სხეულის დაზიანებისა და მუქარისთვის იძებნებოდა. სამართალდამცველებმა, ჩატარებული საგამოძიებო მოქმედებების შედეგად, ძებნილი პირი აჭარაში დააკავეს.

ამჟამად, დაკავებულის მიმართ კანონით გათვალისწინებული საექსტრადიციო პროცედურები მიმდინარეობს.“ – წერს შსს.

პროკურატურა „საეჭვო“ თვითმკვლელობებზე, რაზეც ღარიბაშვილი მეხუთე წერილში საუბრობს

დღეს, 3 სექტემბერს, საქართველოს პროკურატურამ განცხადება გაავრცელა ექს-პრემიერმა ირაკლი ღარიბაშვილის მე-5 განცხადებაში ნათქვამ „საეჭვო“ თვითმკვლელობაზე, რაც„კობახიძე-მდინარაძის მმართველობის დროს“ მოხდა.

პროკურატურა თავის განცხადებაში წერს: „2026 წლის 4 აპრილს ლაზარე ჯორბენაძის თვითმკვლელობის ფაქტზე, შინაგან საქმეთა სამინისტროში მიმდინარე გამოძიების ფარგლებში, ჩატარებულია არაერთი საგამოძიებო და საპროცესო მოქმედება. გამოკითხულია გარდაცვლილთან შემხებლობაში მყოფი პირები, მათ შორის, გარდაცვლილის ოჯახის წევრები და მეუღლე, რის საფუძველზეც, ამ ეტაპზე, უტყუარად დადასტურებულია თვითმკვლელობის ფაქტი.

მიუხედავად ზემოაღნიშნულისა, მსჯავრდებულ ირაკლი ღარიბაშვილისა და სხვა პირების მიერ საჯაროდ გაკეთებული განცხადებების საფუძველზე, პროკურატურის ზედამხედველობით, შინაგან საქმეთა სამინისტროში მიმდინარე გამოძიების ფარგლებში, გამოიკითხებიან ნიკა გვარამია; ირმა ინაშვილი; ნანუკა ჟორჟოლიანი; ხატია დეკანოიძე; თაზო დათუნაშვილი; გია ხუხაშვილი; გიორგი ლილუაშვილი; ზაზა დავითაია; ერმილე ნემსაძე; გიორგი გიგაური.

აღნიშნულ სისხლის სამართლის საქმეზე ასევე გამოიკითხება ირაკლი ღარიბაშვილი. მაღალი საჯარო ინტერესის გათვალისწინებით, აღნიშნული პირების გამოკითხვის შედეგების შესახებ, ლაზარე ჯორბენაძის თვითმკვლელობის ფაქტთან დაკავშირებით, თუ რაიმე ახალი გარემოებები გახდა ცნობილი, საზოგადოებას დამატებით მივაწვდით ინფორმაციას“.

პატიმრობაში მყოფი ირაკლი ღარიბაშვილმა თავის მე-5 წერილში წერდა: „პასუხი უნდა გაეცეს შემდეგ კითხვას: რა გახდა უფლებადამცველი ლაზარე ჯორბენაძის გარდაცვალების რეალური მიზეზი? ამ კითხვას საჯაროდ ვსვამ, რადგან საზოგადოებაში დღემდე რჩება პასუხგაუცემელი კითხვები არაერთი ადამიანის თვითმკვლელობის ფაქტთან დაკავშირებით, რომლებსაც ადგილი ჰქონდა კობახიძე-მდინარაძის მმართველობის დროს…“

ახალი მონაცემები რუსეთის და უკრაინის სამხედრო დანაკარგებზე ომში – 3 სექტემბერი

უკრაინის შეიარაღებული ძალების გენერალური შტაბის დღევანდელი მონაცემებით, ომის დაწყებიდან 2026 წლის 3 სექტემბრამდე პერიოდში, რუსეთის არმიის საბრძოლო დანაკარგი არის:

  • ცოცხალი ძალა – დაახლოებით 1 492 350 ადამიანი [გასულ დღე-ღამეში +1 320. ამ მონაცემებში შედის როგორც დაღუპულები, ასევე დაჭრილები]
  • ტანკი – 12 324 ერთეული [+0]
  • ჯავშანტექნიკა – 25 264 ერთეული [+1]
  • საარტილერიო სისტემა – 49 085 ერთეული [+69]
  • MLRS – 2 085 ერთეული [+4]
  • საზენიტო საბრძოლო სისტემა – 1 600 ერთეული [+2]
  • თვითმფრინავი – 441 ერთეული [+1]
  • ვერტმფრენი – 355 ერთეული [+1]
  • უპილოტო საფრენი აპარატის ოპერატიულ-ტაქტიკური დონე – 496 021 ერთეული [+1 875]
  • სახმელეთო რობოტიზებული კომპლექსი – 2 476 ერთეული [+12]
  • გემი/ნავი – 35 ერთეული [+0]
  • წყალქვეშა ნავი – 2 ერთეული [+0]
  • მანქანები და საწვავის ავზები – 143 150 ერთეული [+435]
  • სპეცტექნიკა – 4 628 ერთეული [+3]
  • ფრთოსანი რაკეტა [ჩამოაგდეს] – 5 070 ერთეული [+0]

უკრაინის გენერალური შტაბის განცხადებით, საომარი მოქმედებების მაღალი ინტენსივობის გამო მონაცემები იცვლება.

უკრაინის სამხედრო დანაკარგებზე სტატისტიკური ინფორმაცია 2026 წლის 25 თებერვლის შემდეგ აღარ განუახლებია რუსეთს.

რუსეთის თავდაცვის სამინისტროს მიერ ტელეგრამ არხზე ბოლოს გავრცელებული მონაცემებით, ომის დაწყებიდან 2026 წლის 25 თებერვლამდე პერიოდში სულ განადგურებულია უკრაინის:

  • 670 თვითმფრინავი
  • 283 ვერტმფრენი
  • 117 299 უპილოტო საფრენი აპარატი
  • 651 საზენიტო სარაკეტო სისტემა
  • 27 873 ტანკი და სხვა ჯავშანტექნიკა
  • 1 674 მრავალჯერადი სარაკეტო გამშვები
  • 33 474 საველე არტილერია და ნაღმმტყორცნი
  • 55 252 სპეციალური სამხედრო მანქანა

ეს ის მონაცემებია, რომელსაც უკრაინა და რუსეთი ოფიციალურად ავრცელებენ, თუმცა ომის პირობებში შეუძლებელია ზუსტად გადამოწმება, რამდენად შეესაბამება მხარეების მიერ გავრცელებული ინფორმაცია დანაკარგების შესახებ რეალურ რიცხვებს.

ამასთან, აღნიშნულ მონაცემებთან ერთად რუსეთის თავდაცვა, უკრაინის და რუსეთის არმიის ცოცხალი ძალის საერთო დანაკარგების შესახებ სტატისტიკას არ აქვეყნებს. უკრაინის არმიის ცოცხალი ძალის დანაკარგების შესახებ მონაცემებს არ აქვეყნებს არც უკრაინა.

—

რუსეთი უკრაინაში 2022 წლის 24 თებერვალს გამთენიისას შეიჭრა და სრულმასშტაბიანი ომი დაიწყო.

ამავე თემაზე:

„ომი რუსეთში, სახლში ბრუნდება“ – უკრაინის საგარეო საქმეთა მინისტრი

 

 

მთავარი ფოტო: უკრაინის გენშტაბი/facebook

„დაური იყო ხიდი ჩვენს შორის, რომელიც მეორედ დაგვინგრიეს“ – თბილისში დაურ ბუავა დაკრძალეს

2 სექტემბერს, მუხათგვერდის სასაფლაოზე დაკრძალეს აფხაზი ბლოგერი დაურ ბუავა. მის დაკრძალვას, ოჯახის წევრების გარდა, მოქალაქეებიც ესწრებოდნენ.

დაკრძალვას ესწრებოდა 2008 წელს, აგვისტოს ომში დაღუპული გმირის, 20 წლის კაპრალის, სერგო გოროზიას დედა, მზია გოროზია, რომელიც დაკრძალვაზე შვილის ფოტოთი მივიდა და თქვა, რომ დაური იყო ხიდი, რომელიც მეორედ დაანგრიეს.

„ჩემი შვილი, სერგო გოროზია, აფხაზეთში დაბადებული და გაზრდილი. 4 წლამდე იქ იყო, მამა მოუკლეს. შევიდა შეიარაღებულ ძალებში 2008 წელს.

ყველაფერი კარგად ვიცი, სოხუმში ვცხოვრობდით. ჩემი ქმარი არ ომობდა, ჩემმა ქმარმა მითხრა- „ვინ მყავს აქ მოსაკლავი“, ამ ხალხში გავიზარდე, მე აქ ვერავის მოვკლავ, ვინ უნდა მოვკლა აქ?

სამაგიეროდ ის თვითონ მოკლეს, სახლი წაგვართვეს.

2008 წელი მოვიდა. დედა, აფხაზეთს მშვიდობიანი გზით დავიბრუნებთო, აი, ეს იმ მამის შვილია, რომელიც აღმერთებდა სოხუმს, აღმერთებდა აფხაზებს, ყველა ერს სოხუმში, იმიტომ, რომ სოხუმი მრავალეროვანი ქალაქია.

ჩემი შვილი აქ, მუხათგვერდის სასაფლაოზეა დაკრძალული, ძმათა სასაფლაოზე. მეორეს მხრივ, მიხარია, რომ ახლოსაა, მასთან რომ მივალ, აქაც მოვალ.

მე ვიტირებ თქვენთვისაც.

ერთსაც ვიტყვი. ჩვენი მზე იყო დაური. ჩვენი „ამრა“ [მზე აფხაზურად]. ხიდი ჩვენს შორის, რომელიც მეორედ დაგვინგრიეს.

მთელი საქართველო ტირის. ყველა ნორმალური აფხაზი დღეს ტირის. ყველა, ვინც აზროვნებს. ოსები ტირიან.

ვისარგებლებ შემთხვევით და თანავუგრძნობ აფხაზ დედებს, ოს დედებს. ეს არასწორი ომები იყო ხალხნო. ამ მზესავით ბიჭს არავის მოუკლავს. მას ეკუთვნის ღირსეული პატივი და სახელი“ – თქვა მზია გოროზიამ.

აფხაზი ბლოგერი დაურ ბუავა 28 აგვისტოს თბილისში, საკუთარ სახლში გარდაცვლილი იპოვეს. საქმეზე დაწყებულია გამოძიება.

დაურ ბუავა 26 წლის იყო, როდესაც 2021 წელს აფხაზეთიდან თბილისში ჩამოვიდა. მისი ვიდეოები ძირითადად ქართველებისა და აფხაზების ურთიერთობას, ომს, მშვიდობასა და აფხაზეთის მომავალს ეხებოდა. მას ტიკოკზე ათიათასობით ადამიანი, მათ შორის ბევრი აფხაზი ახალგაზრდა, ადევნებდა თვალს.

ამავე თემაზე: 

ვინ იყო დაურ ბუავა, რომელიც აფხაზეთში „მოღალატედ“ გამოაცხადეს

 

„ომი რუსეთში, სახლში ბრუნდება“ – უკრაინის საგარეო საქმეთა მინისტრი

უკრაინის საგარეო საქმეთა მინისტრმა ანდრეი სიბიჰამ დღეს, 2 სექტემბერს განაცხადა, რომ უკრაინამ ოფიციალურად აცნობა სამოქალაქო ავიაციის საერთაშორისო ორგანიზაციას (ICAO), გაეროს საავიაციო სააგენტოს, რომ რუსეთის საჰაერო სივრცე საფრთხეს უქმნის სამოქალაქო ავიაციას გაზრდილი სამხედრო აქტივობის გამო.

„უკრაინამ ოფიციალურად აცნობა ICAO-ს, რომ რუსეთის საჰაერო სივრცე სამოქალაქო ავიაციისთვის უსაფრთხო არ არის გაზრდილი სამხედრო აქტივობის გამო. ჩვენ მოვუწოდებთ ყველას, თავი აარიდონ მას [რუსეთის საჰაერო სივრცეს].

რუსეთი განზრახ უგულებელყოფს უკრაინის წინააღმდეგ აგრესიის შედეგად არსებულ საფრთხეებს, რამაც უკვე გამოიწვია რამდენიმე ინციდენტი ბოლო წლებში.

რუსეთის მიერ უკრაინის წინააღმდეგ ტერორის მკვეთრი ესკალაციის ფონზე, რუსეთის საჰაერო სივრცე სულ უფრო სახიფათო ხდება.

ეს ჩვენი პასუხისმგებლიანი გადაწყვეტილებაა, ვაცნობოთ ICAO-ს, ყველა ავიაკომპანიას და მთავრობებს სიფრთხილისკენ – მაშინაც კი, თუ რუსეთი უარს იტყვის მათი ინფორმირების ვალდებულების შესრულებაზე. ჩვენ გვსურს თავიდან ავიცილოთ გაუთვალისწინებელი ინციდენტები.

ომი რუსეთში, სახლში ბრუნდება. უკრაინა ახორციელებს თავდაცვის უფლებას გაეროს წესდების 51-ე მუხლის შესაბამისად“ – წერს სიბიჰა X-ზე.

1 სექტემბერს უკრაინის პრეზიდენტმა ვოლოდიმირ ზელენსკიმ განაცხადა, რომ რუსეთის ცა სრულიად სახიფათო ხდება და ამის შესახებ გააფრთხილა ყველა ავიაკომპანია, რომელიც რუსეთის საჰაერო სივრცეს იყენებს.

„ჩანთა წაართვეს, ტელეფონები, ფული“ – შსს ვერსიით, ბათუმში კაცი გაძარცვეს დღისით და ჯგუფურად

„ხუთივეს დაკავება უკანონოა, მოსამართლის განჩინების გარეშე დააკავეს,“ – უთხრა მოსამართლე ლევან ყოლბაიას ადვოკატმა დავით ჯაფარიძემ საქმეზე, რომელიც ბათუმში მომხდარ ძარცვას ეხება, თუმცა მოსამართლემ ადვოკატის ეს განცხადება არ შეიმჩნია.

ეს ამბავი 2026 წლის 8 ივლისს, საღამოს რვის ნახევარზე მოხდა. პროკურატურის ვერსიით, ჯავახიშვილის და ტბელ აბუსერიძის ქუჩების კვეთაში ფეხით მიმავალ კაცს 5 პირი თავს დაესხა, სცემა და ჩანთა წაართვა. ჩანთაში კაცს 3 მობილური ტელეფონი, 500 ლარი, 8 მეხსიერების ბარათი და სხვა პირადი ნივთები ჰქონია. დაზარალებული უცხო ქვეყნის მოქალაქეა, რომელსაც საავადმყოფოში გადაყვანა დასჭირდა. დაზარალებულს მსუბუქი ხასიათის დაზიანებები დაუდასტურდა.

დღეს, 2 სექტემბერს, ბათუმის საქალაქო სასამართლოში ძარცვის საქმეზე წინასასამართლო სხდომა გაიმართა. ხუთივე ბრალდებული მოსამართლე ლევან ყოლბაიმ წინასწარ პატიმრობაში დატოვა. დღესვე მოსამართლემ მხარეების მიერ სასამართლოში წარმოდგენილი მტკიცებულებები დასაშვებად, მაგრამ სადავოდ მიიჩნია. ეს იმას ნიშნავს, რომ მოსამართლე ამ საქმეზე მოწმეთა ჩვენებებს მოუსმენს.

საქმეში მთავარი მტკიცებულება ვიდეო ჩანაწერია, თუმცა ადვოკატების მტკიცებით, ჩანაწერი არ ასახავს ძარცვის ფაქტს და ჩანაწერში ძარცვის ფაქტის შემდეგი ეპიზოდია.

„ვიდეოში ჩანს, რომ მან ჩაიდინა ის ქმედება, რასაც ჩვენ პროკურატურა გვედავება? რა ჩანს იქ?“ – სხდომაზე მოსამართლეს მიმართა ერთ-ერთი ბრალდებულის ადვოკატმა, თენგიზ კახიძემ.

„არაფერიც არ ჩანს იქ, მე საუკეთესო პროგრამაში ვნახე ეს ვიდეო, სქესსაც ვერ გაიგებთ, ისეთი ჩანაწერია,“ – პროკურორს გადახედა ადვოკატმა დავით ჯაფარიძემ. მისი ვერსიით, ბრალდებულები შესაძლოა შემთხვევით გამოჩნდნენ კადრში იმ დროს, როცა ისინი რეალურ დამნაშავეებს მისდევდნენ.

ხუთი ბრალდებულიდან სამი ჯავახიშვილის ქუჩაზე ცხოვრობს – ძარცვის ადგილთან ახლოს. ისინი ერთმანეთის მეზობლები და მეგობრები არიან.

„დუმილის უფლებას ვიყენებ“, – უთხრა მოსამართლეს ბრალდებულმა გიორგი ქ.-მ.-მ, მანამდე მას მოსამართლემ ბრალდება გააცნო და უთხრა ისიც, რომ მისთვის წარდგენილი მუხლი 5-დან 8 წლამდე თავისუფლების აღკვეთას ითვალისწინებს.

„ანალოგიურია ჩვენი პოზიცია, დუმილის უფლებას ვიყენებთ,“ – გაიმეორეს სხვა ბრალდებულებმაც, როცა მოსამართლე ბრალდებასთან დაკავშირებით მათი პოზიციით დაინტერესდა.

„ბოლომდე ვიბრძოლებთ ევროსასამართლოში, გაიგეთ ახლა ჩემი პოზიცია?“ – პროკურორს მიუბრუნდა ადვოკატი დავით ჯაფარიძე.

„იქნებ შენიშვნა მისცეთ,“ – პროკურორმა დავით აკოპიანმა მოსამართლეს მიმართა და ხაზი გაუსვა იმას, რომ ადვოკატის ეს პოზიცია ბრალდებულთან შეთანხმებული არ იყო: საპროცესო შეთანხმება მიღწეული არ არის, მაგრამ დაწყებულია მოლაპარაკება. საპროცესო კი ბრალდების აღიარების გარეშე არ ფორმდება.

„გთხოვთ, მშვიდად,“ – ადვოკატს მიმართა მოსამართლემ.

„ზარალი 1300 ლარია და დაზარალებული ითხოვს 30 ათას დოლარს“, – აღნიშნა ადვოკატმა ადილარ წირღვავამ. საპროცესო შეთანხმების ერთ-ერთი პირობაა, დაზარალებული იყოს თანახმა, ბრალდებულებს საპროცესო გაუფორმდეთ.

„მატყუარა ნარკორეალიზატორია, ამოიღეთ მიმოწერები და ნახეთ,“ – ხმამაღლა წამოიძახა ისევ ადვოკატმა დავით ჯაფარიძემ დაზარალებულად მიჩნეული კაცის შესახებ. სხდომის დასრულების შემდეგ პროკურორმა „ბათუმელებთან“ გასაუბრების დროს დაადასტურა, რომ ამ კუთხით მოკვლევა მართლაც მიმდინარეობს. სხვა დეტალებზე, მათ შორის იმაზე, თუ რატომ დააკავეს ბრალდებულები, მაგალითად, მოსამართლის განჩინების გარეშე, პროკურორმა ამ ეტაპზე კომენტარი არ მოგვცა: არსებითი განხილვის ეტაპზე გამოჩნდება, რაც არის სიმართლეო.

„სხვა პირდაპირი მტკიცებულება, სად აქვს პროკურორს?“ – მოსამართლეს მიმართა ადვოკატმა დავით ჯაფარიძემ და ყურადღება გაამახვილა იმაზე, რომ მისი შეფასებით, სადავო ვიდეო ჩანაწერის გარდა, პირდაპირი მტკიცებულება პროკურატურას ამ საქმეში არ წარმოუდგენია.

„პრაქტიკა დაადგინა, მათ შორის, მოსამართლე დავით მამისეიშვილმა, არ იკვეთება განზრახვა და სახეზე გვაქვს თვითნებობა… მას დღეს ნიშნავენ უზენაეს სასამართლოში,“ – აღნიშნა დავით ჯაფარიძემ.

„განსხვავებულია პრაქტიკა,“ – ჩაილაპარაკა პროკურორმა.

„მიწვევს პროკურორი“, – ბრალდებულების ახლობლებით გადავსებულ დარბაზს გამოხედა ადვოკატმა და დასძინა: „დაზარალებული ამბობს, მე არ მაქვს პრეტენზია, ჩემს ცოლს აქვსო, რა გავიგო ახლა?“

„ჩემი დაცვის ქვეშ მყოფს პოლიცია როგორც კი დაუკავშირდა, ტაქსი გამოიძახა და მივიდა პირველ განყოფილებაში, შემდეგ 3 საათი ელოდა, როდის გამოკითხავდნენ… პოლიციელების ჩვენებები უკვე საქმეშია, მეტი რა უნდა გაანადგურონ? ამ ახალგაზრდებს მთელი ცხოვრება წინ აქვთ, დაეკარგებათ სამართლიანობის განცდა,“ – ბრალდებულის მიმალვის საფრთხე გამორიცხა ადვოკატმა თენგიზ კახიძემ, როცა სასამართლომ აღკვეთი ღონისძიების შეცვლის საკითხი განიხილა.

ადვოკატებმა ყურადღება გაამახვილეს იმაზეც, რომ ვიდეოჩანაწერზე ექსპერტიზა ჩატარდა. ამ გზით დადასტურდებოდა, ნამდვილად ჩანან თუ არა კადრში ის პირები, რომლებიც ახლა ბრალდებულები არიან.

ბათუმის საქალაქო სასამართლო

9 ტყვია ესროლა და 5 მოხვდა – ფიროსმანის ქუჩაზე მომხდარი მკვლელობის მცდელობის საქმე

დღეს, 2 სექტემბერს, მოსამართლე ვიქტორ მეტრეველმა წინასწარ პატიმრობაში დატოვა დავით ბ. და გიორგი შ. მათ პროკურატურა განზრახ მკვლელობის მცდელობას [სსკ-ის 19, 109] ედავება, ასევე ცეცხლსასროლი იარაღის უკანონო ტარებას [სსკ-ის 236-ე მუხლი].

საუბარია 2026 წლის 22 ივლისს ბათუმში, ფიროსმანის ქუჩაზე მომხდარ შემთხვევაზე: ქუჩაში მყოფ 31 წლის კაცს ცეცხლსასროლი იარაღიდან 9-ჯერ ესროლეს. დაჭრილი კაცი კლინიკაში გადაიყვანეს. „ბათუმელების“ ინფორმაციით, დაჭრილი კლინიკიდან უკვე გაწერეს და მისი ჯანმრთელობის მდგომარეობა სტაბილურია.

ამ საქმეზე პროკურატურამ ორი პირი დააკავა, მათ შორის, ერთი 17 წლისაა.

„ზდაროვა,“ – მხიარული სახით და ხელის აწევით მიესალმა დარბაზში მსხდომ ახლობლებს არასრულწლოვანი ბრალდებული, რომელიც დარბაზში შემოყვანისთანავე ადვოკატ თემურ ქავშბაიას და მისი კანონიერი წარმომადგენლის – მამის გვერდით დასვეს.

მეორე ბრალდებული – დავით ბ. 22 წლისაა. ის მანდატურებმა გისოსებით გამოყოფილ სივრცეში შეიყვანეს. ბრალდებულმა დარბაზს მშვიდად მოავლო თვალი და ბრალდებულის სკამზე არ ჩამოჯდა.

ამ დროს დარბაზში დაგვიანებით შემოვიდა პროკურორი ირაკლი დონდოლაძე. იგი არასრუწლოვნის პირისპირ დაჯდა.

„სხდომას დახურულად ვაცხადებ“, – ხმამაღლა თქვა მალევე მოსამართლე ვიქტორ მეტრეველმა და იქვე არასრულწლოვანთა კოდექსის მუხლები დაასახელა, რატომაც დახურა სხდომა.

ბრალდებულების ახლობლები უკმაყოფილო შეძახილებით ტოვებენ დარბაზს.

შემთხვევა ფიროსმანის ქუჩაზე მოხდა

საქმის მასალების მიხედვით, დაზარალებულს 9 ტყვია ესროლეს და აქედან 5 ტყვია მოხვდა. სამედიცინო ექსპერტიზამ დაადასტურა, რომ კაცს ცეცხლსასროლი იარაღიდან ესროლეს. 2 ტყვია ახლაც დაზარალებულის სხეულშია.

მნიშვნელოვანი გარემოება ამ საქმეში ისაა, რომ ბრალდებულები და დაზარალებული ერთმანეთს არ იცნობდნენ. ბრალდებულები კი ერთმანეთთან მეგობრობდნენ. უცნობია, დანაშაულის ჩადენის კონკრეტული მოტივი.

გამოძიება ამ საქმეზე ელოდება სხვადასხვა ექსპერტიზის შედეგს, მათ შორის, ტრასოლოგიურ ექსპერტიზას.

გამოძიების ვერსიით, 17 წლის ბრალდებულმა მოტოციკლით მიიყვანა ფიროსმანის ქუჩაზე დავით ბ. არასრუწლოვანს თან არც იარაღი ჰქონია და არც გაუსროლია. გამოძიებამ ორივე ბრალდებულს ერთი და იგივე მუხლებით წარუდგინა ბრალდება.

ორივე ბრალდებული მკვლელობის მცდელობის დღეს, 22 ივლისს შემთხვევის ადგილიდან მიიმალა. არასრუწლოვანი ბრალდებული 29 ივლისს რუსთავში დააკავეს, ხოლო მეორე ბრალდებული, რომელიც იძებნებოდა, 5 აგვისტოს სამცხეთ-ჯავახეთის რეგიონში დააკავეს.

სასამართლოს გადაწყვეტილებით, ამ საქმეს არსებითად განიხილავენ.

____

ამ თემაზე:

დააკავეს პირი, რომელმაც ბათუმში, ფიროსმანის ქუჩაზე მოტოციკლეტით მიიყვანა კაცი, მან კი სხვას ესროლა

 

„ბათუმი პლაზასთან“, დაპირისპირების შემდეგ, სიგარეტებით მოვაჭრე კაცი დააკავეს – საგამოძიებო

ფინანსთა სამინისტროს საგამოძიებო სამსახურის განცხადებით, ბათუმში დააკავეს ერთი ადამიანი, რომელიც მათი განცხადებით „ბათუმი პლაზას“ მიმდებარე ტერიტორიაზე უაქციზო სიგარეტს ყიდდა.

„გამოძიებით დადგინდა, რომ წარსულში ანალოგიური დანაშაულისთვის ნასამართლევი პირი თამბაქოს ნაწარმს ავტომანქანებში მალავდა და მის საცალო რეალიზაციას ქალაქ ბათუმში, „ბათუმი პლაზას“ მიმდებარე ტერიტორიაზე ახორციელებდა.

ჩატარებული ჩხრეკისა და სხვა საგამოძიებო მოქმედებების შედეგად, ამოღებულია დიდი ოდენობით უაქციზო სიგარეტი, რომლის საბაზრო ღირებულება 5 000 ლარს აღემატება.

ერთ სისხლის სამართლის საქმეზე მის მიმართ უკვე დამდგარია გამამტყუნებელი განაჩენი, ხოლო მეორე საქმეზე არსებითი განხილვა ბათუმის საქალაქო სასამართლოში მიმდინარეობს.

საგამოძიებო მოქმედებების პარალელურად, ბრალდებულისა და სხვა პირების მხრიდან ადგილი ჰქონდა საგამოძიებო სამსახურის თანამშრომლებისთვის საქმიანობის განხორციელებაში ხელის შეშლის ფაქტს, რა დროსაც მათ თანამშრომლებს ფიზიკური და სიტყვიერი შეურაცხყოფა მიაყენეს“- წერს საგამოძიებო.

მათი ინფორმაციით, მომხდარ ფაქტზე გამოძიება გრძელდება საქართველოს სისხლის სამართლის კოდექსის 200-ე მუხლის მე-2 ნაწილის „ბ“ ქვეპუნქტით, რაც სასჯელის სახით 4-დან 6 წლამდე ვადით თავისუფლების აღკვეთას ითვალისწინებს.

კაცი, რომელიც საგამოძიებო სამსახურის ინფორაციით დაკავებულია, „ბათუმი პლაზასთან“ შეუძლოდ გახდა. პლაზასთან მყოფმა მოქალაქეებმა მისი დაცვა სცადეს რასაც სიტყვიერი და ფიზიკური დაპირისპირება მოჰყვა.

ვიდეო:

How Do People Fund an Opposition Politician — A Woman Politician Without an Office or a Party

„It will be deposited into your account with every paycheck. Though even the smallest gift is rich when given with love..,“ a citizen wrote in her message to the independent opposition politician Teona Chalidze.

The „small amount“ that a citizen gave to an opposition politician is 5 Lari.

For six months, politician Teona Chalidze has been asking the public to fund her work. During this time, she has managed to gain 50-55 regular supporters.

The smallest contribution made by citizens to fund her activities is 2 Lari, and the largest amount is 250 Lari.

In total, she saves 1,500 Lari a month – this is not enough for all the activities she pursues during the month, however she says she tries to „make her budget stretch“.

At the end of each month, she presents a detailed report to her audience, supporters, and all interested citizens, describing what she did during the month and how she spent the money donated to her by citizens.

38-year-old Teona Chalidze has two children, one in public preschool and one in public school. It is worth noting that both of her children attend a state school.

She has been involved in activism since the age of 17. She was involved in party activities for almost 10 years. She was a member of the „Strategy Azghmashenebeli“ political party.

„I have gone through every level in party politics,“ says Teona Chalidze.

„I have been a field coordinator and a head of election campaigns. In 2021, I was a majoritarian candidate in Isani. The 2,778 people who went to the polls that year voted for Teona Chalidze as their district representative.“

„Throughout my career, I have never singled out ordinary citizens on political grounds – anyone who has the ambition to hold a responsible position in the country, or to lead any institution, must be in the service of the people. Therefore, a ruler must be a ruler for everyone,“- this is the young female politician’s vision.

Theona Chalidze left party politics a year and a half ago and began working independently. She thought long and hard about how to finance her own work, as he did not want to go into forced immigration or take up a completely different profession to make a living.

Teona Chalidze

She believes that it is impossible to do other things while making policy, because something always gets sacrificed.

“If a politician is focused on another task from morning until evening, doing other work, she physically has no time left to do politics, to stand by people, to go to the regions, to hold a rally at the prison, to walk around with the parents of prisoners, and to be engaged in such activism. Therefore I did everything in my power to dedicate all my time, energy, resources, and experience 24/7 to the work that is organic to me, that I love, and where I feel I am doing very valuable work.

„So I came up with this idea – something that’s less popular in Georgia, but by the way, is much more established in Europe – and I started collecting donations, the so-called fundraising,“ says Teona Chalidze.

Teona Chalidze positions herself as an independent, opposition politician who is focused on social problems and human rights issues.

My supporters are mainly socially vulnerable individuals, pensioners, and people on middle and lower incomes. I work with those whose voices are the least heard.

„I work on solving the problems of the most oppressed people in this country. I try to use my resources to give voice to the problems of these very people,“- says Theona.

The independent politician has no office. She works wherever she can find a workspace. She doesn’t like travelling by tube because her phone has no signal.

„I prefer to travel by bus all the time, because I often work while on the bus. I always have my laptop with me; I work on the go, reply to messages, write various texts, plan different activities and I also prepare the brochures, needed for these activities, myself,“- says Teona.

Theona Chalaidze, together with the parents of political prisoners, has travelled to around 40 cities in the last year : they were in the markets, bus stations and streets of these cities – distributing special newspapers that told the stories of the political prisoners and, in this way, informed citizens about the injustice that had befallen them.

Through our march, the voices of political prisoners reached at least 100,000 people. We were distributing the newspaper “Voice of Freedom from Prison”, which four women politicians and I had put together: Tea Metreveli, Barbare Gimelli -Sulashvili, and Ana Gogoladze.

„I was responsible for organising the regional trips. It became a large-scale campaign. We’re going to continue it again,“ – says Teona Chalidze.

According to Teona Chalidze, she toured 40 cities in Georgia with the families of prisoners of conscience.

Theona Chalidze focuses her work on social themes and social policy.

According to her, there is now no room left for cooperation with the so-called authorities.

The government is exploiting the problem of poverty to make citizens even more vulnerable or to force those who can afford to do so to leave the country.

The only solution is to maintain as close a communication as possible with each individual. Despite this nihilism and despair, we must convince these people that it is precisely their single voice that is decisive.

They think that, in the end, everything will be decided as someone wants; that their single vote doesn’t matter; that, for them, it makes no difference who is in power… So, if we can change these attitudes, the votes of these very people will be decisive in the next election.

The lost trust between politicians, politics, and ordinary people must be rebuilt. Everyone has a role to play in this process. ‘I see these changes as one big puzzle, and one piece of this puzzle could be all of us,’ says Teona Chalidze.

ბათუმის მერია ტროტუარებიდან უნებართვო კომერციულ აპარატებს იღებს

დღეს 2 სექტემბერს, ბათუმის მუნიციპალურმა ინსპექციამ ქალაქის ტერიტორიიდან, კომერციული მიზნით ტროტუარებზე განთავსებული აპარატების დემონტაჟი დაიწყო.

ინსპექციის ცნობით, აპარატები ტროტუარებზე უნებართვოდ იყო განთავსებული.

„აღნიშნული სამუშაოები, კანონის მოთხოვნების აღსრულებას, საზოგადოებრივი სივრცეების უსაფრთხოების უზრუნველყოფას და ქალაქის იერსახის შენარჩუნებას ისახავს მიზნად“ – წერს მუნიციპალური ინსპექცია.

მათი განცხადებით, უნებართვო კონსტრუქციებისა და ობიექტების დემონტაჟი ტურისტული სეზონის განმავლობაში მიმდინარეობს.

__________________

ფოტო: მუნიციპალური ინსპექცია

„არ ვიცოდით სად იყო“ – რას ითხოვენ სტუდენტები, რომლებიც ხიჭაურის უნივერსიტეტში ჩაირიცხნენ

სტუდენტების ნაწილი, რომლებიც 2026 წლის ერთიანი ეროვნული გამოცდების შედეგად ხიჭაურის უნივერსიტეტში ჩაირიცხა, აცხადებს, რომ მხოლოდ ჩაბარების შემდეგ გაიგეს, სად მდებარეობდა ეს უნივერსიტეტი – მათ სასწავლებელი თბილისში ეგონათ, მაშინ, როცა ის მაღალმთიან აჭარაში, შუახევის მუნიციპალიტეტში მდებარეობს.

სტუდენტები ამბობენ, რომ სწავლის გაგრძელებას თბილისში გეგმავდნენ და არ უნდათ, ან არ შეუძლიათ საცხოვრებლად შუახევში გადასვლა.

მათი მშობლები აქცენტს აკეთებენ ხარჯებზეც, რაც სტუდენტის ოჯახისგან დამოუკიდებლად ცხოვრებას ახლავს – ბინის ქირა, კომუნალურები, საკვებისა და სხვა საყოფაცხოვრებო ხარჯები. ისინი ამბობენ, რომ ამისთვის მზად არ იყვნენ, რადგან არ ეგონათ, რომ მათი შვილები მაღალმთიან აჭარაში მდებარე უნივერსიტეტში ჩაირიცხებოდნენ.

მათი ინფორმაციით, „ამ გაუგებრობაში“ ათობით სტუდენტი აღმოჩნდა. სტუდენტების ნაწილმა პირველ სექტემბერს განათლების სამინისტროში განცხადება შეიტანა და პრობლემის მოგვარება ითხოვა.

„გთხოვთ, დაგვეხმაროთ სწავლის გაგრძელებაში“ – წერია განცხადებაში, რომლის ავტორები სამინისტროს ორი სავარაუდო გამოსავალს სთავაზობენ:

  1. ხიჭაურის უნივერსიტეტში ჩარიცხულ სტუდენტებს მისცენ დაშვება ე.წ. მეორად ჩარიცხვებზე. ეს არის ერთჯერადი გამონაკლისი იმ სტუდენტებისთვის, რომლებმაც ერთიან ეროვნულ გამოცდებზე ყველა საგანში გადალახეს ბარიერი, თუმცა ვერცერთ უნივერსიტეტში ვერ ჩაირიცხნენ;
  2. ხიჭაურის უნივერსიტეტმა სხვა რეგიონებში მცხოვრებ სტუდენტებს შესთავაზოს ონლაინ ან ჰიბრიდული სწავლება.

მშობლები, რომლებმაც სამინისტროში განცხადება ჩააბარეს, „ბათუმელებთან” საუბრისას ამბობენ, რომ უწყების წარმომადგენელმა, რომელიც მათ შეხვდა, გაესაუბრა და ოფიციალური განცხადებით მიმართვა ურჩია, მეორად ჩარიცხვებში მონაწილეობის შესაძლებლობა, ფაქტობრივად, გამორიცხა.

რაც შეეხება ჰიბრიდული სწავლების შესაძლებლობას, ამის შესახებ სამინისტროსგან პასუხს სტუდენტები და მათი მშობლები უახლოეს პერიოდში ელოდებიან.

„ვიყავი განათლების სამინისტროში, რომ როგორც მრავალშვილიანი დედა, როგორც თბილისში მაცხოვრებელი, გაგვითვალისწინონ.

ჩემთვის ძალიან რთულია – თბილისში ვმუშაობ, უმცროსი შვილები აქ მიდიან სკოლაში და უფროსი უნდა იყოს მოწყვეტილი სახლს. თან, ძალიან მეხმარებოდა პატარა ბავშვების მოვლაში – მიჰყავდა-მოჰყავდა. მე მესმის, რომ რეგიონებიდან თბილისშიც მოდიან სტუდენტები, მაგრამ ჩემ შემთხვევაში, ჩათვალეთ, რომ მარჯვენა ხელი რომ მოგაცალონ, იგივე იქნება. 4 შვილის დედობა ისედაც რთულია ფინანსურად და იქ თუ გავუშვი, ბინა უნდა ვუქირავო, კომუნალურები, საჭმელი ხომ უნდა?!

არ ვიცოდით მანამდე სად იყო ეს უნივერსიტეტი, არ ჩანდა ცნობარში. ამიტომ მოვყევით ამ გაუგებრობაში.

იქნებ მისცენ მეორადი ჩარიცხვის შანსი, როგორც სხვებს მისცეს. დისტანციური სწავლებაც მოსახერხებელი იქნება”, – ამბობს ხიჭაურის უნივერსიტეტში, ბიზნესის ადმინისტრირების პროგრამაზე ჩარიცხული ერთ-ერთი სტუდენტის დედა, რომელმაც ვინაობის გამხელა არ ისურვა.

  • რატომ შეიქმნა პრობლემა – სტუდენტების განმარტება

ხიჭაურის უნივერსიტეტში ჩარიცხული სტუდენტები, რომლებსაც „ბათუმელები“ ესაუბრა, აცხადებენ, რომ გაუგებრობა უნივერსიტეტის სახელწოდებამ გამოიწვია.

ხიჭაურის უნივერსიტეტს ოფიციალურად ჰქვია „საქართველოს საპატრიარქოს წმიდა ტბელ აბუსერისძის სახელობის სასწავლო უნივერსიტეტი”. სტუდენტების ნაწილს ეს სახელწოდება აერია „საქართველოს საპატრიარქოს წმინდა ანდრია პირველწოდებულის სახელობის ქართულ უნივერსიტეტში”, რომელიც თბილისში მდებარეობს, ზოგიერთი სტუდენტი კი ამბობს, რომ რეგიონში მდებარე ყველა უნივერსიტეტის სახელწოდებაში მითითებულია მისი მდებარეობა და რადგან ამ შემთხვევაში ქალაქი დაკონკრეტებული არ იყო, ავტომატურად ჩათვალეს, რომ ეს უნივერსიტეტი თბილისში უნდა ყოფილიყო.

მაგალითად, „ბათუმის შოთა რუსთაველის სახელმწიფო უნივერსიტეტის“ სახელწოდებიდანვე ცხადია, რომ ის ბათუმში მდებარეობს.

ასევეა, მაგალითად, „შოთა მესხიას ზუგდიდის სახელმწიფო სასწავლო უნივერსიტეტისა“ და „იაკობ გოგებაშვილის სახელობის თელავის სახელმწიფო უნივერსიტეტის“ შემთხვევაში. ხიჭაურის უნივერსიტეტის სახელწოდებაში კი – როგორც მას არაფორმალურად უწოდებენ, არ არის ნახსენები სოფელი ხიჭაური, ან შუახევის მუნიციპალიტეტი.

„ყველა უნივერსიტეტს, რომელიც თბილისის გარეთ მდებარეობს, მითითებული აქვს, მაგალითად, ქალაქი ქუთაისი, გორი და ა.შ. ამას არ ჰქონდა მითითებული სად მდებარეობდა. ამიტომ, ჩავთვალეთ, რომ თბილისი იყო და ჩავწერეთ. მანდ მოვხვდი. საერთოდ ამ ადგილის შესახებაც არ ვიცოდი, სად იყო. 

ჩვენ ვითხოვთ ელემენტარულ რაღაცას: არ ვამბობთ, რომ სწავლა არ გვინდა. უმაღლესი განათლების მიღება ყველას გვინდა. თუმცა, ჯერ ერთი, უნივერსიტეტი მდებარეობს საკმაოდ შორის. მეორე – ბინები აღარ არის დარჩენილი, რომ ვიქირავოთ. თუ უნივერსიტეტს უნდა ამდენი ბავშვის მიღება, ხომ უნდა გაითვალისწინონ სად იცხოვრებს ამდენი ადამიანი?! იქნებ დაუშვან, რომ ონლაინ იყოს სწავლება და გამოცდების პერიოდში ჩავიდეთ“, – ამბობს ნიკა გიგაური, რომელიც თბილისში ცხოვრობს, სწავლის გაგრძელებასაც თბილისში გეგმავდა, მაგრამ ხიჭაურის უნივერსიტეტის სამართლის ფაკულტეტზე ჩაირიცხა.

გარდა ამისა, სტუდენტები ამბობენ, რომ ხიჭაურის უნივერსიტეტში ჩარიცხვა მათი პრიორიტეტი არ იყო და სარეიტინგო სიაში 1-ელ, მე-2 და მე-3 ადგილებზე იმ უნივერსიტეტების სასწავლო პროგრამები მიუთითეს, სადაც სურდათ ჩარიცხვა. ძირითადად, საუბარია თბილისში მდებარე სახელმწიფო უმაღლეს სასწავლებლებზე – ივანე ჯავახიშვილის სახელობის, ან ილიას სახელმწიფო უნივერსიტეტებზე, ასევე – ტექნიკურ უნივერსიტეტზე.

ხიჭაურის უნივერსიტეტი სტუდენტებს პრიორიტეტული სიის ბოლოს ადგილებზე ეწერათ, ამიტომ უნივერსიტეტის შესახებ ინფორმაცია არ მოიძიეს.

თუმცა, ბოლო ერთი წლის განმავლობაში განხორციელებული ცვლილებების შედეგად, რომელსაც განათლების ექსპერტები ხშირად „განათლების დეფორმას“ უწოდებენ, სახელმწიფო უნივერსიტეტებში მისაღები კვოტები შემცირდა, რამაც გაზარდა კონკურენცია აბიტურიენტებს შორის, ამიტომ ბევრი სტუდენტი ვერ მოხვდა იმ უნივერსიტეტში, რომელიც მისი პრიორიტეტების სიაში 1-ელ, მე-2, ან მე-3 ადგილზე ჰქონდა მითითებული.

ასე აღმოჩნდა აბიტურიენტთა ნაწილი იმ უნივერსიტეტში, რომელიც სიაში „ყოველი შემთხვევისთვის“ ჩაწერა.

მაგალითად, მარი ხაბაზიშვილს პრიორიტეტულ ჩამონათვალში სულ 15 პროგრამა ჰქონდა მითითებული. მათგან 14 თბილისში მდებარე უნივერსიტეტების სასწავლო პროგრამები იყო და მხოლოდ ერთი, როგორც მოგვიანებით აღმოაჩინა – შუახევის მუნიციპალიტეტში. მას წმინდა ტბელ აბუსერისძის სახელობის სასწავლო უნივერსიტეტის ბიზნესის ადმინისტრირების პროგრამა მე-9 ადგილას ეწერა და სწორედ იქ მოხვდა.

ახლა მარი ამბობს, რომ თუ მათი მოთხოვნა ჰიბრიდული სწავლების შესახებ არ დაკმაყოფილდება, დროებით გადავა საცხოვრებლად შუახევში, შემდეგ კი ეცდება მობილობით თბილისში მდებარე რომელიმე უნივერსიტეტში გადავიდეს.

„თავიდან მეგონა, რომ მარტო მე ვიყავი ასე, მაგრამ იმდენი გამოჩნდა – 100-ზე მეტნი ვართ, ვისაც ჩემსავით აერია, თუ არ ვიცი, რა დავარქვა ამას. არ გვაქვს ყველას ამდენი შესაძლებლობა ფინანსურად, ან თუნდაც ფსიქოლოგიურად, რომ იქ წავიდეთ და იქ ვისწავლოთ.

სამინისტროში როცა განცხადება დავტოვეთ, გვითხრეს, რომ რადგან ბევრი ხართ, შეიძლება რამე გეშველოთო. თუ ამ განცხადება რაიმე ცვლილება მოახდინა, ვთქვათ, ონლაინ რომ ჩავერთოთ და გამოცდების ჩასაბარებლად ჩავიდეთ, კარგი იქნება. თუ არა და, არ მინდა, რომ შრომა წყალში ჩამეყაროს და განათლების გარეშე დავრჩე. ალბათ, გადავალთ იქ და ვეცდები, რომ მობილობით გადმოვიდე მერე ისევ აქ“, – ამბობს მარი ხაბაზიშვილი.

„ბათუმელები“ დაუკავშირდა განათლების სამინისტროს, სადაც გვითხრეს, რომ სტუდენტები და მათი მშობლები განცხადებაზე პასუხს განხილვის შემდეგ მიიღებენ.

რაც შეეხება საპატრიარქოს წმინდა ტბელ აბუსერისძის სახელობის სასწავლო უნივერსიტეტს, აქ როგორც კი გაიგეს, რომ „ბათუმელებიდან“ ვუკავშირდებოდით, მობილური გათიშეს და არც განმეორებით ზარებს და არც შეტყობინებებს აღარ უპასუხეს.

„ბათუმელები“ ესაუბრა განათლების ექსპერტს სიმონ ჯანაშიას. ის მიიჩნევს, რომ სამართლიანი იქნება, თუ ხიჭაურის უნივერსიტეტში ჩარიცხულ სტუდენტებს ხელახალი ჩარიცხვის შესაძლებლობა მიეცემათ.

სიმონ ჯანაშია ყურადღებას ამახვილებს იმაზე, რომ მათთვის სასურველი პროგრამების შესარჩევად და პრიორიტეტების განსასაზღვრად წელს აბიტურიენტებს გაცილებით ნაკლები დრო ჰქონდათ და არაერთ შემთხვევაში, გაუგებარი იყო კონკრეტული პროგრამის ბედი.

„ღიად ამბობს ხალხი, რომ ვერ მიხვდნენ, რომ ეს იყო ზემო აჭარაში. სამართლიანი იქნება, რომ მისცენ ხელახლა რეგისტრაციის უფლება, როცა მეორად ჩარიცხვებს გააკეთებენ. სხვა საკითხია, არის თუ არა ადგილები იმ პროგრამებზე, რომლებზეც ეს აბიტურინენტები აბარებდნენ და ჩააბარეს. მაშინ სხვა რამე უნდა გაკეთდეს: ან კვოტები უნდა გაიზარდოს, ან უნივერსიტეტებს უნდა მისცენ უფლება, რომ თვითონ გადაანაწილონ ის ადგილები, რაც დარჩათ. 

მაგალითად, თუ უნივერსიტეტს დარჩა ადგილები ფიზიკაზე, მაგრამ იქ არ უნდა ჩაბარება და უნდათ, ვთქვათ, სოციოლოგიაზე, სადაც აღარ არის ადგილები, უნივერსიტეტს უნდა შეეძლოს, გადაანაწილოს. ეს იქნება, ჩემი აზრით, სამართლიანი”, – ამბობს სიმონ ჯანაშია.

საპატრიარქოს წმიდა ტბელ აბუსერისძის სახელობის სასწავლო უნივერსიტეტში ჩარიცხულ სტუდენტთა რეგისტრაცია უკვე დაწყებულია და 13 სექტემბრამდე გაგრძელდება. სტუდენტებს 2 კვირაზე ნაკლები აქვთ სამინისტროსგან პასუხის მიღებისა და გადაწყვეტილების მისაღებად.

ხიჭაურის უნივერსიტეტში სწავლა 15 სექტემბერს იწყება.

მეწყერმა ქობულეთის სოფელ აჭში სახლი დააზიანა

ქობულეთის მუნიციპალიტეტის სოფელ აჭში მეწყრის შედეგად ერთი მოქალაქის საცხოვრებელი სახლი დაზიანდა.

ქობულეთის მერიის ინფორმაციით, მეწყერმა დარეჯან სალუქვაძის საცხოვრებელი სახლის კედელი შეანგრია. დაზიანდა საყოფაცხოვრებო ნივთებიც, თუმცა სახლში მყოფი პირებიდან არავინ დაშავებულა.

მერიის ინფორმაციით, ოჯახი გაყვანილია უსაფრთხო ადგილას.

„გუშინვე გამოძახებული იყვნენ გეოლოგები და მოხდება მდგომარეობის შესწავლა. ამ ეტაპზე სოფელში მხოლოდ ერთი ოჯახია დაზარალებული“ – გვითხრეს მერიის პრესსამსახურში.

_______________

ფოტოზე: აჭში მეწყრის შედეგად დაზიანებული სახლი

რუსეთის და უკრაინის სამხედრო დანაკარგები ომში – 2 სექტემბერი

უკრაინის შეიარაღებული ძალების გენერალური შტაბის დღევანდელი მონაცემებით, ომის დაწყებიდან 2026 წლის 2 სექტემბრამდე პერიოდში, რუსეთის არმიის საბრძოლო დანაკარგი არის:
  • ცოცხალი ძალა – დაახლოებით 1 491 030 ადამიანი [გასულ დღე-ღამეში +1 390. ამ მონაცემებში შედის როგორც დაღუპულები, ასევე დაჭრილები]
  • ტანკი – 12 324 ერთეული [+4]
  • ჯავშანტექნიკა – 25 263 ერთეული [+6]
  • საარტილერიო სისტემა – 49 016 ერთეული [+62]
  • MLRS – 2 081 ერთეული [+2]
  • საზენიტო საბრძოლო სისტემა – 1 598 ერთეული [+1]
  • თვითმფრინავი – 440 ერთეული [+0]
  • ვერტმფრენი – 354 ერთეული [+0]
  • უპილოტო საფრენი აპარატის ოპერატიულ-ტაქტიკური დონე – 494 146 ერთეული [+1 969]
  • სახმელეთო რობოტიზებული კომპლექსი – 2 464 ერთეული [+12]
  • გემი/ნავი – 35 ერთეული [+0]
  • წყალქვეშა ნავი – 2 ერთეული [+0]
  • მანქანები და საწვავის ავზები – 142 715 ერთეული [+383]
  • სპეცტექნიკა – 4 625 ერთეული [+2]
  • ფრთოსანი რაკეტა [ჩამოაგდეს] – 5 070 ერთეული [+10]

უკრაინის გენერალური შტაბის განცხადებით, საომარი მოქმედებების მაღალი ინტენსივობის გამო მონაცემები იცვლება.

უკრაინის სამხედრო დანაკარგებზე სტატისტიკური ინფორმაცია 2026 წლის 25 თებერვლის შემდეგ აღარ განუახლებია რუსეთს.

რუსეთის თავდაცვის სამინისტროს მიერ ტელეგრამ არხზე ბოლოს გავრცელებული მონაცემებით, ომის დაწყებიდან 2026 წლის 25 თებერვლამდე პერიოდში სულ განადგურებულია უკრაინის:

  • 670 თვითმფრინავი
  • 283 ვერტმფრენი
  • 117 299 უპილოტო საფრენი აპარატი
  • 651 საზენიტო სარაკეტო სისტემა
  • 27 873 ტანკი და სხვა ჯავშანტექნიკა
  • 1 674 მრავალჯერადი სარაკეტო გამშვები
  • 33 474 საველე არტილერია და ნაღმმტყორცნი
  • 55 252 სპეციალური სამხედრო მანქანა

ეს ის მონაცემებია, რომელსაც უკრაინა და რუსეთი ოფიციალურად ავრცელებენ, თუმცა ომის პირობებში შეუძლებელია ზუსტად გადამოწმება, რამდენად შეესაბამება მხარეების მიერ გავრცელებული ინფორმაცია დანაკარგების შესახებ რეალურ რიცხვებს.

ამასთან, აღნიშნულ მონაცემებთან ერთად რუსეთის თავდაცვა, უკრაინის და რუსეთის არმიის ცოცხალი ძალის საერთო დანაკარგების შესახებ სტატისტიკას არ აქვეყნებს. უკრაინის არმიის ცოცხალი ძალის დანაკარგების შესახებ მონაცემებს არ აქვეყნებს არც უკრაინა.

—

რუსეთი უკრაინაში 2022 წლის 24 თებერვალს გამთენიისას შეიჭრა და სრულმასშტაბიანი ომი დაიწყო.

ამავე თემაზე:

„უკრაინამ კუპიანსკიში კონტრშეტევა დაიწყო“ – ინტერვიუ გენერალთან

 

 

მთავარი ფოტო: უკრაინის გენშტაბი/facebook

„უკრაინამ კუპიანსკიში კონტრშეტევა დაიწყო“ – ინტერვიუ გენერალთან

„მობილიზაციის შიში იმდენად დიდია, რომ წარმოიდგინეთ, როგორც სხვადასხვა წყარო იტყობინება, მარტო ერთ დღე-ღამეში საქართველოში 20 ათასამდე კაცი გადმოვიდა,“ – გვიყვება გადამდგარი გენერალი, ვახტანგ კაპანაძე და აქვე გვიზიარებს, ეს სადღაც 6 ქართული ბრიგადა გამოდის, ან სრულყოფილი 4 ბრიგადაო.

„ერთი მესამედიც რომ ვიანგარიშოთ, რადგან იქ ქალები, ბავშვები და მოხუცები არიან, გამოვა, რომ ორ-სამ ბრიგადამდე შემოვიდა ერთ ღამეში საქართველოში,“ – დასძენს სამხედრო ანალიტიკოსი.

ვახტანგ კაპანაძის დაკვირვებით, პუტინს ცეცხლის შეწყვეტა ლოგიკურად აწყობს, მაგრამ უცნობია, რა ხდება მის გარშემო. მონაცემების მიხედვით კი, რუსეთს დაახლოებით კიდევ 3 სამი წელი შეუძლია ამ ტემპით იომოს.

ამასობაში, უკრაინელებმა წამოიწყეს კონტრშეტევა კუპიანსკიში. გადამდგარი გენერალი ამბობს, ეჭვი მაქვს, იმ დანაყოფმა მიაღწია წარმატებას, სადაც უცხოელი მოხალისეები არიანო.

რა იცვლება ფრონტის ხაზზე? – „ბათუმელებმა“ ვახტანგ კაპანაძესთან ინტერვიუ ჩაწერა. ის სამხედრო მეცნიერებათა დოქტორია და საქართველოს გენერალური შტაბის უფროსი ორჯერ იყო. ვახტანგ კაპანაძე პოლიტიკური პარტიის – „ჯერ საქართველოს“ თანადამფუძნებელი და ერთ-ერთი ლიდერია.

  • ბატონო ვახტანგ, წუხელ 12 ადამიანი დაიღუპა უკრაინაში რუსეთის მორიგი თავდასხმის შედეგად. რა ხდება საჰაერო თავდაცვითი ბალისტიკური საშუალებების მიწოდების კუთხით უკრაინისთვის? 

რუსეთი რეალურად გადავიდა ფსიქოლოგიურ ზემოქმედებაზე, რაც გამოიხატება ქალაქების დაბომბვით იმ მომენტში, როცა ხალხი ქუჩებშია. რუსები ურტყამენ სავაჭრო ობიექტებს და ასე შემდეგ. წუხელ, მაგალითად, 29 მოხვედრა იყო.

უკრაინამ გუშინ შეძლო 169 ბალისტიკური რაკეტის და ბევრი დრონის ჩამოგდება, მაგრამ ეს საკმარისი არ არის. უკრაინას სჭირდება ძლიერი რაკეტსაწინააღმდეგო თავდაცვა, რომელიც შემცირებული აქვს, ძალიან უჭირს და ამას აცხადებს ზელენსკი მუდმივად იმ ფონზე, როცა ფრონტის ხაზზე ცვლილებები არ არის.

ამავე დროს, უკრაინაც თავის მხრივ ახორციელებს დარტყმებს რუსეთზე – ისე არ არის, რომ ცალ კარში მიდის თამაში. საკმაოდ ეფექტიანად ურტყამენ უკრაინელები რუსეთს. წუხელ დაარტყეს სამხედრო ბაზა ციმბოლოვოს, ორლოვის ოლქში, სადაც რუსებს აქვთ ერთ-ერთი შორი მოქმედების დრონების გამშვები პუნქტი. სხვათა შორის, 10 ბაზა აქვთ რუსებს მოწყობილი, რასაც ეძახიან „დრონო პორტებს“.

რუსების გონიერებას საზღვარი არა აქვს: ეს პუნქტები განალაგეს უკრაინის საზღვართან ახლოს, რათა მისწვდომოდნენ, რაც შეიძლება შორ მანძილზე. ფაქტობრივად, მათი მოქმედების რადიუსში შედის სამხრეთ ფინეთი, ბალტიის ქვეყნები, რუმინეთი, პოლონეთი, თურქეთი. სამაგიეროდ, რუსეთი თვითონ არის მოწყვლადი – უკრაინელებს შეუძლიათ ძალიან ადვილად მისწვდნენ და ამას აკეთებენ კიდევაც – ახლა ამ დრონოპორტებზე დარტყმები დაიწყეს.

დღეში საშუალოდ 1000-მდე დრონს უშვებს უკრაინა რუსეთის მიმართულებით. გელენჯიკში, სადაც პუტინის რეზიდენციაა მოწყობილი და ძალიან კარგად იყო დაცული, უკრაინელებმა მეთოდურად დაიწყეს მისი დამუშავება: 7 აგვისტოს რადიოელექტრონული ბრძოლის საშუალებებს დაარტყეს და ჩაახშვეს ეს საშუალებები – „ვოლნა“, „კუპოლი“, „გარანტი“. ფაქტობრივად, დააბრმავეს. 9 აგვისტოს დაარტყეს ჰაერსაწინააღმდეგო სისტემებს, მათ შორის, S-400-ს.

ისიც გასათვალისწინებელია, რომ ყირიმიდან რუსებმა ნაწილობრივ გაიტანეს ჰაერსაწინააღმდეგო საშუალებები მოსკოვის დასაცავად. ყირიმში გატანა-შემოტანა მარტივად არ ხდება, ვინაიდან საჰაერო დარტყმებით იზოლირებული აქვს უკრაინას ყირიმი. ამ დარტყმების შედეგად საწვავის და წყლის პრობლემებია. მოწყვეტილია მატერიკს ყირიმი.

ამას მოჰყვება შემდეგი სერიები. ყირიმის სრული იზოლაციისა და ჩახშობისთვის უკრაინას გააჩნია დღეს საჭირო საშუალებების 14%. თუკი უკრაინა შეძლებს, რომ 86%-ს თავი მოუყაროს, მაშინ ყირიმი იქნება განწირული. როგორც მადიარი [უკრაინის უპილოტო სისტემების ძალების მეთაური რობერტ მადიარ ბროვდი] აცხადებს, ყირიმი იყო, პირველ რიგში, დაპყრობილი, ყირიმი იქნება გათავისუფლებული, პირველ რიგში.

  • შეიძლება ამ ომში გარდამტეხი აღმოჩნდეს დრონებით თავდასხმები რუსეთის ტერიტორიაზე? 

ეს მაინც არის რუსეთის იძულება მოლაპარაკებებისადმი. ჯერჯერობით უკრაინას არ აქვს რესურსი, რომ მნიშვნელოვანი გარღვევა განახორციელოს ფრონტის ხაზზე ისევე, როგორც რუსებს არ აქვთ იმის რესურსი, რომ რაღაც გარღვევა განახორციელონ.

დღეს, მაგალითად, უკრაინელებმა დაიწყეს კონტრშეტევა ხარკოვის რაიონში, კუპიანსკიში და შვიდი კვადრატული კილომეტრი დაიკავეს. ასევე, არსებობს ინფორმაცია, რომ ამ ოპერაციაში განსაკუთრებული როლი ითამაშეს უცხოელმა მოხალისეებმა. ჩემი მოსაზრებით, ესენი უფრო სამხრეთ-ამერიკელები იყვნენ, კოლუმბიელები და ბრაზილიელები, რომლებიც მრავლად არიან უკრაინის არმიის შემადგენლობაში.

შვიდი კვადრატული კილომეტრი დიდი არაფერია, მაგრამ ტენდენციას აჩვენებს. უკრაინელები ასევე აქტიურობენ დოლგოპოლიეს რაიონში. ამიტომაც, რუსები ფრონტის ხაზზე სტაგნაციის პირობებში არიან და ძირითადი აქცენტი არის საჰაერო ზემოქმედებაზე.

ვფიქრობ, ფრონტის ხაზზე მნიშვნელოვანი ცვლილება უახლოეს პერიოდში არ იქნება. ყველაფერი გადატანილია დისტანციურ ზემოქმედებაზე.

  • ამ სტაგნაციური მოცემულობის მიუხედავად, რატომ არ ურჩევნია პუტინს ცეცხლის შეწყვეტა? „Economist“-ის ინფორმაციით, პუტინს თავისი გარემოცვისთვის უთქვამს: ჩამომახრჩობენ დონბასის სრულად აღების გარეშეო. პუტინის აზრით, რუსეთი უფრო დიდხანს გაუძლებს გამოფიტვას, ვიდრე დასავლეთი?

დიახ, მაგის ილუზია გააჩნია პუტინს. ბევრი რამ არის დამოკიდებული იმაზე, რა ინფორმაციას აწვდიან პუტინს. ჩემი აზრით, ცენტრალური სადაზვერვო სამსახურის დირექტორის ვიზიტი მოსკოვში, გარკვეული წყაროების მონაცემებით, ასევე დაკავშირებული იყო იმასთან, რომ პუტინისთვის დაენახებინათ ის მძიმე, რეალური სურათი და შესაძლებლობა, რაც გააჩნია რუსეთს ამ მიმართულებაზე.

როგორც ინფორმაციამ გაჟონა, თითქოსდა პუტინს ზელენსკის ახალი გეგმა ცეცხლის შეწყვეტაზე წარუდგინეს. პუტინს რომ ნება მისცე რუსეთის ბოლო მოქალაქემდე შეუძლია იომოს – მთავარია, რა პირობებში ჩააყენებენ მას არამარტო უკრაინელები და უკრაინის მხარდამჭერები, არამედ საკუთარი მომხრეები.

  • რამდენად რეალურია მობილიზაციის გამოცხადების მოლოდინი? ანალიტიკოსების ნაწილი თვლის, რომ ჩიხიდან გამოსვლას პუტინი უკან დახევით კი არა, კონფლიქტის ახალი ესკალაციით გეგმავს. თქვენთვის რა ჩანს დღევანდელი გადასახედიდან – ემზადება პუტინი ახალი კამპანიისთვის?

ძალიან რთულია პუტინის პროგნოზირება. ჯერჯერობით, არ ჩანს ახალი კამპანიისთვის გააქტიურების ნიშნები. ჩანს, რომ რუსეთი გააქტიურდა ნატოს მიმართულებით, ნატოს მზადყოფნის შემოწმების მიზნით. ეს გამოიხატება იგივე დრონების შეფრენაში, საზღვრების სიახლოვეს სამხედრო თვითმფრინავების პროვოკაციებში, სხვა დივერსიულ მოქმედებები. მაგალითად, ჩეხეთში, ერთ-ერთ სამხედრო საწარმოსთან, უცნობმა პირებმა შიშის დათესვის მიზნით დადეს ამ საწარმოს ხელმძღვანელების ფოტოები შავი ლენტით და გლოვის გვირგვინებით.

მობილიზაცია თუ იქნება რუსეთში, იქნება დაახლოებით სექტემბრის 24-დან, ანუ როცა ჩაივლის არჩევნები, თუმცა არა მგონია, პუტინმა გაბედოს და საყოველთაო მობილიზაცია გამოაცხადოს. ისევ იქნება პერმანენტული, ფარული მობილიზაცია, რაც იყო მანამდეც. მობილიზაციის შიში იმდენად დიდია, რომ წარმოიდგინეთ, როგორც სხვადასხვა წყარო იტყობინება, მარტო ერთ დღე-ღამეში საქართველოში 20 ათასამდე კაცი გადმოვიდა.

20 000 კაცი ეს არის – უხეშად რომ ვთქვათ – ექვსი ქართული ბრიგადა ან ოთხი სრულყოფილი, ქვეითი ბრიგადა. ერთი მესამედიც რომ ვიანგარიშოთ, რადგან იქ ქალები, ბავშვები და მოხუცები არიან, გამოვა, რომ ორ-სამ ბრიგადამდე ხალხი შემოვიდა ერთ ღამეში საქართველოში. ეს ძალიან მნიშვნელოვანი ფაქტია.

  • ევროპის ქვეყნებში სხვადასხვა დივერსიული ქმედების მიღმა, ჩანს უფრო დიდი საფრთხე, მაგალითად, ბალტიისპირეთში? ასევე, ცნობილია, რომ ფინეთმა საზღვრის მონიტორინგისთვის შვედეთს სთხოვა ავიაციითა და სამხედრო ხომალდებით დახმარება.

ისედაც ახორციელებს ნატო ჰაერში პატრულირებას ბალტიის ქვეყნების თავზე. ახლა ალბათ კიდევ უფრო გააძლიერებენ.

ისე რომ მკითხოთ, 2022 წელს, როცა რუსეთი საბრძოლო მზადყოფნის პიკზე იყო, უკრაინის მაგივრად რომ დაერტყა ბალტიის ქვეყნებზე, არა მგონია, ნატოს რეალური პასუხი გაეცა მაშინ. დღევანდელ რეალობაში კი, ეჭვი მეპარება, რუსეთს იმდენი ძალა ჰქონდეს, უკრაინის ფრონტის პარალელურად ახალი ძალები შექმნას ამ მიმართულებაზე.

რუსეთი ძალიან აქტიურად ცდილობს ბელორუსის დაკავშირებას საომარ მოქმედებებთან. ფაქტია, რომ ბელორუსი არის მნიშვნელოვანი პლაცდარმი რუსეთისთვის უკრაინის მიმართულებაზე თავისი სამხედრო-სამრეწველო კომპლექსით, სამხედრო ინფრასტრუქტურით, რომელიც რუსეთს ეხმარება. საწვავიც ბელორუსიდან რუსეთში აქტიურად შედის, სხვა პროდუქტზე აღარაფერს ვამბობ.

ერთადერთი საომარ მოქმედებებში ვერ დაიყოლია პუტინმა ლუკაშენკო, რომელიც ძალიან თეატრალურად აჩვენებს, თქვენიანი ვარო. ნუ დაგვავიწყდება, რუსეთი უფრო მკაცრ ზომებსაც მიიღებს ლუკაშენკოს წინააღმდეგ, მაგრამ ეშინია, ბელორუსი საერთოდ არ დაკარგოს. ბელორუსი, ფაქტობრივად, ტრამპლინია ევროპაში შესასვლელად რუსეთისთვის.

  • რაში სჭირდება რუსეთს ეს დივერსიული მოქმედებები ნატოს წევრ ქვეყნებთან? 

მოსახლეობაში შიშის დანერგვა: იქნებ, არ დავეხმაროთ უკრაინას და ჩვენ თავს მივხედოთ… თუ არ დავეხმარებით უკრაინას, ომი დასრულდება და ჩვენც კარგად ვიქნებით.

  • ზელენსკის თქმით, ომის დასრულებისთვის არსებული „ფანჯარა“ 2027 წლის ზაფხულამდე იარსებებს, ანუ ვიდრე აშშ-ში მორიგი საპრეზიდენტო არჩევნების პერიოდი გააქტიურდება. თქვენი აზრით, რამდენად არსებობს რუსეთ-უკრაინის ომში ცეცხლის შეწყვეტის შესაძლებლობა დღეს? 

მე მაინც არ ვკარგავ იმედს, რომ ამ წლის ბოლომდე შესაძლოა რაღაც ნაბიჯები გადაიდგას ცეცხლის შეწყვეტასთან დაკავშირებით და მოლაპარაკებები დაიწყოს. მართალია, ამას გასულ წელსაც ვამბობდი, რადგან ლოგიკურად რუსეთს ეს აწყობდა. დღევანდელი მოქმედებები აჩვენებს იმას, რომ მხარეები ემზადებიან მოლაპარაკებებზე ძლიერი პოზიციებით მივიდნენ.

ლოგიკურად ახლაც შეუძლია რუსეთს ცეცხლი შეწყვიტოს და ამით ის არ დაკარგავს არაფერს და თავის მომხრეებსაც შეუძლია მიყიდოს: აი, წარმატებას მივაღწიეთო, მაგრამ ჩვენ არ ვიცით შიგნით რა ხდება, სამზარეულოში, პუტინის საახლობლოში. რთულია პუტინზე რაღაცის პროგნოზირება.

გავიმეორებ იმას, რაც აღვნიშნე წინა ინტერვიუში თქვენთან: პუტინს შეუძლია სამი წელი იომოს ისე, რომ მშიერი იქნება. ის, რომ საწვავი არა აქვს რუს მოსახლეობას, მას ნაკლებად ადარდებს მსგავსი პრობლემები.

  • ევროკომისიამ უკრაინისთვის 6,1 მილიარდი ევროს თავდაცვითი შესყიდვები დაამტკიცა. მაშინ თავდაცვითი ბალისტიკური საშუალებების მიწოდება რატომ არის პრობლემა, რის გამოც უკრაინის ქალაქების დაბომბვას პერიოდულად რუსეთი ისევ ახერხებს? 

მისი წარმოება ხერხდება გარკვეული რაოდენობით, მაგრამ არა იმ ოდენობით, რაც ჩვენ გვინდა. რუსეთის მიმართულებით დღეში 1000 დრონამდე როცა ავა ქვეყანა, წარმოიდგინეთ იქ რა მასშტაბის წარმოებაა საჭიროა. მარტო 2026 წლის აგვისტოში 9 ქვეყანასთან დაიდო ხელშეკრულებები. ბოლოს იყო ფინეთთან ხელშეკრულება უპილოტო საჰაერო, საზღვაო სისტემების და სახმელეთო რობოტების ერთობლივი წარმოების შესახებ.

ამავე ხელშეკრულებაში შედის დრონგადამჭერების, ანუ ჰაერსაწინააღმდეგო დრონების წარმოება. ეს იაფი და საკმაოდ ეფექტურია რაკეტებთან შედარებით.

გარდა ამისა, უკრაინელებს ფრანგები აძლევენ ჰაერსაწინააღმდეგო „Aster“-ის წარმოების ნებართვას, რომელსაც შეუძლია რუსული ბალისტიკური რაკეტების წინააღმდეგ მოქმედება, ასევე აძლევენ რადარებს ჰაერსაწინააღმდეგო საშუალებებისთვის.

ეს ცალმხრივი პროცესი არ არის: უკრაინაც აწვდის ბევრ რამეს ევროპას, მაგალითად, იტალიის თავდაცვის მინისტრის მრჩევლად დანიშნეს უკრაინის თავდაცვის ყოფილი მინისტრი – ფედორევი. ფედოროვი ამჟამად აშშ-შია საქმიანი ვიზიტით. გაჩნდა ინფორმაცია, რომ მასკი უკრაინელებს მისცემს „სტარლინკს“ რუსეთის ტერიტორიაზე სამოქმედოდაც. არ ვიცი, ეს ინფორმაცია რამდენად ზუსტია, მაგრამ თუ ეს სინამდვილეა, ეს ნიშნავს, რომ დარტყმების შესაძლებლობა ხარისხობრივად და რაოდენობრივად რუსეთის ტერიტორიაზე ძალიან გაიზრდება.

უკრაინას უჭირს შეტევითი, ბალისტიკური რაკეტები. იმედია, დაიწყებენ ამის წარმოებას სერიულად. ამის წარმოება დაიწყო და გამოიცადა კიდეც „Fire Point“ – ის მიერ, მაგრამ სერიული წარმოება ჯერ არ არის დაწყებული.

  • ამ რთულ ვითარებაში, როცა ტრამპის პოზიციები ცვალებადია, ხოლო სიტუაცია ირანში დაძაბული, რა მიდგომა აქვს და ექნება ევროპას უკრაინის მიმართ? – თვალსაჩინოა ევროპის და ასევე აშშ-ს უკრაინის მიმართ მკაფიო მხარდაჭერა, თუმცა დასავლეთი არ აპირებს რუსეთის სამხედრო ძალით დამარცხებას და ელოდება რუსეთის გამოფიტვას? 

დასავლეთის დახმარება გაიზრდება უკრაინის მიმართ. უფრო და უფრო იქოქება სამხედრო  წარმოება, უკრაინულ-დასავლეთის თანამშრომლობა, რომელიც ფაქტობრივად დაიწყო 2023 წელს და თანდათანობით აიღო ინერცია.

უკრაინელები აწვდიან ევროპელებს დეტალურ ინფორმაციას ბრძოლის ველზე გამოჩენილ რუსულ ტექნიკაზე, მათ ტექნიკურ – ტაქტიკურ მახასიათებლებზე. ეს მონაცემები უკვე აღარაა გუგლზე, ან ვიკიპედიაში მოძიებული ინფორმაცია.  აღნიშნული რეალური მონაცემები სჭირდება დასავლეთს სამხედრო ხელოვნური ინტელექტის გასაძლიერებლად.

ამჯერად ფედოროვი სთავაზობს შტატებს, რომ მზად არის დაეხმაროს დრონების საჰაერო ფლოტის შექმნაში და სამაგიეროდ „პატრიოტები“ მოგვაწოდეთ უკრაინასო. სიზუსტეზე თავს ვერ დავდებ, მაგრამ ეს ინფორმაცია ჟღერდება.

ომი არ არის მხოლოდ სამხედრო ძალა. აქ არის პოლიტიკური, ეკონომიკური, სამხედრო, საინფორმაციო – სოციალური შემადგენელი.

  • გაჩნდა სკეპტიკური შეფასება, რომ რეალურად დასავლეთი არ ინდომებს სამხედრო ძალით რუსეთის დამარცხებას და ამ ვითარებაში უკრაინა ელოდება რუსეთის გამოფიტვას. 

ვერ დავეთანხმები ამ მოსაზრებას. ყველა ქვეყანას გააჩნია თავისი საბრძოლო მარაგების კრიტიკული, დასაშვები ზღვარი, რომლის ქვევითაც ის ვერ დაიყვანს თავის შეიარაღებას. გარდა ამისა, ყველა ქვეყანა თვითონ ამ იარაღს აღარ აწარმოებს. ამ ქვეყნებს თავისი ამომრჩეველი არ მისცემს უფლებას და არც სამხედრო პოლიტიკური ხელმძღვანელობა მისცემს უფლებას, რომ იარაღი უკრაინას გადასცენ.

ევროპის ქვეყნებში ძველი მარაგები რაც იყო, უკვე გაიცა. ახლა სჭირდებათ ახლის წარმოება. აქ დიდია ბიუროკრატია და ამას შეიძლება შეეხოს კრიტიკა, მაგრამ ცალსახად ჩანს, რომ უკრაინასა და ცალკეულ ქვეყნებს შორის უკვე ფორმდება ხელშეკრულებები. დრო სჭირდება ამას, რომ დაიწყოს შეარაღების წარმოება, მაგალითად, იგივე „Storm Shadow“-ს წარმოება.

რომ არა დასავლეთის აქტიური მხარდაჭერა, ეჭვი მეპარება, უკრაინა ასეთი წარმატებული ყოფილიყო ბრძოლის ველზე.

მზია ამაღლობელის საქმის ცრუმოწმე პოლიციელი გოჩა ვანაძე შუახევის პოლიციის უფროსად დანიშნეს

გოჩა ვანაძე შუახევის პოლიციის სამმართველოს უფროსის თანამდებობაზე დანიშნეს. მანამდე იგი აჭარის პოლიციის დეპარტამენტში ბათუმის საქალაქო სამმართველოს უფროსის მოადგილედ მუშაობდა.

შს სამინისტროში „ბათუმელებს“ უთხრეს, რომ საკადრო ცვლილება 2 თვის წინ განხორციელდა.

გოჩა ვანაძის სახელი და გვარი ცნობილი „მზია ამაღლობელის საქმიდან“ გახდა – გოჩა ვანაძე ამ საქმის ერთ-ერთი ცრუ მოწმე პოლიციელია. იგი ირაკლი დგებუაძის მოადგილე იყო, როცა ჟურნალისტი მზია ამაღლობელი დააკავეს.

გოჩა ვანაძემ მზია ამაღლობელის საქმეზე მოსამართლეს უთხრა, რომ მზია ამაღლობელი ადმინისტრაციული წესით თავად დააკავა. სინამდვილეში კი, აქციაზე გადაღებულ ვიდეოში ჩანს და მოსამართლემ სალიხ შაინიძემაც დაადასტურა, რომ მზია ამაღლობელი ადმინისტრაციული წესით გრიგოლ ბესელიამ დააკავა, აჭარის პოლიციის დეპარტამენტის უფროსმა, რომელიც ჯერ ცენტრალური კრიმინალური პოლიციის დეპარტამენტის დირექტორის მოადგილედ გადაიყვანეს, შემდეგ კი პოლიციიდან გაუშვეს და ბოლო ცნობებით, სამშენებლო კომპანიის დაცვის უფროსად დაასაქმეს.

2025 წლის 6 აგვისტოს, როცა მზია ამაღლობელს მოსამართლე სახელაშვილმა 2-წლიანი პატიმრობა მიუსაჯა, სასამართლოსთან შეკრებილი მოქალაქეები გოჩა ვანაძის გამოჩენას სკანდირებით – „ცრუმოწმე! ცრუმოწმე“ – შეხვდნენ. 

ამ თემაზე:

სასამართლომ მზია ამაღლობელს თავის დაცვის უფლება ჩამოართვა – ადვოკატების განცხადება

Letter Five: Garibashvili Names Kobakhidze and Raises Questions Over Several Suicides Under His Government

Imprisoned former Prime Minister Irakli Garibashvili has issued his fifth public letter from prison, this time addressing Mamuka Mdinaradze’s resignation and accusing Mdinaradze and Prime Minister Irakli Kobakhidze of causing “grave and irreparable damage” to the country, its people, and the Georgian Dream party.

Garibashvili also returns to the claims outlined in his first letter, in which he alleged that he had received a blackmail letter and published a photograph of the printed document. In his latest letter, he seeks to explain what he says prompted the suspicions against him and ultimately led to attempts to eliminate him politically and prosecute him on corruption charges.

According to Garibashvili, the suspicions were linked to an interview with human rights defender Lazare Jorbenadze published in the newspaper Asaval-Dasavali. In the interview, Jorbenadze claimed that he had seen Kobakhidze sign a document concerning the transfer to Azerbaijan of territories belonging to the David Gareji monastery complex that, according to the claim, had been promised by Saakashvili to Aliyev. Garibashvili says Mdinaradze and Kobakhidze suspected that the article had been commissioned by him, reinforcing their belief that he was behind critical publications and prompting a desire to “eliminate even a 1% possibility of his return to politics” by prosecuting him under corruption charges.

Garibashvili further writes that he recently learned that Jorbenadze had died by suicide, which, he says, raises questions about the circumstances of his death. He also points to ‘several other suicides that occurred during the Kobakhidze–Mdinaradze government’, arguing that unanswered questions remain surrounding those deaths

“I believe the public is now convinced that the letter I published is authentic and that the facts stated in it are true. Mamuka Mdinaradze made such serious and egregious mistakes in this matter that they resulted not only in his removal from office, but also in his departure from politics. However, I would like to make my position clear to the public: removing Mdinaradze from politics cannot erase the grave and irreparable damage inflicted on the country, its people, and Georgian Dream with the involvement of both him and Irakli Kobakhidze.

I would once again like to explain to the public what the first part of the letter sent to me meant. It mentioned journalist Dito Chubinidze, Irma Inashvili, and the perceptions and suspicions that had arisen because of their activities. On this matter, Ms. Irma Inashvili herself has made it clear that I had no involvement, and have no involvement, in their political or journalistic activities. I might never have said anything at all about journalist Dito Chubinidze’s articles had I not learned, quite by chance, of a disturbing fact a few days ago. It was precisely because of this that I decided to share additional information with the public — information that is directly connected to the letter sent to me by the authorities and to an incident that took place in February of this year.

On February 12, at the instruction of Kobakhidze and Mdinaradze, I was sent an article from the February 2, 2026 issue of the newspaper Asaval-Dasavali. In that article, journalist Dito Chubinidze interviewed former human rights defender Lazare Jorbenadze. The article was primarily devoted to criticism of Kobakhidze and serious allegations made against him.

I was given a confrontational message containing a suspicion based on an entirely false perception — namely, whether I might have been behind the aforementioned article. I am deliberately leaving out other details, but the central accusation and grievance was precisely that they believed they could see my involvement behind such critical articles.

My reaction was, of course, extremely negative. I made it clear to them that they should not come to me again with questions and accusations of this kind; that such commissioned articles were not my way of doing things, but rather characteristic of them. Later, these critical accusations were repeatedly voiced on the air by the television channel Obieqtivi as well.

Now the picture is clear to me, and the answer to all these questions has become apparent: this explains why the first part of the letter stated that “supporters like Dito Chubinidze and Irma Inashvili” had raised serious suspicions and seriously harmed the interests of the Kobakhidze–Mdinaradze team.

This entire story probably would not have been something I needed to make public had I not learned, quite by chance, that some time after the publication of Dito Chubinidze’s aforementioned article, the person interviewed in the article, human rights defender Lazare Jorbenadze, took his own life…

I also learned that, in connection with the death of the late human rights defender Lazare Jorbenadze, the newspaper Asaval-Dasavali itself openly raised questions and cast doubt on the suicide theory.

The following question must be answered: What was the real cause of the death of human rights defender Lazare Jorbenadze?

I am raising this question publicly because questions surrounding the deaths by suicide of several people that occurred during the rule of the Kobakhidze–Mdinaradze government remain unanswered in the public sphere to this day,” – reads the fifth letter sent out by imprisoned ex-prime minister Irakli Garibashvili.

Lazare Jorbenadze; Cover photo of the newspaper Asaval-Dasavali, February 2, 2026 issue

ბათუმში 26-სართულიანის მშენებლობის გამო გზა დაიბზარა, მოქალაქეს კი ეზო ენგრევა

ბათუმში, ბესიკის ქუჩაზე მცხოვრებლები ამბობენ, რომ მათი სახლების წინ მიმდინარე 26-სართულიანი კორპუსის მშენებლობის გამო ქუჩაში ასფალტი დაიბზარა, ხოლო ეზოების კედლები ინგრევა.

თემურ ჯიჯავაძე მელიქიშვილის ქუჩაზე ცხოვრობს. მისი ეზოს მესერი, რომელიც ბესიკის ქუჩაზე მშენებლობას ემიჯნება, ინგრევა.

ინგრევა თემურის მეზობლის ეზოს კედელიც.

„ყველა გზას ვეძებთ, რომ ჩვენი ეზოები და სახლები გადავარჩინოთ. ახლა ნაწვიმარია და გადაიფარა დახეთქილი ეზო. ოდნავ რომ მოშრება, ჩანს რამხელაზეა გახსნილი. გვერდით, ბესიკის ქუჩაზე, ბზარი თავიდან უმნიშვნელო იყო, ახლა ათი სანტიმეტრი მაინცაა. როცა მშენებლობა მიდის, მთელი სახლი ზანზარებს.

ვრეკავთ 112-ში, ვრეკავთ მუნიციპალურში, ვრეკავთ მერიაში – არავის რეაქცია არ აქვს და არავინ ყურადღებას არ გვაქცევს.

ახლა ჯერ ეზოს კედელი დაინგრა, ერთ დილას ჩემი სახლი რომ დაინგრეს, მაგაზე ვინმე პასუხისმგებლობას იღებს?“ – სვამს კითხვას თემურ ჯიჯავაძე.

ბესიკის ქუჩაზე მშენებლობა №75-77-79 ნომრებში მიმდინარეობს. აქ ადრე პატარა, ბარაკული ტიპის სახლები იყო.

მშენებლობის ნებართვა ბათუმის მერიამ გასული წლის დეკემბერში გასცა. შესაბამის ბრძანებას ხელს ბათუმის მერი, გიორგი ცინცაძე აწერს.

1294 კვადრატულ მეტრ მიწაზე მშენებელმა 26-სართულიანი კორპუსი უნდა ააშენოს. მშენებლობის ნებართვა 2030 წლის 8 აგვისტომდე ვადითაა გაცემული.

ბესიკის ქუჩაზე და მის მიმდებარედ მცხოვრებლები ამბობენ, რომ პროექტის დამტკიცებამდე დაიდო საპროექტო შენობის მომიჯნავე შენობა-ნაგებობებზე შესაძლო ზემოქმედების შესახებ ექსპერტიზის დასკვნა.

ამ დასკვნის მიხედვით, კორპუსის მშენებლობისას მისი მომიჯნავე შენობა-ნაგებობები რომ არ დაზიანებულიყო, ამისათვის მშენებელს უნდა მოეწყო ე.წ. ლარსენის შპუნტები.

„საპროექტო შენობის მომიჯნავე შენობა-ნაგებობებზე შესაძლო ზემოქმედების აცილების მიზნით საპროექტო შენობის პერიმეტრზე ეწყობა ლარსენის შურფების [სავარაუდოდ, იგულისხმება ლარსენის შპუნტები] –  კედელი, მთელ პერიმეტრზე 9 მეტრი ჩაღრმავების, რომლებიც ამოღებულ იქნება მიწისქვეშა სამუშაოების დასრულების შემდეგ. ლარსენის შურფები ჩაერჭოს გრუნტში ვიბროჩამძირავით.

აღნიშნული სამუშაოების სათანადოდ ჩატარების შემთხვევაში არ ხდება მომიჯნავე შენობების მიმართ მიწისქვეშა ზემოქმედება და გასათვალისწინებელია ასევე, რომ საპროექტო შენობის საძირკვლის ქვეშ სამშენებლო სიღრმეებზე ფიქსირდება გრუნტის წყლები, მაგრამ ზამთარში საპროექტო ადგილისათვის გრუნტის გაყინვის დონე არის 0 სმ,“ – ნათქვამია ექსპერტიზის დასკვნაში.

ქუჩა დაიბზარა, სახლების ეზოების კედლები ინგრევა - ხალხი 26-სართულიანი კორპუსის მშენებლობის შედეგზე

თემურ ჯიჯავაძე, რომლის სახლის კედელიც უშუალოდ ემიჯნება ბესიკის ქუჩაზე დაწყებულ მშენებლობას, ამბობს, რომ მშენებელს ექსპერტიზის დასკვნა არ გაუთვალისწინებია და მთელი რვა თვე წესების დაცვის გარეშე აწარმოებდა მშენებლობას.

„ისეთ დღეში ჩაგვაგდეს, მოვიკითხეთ და გავარკვიეთ, რომ ამ ლარსენის შპუნტების გაკეთება ძალიან ძვირია. ამიტომ მშენებელმა ჩვენთვის ზიანის მოყენების ხარჯზე გადაწყვიტა ეკონომიის გაკეთება. დღეს კედელი და ეზო ინგრევა, ხვალ რა იქნება, არ ვიცი.

რკინის კარი აქვს ჩემს სახლს. ზოგჯერ დილით კარი უბრალოდ არ იღება, ჩაჭედილია. იწყებენ სამუშაოებს, იწყებს სახლი ზანზარს და მერე კარი სწორდება. ფაქტია, რომ ზიანი გვადგება,“ – ამბობს თემურ ჯიჯავაძე.

მისი თქმით, ადგილზე მუნიციპალური ინსპექცია არაერთგზის გამოიძახეს. ინსპექციიდან მოდიან, თუმცა ტერიტორიას კონკრეტული შედეგის გარეშე ტოვებენ.

მელიქიშვილის ქუჩაზე მცხოვრებლებმა წერილით მიმართეს მუნიციპალურ ინსპექციას. სწორედ ამ წერილზე პასუხიდან ირკვევა, რომ ბათუმის მერიამ უგულებელყო ექსპერტიზის დასკვნა და მშენებელს უფლება მისცა ლარსენის შურფების ნაცვლად მშენებლობაზე ლითონის ხიმინჯები გამოეყენებინა.

„2026 წლის 28 ივლისს, „ქალაქ ბათუმის მუნიციპალიტეტის მერის“ მიერ გაიცა „არქიტექტურულ პროექტში ცვლილებების შეთანხმების შესახებ“ ბრძანება, რითაც ცვლილება შევიდა ქვაბულის შემომზღუდავი კონსტრუქციის მოწყობის ტექნოლოგიაში და ლარსენის შპუნტების ნაცვლად განისაზღვრა ბურღული ლითონის ხიმინჯების მოწყობა, სამშენებლო მოედნის მთელ პერიმეტრზე,“ – ვკითხულობთ ოფიციალურ დოკუმენტში, რომელიც ბათუმის მუნიციპალურმა ინსპექციამ გაუგზავნა მოქალაქეს.

ბესიკის ქუჩაზე 26 სართულიან კორპუსს შპს „ჯეო 2020“ აშენებს. კომპანიის ხელმძღვანელი და 70 %-იანი წილის მფლობელი ბეგლარ ბოლქვაძეა.

„ბათუმელები“ ბეგლარ ბოლქვაძეს ესაუბრა. ის ამბობს, რომ თუკი მისი მშენებლობის გამო მიადგებათ ზარალი მომიჯნავედ მაცხოვრებლებს, კომპანია მათ ყველა ზარალს აუნაზღაურებს.

„ბესიკის ქუჩაზე არსებულ დაზიანებასთან დაკავშირებით ჩვენ მივმართეთ ქალაქ ბათუმის მერიას, ავიღეთ პასუხისმგებლობა, დავწერეთ განცხადება, რომ რამდენიმე დღეში მოვრჩებით საძირკვლის სამუშაოებს და სრულად იქნება აღდგენილი კომპანიის მიერ [გზა].

მოსახლეობასაც მივმართე, რომ ჩვენ ჩავატარებთ ექსპერტიზას, თუ რამე ჩვენგან გამოწვეულია ზიანია, სრულად იღებს კომპანია პასუხისმგებლობას და აანაზღაურებს. რამდენიმეჯერ პოლიციაშიც გამოგვიძახეს, მივედით, იგივე დავაფიქსირეთ იქაც. მე ვთქვი – მე მშენებლობა უნდა ვაწარმოო, ჩემგან თუ რამე ზიანი იქნება, ექსპერტიზაც ჩემს მიერ იქნება მოყვანილი, ზიანიც სრულად ჩვენი მიერ იქნება ანაზღაურებული-მეთქი,“ – ამბობს ბეგლარ ბოლქვაძე „ბათუმელებთან“.

„ბათუმელების“ კითხვას – მაშინ, როცა ექსპერტიზის დასკვნაში მომიჯნავედ არსებული შენობებისთვის ზიანის შესამცირებლად გათვალისწინებული იყო ლარსენის შპუნტების მოწყობა, რატომ დაიწყო კომპანიამ მის გარეშე საძირკვლის მოწყობა, ბეგლარ ბოლქვაძე ასე პასუხობს:

„ლარსენის შპუნტები რომ მაქ წასულიყო, ჩვენ გავიარეთ კონსტრუქტორთან ერთად… ლარსენის შპუნტები, თუ იცით, ძალის მიხედვით ეჭედება, იმიტომ, რომ იქითაც იყო მშენებლობა და სახლი ნაწილობრივ დაიშალა მაგის ვიბრაციით… ვიბრაცია (დრაჟენია) მიდის და ეჭედება. ჰოდა, ამის ჩაჭედვით ის სახლები მთლიანად დაიშლებოდა. ჩვენ ვნახეთ ყველაზე უსაფრთხო გამოსავალი, რითაც დაიბურღა ეგ ადგილი, ტრუბები ჩალაგდა ირგვლივ და შეიკრა უსაფრთხოება.

კიდევ ერთხელ ვამბობ, არ გავურბივართ პასუხისმგებლობას, გვაქვს მუდმივი კონტაქტი მოსახლეობასთან. ავუხსენით, რომ მე თვითონ მოვიყვან ექსპერტს, სამხარაული გინდათ – თქვენ მოიყვანეთ, დავთვალოთ ზიანი, რა ზიანიც არის, სრულად ვანაზღაურებთ-მეთქი. პოლიციაშიც რომ ვიყავი გამოძახებული, იქაც დავაფიქსირე და იქაც დევს ეგ განცხადება.

ჩემი პირობაა, ზიანი უნდა დაითვალოს სამხარაულის მიერ – ჩემი მიყენებულია ზიანი თუ მშენებლობის დაწყებამდე იყო, ეს უნდა შეისწავლოს ექსპერტმა. მე ჩემს პასუხისმგებლობას არ ვარიდებ თავს,“ – ამბობს ბეგლარ ბოლქვაძე [სტილი დაცულია].

მშენებარე 26-სართულიან სახლში ერთი კვადრატული მეტრის ღირებულების ფასი 1130 დოლარია.

ღარიბაშვილი ახალ წერილში კობახიძის მმართველობისას მომხდარ საეჭვო თვითმკვლელობაზე წერს

პატიმრობაში მყოფი „ოცნების“ ექსპრემიერ მინისტრი ირაკლი ღარიბაშვილი ციხიდან მორიგ წერილს ავრცელებს.

ღარიბაშვილი წერს, რომ მდინარაძემ და კობახიძემ „ოცნებას“ გამოუსწორებელი ზარალი მიაყენეს, იხსენებს „ასავალ-დასავალში“ გამოქვეყნებულ ინტერვიუს, რომელშიც კობახიძე იყო გაკრიტიკებული და აღნიშნავს, რომ ამ ინტერვიუს რესპონდენტმა სტატიის გამოქვეყნების შემდეგ თავი მოიკლა, რაც ეჭვებს აჩენს.

„ამ კითხვას საჯაროდ ვსვამ, რადგან საზოგადოებაში დღემდე რჩება პასუხგაუცემელი კითხვები არაერთი ადამიანის თვითმკვლელობის ფაქტთან დაკავშირებით, რომლებსაც ადგილი ჰქონდა კობახიძე-მდინარაძის მმართველობის დროს…“  – წერს ღარიბაშვილი.

„ბათუმელები“ სრულად გთავაზობთ ირაკლი ღარიბაშვილის წერილს.

„ვფიქრობ, საზოგადოება უკვე დარწმუნდა, რომ ჩემს მიერ გამოქვეყნებული წერილი ნამდვილია და მასში დასახელებული ფაქტები სიმართლეს შეესაბამება. მამუკა მდინარაძემ ამ საქმეში იმდენად მძიმე და უხეში შეცდომები დაუშვა, რომ ამან გამოიწვია არამხოლოდ მისი თანამდებობიდან მოხსნა, არამედ პოლიტიკიდან წასვლა. თუმცა, საზოგადოებას მინდა გავაცნო ჩემი პოზიცია: მდინარაძის პოლიტიკიდან გაყვანა ვერ წაშლის მისი და ირაკლი კობახიძის თანამონაწილეობით ქვეყნისთვის, ადამიანებისთვის და ქართული ოცნებისთვის მიყენებულ უმძიმეს და გამოუსწორებელ ზიანს.

ერთხელ კიდევ საზოგადოებისთვის განვმარტავ რას გულისხმობდნენ ჩემთვის გამოგზავნილი წერილის პირველ პუნქტში, სადაც ნახსენებია ჟურნალისტი დიტო ჩუბინიძე, ირმა ინაშვილი და მათი აქტიურობის გამო გაჩენილი აღქმები და ეჭვები. ამ საკითხზე ქალბატონმა ირმა ინაშვილმა თავად განმარტა, რომ მე არავითარი შეხება არ მქონია და არც მაქვს მათ პოლიტიკურ თუ ჟურნალისტურ საქმიანობასთან. შესაძლოა, ჟურნალისტ დიტო ჩუბინიძის სტატიების შესახებ საერთოდ არაფერი მეთქვა, რამდენიმე დღის წინ სრულიად შემთხვევით ერთი შემზარავი ფაქტი რომ არ გამეგო. სწორედ ამის გამო გადავწყვიტე საზოგადოებისთვის გამეზიარებინა დამატებითი ინფორმაცია, რომელიც პირდაპირ უკავშირდება ხელისუფლების მიერ ჩემთვის გამოგზავნილ წერილს და მიმდინარე წლის თებერვალში მომხდარ ფაქტს.

12 თებერვალს, კობახიძისა და მდინარაძის დავალებით შემომიგზავნეს 2026 წლის 2 თებერვლის გაზეთ „ასავალ-დასავალის“ სტატია. აღნიშნულ სტატიაში ჟურნალისტი დიტო ჩუბინიძე ინტერვიუს ართმევს ყოფილ უფლებადამცველ ლაზარე ჯორბენაძეს. სტატია ძირითადად კობახიძის კრიტიკას და მის მიმართ გამოთქმულ მძიმე ბრალდებებს ეძღვნებოდა.

გადმომცეს პრეტენზიული გზავნილი, რომელშიც გამოთქმული იყო აბსოლუტურად ცრუ აღქმაზე დაფუძნებული ეჭვი — ხომ არ ვიდექი მე ხსენებული სტატიის უკან. სხვა დეტალებს შეგნებულად არ ვწერ, თუმცა ძირითადი ბრალი და პრეტენზია სწორედ ის იყო, რომ მსგავსი კრიტიკული სტატიების უკან ჩემს კვალს ხედავდნენ.

ჩემი რეაქცია, რა თქმა უნდა, უკიდურესად ნეგატიური იყო და შევუთვალე, მსგავსი კითხვებითა და პრეტენზიებით ჩემთან მეორედ აღარ მოსულიყვნენ, რომ ასეთი შეკვეთილი სტატიები ჩემი ხელწერა არ არის და მათთვის არის დამახასიათებელი. მოგვიანებით ეს კრიტიკული ბრალდებები ხშირად მეორდებოდა ტელეკომპანია „ობიექტივის“ ეთერშიც.

ახლა უკვე ჩემთვის სურათი ნათელია და პასუხი ყველა საკითხზე არის გაცემული, თუ რატომ ჩამიწერეს წერილის პირველ პუნქტად, რომ „დიტო ჩუბინიძისნაირმა და ირმა ინაშვილისნაირმა მხარდამჭერებმა“ სერიოზული ეჭვები გააჩინეს და ძალიან დააზიანეს კობახიძე-მდინარაძის გუნდის ინტერესები.

მთელი ეს ისტორია, ალბათ, საჯაროდ მოსაყოლი არც იქნებოდა, სრულიად შემთხვევით რომ არ გამეგო, რომ დიტო ჩუბინიძის ხსენებული სტატიის რესპონდენტმა, სტატიის გამოქვეყნებიდან გარკვეული ხნის შემდეგ, თავი მოიკლა…

ასევე ჩემთვის ცნობილი გახდა, რომ გარდაცვლილი უფლებადამცველის, ლაზარე ჯორბენაძის, თვითმკვლელობასთან დაკავშირებით თავად გაზეთი „ასავალ-დასავალი“ ღიად სვამდა კითხვებს და ეჭვქვეშ აყენებდა მისი თვითმკვლელობის ვერსიას.

პასუხი უნდა გაეცეს შემდეგ კითხვას: რა გახდა უფლებადამცველი ლაზარე ჯორბენაძის გარდაცვალების რეალური მიზეზი?

ამ კითხვას საჯაროდ ვსვამ, რადგან საზოგადოებაში დღემდე რჩება პასუხგაუცემელი კითხვები არაერთი ადამიანის თვითმკვლელობის ფაქტთან დაკავშირებით, რომლებსაც ადგილი ჰქონდა კობახიძე-მდინარაძის მმართველობის დროს…“ – წერს ღარიბაშვილი.

სასულიერო პირების ანაზღაურებაზე მინიმუმ 1.3 მილიონი ლარი დაიხარჯება სასკოლო კლუბებში  

განათლების სამინისტრო, საჯარო სკოლებში დასაქმებულ სასულიერო პირებს, კლუბურ მუშაობაში, ხელფასის სახით თვეში 650 ლარს გადაუხდის.

ამის შესახებ „ბათუმელების“ მიერ განათლების სამინისტროსგან გამოთხოვილი ინფორმაციის შემდეგ გახდა ცნობილი.

განათლების სამინისტროს ცნობით, ამ ეტაპზე საქართველოს მასშტაბით 141 საჯარო სკოლაში [სულ 175 კლუბი] ფუნქციონირებს ე.წ „ღირებულებითი განათლების კლუბები“. ბიუჯეტიდან ამ კლუბებში დასაქმებული სასულიერო პირების ხელფასებზე თვეში 113 750 ლარი დაიხარჯება, რაც წელიწადში მინიმუმ 1 მილიონ 300 ათას ლარზე მეტი გამოდის.

როგორც სამინისტროდან წერილობით გვაცნობეს, კლუბებში სასულიერო პირები მოსწავლეებს „ეროვნულ და ზოგადსაკაცობრიო უნივერსალურ ღირებულებებთან“ დაკავშირებულ საკითხებზე ესაუბრებიან და „ასე უწყობენ ხელს მოსწავლეებში ღირებულებების გაძლიერებას“.

განათლების სამინისტროს ინფორმაციით, კლუბებისთვის სასულიერო პირები მასწავლებელთა პროფესიული განვითარების ეროვნულმა ცენტრმა გადაამზადა.

ფოტოზე: კლუბებში დასაქმებული სასულიერო პირები. ფოტო: განათლების სამინისტრო.

_______________

ამავე თემაზე:

„აღარავის უნდა დამრიგებლობა. პასუხისმგებლობა დიდია, ხელფასი კი 79 ლარი“ – მასწავლებლები

ბათუმში დაკარგული ქალის ცხედარი ზღვაში იპოვეს

დღეს, პირველ სექტემბერს, ზღვაში იპოვეს ქალის ცხედარი.

ქალს მაშველები 30 აგვისტოდან ეძებდნენ.

ქალი 29 აგვისტოს, დაახლოებით ღამის 11 საათისათვის, ბათუმის ძველი ბულვარის მიმდებარედ შევიდა ზღვაში და გაუჩინარდა.

2 000 ცალ ყავის ფინჯანს 98 ათას ლარად იყიდის აჭარის ტურიზმის დეპარტამენტი 

აჭარის ტურიზმისა და კურორტების დეპარტამენტმა 2 ათასი ცალი ყავის ფინჯანს დამზადება-შესყიდვაზე ტენდერი გამოაცხადა. შესყიდვის სავარაუდო ღირებულება 98 ათასი ლარია დღგ-ს გარეშე.

ჭიქების დამზადება-შესყიდვა, როგორც დეპარტამენტის განცხადებაშია აღნიშნული, გადაწყდა „აჭარის ტრადიციული ნაქარგობებისა და აჭარული ორნამენტების პოპულარიზაციის მიზნით“.

ტენდერის პირობის მიხედვით, უნდა დამზადდეს „აჭარული ნაქარგობების დიზაინით მომზადებული საპრომოციო – ბრენდირებული ყავის ჭიქა თეფშით, სპეციალური წარწერითა და სასაჩუქრე ყუთით“.

ფინჯნის ტევადობა – 200 მლგ; მასალა – კერამიკა; ფინჯანზე და ლამბაქზე დატანილი უნდა იყოს აჭარული ნაქარგობის ამსახველი ორნამენტი; ფინჯნის ძირზე – ლოგო და წარწერა; ასევე უნდა დამზადდეს საინფორმაციო ბარათი, რომელიც უნდა იყოს ორენოვანი.

ტენდერს თან ახლავს ესკიზები:

წყარო: ტენდერი

„საპრომოციო მასალა უნდა მომზადდეს მაღალი ხარისხით, ფერები უნდა დაიპრინტოს დიზაინის მიხედვით, პრინტი უნდა იყოს გამძლე. ჭიქა და თეფში შეხვეული უნდა იყოს დამცავი ქაღალდით ან მასალით, რომ არ გატყდეს. ჭიქა და თეფში ჩალაგებული უნდა იყოს ინდივიდუალურად სასაჩუქრე მუყაოს ყუთში. სასაჩუქრე ყუთს არ უნდა ჰქონდეს წარწერები“, – წერია ტენდერის პირობაში.

ტენდერში წინადადებების მიღება 2026 წლის 12 სექტემბერს დაიწყება და 14 სექტემბერს დასრულდება. ტენდერში გამარჯვებულმა საქონელი ტურიზმის დეპარტამენტს ხელშეკრულების გაფორმებიდან 30 დღეში უნდა მიაწოდოს.

„შესყიდვის ობიექტის მიწოდებას და მის დასაწყობებას [გადაზიდვას] მიმწოდებელი უზრუნველყოფს საკუთარი ხარჯებით. ქვეკონტრაქტორი არ დაიშვება“, – წერია ტენდერში.

ტურიზმის დეპარტამენტის სატენდერო კომისიის ოქმში აღნიშნულია, რომ შესყიდვის სავარაუდო ღირებულება ბაზრის კვლევის შედეგებით დაადგინეს:

„ბაზრის კვლევაში მონაწილეობა მიიღო სამმა კომპანიამ. ბაზრის კვლევა გამოცხადდა დღგ-ს გარეშე. ერთი კომპანის მიერ წარმოდგენილი ფასია 104 000 ლარი, მეორე კომპანიის მიერ წარმოდგენილი ფასია – 100 000 ლარი, ხოლო მესამე კომპანიის ფასია – 98 000 ლარი“, – წერია ოქმში.

ამავე თემაზე:

სონიას ნაქარგები [ვიდეო]

„დაიცავი ილიაუნის“ წევრები სოციალურად დაუცველ ბავშვებს ეხმარებიან რეგიონებში

მოძრაობა „დაიცავი ილიაუნის“ სტუდენტებმა აჭარაში სოციალურად დაუცველ ბავშვებს სასკოლო ნივთებს გადასცეს უსასყიდლოდ.

სტუდენტური მოძრაობის ერთ-ერთი წევრი, ივერი შაინიძე „ბათუმელებთან“ საუბრისას ამბობს, რომ მათი მიზანია, რაც შეიძლება მეტი ბავშვისთვის იყოს ხელმისაწვდომი განათლება და ეს კამპანიაც სწორედ ამ მიზნით წამოიწყეს.

„დავიწყეთ კამპანია „ილიას გზით განათლებისთვის“. უკვე ვიყავით სამეგრელოში, გურიასა და იმერეთში. ამ კამპანიის მიზანია იმ ოჯახების დახმარება, რომლებსაც არ აქვთ შესაძლებლობა, შვილებს სასკოლო ნივთები შეუძინონ.

ხელმოკლე ოჯახებს გადავეცით სასკოლო-საკანცელარიო ნივთები და ამ ფორმით ვცდილობთ ადამიანებს შევუმსუბუქოთ ყოფითი პრობლემები.

115-მდე ბავშვი გავახარეთ სამ რეგიონში. ახლა აჭარის დროა. ვიქნებით ყველა მუნიციპალიტეტში. ქობულეთში ორ ოჯახს უკვე გადავეცით ნივთები. დღეს ბათუმის ოთხ ოჯახში ვაპირებთ მისვლას, ასევე – ხელვაჩაურშიც. პირველ სექტემბერს კი მაღალმთიან აჭარაში მივდივართ.

როცა ოჯახებში მივდივართ, მარტო ნივთებს არ გადავცემთ, ვესაუბრებით ამ ადამიანებს. ერთმა ბავშვმა გვითხრა, ჩემს ცხოვრებაში ყველაზე ბედნიერი დღე არისო“- გვეუბნება ივერი შაინიძე.

ვესაუბრეთ „დაიცავი ილიაუნის“ კიდევ ერთ წევრს, ლაშა ჯანჯღავას.

მისი თქმით, ყველა შემოწირულება, რომელსაც ამ კამპანიის ფარგლებში საზოგადოებისგან იღებენ, ბავშვების საჭიროებებს ხმარდება.

„ხალხი რა თანხასაც გვირიცხავს, ყველაფერი იხარჯება ბავშვებისთვის. გავდივართ ხან ლილოში, ხან საბითუმო საკანცელარიო მაღაზიებში ასე ვყიდულობთ ბავშვებისთვის საჭირო ნივთებს.

წიგნები სულაკაურის გამომცემლობამ და „ბიბლუსმა“ გვაჩუქეს. ზოგჯერ თვითონ მოაქვთ პირადი ბიბლიოთეკიდან და გვჩუქნიან. ბევრი ადამიანი ჩაერთო ამ კამპანიაში.

ივერი აჭარაში პოულობს ოჯახებს, რომლებსაც დახმარება სჭირდებათ, მე სამეგრელოში ვეძებ, მეზობლებიც გვაწვდიან ხოლმე ინფორმაციას, თუ ვის უჭირს სოფელში და ვის შეგვიძლია დავეხმაროთ.

ზუგდიდში, ჩხოროწყუსა და წალენჯიხაში დავეხმარეთ ოჯახებს და კიდევ ვაგროვებთ ასეთი ოჯახების შესახებ ინფორმაციას“- ამბობს ლაშა ჯანჯღავა.

სტუდენტების თქმით, „ქართული ოცნების“ ხელისუფლებამ ბოლო პერიოდში ბევრ ოჯახს შეუწყვიტა სოციალური შემწეობა, მიუხედავად იმისა, რომ ოჯახებს არ აქვთ საკმარისი შესაძლებლობა, ამიტომ ასეთ ოჯახებში ბავშვები კვლავ საჭიროებენ სოციალურ მხარდაჭერას.

„გვქონდა შემთხვევა, როდესაც ერთ-ერთ ოჯახში მეზობლები მოვიდნენ და მადლობა გადაგვიხადეს, რომ ამ ოჯახს დავეხმარეთ“- იხსენებს ლაშა.

ივერი შაინიძის თქმით, განათლების მხარდაჭერა დღეს ყველაზე მნიშვნელოვანია, რადგან „ოცნების“ ე.წ. განათლების რეფორმამ არათუ ხელი შეუწყო, არამედ, პირიქით, ზიანი მიაყენა განათლების ხელმისაწვდომობას.

„ჩვენი მოძრაობა შეიქმნა ამ ეგრეთ წოდებული რეფორმის გამოცხადების შემდეგ და ჩვენ ვიცავთ ილიაუნს, რადგან ყველაზე მეტად სწორედ ილიაუნი დააზიანა ამ „რეფორმამ“. ასევე, ჩვენი მიზანია დავიცვათ განათლების უფლება ამ ქვეყანაში.

განათლების ხელმისაწვდომობა არის მთავარი, რადგან „ოცნება“ სწორედ ამ ხელმისაწვდომობას უშლის ხელს. ეს რეფორმა მარტო სტუდენტების წინააღმდეგ არ არის, ზოგადად ახალგაზრდების წინააღმდეგაა და ამიტომაც გვინდა ახალგაზრდების გაძლიერება.

გვსურს, რომ მარტო ნივთები კი არა, მხარდაჭერა დავანახოთ ამ ოჯახებს“- გვეუბნება ივერი შაინიძე.

ლაშა ჯანჯღავა კი მიიჩნევს, რომ მთავარია, ამ ბრძოლაში საკუთარი ძალების რწმენა.

„პირველ რიგში, ჩვენ თვითონ უნდა გვქონდეს რწმენა, რომ ამ რეფორმას გავაწვევინებთ და გავიმარჯვებთ. ვაპირებთ, რომ კიდევ უფრო გავაძლიეროთ სტუდენტური მოძრაობა ამ მიმართულებით, გაჩერებას არ ვაპირებთ. განათლების მინისტრი მიქანაძე უნდა დაჯდეს სტუდენტებთან, პროფესორებთან და პასუხი გასცეს ჩვენს შეკითხვებს“ – ამბობს ლაშა.

ჩაუბარებელი უწყება საჯაროდ გამოქვეყნდება და ჩაბარებულად ჩაითვლება – წვევამდელთა გაწვევა

წვევამდელი თუ სამხედრო აღრიცხვის ან/და სამხედრო სამსახურში გაწვევის უწყისს არ ჩაიბარებს, ან ამ უწყისის მისთვის ჩაბარებას სამხედრო გაწვევისა და რეკრუტირების ეროვნული სააგენტო ვერ ახერხებს, ასეთ შემთხვევაში უწყისი [ასევე შეტყობინებაც] გამოქვეყნდება საჯაროდ.

საჯაროდ გამოქვეყნებიდან მე-7 დღეს სამხედრო აღრიცხვისა თუ სამხედრო სამსახურში გაწვევის უწყისი/შეტყობინება ჩაბარებულად ჩაითვლება. აქედან 10 დღის ვადაში კი წვევამდელი ვალდებულია გამოცხადდეს სააგენტოს შესაბამის ქვედანაყოფში.

2026 წლის 31 აგვისტოს დადგენილებით ცვლილება შევიდა „სამხედრო აღრიცხვის, წვევამდელთა ეროვნული სამხედრო სამსახურისა და სარეზერვო სამხედრო სამსახურის ორგანიზების წესში“, რომელიც დღეიდან, 2026 წლის 1-ლი სექტემბრიდან შევიდა ძალაში.

ახალი ცვლილების მიხედვით, თუ წვევამდელის სამხედრო აღრიცხვაზე აყვანის, ან ეროვნულ სამხედრო სამსახურში გაწვევის მიზნით უწყების ჩაბარება ვერ ხერხდება – მათ შორის, თუ მოქალაქე შეტყობინებას SMS-ზე ან ელფოსტაზე 2 სამუშაო დღეში არ უპასუხებს, ან ფოსტით შეტყობინების გაგზავნა შეუძლებელია – სააგენტო უწყებას ოფიციალურ ვებგვერდზე გამოაქვეყნებს.

ასეთ შემთხვევაში, უწყება/შეტყობინება გამოქვეყნებიდან მე-7 კალენდარულ დღეს ავტომატურად ჩაბარებულად ჩაითვლება და პირი ვალდებულია  შეტყობინების/უწყების ოფიციალურად ჩაბარებიდან [ანუ საჯაროდ გამოქვეყნებიდან] 10 კალენდარული დღის ვადაში გამოცხადდეს სააგენტოს შესაბამის სტრუქტურულ ქვედანაყოფში.

ამასთან, საქართველოს ადმინისტრაციულ სამართალდარღვევათა კოდექსის [სასკ] 196-ე მუხლის  პირველი ნაწილის თანახმად, წვევამდელთა სამხედრო აღრიცხვასთან დაკავშირებით შესაბამისი კომპეტენტური ორგანოს მიერ პირის გამოძახების შემთხვევაში მისი საპატიო მიზეზის გარეშე [დადგენილ ვადაში] გამოუცხადებლობა გამოიწვევს დაჯარიმებას 1 000 ლარის ოდენობით.

ამავე სასკ-ის 197-ე მუხლის პირველი ნაწილის თანახმად, წვევამდელთა ეროვნულ სამხედრო სამსახურში გაწვევისთვის თავის არიდების მიზნით პირის გამწვევ კომისიაში [დადგენილ ვადაში] გამოუცხადებლობა გამოიწვევს დაჯარიმებას 1 000 ლარის ოდენობით.

თუ გამოუცხადებლობა, სამხედრო სამსახურში გაწვევისთვის თავის არიდების მიზნით მეორდება, ეს უკვე სისხლის სამართლის დანაშაულად ითვლება.

სისხლის სამართლის კოდექსის 356-ე მუხლის მიხედვით კი წვევამდელის მიერ სამხედრო სამსახურისათვის თავის არიდება, მათ შორის, ავადმყოფობის სიმულაციით, სხეულის თვითდაზიანებით, ყალბი დოკუმენტის გამოყენებით ან სხვაგვარად მოტყუებით, ისჯება ჯარიმით ან თავისუფლების აღკვეთით ვადით სამ წლამდე.

წვევამდელებთან დაკავშირებით ამ და სხვა საკანონმდებლო ცვლილებებზე „ოცნების“ ხელისუფლებამ მუშაობა 5 თვის წინ დაიწყო.

ამ თემაზე ვრცლად:

თუ ჯარი გიწევთ და საზღვარგარეთ ხართ, ქვეყანაში უნდა დაბრუნდეთ – ცვლილება კანონში

ბათუმში ყინულის სასახლის თანამშრომლის სახლს ჩხრეკენ – რას ამბობს პროკურატურა

ბათუმში „ყინულის სასახლის“ ერთ-ერთი თანამშრომლის სახლში ჩხრეკა მიმდინარეობს. პირველადი ინფორმაციით, აღნიშნული პირი სამედიცინო დახმარების ექთანია.

„ბათუმელებს“ პროკურატურის პრესსამსახურში განუცხადეს, რომ მიმდინარეობს გადაუდებელი საგამოძიებო მოქმედებები. უწყებაში ამბობენ, რომ ამ დროისთვის დაკავებული არავინაა.

პროკურატურაში არ აზუსტებენ, რას უკავშირდება საგამოძიებო მოქმედება.

„ბათუმელები“ დაუკავშირდა ყინულის სასახლის ადმინისტრაციასაც. მათი ინფორმაციით, საგამოძიებო მოქმედებები „არ უკავშირდება სპორტული ცენტრის, როგორც ორგანიზაციის ოფიციალურ საქმიანობას“-მოგვწერეს ადმინისტრაციიდან.

როგორი ამინდი იქნება ბათუმში სექტემბრის პირველ დღეებში

გარემოს ეროვნული სააგენტოს აჭარის რეგიონული ჰიდრომეტეოროლოგიური ობსერვატორიის ინფორმაციით, 1 სექტემბრის 21 საათიდან 2 სექტემბრის 21 საათამდე აჭარაში მოსალოდნელია ცვალებადი მოღრუბლულობა, უმეტესად უნალექოდ.

იქროლებს ცვალებადი მიმართულების ქარი 10-15 მეტრი წამში.

ჰაერის ტემპერატურა სანაპირო ზოლსა და მთიან მუნიციპალიტეტებში:

  • დღისით: 25 – 30 გრადუსი სითბო
    ღამით: 15 – 20 გრადუსი სითბო

მაღალმთიან ზონაში:

  • დღისით: 17  – 23 გრადუსი სითბო
    ღამით: 7 – 12 გრადუსი სითბო

ზღვის ღელვა 2-3 ბალი იქნება, ზღვის წყლის ტემპერატურა +26 გრადუსია.

სინოპტიკოსების ცნობით, 3-4 სექტემბერს აჭარაში მოსალოდნელი ძირითადად უნალექო ამინდი.

სვანეთში 20 წლის ქალს ეძებენ

სვანეთში 20 წლის ქალს ეძებენ.

დაკარგული, სავარაუდოდ, ტურისტია რუსეთიდან.

როგორც ფეისბუქში წერენ, ქალის ავტომობილი ბოლოს ჭალაადის მყინვართან ნახეს.

„მარია საქართველოში მარტო მოგზაურობს. ბოლოს მასთან დაკავშირება გუშინ, მესტიაში შეძლეს. ის საბაგიროთი იყო ასული და იქიდან ახლობლებს ფოტოებსა და ვიდეოებს უგზავნიდა.

გოგონა გადაადგილდებოდა ნაქირავები Mazda CX-5-ით. მისი ავტომობილი დღეს საღამოს ჭალაადის მყინვართან იპოვეს, თავად მარიას ადგილსამყოფელი კი უცნობია“ – წერენ ფეისბუქში.

შსს-ს ინფორმაციით გამოძიება დღეს, პირველ სექტემბერს დაიწყო, სისხლის სამართლის კოდექსის 143-ე მუხლით, რაც თავისუფლების უკანონო აღკვეთას გულისხმობს.

ტრანსპორტის გადაჭარბებული ხმაური დაჯარიმდება 100 ლარით

პირველი სექტემბრიდან, შსს საგზაო მოძრაობის პირობებში სატრანსპორტო საშუალების ექსპლუატაციისას წარმოქმნილი ხმაურის დონის შემოწმებას დაიწყებენ.

შსს-ს ინფორმაციით, ხმაურის დონის შემოწება საერთაშორისო – ISO 5130:2019 სტანდარტთან შესაბამისობაში არსებულ, ხმაურის დონის საზომი პორტატული მოწყობილობის კომპლექტის მეშვეობით.

სატრანსპორტო საშუალებების ექსპლუატაციისას წარმოქმნილი ხმაურის დასაშვები ნორმები მთავრობის დადგენილებით არის რეგულირებული.

„დადგენილების თანახმად, დასახლებულ პუნქტებში ღამის საათებში – 23:00 საათიდან 08:00 საათამდე, სატრანსპორტო საშუალების ექსპლუატაციისას წარმოქმნილი ხმაური არ უნდა აღემატებოდეს 80 დეციბალს.

საქართველოს ადმინისტრაციულ სამართალდარღვევათა კოდექსის თანახმად, იმ სატრანსპორტო საშუალების მართვა, რომლის ექსპლუატაციისას წარმოქმნილი ხმაური საქართველოს კანონმდებლობით დადგენილ ნორმას აღემატება, იწვევს დაჯარიმებას 100 ლარის ოდენობით და მართვის მოწმობისთვის მინიჭებული ქულების 10 ქულით შემცირებას.

იმავე ქმედების განმეორებით ჩადენა 200 ლარის ოდენობით დაჯარიმებას და მართვის მოწმობის ქულების 20 ქულით შემცირებას, ხოლო მესამე და ყოველი მომდევნო შემთხვევა 300 ლარის ოდენობით დაჯარიმებას და მართვის მოწმობის ქულების 30 ქულით შემცირებას“- წერს შსს.

რუსეთის ღამის თავდასხმა უკრაინაზე რაკეტებით – დაიღუპა 12 ადამიანი

1 სექტემბრის ღამეს რუსეთი კიევში რკინიგზის დეპოს ბალისტიკური რაკეტებით დაესხა თავს, რის შედეგადაც შვიდი ადამიანი დაიღუპა. ინფორმაციას უკრაინული მედია ავრცელებს „უკრზალიზნიცის“ პრესსამსახურის განცხადებაზე დაყრდნობით.

თავდასხმის ადგილას ხანძარი გაჩნდა, რკინიგზის ორი მონაკვეთი დროებით დაიკეტა. ოფიციალური ცნობებით, დაღუპულთაგან 6 დეპოს თანამშრომელია.

კიევის ცნობით, 1 სექტემბრის ღამეს რუსეთმა უკრაინაზე დარტყმა განახორციელა ბალისტიკური და ფრთოსანი რაკეტებით და 218 დრონით. დარტყმა 28 ადგილას დაფიქსირდა. უკრაინის საჰაერო თავდაცვის სისტემამ 199 სამიზნე გაანეიტრალა.

უკრაინის პრეზიდენტმა ვოლოდიმირ ზელენსკიმ განაცხადა, რომ 1 სექტემბრის ღამეს უკრაინაზე რუსეთის თავდასხმის შედეგად ჯამში 12 ადამიანი, მათ შორის ერთი უცხოეთის მოქალაქე, დაიღუპა.

„რუსეთი მხოლოდ მაშინ აღწევს წარმატებას, როდესაც საჰაერო თავდაცვის საშუალებები არასაკმარისია. რუსული ტერორიზმის მსხვერპლთა რაოდენობა პირდაპირ დამოკიდებულია ახალი დახმარების პაკეტზე“ – განაცხადა მან.

 

ირანში სამხედრო გზიდან ეკონომიკურ წნეხზე გადასვლა – შეფასებები ვაშინგტონში

ავტორი: ანა კალანდაძე, ვაშინგტონი

___

2026 წლის 24 აგვისტოს აშშ-ის ხაზინის მდივანმა, სკოტ ბესენტმა წარმოადგინა კამპანია „Operation Economic Outcast“, რომელსაც „ეკონომიკური D-Day“ უწოდა. 60-ზე მეტი სუბიექტის წინააღმდეგ მიმართული სანქციების მიზანია ირანის ნავთობის კონტრაბანდის, კრიპტოვალუტის არხებისა და რეგიონული დაჯგუფებების დაფინანსების შეჩერება.

ზომებმა ირანი საერთაშორისო საბანკო სისტემას მოწყვიტა, დააჩქარა ეროვნული ვალუტის გაუფასურება და გაზარდა ინფლაცია. რიგითი მოქალაქეებისთვის ამან საკვებსა და საწვავზე ფასების მკვეთრი ზრდა, დანაზოგების გაუფასურება და სასიცოცხლო მედიკამენტების დეფიციტი გამოიწვია.

რიტორიკა და სტრატეგიული ცვლილება „ატლანტიკური საბჭოს“ დისკუსიაზე, სადაც სანქციები შეაფასეს, სახელმწიფო დეპარტამენტის სანქციების პოლიტიკის ყოფილმა კოორდინატორმა, ელჩმა დენიელ ფრიდმა აღნიშნა, რომ განცხადება შეიცავდა „მკვეთრ რიტორიკას, D-Day-ის შეფასებას და შედარებით მოკრძალებულ სანქციებს“.

მიუხედავად კრიტიკისა, რომ „რიტორიკამ ქმედებებს გაუსწრო“, ფრიდმა სამხედრო გზიდან ეკონომიკურ წნეხზე გადასვლას „უფრო მდგრადი სტრატეგია“ უწოდა, თუკი ვაშინგტონი ძალისხმევას ისეთ „არასაჭირო მიმართულებებზე არ გაფანტავს, როგორიც კანადაა“.

  • ჩინეთის ფაქტორი და წნეხი პარტნიორებზე

„ატლანტიკური საბჭოს“ სანქციების ექსპერტმა, მაია ნიკოლაძემ ყურადღება გაამახვილა მთავარ სავაჭრო პარტნიორებზე. მან ხაზი გაუსვა, რომ ირანული ნავთობის „80-დან 90%-მდე ჩინეთში გადის“, ხოლო არაბთა გაერთიანებული საამიროები გადაიქცა „მთავარ სატრანზიტო და სანქციების [ჰაბად]“.

მისი თქმით, ეს ქვეყნები, თურქეთთან და ერაყთან ერთად, „მომავალში წნეხის ქვეშ აღმოჩნდებიან“. ნიკოლაძემ ასევე აღნიშნა სამხრეთ-აღმოსავლეთ აზიის ქვეყნები, რომლებიც ხელს უწყობენ „ირანის მიერ სანქციების არიდებას ჩრდილოვანი ფლოტის ოპერაციებით“.

ფრიდმა განმარტა, რომ აუცილებელია მეორადი სანქციების მკაცრი აღსრულება: „ან ჩინეთს უპირისპირდები, ან სერიოზულად არ ხარ განწყობილი“. მან დასძინა, რომ პარტნიორებს აინტერესებთ: “მართლა სერიოზულად ფიქრობს ტრამპის ადმინისტრაცია, თუ ეს მხოლოდ სიტყვებია?”

  • სანქციების შესაძლებლობები და შეზღუდვები

თეირანი შეზღუდვების გვერდის ავლისთვის ჩრდილოვან ტანკერებსა და კრიპტოვალუტას იყენებს. ნიკოლაძის თქმით, სანქციები ეფექტურია „რეჟიმის შემოსავლების შესამცირებლად და დროთა განმავლობაში მისი ფინანსური დასუსტებისთვის“, თუმცა მან გააფრთხილა გადაჭარბებული მოლოდინების შესახებ: „არასწორი მოლოდინია იმის ფიქრი, რომ სანქციებს თავისთავად შეუძლია საზღვაო ბლოკადის დასრულება“.

ოზურგეთში დააკავეს 63 წლის ქალის განზრახ მკვლელობაში ბრალდებული

შინაგან საქმეთა სამინისტროს ინფორმაციით, ოზურგეთში 63 წლის ქალის განზრახ მკვლელობაში ბრალდებული დააკავეს.

„გამოძიებით დადგინდა, რომ 28 აგვისტოს ბრალდებული ოზურგეთის მუნიციპალიტეტის სოფელ ნასაკირალში ერთ-ერთი მოქალაქის საცხოვრებელ სახლში განზრახ მკვლელობის მიზნით ფარულად შეიჭრა.

მან სახლში მყოფ ქალს ცივი იარაღით სიცოცხლისთვის საშიში, მრავლობითი დაზიანებები მიაყენა და შემთხვევის ადგილიდან მიიმალა.

მიყენებული დაზიანებების შედეგად ქალბატონი შემთხვევის ადგილზე გარდაიცვალა“- წერს შსს.

სამართალდამცველებმა ჩატარებული საგამოძიებო მოქმედებების შედეგად, დანაშაულის ჩამდენი პირი ბრალდებულის სახით დააკავეს.

გამოძიება სისხლის სამართლის კოდექსის 108-ე მუხლით მიმდინარეობს, რაც 15 წლამდე ვადით თავისუფლების აღკვეთას ითვალისწინებს.

__________________

ამ თემაზე:

სოფელ ნასაკირალში 60-წლამდე ქალი მოკლეს
Exit mobile version