რუსეთის პრეზიდენტმა ვლადიმერ პუტინმა შესთავაზა აშშ-ის პრეზიდენტ დონალდ ტრამპსა და ჩინეთის პრეზიდენტ სი ძინპინს შეხვედრა უკრაინაზე სასაუბროდ, ომის დასრულებაზე, მოსკოვის სასარგებლოდ – წერს ამერიკული გამოცემა Wall Street Journal-ი ინფორმირებულ წყაროებზე დაყრდნობით.
გამოცემის ცნობით, ეს გეგმა წარმოადგენს პუტინის მცდელობას, ისარგებლოს ტრამპსა და რუსეთის ლიდერს შორის დამთბარი ურთიერთობებით.
„უკრაინის პრეზიდენტის, ვოლოდიმირ ზელენსკის მონაწილეობის გარეშე ასეთი სამიტის გამართვა უპრეცედენტო მოვლენა იქნებოდა, რომელიც ევროპულ დედაქალაქებსა და მის ფარგლებს გარეთ სერიოზულ შეშფოთებას გამოიწვევდა“ – წერს Wall Street Journal-ი.
გამოცემის ცნობით, აშშ-ის ერთ-ერთმა მაღალჩინოსანმა განაცხადა, რომ ტრამპი ჯერ არ დათანხმდა ასეთი სამიტის ჩატარებას. თუმცა, მან აღნიშნა, რომ ამერიკის პრეზიდენტი შესაძლოა დაეთანხმოს ამ იდეას, იმის გათვალისწინებით, რომ მას სურს შეასრულოს თავისი საარჩევნო დაპირება ომის დასრულების შესახებ.
გამოცემის წყაროების ცნობით, კრემლმა შესთავაზა სამმხრივი დიალოგის ჩატარება აზია-წყნარი ოკეანის ეკონომიკური თანამშრომლობის (APEC) მომავალ სამიტზე, რომელიც 18 და 19 ნოემბერს გაიმართება სამხრეთ ჩინეთში მდებარე ტექნოლოგიურ ცენტრში, შენჟენში.
___________
ფოტოზე: სი ძინპინი, პუტინი და ტრამპი/ფოტოკოლაჟი
