„ქალაქ ბათუმის მერია თანახმაა განხორციელდეს ხელვაჩაურის მუნიციპალიტეტსა და ბათუმის მუნიციპალიტეტს შორის ადმინისტრაციული საზღვრების შეცვლა, ხელვაჩაურის მუნიციპალიტეტის საკრებულოს მიერ წარმოდგენილი ხელვაჩაურის მუნიციპალიტეტში შემოსაერთებელი ტერიტორიის საზღვრების დემარკაციის რუკის შესაბამისად“, – აღნიშნულია ბათუმის მერის, ლაშა კომახიძის წერილში, რომელიც მერმა ბათუმის საკრებულოს თავმჯდომარეს, სულიკო თებიძეს 2019 წლის 30 იანვარს გადაუგზავნა.
ორ მუნიციპალიტეტს შორის ადმინისტრაციული საზღვრის დემარკაციის საკითხს ბათუმის საკრებულო 2019 წლის 5 მარტის სხდომაზე განიხილავს. პროექტის მიხედვით, ბათუმის საკრებულოც თანახმაა საზღვრის შეცვლაზე. თუ საკრებულოს უმრავლესობა საზღვრის შეცვლას მხარს დაუჭერს, ბათუმის საკრებულოს თავმჯდომარე შესაბამის შუამდგომლობას სამთავრობო კომისიას წარუდგენს.
ხელვაჩაურის საკრებულომ ბათუმის მუნიციპალიტეტს საზღვრების შეცვლის თხოვნით იმ მიზეზით მიმართა, რომ 2011 წელს საზღვრების შეცვლის დროს, ბათუმის საზღვრებში მოექცა ხელვაჩაურის დაბა და მუნიციპალიტეტის ადმინისტრაციული ცენტრი; ადგილობრივი თვითმმართველობის კოდექსით კი, აუცილებელია მუნიციპალიტეტს ჰქონდეს ადმინისტრაციული ცენტრი.
აქედან გამომდინარე, ხელვაჩაურში მომზადდა ადმინისტრაციული საზღვრის ახალი რუკა, რომლის მიხედვითაც 555 482 კვ/მ ტერიტორია, რომელიც დღეს ქალაქ ბათუმის საზღვრებშია, გადადის ხელვაჩაურის მუნიციპალიტეტის საზღვრებში.
ეს ტერიტორია მოქცეულია ფრიდონ ხალვაშის გამზირს, გრიგოლ რობაქიძისა და ზაზა ფანასკერტელ-ციციშვილის ქუჩებს შორის. დოკუმენტებში აღნიშნულია, რომ ხელვაჩაურის საკრებულოს მიერ აღნიშნულ ტერიტორიაზე მცხოვრები 246 ადამიანი გამოიკითხა, რომელთაგან 91,4% თანახმაა ადმინისტრაციული საზღვრის შეცვლაზე.
აღნიშნულ ტერიტორიაზე, რომელიც ხელვაჩაურის საზღვრებში უნდა გადავიდეს, დღეს მოქცეულია:
ბათუმის საკრებულოს დოკუმენტებიდან
ხელვაჩაურის მუნიციპალიტეტის ტერიტორიის საერთო ფართობი [დაბრუნებული ტერიტორიის ჩათვლით] იქნება 36 766,7 ჰექტარი.
ტერიტორია, რომელიც ბათუმის საზღვრებშია და ხელვაჩაურის საზღვრებში მოექცევა მდებარეობს ფრიდონ ხალვაშის გამზირს, გრიგოლ რობაქიძისა და ზაზა ფანასკერტელ-ციციშვილის ქუჩებს შორის.
