Batumelebi

5 ნოემბრის მონაცემებით, საქართველოში დადასტურდა კოვიდის  5340 ახალი შემთხვევა. ჩატარდა 55 301 ტესტი კორონავირუსზე.

გასულ 24 საათში 62 პაციენტი გარდაიცვალა კოვიდით.

დღეს ქვეყანაში გამოვლენილი ინფიცირების 5 340 ახალი შემთხვევიდან თბილისში გამოვლენილია 1 956 შემთხვევა, აჭარაში – 217, იმერეთში – 1 059, ქვემო ქართლში – 413, შიდა ქართლში – 446, გურიაში – 130, სამეგრელო – ზემო სვანეთში – 328, კახეთში – 492, მცხეთა-მთიანეთში – 109, სამცხე-ჯავახეთში – 119, რაჭა-ლეჩხუმსა და ქვემო სვანეთში -71.

ამ დროისთვის ქვეყანაში კოვიდით ინფიცირებულია 51 266 ადამიანი, მათგან 6 666 ადამიანი მკურნალობს საავადმყოფოში.

4 ნოემბრის მდგომარეობით, დადებითობის დღიური მაჩვენებელი არის 9.66%, ბოლო 14 დღის მანძილზე – 9.45% ხოლო 7 დღის მანძილზე – 9.99%.

ამავე თემაზე: 

რატომ არ დარდობენ კოვიდით გარდაცვალებაზე საქართველოში – ინტერვიუ ექიმთან

See more

ფინანსთა სამინისტროს საგამოძიებო სამსახურის ინფორმაციით, დიდი ოდენობით სხვისი ქონების მოტყუებით დაუფლების ფაქტზე რუსეთის მოქალაქე დააკავეს.

„გამოძიებით დადგინდა, რომ ბრალდებულმა, სხვა პირების დახმარებით, სხვისი ქონებრივი უფლებამოსილების დამადასტურებელი ყალბი დოკუმენტი დაამზადა და მიისაკუთრა თბილისში მდებარე, ერთ-ერთი კომპანიის საკუთრებაში რიცხული, ჯამში 47 800 კვ/მ მოცულობის ორი მიწის ნაკვეთი.

მან ასევე გააყალბა აღნიშნული კომპანიის  წილის ნასყიდობის ხელშეკრულება, რომლის საფუძველზეც გახდა მისი ერთპიროვნული დირექტორი და დამფუძნებელი, რის შემდგომაც მიწის ნაკვეთები გადააფორმა თავისივე სახელზე რეგისტრირებულ სხვა კომპანიაზე.

„დანაშაულებრივი განზრახვის სისრულეში მოყვანის შემდგომ, ბრალდებული გეგმავდა მიწის ნაკვეთების იპოთეკით დატვირთვას 200 000 აშშ დოლარამდე თანხის დაუფლების მიზნით, რა დროსაც მოხდა მისი დაკავება. გამოძიების პროცესში მიწის ნაკვეთებს დაედო ყადაღა.

წინასწარი მონაცემებით, მიწის ნაკვეთების საბაზრო ღირებულება აღემატება 16 000 000 ლარს“- ნათქვამია გამოძიების სამსახურის მიერ.

გამოძიება მიმდინარეობს საქართველოს სისხლის სამართლის კოდექსის 180-ე მუხლის მე-3 და 210-ე მუხლის პირველი ნაწილებით, რაც  სასჯელის სახით ითვალისწინებს თავისუფლების აღკვეთას 6-დან 9 წლამდე ვადით.

„გრძელდება შესაბამისი ღონისძიებები, აღნიშნული დანაშაულის ჩადენაში თანამონაწილე სხვა პირების დადგენა-მხილების მიზნით“.

ბათუმის საოლქო-საარჩევნო კომისიამ არ დააკმაყოფილა „სამართლიანი არჩევნების“ საჩივარი, რაც  მესამე საუბნო საარჩევნო კომისიის  ბათილად მიჩნეული ბიულეტენების გადახედვას ითვალისწინებდა. ორგანიზაცია საოლქო კომისიის გადაწყვეტილებას სასამართლოში ასაჩივრებს.

წინასწარი მონაცემებით, 30 ოქტომბრის ბათუმის მერის მეორე ტურის არჩევნებზე ოპოზიციის კანდიდატ გიორგი კირთაძეს სახელისუფლო კანდიდატმა არჩილ ჩიქოვანმა 1 526 ხმით მოუგო. ბათუმის 79-ე ოლქში ამ არჩევნებზე 2017 ბიულეტენი გააუქმეს.

30 ოქტომბრის ბათუმის მერის არჩევნების მეორე ტურში #3 საუბნო-საარჩევნო კომისიაში 38 ბიულეტენი გააბათილეს. ამ უბანზე 1458 ამომრჩეველია რეგისტრირებული. მეორე ტურზე არჩევნებში მონაწილეობა 637-მა ამომრჩეველმა მიიღო.

შედეგების დათვლის შემდეგ, შემაჯამებელ ოქმში, კომისიის ერთ-ერთმა წევრმა, თეონა დიასამიძემ, განსხვავებული აზრი დააფიქსირა – მან დაწერა, რომ ოპოზიციის კანდიდატის 6 ხმა და „პოზიციის“ [„ქართული ოცნების“ კანდიდატი] 4 ხმა მიკერძოებულად გააბათილეს.

„სამართლიანი არჩევნები“ ბათუმის საოლქო კომისიას ამ უბნის ყველა ბათილი ბიულეტენის გადახედვას და კანდიდატებისთვის იმ ბიულეტენების ჩათვლას ითხოვდა, სადაც არჩევანი დაფიქსირებულად ჩაითვლებოდა.

საოლქო კომისიამ საჩივარი არ დააკმაყოფილა, ორგანიზაცია  საოლქო კომისიის შესაბამისი განკარგულების გაუქმებას სასამართლოში ითხოვს.

„პირველ ტურში ძალიან ბევრი მონაცემი გადათვალეს. მეორე ტურის შემდეგ ჩემთვის მართლა გაუგებარია პრინციპული მიდგომა, რომ გადაუთვლელი რჩება იმ უბნის შედეგები, სადაც არსებობს ეჭვი კანონდარღვევაზე, ამ შემთხვევაში ბათილებთან დაკავშირებით. გაუგებარია რატომ არ აქვს საოლქო კომისიას სურვილი, რომ მოხსნას კითხვითი ნიშნები და ნდობა გააჩინოს შედეგებთან მიმართებაში. ჩვენ ვითხოვდით მხოლოდ ბათილი ბიულეტენების გადათვლას. ეს არ იყო შრომატევადი საქმე“, – ამბობს მადონა ბერიძე, „სამართლიანი არჩევნების“  აჭარა-გურიისა და ფოთის რეგიონული ორგანიზაციის კოორდინატორი.

38 ბიულეტენი მიიჩნია ბათილად  ბათუმის #10 საუბნო საარჩევნო კომისიამაც. ოქმის განსხვავებული აზრის გრაფაში არსებობს ამ კომისიის ერთ-ერთი წევრის ჩანაწერი.  ქეთი ციმნარიძე წერს, რომ ოქმში დაფიქსირებულ შედეგებს პროცედურული დარღვევების სიმრავლის გამო არ ეთანხმება. ამ უბნის შედეგები საოლქო კომისიამ ხელახლა გადათვალა და მონაცემები უცვლელად დატოვა.

#11 უბანზე 36 ბიულეტენი, #12 საარჩევნო უბანზე კი 31 ბიულეტენი მიიჩნიეს ბათილად. #13 საუბნო-საარჩევნო კომისიის მიხედვით, ამ უბანზე 33 ბათილი ბიულეტენი გამოავლინეს, ამავე უბნის ოქმის განსხვავებული აზრის გრაფაში ჩაწერეს, რომ ადგილი ჰქონდა ამომრჩეველზე ზეწოლას. #14 უბანზე 33 ბათილი ბიულეტენი გამოავლინეს.

ბათუმის საოლქო-საარჩევნო კომისიამ არ დააკმაყოფილა ასევე საჩივარი, რომლითაც საია ყუაგადახეული ბიულეტენის გაბათილებას ასაჩივრებდა, ამ ბიულეტენში არჩევანი ბათუმის მერობის გაერთიანებული ოპოზიციის კანდიდატის სასარგებლოდ იყო გაკეთებული. ბიულეტენი 50-ე საუბნო-საარჩევნო კომისიამ მხოლოდ იმის გამო გააბათილა, რომ მას კიდე ჰქონდა მოხეული.

კუთხემოხეული ბიულეტენის ამბავი – რა ჩანს ცესკოს ვიდეოში

საიას აჭარის ორგანიზაციის ხელმძღვანელის, პაატა დიასამიძის შეფასებით, ამ ბიულეტენის გაბათილება და მასთან დაკავშირებული ამბავი ნათლად გვაჩვენებს როგორც საუბნო, ასევე საოლქო კომისიის ტენდენციურობას.

„ვიდეოში, რაც ცესკოს ვებგვერდზე გამოქვეყნდა, ვნახეთ, რომ ამ ბიულეტენზე მსჯელობენ, როგორც საეჭვოზე. საოლქო კომისიამ საჩივრის განხილვისას სატელეფონო ხაზზე ჩართო საუბნო კომისიის თავმჯდომარე, სადაც უარყო, რომ ბიულეტენი იყო საეჭვო. მან თქვა, რომ ეს ბიულეტენი კონვერტის გარეშე იყო ყუთში მოთავსებული. კანონი ადგენს ბიულეტენების დახარისხების წესს – თუ ბიულეტენი არ იყო კონვერტში, ის ცალსახად ბათილია და არა საეჭვო. ვიდეოში კი ჩანს, რომ კომისიამ იმსჯელა მასზე, როგორც საეჭვო ბიულეტენზე და გადაწყვიტა გაბათილება“, – ამბობს პაატა დიასამიძე.

საიამ შემდეგ სხდომაზე დამატებითი მტკიცებულებით, ვიდეოჩანაწერით მიმართა საოლქო კომისიას და საჩივრის ხელახალი განხილვა მოითხოვა. საოლქო კომისიის თავმჯდომარემ განხილვაზე ორგანიზაციას უარი უთხრა – ხელახლა არ ვიმსჯელებო.

საიაში აცხადებენ, რომ საოლქო კომისიის ეს მიდგომაც არასწორია და კანონთან წინააღმდეგობაში მოდის. მომჩივანმა ახალი გარემოებით მიმართა მას – ცალსახად ადასტურებდა, რომ კომისიის თავმჯდომარემ ცრუ ახსნა-განმარტება მისცა საოლქო კომისიას. საიამ საოლქო კომისიის გადაწყვეტილება #50-ე საუბნო კომისიის შემთხვევაზე სასამართლოში გაასაჩივრა.

დამკვირვებელი ორგანიზაციები მიიჩნევენ, რომ საოლქო კომისიას აუცილებლად უნდა გადაეთვალა ბათილი ბიულეტენები ყველგან, სადაც ამის მოთხოვნა იყო. მით უფრო, რომ პირველ ტურში გამოვლინდა ფაქტები, როცა ნამდვილი ბიულეტენები ბათილად იყო  ჩათვლილი.

დამკვირვებელი ორგანიზაციები ყურადღებას ამახვილებენ ასევე ოქმებში მკვეთრი დისბალანსით გამოწვეულ უნდობლობაზე საუბნო კომისიების მიმართ, რაც გასულ საპარლამენტო არჩევნებზე დაფიქსირდა.

საიამ რამდენიმე უბნის გადათვლას უბანზე მოსულ ამომრჩეველთან მიმართებაში ბათილი ბიულეტენების სიმრავლის გამოც ითხოვდა. ეს უბნები იყო – #10-ე, #34-ე და #37-ე.

„სამართლიან არჩევნები“ საოლქო კომისიაში ითხოვდა ასევე #16-ე და #62- ე საუბნო კომისიის შედეგების სრულ გადათვლას. #16-ე უბანზე  ერთით მეტი ბიულეტენი აღმოაჩინეს. ამ უბანზე განსხვავებული აზრის გრაფაში კომისიის წევრი დამატებით წერს, რომ უბნის შედეგები უნდა გაბათილდეს, რადგან აქ არა მხოლოდ ერთი ზედმეტი ბიულეტენი, არამედ ერთი ცარიელი კონვერტიც აღმოაჩინეს. ეს, მისი აზრით, იმას ნიშნავს, რომ აქ ე.წ. კარუსელი დატრიალდა.

არასამთავრობო ორგანიზაციების თქმით, ასევე დარღვევა იყო #62-ე უბანზე, სადაც საუბნო საარჩევნო კომისიის ოქმში ერთ-ერთი კანდიდატის მიღებული ხმების რაოდება გადასწორებული იყო. ამ შემთხვევაში „სამართლიანი არჩევნები“ ადმინისტრაციულ პასუხისმგებლობას ითხოვდნენ. საოლქო კომისიამ გახსნა მხოლოდ იმ კანდიდატის დალუქული ბიულეტენები, რომლის მონაცემიც გადასწორებული იყო, გადათვალა და დააზუსტა, რომ მონაცემი სწორია.

არჩევნების მეორე ტურის შემდეგ ბათუმის საოლქო-საარჩევნო კომისიას „სამართლიანმა არჩევნებმა“ 13 საჩივრით მიმართა, მათ შორის ორი შემაჯამებელ ოქმში დაფიქსირებულ დარღვევას შეეხებოდა. საიამ კი 7 საუბნო კომისიის ოქმი და 6 უბანზე დაფიქსირებული პროცედურული დარღვევები გაასაჩივრა. საოლქო კომისიამ გადათვლის მოთხოვნა უმეტესად არ დააკმაყოფილა, სამ შემთხვევაში კი მხოლოდ ნაწილობრივ დააკმაყოფილა. ათამდე საუბნო კომისიის წევრს კი შენიშვნა მისცეს.

„მთავრობა და, როგორც ჩანს, საზოგადოებაც უკვე შეეგუა ათეულობით გარდაცვლილის გამოცხადებას ყოველდღიურად და ისე განაგრძობენ მუშაობას, თითქოს გარდაცვლილების ეს მაჩვენებელი არც არსებობდეს,“ – ამბობს ექიმი რეანიმატოლოგი ვახტანგ კალოიანი, რომელიც გვახსენებს, რომ, მაგალითად, დღესაც ჩვეულებრივ სტატისტიკად მივიღეთ ყველამ მორიგი ნიუსი: „კოვიდით 4 ნოემბერს 53 ადამიანი გარდაიცვალა“.

რა გზებით არის შესაძლებელი კოვიდით ინფიცირებისა თუ გარდაცვალების შემთხვევების კლება? – ვახტანგ კალოიანს რამდენიმე კითხვა დავუსვით.

• ბატონო ვახტანგ, ხელისუფლება ისევ უარს ამბობს ახალ რეგულაციებზე იმის მიუხედავად, რომ კოვიდით 10 ათასზე მეტი ადამიანი დაიღუპა. რა იქნებოდა ამ დროს ეფექტური, რას აჩვენებს სხვა ქვეყნების გამოცდილება? 

მთავარია აქტიური ვაქცინაცია, რადიკალურად მხოლოდ ეს შეცვლის იმ მძიმე სურათს, რაც ახლა ქვეყანაში გვაქვს.

სხვა ქვეყნების გამოცდილება მკაფიოდ აჩვენებს, რომ სადაც ვერ მოახერხეს ვაქცინაციის სწრაფი ტემპი საგანმანათლებლო კამპანიით და დაახლოებით 60-70 პროცენტი არ აიცრა ნებაყოფლობით. გარკვეული ჯგუფებისთვის სავალდებულო ვაქცინაცია დააწესეს.

კლასიკური მაგალითია აშშ, სადაც 8 რისკჯგუფი გამოყეს, ანუ ისეთი პროფესიები, რომლებსაც ყველაზე ხშირი შეხება აქვთ სხვებთან და საფრთხეს ქმნიან ინფექციის სწრაფად გავრცელების კუთხით. ამ ჯგუფებში არიან საჯარო მოხელეები, პოლიციელები, სასწრაფო დახმარების ექიმები, კვების მრეწველობაში ჩართული ადამიანები, ტრანსპორტის სექტორი, განათლების სისტემაში ჩართული ადამიანები, მედიცინის სფერო სრულად.

ამ ჩარევამ მისცა საშუალება ქვეყნებს, რომ რადიკალურად შემცირებულიყო როგორც ინფიცირების მაჩვენებელი, ასევე გარდაცვალების შემთხვევები. მათ მოახერხეს ის, რომ ფაქტობრივად გაეხსნათ საზღვრები და განეგრძოთ ნორმალური ფუნქციონირება.

ჩვენთან არასაკმარისი იყო საინფორმაციო კამპანია და რაც გვქონდა, მასაც არ აქვს სასურველი შედეგი. მეხუთე ტალღის დასაწყისში იყო 2-3 ათასი დღიური შემთხვევა და ახლა გვაქვს 5 – 6 ათასი ახალი შემთხვევა დღეში. სამწუხაროდ, ლიდერი ვართ ჩვენს რეგიონში და ზოგადად.

• საკოორდინაციო საბჭოს სხდომაზე გაჟღერდა ე.წ. მწვანე ბარათების იდეა. ეს რამდენად შეამცირეს ახალი შემთხვევების რაოდენობას? 

ეს კარგია, მაგრამ დაგვიანებული, თუმცა დარწმუნებული ვარ, რომ სავალდებულო ვაქცინაციის გარეშე ეფექტი არ ექნება. რისკჯგუფების სავალდებულო ვაქცინაციის გარეშე ჩვენ მოგვიწევს სხვადასხვა სიდიდის ტალღის გადატანა, სამწუხაროდ, არცთუ მცირე ადამიანური დანაკარგებით.

რეალურად მთავარი პრობლემა არის ის, რომ მთავრობა და, როგორც ჩანს, საზოგადოებაც უკვე შეეგუა ათეულობით გარდაცვლილის გამოცხადებას ყოველდღიურად. ისე განაგრძობენ მუშაობას, თითქოს გარდაცვლილი არ არსებობდეს. პრეზიდენტს ზურაბიშვილის განცხადებაც ამაზე მეტყველებს, როცა მან გუშინ სრულიად არაჰუმანური დამოკიდებულება დააფიქსირა.

• გულისხმობთ იმას, რომ ვინც აცრილი არაა, მისი მკურნალობა ფასიანი შესაძლოა გახდეს? 

კი, ეს არის სრულიად არაჰუმანური განცხადება. მე აქტიური მომხრე ვარ სავალდებულო ვაქცინაციის, მაგრამ ეს არ ნიშნავს იმას, რომ ადამიანები დარჩნენ სამედიცინო მომსახურების გარეშე და მოკვდნენ. საქართველოში ფასიანი რეანიმაციის და ინტენსიური თერაპიის დაფინანსებას მოახერხებს მოსახლეობის მხოლოდ 0.5 პროცენტი.

რეანიმაციული საწოლის ყველაზე დაბალი ფასი დღეში 600 ლარია. რამდენი ადამიანი გადაიხდის ამას დღეში? – შესაბამისად, პრეზიდენტის ეს განცხადება ნიშნავს ჩვენი მოქალაქეების უბრალოდ გაწირვას იმის გამო, რომ მათ მცდარი გადაწყვეტილება მიიღეს. ეს ერთგვარი ანგარიშსწორებაა.

გამოდის, შემდეგი ნაბიჯი შეიძლება იყოს ის, რომ მოდი, არ ვუმკურნალოთ, მაგალითად, განსხვავებული პოლიტიკური შეხედულების მქონე ადამიანებს, რადგან ისინი აქციებს მართავენ და იქ მობილობა მაღალია, ან ფიზიკურად მაღლებს არ ვუმკურნალოთ უფასოდ, მსუქნებს და ასე შემდეგ.

• სხვა გამოცდილებაზე რას ფიქრობთ, მაგალითად, შეზღუდვა საზოგადოებრივი ტრანსპორტის გამოყენებაზე, ან კაფეში შესვლაზე, თუკი კოვიდპასპორტი არ გაქვს? 

შესაძლებელია, მაგრამ ეს ყველაფერი არის დროებითი ღონისძიება, მათ შორის, ლოქდაუნი, რომლის გაკეთება ახლა სრული სიგიჟეა, მაგრამ ისიც კი დროებითია – რაღაც მომენტში გაწყვეტს ჯაჭვს, შეამცირებს ციფრებს, მაგრამ როგორც კი მოიხსნება, ეგრევე უკან დაბრუნდება ყველაფერი. ამ მეთოდების გამოყენებამ ჩვენ შესაძლოა მოგვცეს დროებითი შეღავათი, მაგრამ ეს არ იქნება საკითხის რადიკალური გადაწყვეტა.

მდგომარეობას მნიშვნელოვნად მხოლოდ აქტიური ვაქცინაცია შეცვლის.

• თქვენი აზრით, რატომ არ სურს ხელისუფლებას სავალდებულო ვაქცინაცია კონკრეტული ჯგუფებისთვის? 

იციან მოქალაქეების განწყობა და არ ჰყოფნით პასუხისმგებლობა, მიიღონ შესაბამისი გადაწყვეტილება. საარჩევნო კამპანიამ ნათლად დამანახა ანტივაქსერული დამოკიდებულებები. ფაქტია, რომ არჩევნების გასაყალბებლად და გარკვეული მხარდაჭერის მისაღებად ამუშავეს ეს ტაქტიკა, რაც ამორალური და უზნეოა. ფაქტია, რომ ამ ტაქტიკის მიუხედავად ხმები არ დაკარგეს. გამოდის, რომ კოვიდით 10 ათასზე მეტი კაცი რომ გარდაიცვალა, ეს არც ხელისუფლებას ადარდებს და არც მოქალაქეებს დიდწილად.

• მაგრამ არჩევნების შემდეგაც არ შეცვლილა ეს მიდგომა… 

არც ახლა აწყობთ მოქალაქეების განაწყენება, რადგან დაძაბული პოლიტიკური ვითარებაა, არ აწყობთ შავრაზმული და რადიკალური ჯგუფების გაღიზიანება.

დააკვირდით: ჩვენ არ გვაქვს რეგულაციები და რაც გვაქვს, ამ მინიმალური რეგულაციების მართვაც კი არ გვაქვს, მათ შორის, ნიღბის ტარება. ნახეთ რა მდგომარეობაა საზოგადოებრივ ტრანსპორტში, სადაც არც დისტანციის დაცვა ახსოვს ვინმეს, არც მგზავრების რაოდენობა და არც პირბადეს ატარებს უმრავლესობა.

• არის თუ არა ეს კონკრეტული თანამდებობის პირების პასუხისმგებლობა? 

რა თქმა უნდა, ეს არის პრემიერის და საკოორდინაციო საბჭოს ყველა წევრის, ჯანდაცვის მინისტრის და დაავადებათა კონტროლის ეროვნული ცენტრის, ასევე კლინიკური ჯგუფის პასუხისმგებლობა.

• მაგალითად, ჯანდაცვის მინისტრმა რა უნდა ქნას ასეთ სიტუაციაში? 

თავმოყვარე მინისტრი რომ იყოს, მინიმუმ უნდა გადადგეს, როცა 10 ათასზე მეტი ადამიანი გარდაიცვალა საქართველოში კორონავირუსის გამო. პრემიერიც უნდა გადადგეს, რომელიც არის საბოლოო გადაწყვეტილების მიმღები. პასუხისმგებლობას არც დაავადებათა კონტროლის ეროვნული ცენტრი უნდა გაექცეს, მიუხედავად იმისა, რომ ის სწორ პოზიციას აფიქსირებს პერიოდულად, მაგრამ რეალურად პრობლემების გადაწყვეტას ვერ ახერხებს.

• სწორი პოზიციების დაფიქსირებას, მაგალითად, ამირან გამყრელიძისგან რამდენად შეიძლება ჰქონდეს პოზიტიური გავლენა? 

რა თქმა უნდა, ადეკვატური ქცევა ძალიან მნიშვნელოვანია… დაავადებათა კონტროლი ფანტასტიკურ რამეს კი არ აკეთებს, უბრალოდ ზოგჯერ საჯაროდ აფიქსირებს პოზიციებს, რაც სამედიცინო თვალსაზრისით არის გამართული, თორემ მაგალითის მიცემაში ისეთი პასუხისმგებლობა აქვთ, როგორც ჯანდაცვის მინისტრს, პრემიერს.

• საითკენ შეიძლება წავიდეს პროცესი, თუკი ხელისუფლება კოვიდსიტუაციის შეცვლაზე პასუხისმგებლობას ისევ არ აიღებს? 

არ მინდა ამის დაკონკრეტება, არ მაქვს კარგი მოლოდინი. ეს რაოდენობა გაიზრდება, სკეპტიკური მოლოდინი მაქვს…

სულ 8 ათასი საწოლი გვაქვს და სწორი ორგანიზების შემთხვევაში, მაქსიმალურად 12 ათასის ორგანიზება შეიძლება. გასათვალისწინებელია ადამიანური რესურსიც.

ბერძნულ–რომაული სტილით მოჭიდავე ტარიელ შავაძე 25 წელია გერმანიაში ცხოვრობს. იგი მსოფლიოს ორგზის ჩემპიონია და ახლა გერმანიაში, ქალაქ შტუტგარტში გერმანელ სპორტსმენებს წვრთნის სპორტის ამ სახეობაში.

23 ოქტომბერს 51 წლის ტარიელ შავაძე მსოფლიო ჩემპიონი გახდა ვეტერან სპორტსმენებს შორის და  ამ გამარჯვების აღსანიშნავად საქართველოს დროშით შემოურბინა ტატამს.

ტარიელის სპორტული კარიერა ხულოს მუნიციპალიტეტის სოფელ ირემაძეებში დაიწყო, როცა ტყუპისცალ ძმასთან ერთად, 1983 წელს ჭიდაობის წრეზე მიიყვანეს.

„ჩვენი პირველი მწვრთნელი ლევან შავაძე იყო, რომელმაც ხულოში ორწლიანი ვარჯიშის შემდეგ თბილისში თავის მწვრთნელთან, თამაზ კიკნაძესთან გაგვიშვა“ – იხსენებს ტარიელ შავაძე.

1985 წლიდან ძმები თბილისში ერთად ვარჯიშობდნენ, ორივე აქტიური სპორტსმენი იყო, 90-იან წლებში კი ძმების გზები გაიყო.

„ორივე საქართველოს მრავალგზის ჩემპიონები ვიყავით. 90-იან წლებში გავიყავით, გაჭირვება რომ დაიწყო. მამაჩემს არ შეეძლო ორი სტუდენტის რჩენა, ჩემ ძმას კი არ უნდოდა საქართველოდან წამოსვლა“ – გვიამბობს ტარიელი.

საბოლოოდ, ტარიელის ტყუპისცალმა, ფრიდონ შავაძემ საქართველოში დარჩენა და დაქორწინება გადაწყვიტა, ხოლო ტარიელი საზღვარგარეთ წავიდა სპორტული კარიერის გასაგრძელებლად.

„არ მინდოდა სპორტისთვის თავი დამენებებინა, ამიტომ საბჭოთა კავშირის დაშლის შემდეგ ბელარუსში წავედი.

მაშინ საქართველოში არანაირი შესაძლებლობა არ იყო, მწვრთნელებმა თავი დაანებეს თავიანთ საქმეს, ყველა შველას ითხოვდა, ძალიან ცუდ პერიოდში მოვხვდი, როცა 20 წლის ვიყავი და სპორტის გაგრძელება მინდოდა“ – ნაღვლიანად ამბობს ტარიელი.

იგი გვიამბობს, რომ ბელარუსში ქვეყნის ექვსგზის ჩემპიონი გახდა, 1991 წლიდან ყოველწლიურად იგებდა ქვეყნის ჩემპიონატს და ერთხელაც შეთავაზება მიიღო – კარიერა ევროპაში გაეგრძელებინა.

 „ერთ–ერთმა კლუბის პრეზიდენტმა კონტრაქტით გერმანიაში ჭიდაობა შემომთავაზა, აქედან დაიწყო ჩემი გერმანიაში ცხოვრების ისტორია“ – გვიყვება ის. 

 იქიდან მოყოლებული ტარიელ შავაძე გერმანიაში ცხოვრობს. კლუბს ხელმძღვანელობს, თავადაც ვარჯიშობს და პროფესიონალ გერმანელ მოჭიდავეებს ავარჯიშებს.

2017 წელს, 47 წლის ასაკში ტარიელ შავაძე მსოფლიო ჩემპიონი გახდა. ეს ბულგარეთში, ქალაქ პლოვდივში გამართულ ჩემპიონატზე მოხდა.

„არ ვიცნობდი კონკურენტებს, დაძაბული შეხვედრა მქონდა ფინალში, მინიმალური ანგარიშით გავიმარჯვე და დავამარცხე სომეხი მოწინააღმდეგე, ფინალამდე სამივე შეხვედრაში თავისუფლად გავიმარჯვე და გავხდი მსოფლიო ჩემპიონი“ – იხსენებს ტარიელი.  

მეორედ კი მსოფლიო ჩემპიონის სტატუსი ტარიელ შავაძემ წელს, 23 ოქტომბერს მოიპოვა საბერძნეთში გამართულ ვეტერანთა ჩემპიონატზე. ამბობს, რომ ამ ჩემპიონატისთვის განსაკუთრებულად ემზადებოდა:

„დარწმუნებული ვიყავი, რომ მე იქ წასაგებად არ ვიყავი წასული. შეიძლება ითქვას, რომ რეკორდულ შედეგს მივაღწიე. ჯერ არავინ არ გამხდარა მსოფლიო ჩემპიონი, რომელიც 16 წუთის ნაცვლად ოთხ შეხვედრას 2 წუთსა და 48 წამს მოანდომებდა. არცერთი ტექნიკური ქულა არ დამიკარგავს, როგორც იტყვიან „გავაკარ ბეჭებზე!“ – ჰყვება ტარიელი.  

ტარიელ შავაძემ პირველი შეხვედრა ფრანგ მეტოქეს მოუგო, რომელიც 2017 წელს ანგარიშით – 3:0 ხოლო ახლა – 9:0-ით დაამარცხა. მეორე შეხვედრა ირანელ სპორტსმენთან ჰქონდა:

 „25 წამში გავაკარ ბეჭებზე, ტექნიკური ილეთებით. ტრიბუნაზე ხალხი დგებოდა და ტაშს უკრავდა. 

მესამე შეხვედრაზე 9:0 დავამარცხე შვედეთის წარმომადგენელი, მეოთხე შეხვედრაზე უძლიერესსა და ძალიან ცნობილ ამერიკელ სპორტსმენს, სტეფან ჰორტონს შევხვდი და 30 წამში სუფთა გამარჯვება მოვიპოვე“ – ემოციურად გვიამბო ორგზის მსოფლიო ჩემპიონმა.  

„რას ნიშნავს ჩემთვის ორგზის მსოფლიო ჩემპიონობა? ძალიან კმაყოფილი ვარ, რომ ორჯერ ავაფრიალე მსოფლიოში ქართული დროშა“ – ამბობს ტარიელი. 

ამჯერად ტარიელის მწვრთნელი ტყუპისცალი ძმის, ფრიდონის შვილი, გიორგი შავაძე იყო. ტარიელი ამბობს, რომ მისთვის ძალიან მნიშვნელოვანი იყო გიორგის მხარდაჭერა.

„პირველი ვინც გამარჯვებას მილოცავენ ჩემი ძმა და ძმისშვილები არიანო“ – ამბობს ტარიელი.

მისი ერთგული მხარდამჭერები არიან მოსწავლეებიც. „მწვრთნელმა უნდა იჭიდავოს კარგად, რომ მერე მოსწავლეებმა დაუჯერონ და მეტად შედეგიანები გახდნენ“ – გვითხრა მან.

მიუხედავად იმისა, რომ წლებია გერმანიაში ცხოვრობს, ტარიელი კვლავ საქართველოს მოქალაქეა.

„გეტყვით, 25 წლის მანძილზე რატომ არ მივიღე გერმანიის მოქალაქეობა. მე ვარ აქ მცხოვრები და არა გერმანიის მოქალაქე. მინდოდა, რომ საქართველოს სახელით გამოვსულიყავი და ჩვენი დროშა, ჩვენი ქვეყანა მესახელებინა.

საქართველო ძალიან პატარა ქვეყანაა… ჭიდაობა ჩვენი სპორტია, ამიტომ არ მივიღე გერმანიის მოქალაქეობა, მინდოდა საქართველოსთვის გამარჯვება მომეტანა“ – ეს ტარიელ შავაძემ ინტერვიუს განმავლობაში რამდენჯერმე, ხაზგასმით გაიმეორა.  

ტარიელ შავაძემ გვითხრა, რომ გერმანიაში ცხოვრების განმავლობაში 30-მდე გერმანიის ჩემპიონის და მსოფლიოს სამგზის ჩემპიონის მწვრთნელი იყო.

„90-იან წლებში არ გამიმართლა, მაგრამ შრომამ ორჯერ მსოფლიო ჩემპიონობა მომიტანა. მოვუწოდებ ყველა სპორტსმენს ბოლომდე იბრძოლონ და შედეგი აუცილებლად იქნება.  სპორტში არ შეიძლება არცერთი ვარჯიშის გაცდენა, დიდი მნიშვნელობა აქვს კვებას“ – ამბობს ტარიელ შავაძე.  

ტარიელს სამი შვილი და ქართველი მეუღლე ჰყავს, ოჯახთან ერთად ცხოვრობს გერმანიაში. ამბობს, რომ ბავშვები დადიან როგორც სკოლაში, ასევე სპორტზე და მთელი ოჯახი სპორტულად ცხოვრობს.  „ბათუმელების” შეკითხვაზე, აპირებს თუ არა საქართველოში საცხოვრებლად დაბრუნებას ოჯახთან ერთად შეყოვნდა – „დრო გვიჩვენებს, როგორ იქნება სამომავლოდ, მაგრამ დღეს …“

 

 

სტატისტიკის ეროვნული სამსახურის მონაცემებით, ფასები საგრძნობლად გაიზარდა ბოლო ერთი წლის განმავლობაში საკვებ პროდუქტებზე. ბოსტნეული 43%-ით გაძვირდა, ზეთი კი 31,6%-ით.

ბოლო ორ თვეში მნიშვნელოვნად გაძვირდა ბავშვთა კვების პროდუქტები და საფენებიც.

გიგა გოგინაშვილი, რომელიც მეუღლესთან ერთად ორ შვილს ზრდის, ამბობს, რომ მაგალითად, „პამპერსის“ ფირმის საფენებისა და ბავშვთა საკვები პროდუქტების გაძვირება მათთვის მძიმე ტვირთად იქცა.

„ორი თვის წინ 37 ლარად ვყიდულობდი „პამპერსს“ 94-ცალიანი შეფუთვით, ახლა 56 ლარი ღირს. მომატებულია ფასები ასევე სხვადასხვა ფაფაზე, ჰიპის, ჰუმანას ფაფებზე მაგალითად. პრაქტიკულად შეუძლებელია უკვე ფასების კონტროლი. ერთი წლის წინ ჰიპის ხილფაფები 125 გრამიანი ქილით 3, 20 – 3, 35 ლარი ღირდა. ახლა იგივე პროდუქტი 5 ლარამდე ღირს. არის რძიანი და ურძეო ფაფები. ეგენიც ორივე 2, 3 ლარით გაძვირდა“, – ამბობს გიგა.

ბავშვთა კვების პროდუქტებისა და პამპერსის ფასის გადასამოწმებლად რამდენიმე სხვადასხვა აფთიაქს მივაკითხეთ ბათუმში.

„პამპერსის“ 94 ცალიანი შეფუთვის ფასი სხვადასხვა აფთიაქში სხვადასხვა იყო, ძირითადად 60 ლარამდე:

• ავერსი – 60,00 ლარი (მოქმედებს დროებითი ფასდაკლება);
• ჯი პი სი – 59,00 ლარი (მოქმედებს დროებითი ფასდაკლება);
• იმპექსი – 53,00 ლარი.
• ჰიპის ხილფაფებისა და ბოსტნეულის პიურეს ფასი 125 გრამიანი ქილით – სხვადასხვა აფთიაქში ახლა 4,50 – 4, 70 ლარი ღირს.

ფაფების ფასი პე ეს პეს სააფთიაქო ქსელში ასეთია:

ურძეო ფაფები:

• ნორდიკის 600 გრამიანი ხუთი სახის შერეული მარცვლის ფაფა – 12,00 ლარი;
• ჰიპის მრავალმარცვლიანი ურძეო შვრიის ფაფა – 10, 10 ლარი;
• ჰეინცის ურძეო ფაფა 200 გრამიანი შეფუთვით 8,07 (მოქმედებს ფასდაკლება

რძიანი ფაფები:

• ჰეინცის 200 გრამიანი ფაფა ბანანით და მარწყვით – 9, 70 ლარი;
• ჰეინცის წიწიბურას 200 გრამიანი ფაფა – 10,08 ლარი (მოქმედებს ფასდაკლება);
• ჰუმანას 200 გრამიანი 5 სახეობის მარცვლეულის რძიანი ფაფა ბანანით – 9, 80 ლარი.

თეო გურგენიძეს 6 თვის შვილი ჰყავს. გვეუბნება, რომ ბავშვის საფენები განსაკუთრებით ახალგაზრდა მშობლებისთვის მძიმე ტვირთია.

„ვისაც ჩვილი არ ჰყავს, შეიძლება იფიქროს, რომ 94 ცალიანი პამპერსის შეფუთვა საკმაოდ ბევრია, ხანდახან ფასდაკლებისას 36, 37 ლარი ღირს პამპერსი, მაგრამ ესეც ძვირია. შეიძლება ჩვილს დღე-ღამეში 10 საფენიც კი დასჭირდეს და ეს 94 ცალიანი შეფუთვა რამდენიმე გჭირდება თვის განმავლობაში, ერთი არ გყოფნის“, – ამბობს თეო გურგენიძე.

დღეს, 4 ნოემბერს, ბათუმში ექიმების ერთმა ჯგუფმა ქვეყნის მესამე პრეზიდენტის, პატიმრობაში მყოფი მიხეილ სააკაშვილის მხარდასაჭერი აქცია გამართა. მიხეილ სააკაშვილ 35-ე დღეა შიმშილობს და როგორც მისი მკურნალი ექიმები ამბობენ, მდგომარეობა მძიმდება.

ბათუმელი ექიმები საქართველოს ხელისუფლებას სთხოვენ გააცნობიეროს საფრთხეები, რაც შეიძლება მიხეილ სააკაშვილის ჯანმრთელობის მდგომარეობის დამძიმებამ გამოიწვიოს და ის რეპუტაციული ზიანი, რაც ამით ქვეყანას მიადგება.

ექიმების მიერ გავრცელებულ ტექსტს უცვლელად გთავაზობთ:

მედიცინა ჰუმანური დარგია და მისი მთავარი მიზანი ადამიანის სიცოცხლის დაცვა და შენარჩუნებაა. სახელმწიფო მოწყობის ნებისმიერი მოდელის პირობებში ექიმი თავისუფალი უნდა იყოს პოლიტიკური გავლენებისა და წნეხისგან და უნდა მოქმედებდეს ადამიანის სიცოცხლის, როგორც კაცობრიობის უმთავრესი ღირებულების, გაცნოებიერებით.

კაცობრიობის არსებობის მანძილზე, ყველა ის შემთხვევა, როდესაც ქვეყნის პირველი პირი და ზოგადად მოქალაქე, განზრახ ქმედების თუ უმოქმედობის გამო ისჯებოდა სიცოცხლის ხელყოფით, ისტორიას რჩებოდა შავ ლაქად და განსაკუთრებით უარყოფითად აისახებოდა ქვეყნის მომავალ განვითარებასა და ცივილურ სამყაროში ინტეგრაციაზე. ისტორია გვაჩვენებს, რომ აღნიშნულის სრულად გაცნობიერებას წლები სჭირდება, დამდგარ ზიანს და შელახულ რეპუტაციას კი – ხშირად დიდი ძალისხმევაც ვერ აღადგენს.

სწორედ აღნიშნულის გათვალისწინებით, ვითვალისწინებთ რა იმ ფაქტს, რომ შიმშილობის 35-ე დღეს ორგანიზმი შეუქცევადი დაზიანებების მიჯნაზეა და ამის ცოდნის პირობებში ჩვენი უმოქმედობა პაციენტის განსაცდელში მიტოვების ტოლფასია, რაც როგორც მორალურად, ასე იურიდიულად დასჯადი ქმედებაა. ვთვლით, მიუხედავად ჩვენი პოლიტიკური გემოვნებისა და შეხედულებებისა, ქვეყნის თავისუფალი მოქალაქეები და განსაკუთრებით ექიმები, უნდა დავდგეთ ქვეყნის მესამე პრეზიდენტის სიცოცხლის სადარაჯოზე.

მოვუწოდოთ და ვთხოვოთ ქვეყნის ხელისუფლებას, პრეზიდენტს, პარლამენტს – მიხეილ სააკაშვილის ჯანმრთელობისთვის შექმნილი საფრთხეების გაცნობიერებით დაუყოვნებლივ განხორციელდეს მისი გადაყვანა მულტიპროფილურ სამედიცინო დაწესებულებაში, სადაც მას, როგორც ამ ქვეყნის მოქალაქეს, ექნება შესაძლებლობა გამოიყენოს კანონმდებლობით გათვალისწინებული ჯანმრთელობის და სიცოცხლის დაცვის უფლება.

კიდევ ერთხელ, ხაზგასმით აღვნიშნავთ, რომ აღნიშნული მოწოდება/თხოვნა – სრულიად აპოლიტიკურია, არ ეწინააღმდეგება სახელმწიფოებრივ ინტერესებს, არ არღვევს არც ერთ საკანონმდებლო ნორმას და მისი არშესრულების შემთხვევაში კი პირიქით, საფრთხე ექმნება ქვეყნის მესამე პრეზიდენტის სიცოცხლეს და ჩვენ ყველა ამ დანაშაულის თანამონაწილე გავხდებით.

ბათუმში, ევროპის მოედანზე შეკრებილი ექიმების აზრით, მიხეილ სააკაშვილი პოლიტიკური ნიშნით არ უნდა იდევნებოდეს და მას აქვს უფლება სამედიცინო მომსახურების უფლება.

„რახან დემოკრატიული სახელმწიფოს შენებაზე გვაქვს პრეტენზია, უნდა დავიცვათ ყოფილი პრეზიდენტების ჯანმრთელობა, მიუხედავად პოლიტიკური შეხედულებისა და გადაცდომებისა.

ყოფილსაც და მოქმედ პრეზიდენტსაც აქვს უფლება, მიიღოს ადეკვატური და მაღალი ხარისხის სამედიცინო მომსახურება, ნებისმიერ, მითუმეტეს თავის ქვეყანაში,” – გვითხრა ექიმმა დავით მამულაძემ. იგი ბათუმის რესპუბლიკური კლინიკის ექიმი-ალერგოლოგ-თერაპევტია. 

მისი თქმით, სააკაშვილი უნდა გადაიყვანონ ისეთ მაღალტექნოლოგიურ კლინიკაში, სადაც მისთვის ყველა საჭირო სერვისი იქნება ხელმისაწვდომი:

„ციხისა და და სამხედრო კლინიკები მაინც სპეციფიკურია და აქედან გამომდინარე, შეიძლება ის სერვისი ვერ მიეწოდოს, რაც მისთვის იმ წუთისთვის აუცილებელი იქნება,” – აღნიშნა დავით მამულაძემ.

____

მიხეილ სააკაშვილი 35-ე დღეა, რაც შიმშილობს. მისი თანაპარტიელები და მკურნალი ექიმები ამბობენ, რომ მდგომარეობა მძიმდება.

სპეციალური პენიტენციური სამსახური კი აცხადებს, რომ სიმართლეს არ შეესაბამება გავრცელებული ინფორმაცია, თითქოს მე-12 პენიტენციურ დაწესებულებაში ექიმების განსაკუთრებული მობილიზებაა და დაწესებულების მედპერსონალი მსჯავრდებულ მიხეილ სააკაშვილის ჯანმრთელობის მდგომარეობას ვეღარ მართავს.

ამასთან, უწყებაში ადასტურებენ, რომ ციხეში შევიდა “ვივამედის” ანგიოლოგი და დაგეგმილია პულმონოლოგის პრევენციული ხასიათის ვიზიტი.

2021 წლის ოქტომბერში ქართველმა დიზაინერმა, ფრანგული მოდის სახლის – Balenciaga-ს შემოქმედებითმა ხელმძღვანელმა – დემნა გვასალიამ ინტერვიუ მისცა interview magazine-ის ცნობილ მოდის ჟურნალისტს, ლეონ ტეილის. 

გვასალია ინტერვიუში მისი ცხოვრების რამდენიმე მნიშვნელოვან და გარდამტეხ მომენტს შეეხო. 

„მე ეკონომიკის ფაკულტეტი დავამთავრე, რადგანაც მამას უნდოდა, ბიზნესმენი ვყოფილიყავი… ათი წლის შემდეგ მან საბოლოოდ აღიარა, რომ დიზაინერობა არის სამსახური და არა მხოლოდ მდიდარი გოგონებისთვის. ეს არის სამსახური, რომლითაც შეგიძლია დაფარო გადასახადები და გააბედნიერო სხვები“, – ამბობს დიზაინერი

იგი ჰყვება თავის ბავშვობაზეც: 

„მე გავიზარდე საბჭოთა კავშირში. მოდის ჟურნალები ნანახიც არ მქონდა. 1991 წელს, საბჭოთა კავშირის დაცემის შემდეგ, ჩვენ გვქონდა „ვოგისა“ და „უესთერნ ფეშენის“ ჟურნალთა ასლები. ასე დავიწყე მოდის აღმოჩენა, საოცნებო სამყაროსი, რომლის არსებობის შესახებაც არაფერი ვიცოდი“. 

გვასალია იხსენებს თავის პირველ ემოციებსაც, დაკავშირებულს ტანისამოსთან.

ჟურნალისტის კითხვაზე – რა იყო მისი საყვარელი ტანსაცმელი, იგი პასუხობს:

„წითელი ქურთუკი, განკუთვნილი გოგოსთვის, რომლის შეძენაზეც მშობლები არ მთანხმდებოდნენ და მხოლოდ მას შემდეგ მიყიდეს, რაც მაღაზიაში დიდი ამბები დავატრიალე.

ის მინდოდა არა იმისთვის, რომ ჩამეცვა, არამედ იმისთვის, რომ უბრალოდ მეყურებინა, რადგან მასში სილამაზე დავინახე და იგი უბრალოდ მჭირდებოდა. ის იყოს ჩემთვის ხელოვნების ნიმუშივით. რაღაც დროის მერე მშობლებმა ქურთუკი გააქრეს, იმის შიშით, რომ მე მას ჩავიცვამდი და გეიდ ვიქცეოდი, რაც ისედაც მოხდა“. 

გვასალია ინტერვიუში იმაზეც საუბრობს, თუ რას მიიჩნევს საკუთარ როლად მოდის თანამედროვე სამყაროში:

„მე ვგრძნობ, რომ ჩემი გამოწვევა და ვალდებულება დღეს, როგორც დიზაინერისთვის, გამოიხატება კითხვით – რა არის სილამაზე? რატომ ვიცავთ 50 წლის წინ შემოღებულ წესებს? მე არ გავზრდილვარ ვერსალში. მე ვარ დევნილი. მე მჭირდებოდა ყველაფერში მეძებნა სილამაზე“. 

2 ნოემბერს „ბალენსიაგამ“ 2022 წლის გაზაფხულის კოლექციის კამპანიის ვიდეო გამოაქვეყნა „იუთუბზე“.

ქუთაისის საერთაშორისო აეროპორტს ახალი შიდა მიმართულების ფრენა ემატება.

10 ნოემბრიდან, კვირაში ერთხელ, ყოველ ოთხშაბათს, კომპანია Vanilla Sky შეასრულებს რეისებს მესტია-ქუთაისის [12:00 საათზე] და ქუთაისი-მესტიის [13:30 საათზე] მიმართულებით.

ერთი მიმართულებით ავიაბილეთის ღირებულება 50 ლარია.

აქამდე მესტიის მიმართულებით ფრენა მხოლოდ ნატახტრიდან იყო შესაძლებელი.

კორონავირუსით გარდაიცვალა ბაღდათის მუნიციპალიტეტის ბოლო მოწვევის საკრებულოს წევრი, 38 წლის მამუკა გორგოძე.

მუნიციპალიტეტის საკრებულოს პრესსამსახურის ინფორმაციით, მამუკა გორგოძე კორონავირუსს შინ მკურნალობდა, მდგომარეობის დამძიმების შემდეგ ის კლინიკაში გადაიყვანეს, სადაც კორონავირუსის გართულების შედეგად გარდაიცვალა.

ბაღდათის მუნიციპალიტეტის საკრებულოში მამუკა გორგოძე ფრაქცია „ქართული ოცნება-კონსერვატორების“თავმჯდომარე იყო, ხელმძღვანელობდა ეკონომიკური პოლიტიკის, ინფრასტრუქტურისა და ქონების მართვის საკითხთა კომისიას.

2021 წლის თვითმმართველობის არჩევნებზე კი საკრებულოში პარტიიდან – „საქართველოსთვის” იყრიდა კენჭს.

მამუკა გორგოძე ოთხი შვილის მამა იყო.

___

ბოლო 24 საათში კოვიდით საქართველოში 53 ადამიანი დაიღუპა. ამის მიუხედავად, ბოლო 24 საათში ქვეყანაში მხოლოდ 3 569 ადამიანი აიცრა.

4 ნოემბრის მონაცემებით, გასულ 24 საათში აჭარაში 193 ახალი შემთხვევა დადასტურდა.

ამავე პერიოდში რეგიონში 5 ადამიანი გარდაიცვალა კორონავირუსით.

დღეის მონაცემებით, აჭარის კოვიდკლინიკებშია 545 პაციენტი, კოვიდსასტუმროში იმყოფება 230 ინფიცირებული.

4 ნოემბრის მონაცემებით, საქართველოში კოვიდის 5 206 ახალი შემთხვევა დადასტურდა, 53 პაციენტი გარდაიცვალა.

4 ნოემბრის მონაცემებით, საქართველოში დადასტურდა კოვიდის  5 206 ახალი შემთხვევა. ჩატარდა 48 615 ტესტი კორონავირუსზე.

გასულ 24 საათში 53 პაციენტი გარდაიცვალა კოვიდით.

დღეს ქვეყანაში გამოვლენილი ინფიცირების 5 206 ახალი შემთხვევიდან თბილისში გამოვლენილია 1 885 შემთხვევა, აჭარაში – 193, იმერეთში – 979, ქვემო ქართლში – 360, შიდა ქართლში – 428, გურიაში – 142, სამეგრელო – ზემო სვანეთში – 378, კახეთში – 530, მცხეთა-მთიანეთში – 118, სამცხე-ჯავახეთში – 157, რაჭა-ლეჩხუმსა და ქვემო სვანეთში -36.

ამ ეტაპზე ინფიცირების მიმდინარე აქტიური შემთხვევაა 49 619, მათგან 6 648 ადამიანი მკურნალობს საავადმყოფოში.

3 ნოემბრის მდგომარეობით, დადებითობის დღიური მაჩვენებელი არის 10.71%, ბოლო 14 დღის მანძილზე – 9.34% ხოლო 7 დღის მანძილზე – 9.77%.

საქართველოს მთავრობის 2021 წლის 2 ნოემბრის დადგენილებით, სახელმწიფო სტიპენდია დაენიშნებათ:

ოლიმპიური და პარალიმპიური თამაშების ჩემპიონებს, პრიზიორებს, საჭადრაკო ოლიმპიადებში გამარჯვებულებს, მსოფლიოსა და ევროპის ჩემპიონებს, სახალხო არტისტებს, სახალხო მხატვრებსა და შოთა რუსთაველის სახელობის პრემიის ლაურეატებს.

ამავე დადგენილების მიხედვით, სახალხო არტისტებს, სახალხო მხატვრებსა და შოთა რუსთაველის სახელობის პრემიის ლაურეატებს დაენიშნოთ ყოველთვიური სტიპენდია 600 ლარის ოდენობით.

სახალხო არტისტებს ან სახალხო მხატვრებს, რომელთაც იმავდროულად მინიჭებული აქვთ შოთა რუსთაველის სახელობის პრემიის ლაურეატის წოდება, ყოველთვიური სტიპენდიის ოდენობა ორივე წოდებისათვის განესაზღვრებათ ასევე 600 ლარით.

ოლიმპიური და პარაოლიმპიური თამაშებისა და საჭადრაკო ოლიმპიადების პრიზიორებს დაენიშნებათ ყოველთვიური სტიპენდია შემდეგი ოდენობებით:

ვერცხლის მედლის მფლობელებს − 800 ლარი

ბრინჯაოს მედლის მფლობელებს − 500 ლარი

საჭადრაკო ოლიმპიადაში გამარჯვებულს, რომელიც იმავდროულად არის საჭადრაკო ოლიმპიადის პრიზიორი (ვერცხლის ან/და ბრინჯაოს მედლის მფლობელი), ყოველთვიური სტიპენდიის ოდენობა განესაზღვრებათ 2000 ლარის ოდენობით;

საჭადრაკო ოლიმპიადის ვერცხლის მედლის მფლობელებს კი, რომლებიც იმავდროულად საჭადრაკო ოლიმპიადის ბრინჯაოს მედლის მფლობელები არიან, ყოველთვიური სტიპენდიის ოდენობა განესაზღვრებათ 800 ლარის ოდენობით.

ზემოთ ჩამოთვლილი პირების სტიპენდიისათვის საჭირო საბიუჯეტო სახსრები გამოიყოფა საქართველოს კულტურის, სპორტისა და ახალგაზრდობის სამინისტროსათვის წლიური საბიუჯეტო კანონით გათვალისწინებულ ასიგნება­თა ფარგლებში.

2 ნოემბრის ამ დადგენილებას ხელს პრემიერ-მინისტრი ირაკლი ღარიბაშვილი აწერს.

„ჩვენ საკუთარ საფლავს ვთხრით“, – გააფრთხილა გაეროს გენერალურმა მდივანმა, ანტონიო გუტერეშმა გლაზგოში გაეროს კლიმატის კონფერენციაზე შეკრებილი მსოფლიო ლიდერები. 

მან ხაზგასმით აღნიშნა, რომ კაცობრიობის დამოკიდებულება წიაღისეული საწვავის მიმართ უბიძგებს მას უფსკრულისკენ. 

„ექვსი წელი პარიზის კლიმატის შეთანხმების ხელმოწერიდან იყო ყველაზე ცხელი ექვსი წელიწადი დაკვირვებათა ისტორიაში,“ –  გუტერეშმა. მისი თქმით, დღეს კაცობრიობა „მკაცრი არჩევანის“ წინაშე დგას – ან შეაჩერებს ამ პროცესს, ან კრიზისი შეაჩერებს სიცოცხლეს პლანეტაზე. 

„საკმარისია ბიომრავალფეროვნების დაზიანება, საკმარისია საკუთარი თავის მოკვლა ნახშირბადის გამონაბოლქვით, საკმარისია ბუნებასთან ისე მოპყრობა, როგორც უნიტაზთან,  საკმარისია წვა, ბურღვა და სულ უფრო და უფრო ღრმად თხრა. ჩვენ თვითონ ვუთხრით საფლავს საკუთარ თავს“, – განაცხადა გაეროს ხელმძღვანელმა.

ანტონიო გუტერეშმა ხაზი გაუსვა, რომ ზღვის დონე ორჯერ უფრო სწრაფად იზრდება, ვიდრე 30 წლის წინ, ოკეანეები უფრო სწრაფად თბება და ამაზონის ტროპიკული ტყეების ნაწილი ატმოსფეროში უფრო მეტ ნახშირბადს გამოყოფენ, ვიდრე შთანთქავენ. 

„თუ მოუსმენთ ბოლო განცხადებებს კლიმატის ცვლილებასთან დაკავშირებით მიღებული ზომების შესახებ, შეიძლება ისე ჩანდეს, რომ ჩვენ სიტუაციის შეცვლის გზაზე ვართ. ეს ილუზიაა. ბოლო ანგარიში აჩვენებს, რომ ვალდებულებების შესრულების მიუხედავად, მსოფლიო უწინდებურად განწირულია ტემპერატურის კატასტროფული – 2,7- გრადუსიანი მატებისთვის“ – განაცხადა ანტონიო გუტერეშმა. 

იგი ამბობს, რომ მხარს უჭერს კლიმატის დასაცავად შექმნილ შეუჩერებელ აქტივისტთა ჯგუფს, რომელსაც ახალგაზრდობა ხელმძღვანელობს: „მათი რიცხვი სულ უფრო და უფრო იზრდება. მათი ხმები სულ უფრო ძლიერდება და გარწმუნებთ, უკან არ დაიხევენ. მე მათ მხარს ვუჭერ.“

 

პროკურატურის ინფორმაციით, სასამართლომ დამნაშავედ სცნო ახალგაზრდა კაცი, რომელმაც 2021 წლის 17 მაისს, ყოფილი ცოლი ფიზიკურად და სიტყვიერად შეურაცხყო. დაზარალებული ჰყვება, რომ მაისში თბილისში თავის მეგობარ გოგოსთან ერთად იმყოფებოდა, როცა ყოფილმა ქმარმა დაურეკა და შეხვედრა სთხოვა.

“17 მაისს მოხდა ზუსტად, ბათუმიდან ჩავედი შეყვარებულთან და კიდევ ერთ მეგობართან ერთად. ჩემი ყოფილი ქმარი დამიკავშირდა და გადავწყვიტეთ გველაპარაკა. შევხვდით სამივე სადგურის ტერიტორიაზე, სადაც შეკამათებისას ჩემკენ წამოიწია, რამდენჯერმე დამარტყა, ჩემი დახრჩობაც სცადა, ძალადობის კვალიც მეტყობოდა. სიტყვიერი შეურაცხყოფაც მოგვაყენა, დაგვემუქრა მოკვლით მეც, ჩემს მეგობარ გოგოსაც.

ითხოვდა, რომ ისევ მასთან ვყოფილიყავი, შენ ისევ ჩემი ცოლი ხარო, ისევ ჩემთან ერთად უნდა იყო ან მოგკლავ და თავსაც მოვიკლავო. ექვსი წელია დაშორებული ვართ.

დამემუქრა ბათუმში ჩამოვალ და შვილს წაგართმევო. ბავშვს მისი გვარიც კი არ აქვს დაბადების მოწმობაში, ამის სურვილი თავად არ გამოუჩენია. სულ ხუთჯერ ჰყავს ბავშვი ნანახი,” – ჰყვება დაზარალებული. – “იმ წუთში დასახმარებლად ვერავის მივმართე, მერე უკვე ბავშვზე იმუქრებოდა, ბათუმში აპირებდა ჩამოსვლას. გამოვიქეცი ბათუმში და აქ სათემო ორგანიზაციას, იდენტობა იუსს დავუკავშირდი, საიდანაც გამყვნენ საიაში, იქიდან კი საჩივარი თბილისში გადააგზავნეს, რადგან იქ მოხდა შემთხვევა”.

პროკურატურის ინფორმაციით, 25 წლის კაცი დამნაშავედ სცნეს სისხლის სამართლის კოდექსის 126′-1 და 11′-151-2დ მუხლებით, რაც ნიშნავს ოჯახში ძალადობას და მუქარას ოჯახის წევრის მიმართ.

ახალგაზრდა კაცს დანაშაულთა ერთობლიობით განესაზღვრა ერთი წლითა და ექვსი თვით თავისუფლების აღკვეთა.

კოვიდზე აცრილთა რაოდენობა ბათუმში მოზრდილი მოსახლეობის 60%-ს შეადგენს, თუმცა აჭარის სხვა მუნიციპალიტეტებსა და სოფლებში ვაქცინირებულთა პროცენტული რაოდენობა ამდენივე არ არის.

აჭარის ჯანდაცვის სამინისტროს ცნობით, მთლიანად აჭარაში 2 დოზით აცრილია მოსახლეობის 29.1%, ერთი დოზით – 32.3%.

რა უშლის ხელს ვაქცინაციის პროცესს აჭარის სოფლებში, რა ტიპის სამუშაოებს ეწევა ჯანდაცვის სამინისტრო აცრის ტემპის დასაჩქარებლად და რა ელის რეგიონს, თუ ვაქცინაციის ტემპი არ აჩქარდება? – კოვიდვაქცინაციასთან დაკავშირებულ ამ და სხვა კითხვებზე „ბათუმელები”  აჭარის ჯანდაცვის მინისტრს ნინო ნიჟარაძეს ესაუბრა.

• თქვენ ამბობთ, რომ ინფიცირებისა და სიკვდილიანობის კლებადი დინამიკა აჭარაში უკავშირდება რეგიონში ვაქცინაციის მაღალ მონაცემებს. აგვიხსენით, სხვა რეგიონებისგან განსხვავებული რა ვითარება გვაქვს აჭარაში?

ეპიდემიოლოგიურად სტაბილური ვითარებაა აჭარაში. 4%-ის ფარგლებში მერყეობს ჩვენი დაინფიცირების მაჩვენებელი.

ეს ციფრები ცვალებადია კვირის განმავლობაში. მართალია, ბათუმში მოზრდილი მოსახლეობის 60% აცრილია, მაგრამ ეს ზღვარი უკვე აღარ მიიჩნევა საუკეთესო მაჩვენებლად.

როცა ვაქცინაციის ეროვნული გეგმა შემუშავდა, მაშინ მოსახლეობის 60%-ის აცრა იყო სასურველი მაჩვენებელი, მაგრამ ახლა ამ ციფრმა 80%-მდე აიწია.

ჩვენ სხვა ქვეყნების მონაცემებს ვეყრდნობით, როცა ვამბობთ, რომ მინიმუმ 60% მაინც უნდა იყოს აცრილთა რაოდენობა. საქმე ისაა, რომ სადაც მოზრდილი მოსახლეობის 60% იყო აცრილი, იქ ავადობის შემდგომი ტალღები კარგად წარიმართა და ვაქცინაციის სასურველი ზღვარი ახლა ასწიეს – ხალხის მეტ რაოდენობას ცრიან.

მოსახლეობის 60%-ის აცრა დაინფიცირების შემდგომი ტალღების წარმოქმნისგან ვერ გვიცავს.  მუნიციპალიტეტებში ბათუმის მსგავსად 60%-იანი აცრისთვის არ მიგვიღწევია.

• მოზრდილი მოსახლეობის აცრილი ნაწილის 60% ბათუმზე მოდის. გამოდის, აჭარაში იმუნიზაციის მაღალი მაჩვენებელიც ამის ხარჯზეა მაღალი. რამდენი ადამიანი აიცრა, მაგალითად, აჭარის მთის სოფლებში – თუ გაქვთ დათვლილი, აჭარის აცრილი მოსახლეობის რა პროცენტი მოდის ბათუმზე და რა – მუნიციპალიტეტებზე?

ახლა მიდის ინტენსიური მუშაობა იმის აღსაწერად და დასადგენად, ადგილობრივ მცხოვრებ მოქალაქეებს შორის ვინ არის აცრილი და ვინ არა. ბათუმში ვაქცინირებულთა შორის გვყავს მუნიციპალიტეტებიდან ჩამოსული მოსახლეობაც, რომლებიც აჭარის მუნიციპალიტეტებსა და სოფლებში ცხოვრობენ, იქ არიან რეგისტრირებულები, უბრალოდ, ბათუმში აიცრნენ.

ყველაზე ცოტა, აჭარის სხვადასხვა მუნიციპალიტეტიდან, სოფლებიდან, 20% მაინც არის აცრილი ბათუმში. 2 თვეა დავიწყეთ მუნიციპალიტეტებსა და სოფლებში ვიზიტები მოსახლეობასთან შესახვედრად, ვაქცინაციის პროცესზე დასაკვირვებლად და პროცესის ფართოდ დასანერგად.

ქედის ყველა სოფელში, მაგალითად, საკმაოდ მაღალია ვაქცინირებულთა რაოდენობა, ჩვენი ხედვა ასეთია, რომ თითოეულმა სოფლის ექიმმა უნდა იცოდეს თავის სოფელში რამდენი ადამიანი დარჩა ასაცრელი და ახლა ამ სიების იდენტიფიცირებაზე მუშაობენ.

• რა ტიპის პრობლემებს აწყდებით მუნიციპალიტეტებში ვაქცინაციის დროს? დეზინფორმაცია არის ხელშემშლელი ფაქტორი სოფლებში მოსახლეობის აცრისას?

განსაკუთრებული პრობლემები, ისეთი, რაც არ გვხვდება ქალაქში, არ გვხვდება არც სოფლებში.

ვაქცინაციის საწყის ეტაპზე აიცრა ყველა მსურველი, მაგრამ ახლა აუცრელია მოსახლეობის ის ნაწილი, ვისაც ვაქცინაციის მიმართ მკვეთრად ნეგატიური დამოკიდებულება აქვს, მათთვის მეტი ინფორმაციის მიწოდებაა საჭირო.

მათთან მუშაობისას დიდი როლი აქვს ოჯახის ექიმს, რადგან სწორედ ოჯახის ექიმს აქვს ნდობა და ავტორიტეტი სოფელში. სამინისტრო კოორდინაციას უწევს თითოეული სოფლის და თემის დონეზე თვითმმართველობების სამსახურებთან ამ მუშაობას.

ძალიან აქტიურად მუშაობენ ხულოში სოფლის ექიმები, გუშინ, მაგალითად, ვიმუშავეთ ჩაქვის ტერიტორიაზე, ხალისა და ჩაისუბნის ტერიტორიაზე და ექიმებთან ერთად შევადგინეთ უბნებზე გასვლის გეგმა-გრაფიკი.

თითქმის კარდაკარის მეთოდია საჭირო ვაქცინაციის სასურველი ზღვარის მისაღწევად.

• როგორ მოხერხდა ბათუმში მოზრდილი მოსახლეობის 60%-ის აცრა? თქვენი აზრით, რამ იქონია ყველაზე მეტად გავლენა ბათუმელებზე?

დრამატულად წარიმართა აჭარაში თავიდან პროცესები. ინფიცირებისა და სიკვდილიანობის მაღალმა მაჩვენებელმა იმოქმედა. გაიზარდა აცრის მსურველთა რაოდენობა. ქალაქში თითქმის ყველას ნათესავი, მეზობელი ან მეგობარი აღმოჩნდა დაავადებულებს და გარდაცვლილებს შორის.

ზოგადად, აჭარაში, საქართველოს სხვა მუნიციპალიტეტებთან შედარებით, ყოველთვის მაღალი იყო იმუნიზაციის მაჩვენებელი, რასაც დაავადებათა კონტროლის ეროვნული ცენტრიც აღნიშნავდა ყოველთვის, ვგულისხმობ ბავშვთა გეგმიურ იმუნიზაციას.

უნდა ვთქვათ, რომ პირველადი ჯანდაცვის სექტორი ამ თვალსაზრისით კარგად იყო მობილიზებული და დიდი გამოცდილება აქვთ სოფლისა თუ ქალაქის ექიმებს იმუნიზაციის პროცესის წარმართვის.

• როგორც ვიცით, აჭარაში ყოველდღიურად კოვიდით გარდაცვლილებს შორის არიან არამხოლოდ აჭარის, არამედ სხვა რეგიონების მცხოვრებლებიც. ეს ნამდვილად ასეა?

ჩვენ საკმაოდ დიდი საწოლფონდი გვაქვს, ამიტომ კატასტროფის სამსახურს სხვა რეგიონებიდანაც გადმოჰყავს ჩვენთან ჰოსპიტალიზაციის საჭიროების მქონე პაციენტები. ეს მაშინ ხდება, როცა ჩვენს მეზობელ რეგიონებში იმატებს ინფიცირების მაჩვენებელი და ცხადია, დგება ლეტალური შედეგებიც.

დიახ, აჭარაში კოვიდით ყოველდღიურად გარდაცვლილთა შორის არიან მეზობელი რეგიონებიდანაც და არამხოლოდ ბათუმიდან.

• მოსალოდნელია თუ არა აჭარაში ინფიცირების შემთხვევებისა და სიკვდილიანობის ზრდა, თუ ვაქცინაციის ტემპი არ გაიზარდა რეგიონში?

ჩვენი გათვლებით სიტუაცია დრამატულად არ უნდა განვითარდეს აჭარაში, თუ ვაქცინაციის ამ ტემპით წავალთ, ხოლო თუ ცოტა კიდევ გაიზრდება ეს ტემპი, რა თქმა უნდა, შენარჩუნდება ის სიტუაცია, რაც გვაქვს.

ბუსტერზეც დაიწყო მუშაობა, ვინც უკვე გაიკეთა ვაქცინის 2 დოზა, განსაკუთრებით რისკჯგუფებზეა საუბარი, მათ აქვთ დამატებითი დოზების მიღების საშუალებაც.

აცრა აუცილებელია მათთვისაც, ვინც უკვე გადაიტანა კოვიდი. ხშირად მოგვმართავენ ამ კითხვით და ჩვენ ყველას ვეუბნებით, რომ აუცილებელია ვაქცინაცია მყარი იმუნიტეტისთვის მაშინაც კი, როცა კოვიდი უკვე გადატანილი გაქვთ.

ვაქცინაცია, საინფორმაციო შეხვედრები – ყველაფერი ერთად მუშაობს და ვფიქრობთ, რომ ვაქცინაციის ეს მაჩვენებელი რაც ახლა გვაქვს აჭარაში, ცუდი არ არის, ყოველ შემთხვევაში, სიტუაციის სამომავლო დრამატიზებისგან დაგვიცავს.

• ფაქტია, რომ აცრის მსურველთა რიცხვი აჭარის სოფლებში არ არის მაღალი. რა კეთდება აცრის ტემპის დასაჩქარებლად, რა გეგმა გაქვთ ამ მხრივ?

სოფლად ჩვენი სტრატეგია ეხება არამხოლოდ სოფლების ამბულატორიებს, არამედ თითოეულ თემს, თემის სამედიცინო პუნქტს და უბანს. სოფლის ექიმი შესაბამისი პროტოკოლით გათვალისწინებული ყველა წესის დაცვით თვითმმართველობის და ჯანდაცვის სამინისტროს წარმომადგენელთან ერთად აწყობს შეხვედრებს მოსახლეობასთან.

ამის პარალელურად სოფლის ექიმი თავის ტერიტორიაზე აუცრელ მოსახლეობას აღნუსხავს და მათ მიაკითხავს ან გამოიძახებს სრულად ინფორმირებისთვის.

ქალაქში პერიოდულად სამიზნე ჯგუფებს ვხვდებით, სადაც კამპანიას ვატარებთ. ლექციის, საუბრის შემდეგ მიგვყავს ამცრელი ბრიგადა და პარალელურ რეჟიმში ვაქცინაციის შესაძლებლობა ადგილზევე ეძლევათ ადამიანებს.

შეიძლება მომართვიანობა დიდი არ იყოს და ერთი საუბრის შემდეგ მხოლოდ 20 ან 22 მსურველი აიცრას, მაგრამ პანდემიის დროს თითოეულ აცრას აქვს მნიშვნელობა.

• რამდენად ეფექტურია სოფლის ამბულატორიების მუშაობა რეალურად?  რამდენად მოიცავს მათი მუშაობა ვაქცინაციაზე თემთან საუბრებს, ამომწურავი ინფორმაციის გაცემას?

როცა ვსაუბრობთ პირველადი ჯანდაცვისა და ამბულატორიის ჩართულობის მნიშვნელობაზე ვაქცინაციის პროცესში, აქ პირველ რიგში ვგულისხმობთ სოფლის ექიმის წარმოებულ კამპანიას, როგორც თავშივე აღვნიშნე, სოფლის ექიმი დიდი ავტორიტეტია თავის თემში და მის რჩევას დიდი მნიშვნელობა აქვს.

ჩვენი სოფლის ექიმები კოვიდსასტუმროებში იყვნენ დასაქმებულები. მათ რეალურად ნახეს, თუ რა გამოიარა აჭარის სამედიცინო სისტემამ და რა გადაიტანეს პაციენტებმა, ამ გამოცდილებას ისინი სოფლის მოსახლეობას უზიარებენ და არწმუნებენ ვაქცინაციის აუცილებლობაში.

საქართველოს ჯანდაცვის მინისტრის მოადგილის, თამარ გაბუნიას განცხადებით, მიუხედავად კორონავირუსის ახალი შემთხვევების გაზრდილი სტატისტიკისა, საქართველოს მთავრობა არ განიხილავს დამატებითი შეზღუდვების დაწესებას.

„ამ ეტაპზე დამატებითი შეზღუდვების დაწესება, დღევანდელი მდგომარეობით, არ იგეგმება, მაგრამ ის შეზღუდვები და რეგულაციები, რომლებიც უკვე დაწესებულია, აუცილებლად უნდა აღსრულდეს, რადგან თუ არ მოხდა იმის აღსრულება, რაც უკვე დაწესებულია, აბსოლუტურად აზრს მოკლებულია დამატებითი შეზღუდვების დაწესება,“ – თქვა თამარ გაბუნიამ დღეს, 3 ნოემბერს.

მისივე თქმით, ჯერჯერობით ჯანდაცვის სისტემა ახერხებს პაციენტთა ნაკადის მართვას:

„ჯერჯერობით ნაკადების მართვა კლინიკებში ხერხდება, თუმცა იმატებს რეანიმაციაში პაციენტთა რაოდენობა, 350-ს გადააჭარბა უკვე ამ დილის მდგომარეობით. ჯერჯერობით შესაძლებელია საველე ჰოსპიტლების გარეშე. ვფიქრობთ, მომდევნო რამდენიმე დღე ჩვენ გვექნება შესაძლებლობა, იმართოს პაციენტთა ნაკადები,“ – აღნიშნა თამარ გაბუნიამ.

დღევანდელი, 3 ნოემბრის მონაცემებით, საქართველოში 6024 ახალი შემთხვევა დადასტურდა, გარდაიცვალა 49 პაციენტი.

 

საქართველოს სტატისტიკის ეროვნული სამსახურის მონაცემებით, ბოლო ერთი წლის განმავლობაში ფასები მნიშვნელოვნად გაიზარდა საკვებ პროდუქტებზე.

საანგარიშო პერიოდში ფასები მომატებულია შემდეგ ქვეჯგუფებზე:

• • ბოსტნეული და ბაღჩეული (43.0 პროცენტი),
  • ზეთი და ცხიმი (31.6 პროცენტი),
  • პური და პურპროდუქტები (19.4 პროცენტი),
  • რძე, ყველი და კვერცხი (18.2 პროცენტი),
  • შაქარი, ჯემი და სხვა ტკბილეული (18.0 პროცენტი),
  • თევზეული (16.0 პროცენტი),
  • მინერალური და წყაროს წყალი, უალკოჰოლო სასმელები და ნატურალური წვენები (13.0 პროცენტი),
  • ხორცი და ხორცის პროდუქტები (11.2 პროცენტი),
  • ხილი და ყურძენი (9.3 პროცენტი),
  • ყავა, ჩაი და კაკაო (6.4 პროცენტი);

ტრანსპორტის ჯგუფში ფასები გაიზარდა 19.6 პროცენტით, კომუნალური ხარჯები და სახლის მოვლა გაძვირდა 11.9 პროცენტით, ჯანმრთელობის დაცვა – 8.4 პროცენტით.

რაც შეეხება პურის ფასს, 11 ოქტომბრის მდგომარეობით, საქართველოში პურის ფასი საშუალოდ 10-15 თეთრით გაიზარდა.

ბოლო 24 საათში აჭარაში კორონავირუსის 229 ახალი შემთხვევა დადასტურდა, გარდაიცვალა 6 პაციენტი.

აჭარის ჯანდაცვის სამინისტროს ინფორმაციით, ამ დროისთვის კოვიდკლინიკებში მკურნალობს 512 ადამიანი, კოვიდსასტუმროებში – 202, ხოლო ონლაინკლინიკაში – 857 პაციენტი.

ქვეყნის მასშტაბით დღეს, 3 ნოემბერს, კორონავირუსის 6024 ახალი შემთხვევა დაფიქსირდა.

ბოლო 24 საათის განმავლობაში,  საქართველოში კორონავირუსის 6024 ახალი შემთხვევა დადასტურდა, გარდაიცვალა 49 პაციენტი.

17 აგვისტოს შემდეგ, როდესაც ინფიცირების 6 208 შემთხვევა იყო ქვეყანაში, მსგავსი მაღალი მაჩვენებელი დღეს პირველად დაფიქსირდა.

ამის მიუხედავად ქვეყანაში ბოლო 24 საათის განმავლობაში მხოლოდ 3 868 ადამიანი აიცრა.

stopcov.ge-ის ინფორმაციით, გამოჯანმრთელდა 3818 ადამიანი.

აჭარის რეგიონში დაფიქსირდა 229 ახალი შემთხვევა.

ხელოვნური სუნთქვის აპარატზე იმყოფება 337 პირი, მათგან თბილისში – 183, აჭარაში – 40, იმერეთში – 33.

___

ევროპის პატარა ქვეყნებს შორის საქართველოში კოვიდით ყველაზე მეტი ადამიანი დაიღუპა

See more

ლაო ჯინ ჯაოს ისტორიული სახლი ჩაქვში საპარტნიორო ფონდის საკუთრებაში გადავიდა, შესაბამისი ცვლილება საჯარო რეესტრში 2021 წლის აგვისტოშია დაფიქსირებული. საპარტნიორო ფონდს ეკუთვნის ამ სახლთან დაკავშირებული 1379 კვ.მეტრი მიწის ნაკვეთიც.

შენობას კულტურული მემკვიდრეობის ძეგლის სტატუსი აქვს და ამ დრომდე ის აჭარის ფინანსთა და ეკონომიკის სამინიტროს საკუთრება იყო.

სამინისტროს ეს სახლი გასულ წლებში კონკრეტულ კომპანიაზეც ჰქონდა გადაცემული, რომელმაც ვალდებულებები ვერ შეასრულა, ამიტომაც ქონება სამინისტროს ბალანსზე დაბრუნდა.

ლაო ჯინ ჯაოს სახლი ქობულეთის მუნიციპალიტეტის ტერიტორიაზე, დაბა ჩაქვში, ზღვისპირას დგას. შენობა 348,20 კვ.მ. -ია.

ამ სახლში, ნინოშვილის #12-ში, ჩინელი მეწარმე, ლაო ჯინ ჯაო მე-20 საუკუნის 10-20-იან წლებში ცხოვრობდა. წლების წინ აქ მუზეუმის გახსნის იდეაც  განიხილებოდა.

იმის გათვალისწინებით, რომ შენობას ძეგლის სტატუსი აქვს, ლაო ჯინ ჯაოს სახლში სამშენებლო სამუშაოების წარმოების შემთხვევაში, პროექტი აჭარის კულტურული მემკვიდრეობის სააგენტომ უნდა შეითანხმოს და შესაბამისი ნებართვაც გასცეს.

სააგენტოს დირექტორის მოვალეობის შემსრულებლის, ოლეგ ბოლქვაძის ინფორმაციით, ამ დროისთვის სააგენტოს არანაირი ნებართვა ჩაქვში, ნინოშვილის #12-ში მდებარე ძეგლთან დაკავშირებით გაცემული არ აქვს.

საპარტნიორო ფონდს ქობულეთში დარეგისტრირებული აქვს ასევე 70 073 კვ.მ. მიწის ნაკვეთი ქობულეთის შემოსასვლელში, მდინარე ჩოლოქთან ახლოს, პლაჟსა და საავტომობილო მაგისტრალს შორის. აღნიშნული ნაკვეთი ბოლო წლებში ყაზახურ კომპანია „ყაზმუნაიგაზ-სერვისის“ საკუთრებაში იყო.

ამ თემაზე დეტალურად წაიკითხეთ აქ:

გასაყიდი მიწები აჭარის სანაპიროზე, სადაც შესაძლოა სასტუმროები აშენდეს

See more