Batumelebi | რუსეთის მოქალაქე დიდი ოდენობით ქონების მითვისების ბრალდებით დააკავეს რუსეთის მოქალაქე დიდი ოდენობით ქონების მითვისების ბრალდებით დააკავეს – Batumelebi
ნეტგაზეთი • RU

რუსეთის მოქალაქე დიდი ოდენობით ქონების მითვისების ბრალდებით დააკავეს

ფინანსთა სამინისტროს საგამოძიებო სამსახურის ინფორმაციით, დიდი ოდენობით სხვისი ქონების მოტყუებით დაუფლების ფაქტზე რუსეთის მოქალაქე დააკავეს.

„გამოძიებით დადგინდა, რომ ბრალდებულმა, სხვა პირების დახმარებით, სხვისი ქონებრივი უფლებამოსილების დამადასტურებელი ყალბი დოკუმენტი დაამზადა და მიისაკუთრა თბილისში მდებარე, ერთ-ერთი კომპანიის საკუთრებაში რიცხული, ჯამში 47 800 კვ/მ მოცულობის ორი მიწის ნაკვეთი.

მან ასევე გააყალბა აღნიშნული კომპანიის  წილის ნასყიდობის ხელშეკრულება, რომლის საფუძველზეც გახდა მისი ერთპიროვნული დირექტორი და დამფუძნებელი, რის შემდგომაც მიწის ნაკვეთები გადააფორმა თავისივე სახელზე რეგისტრირებულ სხვა კომპანიაზე.

„დანაშაულებრივი განზრახვის სისრულეში მოყვანის შემდგომ, ბრალდებული გეგმავდა მიწის ნაკვეთების იპოთეკით დატვირთვას 200 000 აშშ დოლარამდე თანხის დაუფლების მიზნით, რა დროსაც მოხდა მისი დაკავება. გამოძიების პროცესში მიწის ნაკვეთებს დაედო ყადაღა.

წინასწარი მონაცემებით, მიწის ნაკვეთების საბაზრო ღირებულება აღემატება 16 000 000 ლარს“- ნათქვამია გამოძიების სამსახურის მიერ.

გამოძიება მიმდინარეობს საქართველოს სისხლის სამართლის კოდექსის 180-ე მუხლის მე-3 და 210-ე მუხლის პირველი ნაწილებით, რაც  სასჯელის სახით ითვალისწინებს თავისუფლების აღკვეთას 6-დან 9 წლამდე ვადით.

„გრძელდება შესაბამისი ღონისძიებები, აღნიშნული დანაშაულის ჩადენაში თანამონაწილე სხვა პირების დადგენა-მხილების მიზნით“.

ნეტგაზეთის მასალების სხვა გამოცემებში გადაბეჭდვის წესი
ავტორი
ლელა დუმბაძე, ჟურნალისტი. ტელ: [0042] 27 45 12. lelabatumelebi@gmail.com