Batumelebi

თბილისში, დამწვრობის ცენტრში, პიროტექნიკის აფეთქების შედეგად დაშავებულ ორ ბავშვს მკურნალობენ.

„ერთ-ერთი ბავშვის მდგომარეობა ძალიან მძიმე იყო, ის ახალ წლამდე გადმოიყვანეს რეგიონიდან. მოზარდს დამწვარი ჰქონდა სახე, კისერი, გულმკერდი და ზედა კიდურები, ასევე, აფეთქების შედეგად დაუზიანდა სასუნთქი გზებიც. მას ჩაუტარდა 2 ქირურგიული ოპერაცია, ახლა გაუმჯობესების სტადიაშია“ – უთხრა დამწვრობის ცენტრის ხელმძღვანელმა, გუგა ქაშიბაძემ „ბათუმელებს“.

მისივე თქმით, მეორე ბავშვი სახის დამწვრობით, გუშინ, 3 იანვარს შეიყვანეს კლინიკაში.

„გაგვიმართლა, რომ დამწვრობა ღრმა არ არის, თვალებიც დაზიანებული არ აქვს. ბავშვი კლინიკაში ჩვენი დაკვირვების ქვეშ რჩება“.

გუგა ქაშიბაძის თქმით, წელს, ასევე, დამწვრობის ცენტრში მსუბუქი დამწვრობით გადაიყვანეს რამდენიმე ადამიანი, რომლებსაც ჩაუტარდათ ამბულატორიული მომსახურება.

ამავე დროს, გუგა ქაშიბაძემ „ბათუმელებთან“ აღნიშნა, რომ პიროტექნიკის აფეთქებით გამოწვეული დაზიანების შემთხვევები წინა წლებთან შედარებით შემცირებულია.

ფოტოზე: გუგა ქაშიბაძე

________________

ავტორი: ანა ბაჟუნაიშვილი

ამავე თემაზე: 

იაპონიაში მიწისძვრის შედეგად დაღუპულთა რიცხვი 84-მდე გაიზარდა იშიკავას პრეფექტურაში, 79 ადამიანი კი დღემდე უგზო-უკვლოდ დაკარგულად ითვლება – წერს იაპონური გამოცემა mainichi.

მედიის ცნობით, დაზარალებულ რეგიონებში სამაშველო სამუშაოები ისევ გრძელდება.

7,6 მაგნიტუდის სიმძლავრის მიწისძვრა იაპონიაში 1 იანვარს მოხდა და ნგრევა და ხანძარი გამოიწვია. მიწისძვრის შემდეგ გაჩენილმა ხანძარმა 200-ზე მეტი შენობა გაანადგურა.

ფოტოზე: მიწისძვრა იაპონიაში. ფოტო: EPA-EFE/FRANCK ROBICHON

___________

ავტორი: ანა ბაჟუნაიშვილი 

ამავე თემაზე:

ბათუმში საახალწლო პიროტექნიკის აფეთქების შედეგად მინიმუმ 2 ადამიანი დაშავდა ახალი წლის დღეებში.

31 დეკემბერს, ბათუმში, საერთაშორისო ჰოსპიტალში [ბაუ] ორივე ხელის მტევნის მრავლობითი დამწვრობით 40 წლის მამაკაცი შეიყვანეს. როგორც ,,ბათუმელებს“ კლინიკაში უთხრეს, პაციენტმა ერთი თითი სრულად, მეორე კი ნაწილობრივ დაკარგა. ამჟამად, მამაკაცის მდგომარეობა დამაკმაყოფილებელია.

ასევე, 30 დეკემბერს, ბათუმის სამედიცინო ცენტრში [BMC] პიროტექნიკის აფეთქების შედეგად დაზიანებული 25 წლის მამაკაცი გადაიყვანეს. როგორც კლინიკაში გვითხრეს, პაციენტს საავადმყოფოში გადაყვანამდე უკვე დაკარგული ჰქონდა ერთი თითი.

მას ტრავმატოლოგიური ჩარევაც დასჭირდა. კაცი დღემდე გადის მკურნალობის კურს სამედიცინო ცენტრში.

ეს არ არის პიროტექნიკით დაზიანების ერთეული შემთხვევები. საქართველოში, ყოველწლიურად, პიროტექნიკის აფეთქების შედეგად ათობით ადამიანი ზიანდება.

_____________

ავტორი: ანა ბაჟუნაიშვილი

ამავე თემაზე: 

საქართველოს კულტურული მემკვიდრეობის სააგენტო აცხადებს, რომ გავრცელებული ინფორმაცია, რომ ნიკორწმინდას საფრთხე ემუქრება და განადგურების რისკის ქვეშაა, არ შეესაბამება სიმართლეს.

ამის შესახებ სააგენტო ფეისბუქზე წერს.

„ამბროლაურის მუნიციპალიტეტის სოფელ ნიკორწმინდაში მდებარე წმ. ნიკოლოზის სახელობის ტაძრის სრული რესტავრაცია-რეაბილიტაცია სააგენტოს დაკვეთით 2018 წელს განახორციელა შპს „ხელოვნების ნიმუშთა კონსერვაციის ცენტრმა“ (ნანა კუპრაშვილი).

ხელშეკრულებით გათვალისწინებული იყო შემდეგი სამუშაოები: ტაძრის სახურავიდან თუნუქის ბურულის მოხსნა და ჩანაცვლება სპილენძის ფურცლებით, სარკმლებისა და კარების შეცვლა, ქვის საკონსერვაციო სამუშაოები, ინტერიერში ნალესობისა და ფერწერის რესტავრაცია, ელექტრო სამონტაჟო სამუშაოები და სამრეკლოს რეაბილიტაცია.

ხსენებული სამუშაოების ღირებულებამ შეადგინა 946 175 ლარი.

სააგენტოს თანამშრომლების მიერ ობიექტის მონიტორინგი ბოლოს განხორციელდა 2023 წლის აგვისტოში. შემოწმებულ იქნა ტაძრის როგორც გადახურვის, ასევე ექსტერიერის და ინტერიერის მდგომარეობა.

მონიტორინგის შედეგად დადგინდა, რომ გარდა მცირე დაზიანებებისა ძეგლის მდგომარეობა დამაკმაყოფილებელია.

ტაძარს არ აქვს სტრუქტურული პრობლემები, ინტერიერში არ ხდება წყლის ინფილტრაცია და ვიზუალური დათვალიერებით კედლის მხატვრობის მდგომარეობის გაუარესება არ შეინიშნება.

შესაბამისად გავრცელებული ინფორმაცია, რომ ძეგლს საფრთხე ემუქრება და არის განადგურების რისკის ქვეშ არ შეესაბამება სიმართლეს. სააგენტო კვლავაც გააგრძელებს ძეგლის მონიტორინგს და საჭიროების შემთხვევაში გაატარებს შესაბამის ღონისძიებებს“ – წერს სააგენტო.

XI საუკუნეში აგებული ნიკორწმინდა ეროვნული მნიშვნელობის კულტურული მემკვიდრეობის ძეგლია.

_________

ფოტო: ვიკიპედია

31 იანვარს ბათუმში, კაზინოში ხანძარი გაჩნდა – სოციალურ ქსელებში ხანძრის ამსახველი რამდენიმე ვიდეო გავრცელდა, სადაც ჩანს ხანძარი, სათამაშო აპარატები და ხალხი, რომელიც კაზინოს დატოვებას ცდილობს.

ინფორმაცია „ბათუმელებს“ საგანგებო სიტუაციების მართვის სამსახურში დაუდასტურეს.

აქ გვითხრეს, რომ ცეცხლი სწრაფად იქნა ლიკვიდირებული და ხანძრის შედეგად არავინ დაშავებულა.

______________

ფოტოზე: კადრი სოციალურ ქსელებში გავრცელებული ვიდეოდან

ბათუმის მე-7 საჯარო სკოლის რეაბილიტაციისთვის ბიუჯეტიდან 4,7 მილიონი ლარი დაიხარჯება.

სკოლის შენობის სრული რეაბილიტაცია-გამაგრების სამუშაოებზე აჭარის განათლების სამინისტრომ ტენდერი უკვე გამოაცხადა. სატენდერო თანხა 4 767 332 ლარია.

„ბათუმში, ჰ. აბაშიძის ქუჩაზე არსებული N7 საჯარო სკოლის რეაბილიტაციის პროექტი ითვალისწინებს სკოლის განახლებას არსებული სიტუაციის, ფართობების და დაკავებულობის ცვლილების გარეშე“ – აღნიშნულია ტენდერში.

სკოლის შენობის რეაბილიტაცია ტენდერში გამარჯვებულთან ხელშეკრულების დადებიდან 15 თვეში უნდა დასრულდეს.

„ვადის ცვლილების (გაზრდის) საფუძველს არ წარმოადგენს მეტეოროლოგიური მოვლენები (მოწოდების ვადა განისაზღვრა მსგავსი გარემოებების გათვალისწინებით), ასევე ობიექტის მიმდებარედ მიმდინარე სხვა სამუშაოები. აღნიშნულ ვადაში გათვალისწინებულია ზამთრის პერიოდიც.“ – აღნიშნულია პირობაში.

ტენდერში წინადადებების მიღება კი 2024 წლის 19 იანვარს დაიწყება და 24 იანვარს დასრულდება.

„პროექტში არსებულ რენდერში, ფასადის სრულად წარმოჩენისთვის, არ არის ხე-მცენარეები. თუმცა, პროექტის მიხედვით, უნდა შენარჩუნდეს ყველა ხე-მცენარე“ – აღნიშნულია სატენდერო განაცხადში.

პირობის მიხედვით, „ტენდერში მონაწილე პრეტენდენტს 2020 წლის 1-ლი იანვრიდან ტენდერის გამოცხადებამდე პერიოდში, საქართველოს ტერიტორიაზე ან/და სხვა ქვეყნის ტერიტორიაზე (გარდა იმ ქვეყნის ტერიტორიისა, სადაც რეგისტრირებულია პრეტენდენტი) შესრულებული უნდა ჰქონდეს შენობის/ნაგებობის მშენებლობის/რეაბილიტაციის სამუშაოები საერთო ღირებულებით არანაკლებ 4 000 000 ლარის, მათ შორის ერთი შესყიდვის ფარგლებში არანაკლებ 1 000 000 ლარის ღირებულების სამუშაოები.

გამოცდილებაში არ ჩაითვლება გზების, ხიდების, გაბიონების, საყრდენი კედლების, სანიაღვრე არხების, ეზოების, ქუჩების მოწყობის/რეაბილიტაციის და მსგავსი სამუშაოები, გარდა იმ შემთხვევისა, თუ ეს სამუშაოები სხვა ძირითადი სამუშაოების თანმდევი სამუშაოებია“.

ბათუმის შოთა რუსთაველის სახელმწიფო უნივერსიტეტი [ბსუ] მე-2 კორპუსის სახურავის აღსადგენად 445 ათას 8 ლარს დახარჯავს. შესაბამისი ხელშეკრულება შპს „აჭარასთან“ უკვე გაფორმებულია.

სახურავის აღდგენა, ხელშეკრულების მიხედვით, 2024 წლის 28 თებერვლამდე უნდა დასრულდეს.

უნივერსიტეტმა კომპანიასთან ხელშეკრულება ტენდერის გარეშე „გადაუდებელი აუცილებლობით“ გააფორმა 2023 წლის 29 დეკემბერს და შეთანხმებისთვის სახელმწიფო შესყიდვების სააგენტოს მიმართა. სააგენტო საკითხს 5 იანვარს განიხილავს.

„სტიქიის შედეგად მთლიანად დაზიანდა ბსუ-ს მე-2 კორპუსის სახურავი, რომლის გადაუდებელი აღდგენის საჭიროება განპირობებულია იურიდიულ და სოციალურ მეცნიერებათა ფაკულტეტის სასწავლო პროცესის უმოკლეს ვადაში აღდგენის, ასევე, შენობაში განთავსებული ლაბორატორიული აღჭურვილობისა და წიგნადი ფონდის ნალექებისაგან დაცვისა და სამუშაო პროცესის შეუფერხებლად წარმართვის აუცილებლობიდან გამომდინარე.“ – აღნიშნულია ბსუ-ს განაცხადში.

ამავე განაცხადის მიხედვით, „დაზიანებული სახურავის დარჩენილი ნაწილის მდგრადობის შეფასების მიზნით მოწვეული იქნა ინჟინერ – კონსტრუქტორი [ექსპერტი] შოთა კუჭავა, რომლის მიერაც წარმოდგენილი საექსპერტო დასკვნით დასტურდება, რომ სახურავზე დარჩენილი კონსტრუქციაც არ შეესაბამება ექსპლუატაციის ნორმებს და სრულად საჭიროებს შეცვლას“.

ბსუ-ს ინფორმაციით, „შესყიდული იქნა დაზიანებული სახურავის საპროექტო-სახარჯთაღრიცხვო დოკუმენტაცია, რომლის მიხედვითაც სამუშაოების ღირებულებამ შეადგინა 525 519.57 ლარი. ამ დოკუმენტაციის საფუძველზე ჩატარდა ბაზრის მოკვლევა და შეტყობინებები ელ. ფოსტის საშუალებით დაეგზავნა 26 პრეტენდენტს, საიდანაც წინადადებები მოგვაწოდა სამმა პრეტენდენტმა:

შპს „მშენებელთა ჯგუფიმ“-მ – ღირებულებით 511604,98 ლარი, მოწოდების ვადა – 50 დღე;
შპს „აჭარა“-მ – ღირებულებით 445008,81 ლარი, მოწოდების ვადა 60 დღე;
შპს „იორ ბუილდინგ კომპანი-LTD YOUR BUILDING COMPANY“-იმ – ღირებულებით 299376,37 ლარი, მოწოდების ვადა 25 დღე.“

„დაბალ ფასიან პრეტენდენტს – შპს „იორ ბუილდინგ კომპანი-LTD YOUR BUILDING COMPANY“-ის წერილობით ეცნობა ხელშეკრულების გაფორმებისა და სამუშაოების დაუყოვნებლივ დაწყების თაობაზე, რაზეც კომპანიამ განაცხადა წერილობითი უარი. გამომდინარე აღნიშნულიდან განხილული იქნა ბაზრის კვლევაში მონაწილე მომდევნო დაბალფასიანი პრეტენდენტის შემოთავაზება, რომელმაც გამოთქვა სამუშაოების დაუყოვნებლივ დაწყების მზადყოფნა, რის საფუძველზეც გაფორმდა ხელშეკრულება“ – აღნიშნულია ბსუ-ს განაცხადში.

ბსუ-ს მეორე კორპუსს სახურავი ქარმა 2023 წლის 24 დეკემბერს გადახადა.

ამ თემაზე:

დღეს, 2 იანვარს, ტოკიოში, ჰანედას აეროპორტში Japan Airlines-ის თვითმფრინავს ცეცხლი გაუჩნდა

ავიაკომპანიის ცნობით, ბორტზე 379 მგზავრი იყო და თვითმფრინავის დატოვება მოასწრეს სიცოცხლისთვის საშიში დაზიანებების გარეშე.

პირველადი ინფორმაციით, ხანძარი სავარაუდოდ გამოიწვია Japan Airlines-ის თვითმფრინავისა და იაპონიის სანაპირო დაცვის თვითმფრინავის შეჯახებამ.

მიმდინარეობს გამოძიება.

____________

ფოტო: EPA-EFE

2024 წლის 1 იანვარს ესტონეთში ძალაში შევიდა კანონი ქორწინების თანასწორობის შესახებ, რომლის მიხედვითაც, სქესის მიუხედავად, ორ სრულწლოვანს შეუძლია დაქორწინება.

ქორწინების თანასწორობის აქტი ესტონეთმა მიიღო მიერ 2023 წლის 20 ივნისს. მას მხარი 54-მა დეპუტატმა დაუჭირა, 34 წინააღმდეგი იყო, ერთმა კი თავი შეიკავა.

ესტონეთი გახდა პირველი ქვეყანა პოსტსაბჭოთა სივრცეში, რომელმაც დააკანონა ერთნაირსქესიან წყვილთა ქორწინება.

2013 წლიდან ესტონეთში მოქალაქეებს უფლება აქვთ დადონ ფორმალური პარტნიორობის ხელშეკრულება, მიუხედავად სქესისა.

ქორწინების თანასწორობის აქტი არ ხსნის პარტნიორული ხელშეკრულების დადების შესაძლებლობას. წყვილები, რომლებმაც გაფორმებული ჰქონდათ ასეთი შეთანხმება, ახლა შეძლებენ ქორწინების რეგისტრაციას გამარტივებული წესით.

ესტონეთის ადამიანის უფლებათა ცენტრის მიერ ჩატარებული გამოკითხვით, ესტონელთა 53%-მა მხარი დაუჭირა ერთნაირსქესიან წყვილთა ქორწინებას. ათი წლის წინ ეს მაჩვენებელი მხოლოდ 34% იყო.

___________

ფოტოზე: ტალინი

დედამიწის შემსწავლელ მეცნიერებათა ინსტიტუტის სეისმური მონიტორინგის ეროვნული ცენტრის ცნობით, დღეს, 2 იანვარს, საქართველოში მიწისძვრა მოხდა.

ცენტრის ინფორმაციით, მიწისძვრა რაჭაში, ქალაქ ამბროლაურიდან 14 კილომეტრის დაშორებით, სოფელ ბაჯთან მოხდა.

პირველადი ინფორმაციით, მიწისძვრის სიმძლავრე 4.3 (ML) მაგნიტუდას შეადგენდა. მიწისძვრის სიღრმე 13 კმ იყო.

იაპონიაში სულ მცირე 30 ადამიანი დაიღუპა ძლიერი მიწისძვრის შედეგად, რომელიც 1 იანვარს, ახალი წლის პირველ დღეს მოხდა.

იაპონური მედიის ცნობით, მაშველები ჯერ ისევ ეძებენ დაკარგულ ადამიანებს.

7,6 მაგნიტუდის სიმძლავრის მიწისძვრამ გამოიწვია ნგრევა და ხანძარი იშიკავას პრეფექტურის ქალაქ ვაჯიმაში, მედიის ცნობით, გზებზე ნანგრევები აფერხებს სამაშველო ოპერაციებს.

2 იანვარს, დილით, საგანგებო სამსახურმა გააუქმა გაფრთხილება მოსალოდნელ ცუნამზე, მას შემდეგ, რაც ყველაზე მაღალი ტალღა –  დაახლოებით 1.2 მეტრი – თავს დაატყდა ვაჯიმას პორტს ღამით.

იშიკავას პრეფექტურის წარმომადგენლებმა განაცხადეს, რომ მიწისძვრის შემდეგ გაჩენილმა ხანძარმა 200-ზე მეტი შენობა გაანადგურა.

იაპონიის მეტეოროლოგიური სააგენტოს ცნობით, მიწისძვრის ეპიცენტრი მდებარეობდა ვაჯიმას აღმოსავლეთით-ჩრდილო-აღმოსავლეთით 30 კილომეტრში, სიღრმე 16 კმ იყო. მსგავსი მიწისძვრა შეუძლებელს ხდის ადამიანების ფეხზე დგომას. სააგენტოს ცნობით, ასეთი მიწისძვრა იაპონიაში ბოლოს 2018 წელს დაფიქსირდა, ჰოკაიდოში.

ბათუმის სამედიცინო ცენტრის ცნობით, პირველი ახალშობილი 2024 წელს ბათუმში, BMC-ის  სამშობიარო განყოფილებაში დაიბადა.

ახალშობილი 2024 წლის პირველ იანვარს, დაახლოებით 00:06 საათზე დაიბადა, მას ილია დაარქვეს.

როგორც ბათუმის სამედიცინო ცენტრში „ბათუმელებს უთხრეს“, ახალშობილის წონა კგ-ია, სიმაღლე კი 51 სანტიმეტრი.

დღეს, 31 დეკემბერს, ბათუმში, ევროპის მოედანზე საახალწლო ღონისძიებები 19 საათზე დაიწყება.

განრიგის თანახმად, ჯერ გაიმართება ჯამბაზების წარმოდგენა, ცეცხლოვანი შოუ, შემდეგ კი საახალწლო კონცერტი, რომელზეც იმღერებენ:

ღამის შოუს ბენდი; ბენდი „სისაიდი“, ზვიად ბოლქვაძე, აჩიკო გოგიტიძე, თამთა ხუხუნაიშვილი, ნიკო ბერიძე, გიორგი ბერიძე, სანდრო კურცხალიძე, მორის მელაძე, სულხან დევაძე, მარიტა ცეცხლაძე, ლუკა ზაქარიაძე, სალომე მირიანაშვილი, მაგდა გიორგაძე, თათია კობალაძე, ნანუკა მიქაძე, გვანცა ოსიყმაშვილი, მზიკო ფარტენაძე, ჯეკო გოგიტიძე, მერაბიკო დოლიძე, ანრი გუჩმანიძე, გიორგი ნაკაშიძე, ავთო აბესლამიძე; კახაბერი და ხანუმები.

კონცერტს დიჯეის პროგრამა დაასრულებს.

ღონისძიებაზე დასწრება უფასოა. ამავე დროს, ევროპის მოედანზე გაიმართება საახალწლო ბაზრობა.

ბათუმში ახალი წლის ღამეს მუნიციპალური ტრანსპორტი ღამის 2 საათამდე იმოძრავებს, მგზავრობა უფასო იქნება.

ამავე თემაზე:

ახალი წლის დღესასწაულთან დაკავშირებით, დღეს, 31 დეკემბერს, ბათუმში მუნიციპალური ავტობუსები 18:00 საათიდან მგზავრებს უფასოდ მოემსახურებიან.

ბათუმის მერიის ცნობით, მუნიციპალური ტრანსპორტი ღამის 02:00 საათამდე იმუშავებს.

დღეს, 31 დეკემბერს, ბათუმში, ევროპის მოედანზე, საახალწლო კონცერტი 19 საათზე დაიწყება და ღამის პირველ საათამდე გასტანს.

_____________

ფოტო: ბათუმის ავტოტრანსპორტი

„კარგია, რომ ივანიშვილმა საბოლოოდ მოახერხა სამალავიდან გამოსვლა. საბაბი სუსტი იყო. გამოწვევა მიღებულია“ – ასე გამოეხმაურა X-ზე [ყოფილი ტვიტერი] გიორგი გახარია, პარტია „გახარია -საქართველოსთვის“ დამფუძნებელი, დღეს, 30 დეკემბერს, ბიძინა ივანიშვილის პოლიტიკაში ოფიციალურად დაბრუნებას.

დღეს, 30 დეკემბერს, ივანიშვილმა განაცხადა, რომ რომ აქტიურ პოლიტიკაში ბრუნდება „ქართული ოცნების“ საპატიო თავმჯდომარის რანგში. პარტია „ქართული ოცნების“ ყრილობაზე დღეს მან გიორგი გახარია მოიხსენია, როგორც მოღალატე.

„ერთადერთი, რისი გათვლაც არ შემეძლო, იყო ქვეყნისა და გუნდის ღალატი, რომელიც პოლიტიკიდან ჩემი დისტანცირებიდან სულ რაღაც ერთ თვეში გიორგი გახარიამ იკადრა. მაშინ მომიწია, მრჩევლის ფუნქცია მეტვირთა და გუნდს კონსულტაციებით რომ არ დავხმარებოდი, პროცესები ქვეყნისთვის უმძიმესი სცენარით განვითარდებოდა“ – განაცხადა ივანიშვილმა.

ამავე თემაზე: 

ბათუმის მერიის ცნობით, 2024 წლის წლის 1-2 იანვარს ბათუმის ბოტანიკურ ბაღში შესვლა უფასო იქნება.

ბოტანიკურ ბაღში ამ დღეებში უფასოდ შესვლა შეეძლებათ მხოლოდ საქართველოს მოქალაქეებს.

ბოტანიკური ბაღი მუშაობს დილის 9 საათიდან საღამოს 6 საათამდე.

გორის მუნიციპალიტეტის მერია ფეისბუქის ოფიციალურ გვერდზე წერს, რომ ახალი წლის ღამე, საახალწლო დღესასწაულზე პიროტექნიკას არ გამოიყენებენ.

გორის მერიის ცნობით, პიროტექნიკისთვის განსაზღვრული თანხა გარემოს დაცვის შესახებ ცნობიერების ამაღლების კამპანიას მოხმარდება.

საახალწლო პიროტექნიკით ყოველწლიურად ზიანდებიან ადამიანები. პიროტექნიკური საშუალებების გამოყენება საფრთხის შემცველია ფრინველებისა და ქუჩაში მცხოვრები ცხოველებისთვის.

წელს პიროტექნიკის აკრძალვის მოთხოვნით პეტიცია შეიქმნა. პეტიციის ავტორები მიმართავენ საქართველოს გარემოს დაცვისა და სოფლის მეურნეობის სამინისტროს, საქართველოს მთავრობას, პარლამენტსა და პრეზიდენტს და პიროტექნიკის აკრძალვას ითხოვენ.

2023 წელს საქართველოში 5 მილიონ 2 ათას 100 აშშ დოლარის ღირებულების პიროტექნიკა შემოიტანეს. ამ სტატისტიკაში ჯერ არ არის ასახული ნოემბრისა და დეკემბრის თვეების მონაცემები, როცა საახალწლო ფეიერვერკებსა და სხვა პიროტექნიკაზე მოთხოვნა ყველაზე მეტად იზრდება.

ამავე თემაზე: 

„ქართული ოცნების“ დამფუძნებელი, მილიარდერი ბიძინა ივანიშვილი აცხადებს, რომ კვლავ ბრუნდება პოლიტიკაში, ამჯერად „ქართული ოცნების“ საპატიო თავმჯდომარის რანგში.

ამის შესახებ ბიძინა ივანიშვილმა პარტიის ყრილობაზე განაცხადა დღეს, 30 დეკემბერს.

„ზუსტად სამი წლის წინ საზოგადოებას ვაცნობე ჩემი გადაწყვეტილება აქტიური პოლიტიკური პროცესებიდან დისტანცირების შესახებ. ახლა კი სამი წლის შემდეგ ჩემივე ინიციატივით პარტიის საპატიო თავმჯდომარის სტატუსით პოლიტიკურ ცხოვრებას ვუბრუნდები,“ — განაცხადა ბიძინა ივანიშვილმა

ივანიშვილი ქართულ პოლიტიკაში ოფიციალურად 2011 წელს გამოჩნდა, 2012 წლის საპარლამენტო არჩევნებამდე ერთი წლის წინ. 2012 წელს, საპარლამენტო არჩევნებში მის მიერ დაარსებული პარტიის – „ქართული ოცნების“ გამარჯვების შემდეგ ივანიშვილმა პრემიერ-მინისტრის პოსტი დაიკავა, რომელიც მან 2013 წელს დატოვა. მაშინ ივანიშვილმა თქვა, რომ პოლიტიკიდან წასვლის გადაწყვეტილება მის მიმართ არსებული „ჭარბი ნდობის“ გამო გადაწყვიტა.

თუმცა 2018 წელს ივანიშვილი პოლიტიკაში ოფიციალურად ისევ დაბრუნდა და „ქართული ოცნების“ თავმჯდომარე გახდა. 2021 წელს ივანიშვილმა ისევ განაცხადა, რომ პოლიტიკიდან მიდის და ამჯერად თქვა, რომ მისი „მისია შესრულებულია“ და „ოცნების“ გუნდს შეუძლია მისი „შრომის, ავტორიტეტისა და უნარების ღირსეულად ჩანაცვლება“.

დღეს, 2023 წლის მიწურულს, მან განაცხადა, რომ კვლავ ბრუნდება პოლიტიკაში და ამის მიზეზი „ქართული ოცნების“ „ადამიანური ცდუნებებისგან“ დაცვაა.

„ჩემი მთავარი მიზანი არა საარჩევნოდ პარტიის კიდევ უფრო გაძლიერება, არამედ ჭარბად მოძლიერებული გუნდის ადამიანური ცდუნებებისგან დაცვაა.

მმართველი პარტია საჭიროებს ახალ სიმძიმის ცენტრს და მიმაჩნია, რომ ჩემს მიერ ამ ახალი სიმძიმის ცენტრის მისიის შესრულება დღეს დროული და აუცილებელია. ამისათვის, 2-3 კაცთან კონსულტაციები ვეღარ იქნება საკმარისი და მიმაჩნია, რომ ქვეყნის წინაშე მდგარი ამოცანების შესრულება ჩემსა და გუნდს შორის ბევრად უფრო ფართო კონსულტაციებს და კოორდინაციას საჭიროებს“ – განაცხადა ივანიშვილმა.

წასვლის ეპიზოდებში ბიძინა ივანიშვილს ოფიციალური პოლიტიკური თანამდებობა არ ეჭირა, თუმცა მოქმედი პოლიტიკოსები პირები მუდმივად საუბრობდნენ მის როლზე, ოპონენტები კი მას ჩრდილოვან მმართველობაში ადანაშაულებდნენ და ამბობდნენ, რომ რეალურად, ქვეყანას კვლავ ივანიშვილი მართავს.

ხანძარი გაჩნდა დღეს, 30 დეკემბერს, ბათუმში, რუსთაველისა და ვაჟა-ფშაველას ქუჩების კუთხეში მდებარე კორპუსის ბინაში.

ადგილზე მობილიზებული იყო სახანძრო სამსახური.

„ბათუმელებს“ საგანგებო სიტუაციების მართვის სამსახურში უთხრეს, რომ ხანძარი უკვე ლიკვიდირებულია და ხანძრის შედეგად არავინ დაშავებულა.