ბათუმის ყინულის არენის ვერშემდგარი მშენებლობის ამბავმა შეიძლება გაგახსენოთ ყოფილი პრემიერის ცნობილი გამონათქვამი – „რა კორუფცია, რის კორუფცია. შეიძლება ვიღაცამ ვიღაცას ქართულ ჯიგრულ პონტში რამე, მაგრამ რა კორუფცია?“ – ოპოზიცია კი სხვაგვარად ფიქრობს და გამოძიებას ითხოვს.
გადახდილია 10 მილიონი ლარი, მაგრამ სამუშაო შესრულებული არ არის – ასეთია სახელმწიფო აუდიტის შეფასება, ბათუმში ყინულის არენისა და საცურაო აუზის მოწყობის ჩავარდნილ პროექტზე. ბათუმში, ლადო ასათიანის 27-ში ყინულის არენისა და საცურაო აუზის მოწყობის სამუშაოები აჭარის მთავრობამ 2017 წელს შეისყიდა.
აუდიტი არ აქცენტირებს ამაზე, თუმცა დოკუმენტებით დასტურდება, რომ ამ ამბავში საქართველოს პრემიერ-მინისტრიც მონაწილეობდა და აჭარის მთავრობას გადაწყვეტილებები დამოუკიდებლად არ მიუღია.
ამ თემას „ბათუმელები“ პროექტის მიმდინარეობის ყველა ეტაპზე აშუქებდა, 2022 წლის სექტემბერში კი გამოვაქვეყნეთ ჟურნალისტური გამოძიება, რომელშიც საუბარია შეუსრულებელ სამუშაოსა და არამიზნობრივ ხარჯვაზე, რომელიც მთავრობამ საარბიტრაჟო დავის თავიდან ასაცილებლად გასწია.
ყინულის მოედნისა და აუზის აშენებაზე 29 მილიონი დაიხარჯა – ადგილზე კი არც მოედანია, არც აუზი
თბილისში მიღებული გადაწყვეტილებები, რაზეც აუდიტი არ ამახვილებს ყურადღებას, ამ საქმის ახალი გარემოებაა. დოკუმენტების მიხედვით, შეუსრულებელი სამუშაოების ხარჯის დასაფარად პრემიერმა აჭარის მთავრობას თანხა სესხად მისცა.
იმ გარემოების გათვალისწინებით, რომ აჭარის მთავრობას, მიმწოდებელი კომპანიისთვის, Westincor limited-ისთვის გადასახდელი 6 მილიონ 810 022 დოლარი ბიუჯეტში გათვალისწინებული არ ჰქონდა, საქართველოს მთავრობამ შპს „სტადიონს“ სესხი მისცა. კონკრეტულად კი, პრემიერ ირაკლი ღარიბაშვილის გადაწყვეტილებით, აჭარის მთავრობამ სასამართლო გადაწყვეტილებების აღსრულების ფონდიდან 20 მილიონი ლარი გამოუყო.
ამ თანხის დაფარვა აჭარის მთავრობამ 2024 წლიდან უნდა დაიწყოს.
მსოფლიო საჭადრაკო ოლიმპიადის ჩასატარებლად, ფართობით უზრუნველყოფის მიზნით, სამშენებლო სამუშაოების შესყიდვა შპს „სტადიონს“ ზემდგომმა ორგანომ, აჭარის ფინანსთა და ეკონომის სამინისტრომ 2017 წლის 7 თებერვალს დაავალა. კომპანიამ დავალებას თავი დროულად ვერ გაართვა, რის გამოც „საზოგადოებრივი მნიშვნელობის ღონისძიების შეზღუდულ ვადებში განხორციელების მიზნით“ ხელშეკრულება გამარტივებული წესით გააფორმეს.
შეთანხმება ითვალისწინებდა ახალი საცურაო აუზისა და ყინულის დარბაზის საპროექტო სახარჯთაღრიცხვო დოკუმენტაციის შედგენასა და მშენებლობას ლადო ასათიანის ქუჩა № 27-ში მდებარე მიწის ნაკვეთებზე. ხელშეკრულების ღირებულება 19 მილიონ 990 002 დოლარით განისაზღვრა.
სასამართლო ექსპერტიზის ეროვნული ბიუროს დასკვნით, კომპანია Westincor limited-ის მიერ წარდგენილი ხარჯთაღრიცხვა არ შეესაბამებოდა საქართველოში მოქმედი ნორმატიული აქტების მოთხოვნებს. მონაცემები არ იძლეოდა სრულ ინფორმაციას შესასრულებელ სამუშაოებზე და არ იყო შედგენილი საბაზრო ფასების გათვალისწინებით.
ამ გარემოებების გათვალისწინებით მხარეებს შორის დავა დაიწყო, რაც ხელშეკრულების შეწყვეტით დასრულდა.
პროექტების მართვის კომპანიამ, ზემდგომთან შეთანხმებით, 2020 წლის 1 აპრილს Westincor limited-ს აცნობა ხელშეკრულების შეწყვეტის თაობაზე და ავანსის სახით გადახდილი 3 მილიონ 998 001 დოლარი ბანკიდან გამოითხოვა. ასევე, ხელშეკრულების შესრულების უზრუნველყოფის საგარანტიო თანხა – 999 500 დოლარი. ეს თანხა პროექტების მართვის კომპანიის ანგარიშზე ჩაირიცხა სრულად.
2021 წლის 20 დეკემბერს Westincor Limited-მა პირველი ფაზის მშენებლობაზე ფაქტობრივად გაწეული ხარჯების, ასევე შპს „სტადიონის“ მიერ გამოთხოვილი ხელშეკრულების შესრულების უზრუნველყოფის გარანტიით გათვალისწინებული თანხა და ვადაგადაცილებული გადახდების გამო დამატებით დარიცხული ჯარიმების, ჯამში სულ – 10 მილიონი აშშ დოლარის გადახდა მოითხოვა.
ფაქტობრივ ხარჯებთან დაკავშირებით, ექსპერტიზის ეროვნული ბიუროს დასკვნების საფუძველზე, 2021 წლის 29 დეკემბერს Westincor Limited-თან გაფორმდა მორიგების ხელშეკრულება, რომლის შესაბამისად შემსყიდველები იღებენ ვალდებულებას, მიმწოდებელ კომპანიას გადაუხადონ 10 მილიონ აშშ დოლარი.
პასუხისმგებელი პირების განმარტებით, მოთხოვნილი თანხა კომპანიას გადაუხადეს მოწოდებული აპარატურის ვარგისიანობისა და ღირებულების გათვალისწინებით.
აუდიტის პერიოდში წარმოდგენილი ინფორმაციის შესაბამისად, 2022 წლის პირველი მაისის მდგომარეობით, მორიგების აქტით განსაზღვრული გრაფიკის შესაბამისად, Westincor Limited-ზე გადახდილია 57 84 162 აშშ დოლარი. შესრულებული სამუშაოების ღირებულების განსაზღვრასთან დაკავშირებით, ექსპერტიზის ეროვნული ბიუროს დასკვნის შესაბამისად ირკვევა, რომ სულ შესრულებულია 1 მილიონ 810 375 აშშ დოლარის ღირებულების პირველი ეტაპის სამუშაოები.
აუდიტის განმარტებით, ექსპერტიზის ეროვნული ბიუროს მიერ გაცემულია დასკვნა, რომლის შესაბამისადაც, შესრულებულ სამუშაოთა ღირებულება მოქმედი კანონმდებლობას შესაბამისადაა განსაზღვრული.
ანგარიში სახელმწიფო აუდიტის სამსახურმა 7 აპრილს გამოაქვეყნა.
