Batumelebi

მალხაზ სონღულაშვილი: ”ველოდები დროს, როდესაც ბათუმში გაიხსნება ახალი მეჩეთი”

მალხაზ სონღულაშვილი

მან მუსლიმანური რელიგიის წარმომადგენლებს წინასწარმეტყველ მუჰამედის დაბადებიდან 1443 წელი მიულოცა.

„საქართველოში ტრადიციად მკვიდრდება ის, რომ ქრისტიანები და მუსლიმანები ულოცავენ ერთმანეთს წინასწარმეტყველ მუჰამედის დაბადების დღეს და ქრისტეს შობას. ეს არის ნიშანი იმისა, რომ ჩვენს ქვეყანაში არის სურვილი და შესაძლებლობა ვაშენოთ მშვიდობიანი საქართვლო. ჩვენ უნდა ვზეიმობდეთ იმ რელიგიური მრავალფეროვნებით, რომელიც საქართველოშია. მე ვამაყობ მათით. მათ თავიანთი წვლილი შეაქვთ ჩვენი ქვეყნის განვითარების საქმეში“ – თქვა მალხაზ სონღულაშვილმა.

ბათუმში 29 წლის მამაკაცი მე-8 სართულიდან ვარდნით დაიღუპა

მამაკაცის დაღუპვის შესახებ ინფორმაცია „ბათუმელებს“ სასწრაფო დახმარებაში დაუდასტურეს. „ბათუმელების“ ინფორმაციით, გარდაცვლილი 29 წლის იმედა მჟავანაძეა, რომელიც ქედის მუნიციპალიტეტში ცხოვრობდა. ის ბათუმში ახლობლის ქორწილში ჩამოვიდა. ზემოთ აღნიშნულ მისამართზე სწორედ ქორწილიდან მივიდა.

გარდაცვლილის ცხედარი ექსპერტიზის ბიუროშია გადატანილი. ფაქტს სამართალდამცველები შეისწავლიან.

დაბრკოლებათა გადალახვაში გიორგი ჩხარტიშვილი მეოთხე ადგილზე გავიდა

საქართველოს საცხენოსნო სპორტის ეროვნული ფედერაციის წევრის გიორგი აფციაურის შეფასებით ბათუმის გუნდმა წარმატებით იასპარეზა.

„კარგად ვითარდება ბათუმის გუნდი. შეჯიბრებაზე ძლიერი კონკურენცია იყო. მომავალში უკეთესი ცხენები თუ ეყოლებათ ბათუმის გუნდს უფრო დიდი შედეგი ექნება“ – აღნიშნა მან.

საცხემოსნო სპორტში – დაბრკოლებათა გადალახვაში (რომელიც ოლიმპიურ სახეობას განეკუთვნება) საქართველოს თასის გათამაშება ჭაბუკთა და პროფესიონალებს შორის თბილისში ლისის ჰიპოდრომზე გაიმართა. მასში ბათუმის, ფოთის, მუხიანის, ახალუბნის და თბილისის იპოდრომის საცხენოსნო კლუბები და 25 სპორტსმენი მონაწილეობდა.

ბათუმის საცხენოსნო კლუბი შეჯიბრებაზე სამი სპორტსმენით გამოვიდა. ჭაბუკებს შორის იასპარეზა 12 წლის ნიკა ხაბაძემ, რომელმაც მე-6 ადგილი დაიკავა. პროფესიონალებს შორის გამოვიდნენ გიორგი ძინძიბაძე და გიორგი ჩხარტიშვილი. ამ უკანასკნელმა ცხენით – ტენელა ჩევერსით იასპარეზა, რომლის ღირებულება 15000 ლარია. პირველი ადგილი კი პროფესიონალებს შორის თბილისის ჰიპოდრომის კლუბის წევრმა გოგა ქელხიშვილმა მოიპოვა. ჭაბუკთა თასი კი ფოთის საცხენოსნო კლუბმა მოიგო.

ბათუმელმა მხედრებმა წინა მოსამზადებელი ეტაპი ხუთი დღე თბილისში გაიარეს, ორი ცხენით: ზაგრები, ტენელა ჩევერსით.

ბათუმის საცხენოსნო კლუბის დირექტორის ბექა ხაბაძის შეფასებით ბათუმელმა სპორტსმენებმა შედეგიანად იასპარეზეს.

„შედეგიანი გამოსვლა იყო, იმ ცხენებთან შედარებით რომელთა ღირებულება 50 ათასი ევროა. ამიტომ ასეთ შედეგსაც არ ველოდით“ – გვითხრა მან.

გიორგი აფციაურის ინფორმაციით კლუბების სპორტსმენები მომდევნო შეჯიბრებებისთვის მოემმზადებიან.

„5-7 ივნისს „კავკასიის თასი“ გათამაშდება, რომლის საპრიზო ფონდი დაახლოებით 17 000 ევრო იქნება. ველოდებით გუნდებს, აზერბაიჯანიდან, სომხეთიდან, რუსეთიდან, თამაშდება ოლიმპიური ლიცენზიები. ვინც მეტ ქულას დააგროვოს, ის მოიგებს მსოფლიოს თასისა და ოლიმპიურ ლიცენზიასაც“.

მანამდე კი საცხენოსნო კლუბების მხედრები მსოფლიოს თასის ეტაპისთვის, ბაქოს „ოთხვარსკვლავიანი“ შეჯიბრებისთვის მოემზადებიან, სადაც ოლიმპიადის ქულები და 250 000 ევრო საპრიზო ფონდი გათამაშდება.

საცხენოსნო სპორტში – დაბრკოლებათა გადალახვაში საქართველოს თასის გათამაშება საქართველოს საცხენოსნო სპორტის ეროვნული ფედერაციის ორგანიზებითა და „ვი-თი-ბი ბანკის“ სპონსორობით ჩატარდა. გამარჯვებულებს თასები და მედლები გადასცეს.

ქედა 6 სპორტულ ღონისძიების ორგანიზებას შეისყიდის

ქედის სასპორტო სკოლა – ადმინისტრაციული შენობა კალათბურთის დარბაზით, ჭიდაობის დარბაზი და ფეხბურთის მოედანი

ეს სპორტული ღონისძიებებია:

დასავლეთ საქართველოს პირველობა მაგიდის ჩოგბურთში, (ჩატარდება ქუთაისში),

ზარიბეგ ბერიაშვილის სახელობის ტურნირი თავისუფალი ჭიდაობაში (ჩატარდება თბილისში),

კობა კაკალაძის სახელობის ტურნირი თავისუფალი ჭიდაობა (ჩატარდება ქობულეთში),

რომან რურუას სახელობის საერთაშორისო ტურნირი ბერძნულ-რომაული სტილით ჭიდაობაში (ჩატარდება მცხეთაში),

დავით ციმაკირიძის სახელობის ტურნირი თავისუფალი ჭიდაობაში (ჩატარდება თბილისში)

გარსევანიშვილის სახელობის ტურნირი მაგიდის ჩოგბურთში (ჩატარდება თელავში).

სპორტული მომსახურებების ორგანიზებაზე ტენდერი ქედის მუნიციპალიტეტმა ტენდერი 14 აპრილს გამოაცხადა. ტენდერის სავარაუდო ღირებულება 12670 ლარია.

იოჰან კანდელინის მიმართვა უმცირესობებს: „ნუ ახდენთ საკუთარი თავის იზოლირებას“

„საკუთარი თავის იზოლირებას თქვენ თვითონ ნუ ახდენთ, იმიტომ რომ უმრავლესობას სურს უმცირესობის იზოლირება. უმცირესობა არის ზეწოლის ქვეშ და მთელს მსოფლიოში მათ მიმართ ხორციელდება იერიში. ამის მიზეზი არის ის, რომ ძალიან ცოტაა დიალოგია და სურვილი იმისა გაუგონ უმცირესობებს. დღეს მთელ მსოფლიოში ყველა საუბრობს ადამიანის უფლებებზე. მაგრამ მე მინდა ვისაუბრო ადამიანის პასუხისმგებლობაზე, რადგან მგონია, რომ ჩვენ შეგვიძლია შევცვალოთ მსოფლიო თუ ადამიანის პასუხისმგებლობას დავაყენებთ ადამიანის უფლებაზე მაღლა. მე მგონი ეს უნდა იყოს ათვლის წერტილი. თუ ჩვენ ამას შევძლებთ ყველა რელიგიაში მოვიპოვებთ მეგობრებს“.

თავის გამოსვალაში იოჰან კანდელინმა ორი წლის წინ ჭელაში მინარეთის დემონტაჟს ფაქტზეც ისაუბრა: „ამ ფაქტმა დიდი საერთაშორისო ყურადღება გამოიწვია. ეს იყო გულში ჩაცემული დანა მუსლიმთა საზოგადოებისთვის“.

რელიგიის თემასთან დაკავშირებით მან ხაზი გაუსვა მედიის როლს და ინფორმაციის სწორად მიწოდების მნიშნელობას საზოგადოებისთვის: „როცა უმრავლესობა იწყებს პრობლემების შექმნას უმცირესობისთვის, ეს ყოველთვის იწყება არასწორი ინფორმაციით ან ინფორმაციის ნაკლებობით. დეზინფორმაცია – ეს არის პირველი ნაბიჯი უმცირესობის წინააღმდეგ; დეზინფორმაცია მასმედიის საშუალებით, ტელევიზიით, რადიოთი. მეორე ნაბიჯი ეს არის დისკრიმინაცია, რომელიც გამორიცხავს იმას, რომ უმცირესობები მუშაობდნენ ოფისებში, გახდნენ მასწავლებლები, პროფესორები. საბოლოო ჯამში უმცირესობა ის არის, ვისაც არ ენდობა უმრავლესობა. ნდობა კი დაკარგულია მედია საშუალებებით გადაცემული დეზინფორმაციის გამო. მესამე ნაბიჯი ეს არის დევნა. სახელმწიფოს უნდა ჰქონდეს კანონი, რომელიც კრძალავს დისკრიმინაციას უმცირესობების მიმართ. საზოგადოებამ რაზეც ყველაზე მეტად უნდა ვიმუშავოთ, ეს არის პლურალიზმი, სადაც მრავალრელიგიური და მრავალკულტურული საზოგადოება მხარს დაუჭერს თანასწორშესაძლებლობებს“.

თავისი გამოსვლის ბოლოს იოჰან კანდელინმა იმედი გამოთქვა, რომ კონფერენცია ყოველწლიურად გაიმართება. „ამ კონფერენციით ჩვენ სამშვიდობო მესიჯს გავუგზავნით მსოფლიოში მყოფ მუსლიმანებს, ქრისტიანებს და ყველა სეკულარულ საზოგადოებას“, – დასძინა მან.

ჰესის მშენებელი კომპანია თანამშრომლების გარდაცვალებაზე: დაზარალებული ოჯახები კომპენსაციას მიიღებენ

„17 აპრილს საღამოს დაახლოებით 7 საათზე დიდაჭარის სამშენებლო მოედანზე მომხდარი უბედური შემთხვევის შედეგად გარდაიცვალა ჩვენი კომპანიის ,,აგე ბათუმის“ ორი თანამშრომელი, საქართველოს მოქალაქე პაატა იაკობაძე და თურქეთის მოქლაქე აჰმედ ჩაქმაქი, ხოლო დაშავებული თენგიზ პაქსაძე მკურნალობას განაგრძობს ბათუმის სამედიცინო ცენტრ ,,მედინაში“.

ენ ღრმა მწუხარებას გამოთქვამთ და ვუსამძიმრებთ დაღუპული თანამშრომლების ოჯახებს. კომპანიის უსაფრთხოების სამსახური დეტალურად სწავლობს უბედური შემთხვევის გამომწვევ მიზეზებს და შესაბამისად, მიღებული იქნება ყველა საჭირო ზომა რათა მომავალში არ განმეორდეს მსგავსი ტრაგედია. ჩვენ მზად ვართ ვუზრუნველყოთ ღია და გამჭვირვალე კომუნიკაცია მედიასთან და საზოგადოებასთან.

ამასთან, კომპანია სრულად აცნობიერებს პასუხისმგებლობას დაღუპულთა და დაშავებულთა ოჯახების წინაშე. კომპანია მოახდენს დაზარალებული ოჯახების სათანადო კომპენსირებას და ყველა ღონეს იხმარს, რომ დაშავებული თენგიზ პაქსაძე ძალიან მალე დაუბრუნდეს ჩვენს გუნდს“.

რიჩარდ ნორლანდი: საქართველოს ნამდვილად შეუძლია იამაყოს შემწყნარებლობის საუკუნოვანი ტრადიციით

რიჩარდ ნორლანდი: „რელიგიათაშორის დიალოგი უმნიშვნელოვანესია განსაკუთრებით ამ პერიოდში, როცა საქართველო გახლავთ ნაწილი ამ დიალოგისა, რომელიც მიმდინარეობს ახლო აღმოსავლეთში.საქართველოს ნამდვილად შეუძლია იამაყოს იმ შემწყნარებლობის საუკუნოვანი ისტორიული ტრადიციით, რომელიც მას აქვს და რომელიც არის მოდელი მშვიდობიანი თანაარსებობისა სხვადასხვა რელიგიის წარმომადგენლებს შორის. ახლო აღმოსავლეთში მიმდინარე მოვლენების ფონზე საქართველოში რელიგიათა შორის დიალოგი უმნიშვნელოვანესია. საქართველოს შეუძლია იამაყოს იმ შემწყნარებლობით, საუკუნოვანი ისტორიული ტრადიციებით, რომელიც მას აქვს. ეს არის მოდელი მშვიდობიანი თანაარსებობისა, სხვადასხვა რელიგიურ წარმომადგენლებს შორის“.

ელჩის თქმით, „ჩვენ უნდა გავაორმაგოთ ძალისხმევა იმისთვის, რომ თითოეული ადამიანისთვის მისი უფლება აღმსარებლობისა თუ განათლების იყოს უზრუნველყოფილი“.

რიჩარდ ნორლანდის აზრით, საქართველო სწორედ ამას უჭერს მხარს, ხოლო ამ საქმეში საქართველოს აშშ-ის სახით ჰყავს მხარდამჭერი.

,,ევროკავშირი და ნატო’’ – დისკუსია მოსწავლეებთან

ვანო ჩხიკვაძე: ჩვენი ქვეყნის პოლიტიკა ორი მიმართულებით მიმდინარეობს. ერთი გახლავთ ევროკავშირში ინტეგრაცია და მეორე _ ნატოში. ევროკავშირი პოლიტიკური გაერთიანებაა, ხოლო ნატო, ანუ ჩრდილოეთ ატლანტიკური ალიანსი, არის სამხედრო პოლიტიკური გაერთიანება. 66 წლის წინ ბრიუსელში ხელი მოეწერა შეთანხმებას ჩრდილო ატლანტიკური ალიანსის შექმნის შესახებ.მაშინ 12 ქვეყანა იყო გაერთიანებული:აშშ, კანადა – ჩრდილო ამერიკის კონტინენტიდან და ევროპის კონტინენტის ქვეყნები (ბელგია, ნიდერლანდები, ისლანდია, იტალია და ა.შ). ბლოკი, რომელიც 12 ქვეყნისგან შედგებოდა, ნელ-ნელა ფართოვდებოდა და იძენდა ახალ-ახალ წევრებს პირველი გაფართოება იყო 1952 წელს, ანუ დაარსებიდან ორი წლის შემდეგ და მასში გაერთიანდა თურქეთი. ნატოს წევრია ასევე საბერძნეთიც.

თუ გადავავლებთ თვალს უახლოეს ისტორიულწარსულს, მთელი ამ წლების მანძილზე, ოთხივე პრეზიდენტის დროს, საქართველო პირობითად მიემართებოდა ნატოსკენ. პირველი, რა თქმა უნდა, იყო როდესაც დაიშალა საბჭოთა კავშირი და ჩვენ გამოვეყავით მას. პირველად ეს იყო დიპლომატიური ურთიერთობის დამყარება და მისიის გაგზავნა ნატოში, 1998 წელს საქართველომ დანიშნა ელჩი ბრიუსელში.პირველი ერთობლივი მუშაობა ჩატარდა 2001 წელს ფოთში.

2003 წლიდან საქართველომ ნატოსკენ მიმავალი ტემპი ძალიან გაზარდა. ჩვენ გვყავს მეზობლად ისეთი ქვეყანა, რომელთანაც მარტო დარჩენა, ფაქტობრივად,შეუძლებელია და სწორედ ამიტომ ცდილობს საქართველო შეუერთდეს ნატოს.ეს სწრაფვა გაიზარდა ,,ვარდების რევოლუციის’’ შემდეგ.

2004 წლიდან ნატოს ჯარისკაცებთან ერთად აისაფის მისიაში იღუპებიან ქართველი ჯარისკაცებიც, რომლებიც,ფაქტობრივად, გზას უკვალავენ საქართველოს ნატოსკენ. ერთ-ერთი მნიშვნელოვანიქვაკუთხედი იყო ბუქარესტის სამიტი 2008 წელს. ეს სამიტი ყოველ ორ წელიწადში ტარდება. ეს არის ყველაზე დიდი კრება, სადაც ნატოს ყველა წარმომადგენელი იღებს მონაწილეობას და მსჯელობენ მნიშვნელოვან საკითხებზე. მაგალითად, უნდა გაფართოვდეს თუ არა ნატო და მიიღონ თუ არა ახალი ქვეყნები წევრებად.

2008 წელს რუმინეთის დედაქალაქ ბუქარესტში ჩატარდა ნატოს კრება, სადაც ჩვენი მოლოდინი იყო დიდი, გვეგონა, რომ დაიწყებოდა ნატოში შესვლის პროცესი, თუმცა ბუქარესტის სამიტზე არ იყო ერთსულოვნება. გერმანიისა და საფრანგეთის წარმომადგენლები მიიჩნევდნენ, რომ მაპის მიღების შემთხვევაში ეს გამოიწვევდა რუსეთის გაღიზიანებას, რის შემდეგ საქართველომ მიიღო დაპირება იმის შესახებ, რომ ის აუცილებლად შევა ნატოში.

თუ შეხვალ ნატოში, ხარ დაცული. ნატო – ეს არის თავდაცვითი გარანტია. ნატოში შესასვლელად საჭიროა კონსესუსი, რომელიც, ჩვენ არ გაგვაჩნია.

2014 წელს უელსში გადაწყდა, რომ საქართველომ უნდა მიიღოს არსებულიპაკეტი. თუმცა ბევრი პოლიტიკური მხარე ამ პაკეტს სხვადსხვანაირად აღიქვამს. ერთი მიიჩნევს, რომ ეს გამოიწვევს რუსეთის აგრესიას, მეორენი კი ფიქრობენ, რომ ეს ძალიან კარგია. ნატოს სწავლებისა და შეფასების ცენტრთან დაკავშირებით მიმდინარეობს ადგილის შერჩევა. ვარაუდობენ ორ ადგილს: ერთ-ერთი არის კრწანისში, მეორე _ ვაზიანში. სავარაუდოდ მაისის დასაწყისში გვეცოდინება პასუხი, სადაც დაიწყება ერთობლივი წვრთნები.

ნატოში გაწევრიანება გვჭირდება ძალიან, რადგან ჩვენ ვცხოვრობთ რუსეთთან და არ ვიცით, როდის დაგვესხმება იგი თავს, მაგალითად, როგორც უკრაინას. რეალურად ნატო არის ერთადერთი საშუალება რუსეთისგან თავდასაცავად, რადგან ამის შემდეგ ჩვენ არ გვექნება იმის შიში, რომ რუსეთი დაქოქავს ტანკს, შემოიჭრება და მიითვისებს ჩვენს ტერიტორიებს. ნატო არ ცნობს ჩვენს ოკუპირებულ ტერიტორიებს დაკარგულად და ამას მხარს უჭერს ყველა ქვეყანა. 2008 წლის ომი რეალურად გამოიწვია იმან, რომ საქართველო მიისწრაფოდა ნატოში.

არჩილ თურმანიძე, დისკუსიის მონაწილე: ყოფილა თუ არა ისეთი შემთხვევა, როდესაც სახელმწიფო შესულა ნატოში და დაკარგული ტერიტორიები დაუბრუნებია?

ვანო ჩხიკვაძე: ყოფილა ამის პრეცედენტი და ეს იყო გერმანია, რომელმაც მოახერხა და გაერთიანება შეძლო. თუ უნდა საქართველოს გაერთიანება, ის აუცილებლად უნდა შევიდეს ნატოში.

გიორგი სურმანიძე, დისკუსიის მონაწილე: ნატოში შესვლის შემდეგ თვითონ ნატო ქვეყანას ეხმარება ტერიტორიების დაბრუნებაში?

ვანო ჩხიკვაძე: არა, რადგან ამ შემთხვევაში ნატო ვალდებულია დაგვიცვას გარედან შემოჭრილი აგრესიისაგან და არა თავისი ძალებითა და იარაღით დაგვეხმაროს ტერიტორიების დაბრუნებაში. რუსეთი თუ გადაწყვეტს თავისი აგრესია გამოავლინოს, ამ შემთხვევაში ნატო ვალდებულია რუსეთისაგან დაგვიცვას. ახლახან, როდესაც რუსეთის ბომბდამშენები მიუახლოვდნენ თურქეთის საჰაერო საზღვრებს, თურქეთიდან ნატოს ავიაგამანადგურებლებმა გააცილეს ბომბდამშენები, რაც იმას ნიშნავს, რომ ნატომ აჩვენა თავისი ძალა.

ედუარდ შამილაძე: მე მაინტერესებს რა გვიშლის ხელს ევროკავშირში უფრო ადრე შესვლაში?

ვანო ჩხიკვაძე: ევროკავშირში გაწევრიანებას არაფერი უშლის ხელს, აქ უფრო მეტად ეკონომიკაზეა დამოკიდებული ყველაფერი. ჩვენი შეიარაღებული ძალები გაცილებით უფრო უკეთეს მდგომარეობაში არიან, ვიდრე ეკონომიკა, შესაბამისად ეს ერთ-ერთი ფაქტორი გახლავთ დაბრკოლების. მეორე გახლავთ ასოცირების ხელშეკრულება, რომელსაც ახლახან მოაწერა ხელი საქართველომ, ძალიან მნიშვნელოვანია რამდენად კარგად განვახორციელებთ მას. თუმცა ასოცირების ხელშეკრულება არ ნიშნავს იმას, რომ საქართველო აუცილებლად გახდება ევროკავშირის წევრი და არც იმას, რომ არავითარ შემთხვევაში არ გახდება. ნატოს შემთხვევაში საქართველოს პირობა აქვს მოცემული, რომ საქართველო გახდება ნატოს წევრი, როგორც კი კონკრეტული კრიტერიუმებით დაკმაყოფილდება. ევროკავშირისგან ასეთი პირობა ჯერ არ არის.

გიორგი ბოლქვაძე: ჩვენ ვისწრაფით ნატოსკენ, მაგრამ რამდენად დაგვთმობს რუსეთი?

ვანო ჩხიკვაძე: რუსეთის გადასაწყვეტი არ არის ჩვენი ბედი, რუსეთი არის ცალკე სახელმწიფო, რა თქმა უნდა, იბრძვის ის, მაგრამ არც იმის ილუზია უნდა გვქონდეს, რომ ერთ დღეს ის განაცხადებს, რომ თავი დაანება საქართველოს და არც იმის ილუზია უნდა ჰქონდეს ხალხს, რომ რუსეთი გადაწყვეტს ჩვენს ბედს.

დავით ხაჩიბანი: რუსეთმა ნატოს რომელიმე ქვეყანას ომი თუ გამოუცხადა, რა მოხდება ასეთ დროს?

ვანო ჩხიკვაძე: თუ რუსეთმა დაარღვია ნატოს რომელიმე წევრი ქვეყნის ტერიტორიული მთლიანობა, მას საკადრის პასუხს გასცემენ.

მარიკა აბულაძე: ჩემი პოზიცია განსხვავებულია, ამ საუბრიდან ისე გამოვიდა, რომ რუსეთი არის დამპყრობელი. როდესაც ჩვენ საბჭოთა კავშირში ვიყავით, ეკონომიკა უმაღლეს დონეზე იყო განვითარებული, როცა დაიშალა საბჭოთა კავშირი, ეკონომიკაც განადგურდა. 2008 წლის ომის შემდეგ მთლიანად ჩაიკეტა ბაზარი. ეს როგორ უნდა დავარეგულიროთ?

ვანო ჩხიკვაძე: საბჭოთა კავშირი დაიშალა და აღარ აღდგება, ევროკავშირთან გვაქვს ხელშეკრულება დადებული და გვაქვს მასთან თავისუფალი ვაჭრობა. 2006 წლამდე ქართული ყველანაირი ხარისხის ღვინო შედიოდა რუსულ ბაზარზე. ერთ მშვენიერ დღეს, როდესაც საქართველო არ მოიქცა ისე, როგორც რუსეთს მოეწონებოდა, მან ეს ბაზარი დაგვიკეტა. რუსეთის ბაზარზე შეიძლება შეიტანო პროდუქტი, მაგრამ ამ ბაზარზე არ უნდა იყო დამოკიდებული, რადგან არასაიმედოა.

„აჭარისწყალი ჯორჯია“ ჰესის მშენებლობაზე ადამიანების დაღუპვასთან დაკავშირებით განცხადებას ავრცელებს

„კომპანია ,,აჭარისწყალი ჯორჯია“ ღრმა მწუხარებას გამოთქვამს 2015 წლის 17 აპრილს კონტრაქტორი კომპანიის თანამშრომლების გარდაცვალების და დაშავების გამო. ვუსამძიმრებთ და სრულ მხარდაჭერას ვუცხადებთ გარდაცვლილთა და დაზარებულთა ოჯახებს.

ჩვენი კომპანიის მთავარ პრიორიტეტს წარმოადგენს პროექტის მშენებლობის პროცესში თითოეული დასაქმებული ადამიანის შრომის უსაფრთხოების მაღალი სტანდარტის დაცვა. ჩვენ შეგვძრა ამ უბედურმა შემთხვევამ და პროექტის გუნდმა დაუყოვნებლივ დაიწყო შიდა მოკვლევა მომხდართან დაკავშირებით.

ამ მომენტისათვის სამართალდამცავი ორგანოების მიერ მიმდინარეობს გამოძიება უბედური შემთხვევის გამომწვევი მიზეზების დასადგენად და პროექტის გუნდი სრულად თანამშრომლობს გამოძიებასთან. დამატებითი განცხადება მომხდართან დაკავშირებით გაკეთდება ზემოთაღნიშნული მოკვლევის დასრულების შემდგომ“.

რელიგია და მშვიდობა – რაზე მსჯელობენ საერთაშორისო ფორუმზე ბათუმში

ფორუმის ფარგლებში დღეს გაიმართა მრგვალი მაგიდა სახელწოდებით – „მედიის როლი რელიგიური და კულტურული მრავალფეროვნების წარმოჩენის საქმეში“. ქართველ მუსლიმთა კავშირი ინფორმაციით, დღევანდელ ფორუმზე მრავალ თემაზე ისაუბრეს, შესაბამისად, დღევანდელ ფორუმს ბევრი მომხსენებელი ჰყავდა.

„ამერიკის ბაპტისტი ქალების” წარმომადგენელმა ისაუბრა ქალების როლზე მშვიდობის მშენებლობაში, ქალების როლზე რელიგიური თუ სხვა სახის შემწყნარებლობის დამკვიდრებაში.

უკრაინის მუფთის, საიდ ისმაილოვის მოხსენების თემა იყო ქრისტიანულ-მუსლიმური დიალოგი და თანამშრომლობა უკრაინაში – ისტორია და თანამედროვე ეტაპი.

ამერიკული საბჭოები – “Open World-ის” წარმომადგენელმა, მომხსენებელმა წარმოადგინა პრეზენტაცია “Open World-ისა” და აშშ-ში სასწავლო ტურის შესახებ. მან ისაუბრა ამერიკულ ტოლერანტობაზე და დასძინა რომ პრობლემები, რომელთა წინაშეც ჩვენ დღეს ვდგავართ აშშ-მაც გამოიარა და ჩვენ მის გამოცდილებაზე დაკვირვებით უნდა შევეცადოთ ისეთივე კარგი შედეგის მიღწევას, როგორსაც დღევანდელ აშშ-ში მიიღწა.

დოქტორი მუჰამედ შაფიქიმ თავის მოხსენებაში ისაუბრა ისაუბრა „რელიგიურ დიალოგზე, მის სახეებსა და მნიშვნელობაზე“.

ბათუმის შოთა რუსთაველის სახელმწიფო უნივერსიტეტის ლექტორის, ისლამთმცოდნე პროფესორის აბესალომ აბრამიძის თემა იყო „ისლამოფობია: მითი თუ რეალობა?!“ მომხსენებელმა რიტორიკულ კითხვას თავადვე უპასუხა და აღნიშნა, რომ საქართველოში ისლამოფობიას ადგილი არ აქვს.

რელიგიის სახელმწიფო სააგენტოს წარმომადგენელმა, ზაზა ვაშაყმაძემ ისაუბრა სახელმწიფო პოლიტიკაზე ქვეყანაში არსებული სხვადასხვა რელიგიების მიმართ. მისი თქმით, უმთავრესია ის ფაქტი, რომ სახელმწიფოს მიზანია შეინარჩუნოს თანასწორუფლებიანი და ტოლერანტული გარემო ქვეყანაში.

დეკანოზმა გიორგი მამალაძემ ისაუბრა რელიგიურ შემწყნარებლობაზე ქართულ ისტორიულ გამოცდილებაში. მისი თქმით, სახელმწიფოში არსებულ ყველა რელიგიურ კომპენსიას აქვს თანაბარი უფლებები და თანაბარია სახელმწიფოს წინაშე. ასევე აღნიშნა, რომ საქართველოში სხვადასხვა რელიგიის წარმომადგენლების მშვიდობიანი თანაცხოვრება ის მშვიდობაა, რომლისთვისაც უნდა იბრძოდეს მსოფლიო.

ქართველ მუსლიმთა კავშირის მიერ გავრცელებული განცხადების მიხედვით, „ბათუმის საერთაშორისო ფორუმი – რელიგია და მშვიდობა“ გაიხსნება ბათუმში, სასტუმრო „შერატონში“ კონფერენცია „ბათუმის საერთაშორისო ფორუმი – რელიგია და მშვიდობა“ მიმდინარეობს. ღონისძიება წმინდა მუჰამმედ შუამავლის დაბადების კვირეულს ეძღვნება და მიზნად ისახავს რელიგიათაშორისი დიალოგის გაღრმავებასა და რელიგიების როლის წარმოჩენას მშვიდობის საკითხში“.

რელიგია და მშვიდობა ბათუმში

კონფერენციას ასევე ესწრება ნორვეგიის ყოფილი პრემიერ-მინისტრი, ამჟამად „ევროპაში მშვიდობისა და ადამიანის უფლებათა ცენტრის“ პრეზიდენტი კიელ მაგნე ბონდევიკი, ევროპული ორგანიზაცია „პირველი ნაბიჯის ფორუმის“ ხელმძღვანელი იოჰან კანდელინი, ოქსფორდის უნივერსიტეტის პროფესორი პაულ ფიდესი და აშშ-სა და თურქეთის ელჩები საქართველოში რიჩარდ ნორლანი და იასინ თემიზქანი. ამერიკიდან, უკრაინიდან მოწვეული სტუმრები, მათ შორის ურაიის მუფთი საიდ ისმაილოვი, რომელმაც თავის გამოსვლაში ქრისტიანულ-მუსლიმნურ დიალოგის უკრაინულ გამოცდილებაზე ისაუბრა. ასევე ვირჯინია ჰოლსტრომი – ამერიკის ბაპტისტი ქალების წარმომადგენელი, რომელმაც ამერიკაში არსებულ რელიგიის მიმართ დამოკიდებულებებზე გაამახვილა ყურადღება, სადაც მისი თქმით კულტურულად ყველაზე მრავალფეროვანი ქვეყანაა.

ფორუმზე ხაზი გაესვა განთლების როლს რელიგიურ კონფესიებს შორის დაპირისპირების პრობლემის მოსაგვარებლად.

ფორუმი ნორვეგიის ყოფილი პრემიერ-მინისტრის კიელ მაგნე-ბონდევიკისა და სხვა მომხსნენებლების გამოსვლით გაგრძელდება და საღამოს დისკუსიით დასრულდება.

ნორვეგიის ყოფილი პრემიერ-მინისტრის კიელ მაგნე-ბონდევიკი თავის გამოსვლაში ისაუბრებს თემაზე რელიგია როგორც საფუძველი ომის თუ მშვიდობის.

ფორუმი “ქართველ მუსლიმთა კავშირის” ორგანიზებით ბათუმში პირველად იმართება.

ბათუმში გორგილაძის ქუჩა შარტავას ქუჩამდე გაგრძელდება

გორგილაძის ქუჩა

მერიის ვებგვერდზე გამოქვეყნებული ინფორმაციის თანახმად ხელშეკრულების ფარგლებში გათვალისწინებულია გორგილაძის ქუჩის გაგრძელება ჯავახიშვილიდან შარტავას ქუჩის მიმდებარე ტერიტორიამდე.

ღონისძიების ფარგლებში დაგეგმილია: 5754 კვ.მ მოცულობაზე ერთი ფენა 7სმ სისქის ასფალტბეტონის მსხვილმარცვლოვანი საფარისა და 12757 კვ.მ. მეორე ფენა 5 სმ სისქის მკვრივი წვრილმარცვლოვანი ასფალტბეტონის საფარის დაგება; მოეწყობა 885 გრძ.მ. ბაზალტის ბორდიური; 2687 კვ.მ მოცულობაზე 5 სმ სისქის ბეტონის დეკორატიული ფილების დაგება; სანიაღვრე სისტემების სამუშაოების განხორციელება; დამონტაჟდება მიწისქვეშა სანაგვე კონტეინერები და გარე განათება.

აღნიშნული სამუშაოებისთვის ქალაქის ბიუჯეტიდან 1 მილიონ 657 ათასამდე ლარია გამოყოფილი. სამუშაოებს ტენდერში გამარჯვებული შპს ,,გზა“ ასრულებს.

ხულოს გამგეობამ სახანძრო ავზის მოსაწყობად ტენდერი გამოაცხადა

სახელმწიფო შესყიდვების ვებგვერდის მიხედვით ხულოს მუნიციპალიტეტის ოთხ სოფელში, სახანძრო ავზი, ტენდერში გამარჯვებულ კომპანიასთან ხელშეკრულების გაფორმებიდან 60 დღეში უნდა მოეწყოს.

შესყიდვის სავარაუდო ღირებულება 33 780 ლარით განისაზღვრება. წინადადებების მიღება 2015 წლის 24 აპრილს 12 საათზე დასრულდება.

სოფელ ჯაბნიძეებში სოფლის სახლი მოეწყობა

შესყიდვების სახელმწიფო ვებგვერდის მიხედვით ტენდერი 6 მაის დასრულდება. შესაბამისად, ამის შემდეგ გახდება ცნობილი, ვინ ააშენებს სოფელ ჯაბნიძეებში სოფლის სახლს ინდ. მეწარმე რამაზ ივანაძის პროექტით.

ტენდერში გამარჯვებულმა კომპანიამ სოფლის სახლი ორი თვის განმავლობაში უნდა ააშენოს.

ხულოში ჰესის მშენებლობაზე ორი ადამიანი დაიღუპა, ერთი – დაშავდა

ერთი გარდაცვლილი საქართველოს მოქალაქე, 30 წლამდე მამაკაცია, მეორე დაღუპული კი – თურქეთის მოქალაქე. საავადმყოფოში გადაყვანილი ასევე საქართველოს მოქალაქეა.

შინაგან საქმეთა სამინისტროს ინფორმაციით, მომხდართან დაკავშირებით გამოძიება უკვე დაწყებულია სისხლის სამართლის კოდექსის 240-ე მხულის მეორე ნაწილით, რაც სამთო, სამშენებლო ან სხვა სამუშაოს წარმოებისას უსაფრთხოების წესის დარღვევას ნიშნავს.

კონკურსი – ,,გააცოცხლე წარსული მომავლისათვის“

კონკურსში მონაწილეობის მიღება შეუძლიათ 14-დან 28-წლამდე ასაკის ახალგაზრდებს. დამატებითი ინფორმაციის მისაღებად დაუკავშირდით ციალა ქათამიძეს, ტელეფონის ნომერზე – 557 96 37 89. წარმოდგენილი ნამუშევრები კრეატიულობის, ტექსტის დახვეწილობისა და გადმოცემის ხარისხის მიხედვით, შეფასდება საკონკურსო კომისიის მიერ. გამარჯვებულ ახალგაზრდებს გადაეცემათ ფოტოაპარატები. კონკურსი ტარდება ორგანიზაცია ,,ბორჯღალის“ ინიციატივით, აჭარის ავტონომიური რესპუბლიკის სპორტისა და ახალგაზრდობის საქმეთა დეპარტამენტის ფინანსური მხარდაჭერით.

N1 საჯარო სკოლის ახალი კორპუსის მშენებლობაზე ტენდერი გამოცხადდა

პროექტის მიხედვით არსებული სკოლის მიმდებარე ტერიტორიაზე უნდა აშენდეს დამოუკიდებელი 4-სართულიანი შენობა. პირველ, მეორე და მესამე სართულებზე განთავსდება საკლასო ოთახები, ხოლო მეოთხე სართულზე სპორტული და სააქტო დარბაზები. შენობაში განთავსდება ასევე სველი წერტილები და დამხმარე სათავსოები. შენობა ადაპტირებული იქნება შშმ პირთათვის. შენობაში ასევე დამონტაჟდება სამგზავრო ლიფტი.

N1 სკოლის, ახალი კორპუსის მშენებლობა 2016 წლის 1 სექტემბრამდე უნდა დასრულდეს.

ელექტრონული ტენდერი (SPA150011395) განათლების სამინისტრომ, 16 აპრილს, ქვეპროგრამის – “საჯარო სკოლების ინფრასტრუქტურის გაუმჯობესების” ფარგლებში გამოაცხადა.

შესყიდვის სავარაუდო ღირებულება 1 273 609 ლარით განისაზღვრება. წინადადებების მიღება 2015 წლის 7 მაისს 13 საათსა და 30 წუთზე დამტავრდება.

სტუდენტური მოძრაობა ალტერნატივა: სტუდენტური თვითმმართველობის არჩევნები მიმდინარეობს დარღვევებით

„ამა წლის მიმდინარე სემესტრში, კონკრეტულად 5 მაისს დანიშნულია სტუდენტური თვითმმართველობის არჩევნები.

სტუდენტური მოძრაობა “ალტერნატივა” მონაწილეობას იღებს ამ არჩევნებში, ვინაიდან ჩვენს ერთ-ერთ ღირებულებას წარმოედგენს საუნივერსიტეტო სივრცეში ჯანსაღი პროცესების წარმოება.

სტუდენტური თვითმმართველობის ისტორიული გამოცდილება ცხადყოფს, თუ როგორ იყენებდნენ წლების განმავლობაში სახელმწიფო ინსტიტუტები თვითმმართველობას უნივერსიტეტში მიმდინარე პროცესების გასაკონტროლებლად და სამართავად, რისი დამსახურებაცაა სტუდენტებში კომფორმიზმისა და ინდეფერენტული დამოკიდებულების გაღვივება, რამაც ხელი შეუწყო არასოლიდარული საზოგადოების ჩამოყალიბებას და სტუდენტთა მასების გათიშვას მიმდინარე პროცესებისგან.

რაც შეეხება სტუდენტური თვითმმართველობის არჩევნებს, პროცესები მიმდინარეობს გაუმჭირვალედ და რიგი დარღვევებით, რომელის გამოიხატება შემდეგში:

1). ქვოტების არათანაბარი გადანაწილება ფაკულტეტებს შორის, მაგ: მენეჯმენტის სპეციალობა სადაც სწავლობს დაახლოებით 300 სტუდენტი გამოყოფილია 3 მანდატი, ხოლო სასურსათო ტექნოლოგიის სპეციალობაზე სადაც სწავლობს დაახლოებით 20 სტუდენტი ასევე გამოყოფილია 3 მანდატი. ყოველივე ეს კი ლოგიკას მოკლებილია და ბუნდოვანია მანდატების განსაზღვრის პრინციპი.

2). გაურკვეველია ახალი დებულების მიღების სამართლებრივი საფუძველი, (ვინ შექმნა, ვინ დაამტკიცა).

3). ცესკოს დებულების მიხედვით კანდიდატს ხმას აძლევს ფაკულტეტის სტუდენტი, ხოლო ცესკოს დადგენილების მიხედვით ხმის მიცემის უფლება აქვს კონკრეტული სპეციალობის სტუდენტს.

ასევე უნდა აღინიშნოს, რომ ერთ-ერთი პრობლემაა წინა საარჩევნო, სააგიტაციო და შუალედური გამოცდების პერიოდის დამთხვევა, რაც ქმნის არახელსაყრელ გარემოს იმისათვის, რომ კანდიდატებმა აწარმოონ ჯანსაღი სააგიტაციო პროცესები.

ყოველივე ზემოთ მოხსენებულიდან გამომდინარე სტუდენტური მოძრაობა “ალტერნატივა” მიიჩნევს, რომ დროულად უნდა აღმოიფხვრას ყველა პროცედურული დარღვევა და მოექცეს სამართლებრივ ნორმებში და მეორეს მხრივ საარჩევნო სუბიექტებისათვის უნდა შეიქმნას დემოკრატიული სარჩევნო გარემო, რაც გულისხმობს, რომ მათ მიეცეთ საშუალება არასაგამოცდო პერიოდში, სალექციო კვირის დღეებში, შეხვდნენ სტუდენტებს სააგიტაციო პროცესების წარმოების მიზნით. აქედან გამომდინარე კი არჩევნების დღე უნდა განისაზღვროს 10-დან 15 მაისამდე შუალედში.“ – აღნიშნულია განცხადების ტექსტში.

ბათუმის მერია მოქალაქეების ინიციატივებს დააფინანსებს

კონკურსში მონაწილის შეფასება ხდება შემდეგი კრიტერიუმების მიხედვით და შეფასების საბოლოო შედეგი განისაზღვრება ქულათა დაჯამებით:

პროექტის იდეა – მაქსიმალური შეფასება 10 ქულა;
პროექტის აქტუალურობა – მაქსიმალური შეფასება 10 ქულა;
პროექტის ინოვაციურობა და კრეატიულობა – მაქსიმალური შეფასება 10 ქულა;
პროექტის თანადაფინანსება – მაქსიმალური შეფასება 10 ქულა;
პროექტში საზოგადოების ჩართულობა – მაქსიმალური შეფასება 10 ქულა

მერია ინიციატივებს მიიღებს, როგორც ორგანიზაციებიდან, ისე ფიზიკური პირებიდან.

განაცხადები მიიღება მიმდინარე წლის, ყოველი თვის პირველი სამუშაო დღიდან – თვის ბოლო სამუშაო დღის ჩათვლით 09:00 საათიდან – 18:00 საათამდე, 2015 წლის საკონკურსო ბიუჯეტის ამოწურვამდე.

კონკურსის შესახებ დამატებითი ინფორმაციისთვის გადადით ბმულზე.

ქართველ მუსლიმთა კავშირის ფორუმი – ”რელიგია და მშვიდობა”

კონფერენციის ფარგლებში გაიმართება მრგვალი მაგიდა სახელწოდებით: „მედიის როლი რელიგიური და კულტურული მრავალფეროვნების წარმოჩენის საქმეში “.

ფორუმში მონაწილეობენ სხვადასხვა რელიგიური აღმსარებლობის მქონე სასულიერო პირები, თეოლოგები, ჟურნალისტები და სხვა მოქალაქეები. კონფერენციას ასევე დაესწრება ნორვეგიის ყოფილი პრემიერ-მინისტრი, ამჟამად „ევროპაში მშვიდობისა და ადამიანის უფლებათა ცენტრის“ პრეზიდენტი კიელ მაგნე ბონდევიკი, ევროპული ორგანიზაცია „პირველი ნაბიჯის ფორუმის“ ხელმძღვანელი იოჰან კანდელინი, ოქსფორდის უნივერსიტეტის პროფესორი პაულ ფიდესი და აშშ–სა და თურქეთის ელჩები საქართველოში.

წაკითხული მოხსენებები გამოიცემა კრებულის სახით.

ფორუმი 18 აპრილს, 14:00 საათზე სასტუმრო „შერატონში“, პრესკონფერენციით გაიხსნება და დასრულდება 19 აპრილს, ბათუმის სახელმწიფო მუსიკალურ ცენტრში საზეიმო ღონისძიებით.

კონფერენციის ორგანიზატორია „ქართველ მუსლიმთა კავშირი“, პარტნიორი ორგანიზაციების – „პირველი ნაბიჯის ფორუმი – ევროპას“, „ევროპის მშვიდობისა და ადამიანის უფლებათა ცენტრისა“ და „ამერიკული საბჭოები – ღია სამყაროს“ მხარდაჭერით.

კონფერენციაზე პირველ დღეს დასწრება შეზღუდულია, ხოლო მეორე დღეს – თავისუფალი.

სოლიდარობის ფონდში ყველაზე დიდი დონაცია აჭარიდან განხორციელდა

სოლიდარობის ფონდის ცნობით, 2 400 000 ლარით ისინი უკვე დაეხმარნენ 22-წლამდე ასაკის ონკოლოგიური დაავადებების მქონე 78 ბენეფიციარს. აჭარის ჯანმრთელობისა და სოციალური დაცვის სამინისტროს ცნობით, მათი სამინისტროს თანამშრომლები ფონდში ყოველწლიურად 5 000-მდე ლარს რიცხავენ.

შეხვედრაზე ფონდის აღმასრულებელმა დირექტორმა და საქართველოს სოლიდარობის ფონდის საზოგადოებასთან ურთიერთობის მენეჯერმა ხატია ფიჩხაიამ, რეგიონის ხელმძღვანელობას დღეის მდგომარეობით ფონდში მობილიზებული თანხისა და დაფინანსებული ბენეფიციარების შესახებ ანგარიში წარუდგინეს.

„მოხარული ვარ, რომ ეს სიგელი მივიღეთ. იგი ეკუთვნის მთლიანად აჭარას. მოგეხსენებათ,ძირითადად საჯარო მოხელეები ვართ ჩართული, თუმცა კერძო კომპანიებიც არ იშურებენ თანხას ქველმოქმედებისთვის და ამის ნათელი მაგალითია კომპანია „ატლას-ჯორჯია“, რომელმაც ფონდს დასაწყისისთვის 500 000 ლარი გადაურიცხა. ვფიქრობ, რომ დიდი წვლილი შეიტანა აჭარამ სოლიდარობის ფონდში, რომელმაც 2014-2015 წლის განმავლობაში 22 წლამდე ასაკის 78 მოქალაქე დააფინანსა. ჩვენ აუცილებლად გავაგრძელებთ ფონდთან თანამშრომლობას. ვფიქრობ, ყველა უწყებაში უნდა იყოს ეს პრეზენტაცია ჩატარებული, რომ ყველამ გაიგოს თუ როგორ იხარჯება, სად და ვის ხმარდება თითოეული ლარი, რომელსაც სოლიდარობის ფონდში რიცხავენ მოქალაქეები. ჩემთვის სასიამოვნოა, რომ აჭარიდანაც იყვნენ პაციენტები, რომლებმაც ამ ფონდის საშუალებით იმკურნალეს“- განაცხადა არჩილ ხაბაძემ შეხვედრის დასრულების შემდეგ.

შეხვედრას აჭარის ჯანდაცვის მინისტრი ნუგზარ სურმანიძე, მინისტრის მოადგილეები, სამედიცინო დაწესებულებებისა და საზღვაო სფეროს წარმომადგენლები ესწრებოდნენ.

სოლიდარობის ფონდის ხელმძღვანელები დღეს, რეგიონში არსებულ იმ კომპანიებისა და საჯარო სამსახურების წარმომადგენლებს შეხვდებიან, რომლებიც საქველმოქმედო ფონდში არიან ჩართულნი.

სოლიდარობის ფონდი 2014 წლის ივლისში საქართველოს პრემიერ-მინისტრის ირაკლი ღარიბაშვილის ინიციატივით დაფუძნდა. ფონდის მიზანია საზოგადოების, კერძო სექტორისა და სახელმწიფოს თანამონაწილეობით, ინოვაციური დაფინანსების მექანიზმების ამოქმედებით, საქართველოში მცხოვრები სოციალურად დაუცველი ან კატასტროფული სოციალური დანახარჯების რისკის წინაშე მდგარი ბავშვებისა და ოჯახებისთვის ალტერნატიული (არასაბიუჯეტო) რესურსების მობილიზაცია და პრიორიტეტულ სოციალურ საჭიროებებზე მიმართვა. ფონდში ჩართვა ნებაყოფლობითია.

საერთაშორისო კონფერენცია – „რელიგია და მშვიდობა“ ბათუმში

კონფერენციის მიზანი, რელიგიათა შორის ურთიერთობის წარმოჩენაა, რა როლი აქვს რელიგიას და რა სიტუაციაში ვართ დღეს გლობალურად, ამ თვალსაზრისით – აცხადებენ კონფერენციის ორგანიზატორები.

„ასეთი კონფერენციები იმ თვალსაზრისით არის მნიშვნელოვანი, გავაანალიზოთ რა როლი აქვს რელიგიას მშვიდობის საკითხში და რა სიტუაციაში ვართ დღეს რეალურად. ჩვენ უნდა დავუპირისპიროთ მშვიდობა იმ არასწორი მიმართულების იდეოლოგიას, რაც დღეს ძალადობს ახლო აღმოსავლეთის ქვეყნებში“, – აცხადებს „ქართველ მუსლიმთა კავშირის“ ხელმძღვანელი, ტარიელ ნაკაიძე.

მისი თქმით, საზოგადოებამ ნათლად უნდა გაიგოს, რატომ არის სიყვარული მნიშვნელოვანი რელიგიისთვის:

„ადამიანი იმიტომ კი არ უნდა გიყვარდეს ან გძულდეს, რომ თეთრკანიანია ან შავკანიანი, მუსლიმია და არამუსლიმი, ადამიანი იმიტომ უნდა გიყვარდეს, რომ ის ღმერთის ქმნილებაა. დღეს აქტუალურია ახლო აღმოსავლეთის თემა, იქ არსებული პრობლემები, ამიტომ ვალდებულები ვართ, სწორად ავხსნათ რა არის რელიგია და დღეს რასთან გვაქვს საქმე, როგორ არის დღეს რელიგია გამოყენებული ადამიანის სიცოცხლის წინააღმდეგ“.

ღონისძიება, როგორც ტარიელ ნაკაიძე ამბობს, მუხამედ შუამავლის დაბადების დღეს დაამთხვიეს: „კონფერენციის პირველ დღე მოხსენებებს დაეთმობა, მეორე დღეს, ანუ 19 აპრილს „ბათუმის მუსიკალურ ცენტრში“ წავიკითხავთ კომუნიკეს“.

კონფერენციის ფარგლებში ხვალ „შერატონში“ გაიმართება მრგვალი მაგიდა თემაზე – მედიის როლი რელიგიურ და კულტურული მრავალფეროვნების წარმოჩენის საქმეში.

ამ თემაზე ქართველი და BBC-ის ჟურნალისტები ისაუბრებენ თავიანთ გამოცდილებასა და მედიის როლზე რელიგიის გაშუქებაში.

„საზოგადოებამ უნდა განსაჯოს რა არის სწორი და არასწორი, ამაში კი მედიის როლი ძალიან მნიშვნელოვანია. კონფერენციის მასალები შემდეგ კრებულის სახითაც გამოვა“, – ამბობს ტარიელ ნაკაიძე.

საერთაშორისო კონფერენციას ორგანიზება „ქართველ მუსლიმთა კავშირმა“ ევროპული ორგანიზაციების ფინანსური მხარდაჭერით მოახერხა.

საქორწინო ტრადიციები აჭარაში

თუ ოდესმე აჭარულ ქორწილში მოხვდებით, სადილის შემოტანის რიტუალი აუცილებლად მიიქცევს თქვენს ყურადღებას.

საგანგებოდ მორთული ხუთი დიდი კალათი შუა ქორწილის დროს ხუთ ბიჭს შემოაქვს მხარზე შედგმული. კალათებით საქორწინო სუფრებს მოივლიან და მერე მეფე-დედოფლის მაგიდის წინ დადებენ. სადილი, რომელიც ტკბილეულისგან შედგება (ბაქლავა და შაქარლამა), გათხოვილი გოგოსთვის ოჯახის წევრებს მიაქვთ.

ხალხურ თქმულებას თუ დავუჯერებთ, სადილის მიტანის ტრადიცია აჭარაში გამუსლიმანების შემდეგ დამკვიდრდა. თუმცა დღეს მნიშვნელობა არ აქვს ქორწილს ქრისტიანი იხდის თუ მუსლიმი – სადილი ნებისმიერი ქორწილის განუყრელი ნაწილია.

ციცინო სამნიძე

ქედაში მცხოვრები ციცინო სამნიძე 25 წელია ე.წ. სადილებს ამზადებს, თვეში საშუალოდ ხუთს.

„სადილი შედგება ბაქლავისა და შაქარლამისგან. სტანდარტულ სადილის კალათებში 300 ნაჭერი ბაქლავა და 80 შაქარლამა თავსდება. ახლა დაემატა შოკოლადები და შამპანური ან ლიქიორი. წესი არის ასეთი – სადილი უნდა შედგებოდეს ხუთი კალათისგან. აქედან ერთი კალათი გამორჩეულია – ნეფე-დედოფლისაა, დანარჩენი ოთხი – ერთნაირია. თუ ოჯახს საშუალება არ აქვს, უფრო ცოტა რაოდენობის კალათით მიაქვთ სადილი, თუ შეძლებულია, მაშინ კალათების რაოდენობა შეიძლება ხუთზე მეტიც იყოს. როცა გოგო თხოვდება, აუცილებელია, რომ ოჯახმა სადილი გაუკეთოს,“ – ამბობს ციცინო სამნიძე.

ციცინო იხსენებს, რომ რვაასი ნაჭერი ბაქლავითაც გაუწყვია საქორწილო სადილის კალათები.

ადრე სადილი ქორწილის გარეშე, ცალკე მიჰქონდათ. ამ დროს გოგოს ნათესავები მიდიოდნენ ახალდაქორწინებულების ოჯახში და მიჰქონდათ ბაქლავითა და შაქარლამით სავსე კალათები. ამას გარდა ნათესავები გოგოს ჩუქნიდნენ ფულს ან სამკაულს. დღეს ეს ტრადიცია შეიცვალა და სადილი ძირითადად ქორწილებში მიაქვთ.

საქორწინო რიტუალში განსაკუთრებული დატვირთვა აქვს სიძე-პატარძლისთვის განკუთვნილ კალათს. ეს კალათი სხვა კალათებისგან (რომლებიც ბაქლავითა და შაქარლამითაა სავსე) განსხვავებულია. სიძე-პატარძლის კალათში დევს ორი მსხლის ან ვაშლის ფორმის შაქარლამა. ამ შაქარლამებიდან ერთ-ერთში ფული ან ოქროს ბეჭედია ჩადებული. ხალხური თქმულების მიხედვით, როდესაც სიძე-პატარძალი შაქარლამას გატეხავს, ვისაც ფული ან ბეჭედი შეხვდება, ქორწინებაში ის უფრო ბედნიერი იქნება.

„როდესაც სადილს მიკვეთავენ, წინასწარ მოაქვთ ჩემთან შაქარლამაში ჩასადები ფული ან ოქრო. სადილის დამზადებას მინიმუმ ერთი დღე სჭირდება. ბაქლავას ჟარონებზე ვაცხობ. ერთი ჟარონიდან 20 ნაჭერი ამოდის. ძალიან დიდი პასუხისმგებლობაა სადილის გაკეთება. კარგი უნდა გამოვიდეს, რომ არ შერცხვე და ოჯახი, რომელსაც სადილი მიაქვს, არ შეარცხვინო. სულ ვნერვიულობ, ვფიქრობ – ნეტა ცუდი გამოვიდა თუ კარგი. ქორწილის შემდეგ, როცა ვიღებ პასუხს, რომ კარგი გამოვიდა, ვმშვიდდები,“ – ამბობს ციცინო სამნიძე.

დღეს ოჯახს საშუალოდ სადილის მიტანა 500 ლარი უჯდება.

„როცა მოდიან, ვეუბნები – ერთი ნაჭერი ბაქლავა ლარ-ნახევარი ღირს. 450 ლარი ჯდება 300 ნაჭერი ბაქლავა. ამაში შედის 80 შაქარლამაც და შოკოლადიც, ასევე კალათების მორთვაც. ხოლო შაქარლამაში ჩასადები ოქრო ან ფული სადილის შემკვეთს მოაქვს. სადილის მიტანა ძვირი ჯდება, მაგრამ აუცილებელია და დიდ სირცხვილად მიიჩნევა, თუ არ მიუტან,“ – ამბობს ციცინო სამნიძე.

„იმდენად ძვალსა და რბილშია გამჯდარი, რომ ოჯახი უკანასკნელ თეთრს გაიღებს სადილის მისატანად. თუ არის ოჯახი, რომელმაც ვერ შეძლო შვილისთვის სადილის მიტანა და მაგალითად, გარდაიცვალა დედა ან მამა, ის შემდგომ შთამომავლობას აუცილებლად ანდერძივით გადასცემს, რომ გათხოვილი გოგოსთვის სადილი მისატანი აქვს და აუცილებლად უნდა მიუტანონ,“ – ამბობს ფოლკლორის სპეციალისტი ლია მახარაძე.

დღემდე ხალხში ლეგენდადაა შემორჩენილი ის ამბავი, თუ როგორ დაწესდა სადილის (ტკბილეულის) მიტანა.

თურმე ერთხელ ფეიღამბერი (უფლის მოციქული) სახლს აშენებდა, მას სამი ხელოსანი ჰყავდა დაქირავებული. ხელოსნებმა სახლი რომ ააშენეს, სამაგიეროდ გოგო სთხოვეს ცოლად. ფეიღამბერს მხოლოდ ერთი გოგო ჰყავდა, რომლისთვის უნდა მიეცა, არ იცოდა. მან ერთ ღამეს გოგოს ოდაში ძაღლი და ვირი შეაგდო. დილას კი სამი ერმანეთის მსგავსი ულამაზესი გოგო დახვდა. ადგა და ეს გოგოები მიათხოვა თავის ხელოსნებს. ფეიღამბერმა ერთ დღეს ცოლს გამოაცხობინა ტკბილეული და წავიდა ამ გოგოების ოჯახში სტუმრად. სურდა გაერკვია, თუ რომელ ოჯახში იყო მისი შვილი. მივიდა პირველთან და ჰკითხა: როგორია თქვენი რძალი, რას საქმიანობსო? უთხრეს: კარგია, მაგრამ ვირივით ჯიუტიაო. მიხვდა, ვირის სოის (ჯიშის) არისო. წავიდა მეორესთან, იმასაც ჰკითხა. იმან უპასუხა: ძალიან კაია, მაგრამ ერთი ცუდი ჩვევა აქვს – ცუდ სიტყვებს ამბობს, ძაღლივით გვექცევაო. მიხვდა ფეიღამბერი: ის ძაღლის ჯიშისააო. წავიდა მესამესთან და იკითხა, როგორიაო? – ძალიან კარგია, ადამიანური ქცევები აქვს ყველაფერშიო. მიხვდა, რომ ის მისი შვილი იყო. გაუხარდა ფეიღამბერს, ადგა და იმ ოჯახში დატოვა პურები და ტკბილეული. ასე დაწესდა სადილის მიტანა.

ტკბილეულს, რომელიც სადილის სახით მიაქვთ ქორწილებში, იქვე, სუფრაზე ურიგებენ სტუმრებს.

ადრე ბაქლავის ნაცვლად ყათმერი მიჰქონდათ. ყათმერი ფქვილით, თაფლითა და ნიგვზით კეთდება. ცომს მაწვნით ზელენ, ცოტა რომ აფუვდება, ზემოდან ნიგოზს აყრიან და თაფლს უსვამენ. შემდეგ გამდნარ კარაქს ასხამენ და სამკუთხედად კეცავენ. მზა ფორმას კვერცხის გულს უსვამენ და აცხობენ. გამომცხვარს კი ისევ კარაქს უსვამენ. ამ ტკბილეულს ყათმერ პურს ეძახდნენ.

ძველად აჭარაში ქორწინების სამი წესი იყო გავრცელებული. მოტაცება, გარიგება და ე.წ. „დაჯდომა“.

ქორწინების ყველაზე გავრცელებული ფორმა იყო გარიგება. გარიგებაში, როგორც წესი, გოგოს და ბიჭის მშობლები მონაწილეობდნენ. მშობლები წყვეტდნენ ვის უნდა გაყოლოდა მათი შვილი. დიდი ყურადღება ექცეოდა ოჯახის წარმომავლობას, შეძლებულობას და პატიოსნებას. ქორწინების საქმეს შუამავალი აგვარებდა.

როგორც წესი, ძველად ძირითადად ისე ქორწინდებოდნენ, რომ გოგო და ბიჭი ერთმანეთს არ იცნობდნენ. მათი შეხვედრა ქორწილის დღეს დგებოდა. ქედის კულტურის ცენტრში არაერთი მსგავსი ისტორიაა შემორჩენილი. აი, რას ყვება სოფელ კანტაურში მცხოვრები ლამარა ხალვაში.

„ნიშნობა ხდებოდა ისე, რომ გოგო და ბიჭი ერთმანეთს არ იცნობდნენ. ქორწილის შემდეგ გაიცნობდნენ ერთმანეთს. ქორწილი ღამით იცოდნენ. თუ შორი იყო, დედოფალი მორთულ-მოკაზმული ცხენით მოყავდათ, თუ ახლოს იყო – ფეხით. დედოფალს ტანზე ჩერჩეფი (ჩადრი) ჰქონდა მოხვეულის. პირზე ფეჩა (პირბადე) ჰქონდა ჩამოფარებული, რომ არვის დეენახა. დედოფალს ორი დადე (მეჯვარე) ჰყავდა. ეს დადეები დედოფალს ცავდენ, არვის დაანახვებდენ. ეზოში რომ მიიყვანდენ, დედამთილს დუუძახებდენ და ასე მუუმღერებდენ: „დედამთილო, გამოგვხედე, მოგიყვანეთ სახლის რძალი, ავი თვალით თუ შეხედო, ძაღლმა გახრას შენი ძვალი“.

დედამთილი რძალს კენჭი შაქარს გადააყრიდა (მაშინ კანფეტი ნაკლები იყო). საინს გაატეხიებდა, კარებზე დანებს მიასობდენ და შეიყვანდენ სახლში, მიიყვანდენ კერაზე, ხელს მოასმევიებდენ და ასე ეტყოდენ: ეს კერა შენიაო.

მერე დედოფალს ფარდაში დააყენებდენ და ფეხებთან ძირს ფეშკირს (პირსახოცს) გაუგებდენ. ვინც დედოფალს ნახავდა, ფარას აჩუქებდა და ფეშკირზე დუუდებდა. დედოფალი მადლობის გადახდით თემენას გუუკეთებდა. ბოლოს დედოფლის ძმას უნდა ეეხადა სახეზე ფეჩა, მაგრამ ამ ფეჩის ახდაში მამათილს ბევრი ფარანა მიეცა. მაყარი დილამდის სმა-ჭამით ირთობდა თავს. ქორწილის შემდეგ ამ ფეშკირს გაჭირვებულს მისცემდენ,“ – ეს ისტორია ლამარა ხალვაშისგან წონიარისის კულტურის სახლის დირექტორმა თამარ ბოლქვაძემ 2012 წელს ჩაიწერა.

ხშირად ხდებოდა ისე, რომ მოტაცება გოგოს დედასთან შეთანხმებული იყო. ან იმ შემთხვევაში, თუკი მშობლები წინააღმდეგი იყვნენ ქორწინების. ასევე ქალს იტაცებდნენ მაშინაც, თუ წყვილს ერთმანეთი უყვარდა, სიძეს კი „ნიშან-ბოხჩის“ მიტანის საშუალება არ ჰქონდა.

ქორწინების არც თუ ისე გავრცელებული ფორმა იყო ე.წ. დაჯდომა. ქალს თუ ბიჭი მოეწონებოდა, ადგებოდა, სახლიდან გაიპარებოდა, ბიჭის ოჯახში მივიდოდა და დაუჯდებოდა. ბიჭს უფლება ჰქონდა უკან გამოებრუნებინა. ეს ქალისთვის დიდ სირცხვილად ითვლებოდა. ამიტომ ასეთ დროს საქმეში მაჭანკალი ერთვებოდა. მაჭანკალს აჭარაში „ჯაზი ნენეს“ უწოდებდნენ. სწორედ მისი მეშვეობით გვარდებოდა ქალ-ვაჟს შორის ურთიერთობა.

ძველებურ ქორწილში ხშირად იმართებოდა შეჯიბრება დედოფლის მაყარსა და დამხდურებს შორის როგორც ცეკვა-სიმღერებში, ასევე შაირებში, გამოცანების გამოცნობასა და ანდაზებში.

პროსტატის კიბო საწყის სტადიაში განკურნებადია

ონკოლოგი თემურ გოგიტიძე ამბობს, რომ პროსტატის კიბოთი, ძირითადად, 50-დან 70 წლამდე ასაკის მამაკაცები ავადდებიან, თუმცა ყველაზე “სარისკო” 50-დან 60 წლამდე ასაკია. “ამ ასაკში განვითარებული პროსტატის კიბო ბევრად უფრო აგრესიულია, ვიდრე გვიან ასაკში, რადგან კიბოს უჯრედებს მამაკაცური ჰორმონები – ტესტესტერონები კვებავს, ხანდაზმულებში კი, ტესტესტერონების დონე სულ უფრო და უფრო იკლებს და უკვე ბიოლოგიური მკურნალობა მიმდინარეობს. შესაბამისად, ბევრი სიმსივნე ამ ჰორმონალური ბუნების გამო ვეღარ ვითარდება, მაგრამ 50-60 წლის ადამიანს ბევრი ტესტესტერონი აქვს და ამიტომ ამ ასაკში მისი აღმოჩენა განსაკუთრებით მნიშვნელოვანია”,- ამბობს ექიმი.

თემურ გოგიტიძის თქმით, ამ რისკჯგუფში არიან ის პაციენტები, რომელთაც გადატანილი აქვთ პროსტატის დაავადებები (ანთება, ჩაუტარებიათ ოპერაცია პროსტატატაზე
და ა.შ.). პროსტატის კიბოს შემთხვევაში მნიშვნელოვანია გენეტიკური ფაქტორიც და იმ ადამიანებმა, რომელთა ოჯახის წევრებსაც (მამას, ბაბუას, ძმას) ჰქონიათ ასეთი დიაგნოზი, განსაკუთრებული ყურადღება უნდა მიაქციონ დაავადების დროულ დიაგნოსტირებას.

პროსტატის კიბო საწყის სტადიაში 100%-ით განკურნებადია. პროსტატის კიბოს აღმოჩენა პირველი ნიშნების გაჩენამდეა შესაძლებელი, რისთვისაც ეროვნული სკრინინგცენტრი უკვე ოთხი წელია პროსტატის კიბოზე, PSA ტესტის მეთოდით, უფასო გამოკვლევის პროგრამას ახორციელებს. პროგრამით სარგებლობა შეუძლიათ 50-დან 70 წლამდე ასაკის საქართველოს მოქალაქეებს. ტესტის მიზანია სისხლში პროსტატის სპეციფიკური ანტიგენების (PSA) დონის დადგენა. თემურ გოგიტიძის თქმით, PშA-ს დონის მკვეთრი მომატება პროსტატის კიბოს არსებობის მაღალ რისკზე მიუთითებს, თუმცა ეს ტესტი შესაძლოა იყოს “ცრუ დადებითი” და ანტიგენების მაღალი დონე რეალურად გამოწვეული იყოს გადატანილი ანთებით, ტრავმითა თუ სხვა მიზეზით. ონკოლოგის თქმით, მიუხედავად ანტიგენების მაღალი მაჩვენებლისა, დიაგნოზის დასასაბუთებლად, უმეტეს შემთხვევაში, საჭირო ხდება დამატებითი კვლევები – ექოსკოპია და ბიოფსია.

ეროვნული სკრინინგცენტრის მონაცემებით, გასული წლის განმავლობაში ამ პროგრამის ფარგლებში გამოკვლევა ჩაუტარდა 4 449 მამაკაცს, რომელთაგან დასაშვებ
ნორმაზე მეტი ანტიგენი 809 ადამიანს, ანუ 18.1%-ს აღმოაჩნდა. ბათუმში პროსტატის კიბოს სკრინინგის პროგრამაში ჩართულნი არიან: ჯანმრთელობის ცენტრი “მედინა”, საზღვაო ჰოსპიტალი, ონკოლოგიურ ცენტრი და ბათუმის სამშობიარო სახლი.

ონკოლოგის თქმით, სკრინინგის პროგრამა არ ითვალისწინებს დამატებით კვლევებს – ექოსკოპიასა და ბიოფსიას, ექოსკოპიის ფასი საშუალოდ 40 ლარია, ბიოფსია კი 500 ლარი ჯდება.

დღეისთვის პროსტატის კიბოს სამი მეთოდით მკურნალობენ – ოპერაციული მეთოდი, ჰორმონალური თერაპია, სხივური თერაპია და იშვიათად ქიმიოთერაპია. „დღეს მკურნალობის ყველა მეთოდი კარგადაა შემუშავებული და მათ სახელმწიფოც აფინანსებს. შესაბამისად, ისე არ ხდება, რომ დიაგნოზის დასმის შემთხვევაში ადამიანმა ვერ იმკურნალოს”, – ამბობს თემურ გოგიტიძე.

ეროვნული სკრინინგცენტრის რეკომენდაციით, ექიმს უნდა მიმართოთ იმ შემთხვევაში, თუ გაწუხებთ: გახშირებული შარდვა (განსაკუთრებით ღამით), გაძნელებული შარდვა
ან შარდვის გახანგრძლივება, ასევე ტკივილი შარდვის დროს. თუმცა, ამ სიმპტომების არსებობა, ხშირად, არ ნიშნავს, რომ კიბო გაქვთ. თუმცა პროსტატის კიბო ზოგჯერ უსიმპტომოდ მიმდინარეობს და რომ არ გამოგეპაროთ, მნიშვნელოვანია გამოკვლევა (PSA ტესტი) დროულად ჩაიტაროთ.

იმისთვის, რომ PSA ტესტის პასუხი იყოს ზუსტი:

უმჯობესია ტესტი გაიკეთოთ დილით უზმოზე.
არ უნდა გქონდეთ საშარდე გზების ინფექცია.
ტესტამდე 48 საათით ადრე არ უნდა გქონდეთ სქესობრივი კავშირი.
ტესტამდე 48 საათით ადრე არ უნდა გქონდეთ მიღებული ალკოჰოლი.
ტესტამდე 48 საათით ადრე თავი აარიდეთ ძლიერ ფიზიკურ დატვირთვას.
ტესტამდე ერთი კვირის განმავლობაში არ უნდა გქონდეთ ჩატარებული პროსტატის რექტალური გამოკვლევა.
ტესტამდე 6 კვირის განმავლობაში არ უნდა გქონდეთ ჩატარებული პროსტატის ბიოფსია

რადიაციული ნაცარი ჭოროხზე ჰესების ასაშენებლად

საქართველოს მთავრობის განკარგულებაში, რომელსაც პრემიერმა ირაკლი ღარიბაშვილმა ხელი რამდენიმე დღის წინ მოაწერა, აღნიშნულია, რომ ნარჩენის იმპორტი უნდა განხორციელდეს ჰიდროელექტროსადგურების მშენებლობისთვის საჭირო უმაღლესი ხარისხის ბეტონის საწარმოებლად. 17 040 ტონა ნარჩენის იმპორტს თურქეთის რესპუბლიკიდან 2016 წლის 31 დეკემბრამდე განახორციელებენ.

აქროლად ნაცარს თურქეთიდან საქართველოში შპს “ჭოროხი-2009”შემოიტანს. ნაცარი განკუთვნილია შპს „აჭარ ენერჯი-2007“-ისთვის, რომელიც მდინარე ჭოროხზე ჰესებს აშენებს.

რამდენად უსაფრთხოა აღნიშნული ნარჩენი და ვინ უნდა განახორციელოს მასზე კონტროლი (ტრანსპორტირებისა და გამოყენების წესებზე, შემცველობაზე და სხვა)?

„ნაცარი შეიცავს ალუმინის ოქსიდს. ეს არის საშიში სასუნთქი არხებისთვის, ჩათვალეთ, საწამლავია.

ამასთან, ჩვენს ქვეყანაში არსებობს კანონი რადიოაქტიური შემცველობის ტვირთის შემოტანასა და ტრანზიტზე, სადაც წერია, რომ 370 არის ნორმა, ნაცარი შეიცავს 500-ს. შესაბამისად, რადიაცია აიწევს. როგორც კი ნაცარი იდება, ის ხდება აქროლადი ქართან ერთად. ანუ, ნებისმიერ ადგილას, სადაც დაიდება, გარემო იქნება დაბინძურებული“, – ამბობს „ნეტგაზეთთან“ თამაზ ვაშაკიძე, ტექნიკურ მეცნიერებათა დოქტორი, საწარმოთა ინოვაციური განვითარების ცენტრის წარმომადგენელი.

ენერგეტიკის მინისტრმა კახი კალაძემ, როცა კანონში შესატანი ცვლილებები განიხილებოდა, განაცხადა: „ნაცარი, რომლის შემოტანასთან დაკავშირებით კანონპროექტი ჩვენმა სამინისტრომ გაიტანა, არის „ევროპის ენერგეტიკულ მწვანე ნუსხაში“ შესული. არანაირი პრობლემა და არანაირი კითხვის ნიშნები ამასთან დაკავშირებით არ არსებობს, რომ ეს არის მავნე”.

„ბათუმელების“ შეკითხვის პასუხად, თუ რამდენადაა ეკოლოგიურად გამართლებული ამ ნაცრის შემოტანა ქვეყანაში და მისი გამოყენება, საქართველოს გარემოსა და ბუნებრივი რესურსების დაცვის სამინისტრომაც, იმის დასტურად, რომ უსაფრთხოა, „მწვანე სიაზე“ მიგვითითა.

ეს სია შემოსავლების სამსახურს ოფიციალურ ვებგვერდზე უდევს, სადაც აღნიშნულია: „დამოუკიდებლად იმისა, ჩართულია თუ არა ნარჩენები ამ ნუსხაში, მათი გადაზიდვა, როგორც მწვანე ნუსხაში ჩართული ნარჩენებისა, შეიძლება არ იქნეს დაშვებული, თუ ისინი დაბინძურებულია სხვა მასალებით ისეთი ოდენობით, რაც ზრდის ნარჩენებთან დაკავშირებულ რისკს იმგვარად, რომ იგი შეესაბამება ყვითელ ან წითელ ნუსხაში შეტანას; ან დაბრკოლებას უქმნის მის მეორეულ გადამუშავებას გარემოსათვის უსაფრთხო ხერხით“.

მწვანე სიაში 146 დასახელების ნარჩენია (მათ შორის აქროლადი ნაცარი) შეტანილი, ყვითელში – 80, ხოლო წითელ სიაში – 8 ნარჩენი.

საქართველოში ნახშირზე მომუშავე თბოელექტროსადგურებიდან წარმოქმნილი აქროლადი ნაცრის იმპორტის დაშვების შემთხვევებისა და პირობების განსაზღვრის შესახებ დებულება 2013 წლის სექტემბერში, ბიძინა ივანიშვილის პრემიერობის დროს დამტკიცდა.

ამ დებულების მიხედვით, ნარჩენის საქართველოს ტერიტორიაზე იმპორტი შეიძლება მხოლოდ მნიშვნელოვანი სახელმწიფოებრივი ან/და საზოგადოებრივი პროექტების განხორციელების შემთხვევებში, რაზეც გადაწყვეტილებას იღებს საქართველოს მთავრობა.

ნარჩენების ტრანზიტსა და იმპორტს არეგულირებს შემოსავლების სამსახური უფლებამოსილ სახელმწიფო ორგანოებთან ერთად. ნარჩენების ტრანზიტისა და იმპორტის რეგულირების სფეროში ბაზელის კონვენციის (სახიფათო ნარჩენების ტრანსასაზღვრო გადაზიდვასა და მათ განთავსებაზე კონტროლის შესახებ) მე-2 მუხლითა და ევროგაერთიანების საბჭოს 1993 წლის №259/93 დებულების მე-2 მუხლით გათვალისწინებული ხელისუფლების კომპეტენტური ორგანოს ფუნქციებს კი, საქართველოს გარემოსა და ბუნებრივი რესურსების დაცვის სამინისტრო ასრულებს.

არასამთავრობო ორგანიზაცია „მწვანე ალტერნატივას“ ბიომრავალფეროვნების კოორდინატორის, ირაკლი მაჭარაშვილის თქმით, როცა გარემოს დაცვისა და ბუნებრივი რესურსების საპარლამენტო კომიტეტის შეხვედრაზე ეს საკითხები განიხილებოდა, სპეციალისტებმა ცალსახად განაცხადეს, რომ ჰესების მშენებლობისას არ იყო მიზანშეწონილი ასეთი ტიპის ნარჩენების გამოყენება.

„ბაზელის კონვენციით და შესაბამისი დებულების საფუძველზე რეგულირდება ნარჩენების იმპორტი. ჩვენ ვაწარმოებთ მონიტორინგს. ამ კონკრეტულ შემთხვევაში მოგვმართავს კომპანია, ვისაც შემოაქვს ნარჩენი, უნდა მოგვმართოს იმანაც, ვინც აგზავნის ამ ნარჩენს და ა.შ. ამ ყველაფრის შემდეგ ჩვენ დავაფიქსირებთ ჩვენს პოზიციას და საბოლოო გადაწყვეტილებას მთავრობა მიიღებს“, – გვითხრეს გარემოს დაცვის სამინისტროში.

„ჭოროხი 2009“-ის წარმომადგენლის განცხადებით, ყველა იურიდიულ პროცედურას – საჭირო დოკუმენტებს მოაგვარებს „აჭარ ენერჯი 2007“ და „შემდეგ შემოვიტანთ ნარჩენს, როცა დოკუმენტაცია იქნება მზად“.

კომპანიის წარმომადგენელი აცხადებს, რომ მშენებელს აქვს ლაბორატორიული დასკვნები, რომლითაც ჩანს, რომ საქართველოში წარმოებული ცემენტი არ არის ვარგისიანი ჭოროხზე ჰესის მშენებლობისთვის, ამიტომ კომპანიას შემოაქვს ცემენტი თურქეთიდან, რომელშიც ამ ნაცარს შეურევენ.

„გარემოზე ზემოქმედების შეფასება გაკეთებულია ჰესის მშენებლობასთან დაკავშირებით, მაგრამ ასეთი შეფასების გაკეთება ნაცრის გამოყენებაზე არ არის სავალდებულო. ნაცრის გამოყენება ბეტონში არავითარ ზიანს არ აყენებს გარემოს“, _ განაცხადა „ბათუმელებთან“ „აჭარ ენერჯი 2007“-ის პასუხისმგებელმა პირმა სახელმწიფოსთან ურთიერთობაში, სოფო ვარშალომიძემ.

მისივე თქმით, კომპანიას ნაცრის გამოყენება ორი რამისთვის სჭირდება: ნაკლები ცემენტის გამოყენებით მიიღონ ბეტონის სასურველი მარკა და მეორე, შეაჩეროს ალკანის სილიკის რეაქცია, რომლის მაჩვენებელი მდინარე ჭოროხში გაცილებით მაღალია, ვიდრე ვთქვათ, მდინარე აჭარისწყალში: `ჩვენ გაცილებით იაფი დაგვიჯდებოდა საქართველოში წარმოებული ცემენტი და ნაცარი გამოგვეყენებინა, მაგრამ ტესტირებით ვერ მივიღეთ სასურველი შედეგი”.

აჭარაში ჰიდროელექტროსადგურებს მდინარე აჭარისწყალზე კომპანია “აჭარისწყალი ჯორჯიაც” აშენებს. როგორც კომპანიაში გვიპასუხეს, მათაც მშენებარე “შუახევი ჰესისთვის” ცემენტი საზღვარგარეთიდან შემოაქვთ. რაც შეეხება აქროლად ნაცარს, მას არ იყენებენ.

მოქმედი კანონმდებლობით იმპორტიორი ვალდებულია: ნარჩენი გამოიყენოს გარემოსდაცვითი თვალსაზრისით გამართლებული გზით; უზრუნველყოს ნარჩენის გადაზიდვების მინიმუმამდე დაყვანა მათი გარემოსდაცვითი თვალსაზრისით გამართლებული და ეფექტური მართვის გამოყენებით და ის განახორციელოს იმგვარად, რომ ადამიანის ჯანმრთელობა და გარემო დაიცვას მათგან უარყოფითი ზეგავლენისაგან; უზრუნველყოს ნარჩენის შეფუთვა, მარკირება და მისი გადაზიდვა საყოველთაოდ მიღებული საერთაშორისო წესებისა და ნორმების თანახმად; ნარჩენს თან დაურთოს სახიფათო ნარჩენთა გადაზიდვის დოკუმენტი საზღვარგადამკვეთი გადაზიდვის საწყისი პუნქტიდან მისი განთავსების ადგილამდე; დაიცვას დადგენილი უსაფრთხოების ნორმები, სტანდარტები და სხვა შესაბამისი ნორმატივები.

საქართველოს მთავრობის ადმინისტრაციიდან მოწოდებულ დოკუმენტში აღნიშნულია, რომ „ქვეყანაში არსებობს სხვადასხვა საშუალებები [სხვადასხვა მარკის ცემენტი, მიკროსილიკა, სხვა პლასტიფიკატორები], რომლითაც შესაძლებელია მიღებული იქნას სასურველი შედეგები. ყოველი მათგანი დაკავშირებულია დამატებით დანახარჯებთან. ნაკლებ დანახარჯიანი გადაწყვეტა სწორედ ნაცრის გამოყენებაა.

ამასთან, აღსანიშნავია, რომ აღნიშნული მასალა მიეკუთვნება ნარჩენების კატეგორიას და მისი შემოტანა აკრძალულია, თუმცა, გამონაკლის შემთხვევებში, საქართველოს მთავრობის თანხმობით, დასაშვებია მისი შემოტანა“.

საქართველოს მთავრობამ სწორედ ასეთი გამონაკლისი დაუშვა და კომპანიას რომ ზედმეტი ხარჯი არ გაეწია, მას მისცა უფლება აქროლადი ნაცარი თურქეთიდან შემოიტანოს.

მთავრობის დადგენილების განმარტებითი ბარათი

რეაბილიტაცია პუშკინის ქუჩაზე 2016 წლამდე

„კონკრეტულად როდის დასრულდება სამუშაოები, არც ჩვენ ვიცით. ალბათ, ერთი თვე გაგრძელდებაო, ასე გვეუბნებიან“, – გვითხრა ქალმა, რომელიც პუშკინის ქუჩის გადაკეტილ მონაკვეთში არსებულ ერთ-ერთ მარკეტში მუშაობს.

„ბათუმელების“ ინფორმაციით, პუშკინის ქუჩის გადაკეტილ ნაწილში საკანალიზაციო მილების ჩაწყობას მინიმუმ ორი კვირა მაინც დაჭირდება.

სარეაბილიტაციო სამუშაოებს აქ გერმანულ-ქართული ერთობლივი საწარმო „ფაიფერი და გზა“ ასრულებს.

საწარმოს დირექტორმა ალექსანდრე ბაღათურიამ სატელეფონო საუბარში აღნიშნა, რომ „ქუჩის კონკრეტულ მონაკვეთებში სარეაბილიტაციო სამუშაოები გაწერილია დროში, თუმცა ვადები ვერ იქნება ზუსტი, რაც, ამინდზე უფრო პროექტის ცვლილებებზეა დამოკიდებული. პროექტი, რაც ამჟამად გვაქვს, ერთია, მაგრამ რეალური მდგომარეობა მიწის ქვეშ, შესაძლოა სხვა იყოს. შედარებით ზუსტი პროექტი, სულ ცოტა, სამუშაოების დაწყებამდე სამი თვით ადრე დგება“.

საწარმოს დირექტორის თქმით, პროექტირება, ფაქტობრივად, სამ ეტაპს გადის. საწყისი პროექტის მიხედვით ითხრება ქუჩის გარკვეული მონაკვეთი, შემდეგ დგება კონცეპტური პროექტი, ეს თანხმდება სამუშაოების ზედამხედველთან, რომელიც ქალაქის მერიას ჰყავს დაქირავებული და შემდეგ უკვე სამუშაოები შესრულებითი პროექტის მიხედვით გრძელდება.

დღეს არსებული საწყისი პროექტის მიხედვით, უშუალოდ პუშკინის ქუჩის მონაკვეთებში კანალიზაციის სისტემის რეაბილიტაცია ქვემოთ მოყვანილი თანმიმდევრობითაა გაწერილი, შესაბამისად გადაიკეტება:

აპრილის თვეში: ჯავახიშვილისა და პუშკინის კვეთა (მონაკვეთები: ჯავახიშვილის ქუჩა – გიორგი ბრწყინვალის ქუჩიდან პუშკინის ქუჩამდე და პუშკინის ქუჩა – ჯავახიშვილიდან ლორიას ქუჩის დასაწყისამდე);

აპრილში გადაიკეტება ლერმონტოვისა და პუშკინის კვეთაც (მონაკვეთი:

ლერმონტოვის ქუჩა – გ. ბრწყინვალის ქუჩიდან ჭავჭავაძის ქუჩაზე მისვლამდე);

ასევე, აპრილში გადაიკეტება ექვთიმე თაყაიშვილისა და პუშკინის კვეთა (მონაკვეთი: ე. თაყაიშვილის ქუჩა – გ. ბრწყინვალის ქუჩიდან ჭავჭავაძის ქუჩამდე).

(ჩაიკეტება ასევე გრიბოედოვის ქუჩა – პუშკინის ქუჩიდან გ. ბრწყინვალის ქუჩამდე მონაკვეთში ამ მონაკვეთში პუშკინის ქუჩის მხრიდან სამუშაოები უკვე დაწყებულია).

მაისში: პუშკინის ქუჩა – თაყაიშვილის ქუჩიდან ჰაიდარ აბაშიძის ქუჩამდე მონაკვეთი.

ივნისში: პუშკინის ქუჩა – ჰ. აბაშიძის ქუჩიდან მელიქიშვილის ქუჩამდე.

ივლისში: პუშკინის ქუჩა – მელიქიშვილიდან ვაჟა-ფშაველამდე.

აგვისტოში: პუშკინის ქუჩა – ვაჟა-ფშაველადან თავდადებულის ქუჩამდე მონაკვეთში.

სექტემბერში: პუშკინის ქუჩა – თავდადებულის ქუჩიდან 9 მარტის ქუჩამდე; ასევე ჯორჯიაშვილის ქუჩიდან სულაბერიძის ქუჩის დასაწყისამდე და იმედაიშვილის ქუჩიდან სოხუმის ქუჩამდე მონაკვეთებში.

ნოემბერში: პუშკინის ქუჩა – ბერიძის ქუჩის ბოლოდან ჯორჯიაშვილის ქუჩის ბოლომდე და სოხუმის ქუჩის დასაწყისიდან შავშეთის ქუჩამდე (ავტოსადგურამდე) მონაკვეთებში.

თუმცა, საკანალიზაციო ქსელის რეაბილიტაციით ქუჩის მოწესრიგების საკითხი არ მთავრდება, შემდეგ უნდა მოწესრიგდეს სხვადასხვა კომუნიკაციის ქსელები: გაზი, წყალი, ელექტროენერგია, სანიაღვრე არხები.

„როცა კანალიზაციის მილები ჩაიდება, ამას შემდეგ მოყვება სხვა კომუნიკაცია და ბოლოს მოასფალტება. სხვადასხვა კონტრაქტორი მუშაობს – ეს აიღებს თავის დამცავ ჯებირებს და გადავა სხვა მონაკვეთზე, იქ კი სხვა კონტრაქტორი, ამა თუ იმ კომუნიკაციის მფლობელი მოვა და დაიწყებს სამუშაოებს. აქედან გამომდინარე ქუჩის მონაკვეთები საჭიროებისამებრ გადიკეტება. თუმცა, შესაძლოა ამა თუ იმ კომუნიკაციის რეაბილიტაციამ, ჩაკეტვის აუცილებლობა არც მოითხოვოს“, – აცხადებს ბათუმის მერის მრჩეველი ინფრასტრუქტურის რეაბილიტაციის საკითხებში ჯაბა ტუღუში.

კომუნალური ინფრასტრუქტურის რეაბილიტაციის პროექტი ბათუმში 2007 წლიდან მიმდინარეობს, რომელიც გერმანიის რეკონსტრუქციის საკრედიტო ბანკიდან მიღებული შეღავათიანი სესხის ხარჯზე ხორციელდება. პროექტი ითვალისწინებს ბათუმის წყლისა და კანალიზაციის სისტემის სარეაბილიტაციო სამუშაოებს, რომელიც სამ ფაზად იყოფა. სესხის მთლიანი მოცულობა 82 367 382 ევროა, პროექტის ფარგლებში წარმოქმნილი დამატებული ღირებულების გადასახადის ნახევარი იფარება ადგილობრივი ბიუჯეტიდან, ხოლო დარჩენილი ნახევარი საქართველოს სახელმწიფო ბიუჯეტიდან.

გარდა დღგ-ისა, ადგილობრივი ბიუჯეტიდან ფინანსდება ასევე დამატებითი პროექტი 10 194 104 ევროს (დღგ-ს გარეშე) ოდენობით, იმ ღონისძიებებისთვის, რომლებიც არ ფინანსდება სესხიდან, მაგრამ პროექტის პარალელურად უნდა განხორციელდეს.

ყველა დროის „აქილევსის ქუსლს“ – მიწისქვეშა კომუნიკაციებს გრიბოედოვისა და ჭავჭავაძის ქუჩების კვეთაში – კი, ვერც ქალაქის ამჟამინდელი მთავრობა გადაურჩა. ეს მონაკვეთი (სასტუმრო ლ-ბაკურსა და რესპუბლიკური საავადმყოფოს მიმდებარედ) 2015 წელს კიდევ ერთხელ გადაითხრება, რის გამოც შარშან მერიამ აქ ახალი ასფალტის საფარი არ დააგო. ხელახლა გადათხრის მიზეზი მრავალგზის შეკეთებული საკანალიზაციო სისტემაა, რომელიც, სხვათა შორის ბოლოს, ამავე პროექტის ფარგლებში შეკეთდა „კაპიტალურად“. ეს საკანალიზაციო მილები აქ კვლავ შესაცვლელია, რასაც ამჯერად „ფაიფერი და გზა“ გრაფიკის მიხედვით, მიმდინარე წელს, დეკემბერში დაიწყებს და 2016 წლის მარტამდე უნდა დაასრულოს.

„გმირთა ხეივნის“ განვითარების კონცეფცია

მინისტრის ინფორმაციით, გმირთა ხეივნის ტერიტორიის ფართობი 3 ჰექტარია (იუსტიციის სახლიდან ე.წ. ბათუმის კარიბჭემდე და მიმდებარე ტერიტორია). ტერიტორია 14 საინვესტიციო მიწის ნაკვეთად არის დაყოფილი, რომლის ათვისება ორ ეტაპად განხორციელდება.

კონცეფციის მიხედვით, შენობის მაქსიმალური სიმაღლე 140, ხოლო მინიმალური 30 მეტრი უნდა იყოს.

მინისტრის თქმით, რადგან ბათუმში „გართობის მხრივ მოვიკოჭლებთ, საჭიროა მეტი გასართობი ობიექტი ტურისტებისთვის“. ამიტომ გმირთა ხეივნის ტერიტორიაზე სასტუმროების, აპარტამენტების, რესტორნების გარდა, სხვადასხვა გასართობი ობიექტისა და სპორტული ცენტრის განთავსებაც იქნება შესაძლებელი. გმირთა ხეივნის განვითარების კონცეფციის მიზანი საინვესტიციო გარემოს გაუმჯობესება, ბიზნესის/ტურიზმის ხელშეწყობა, სამუშაო ადგილების შექმნა და ქალაქის ინფრასტრუქტურის განვითარებაა.

მინისტრმა რეგიონში დაგეგმილ მსხვილ საინვესტიციო პროექტებზეც წარუდგინა ინფორმაცია საზოგადოებას. მან ახალ პროექტებთან ერთად ჩამოთვალა ის პროექტებიც, რომელთა განხორციელებაც წინა მთავრობის დროს დაიწყო.

მინისტრის ინფორმაციით, „რეგიონის საინვესტიციო პორტფელის ჯამური მოცულობა 1 754 500 000 აშშ დოლარია. 2015-2020 წლებში განსახორციელებელი პროექტების ჯამური საინვესტიციო მოცულობა კი 1 251 800 000 აშშ დოლარი იქნება. იმავე პროექტებიდან კი, მხოლოდ 2015 წელს განსახორციელებელი ინვესტიციის მოცულობა 366 200 000 აშშ დოლარი იქნება. განხორციელებული ინვესტიციის მოცულობა კი, 502 700 000 აშშ დოლარია.

ურნები პოლიეთილენის, ქაღალდისა და შუშისათვის ბათუმის ბულვარში

მიუხედავად იმისა, რომ ნაგავი სანდასუფთავების სამსახურს სპეციალური ტექნიკით არ გააქვს და აჭარაში არც ნაგვის გადამამუშავებელი საწარმოა, სადაც ქაღალდს, პოლიეთილენსა და შუშას ცალ-ცალკე გადაამუშავებენ, ბულვარის ადმინისტრაციის ხელმძღვანელი, გიორგი ზირაქაშვილი ამბობს, რომ მათი გადაწყვეტილება, სპეციალური სანაგვე ურნების შეძენის თაობაზე, მომავალზეა გათვლილი.

„ამ ეტაპზე 100 ურნა დავალაგეთ ბულვარის ტერიტორიაზე, თუმცა სულ ასეთი 200 ურნა იქნება ბათუმის ბულვარში. ჩვენ გვინდა, რომ ადამიანები მიეჩვიონ იმ აზრს, რომ სამომავლოდ იქნება ასეთი ცვლილებები და როგორც ევროპაშია, ისე მოვიქცეთ საქართველოში“ – ამბობს გიორგი ზირაქაშვილი.

ბათუმის ბულვარმა ახალი სანაგვე ურნების შესაძენად 121 ათასი ლარი დახარჯა.

კონსულტაციები კლინიკა “ინ ვიტროში”

გინეკოლოგიური პრობლემები;

ორსულთა მართვა;

ჰორმონალური დისბალანსი;

მოზარდთა რეპროდუქტოლოგია (მენსტრუალური ციკლის დარღვევა, ჭარბი ან შემცირებული გათმიანება და გამონაყარი).

მსურველები უნდა ჩაეწერონ წინასწარ.

ტელ: +995 32 215 77 77

მისამართი: ბათუმი, გორგასლის (ყოფილი ცხაკაიას) ქუჩა, #159 ბ, მეოთხე სართული (სისხლის ბანკის გვერდით).

პოლიციამ სარფში, ავტობუსის ფარულ სამალავში ადამიანები აღმოაჩინა

შს სამინისტროს ინფორმაციით, გიორგი ც-ს თავის მფლობელობაში არსებული, “ფორდ-ტრანზიტი”-ს მარკის მიკროავტობუსის სახურავში მოწყობილი ჰქონდა სპეციალური სამალავი, რომლის საშუალებითაც საზღვარზე მოქალაქეების უკანონოდ გადაყვანას ცდილობდა. სამართალდამცველებმა მიკროავტობუსის დათვალიერებისას აღმოჩინეს ფარული სამალავი, მასში დამალული ნაირა ა. და ფერუზა კ, რომლებიც ფარულად, უკანონოდ ცდილობდნენ თურქეთის ტერიტორიაზე გადასვლას.

გამოძიება გიორგი ც-ს მიმართ საქართველოს სახელმწიფო საზღვარზე მიგრანტის უკანონო გადაყვანის (საქართველოს სსკ-ის 344-ე მუხლის პრიმა მე-2 ნაწილის „ა“ ქვეპუნქტით), ხოლო ნაირა ა-ს და ფერუზა კ-ს მიმართ საქართველოს სახელმწიფო საზღვრის უკანონოდ გადაკვეთის მცდელობის ფაქტებზე მიმდინარეობს (საქართველოს სსკ-ის 19-344-ე მუხლის მე-2 ნაწილის ა ქვეპუნქტით).

ბათუმში მაშველებმა ორი ადამიანი გადაარჩინეს

შინაგან საქმეთა სამინისტროს საგანგებო სიტუაციების მართვის სააგენტოს მაშველებმა მოქალაქეები შავი ზღვიდან უვნებლად გამოიყვანეს. ინფორმაციას ამის შესახებ უწყება ავრცელებს.

გენდერული საუბრები

ღონისძიების მიზანი არჩევნებში ჩართული მხარეების, მათ შორის მოსახლეობის გენდერული თანასწორობისა და ქალთა პოლიტიკურად გაძლიერების მექანიზმების და მნიშვნელობის შესახებ ინფორმირებაა.

ქალი პოლიტიკოსების და სტუდენტების დისკუსია ბათუმის უნივერსიტეტშიბათუმის უნივერსიტეტშიც გაიმართა დღეს.

ღონისძიება იმართება პროექტის „ერთად გენდერული თანასწორობისათვის“ ფარგლებში, რომელსაც ახორციელებს „ჟურნალისტთა ქსელი გენდერული თანასწორობისათვის“ „საარჩევნო სისტემების განვითარების, რეფორმებისა და სწავლების ცენტრის“ (ცესკოს)მხარდაჭერით.

კავკასიური სახლი სტუდენტებისთვის ესეების კონკურსს აცხადებს

საკონკურსო თემებია:

უკრაინისა და საქართველოს გზა ევროპული ინტეგრაციისკენ: მსგავსებები და განსხვავებები

როგორ იცვლება რუსული რბილი ძალა სამხრეთ კავკასიაში უკრაინის კრიზისის ფონზე?

ევრომაიდანის გავლენა სამხრეთ კავკასიის ქვეყნების შიდა პოლიტიკაზე

ანალიტიკური ესეების კონკურსში მონაწილეობის მიღების შესაძლებლობა აქვთ საქართველოს სახელმწიფო და კერძო უნივერსიტეტების ბაკალავრიატის მეოთხე კურსის სტუდენტებს, მაგისტრანტებსა და დოქტორანტებს.
ანალიტიკური ესე შესრულებული უნდა იყოს ქართულ ენაზე. ნაშრომის მოცულობა წყაროების ჩათვლით არ უნდა აღემატებოდეს 2500 სიტყვას. ნაშრომის ბოლოს მითითებული უნდა იყოს ავტორის სახელი, გვარი, უნივერსიტეტი, სწავლის საფეხური და საკონტაქტო ინფორმაცია.

სტატია უნდა იყოს დაწერილი ექსკლუზიურად კონკურსის ფარგლებშიმ პლაგიატის შემთხვევაში ნაშრომი არ განიხილება.

„კულტურულ ურთიერთობათა ცენტრი – კავკასიური სახლი“ შეაფასებს და გამოავლენს 2 საუკეთესო ესეს.
გამარჯვებული ესეების ავტორებს გადეცემათ ჰონორარი 100 -100 გირვანქა სტერლინგის ოდენობით.

ესეების მიღების ბოლო ვადაა 7 მაისი

ნაშრომების შეფასების კრიტერიუმები:

თეზისის ჩამოყალიბება;
შინაარსობრივი და ენობრივი გამართულობა;
ფაქტობრივი საიმედოობა;
არგუმენტირება;
ავტორის ანალიზი

ინფორმაცია დაწვრილებით იხილეთ კავკასიური სახლის ვებგვერდზე.

სტაჟირება უცხოეთში – შანსი აჭარაში მცხოვრები ახალგაზრდა მეცნიერებისთვის

კვალიფიკაციის ამაღლების პროგრამა საშუალებას იძლევა სტაჟირება ევროკავშირის წევრი ქვეყნების, ამერიკის შეერთებული შტატების, კანადის წამყვან უნივერსიტეტებში ან სამეცნიერო-კვლევით და ხელოვნების ცენტრებში გაიაროთ.

„უმაღლესი განათლების ხელშეწყობის“ პროგრამას აჭარის განათლების სამინისტრო ახორციელებს. სტაჟირების პროგრამაში მონაწილეებს კონკურსის საფუძველზე შეარჩევენ. პროგრამის ბიუჯეტი 15 000 ლარია. მიმდინარე წელს სამ ახალგაზრდა მეცნიერს მიეცემა შანსი სტაჟირება საზღვარგარეთ გაიაროს. სამინისტრო თანადაფინანსების პრინციპით, თითოეულს 5 000 ლარით დააფინანსებს.

პროგრამაში მონაწილე მეცნიერები 45 წლამდე ასაკის უნდა იყვნენ. ასაკობრივი შეზღუდვის დაწესების მიზეზს სამინისტროში ასე ხსნიან:

„პროგრამის მიზანი გახლავთ ახალგაზრდა მეცნიერთა ხელშეწყობა. ახალგაზრდა მეცნიერში იგულისხმება სტუდენტი, რომელმაც დაამთავრა მაგისტრის ან დოქტორის საფეხური და სურს სამეცნიერო სივრცეში ინტეგრირება, რაც რთული და ხანგრძლივი პროცედურაა, რომლის თანმდევი პროცესია სამეცნიერო სტატიების ბეჭდვა მაღალ რეიტინგულ ჟურნალ-გაზეთებში, სამეცნიერო ღონისძიებებში მონაწილეობა და ა.შ. რასაც ადგილობრივი აკადემიური პერსონალი მოკლებულია, თუნდაც მატერიალური კუთხის გათვალისწინებით. სწორედ ამიტომ სამინისტრო ცდილობს ხელი შეუწყოს მათ აკადემიურ და პროფესიულ განვითარებას,“ – ამბობს აჭარის განათლების, კულტურისა და სპორტის სამინისტროს სასკოლო კლუბების კოორდინატორი ნინო ნაკაშიძე.

კონკურსი ყველა დაინტერესებული პირისთვის ღიაა. აპლიკანტებმა სამინისტროში შემდეგი დოკუმენტაცია უნდა წარადგინონ: განცხადება, შევსებული სააპლიკაციო ფორმა, ავტობიოგრაფია, პირადობის დამადასტურებელი დოკუმენტის ასლი, ცნობა რეგისტრაციის ადგილის შესახებ, განათლების დამადასტურებელი დოკუმენტის ასლი, მაგისტრის დიპლომის ასლი (დამამთავრებელი კურსის დოქტორანტი), ცნობა უმაღლესი საგანმანათლებლო დაწესებულებიდან სადოქტორო პროგრამაზე სწავლის შესახებ/დოქტორის აკადემიური ხარისხის დამადასტურებელი დოკუმენტის ასლი, ორი სარეკომენდაციო წერილი – რეკომენდატორების საკონტაქტო ინფორმაციის მითითებით.

ასევე პროგრამაში მონაწილეობისთვის მნიშვნელოვანი მოწვევა. უცხოეთის მიმღები საგანმანათლებლო დასეწებულების/სამეცნიერო-კვლევითი და ხელოვნების ცენტრის მიერ გაცემული დოკუმენტი, რომელიც აპლიკანტს უფლებას აძლევს, აღნიშნულ დაწესებულებაში სტაჟირება გაიაროს.

სტაჟირების პროგრამა ორ ეტაპად ხორციელდება. შესაბამისად, აპლიკანტს შეუძლია განაცხადი სხვადასხვა დროს შეიტანოს. პირველი ეტაპის საბუთების მიღება პირველ მაისამდეა, შერჩეული აპლიკანტი სტაჟირებას ივნის-აგვისტოში გაივლის. მეორე ეტაპი პირველ აგვისტომდეა. აპლიკანტებს საშუალება ექნებათ უცხოურ საგანმანათლებლო დაწესებულებებში სტაჟირება სექტემბერ-დეკემბერში გაიარონ.

აპლიკანტების შერჩევის დროს ყურადღება მიექცევა აპლიკანტის კვალიფიკაციას, ეროვნულ ან საერთაშორისო პროექტებში მონაწილეობას, სამოტივაციო წერილს და პროფესიულ საქმიანობას.

სოლიდარობა ასურელ ქრისტიანებს – აქცია ბათუმში

აქციის ერთ-ერთი ორგანიზატორის, ლაშა ადამიას თქმით, ბათუმში აქცია ამავე დღეს თბილისში გამართული აქციის პარალელურად გაიმართება და აქციას ბათუმში მცხოვრები მუსლიმებიც შეუერთდებიან.

„ეს არ არის ორგანიზაციებისა და პარტიების მიერ ორგანიზებული აქცია, ესაა მოქალაქეების სოლიდარობის აქცია. კადრები, რაც ვრცელდება, შემაძრწუნებელია ყველა ადამიანისთვის. სიცოცხლის უფლება არის მთავარი ღირებულება და მონაპოვარი ადამიანების და 21-ე საუკუნეში ეს უფლება ვერ ხორციელდება. ჩვენ უკვე გამოგვეხმაურნენ არა მარტო მართლმადიდებლური მრწამსის მქონე ადამიანები, არამედ მუსლიმებიც, რომლებიც სოლიდარობის აქციას შემოუერთდებიან და გმობენ იმ ძალადობას, იმ სისასტიკეს, რაც ხდება იქ. რელიგიური ნიშნით არ უნდა მოხდეს ადამიანების დისკრიმინაცია“ – აღნიშნა ლაშა ადამიამ.

“მე და უნივერსიტეტი” – დისკუსია ღია ცის ქვეშ [ანონსი]

მომხსენებლები: ბათუმის სახელმწიფო უნივერსიტეტის რექტორის მოვალეობის შემსრულებელი მერაბ ხალვაში.
ბათუმის სახელმწიფო უნივერსიტეტის სტუდენტი ანა პატარაია.

მოდერატორი: ბათუმის სახელმწიფო უნივერსიტეტის მესამე კურსის სტუდენტი სალომე ფუტკარაძე.

უნივერსიტეტის რექტორის მოვალეობის შემსრულებელი მერაბ ხალვაში აქცენტებს გააკეთებს უნივერსიტეტის როლზე – რა გავლენას ახდენს უნივერსიტეტის სტუდენტების ცხოვრებაში, რის შეცვლას აპირებს ახალი რექტორი… სტუდენტი ანა პატარაია ისაუბრებს იმ მოლოდინებზე, რომელიც სტუდენტებს უნივერსიტეტის მიმართ გააჩნიათ, რას ელოდებიან სტუდენტები უნივერსიტეტში ჩაბარების დროს და რა შედეგს იღებენ ისინი სტუდენტობისას.

დისკუსია მომზადდა „თავისუფალ ჟურნალისტთა სახლის“ პროექტის ფარგლებში – „ახალგაზრდებში დემოკრატიული იდეების პოპულარიზაცია“. პროექტი ხორციელდება „დემოკრატიის მხარდამჭერი ნაციონალური ფონდის“ (NED) მხარდაჭერით.